မင်သခင်မ။

"မီညောင်..."

ကြောင်ဝိညာဉ်သည် အသက်မဲ့ပြီး ကြောက်မက်ဖွယ်ကောင်းသော မျက်လုံးများဖြင့် ဟိုဟိုဒီဒီ သွားလာရင်း တစ်စုံတစ်ခုကို ရှာဖွေနေပုံရသည်။

ပေါ့ပါးစွာ ခုန်ပျံလိုက်သည်နှင့် တပြိုင်နက်၊ ဝဲပျံနေသော အေးစက်သည့် လေပြင်းများကို လှုံဆော်လိုက်ပြီး၊ မင်မိသားစု၏ ပင်မအဆောင်များဆီသို့ တည့်တည့် ဦးတည်သွားသည်။

ချူလျန်တစ်ယောက် ၎င်းကို ဆက်လက် ရှေ့ဆက်ခွင့် မပြုသည်နိုင်မှာ သေချာပေသည်။ အကယ်၍ ဤမျှ ပြင်းထန်သော အငြိုးအတေးရှိသည့် သတ္တဝါကို ဤလောကတွင် ဆက်ရှိနေခွင့် ပေးလိုက်ပါက၊ လူများကို သေချာပေါက် ဒုက္ခပေးပေလိမ့်မည်။

"ဓားထိန်းချုပ်နည်းစနစ်... အသက်ဝင်စမ်း"

ချူလျန်သည် ဓားကို ကောင်းကင်သို့ ချိန်လိုက်ရာ၊ ဓားပျံသည် စီးဆင်းနေသော အလင်းတန်းတစ်ခုအဖြစ် ပြောင်းလဲသွားပြီး လျင်မြန်စွာ ပျံသန်းသွားတော့သည်။

"ညောင်... ဝှောင်..."

ဓားအလင်းတန်း ပျံထွက်သွားသည်နှင့် တပြိုင်နက်၊ ကြောင်မိစ္ဆာသည် ထူးဆန်းသော အော်သံတစ်ခု ပြုလုပ်လိုက်သည်။

၎င်းသည် ထူးဆန်းသော မျက်လုံးများဖြင့် ချူလျန်ကို စိုက်ကြည့်လိုက်ပြီး၊ အနက်ရောင် အရိပ်တစ်ခုအဖြစ် လျင်မြန်စွာ ပြောင်းလဲကာ ဓားပျံကို ရှောင်တိမ်းလိုက်သည်။ ထို့နောက် နောက်လှည့်ပြီး ချူလျန်ထံသို့ ခုန်အုပ်လိုက်တော့သည်။

ချူလျန်၏ တိုက်ခိုက်မှုကို လက်တုံ့ပြန်သည့် အနေဖြင့်၊ ကြောင်ဝိညာဉ်သည် ပြင်းထန်သော သွေးဆာမှု အရှိန်အဝါများနှင့်အတူ လျင်မြန်ပြီး ကြမ်းတမ်းသော တိုက်ခိုက်မှုကို စတင်လိုက်သည်။ ၎င်းသည် ရန်လိုပြီး မရပ်မနား တိုက်ခိုက်နေတော့သည်။

ချူလျန် လျှပ်စီးကဲ့သို့ လျင်မြန်စွာ ရှောင်တိမ်းလိုက်ပြီး ခုန်အုပ်မှုကို ကပ်သီးလေး လွတ်မြောက်သွားသော်လည်း၊ သူ၏ အဝတ်အစားတွင် စုတ်ပြဲရာတစ်ခု ဖြစ်ပေါ်သွားသည်။

ကြောင်ဝိညာဉ်၏ ခန္ဓာကိုယ်သည် မြေကြီးပေါ်သို့ ကျရောက်သွားပြီး၊ မျက်နှာပြင်ကို ကုတ်ခြစ်လိုက်သဖြင့် သွေးစွန်းကြောင်း နှစ်ခု ကျန်ရစ်ခဲ့သည်။

သို့သော် ဓားအလင်းတန်း တစ်ခုသည် မိစ္ဆာကို အမီလိုက်နိုင်ခဲ့ပြီ ဖြစ်သည်။ ယင်းသည် ချူလျန်၏ ဓားပျံပင် ဖြစ်ချေသည်။

ရွှစ်...

