အခန်း (၂၅၉-၂၆၀)

အခန်း (၂၅၉)။

"ဘာ….။ မင်းက ငါ့ကို စိန်ခေါ်ချင်တာလား။"

သူမအား တာအိုပညာ အနည်းငယ် ကစားကြည့်လိုကြောင်း ဟုန်ယွိက ပြောသည်ကို ကြားလိုက်ရသည့်အခါ တိုင်ရှန်တာအိုဂိုဏ်း၏ သူတော်စင် မိန်းမပျိုဖြစ်သည့်အပြင်၊ မျိုးဆက်သစ် တာအိုပညာရှင်များထဲတွင် ထိပ်တန်းပုဂ္ဂိုလ်တစ်ဦးဖြစ်သည့် ဆုမူသည် အနည်းငယ် အံ့ဩသွားလေသည်။ ထို့နောက် သူမသည် မရှင်းမလင်း ကြားလိုက်ရသည့်အလား ထပ်မံအတည်ပြုလိုဟန်နှင့်အတူ လှောင်ပြောင်လိုသော လေသံဖြင့် ထပ်မံ မေးခွန်း ထုတ်လိုက်ပါသည်။

"မှန်သည်။" ဟုန်ယွိက ပြတ်သားပြီး ခိုင်မာသော လေသံဖြင့် ပြောလိုက်သည်၊ "တိုင်ရှန်တာအိုဂိုဏ်း က ချန်ပီယံမြို့စားကို ထီးနန်းသိမ်းပိုက်နိုင်ဖို့ ထောက်ခံမှာဆိုတော့, တစ်ကမ္ဘာလုံးရဲ့ ပြစ်တင်ရှုတ်ချတာကိုတောင် ဂရုမစိုက်ဘဲ ဒီလို စကားမျိုး ပြောရဲတဲ့ သူတော်စင် မိန်းမပျိုရဲ့ စွမ်းရည်ကို ကျွန်တော် တကယ်ပဲ မြင်ချင်မိတယ်။ ဒါ့အပြင်၊ ကျွန်တော် ဟုန်ယွိဟာ နက်နဲတဲ့ တာအိုပညာရပ်တွေကို ကျင့်ကြံထားသူ တစ်ယောက်ပါ။ ကျွန်တော်ရဲ့ စိတ်ဝိညာဉ် စွမ်းအားက အဆုံးမဲ့တယ်လို့ မပြောရဲပေမယ့် ကမ္ဘာကြီးကိုတော့ လွှမ်းမိုးနိုင်စွမ်း ရှိပါတယ်။ ခင်ဗျားက ကျွန်တော့်ကို စည်းစိမ်ချမ်းသာအတွက် လမ်းညွှန်ပေးမယ်ဆိုတဲ့ လေသံမျိုးနဲ့ ချန်ပီယံမြို့စားနဲ့ ပူးပေါင်းဖို့ ပြောရဲတာလား။ အဲဒီကောင်စုတ်လေးကို ကျွန်တော် တစ်ခါမှ မမြင်ခဲ့ဖူးတာ မဟုတ်ဘူး။ ယွန်နိုင်ငံမှာ ကျွန်တော့် သူ့ကို အပြည့်အဝ ဖိနှိပ်နိုင်ခဲ့ပြီးသား။ ဘယ်လောက် ရယ်စရာကောင်းလိုက်လဲ။ ဒီလိုလူမျိုးကို တိုင်ရှန်တာအိုဂိုဏ်းက စစ်မှန်တဲ့ ကောင်းကင်ဘုံရဲ့ သားတော်တစ်ပါး အဖြစ် ရွေးချယ်လိုက်တယ်။ တိုင်ရှန်တာအိုဂိုဏ်းက အမြင် သိပ်မကျယ်ဘူး ထင်တယ်။ မဟုတ်ရင် အရင်တုန်းက ဟုန်ရွှန်ကျိလို နှလုံးသားကင်းမဲ့တဲ့လူမျိုးကို ဘယ်လိုလုပ် ရွေးချယ်ခဲ့မှာလဲ။"

"လာပါ၊ ဆုမူ။ ခင်ဗျားရဲ့ တာအိုပညာ ဘယ်လောက် အစွမ်းထက်လဲဆိုတာ ကျွန်တော့်ကို ပြပါဦး။ ခင်ဗျား တကယ်ပဲ နိုင်ငံတော်ရဲ့ နတ်ဘုရားလက်နက်ကို ထိန်းချုပ်ပြီး ဧကရာဇ်ကို ဖယ်ရှားနိုင်သလား။ တကယ်လို့, ခင်ဗျားသာ ကျွန်တော်ကို အနိုင်ယူနိုင်ရင်၊ ကျွန်တော် ချန်ပီယံမြို့စားနဲ့ ပူးပေါင်းပြီး သူ့အင်အားကို တိုးတက်အောင်လုပ်ပေးဖို့ မဖြစ်နိုင်တာ မဟုတ်ဘူး။"

ဟုန်ယွိသည် စကားဆုံးသည်နှင့် ဟက်ဟက်ပက်ပက် ကျယ်လောင်စွာ ရယ်မောလိုက်ပါသည်။

သူ၏ အရိုင်းဆန်ဆန် ရယ်မောသံသည် တိမ်တိုက်များကို ဖောက်ထွင်းသွားသည်။ ကောင်းကင်ယံရှိ မှောင်မဲနေသော တိမ်တိုက်အများအပြားသည် လွင့်စင်သွားသကဲ့သို့ ကြယ်များ ပိုမို ထင်ရှားလာပါသည်။

ဟုန်ယွိသည် တိုင်ရှန်တာအိုဂိုဏ်းက တော်ဝင်ချန် အင်ပါယာတရားရုံးကို ကိုင်တွယ်ဖြေရှင်းမည့် အကြောင်းနှင့် ထီးနန်းလုပွဲအတွက် လှည့်ကွက်များ အသုံးပြု၍ တော်ဝင်ချန် တရားရုံးကို ရှုပ်ထွေးအောင် လုပ်ဆောင်ရန် ကြိုးပမ်းမည်ဖြစ်ကြောင်း ကြိုတင်သိရှိထားသည်။

သို့သော် တိုင်ရှန်တာအိုဂိုဏ်းက ချန်ပီယံမြို့စားကို စစ်မှန်သော ကောင်းကင်ဘုံ၏သားတော်တစ်ပါးအဖြစ် အမှန်တကယ် ရွေးချယ်လိမ့်မည်ဟု သူ တစ်ခါမှ မမျှော်လင့်ခဲ့ဖူးပေ။

ချန်ပီယံမြို့စားသည် တရားမဝင်သားတစ်ဦး ဖြစ်သော်လည်း၊ သူသည် မင်းသားတစ်ပါး၏ မြေးဖြစ်ပြီး နဂါးသွေးမျိုးဆက်ကို ပိုင်ဆိုင်ထားဆဲ ဖြစ်သည်။ သို့သော် တရားရုံးရှိ အရာရှိများနှင့် အရပ်ဘက်၊ စစ်ဘက်အရာရှိများ၏ အမြင်တွင် တရားမဝင်သားသည် တရားမဝင်သားသာ ဖြစ်ပြီး လူအများရှေ့တွင် ထွက်ပေါ်နိုင်ခြင်း မရှိပေ။ တော်ဝင်ချန် ဧကရာဇ် ယန်ပန်၏ သားများအားလုံး သေဆုံးသွားလျှင်ပင် တော်ဝင်မိသားစုထဲမှ အခြား ထီးနန်းဆက်ခံသူကိုသာ ရွေးချယ်ရမည် ဖြစ်ပြီး၊ ချန်ပီယံမြို့စား၏ အလှည့်ကို လုံးဝ ရောက်လာမည် မဟုတ်ပေ။

၎င်းသည် ထောင်စုနှစ်ပေါင်းများစွာကတည်းက တည်မြဲလာခဲ့သော အမှန်တရားတစ်ခုဟု ဆိုနိုင်ပါသည်။

ပို၍ အရေးကြီးသည်မှာ ချန်ပီယံမြို့စားသည် ဟုန်ယွိနှင့် ရန်ငြိုးရှိနေသည်။ ထို့အပြင် ထိုသူသည် ချန်ယင်းရှာကို ရည်ရွယ်ချက်ရှိနေသည်။ ဟုန်ယွိ သည် ချန်ပီယံမြို့စားအား ရန်သူအဖြစ် ကြာမြင့်စွာကတည်းက သတ်မှတ်ထားပြီးဖြစ်ရာ အဘယ်ကြောင့် သူ့လက်အောက်ကို ခိုလှုံရမည်နည်း။

သို့သော်လည်း ယခုအခါ တိုင်ရှန်တာအိုဂိုဏ်းက ချန်ပီယံမြို့စားကို ထောက်ခံရန် ဆုံးဖြတ်လိုက်ပြီ။ မိုနိုဂိုတာရီသည် ကမ္ဘာ့နံပါတ်တစ် ပုဂ္ဂိုလ်ဟူသည့် ဂုဏ်ပုဒ်ကို ပိုင်ဆိုင်ထားပါသည်။ ချန်ပီယံမြို့စားသည် ထီးနန်းဆက်ခံရသည်ဖြစ်စေ, မရသည်ဖြစ်စေ သူ၏ အင်အားသည် အလွန်အမင်း တိုးတက်လာလိမ့်မည်။

ထိုမျှ ကြီးမားသော အင်အားဖြင့်ဆိုလျှင် ဟုန်ရွှန်ကျိပင်လျှင် တော်ဝင်တရားရုံး၌ သူတို့နှင့် ယှဉ်ပြိုင်ရန် ခက်ခဲပေလိမ့်မည်။

ဟုန်ယွိသည် တိုင်ရှန်တာအိုဂိုဏ်းက ချန်ပီယံမြို့စားကို ထောက်ခံသည့် အချိန်မှစ၍ ထိုလူငယ်သည် တော်ဝင်ချန် တရားရုံး၌ အစွမ်းအထက်ဆုံး အရာရှိတစ်ဦး ဖြစ်လာပြီဆိုသည်ကို သိလိုက်ပါပြီ။