ဓားအလင်းတန်းသည် လျင်မြန်စွာ ဖြတ်သန်းသွားသော်လည်း၊ ကြောင်ဝိညာဉ်၏ ခန္ဓာကိုယ်သည် ထူးဆန်းသော ထောင့်ချိုးပုံစံတစ်ခုဖြင့် လိမ်တွန့်သွားပြီး၊ သေစေနိုင်သော တိုက်ခိုက်မှုကို ကပ်သီးလေး ရှောင်တိမ်းသွားသည်။

"မီ... ညောင်..."

ကြောင်သည် ရှောင်တိမ်းနိုင်ခဲ့သော်လည်း၊ လုံးဝ လွတ်မြောက်ခြင်း မရှိခဲ့ပေ။

ဓားအလင်းတန်းသည် ကြောင်ဝိညာဉ်အပေါ်တွင် နက်ရှိုင်းသော ဒဏ်ရာတစ်ခု ချန်ထားရစ်ခဲ့သည်။

တစ်ခဏချင်းတွင် ဒဏ်ရာမှ မည်းနက်သော သွေးများ ပန်းထွက်လာပြီး၊ ကြောင်ဝိညာဉ်၏ ပတ်လည်ရှိ သွေးဆာမှု အရှိန်အဝါများကို ပိုမို ပြင်းထန်လာစေသည်။

‘မကောင်းတော့ဘူး’

ချူလျန် မျက်မှောင်ကြုတ်လိုက်မိသည်။

သတ္တဝါ အမျိုးမျိုး ပေါင်းစပ်ထားသော ဤထူးခြားသည့် ကြောင်ဝိညာဉ်သည် ကလေးဝိညာဉ်၏ စရိုက်လက္ခဏာများကိုလည်း ပိုင်ဆိုင်ထားသည်။

၎င်းရရှိသော မည်သည့် ဒဏ်ရာကိုမဆို တိုက်ခိုက်ရေး စွမ်းအားအဖြစ် ပြောင်းလဲနိုင်ပြီး၊ ပိုမိုကြီးမားသော ပျက်စီးမှုကို ပေးစွမ်းနိုင်သော စွမ်းရည်ဖြင့် ပိုမို အစွမ်းထက်လာစေနိုင်သည်။

အကယ်၍ တစ်ချက်တည်း အသေသတ်နိုင်ခြင်း မရှိပါက၊ ပြိုင်ဘက်သည် ပိုမို အစွမ်းထက်သော ရန်သူကို ရင်ဆိုင်ရန် ပြင်ဆင်ထားသင့်သည်။

ဤအကျိုးသက်ရောက်မှုသည် ကြောင်၏ တိုးပွားလာသော အမြန်နှုန်းတွင် ချက်ချင်းပင် မြင်သာပေသည်။

ရွှီ...

မမြင်နိုင်သော အနက်ရောင် အလင်းတန်းတစ်ခုကဲ့သို့၊ ၎င်းသည် မျက်စိတစ်မှိတ်အတွင်း ချူလျန်၏ နောက်ကျောဘက်တွင် ပြန်လည် ပေါ်ထွက်လာပြီး၊ လျှပ်စီးကဲ့သို့ မြန်ဆန်သော နောက်ခံအရိပ်နှစ်ခုကို ချန်ထားခဲ့သည်။

ချူလျန် လျင်မြန်စွာ တုံ့ပြန်လိုက်ပြီး၊ ဓားပျံကို သူ၏ လက်ထဲသို့ ပြန်လည် ဆင့်ခေါ်လိုက်သော်လည်း၊ နောက်ကျောဘက်မှ ကျရောက်လာမည့် တိုက်ခိုက်မှုကို ကာကွယ်ရန် နည်းလမ်း မရှိတော့ပေ။

သူ၏ ဆံပင်များ ထောင်မတ်သွားသည်။ မည်သည့်အသံမျှမကြားရသော်လည်း ကြောင်ဝိညာဉ်၏ ထက်မြသော ခြေသည်းများဖြင့် ရိုက်ခတ်တော့မည်ကို သူ သိရှိနေသည်။

အချိန်မီလေးမှာပင်၊ ချူလျန်၏ ညာလက် ရုတ်တရက် ပြေလျော့သွာပြီး သူ အော်ဟစ်လိုက်သည်။

"တုတ်နှောင်လိုက်စမ်း"

စိတ်ဝိညာဉ်မြွေတစ်ကောင်ကဲ့သို့ အနီရောင် အလင်းတန်းတစ်ခုသည် သူ၏ အင်္ကျီလက်စထဲမှ ပျံထွက်သွားပြီး၊ ချူလျန်၏ နောက်ကျောကို တိုက်ခိုက်ရန် ပြင်နေသော ကြောင်ဝိညာဉ်ကို ချက်ချင်း ချည်နှောင်လိုက်သည်။

လိပ်ခွံပုံစံ ချည်နှောင်နည်း…

မိစ္ဆာချုပ်ကြိုး…

"မီးညောင်... ဂရား..." ကြောင်ဝိညာဉ်သည် နာကျင်စွာ အော်ဟစ်လိုက်သော်လည်း၊ ၎င်း၏ ခန္ဓာကိုယ်သည် မထိန်းချုပ်နိုင်ဘဲ မြေကြီးပေါ်သို့ ပြုတ်ကျသွားတော့သည်။

အလွန် လျင်မြန်သော ရန်သူကို ကိုင်တွယ်ရာတွင် အထိရောက်ဆုံး နည်းလမ်းမှာ အဘယ်နည်း…။

လှုပ်ရှားမှုကို ကန့်သတ်နိုင်သော ကိရိယာပင် ဖြစ်သည်မဟုတ်ပါလော…။

ချူလျန်သည် တိုက်ဆိုင်စွာပင် လွန်ခဲ့သော နှစ်ရက်ကမှ မိစ္ဆာချုပ်ကြိုးကို ရရှိထားခြင်း ဖြစ်သည်။

မှော်ဝင်ပစ္စည်း ရှိနေသော်လည်း၊ ပစ်မှတ်ကို သေချာပေါက် ထိမှန်မည်ဟု အာမခံချက် မရှိပေ။ ထို့ကြောင့် သူသည် မိစ္ဆာချုပ်ကြိုးကို အနီးကပ် အသုံးပြုနိုင်ရန်အတွက်၊ ကြောင်ဝိညာဉ်၏ ချဉ်းကပ်လာခြင်းကို ရည်ရွယ်ချက်ရှိရှိ ခွင့်ပြုလိုက်သည့် အန္တရာယ်များသော လှုပ်ရှားမှုကို ပြုလုပ်ခဲ့ခြင်းပင် ဖြစ်သည်။

အကယ်၍ သူ မိစ္ဆာချုပ်ကြိုးကို ပစ်လွှတ်လိုက်သည့် အရှိန်သည် အနည်းငယ် နှေးကွေးသွားပါက၊ ဤတိုက်ပွဲ၏ ရလဒ်သည် လုံးဝ ကွာခြားသွားပေလိမ့်မည်။

သူ၏ စိတ်ရှည်သည်းခံမှုသာ မရှိခဲ့လျှင်၊ သို့မဟုတ် အကွာအဝေးသည် လုံလောက်အောင် မနီးကပ်ခဲ့လျှင်မူ၊ ကြောင်သည် မိစ္ဆာချုပ်ကြိုးကို အလွယ်တကူ ရှောင်တိမ်းသွားပေလိမ့်မည်။

မည်သို့ပင်ဖြစ်စေ၊ သူ အနိုင်ရရှိခဲ့ပြီ ဖြစ်သည်။

ခန္ဓာကိုယ်ကို ပေါ့ပေါ့ပါးပါး လှည့်လိုက်ပြီး၊ ယုံကြည်မှုရှိရှိ လက်ဝှေ့ယမ်းလိုက်ရာ၊ ဓားသည် မြှောက်တက်သွားပြီး ပြန်ကျလာသည်။