"ဒီချန်ပီယံမြို့စားက ဘာလို့ ဒီလောက်တောင် ကံကောင်းနေရတာလဲ။ သူ့လက်အောက်မှာ ကျွမ်းကျင်သူ အများအပြား ရှိရုံသာမက ကမ္ဘာပေါ်ရှိ မဟာနတ်ဆိုးအင်မော်တယ်ရှစ်ပါးထဲ တစ်ပါးအပါဝင်ဖြစ်တဲ့ နတ်လင်းယုန်ဘုရင်တောင် သူ့ဆီမှာ ခိုလှုံတယ်။ အခုဆိုရင် တိုင်ရှန်တာအိုဂိုဏ်းရဲ့ ထောက်ခံမှုကိုတောင် ရသွားပြန်ပြီ။။ ခုနက ဆုမူ ပြောစကားအရဆို, တိုင်ရှန်တာအိုဂိုဏ်းရဲ့ ဂိုဏ်းခေါင်းဆောင် မိုနိုဂိုတာရီက ချန်ပီယံမြို့စားနဲ့ စကားပြောဆိုပြီးပြီတဲ့။ ဒါ ဘယ်တုန်းက ဖြစ်သွားတာလဲ။ တောရိုင်းဒေသမှာများလား။ ဖြစ်နိုင်တယ်။ သူတော်စင် တူယွမ်ကို ကိုင်တွယ် ဖြေရှင်းနေတုန်းက ချန်ပီယံမြို့စားဟာ ပေါ်မလာခဲ့ဘူး။ သူ မိုနိုဂိုတာရီကို သွားတွေ့နေတာ ဖြစ်နိုင်တယ်။ တောရိုင်းဒေသမှာ ငါက အသက်စွန့်ပြီး၊ စကြာဝဠာအိတ်ကို ရယူခဲ့တယ်။။ ဒီလူကတော့ မိုနိုဂိုတာရီနဲ့ တွေ့ပြီး သူ့ရဲ့ ထောက်ခံမှုကို ရယူလိုက်တယ်။ ဒီလို ကံကောင်းခြင်းမျိုးက အရမ်း ကြီးမားလွန်းတယ်။ ဒါပေမယ့် သူက လူငယ် သိုင်းသူတော်စင်အဖြစ် အရမ်း နာမည်ကြီးတယ်။ မိုနိုဂိုတာရီလိုမျိုး မြင့်မြတ်တဲ့ ပုဂ္ဂိုလ်မျိုးက သူ့ကို အချိန်ကြာမြင့်စွာ ကတည်းက သတိထားမိမှာ သေချာပါတယ်။"

ဟုန်ယွိ၏ နှလုံးသားထဲတွင် ထူးဆန်းသော ခံစားချက်တစ်ခု ပေါ်လာသည်။

မိုနိုဂိုတာရီသည် ချန်ပီယံမြို့စားကို သတိပြုမိခြင်းမှာ သဘာဝကျပါသည်။ ချန်ပီယံမြို့စားသည် အလွန်တရာ ထင်ရှားကျော်ကြားသူ ဖြစ်သည်။

ဟုန်ယွိသည် တိုင်ရှန်တာအိုဂိုဏ်း၏ ထောက်ခံမှုကို ဂရုမစိုက်သလို၊ ဟုန်ရွှန်ကျိကို ကိုင်တွယ်ဖြေရှင်းရန်အတွက် တိုင်ရှန်တာအိုဂိုဏ်း၏ စွမ်းအားကိုလည်း အသုံးမပြုလိုပေ။ သူ့မိခင်၏ တရားမျှတမှုအတွက် ဟုန်ရွှန်ကျိနှင့် မဒမ်ကျောက်တို့ထံမှ သူကိုယ်တိုင် တောင်းဆိုမည် ဖြစ်သည်။

သို့သော်, ယခုအခါ တိုင်ရှန်တာအိုဂိုဏ်းက ဟုန်ယွိနှင့် ရန်ငြိုးရှိသူတစ်ဦးအား ထောက်ခံလိုက်သည့်အတွက် ဟုန်ယွိသည် သတိထားရတော့မည် ဖြစ်သည်။

တိုင်ရှန်တာအိုဂိုဏ်း၏ သူတော်စင် မိန်းမပျို ဆုမူက သူ့အား ချန်ပီယံမြို့စားထံ ခိုလှုံရန် စည်းရုံးနေပြီး "စည်းစိမ်ချမ်းသာကို လမ်းညွှန်ပေးမည်" ဟူသော စေတနာ့ဝန်ထမ်းသဖွယ် လေသံဖြင့် ပြောဆိုခဲ့ခြင်းက ဟုန်ယွိကို ပို၍ပင် သည်းမခံနိုင်အောင် ဖြစ်သွားစေခဲ့သည်။

ဟုန်ယွိသည် အေးဆေးတည်ငြိမ်ပြီး ကြီးမြတ်သည့် စိတ်ခံစားချက်ကင်းမဲ့သော တာအိုကို ကျင့်ကြံထားသူ မဟုတ်ပေ။ ဆုမူ၏ လုပ်ရပ်များ၊ လေသံနှင့် သဘောထားများအားလုံးက သူ့အား အလွန် စိတ်အနှောင့်အယှက် ဖြစ်စေခဲ့သည်။ သူ၏အတွေးများသည် ရှင်းလင်းမှု မရှိတော့ဘဲ သူ့စိတ်ထဲမှ မကျေနပ်မှုများကို ဖြေဖျောက်ရန် တိုက်ခိုက်ခြင်းကိုသာ ရွေးချယ်ခဲ့ရသည်။

"ကျွန်တော့်ရဲ့ လက်ရှိ ကျင့်စဉ်အဆင့်က တာအိုပညာမှာဆို ပထမတန်းစား ကျွမ်းကျင်သူအဖြစ် သတ်မှတ်နိုင်တယ်။ သူတော်စင် တူယွမ်က မိုနိုဂိုတာရီကို လိုက်လံရှာဖွေဖို့ အရည်ချင်း ရှိတယ်ဆိုရင် ကျွန်တော်လည်း မိုနိုဂိုတာရီကို လိုက်လံရှာဖွေဖို့ အရည်ချင်း ရှိတယ်။ ဆုမူ၊ ဆုမူ၊ ဒီနေ့ ခင်ဗျား ဘယ်လောက် အစွမ်းထက်လဲဆိုတာ ကျွန်တော့်ကို ပြပါဦး။ ဒီကမ္ဘာကြီးမှာ ခင်ဗျားထက်သာတဲ့သူ အမြဲရှိနေတယ်ဆိုတာ ခင်ဗျားကို သိစေရမယ်..."

ဟုန်ယွိသည် စိတ်ထဲမှာ တွေးတောရင်း ပြောလိုက်ပါသည်။

သူတော်စင် တူယွမ်သည် မိုနိုဂိုတာရီကို လိုက်လံရှာဖွေဖို့ အရည်ချင်း ရှိသည်။ ဟုန်ယွိ၏ လက်ရှိ ကျင့်စဉ်အဆင့်သည် သူတော်စင် တူယွမ်ထက် အားနည်းခြင်း မရှိပေ။ ထို့ကြောင့် သူသည်လည်း မိုနိုဂိုတာရီကို လိုက်လံရှာဖွေဖို့ အရည်ချင်းရှိသည်မှာ သဘာဝကျပါသည်။

ဤသို့ တွေးတောလိုက်သည့်အခါ ဟုန်ယွိသည် နှစ်ပေါင်းတစ်ထောင်သက်တမ်းရှိသော ဂိုဏ်းတစ်ခုဖြစ်သည့်အပြင်၊ မြင့်မြတ်သောနယ်မြေများ၏ ခေါင်းဆောင်ဖြစ်သည့် တိုင်ရှန်တာအိုဂိုဏ်းကို သိပ်ပြီး ကြောက်ရွံ့ခြင်း မရှိတော့ပေ။

သူ စိတ်မပျော်မရွှင် ဖြစ်ပါက တိုက်ခိုက်မည် ဖြစ်သည်။ ၎င်းသည် မှန်ကန်ပြီး သင့်လျော်သည်။

“အော်, မင်းက ချန်ပီယံမြို့စားနဲ့ တွေ့ပြီးပြီလား။ စိတ်ဝင်စားစရာပဲ။ မင်း ငါနဲ့ တိုက်ချင်တယ်ဆိုရင် လာခဲ့ပါ။ စီနီယာအစ်မ ပိုင်ယွင်ရဲ့သားက ဘယ်အဆင့်အထိ ကျင့်ကြံထားလဲဆိုတာ ငါ့ကို ပြစမ်းပါဦး။"

ဆုမူသည် ဟုန်ယွိ၏ စကားကို ကြားသော်လည်း လုံးဝ စိတ်မဆိုးပေ။ သူမ၏ အသံသည် ပန်းခြံထဲတွင် လမ်းလျှောက်၍ လရောင်အောက်၌ စကားပြောနေသကဲ့သို့ အေးဆေးတည်ငြိမ်နေဆဲ ဖြစ်သည်။

"အနန္တတန်ခိုးရှင် ကောင်းကင်နဂါးဗောဓိသတ္တ၊ ဗုဒ္ဓအားလုံးရဲ့ လျှို့ဝှက်ရတနာ၊ နဂါးဆင် တံဆိပ်၊ တောင်များရွှေ့လျားပြီး၊ ပင်လယ်ရေများ ပြည့်လျှံစေ..." ဟုန်ယွိသည် စကားကြောရှည်ပြီး၊ အချိန်မဖြုန်းလိုတော့ပေ။ သူသည် ထာဝရမိခင်နှင့် တိုက်ခိုက်ရသည်ကို အားမရသေးချေ။

ပြင်းထန်သော ရွတ်ဆိုသံများကြားတွင် အနန္တတန်ခိုးရှင် ကောင်းကင်နဂါးဗောဓိသတ္တသည် လေဟာနယ်မှ ခုန်ထွက်လာပြီး လက်သီးဖြင့် ဆုမူကို တိုက်ခိုက်လိုက်သည်။