တစ်ချက်တည်း ခုတ်ပိုင်းလိုက်ရုံဖြင့်၊ မိစ္ဆာခမျာ သေဆုံးသွားလေသည်။

ဝိညာဉ်တွင် ပုံသဏ္ဌာန် မရှိပေ။ မိစ္ဆာသတ္တဝါ သေဆုံးသွားသည်နှင့် တစ်ပြိုင်နက်၊ ရွှေရောင် ပုံရိပ်ယောင်တစ်ခုမှလွဲ၍ ဘာမျှ ကျန်ရစ်ခြင်း မရှိတော့ပေ။ ၎င်းသည် တောက်ပစွာဖြင့် ချူလျန်၏ ခန္ဓာကိုယ်ပေါ်သို့ ကျရောက်လာသည်။

ဖုန်မှုန့်များ ငြိမ်သက်သွားသည်နှင့် တစ်ပြိုင်နက်၊ အခြေအနေသည်လည်း ပြီးဆုံးသွားလေသည်။

တိုတောင်းသော်လည်း အန္တရာယ်များသော တိုက်ပွဲတစ်ခု ဖြစ်ခဲ့ပေသည်။

လွန်ခဲ့သော တစ်ရက်က သူ ကြုံတွေ့ခဲ့ရသော ပင့်ကူမိစ္ဆာနှင့် နှိုင်းယှဉ်လျှင်၊ သတ္တဝါအမျိုးမျိုး ပေါင်းစပ်ထားသော ဤကြောင်ဝိညာဉ်သည် ပိုမို ကြောက်မက်ဖွယ်ကောင်းသော ပြိုင်ဘက်တစ်ဦး ဖြစ်ကြောင်း သက်သေပြခဲ့သည်။

သူ အသက်ပြင်းပြင်း ရှူလိုက်သည်။

မင်မိသားစုကို အသိမပေးရသေးမီမှာပင်၊ လမ်းကြောင်းတစ်ခုမှ အလျင်အမြန် လျှောက်လှမ်းလာသော ခြေသံများကို ကြားလိုက်ရသည်။

အရာရှိမင် ဦးဆောင်သော မင်မိသားစု အစေခံတစ်စု ပြေးထွက်လာကြသည်။

"အိုး... သူရဲကောင်းလေးချူက တကယ်ကို စွမ်းအားကြီးတာပဲ…"

"သူရဲကောင်းလေးချူ အောင်မြင်မယ်ဆိုတာ ကျုပ် အစောကြီးကတည်းက သံသယ မရှိပါဘူး..."

"သူရဲကောင်းလေးချူရဲ့ စွမ်းရည်တွေက တကယ့်ကို မှတ်သားလောက်ပါပေတယ်... အဲဒီ မကောင်းဆိုးဝါးကို တိုက်ကွက်နည်းနည်းနဲ့တင် သတ်ပစ်လိုက်နိုင်တာပဲ.."

"..."

“..”

“.’

လေထုထဲတွင် လူတိုင်း၏ မြှောက်ပင့်စကားများ ပြည့်နှက်နေတော့သည်။

အောင်ပွဲခံနေသော ဤလူအုပ်ကြီးကို ကြည့်ရင်း၊ သူတို့၏ ရုတ်တရက် ပျောက်ကွယ်သွားခြင်းနှင့် ပြန်လည် ပေါ်ထွက်လာခြင်းတို့တွင် မည်မျှ ကျွမ်းကျင်ကြောင်း ချူလျန်တစ်ယောက် ပါးစပ်အ‌ဟောင်းသားနှင့် အံ့အားသင့်နေမိတော့သည်။

...

နောက်တစ်နေ့ နံနက်ခင်း….

တစ်ညလုံး အပြည့်အဝ အနားယူပြီးနောက်၊ ချူလျန်တစ်ယောက် လန်းဆန်းတက်ကြွစွာ နိုးထလာသည်။

မျက်နှာသစ်ပြီးသောအခါ၊ အစေခံတစ်ဦး ရောက်ရှိလာပြီး သူရဲကောင်းလေးချူ၏ အောင်ပွဲကို ဂုဏ်ပြုရန်အတွက် အရာရှိမင်က ဂုဏ်ပြုစားပွဲတစ်ခု ပြင်ဆင်ထားကြောင်း သတင်းပို့လေသည်။