"အနန္တတန်ခိုးရှင် ကောင်းကင်နဂါး ဗောဓိသတ္တကျမ်းလား။ မင်းရဲ့ နောက်ကွယ်မှာ ရွှေပင့်ကူဘုရင် ရှိနေတာကိုး။" ဆုမူက ပြုံးလိုက်ပါသည်၊ "မကြာသေးခင်က ရွှေပင့်ကူဘုရင်ဟာ ဒိုင်ဇင်ဘုရားကျောင်းရဲ့ လျှို့ဝှက်ကျမ်းစာကို ရရှိခဲ့ပြီး၊ အဲဒီကျမ်းကလည်း အဓိကကျမ်းစာ သုံးခုထဲက အမြင့်ဆုံး လျှို့ဝှက်ကျမ်းစာဖြစ်တဲ့ အတိတ်အမိတ္တဘကျမ်း ဖြစ်ပုံရတယ်လို့ ကောလာဟလတွေ ထွက်လာခဲ့တယ်။ တောရိုင်းဒေသက တိုက်ပွဲအတွင်းမှာ သူဟာ သူတော်စင် တူယွမ်ကို လျှို့ဝှက် တိုက်ခိုက်ပြီး စကြာဝဠာအိတ်ကို လုယူခဲ့တယ်။ မင်းလည်း သူ့ဆီကနေ အကျိုးခံစားရမှာ သေချာတယ်။ ဒါကြောင့်လည်း မင်းက နတ်ဘုရားစွမ်းရည်ကို ကျင့်ကြံနိုင်ခဲ့တာပေါ့။ မင်းက ဖြောင့်မတ်ခြင်းတရားကို ပြောဆိုနေပေမယ့် ရိုရန်နိုင်ငံတော်က ပညာရှင်တစ်ယောက်နဲ့ လျှို့ဝှက် ပူးပေါင်းနေတာကတော့ သိပ်ပြီး ဂုဏ်သိက္ခာရှိပုံ မပေါ်ဘူး။ ဟုတ်ပါတယ်လေ၊ ပညာရှင်တွေ အားလုံးကလည်း ဒီလိုပါပဲ။ အပြောတစ်မျိုး အလုပ်တစ်မျိုး လုပ်နေကြတာပါပဲ။ ဟုန်ယွိ၊ မင်း ရွှေပင့်ကူဘုရင်ရဲ့ စွမ်းအားအနည်းငယ်လောက်နဲ့ အရာအားလုံးကို အထင်သေးနိုင်ပြီလို့ ထင်နေတာလား။"

သူမ စကားပြောနေစဉ် ဆုမူ၏ မျက်လုံးများက လင်းလက်သွားခဲ့ပြီး သူမ၏ မျက်ခုံးနှစ်ခုကြားမှ ယန်လေပြင်း တစ်ချက် တိုက်ခတ်သွားသည်။ မျက်စိတစ်မှိတ်အတွင်းမှာပင် အစိမ်းရောင် အလင်းတန်းတစ်ခု ထွက်ပေါ်လာခဲ့ပြီး၊ ခေါင်းလောင်းကြီး တစ်လုံးအဖြစ် ပြောင်းလဲသွားခဲ့သည်။

ထိုခေါင်းလောင်းကြီးသည် အတော်လေး ရှေးကျပုံရပြီး ကြေးဝါဖြင့် ပြုလုပ်ထားပုံရပါသည်။ ခေါင်းလောင်းကြီး ထွက်ပေါ်လာသည်နှင့် ချက်ချင်းပင် အချိန်၏ စီးဆင်းမှုကို ပြောင်းပြန်လှန်နိုင်သည့် နတ်ဘုရား လက်နက်တစ်ခုကဲ့သို့ လေးလံပြီး၊ ကျယ်ပြန့်သော၊ ခိုင်မာသော ခံစားချက်ကို ပေးစွမ်းခဲ့သည်။

သို့သော် ဤခေါင်းလောင်းသည် ရုပ်ဝတ္ထုပစ္စည်း မဟုတ်ဘဲ ဆုမူ၏ စိတ်ဝိညာဉ်မှ ပုံဖော်ထားသော စိတ်ကူးပုံရိပ်တစ်ခုသာ ဖြစ်ပါသည်။

“ဒါက တိုင်ရှန်တာအိုဂိုဏ်းရဲ့ တာအိုပညာ စိတ်ကူးပုံဖော်မှုပဲ။ တာအိုသခင်လည်း မဟုတ်သလို၊ စိတ်ဝိညာဉ်လည်း မဟုတ်ဘူး။ ခေါင်းလောင်းကြီးပုံစံ လက်နက်တစ်ခုပဲ။" ဟုန်ယွိသည် ခေါင်းလောင်းကြီးကို မြင်လိုက်ရသည့်အခါ ချက်ချင်းဆိုသလို အကြီးအကျယ် တုန်လှုပ်သွားခဲ့သည်။

သူ၏မျက်လုံးများတွင် ဤခေါင်းလောင်းကြီး၌ လေးလံပြီး ကျယ်ပြန့်သော စွမ်းအင်များ ရှိနေရုံသာမကဘဲ၊ ဤခေါင်းလောင်းကြီးပေါ်တွင် ရွေ့လျားနေသော စာလုံးများစွာလည်း ရှိနေပြီး၊ ထိုစာလုံးများသည် ပို၍ပင် လျှို့ဝှက်ဆန်းကြယ်၍ ခန့်မှန်းရခက်သည်။

ဟုန်ယွိသည် ထိုဖားလောင်းများကဲ့သို့ စာလုံးများကို ဖတ်၍ မရသော်လည်း သူ၏ အလိုလိုအသိစိတ်အရ, ထိုစာလုံးတစ်ခုချင်းစီတွင် လေးနက်သော အဓိပ္ပာယ်များ ပါဝင်နေသည်ကို ခံစားမိသည်။

ထိုစာလုံးများသည် ခေါင်းလောင်းကြီးပေါ်တွင် ရှေးခေတ်နှင့် ယခုခေတ်ကာလကို ဖြတ်သန်းသွားလာနေသကဲ့သို့ အလွှာလိုက် အလွှာလိုက် ရွေ့လျားနေသည်။ ခေါင်းလောင်းကြီး ပေါ်လာသည်နှင့် ချက်ချင်းပင် သာယာနာပျော်ဖွယ်ကောင်းသော အသံသည် ဟုန်ယွိ၏ နားထဲတွင် ပဲ့တင်ထပ်လာခဲ့သည်။ ရွေ့လျားနေသော ဖားလောင်းများကဲ့သို့ စာလုံးများသည်လည်း ဟုန်ယွိကို လေဟာနယ်ထဲသို့ ခေါ်ဆောင်သွားသကဲ့သို့ ဖြစ်နေသည်။

အချိန်ကြာမြင့်စွာ ကုန်လွန်သွားသကဲ့သို့ ခံစားရသလို, စက္ကန့်ပိုင်းလေးသာ ကြာသွားသည်ဟုလည်း ခံစားရပြန်သည်။ ဟုန်ယွိ၏ စိတ်သည် ခေါင်းလောင်းသံနှင့် စာလုံးများကြောင့် လုံးဝ ဖိနှိပ်ခံလိုက်ရသကဲ့သို့ ဖြစ်သွားခဲ့သည်။

သူသည် လှုပ်ရှားနိုင်စွမ်း မရှိ၊ တွေးတောနိုင်စွမ်း မရှိသလို စိတ်ကူးပင် မယဉ်နိုင်တော့ပေ။ သူ၏ အတွေးများပင် လှုပ်ရှား၍ မရတော့သကဲ့သို့ ခံစားလာရသည်။

တစ်ချိန်တည်းမှာပင် အစက ကြောက်မက်ဖွယ်ကောင်းပြီး ဒေါသပေါက်ကွဲနေကာ၊ လေပြင်းများကို ဖြစ်ပေါ်စေပြီး၊ ဆုမူကို ချက်ချင်းပင် အစိတ်စိတ် အမြွှာမြွှာ ကြေမွသွားစေနိုင်သည့် လက်သီးတစ်ချက် ပစ်သွင်းလိုက်သော အနန္တတန်ခိုးရှင် ကောင်းကင်နဂါးဗောဓိသတ္တသည်လည်း ဘုရားကျောင်း ထဲရှိ သစ်သားဗောဓိသတ္တရုပ်တုကဲ့သို့ အေးခဲသွားပြီး ရပ်တန့်သွားခဲ့သည်။

"ဒိုင်ဇင်ဘုရားကျောင်းမှာ အဓိကကျမ်းစာ သုံးခု ရှိတယ်၊ အဲဒီကျမ်းတွေကတော့ အတိတ်အမိတ္တဘကျမ်း၊ ပစ္စုပ္ပန်ကမ္ဘာဗုဒ္ဓကျမ်းနဲ့ အသက်မဲ့ အနာဂတ်ကျမ်းတို့ပဲ။ အတိတ်၊ ပစ္စုပ္ပန်၊ အနာဂတ်ရဲ့ အဓိကကျမ်းစာ သုံးခုက အကြီးမြတ်ဆုံး တာအိုကို ပြသနေတယ်။ ကံမကောင်းစွာနဲ့ပဲ အဲဒီဘုန်းတော်ကြီးတွေ မသိတာက အတိတ်ပဲဖြစ်ဖြစ်၊ ပစ္စုပ္ပန်ပဲဖြစ်ဖြစ်၊ အနာဂတ်ပဲဖြစ်ဖြစ်၊ အချိန်တစ်ခုဖြစ်တယ်ဆိုတာပဲ။ ကောင်းကင်နဲ့ မြေကြီးရဲ့ အရပ်လေးမျက်နှာကို စကြာဝဠာလို့ ခေါ်ပြီး ရှေးခေတ်ကတည်းက စကြာဝဠာလို့ သိထားကြတယ်။ ကောင်းကင်နဲ့ မြေကြီးရဲ့ အတိတ်၊ ပစ္စုပ္ပန်၊ အနာဂတ်ဆိုတာလည်း စကြာဝဠာပဲ ဖြစ်တယ်။ ငါတို့ တိုင်ရှန်တာအိုဂိုဏ်းရဲ့ တာအိုပညာ က အချိန်ရဲ့ နိယာမတွေကို ပြသနေပြီး ထာဝရခေါင်းလောင်းက အတိတ်ကို ဖိနှိပ်နိုင်တယ်။ ဒိုင်ဇင်ဘုရားကျောင်းက ဘုန်းတော်ကြီးတွေရဲ့ ဒီလိုအသေးဖွဲ့တာအိုပညာနဲ့ ဘယ်လိုလုပ် ယှဉ်နိုင်မှာလဲ။"

ဟုန်ယွိ ပုံဖော်ထားသော အနန္တတန်ခိုးရှင် ကောင်းကင်နဂါးဗောဓိသတ္တသည် လှုပ်ရှား၍ မရဘဲ သစ်သားရုပ်သေးရုပ်ကဲ့သို့ အေးခဲသွားစဉ်, ဆုမူ၏ သိမ်မွေ့သော အသံက ဟုန်ယွိ၏ နားထဲသို့ ရောက်ရှိလာခဲ့သည်။

"တိုင်ရှန်တာအိုဂိုဏ်းရဲ့ တာအိုပညာက တကယ်ကို ထူးခြားဆန်းကြယ်တာပဲ။" ထိုအချိန်တွင် ဟုန်ယွိသည် တိုင်ရှန်တာအိုဂိုဏ်း၏ တာအိုပညာကို အဆုံးတွင် နားလည်သွားခဲ့ပါသည်။ ဆုမူ၏ အတွေးများဖြင့် ပုံဖော်ထားသော ထာဝရခေါင်းလောင်းသည် အသံမြည်လာသောအခါ သူ့အတွေးတွေကို ရပ်တန့်သွားစေပြီး သူ့စိတ်ဝိညာဉ် စွမ်းအားတောင် နှေးကွေးသွားခဲ့ရသည်။ ဤသည်မှာ အလွန်ပင် တုန်လှုပ်စရာကောင်းသည်။

တိုင်ရှန်တာအိုဂိုဏ်းသည် ဒိုင်ဇင်ဘုရားကျောင်းနှင့်အတူ တန်းတူတည်ရှိပြီး၊ နှစ်တစ်ထောင် သက်တမ်းရှိသည့် ဂိုဏ်းတစ်ခုဖြစ်သည်။ သူတို့၏ တာအိုပညာသည်လည်း ဒိုင်ဇင်ဘုရားကျောင်းနှင့် ယှဉ်နိုင်ပြီး၊ အမှန်ပင် ထူးခြားဆန်းကြယ်လှသည်။

ဟုန်ယွိသည် အတိတ်အမိတ္တဘကျမ်ကို ကျင့်ကြံပြီးနောက် ဒိုင်ဇင်ဘုရားကျောင်း၏ တာအိုပညာရပ်များကို နက်နက်ရှိုင်းရှိုင်း အထင်ကြီးလေးစားခဲ့ သည်။ သို့သော်, ယခု, သူ ဆုမူနှင့် တိုက်ခိုက်သည့်အခါ တိုင်ရှန်တာအိုဂိုဏ်း၏ ကမ္ဘာကို လှုပ်ခါစေနိုင်သော တာအိုပညာကိုလည်း ခံစားမိခဲ့သည်။

"မဆန်းပါဘူး၊ ကျောက်စိမ်းမြို့တော်မှာ တိုင်ရှန်တာအိုဂိုဏ်းက သူတော်စင် မိန်းမပျိုကို ဘယ်သူမှ မထိရဲတာ အဆန်းတော့ မဟုတ်ဘူး။ သူမက ဒီလောက် အစွမ်းထက်တဲ့ တာအိုပညာရပ်မျိုးကို ပိုင်ဆိုင်ထားတာကိုး။ သူမက အခြားသူတွေကို သတ်ဖြတ်ခြင်းမရှိဘဲ နေထိုင်တာပင် ကံကောင်း ခြင်းတစ်ရပ် ဖြစ်နေပြီ။ သူမကို ဘယ်သူက စိန်ခေါ်ရဲမှာလဲ။"

ဤအချိန်တွင် ဟုန်ယွိသည် သူ တိုင်ရှန်တာအိုဂိုဏ်း၏ သူတော်စင် မိန်းမပျိုကို လျှော့တွက်မိခဲ့ကြောင်း သိလိုက်ပါပြီ။

"ဗုဒ္ဓက ဟောတယ်၊ စိတ် အားလုံးဟာ စိတ် မဟုတ်ဘူးတဲ့။ ဒါဆို စိတ်လို့ခေါ်တဲ့အရာ ဘာလဲ။ အတိတ်ရဲ့စိတ်ကို ရယူလို့ မရသလို၊ ပစ္စုပ္ပန်ရဲ့စိတ်ကိုလည်း ရယူလို့ မရဘူး။ အနာဂတ်ရဲ့စိတ်ကိုလည်း ထိုနည်းတူ ရယူလို့ မရဘူး။ မတည်မြဲခြင်း တရားအားလုံးကိုလည်း ဓမ္မလို့ ခေါ်တယ်..."

ထာဝရခေါင်းလောင်း၏ ဖိနှိပ်မှုအောက်တွင် ဟုန်ယွိသည် သူ၏ အတွေးများ သို့မဟုတ် တာအိုပညာ များကိုပင် အသုံးပြုနိုင်ခြင်း မရှိခဲ့ပေ။ သို့သော် သူ၏ စိတ်ဝိညာဉ် စွမ်းအားသည် အလွန်မင်း ခိုင်မာသည်။ အထူးသဖြင့် နတ်ဆိုးနတ်ဘုရားသွေးကို စားသုံး၍ ရှေးဟောင်း စစ်နတ်ဘုရား၏ မဆုတ်မနစ်သော စိတ်ဆန္ဒကို နားလည်ခဲ့ပြီးနောက်တွင် ဖြစ်သည်။ ဤအရေးကြီးသော အခြေအနေတွင် သူသည် အတိတ်ကျမ်းစာ၏ နောက်ဆုံး အပိုင်းကို ရုတ်တရက် အသက်သွင်းလိုက်ပါသည်။

သူ အသက်သွင်းလိုက်သည့်အခါ သူ၏ အတွေးများသည် ပိုမို၍ ချောမွေ့လာခဲ့သည်။ အစပိုင်းတွင် စီးဆင်းနေသော ရေကဲ့သို့ ဖြစ်နေပြီး နောက်ပိုင်း တွင် ဒေါသတကြီး စီးဆင်းနေသော မြစ်တစ်စင်းကဲ့သို့ ဖြစ်သွားခဲ့သည်။

ဘန်း…။

သူ၏ အတွေးများအားလုံး အတင်းအကျပ် ဆက်သွယ်သွားပြီး လေဟာနယ်ထဲ၌ အေးခဲနေသော အနန္တတန်ခိုးရှင် ကောင်းကင်နဂါးဗောဓိသတ္တသည် ပြင်းထန်စွာ လှုပ်ရှားလာခဲ့သည်။ ထို့နောက် သူသည် ဆုမူကို လက်သီးဖြင့် ထိုးလိုက်သည်။

"ဟင်…။"

ဆုမူ၏ မျက်လုံးများက လင်းလက်သွားသည်။ ရုတ်တရက် သူမမျက်ခုံးနှစ်ခုကြားမှ အတွေးလှိုင်းတစ်ခု ပေါ်ထွက်လာသည်။ ထာဝရခေါင်းလောင်း သည် ချက်ချင်း ပျောက်ကွယ်သွားပြီး အဆင့်ကိုးဆင့်ရှိသော စေတီတော်ကြီးတစ်ဆူ တစ်ခုအဖြစ် ပြောင်းလဲသွားခဲ့သည်။ ဤအဆင့်ကိုးဆင့်ရှိသော စေတီတော်ကြီးသည် လေးထောင့်ပုံသဏ္ဌာန် ရှိသည်။ စေတီတော်ကြီး ပေါ်လာသည့် အခိုက်အတန့်၌ပင် ကမ္ဘာကြီးတစ်ခုလုံးကို လွှမ်းခြုံ၍ အဆုံးမရှိ ပြည့်နှက်သွားသကဲ့သို့ ဖြစ်နေသည်။

ဒုန်း!

စေတီတော်ကြီး ပေါ်လာသည်နှင့် ချက်ချင်းပင် ပြင်းထန်စွာ ဖိချလိုက်ပြီး အနန္တတန်ခိုးရှင် ကောင်းကင်နဂါးဗောဓိသတ္တကို ဖုန်မှုန့်အဖြစ် ချေမွပစ်သည်။ သူ၏အတွေးများသည် အရပ်လေးမျက်နှာသို့ ပေါက်ကွဲသွားခဲ့သည်။

"ကမ္ဘာကြီးရဲ့ အရပ်လေးမျက်နှာကို စကြာဝဠာလို့ ခေါ်တယ်။ ထာဝရခေါင်းလောင်းက မင်းရဲ့ အတွေးတွေကို အေးခဲအောင် မလုပ်နိုင်မှတော့၊ မင်းရဲ့ အတွေးတွေကို ဖျက်ဆီးဖို့ ဒီအနန္တစကြာဝဠာစေတီတော်ကိုပဲ အသုံးပြုနိုင်တော့မယ်။"

အနန္တတန်ခိုးရှင် ကောင်းကင်နဂါးဗောဓိသတ္တကို ဖျက်ဆီးပြီးနောက် ဆုမူသည် ဟုန်ယွိကို ကြည့်လိုက်ပါသည်။

“တိုင်ရှန်တာအိုဂိုဏ်းရဲ့ တာအိုပညာက တကယ်ကို အမြင့်ဆုံးပဲ။ 'စကြာဝဠာ'ဆိုတဲ့ စကားလုံးရဲ့ စစ်မှန်တဲ့ အဓိပ္ပာယ်ကို ထုတ်ဖော်နိုင်တယ်။ ဒါပေမယ့် ခင်ဗျား ကျွန်တော်နဲ့ ဆက်တိုက်နေရင် တခဏအတွင်းမှာ အနိုင်အရှုံးကို ဆုံးဖြတ်နိုင်မှာ မဟုတ်ဘူး။"

မမျှော်လင့်ဘဲ ဟုန်ယွိသည် ဆက်လက်တိုက်ခိုက်ခြင်း မပြုဘဲ ဆုမူကို စိုက်ကြည့်နေခဲ့သည်။

"ရှေးခေတ်ကတည်းက စကြာဝဠာဟာ အတိတ်နဲ့ ပစ္စုပ္ပန်ပဲ ဖြစ်တယ်။ အနာဂတ်ရဲ့ စိတ်နှလုံးကတော့ အမြဲ ပြောင်းလဲနေပြီး ဖမ်းဆုပ်လို့ မရဘူး။ ခင်ဗျားရဲ့ ဒီတာအိုပညာဟာ အသက်မဲ့ အနာဂတ်ကျမ်းကို တန်ပြန်ဖို့ မလုံလောက်ဘူးလို့ ကျွန်တော် ထင်တယ်။" ဟုန်ယွိက ဆက်ပြောသည်။

"မင်း ခုနက ပြသခဲ့တဲ့ ခွန်အားက ကြီးမားပြီး ငါ့ရဲ့ ထိန်းချုပ်မှုကနေ လွတ်မြောက်နိုင်ခဲ့တယ်။ ဒါက မင်း နတ်ဆိုးနတ်ဘုရားသွေးကို စားသုံးခဲ့လို့ ဖြစ်ရမယ်။ မင်းရဲ့ တာအိုပညာက ဒီလောက်အဆင့်အထိ ရောက်နေလိမ့်မယ်လို့ ငါ မမျှော်လင့်ခဲ့ဘူး။ ဒါပေမယ့် မင်းရဲ့ ခွန်အားနဲ့ဆိုရင်တောင် ဟုန်ရွှန်ကျီရဲ့ ပြိုင်ဘက် မဖြစ်နိုင်သေးဘူးလို့ ငါ ထင်တယ်။ မင်း ကောင်းကင်ဘုံသေမင်းဘီးအောက်မှာ သေဆုံးသွားမှာ ငါ ကြောက်မိတယ်။ ဒါပေမယ့် ငါ့စကားက ဒီမှာပဲ အဆုံးသတ်ပြီ။ မင်း ချန်ပီယံမြို့စားအောက် ခိုလုံတာ မခိုလုံတာ မင်းသဘောပဲ။"