"ခဏနေရင် လာခဲ့ပါ့မယ်..." ချူလျန်က နူးညံ့သိမ်မွေ့သော လေသံဖြင့် ပြန်ဖြေလိုက်သည်။

ထို့နောက် သူသည် အိမ်နောက်ဖေးနှင့် ဝရန်တာတစ်လျှောက် အေးဆေးစွာ လမ်းလျှောက်သွားပြီးနောက်၊ ခမ်းနားထည်ဝါသော တံခါးပေါက်တစ်ခု ရှေ့တွင် ရပ်တန့်လိုက်သည်။

ယင်း၏ နောက်ကွယ်တွင် အရာရှိမင်နှင့် သခင်မဖြစ်သူတို့၏ အိပ်ခန်း ရှိနေချေသည်။

ဒေါက်... ဒေါက်...

ချူလျန် တံခါးခေါက်လိုက်သည်။

"ဘယ်သူလဲ..." အတွင်းဘက်မှ နူးညံ့သိမ်မွေ့သော အသံတစ်ခုက မေးလိုက်သည်။

"ချူလျန်ပါ... သခင်မ နေမကောင်းဘူးလို့ ကြားလို့... ဂါရဝပြုဖို့ လာတာပါ..." သူ ပြန်ဖြေလိုက်သည်။

ခေတ္တမျှ တိတ်ဆိတ်သွားပြီးနောက် အတွင်းဘက်မှ အမျိုးသမီးအသံ ထွက်ပေါ်လာသည်။

"အာ... ရှုတောင်ဂိုဏ်းက သူရဲကောင်းလေးချူပါလား... ရှင်ရဲ့ စေတနာကို ကျေးဇူးတင်ပါတယ်... ဒါပေမဲ့ ကျွန်မက လောလောဆယ် ဧည့်သည်တွေကို ဧည့်ခံနိုင်တဲ့ အခြေအနေ မဟုတ်လို့ပါ... ကျေးဇူးပြုပြီး ပြန်ပါတော့..."

အရာရှိမင်း၏ နွေးထွေးမှုနှင့် လုံးဝ ဆန့်ကျင်ဘက် အနေဖြင့်၊ သခင်မမင်၏ အသံသည် သူစိမ်းဆန်စွာ အေးစက်နေချေသည်။

"ကျွန်တော့်မှာ သခင်မရဲ့ ရောဂါဝေဒနာကို ကူညီပေးနိုင်မယ့် ရှုတောင်ဂိုဏ်းက အထူးနည်းလမ်းတစ်ခု ရှိပါတယ်... သခင်မ အဆင်သင့် ဖြစ်တဲ့အထိ ကျွန်တော် ဒီမှာပဲ စောင့်နေပါ့မယ်..."

ခေတ္တမျှ ရပ်တန့်သွားပြီးနောက်၊ ခြေသံများ တရှပ်ရှပ်မြည်ကာ၊ ကျွီကနဲ တံခါးဖွင့်သံ ထွက်ပေါ်လာသည်။

သခင်မမင် ထွက်ပေါ်လာချေပြီ။ သူမ၏ မျက်နှာတွင် ပင်ပန်းနွမ်းနယ်မှု အရိပ်အယောင်များ ရှိနေသည်။

သူမသည် အလှအပမချယ်သထားဘဲ၊ ရိုးရှင်းသော အိမ်နေရင်းဝတ်ရုံကိုသာ ဝတ်ဆင်ထားသည်။

သို့သော်ငြား သူမ၏ အသားအရေသည် ဖြူဖွေးနေဆဲ ဖြစ်ပြီး၊ သူမ၏ သွင်ပြင်လက္ခဏာများသည် နူးညံ့သိမ်မွေ့စွာ လှပနေဆဲ ဖြစ်သည်။

သူမ၏ အရှိန်အဝါသည် အမှန်တကယ်ပင် ဆွဲဆောင်မှု ရှိလှသည်။

သူမသည် ချူလျန်ကို ခေါက်လိုက်ကာရှေ့ရှိ ထိုင်ခုံတစ်ခုဆီသို့ ခေါ်ဆောင်သွားသည်။

အခန်းက မှောင်နေသဖြင့်၊ သူမသည် အနီရောင် ဖယောင်းတိုင်တစ်တိုင်ကို ထွန်းညှိလိုက်ပြီး လက်ဖက်ရည် နှစ်ခွက်ငှဲ့ကာ ပြောလိုက်သည်။

"ကျွန်မ လန့်သွားရုံပါပဲ... မနေ့ညက သူရဲကောင်းလေးချူ အဲဒီသတ္တဝါကို နှိမ်နင်းလိုက်ပြီဆိုတော့... မနက်ဖြန်ကျရင် အပြည့်အဝ ပြန်ကောင်းသွားမှာပါ... ရှင် ထပ်ပြီး စိတ်ပူစရာ မလိုပါဘူး..."