ဆုမူသည် ဟုန်ယွိကို ပြန်မဖြေဘဲ ခပ်ဖျော့ဖျော့လေး ပြုံးလိုက်သည်။ ရုတ်တရက် သူမရှေ့တွင် လေဟာနယ် အက်ကြောင်းတစ်ခု ပေါ်လာသည်။ သူမသည် ထိုအထဲသို့ ဝင်ရောက်ကာ သဲလွန်စမရှိ ပျောက်ကွယ်သွားခဲ့သည်။

သူတို့နှစ်ဦးသည် တစ်ကွက်တည်းသာ တိုက်ခိုက်ခဲ့ကြသည်။ အနိုင်အရှုံး မပေါ်ခဲ့သလို ဆက်လက်တိုက်ခိုက်ခြင်းလည်း မပြုခဲ့ကြပေ။

အခန်း (၂၆၀)။

“အာယွိ, နင် ဘာလို့ ဆက်မတိုက်တော့တာလဲ။ နင် အစွမ်းကုန် မထုတ်သေးဘူးလို့ ငါ ခံစားမိတယ်။ ဒီကောင်မရဲ့ စိတ်ဝိညာဉ်ကို ချေမွပစ်ဖို့ နင် ဘာလို့ ချီဝိညာဉ်ဝဲဂယက်ပညာကို ထုတ်မသုံးလိုက်တာလဲ။"

ဆုမူ ထွက်သွားသည်ကို မြင်ပြီးနောက် ရွှေပင့်ကူသည် ချက်ချင်း ခုန်ထွက်လာသည်။ သူမ၏ မျက်နှာတွင် အနိုင်ကျင့်ခံရသော်လည်း လက်တုန့်မပြန်နိုင်သည့် ကလေးငယ်တစ်ယောက်ပမာ ရိုးဖြောင့်သော မကျေနပ်ချက်များဖြင့် ပြည့်နှက်နေသည်။

"ချီဝိညာဉ် ဝဲဂယက်ပညာဆိုတာ ရှင်ခြင်းသေခြင်း အဆုံးဖြတ်တိုက်ပွဲမျိုးမှာပဲ အသုံးပြုရတာ။" ဟုန်ယွိ၏ မျက်လုံးတွေက လင်းလက်သွားပြီး တခဏမျှ စဉ်းစားပြီးနောက် ပြောသည် "ပြီးတော့ အဲဒီပညာကို အသုံးပြုရင်တောင် ငါ သူမကို ဘာမှ လုပ်နိုင်မှာ မဟုတ်ဘူး။ ဒါပေမဲ့ သူမက ငါ့ရဲ့ စွမ်းအား အစစ်မှန်ကို မှန်းဆလို့မရသလို သူမမှာ ငါ့ကို အနိုင်ယူဖို့ ယုံကြည်ချက် မရှိလို့ ထွက်သွားတာ ဖြစ်နိုင်တယ်။ တိုင်ရှန်တာအိုဂိုဏ်းရဲ့ တာအိုပညာတွေက တကယ်ကို အစွမ်းထက်လွန်းတယ်။ သူတို့က 'စကြာဝဠာ' ဆိုတဲ့ စကားလုံးရဲ့ နက်နဲမှုကို အသည်းအသန် လေ့လာနေခဲ့ကြတာပဲ။ ကျင်းရွှမ်အာ၊ ဆုမူရဲ့စိတ်ဝိညာဉ်က အနန္တစကြာဝဠာ ခေါင်းလောင်း အဖြစ် ပြောင်းသွားတုန်းက မင်း ဘယ်လို ခံစားရလဲ။"

ဤအချိန်တွင် ဟုန်ယွိသည် တိုင်ရှန်တာအိုဂိုဏ်း၏ တာအိုပညာများကို ဂရုတစိုက် လေ့လာဆန်းစစ်နေသည်။

အခုနက သူ ဆုမူနှင့် တိုက်ခိုက်စဉ်တုန်းက ဟုန်ယွိသည် သူ၏စွမ်းအားကို အပြည့်အသ အသုံးမပြုခဲ့သလို၊ ဆုမူသည်လည်း အသက်စွန့်ရမည့် နည်းလမ်းများကို အသုံးမပြုခဲ့ပေ။

သူတို့နှစ်ဦးသည် တစ်ဦးနှင့်တစ်ဦး စမ်းသပ်နေခြင်းမျှသာ ဖြစ်သည်။ မည်သို့ပင်ဖြစ်စေ၊ ထိုတိုက်ပွဲသည် သေခြင်းရှင်ခြင်းတိုက်ပွဲမျိုး မဟုတ်ပေ။

ဟုန်ယွိသည် ဆုမူ၏ တာအိုပညာကို သေချာမသိသလို၊ သူမမှာ တခြား မည်သည့် လှည့်ကွက်များ ရှိနေဦးမည်ကိုလည်း မသိပေ။ တစ်ချိန်တည်းမှာပင်, ဟုန်ယွိသည် ဆုမူအနေဖြင့်လည်း သူ၏ တာအိုပညာကို ထိုးထွင်းသိမြင်နိုင်မည် မဟုတ်ကြောင်း သေချာပြောနိုင်သည်။ မည်သို့ပင်ဖြစ်စေ, ဆုမူသည် ထာဝရခေါင်းလောင်း တာအိုပညာကို အသုံးပြုခဲ့စဉ်က ဟုန်ယွိသည် ၎င်းတာအိုပညာကို ဖြေရှင်းနိုင်ခဲ့သည်။

သူတို့နှစ်ဦးသည် လက်ရည်စမ်း တိုက်ခိုက်ပြီးနောက် လမ်းခွဲခဲ့ကြသည်။ ဆုမူက ထွက်သွားခဲ့သည်။ ယင်းက သူတို့နှစ်ဦးစလုံးသည် သူတို့စွမ်းအားများကို အပြန်အလှန် ထိန်းချုပ်ထားခဲ့ပြီး၊ သရေကျအဖြစ် သတ်မှတ်နိုင်ပါသည်။

ဤအရာနှင့် ပတ်သက်၍ ဟုန်ယွိ ဆုမူ၏ စစ်မှန်သော ခွန်အားကို ဂရုတစိုက် လေ့လာဆန်းစစ်ပြီး ဆင်ခြင်နေခဲ့သည်။

"သူမ အဲဒီခေါင်းလောင်းကြီး တာအိုပညာကို အသုံးပြုလိုက်တုန်းကဆို, ငါဘာမှတောင် မစဉ်းစားနိုင်တော့ဘူး။ ငါ့စိတ်ဝိညာဉ်က ဖိနှိပ်ခံနေရတဲ့ အတိုင်းပဲ။ စိတ်ဝိညာဉ်ကို ဖိနှိပ်တာထက်စာရင်, အချိန်တွေ ရပ်တန့်သွားသလို ခံစားရတယ်။ ကောင်းကင်နဲ့ မြေကြီး ငြိမ်သက်သွားတဲ့ ခံစားချက်မျိုး ပဲ။ ဘာမှတောင် စဉ်းစားလို့ မရတော့ဘူး။ ဒါက မဟူရာနတ်ဆိုး ကျီးကန်အစီအရင်လိုမျိုး မဟုတ်ဘူး။ မဟူရာနတ်ဆိုး ကျီးကန်အစီအရင်က ဖိနှိပ်တဲ့ အခါ, ငါ့စိတ်ဝိညာဉ်က ခန္ဓာကိုယ်ကို မထိန်းချုပ်နိုင်တာပဲ ရှိတယ်။ ဒါပေမဲ့ ကြားနိုင်တယ်၊ မြင်နိုင်တယ်၊ တွေးနိုင်သေးတယ်။ ဒီခေါင်းလောင်းကြီးရဲ့ ဖိနှိပ်မှုကတော့ တွေးတောင် မတွေးနိုင်တော့ဘူး။"

ရွှေပင့်ကူသည် ဆုမူ ထွက်သွားရာဘက်သို့ ကြည့်လိုက်သည်။ သူမ၏ မျက်လုံးများတွင် ကြောက်ရွံ့မှုများ ပြည့်နှက်နေ၏။

အဆုံးတွင် ဆုမူ၏ တာအိုပညာက သူမကို ကြောက်ရွှံ့စေခဲ့သည်။

၎င်းသည် ရွှေပင့်ကူအနေဖြင့် ဆုမူနှင့် ယှဉ်ပြိုင်နိုင်ခြင်း မရှိဟု ဆိုနိုင်ပါသည်။

"အဲဒီခေါင်းလောင်းကြီးကနေ စုစည်းထားတဲ့ စိတ်ဆန္ဒက 'အထွဋ်အထိပ် စကြာဝဠာ' ရဲ့ စိတ်ဆန္ဒပဲ။ သူတော်စင်တွေရဲ့ စာအုပ်တွေထဲမှာ ‘စကြာဝဠာ’ရဲ့ အဓိပ္ပာယ်က အတိတ်နဲ့ ပစ္စုပ္ပန်ကို ကိုယ်စားပြုတယ်။ အဲဒါက အချိန်ပဲပေါ့။ သူမရဲ့ ပုံရိပ်ဖော်ပညာက လူတစ်ယောက်ရဲ့ အတွေးတွေ ကို ဖိနှိပ်နိုင်တယ်။ ဆိုလိုတာက လူတစ်ယောက်ရဲ့ စိတ်ဝိညာဉ်က တာအိုပညာရှင် ဖြစ်နေသရွေ့ နေရာမှာတင် အေးခဲသွားစေနိုင်တယ်။ သူမရဲ့ ကျင့်စဉ်အဆင့်က အဆင့်မြင့်အဆင့်ကို ရောက်ရှိသွားရင်, သိုင်းသူတော်စင်ကိုတောင် အေးခဲစေနိုင်တယ်။ ဒါပေမဲ့ ထာဝရ ခေါင်းလောင်းရဲ့ စိတ်ဆန္ဒ က အမွှေးနံ့သာတိုင် ပူဇော်ပြီး၊ ယုံကြည်မှုနဲ့ ဖွဲ့စည်းထားတဲ့ စိတ်ဝိညာဉ်နဲ့ ရင်ဆိုင်ရတဲ့အခါ အားနည်းသွားတယ်။ ဘာလို့ဆို, ရှေးခေတ်ကတည်းက အနာဂတ်ရဲ့ စိတ်ဆန္ဒကို ဖမ်းဆုပ်ဖို့က အခက်ခဲဆုံး ဖြစ်ခဲ့တာကိုး။ အမွှေးနံ့သာတိုင် ယုံကြည်မှုနဲ့ ဖွဲ့စည်းထားတဲ့ စိတ်ဝိညာဉ်က အနာဂတ်ရဲ့ စိတ်ဆန္ဒပဲလေ" ဟုန်ယွိက ခန့်မှန်းလိုက်သည်။