"ကောင်းပါပြီ..." ချူလျန် ခေါင်းညိတ်လိုက်သည်။ "ဒါပေမဲ့... ကျွန်တော် မနေ့ညက ကြောင်ဝိညာဉ် ကိစ္စကို ဆွေးနွေးချင်လို့ပါ..."

"အို..." သခင်မမင် မျက်မှောင်ကြုတ်လိုက်ပြီး မေးလိုက်သည်။ "သူရဲကောင်းလေးချူ... ဘာကို ဆွေးနွေးချင်တာလဲ..."

"ဒါက ခန့်မှန်းချက် တစ်ခုပါ..." ချူလျန် ဖြည်းညှင်းစွာ ရှင်းပြလိုက်သည်။

"မနေ့ညက အဲဒီ ကြောင်ဝိညာဉ် ရှိနေတာက တော်တော် ထူးဆန်းတယ်... အဲဒါက ကလဲ့စားဝိညာဉ်.. မိစ္ဆာဝိညာဉ်နဲ့ ကလေးဝိညာဉ်တို့ ပေါင်းစပ်ထားတဲ့ အရာတစ်ခုပဲ... ဒီထူးခြားမှုက ကျွန်တော့်ရဲ့ စူးစမ်းလိုစိတ်ကို နှိုးဆွပေးတယ်... ဘယ်အရာကများ သူ့ကို ခင်ဗျားတို့ရဲ့ စံအိမ်ဆီ ဆွဲဆောင်ခဲ့တာလဲလို့ ကျွန်တော် တွေးမိတယ်လေ..."

"မကောင်းဆိုးဝါးတွေ ဆိုတာ လူတွေကို ဒုက္ခပေးဖို့ပဲလေ... အကြောင်းပြချက် လိုလို့လား..." သခင်မမင် ပြန်ပြောလိုက်သည်။

"လိုတာပေါ့... တကယ်လို့ ကလဲ့စားဝိညာဉ်ဆိုရင်... သူ့အသက်ကို နှုတ်ယူခဲ့တဲ့ လူကို အရင်ဆုံး ရှာဖွေမှာပဲ... တကယ်လို့ ကလေးဝိညာဉ် ဆိုရင်... သူ့အမေကို အရင်ဆုံး ရှာဖွေမှာပဲ..." ချူလျန် ပြောလိုက်သည်။

"ဒါပေမဲ့... ဒီကြောင်ဝိညာဉ်က မင်မိသားစု အိမ်ထဲမှာ (၃)ရက်ဆက်တိုက် ပုန်းအောင်းနေခဲ့တာတောင်... ဘယ်သူ့ကိုမှ ဒုက္ခမပေးခဲ့ဘူး... သူက တစ်စုံတစ်ရာကို ရှာဖွေနေသလိုပဲ..."

"ဘာကို ရှာဖွေနေတာလဲ..." သခင်မမင် မေးလိုက်ရင်း၊ သူမ၏ မျက်လုံးများတွင် ရန်လိုမှု အရိပ်အယောင်များ လက်ခနဲ ဖြစ်ပေါ်သွားသည်။

"အရာရှိမင် ပြောတာတော့... ခင်ဗျားတို့ မိသားစုက ဘိုးစဉ်ဘောင်ဆက် ကောင်းမှုကုသိုလ်တွေ လုပ်ခဲ့ကြတယ်တဲ့... ခင်ဗျားတို့ မိသားစုက တိရစ္ဆာန်တွေကို ဘယ်တော့မှ ညှဉ်းပန်းနှိပ်စက်ပြီး ထိခိုက်အောင် လုပ်မှာ မဟုတ်ဘူး... ဒါဆိုရင်... အဲဒီသတ္တဝါက သူ့အမေကို ရှာနေတာများလား... သူက မိစ္ဆာဝိညာဉ်တစ်ကောင်လေ... သူ့အမေကလည်း မိစ္ဆာများ ဖြစ်နေနိုင်မလား..."

"အဲဒီ ကြောင်ဝိညာဉ် ပေါ်လာကတည်းက... ခင်ဗျားက... မင်မိသားစုအိမ်ထဲမှာ အပြင်မထွက်ရဲတဲ့ တစ်ဦးတည်းသောသူ ဖြစ်နေသလိုပဲ..." ချူလျန်သည် သခင်မမင်ကို နူးညံ့သော အကြည့်ဖြင့် ကြည့်ရင်း ပြောလိုက်သည်။

သခင်မမင် နှာခေါင်းရှုံ့လိုက်ပြီး မေးလိုက်သည်။ "ဟမ့်… သူရဲကောင်းလေးချူ... ရှင်က ကျွန်မကို မိစ္ဆာလို့ ပြောချင်တာလား..."

"ကျွန်တော်တို့ စမ်းသပ်ကြည့်လိုက်ရင် အဖြေပေါ်သွားမှာပါ..." ချူလျန် ပြန်ဖြေလိုက်သည်။

"ရှင့်မှာ မိစ္ဆာဖော်ကြေးမုံ ရှိလို့လား..." သခင်မမင်သည် သံသယဖြစ်နေပုံဖြင့် မျက်ခုံးပင့်ကာ ပြောလိုက်သည်။

မိစ္ဆာသတ္တဝါတစ်ကောင်၏ မူလသဏ္ဌာန်ကို ခွဲခြားသိမြင်ရန်အတွက်...

ပုံမှန်အားဖြင့်၊ မိစ္ဆာကိုယ်တိုင်က မိစ္ဆာအရှိန်အဝါများ ထုတ်လွှတ်စေမည့် မိစ္ဆာသိုင်းကွက်များကို လိုလိုလားလား အသုံးပြုမှသာ၊

သို့မဟုတ် အထူး တန်ခိုးစွမ်းရည်များကို အသုံးပြုမှသာ သိရှိနိုင်ပေသည်။

သို့သော်၊ ချူလျန်၏ ကျင့်ကြံခြင်း အဆင့်သည် တန်ခိုးစွမ်းရည်များကို အသုံးပြုနိုင်လောက်အောင် မမြင့်မားသေးပေ။

ထိုသို့ မဟုတ်ပါက အထူး မှော်ဝင်ပစ္စည်းများ လိုအပ်ပြီး၊ အထင်ရှားဆုံးမှာ မိစ္ဆာဖော်ကြေးမုံပင် ဖြစ်သည်။

သို့သော်လည်း မိစ္ဆာဖော်ကြေးမုံများသည် အလွန် ရှားပါးလှသည်။

ကောလာဟလများအရ လူ့လောက၏ နန်းတော်တွင် တစ်ချပ်နှင့်၊ ဗုဒ္ဓဘာသာ တိမ်တိုက်ကျောင်းတိုက်တွင် တစ်ချပ် ရှိသည်ဟု ဆိုကြသည်။

ရှုတောင်ဂိုဏ်းတွင်လည်း တစ်ချပ် ရှိသော်လည်း၊ အထက်လူကြီးများသည် ဂျူနီယာတပည့် တစ်ဦးအား ကြေးမုံကို တောင်အောက်သို့ ယူဆောင်ခွင့် ပြုပါမည်လော။

ထို့ကြောင့် ချူလျန်တွင် မိစ္ဆာဖော်ကြေးမုံ အမှန်တကယ် ရှိ၊ မရှိ ဆိုသည့် မေးခွန်းသည် သံသယဖြစ်ဖွယ် ကျန်ရစ်နေသည်။

"မရှိပါဘူး..." ချူလျန် ခေါင်းခါရင်း ပြန်ဖြေလိုက်သည်။ "ဒါပေမဲ့ အဲဒါနဲ့ နည်းနည်းနီးစပ်တာတော့ ရှိပါတယ်..."