ဆုမူ၏ တာအိုပညာသည် စိတ်ဝိညာဉ်ကို တိုက်ရိုက် အေးခဲသွားစေနိုင်သည်။ သူမ အခုနက အသုံးပြုခဲ့သော ထာဝရ ခေါင်းလောင်း တာအိုပညာ သည် ဟုန်ယွိ၏ စိတ်ဝိညာဉ်ကိုပင် ဖိနှိပ်နိုင်ခဲ့သည်။ ထိုပညာရပ် မည်မျှ အစွမ်းထက်သည်မှာ ထင်ရှားပါသည်။

စိတ်ဝိညာဉ်သည် မိုးကောင်းကင်၏အလိုတော် ခေါင်းလောင်း၊ အချိန်၏ ခေါင်းလောင်းအဖြစ် အလိုရှိသလို ပုံသဏ္ဌာန် ပြောင်းလဲသွားခဲ့သည်။ ဟုန်ယွိသည် တိုင်ရှန်တာအိုဂိုဏ်း၏ တာအိုပညာကြောင့် အံ့အားသင့်မဆုံး ဖြစ်နေခဲ့ရသည်။

"သူမရဲ့ အခုနက အတွေးတွေက နူးညံ့တဲ့ ယန်လေပြင်း ဖြစ်နေတယ်။ သူမ မိုးကြိုးကပ်ဘေးကို ကျော်ဖြတ်ပြီးပြီလား။ ဒါမှမဟုတ် ငါတို့လို မိုးကြိုးကပ်ဘေးဒဏ် ကျွမ်းကျင်သူတစ်ဦးကို သန့်စင်ခဲ့လို့များလား။ မိုနိုဂိုတာရီရဲ့ နည်းလမ်းတွေနဲ့ဆိုရင်, သူမအနေနဲ့ မိုးကြိုးကပ်ဘေးဒဏ် ကျွမ်းကျင်သူကို သန့်စင်ဖို့က မခက်ခဲဘူး။" ရွှေပင့်ကူက အံ့ဩဟန်ဖြင့် ပြောသည်။

"အဲဒါကိုတော့ ငါလည်း မပြောနိုင်ဘူး။ ရှင်ခြင်းသေခြင်းတိုက်ပွဲတစ်ခု မဖြစ်မချင်းပေါ့။ ဒါပေမဲ့ ဒီနေ့ စိန်ခေါ်မှုက သေးသေးလေးပဲ။ ငါ့အတွက် အရေးမကြီးဘူး။ ငါ့ရည်ရွယ်ချက်ကတော့ ငါ သူမရဲ့ အကူအညီ မလိုအပ်ဘူးဆိုတာကို သိစေချင်ရုံပဲ။ ငါဟုန်ယွိက တခြားသူတွေရဲ့ အကူအညီကို လိုချင်တဲ့လူ မဟုတ်ဘူး။ တိုင်ရှန်တာအိုဂိုဏ်းက ချန်ပီယံမြို့စားကို ထောက်ခံရင်, ငါတို့က နောင်တချိန် ရန်သူဖြစ်လာမှာ သေချာတယ်။ ငါ အဲဒီချန်ပီယံမြို့စားကို ပြင်းပြင်းထန်ထန် တိုက်ခိုက်ခဲ့ပြီးပြီ။ ဒီရန်ငြိုးကို သူ လုံးဝ လွှတ်ထားပေးမှာ မဟုတ်ဘူး။ ငါ့ကို လက်စားချေဖို့ အခွင့်အရေး အမြဲတမ်း ရှာနေမှာပဲ။ သွားကြစို့။ အောက်ဆင်းပြီး ထာဝရမိခင်ကို ဖမ်းချုပ်ရအောင်။ ငါ သူမကို သေချာ မေးမြန်းကြည့်ချင်တယ်။ ပြီးတော့ သူမရဲ့ မဟာဝိညာဉ် ခုနစ်ပါးရဲ့ အကူအညီကို အရယူပြီး မှော်ရတနာတစ်ခု ဖန်တီးချင်တယ်။ အဲဒီအခါကျရင် တိုင်ရှန်တာအိုဂိုဏ်းရဲ့ ထာဝရခေါင်းလောင်းကို ထိန်းချုပ်နိုင်လောက်တယ်။"

ဟုန်ယွိသည် ရွှေပင့်ကူကို ဆုပ်ကိုင်ပြီး အချုပ်ခန်း အမိုးပေါ်မှ ခုန်ဆင်းလိုက်ပါသည်။

"အနာဂတ်ရဲ့ စိတ်ဆန္ဒက အဆုံးမဲ့ ဖြစ်နိုင်ခြေတွေကို ပိုင်ဆိုင်ထားတယ်။ ဒါကြောင့် အနာဂတ်ကို ဖမ်းဆုပ်ဖို့က အခက်ခဲဆုံးပဲ။ ဒီဟုန်ယွိက ဒီလောက်အထိ တိတိကျကျ မြင်နိုင်ခဲ့တာလား။ မျက်စိတစ်မှိတ်အတွင်းမှာပဲ, သူက ငါတို့ တိုင်ရှန်တာအိုဂိုဏ်းရဲ့ ထာဝရခေါင်းလောင်း တာအိုပညာ ကို သူထိုးထွင်း သိမြင်သွားခဲ့တယ်။ အနာဂတ်ကို ဖမ်းဆုပ်ဖို့ ခက်ခဲတယ်။ အမွှေးနံ့သာတိုင် ယုံကြည်မူကနေ မွေးဖွားလာတဲ့ နတ်ဘုရားတွေကိုလည်း ရပ်တန့်လို့ မရနိုင်ဘူး။ ဒီအချက်ကြောင့်ပဲ အသက်မဲ့တာအိုဂိုဏ်းနဲ့ အစစ်မှန်လေဟာနယ်ဂိုဏ်းက ဂိုဏ်းချုပ်တွေကို ကိုင်တွယ်ရတာ ငါ့အတွက် နည်းနည်း ခက်ခဲနေတာ။ ကောင်းကင်တာအို နတ်ဆိုးချိတ်ပိတ်ဓားကို အသုံးပြုရမယ်။ မဟုတ်ရင် သူတို့ ကြီးထွားဖို့ အခွင့်အရေး ရသွားလိမ့်မယ်။ ဒိုင်ဇင်ဘုရားကျောင်းက ငါတို့ တိုင်ရှန်တာအိုဂိုဏ်းရဲ့ ပညာရပ်ကို တန်ပြန်ဖို့ အသက်မဲ့အနာဂတ်ကျမ်းကို ဖန်တီးခဲ့တာပဲ။"

ဟုန်ယွိသည် အမိုးပေါ်မှ ခုန်ဆင်းပြီး ဝူယွမ်ပြည်နယ်မြို့တော်၏ နေအိမ်ရှိ အခန်းသို့ ပြန်ရောက်သည့် အချိန်တွင် တိုင်ရှန်တာအိုဂိုဏ်း၏ သူတော်စင် မိန်းမပျို ဆုမူသည် ဝူယွမ်မြို့တော်မှ မိုင်တစ်ရာခန့် အကွာရှိ လေဟာနယ်တွင် ပေါ်လာသည်။ သူမသည် ဗလာကျင်းသော တောင်ထိပ်တစ်ခုပေါ်သို့ ဆင်းသက်ပြီး ပတ်ဝန်းကျင်ရှိ တောင်တန်းများနှင့် နှင်းကျနေသည့် ညရှုခင်းများကို ကြည့်ကာ အတွေးနက်နေခဲ့သည်။

တိုင်ရှန်တာအိုဂိုဏ်း၏ ထာဝရခေါင်းလောင်း တာအိုပညာသည် ကမ္ဘာပေါ်ရှိ တာအိုပညာရပ်များ၏ အထွဋ်အထိပ်ဟု ဆိုနိုင်သည်။ ၎င်းသည် လူတစ်ဦး၏ စိတ်ဝိညာဉ်ကို အသုံးပြု၍၊ မိုးကောင်းကင်၏အလိုတော်နှင့် အချိန်စီးဆင်းမူ သဘောတရား၏ နက်နဲမှုကို ရှာဖွေရသည်။ ၎င်းကို အသုံးပြုပြီးသည်နှင့် စိတ်ဝိညာဉ်မှ ဖွဲ့စည်းထားသော ခေါင်းလောင်းကြီးသည် အသံလှိုင်းများကို ထုတ်လွှတ်သည်။ မည်သည့် တာအိုပညာရှင်၏ စိတ်ဝိညာဉ်ကိုမဆို များစွာ အနှောင့်အယှက် ဖြစ်စေမည်။

"ထာဝရခေါင်းလောင်းနဲ့ဆိုရင် ကမ္ဘာပေါ်က ဘယ်တစ္ဆေအင်မော်တယ်ကိုမဆို ငါ ရပ်တန့်နိုင်တယ်။ မိုးကြိုးကပ်ဘေး ကျွမ်းကျင်သူတွေအပေါ်မှာ တောင် အများကြီး သက်ရောက်နိုင်တယ်။ ငါနဲ့တိုက်ခိုက်ရင် သူတို့စွမ်းအား ၅၀ ရာခိုင်နှုန်းအထိ လျော့ကျသွားလိမ့်မယ်။ ဒီဟုန်ယွိက ထာဝရ ခေါင်းလောင်းရဲ့ မှော်ပညာအောက်မှာ သူ့ရဲ့အတွေးတွေကို ဆက်လက် လည်ပတ်နိုင်သေးတာ တကယ်ကို မယုံနိုင်စရာပဲ။"

ဆုမူ၏ မျက်ခုံးများက အနည်းငယ် တွန့်သွားခဲ့သည်။ သူမသည် ဟုန်ယွိနှင့် အပြန်အလှန် တိုက်ခိုက်ခဲ့သည်မြင်ကွင်းကို စဉ်းစားနေခဲ့သည်။ အချိန်အတော်ကြာ စဉ်းစားပြီးနောက် နောက်ဆုံးတွင် သူမ၏ မျက်ခုံးများက ပြေလျော့သွားသည်။ ထို့နောက်, သူမရှေ့ရှိ လေဟာနယ်ကို ပေါ့ပေါ့ပါးပါး ဆုတ်ဖြဲလိုက်ပြီး ထိုအက်ကြောင်းထဲသို့ ဝင်ရောက်သွားကာ ခြေရာလက်ရာမကျန် ပျောက်ကွယ်သွားခဲ့သည်။

"တိုင်ရှန်တာအိုဂိုဏ်းရဲ့ ထာဝရခေါင်းလောင်းပညာရပ်၊ ဟုန်ယွိ၊ မင်း တိုင်ရှန်တာအိုဂိုဏ်းရဲ့ သူတော်စင် မိန်းမပျိုနဲ့ လက်ရည်စမ်း တိုက်ခိုက်ခဲ့တာ လား။"

စကြာဝဠာအိတ်ထဲအတွင်းမှ, နင်ဂျာဘုန်းတော်ကြီးသည် ရွှေပုံများရှေ့တွင် ရပ်နေပြီး ဟုန်ယွိ၏ စကားများကို ဂရုတစိုက် နားထောင်နေခဲ့သည်။

"ဒီထာဝရခေါင်းလောင်း တာအိုပညာက အင်မတန် အစွမ်းထက်တယ်။ ဒီတာအိုပညာဟာ ကျင့်ကြံသူက မိုးကောင်းကင်ရဲ့အလိုတော်ကို စောင့်ထိန်းပြီး၊ အချိန်စီးဆင်းမှု သဘောတရားကို နားလည်ဖို့အတွက် ကြီးမားတဲ့ စိတ်ဆန္ဒကို အသုံးပြုပြီး ကျင့်ကြံရတဲ့ နည်းလမ်းတစ်ခုပဲ။ ဒီပညာကို သုံးလိုက်တာနဲ့ ဘယ်တာအိုပညာရှင်ရဲ့ စိတ်ဝိညာဉ်နဲ့ အတွေးတွေမှ လည်ပတ်နိုင်မှာ မဟုတ်တော့ဘဲ အချိန်ရပ်တန့်သွားသလို ရပ်တန့်နေလိမ့်မယ်။ ငါတို့ သိုင်းသူတော်စင်တွေတောင် ခြွင်းချက်မရှိဘူး။ တိုင်ရှန်တာအိုဂိုဏ်းရဲ့ သူတော်စင် မိန်းမပျိုနဲ့ ဂိုဏ်းချုပ်တို့ ဒီပညာကို အသုံးပြုရင် စိတ်စွမ်းအင် အားနည်းတဲ့လူတွေ ချက်ချင်း အေးခဲသွားပြီး စိတ်ဝိညာဉ်ကို မလှုပ်ရှားနိုင်တော့ဘူး။ စိတ်စွမ်းအင် အားကောင်းတဲ့လူတွေတောင် များစွာ ထိန်းချုပ်ခံရပြီး၊ သူတို့တာအိုပညာရဲ့ ၅၀ ရာခိုင်နှုန်းကို အသုံးမပြုနိုင်တော့ဘူး။ သိုင်းသူတော်စင်တောင်မှ သူတို့စိတ်ကို မလှုပ်ရှားစေနိုင်ရင်တောင် လှုပ်ရှားမှုတွေက အများကြီး နှေးကွေးသွားလိမ့်မယ်။"

နင်ဂျာဘုန်းတော်ကြီးက ပြန်ပြောသည်။

"ကျွန်မလည်း တိုင်ရှန်တာအိုဂိုဏ်းက တာအိုပညာ ထာဝရခေါင်းလောင်းအကြောင်း ကြားဖူးပေမယ့် တစ်ခါမှ မမြင်ဖူးဘူး။" ချန်ယင်းရှာသည် တစ်ခုခုကို စဉ်းစားနေသကဲ့သို့ ခြေနှစ်လှမ်း လှမ်းလိုက်ပါသည်။

"အဲဒီတုန်းက ငါတို့ရဲ့ ဒိုင်ဇင်ဘုရားကျောင်းက အဲဒီတာအိုပညာကို တန်ပြန်ဖို့ အသက်မဲ့ အနာဂတ်ကျမ်းကို ဖန်တီးခဲ့တာ။ မိုးကောင်းကင်ရဲ့အလိုတော်နဲ့ အချိန်ရဲ့သဘောတရားကို တန်ပြန်နိုင်ဖို့က အနာဂတ်ရဲ့ အဆုံးမဲ့ ဖြစ်နိုင်ခြေတွေကို အသုံးပြုရမှာပဲလေ။"

"ဒါဆို အာယွိက အသက်မဲ့ အနာဂတ်ကျမ်းကို မကျင့်ကြံဘဲ ဘယ်လိုလုပ် ထာဝရခေါင်းလောင်းကို ချိုးဖျက်နိုင်တာလဲ။" ရွှေပင့်ကူက မေးသည်။

"ဟုန်ယွိဟာ အတွေးမရှိ ငြိမ်သက်ခြင်းနဲ့ ဘာမှမတည်ရှိခြင်း ဗလာနတ္တိ အခြေအနေတွေကို နားလည်ထားတာ ကြာပြီ။။ အတွေးမရှိ ငြိမ်သက်ခြင်း အခြေအနေနဲ့ဆိုရင် အရာအားလုံးက ဗလာနတ္ထိပဲ။ သူ့ရဲ့ အတွေးတွေဟာ အချိန်ရဲ့သဘောတရားကနေ လွတ်မြောက်နေတယ်။ ဒါ့အပြင် ဟုန်ယွိရဲ့ စိတ်ဝိညာဉ်က အင်မတန် သန်မာတယ်။ သူက နတ်ဆိုးနတ်ဘုရားသွေးကို စားသုံးထားတာလည်း ပါတာပေါ့။ ဒီနှစ်ခု ပေါင်းစပ်လိုက်တော့, သူက ထာဝရခေါင်းလောင်းကို သဘာဝအတိုင်း ခုခံနိုင်တာပေါ့။"

နင်ဂျာဘုန်းတော်ကြီးက ခေါင်းခါရင်း ပြောသည်။ "တိုင်ရှန်တာအိုဂိုဏ်းရဲ့ သူတော်စင် မိန်းမပျိုဟာ ဒီလောက် အဆင့်အထိ ကျင့်ကြံနိုင်လိမ့်မယ်လို့ ထင်မထားဘူး။ ဟုန်ယွိ၊ မင်းပြောစကားအရဆို, ဒီ သူတော်စင် မိန်းမပျို ဆုမူဟာ တကယ် အစွမ်းထက်တဲ့သူပဲ။ တကယ်လို့, သူမသာ တကယ်ပဲ မိုးကြိုးကပ်ဘေးကို ကျော်ဖြတ်နိုင်ခဲ့ရင်၊ တစ်ကြိမ်တည်းဆိုရင်တောင်, ဥဒေါင်းဘုရင်နဲ့ ကောင်းကင် မြွေဘုရင်တို့လို အင်မော်တယ်နတ်ဆိုးဘုရင်တွေတောင် သူမကို ဘာမှ လုပ်နိုင်မှာ မဟုတ်တော့ဘူး။ ပြီးတော့ ငါတို့ ဒိုင်ဇင်ဘုရားကျောင်းရဲ့ မဟာ လေဟာနယ် လက်ဝါးကို တန်ပြန်ဖို့ တိုင်ရှန်တာအိုဂိုဏ်းက ကောင်းကင်တာအို နတ်ဆိုးချိတ်ပိတ်ဓားကို ဖန်တီးခဲ့တာ။ ဒီဓားက အင်မတန် အစွမ်းထက်ပြီး နတ်ဘုရားတွေကိုတောင် ပိတ်လှောင်နိုင်တယ်။"

"ကောင်းကင်တာအို နတ်ဆိုးချိတ်ပိတ်ဓားလား။" ထိုစကားကို ကြားပြီးနောက် ဟုန်ယွိသည် သက်ပြင်းချလိုက်မိပါသည်။ "တိုင်ရှန်တာအိုဂိုဏ်းဟာ နံပါတ်တစ် မြင့်မြတ်နယ်မြေ ဖြစ်နေတာ အမှန်ပဲ။ သူတို့က ထာဝရခေါင်းလောင်းလို အစွမ်းထက်တဲ့ တာအိုပညာကိုတောင် ဖန်တီးနိုင်တယ်။ တကယ်လို့, ငါသာ တိုင်ရှန်တာဂိုဏ်းရဲ့ အထွဋ်ထိပ်အဂ္ဂိရတ်ကျမ်းကို တစ်ကြိမ် ဖတ်ရှုခွင့် ရခဲ့ရင် မိုးကောင်းကင်ရဲ့အလိုတော်နဲ့ အချိန်ရဲ့သဘောတရားက ဘာလဲဆိုတာ သိနိုင်မှာပဲ။ ဟွန်း…၊ ငါ အထွဋ်ထိပ်အဂ္ဂိရတ်ကျမ်းကို တစ်ကြိမ် ဖတ်ရှုခွင့်ရရင် တာအိုပညာရပ်တွေ အားလုံးကို ကျွမ်းကျင်ပြီး မကြုံစဖူး နယ်ပယ်တစ်ခုကို သေချာပေါက် ရောက်နိုင်လိမ့်မယ်။"

ဟုန်ယွိသည် အတိတ်အမိတ္တဘကျမ်းမှ 'အတိတ်သည် ထာဝရတည်မြဲပြီး ပြောင်းလဲခြင်းမရှိ' ဟူသော သဘောတရားကို နားလည်ခဲ့သည်။

အတိတ်ကျမ်းစာ၏ အဓိက အနှစ်သာရမှာ ဤသဘောတရား ဖြစ်သည်ဟု ဆိုနိုင်သည်။

ဤအခြေအနေနှင့် သူ၏နက်ရှိုင်းသော ကျင့်ကြံမူကို အားကိုး၍, ဟုန်ယွိသည် အစွမ်းထက်သော ရန်သူများကို အကြိမ်ကြိမ် အနိုင်ယူခဲ့သည်။ ထိုနည်းဖြင့် သူသည် ယနေ့ အခြေအနေကို ရောက်ရှိခဲ့ခြင်း ဖြစ်သည်။

ယခုအခါ ဟုန်ယွိသည် အထွဋ်ထိပ်အဂ္ဂိရတ်ကျမ်းကို ဖတ်ရှုပြီး "မိုးကောင်းကင်၏အလိုတော်နှင့် အချိန်"၏ သဘောရားကို နားလည်လိုသည်။

သူသည် "မိုးကောင်းကင်၏အလိုတော်နှင့် အချိန်၏သဘောတရားနှင့် "အထွဋ်အထိပ် ထာဝရ " ဟူသော ဤသဘောတရားနှစ်ခုသည် "အတိတ်" သဘောတရားကို မရှုံးနိမ့်နိုင်ကြောင်း သေချာပြောနိုင်သည်။ အကယ်၍, သူသာ ဒီသဘောတရားကို နားလည်ပြီး ပေါင်းစပ်နိုင်ပါက, မိုကောင်းကင်၏အလိုတော်နှင့် အချိန်ကိုထိန်းချုပ်ခြင်း၏ အဓိက အနှစ်သာရကို ကျင့်ကြံနိုင်မည် ဖြစ်သည်။ ဟုန်ယွိ၏ စိတ်ဝိညာဉ် စွမ်းအင်သည် သေချာပေါက် များစွာ တိုးတက်လာမည်။

ဤကျင့်ကြံမှု အဆင့်တွင် ဟုန်ယွိသည် မိုးကောင်းကင်၏အလိုတော်နှင့် အချိန်၏ စစ်မှန်သော အဓိပ္ပာယ်က ဘာကို ကိုယ်စားပြုသည်ကို သဘာဝအတိုင်း နားလည်ထားသည်။

သူသည် ယခုအခါ အထွဋ်ထိပ်အဂ္ဂိရတ်ကျမ်းကို မဖတ်ရှုနိုင်ခြင်းက ဝမ်းနည်းစရာပင်။

"ဒီလိုဆိုရင်! အာယွိ, နင် နောက်ဆုတ်လို့ မရတော့ဘူး။ ဆုမူကို အရှင်ဖမ်းပြီး အထွဋ်ထိပ်အဂ္ဂိရတ်ကျမ်းကို အတင်းအကျပ် ပေးခိုင်းဖို့ အခွင့်အရေး ရှာရမယ်။ အခု ငါတို့က အားမနည်းတော့ဘူး။ နင်ဂျာဘုန်းတော်ကြီး၊ အစ်မ ယင်းရှာ၊ အာယွိ၊ ပြီးတော့ ငါ့အဘိုးကိုလည်း ဆက်သွယ်နိုင်တယ်။ အားလုံး ပူးပေါင်း တိုက်ခိုက်ရင်, ဆုမူ ဘယ်လောက် အစွမ်းထက်ပါစေ, ငါတို့ရဲ့ ပူးပေါင်း တိုက်ခိုက်မှုကနေ လွတ်မြောက်နိုင်မှာ မဟုတ်ဘူး!"

ရွှေပင့်ကူသည် ဟုန်ယွိက အထွဋ်ထိပ်အဂ္ဂိရတ်ကျမ်းကို ဖတ်ရှုပြီး မိုးကောင်းကင်၏အလိုတော်နှင့် အချိန်၏ စစ်မှန်သော အဓိပ္ပာယ်ကို နားလည်နိုင်ပါက သူ၏ စိတ်ဝိညာဉ် စွမ်းအားများ များစွာ တိုးတက်လာမည်ဟု ပြောသည်ကို ကြားလိုက်ရသည်။ ထို့ကြောင့် သူမသည် ချက်ချင်း ခုန်ထွက်လာခဲ့သည်။

"တကယ်လို့, ငါတို့က ငယ်တဲ့လူတစ်ယောက်ကို အနိုင်ကျင့်ရင်, အသက်ကြီးတဲ့ လူတစ်ယောက် ပေါ်လာလိမ့်မယ်။ ငါတို့အနေနဲ့ မိုနိုဂိုတာရီရဲ့ မှော်စွမ်းအားကို ယှဉ်နိုင်မှာ မဟုတ်ဘူး။" ချန်ယင်းရှာ ၏ မျက်လုံးများက လင်းလက်သွားခဲ့သည်။ သူမသည် ထိုအကြံပြုချက်ကို စိတ်ဝင်စားပုံရသော်လည်း မကြာမီ ခေါင်းခါလိုက်သည်။

ချန်ယင်းရှာနှင့် ရွှေပင့်ကူဘုရင်တို့သည် တစ်ချိန်က ဘုန်းတော်ကြီး ယင်ယွဲ့ကို ချောင်းမြောင်း တိုက်ခိုက်ခဲ့ဖူးသည်။ ထို့ကြောင့် သူတို့သည် တိုင်ရှန်တာအိုဂိုဏ်း၏ သူတော်စင် မိန်းမပျိုကို ထပ်မံ ချောင်းမြောင်း တိုက်ခိုက်ရန် ဝန်မလေးကြပေ။

"ကျင်းရွှန်အာ၊ ငါ့ကို ချောင်းမြောင်း တိုက်ခိုက်ဖို့အကြောင်း မပြောပါနဲ့တော့။ ဆုမူနဲ့ငါတို့က နက်နဲတဲ့ ရန်ငြိုးမျိုး မရှိသေးဘူး။ ဒါ့အပြင် သူတို့က စိတ်ခံစားချက် ကင်းမဲ့မယ်။ ငါကတော့ မကင်းမဲ့ဘူး။ ဘာပဲဖြစ်ဖြစ် ငါ့အမေကလည်း တိုင်ရှန်တာအိုဂိုဏ်းကပဲ။ တခြားလူတွေကို ချောင်းမြောင်း တိုက်ခိုက်ပြီး သူတို့ရဲ့ အထွဋ်ထိပ်အဂ္ဂိရတ်ကျမ်း ခိုးယူမယ်ဆိုရင်, ငါတို့ရော အဲဒီ နှလုံးသားကင်းမဲ့တဲ့ ဟုန်ရွှန်ကျိနဲ့ ဘာများ ကွာခြားတော့မှာလဲ။"

ဟုန်ယွိက ခေါင်းခါလိုက်သည်။

"ချောင်းမြောင်း တိုက်ခိုက်မဲ့အကြောင်း မပြောကြနဲ့တော့။ ဒါပေမယ့် ဆုမူက ချန်ပီယံမြို့စားကို ထောက်ခံတယ်။ ငါက မင်းသားယုကို ထောက်ခံတယ်။ မကြာခင်မှာ ငါတို့ တွေ့ကြရမှာပါ။ အဲဒီအချိန်ရောက်ရင် ငါ့တာအိုပညာနဲ့ သူမကို တရားမျှတစွာ အနိုင်ယူမယ်။ မိုနိုဂိုတာရီကိုတောင် အနိုင်ယူပြမယ်။"

ဟုန်ယွိသည် စကားကို အဆုံးသတ်ပြီးနောက်, သူ၏မျက်နှာပေါ်တွင် သူရဲကောင်းဆန်သော အမူအရာ ပေါ်လာသည်။ ရုတ်တရက် သူ၏အကြည့်ကို လှည့်လိုက်ပြီး ကြည်လင်သော အလင်းတန်းများဖြင့် ဖုံးလွှမ်းနေသည့် ထာဝရမိခင်ကို ကြည့်လိုက်ပါသည်။ သူက ချက်ချင်း ပြောလိုက်သည်- "အသက်မဲ့ အနာဂတ်ကျမ်းက ထာဝရခေါင်းလောင်းရဲ့ မှော်ပညာကို ကာကွယ်နိုင်တယ်ဆိုရင်၊ ငါ ထာဝရမိခင်ရဲ့ မဟာဝိညာဉ် နတ်ဘုရားခုနစ်ပါးကို စုပ်ယူပြီး ငါရဲ့ ကိုယ်ပွားတွေအဖြစ် ကျင့်ကြံနိုင်ပြီ။ အဲဒီအချိန်ရောက်ရင် တိုင်ရှန်တာအိုဂိုဏ်းရဲ့ မှော်ပညာကို ကာကွယ်နိုင်ဖို့ အခွင့်အရေး ပိုရလာမှာ သေချာတယ်။"

"ဟုန်ယွိ၊ မင်း ပြောတာ မှန်တယ်။" နင်ဂျာဘုန်းတော်ကြီးက ပြောသည် "ဒီထာဝရမိခင်ဟာ အနာဂတ်ကျမ်းကို သတ္တမအဆင့်အထိ ကျင့်ကြံနိုင်ပြီး မဟာဝိညာဉ် နတ်ဘုရားခုနစ်ပါးကို ဖန်တီးနိုင်ခဲ့တယ်။ သူမဟာ ယဇ်ပလ္လင်တွေ အများပြား တည်ဆောက်ပြီး၊ အနည်းဆုံး ကိုးကွယ်သူ တစ်သိန်းရဲ့ ယုံကြည်မှုတွေကို စုဆောင်းထားတယ်ဆိုတာ မင်း မြင်နိုင်တယ်။ ဒီကြီးမားတဲ့ စွမ်းအားဟာ ကျင့်ကြံဖို့အတွက် အကောင်းဆုံး နည်းလမ်း ဖြစ်တာ အမှန်ပဲ။ နှာမြောစရာကောင်းတာက, တကယ်လို့ ဒီလူတွေသာ စစ်မှန်တဲ့ အသက်မဲ့အနာဂတ်ကျမ်းကို ရခဲ့ရင် သူတို့ရဲ့ ယုံကြည်မှုကို သူတို့ရဲ့ကိုယ်ပိုင်ဝိညာဉ်တွေထဲ ပေါင်းစပ်ပြီး သူတို့ရဲ့ စွမ်းအားကို အဆမတန် တိုးမြှင့်နိုင်မှာပဲ။"

"ဒါကို ကျွန်တော် သိပါတယ်။" ဟုန်ယွိက ပြောသည် "ကျွန်တော်လည်း အရင်က တခြားသူတွေရဲ့ ကိုးကွယ်မှုကို ခံယူခဲ့ဖူးတယ်။ ဒါကြောင့် အဲဒီအတွေးတွေ စုစည်းလိုက်တဲ့အခါ ဘယ်လောက် ကြောက်စရာကောင်းလဲဆိုတာ ကျွန်တော် သိတယ်။ ကျွန်တော့မှာ စစ်မှန်တဲ့ အသက်မဲ့ အနာဂတ်ကျမ်း မရှိပေမယ့် ကိုယ်ပွားကို ကျင့်ကြံတာကလည်း မဆိုးပါဘူး။ နောင်အနာဂတ်မှာ တိုက်ခိုက်တဲ့အခါ, ကျွန်တော် မဟာဝိညာဉ် နတ်ဘုရားခုနစ်ပါးရဲ့ စွမ်းအားကိုပါ ပိုင်ဆိုင်လာလိမ့်မယ်။ ဥဒေါင်းဘုရင်နဲ့ ကောင်းကင်မြွေဘုရင်တို့လို ပညာရှင်တွေကိုတောင် တိုက်ခိုက်ဖို့ အခွင့်အရေး ရလာနိုင်တယ်။"

"မင်းတို့အားလုံး ငါ့ကို ကူညီပါ။"

ဟုန်ယွိသည် ထိုစကားကို ပြောပြီးနောက် သူတို့အားလုံးသည် ချက်ချင်းပင် နေရာကိုယ်စီ ယူလိုက်ကြပါသည်။