ကောင်းကင်ကင်းလှည့်အစောင့်တပ် (၂)

ခေတ္တမျှ ကြာပြီးနောက် ကုယန်က "ဒီလူကို ငါ့ဆီခေါ်လာခဲ့" ဟု မိန့်ကြားလိုက်သည်။

"အမိန့်တော်အတိုင်းပါ"

ကုချင်းဖန် မျက်လုံးဖွင့်လိုက်သည်နှင့် ကြောက်မက်ဖွယ်ကောင်းသော အရှိန်အဟုန်တစ်ခု ခဏတာ လက်ခနဲ ဖြစ်သွားသည်။

"သုံးလတောင် ကုန်သွားပြီပဲ"

"ရှေးဟောင်းကောင်းကင်ဓား ကျင့်စဉ်က တိုးတက်မှုရှိပေမဲ့၊ အထွတ်အထိပ်အဆင့်ကို ရောက်ဖို့ကတော့ အချိန်တိုအတွင်း မဖြစ်နိုင်သေးဘူး"

သူ ပို၍ နားလည်လေလေ ကုချင်းဖန်သည် ရှေးဟောင်းကောင်းကင်ဓား၏ စွမ်းအားကို ပို၍ ခံစားမိလေလေဖြစ်သည်။

အကယ်၍ ဤသူတော်စင်အမွေအနှစ်ကို အထွတ်အထိပ် (သို့မဟုတ်) ပြည့်စုံခြင်းအဆင့်အထိ ကျင့်ကြံနိုင်လျှင်၊ သူ၏ကျင့်ကြံမှုအဆင့် မတက်လျှင်ပင် ထို "မီးလျှံနေမင်းသူတော်စင်"နှင့် ပြန်တွေ့ပါက တိုက်ရိုက် သတ်ဖြတ်နိုင်လိမ့်မည်ဟု ကုချင်းဖန် ယုံကြည်နေသည်။

တစ်ချိန်တည်းမှာပင် ပြည့်စုံခြင်းအဆင့်ရှိသော ရှေးဟောင်းကောင်းကင်ဓားသည် သူ့ကို တာအိုနန်းတော်နယ်ပယ်၏ အထွတ်အထိပ်သို့ ရောက်အောင် ပံ့ပိုးပေးရန် လုံလောက်ပေလိမ့်မည်။

သို့သော်လည်း အဆင့်မြှင့်တင်ရေးအမှတ် များကို မသုံးဘဲ ရှေးဟောင်းကောင်းကင်ဓားကို ပြည့်စုံခြင်းအဆင့်အထိ လေ့ကျင့်ရန်မှာ ပြောသလောက် မလွယ်ကူပေ။

ဘာပဲဖြစ်ဖြစ် သူတော်စင်တစ်ဦး၏ အဆုံးစွန်သော ကျွမ်းကျင်မှုများသည် သဘာဝအတိုင်းပင် နက်နဲဆန်းကြယ်လှသည်။ ရှေးဟောင်းတောရိုင်းလောကတွင် သူတော်စင်အမွေအနှစ် ပိုင်ဆိုင်သော အင်အားစုများစွာ ရှိသော်လည်း ၎င်းတို့ကို အမှန်တကယ် ကျွမ်းကျင်ပိုင်နိုင်သူမှာ အလွန်နည်းပါးလှသည်။

သူတော်စင်ကျင့်စဉ်တစ်ခုကို အထွတ်အထိပ်အထိ ကျင့်ကြံရန်မှာ မည်မျှခက်ခဲမည်ကို ခန့်မှန်းကြည့်ရုံဖြင့် သိနိုင်သည်။

ကုချင်းဖန်သည် သူ၏ အချက်အလက်ပြဇယားကို တစ်ချက်ကြည့်လိုက်သည်။

...

အမည်: ကုချင်းဖန်

အသက်: ၅၃/၆၀၀၀

နယ်ပယ်: တာအိုနန်းတော်နယ်ပယ်၊ ဆဋ္ဌမအဆင့်

သိုင်းပညာ: ကောင်းကင်ဝိညာဉ်ကြောကျမ်း (ဒုတိယအလွှာ)၊ ကောင်းကင်ဓား (ပြည့်စုံခြင်း)၊ မဟာတောရိုင်းလက်သီးကျမ်း (ပြည့်စုံခြင်း)၊ နေနတ်ဘုရားကျမ်း (တာအိုနန်းတော်အခန်း - ဆဋ္ဌမအလွှာ)၊ ရှေးဟောင်းကောင်းကင်ဓား (အောင်မြင်မှုအဆင့်ငယ်)၊ ခရမ်းရောင်အထွတ်အထိပ်တာအိုကျမ်း (ပြည့်စုံခြင်း)၊ လီဖုန်းကျမ်း (မလေ့ကျင့်ရသေး)၊ နိဗ္ဗာန်တာအိုကျမ်း (မလေ့ကျင့်ရသေး)၊ ကောင်းကင်ဖီးနစ်နတ်ဘုရားကျမ်း (မလေ့ကျင့်ရသေး)

အဆင့်မြှင့်တင်ရေးအမှတ်: ၆၆၄ မှတ်

...

"အမှတ် ခြောက်ရာကျော်ဆိုတာ မလုံလောက်သေးဘူး၊ ရှေးဟောင်းကောင်းကင်ဓားကို မြှင့်တင်ဖို့ နောက်ထပ် အချိန်အနည်းငယ် စောင့်ရဦးမယ်" ကုချင်းဖန် မိမိကိုယ်ကို တွေးလိုက်သည်။

အတိအကျ ပြောရလျှင် သူသည် သုံးလအတွင်း အဆင့်မြှင့်တင်ရေးအမှတ် ၁၀၀ ကျော်သာ ရရှိခဲ့ခြင်းဖြစ်သည်။

သူ့တွင် မူလက အမှတ် ၅၀၀ ကျော် ရှိနေခဲ့သည်ဖြစ်ရာ၊ ဤသုံးလအတွင်း အမှတ်များ တိုးပွားလာမှုမှာ မမြန်လှကြောင်း တွေ့ရသည်။

သို့သော်လည်း ကုချင်းဖန်၏ အမြင်တွင်မူ ဤသည်မှာ လုံလောက်နေပြီဖြစ်သည်။ အတိတ်နှင့် နှိုင်းယှဉ်လျှင် ဤကြီးထွားနှုန်းမှာ အတော်လေး ကောင်းမွန်လှသည်။

ဘာပဲဖြစ်ဖြစ် မျိုးဆက်သစ်ကလေးများ အဆက်မပြတ် အဆင့်တက်ရန်မှာ မလွယ်ကူပေ။

နောက်ဆုံးတွင် ကုမိသားစု၏ သွေးမျိုးဆက်မှာ များပြားခြင်း မရှိသေးပေ။ စုစုပေါင်းမှ ၇ ဦးသာ ရှိသေးသည်။ သို့သော် ဤသည်မှာ ယာယီသာဖြစ်ပြီး၊ အချိန်အနည်းငယ် ပေးလိုက်ပါက ကုမိသားစုသွေးမျိုးဆက်သည် သေချာပေါက် သိသိသာသာ တိုးပွားလာမည်ဖြစ်သည်။

ထို့နောက် ကုချင်းဖန်သည် သူ၏ အချက်အလက်ပြဇယားကို ကြည့်လိုက်သည်။ အမှတ်များ တိုးလာသည်ဆိုကတည်းက ဤသုံးလအတွင်း တစ်စုံတစ်ယောက် အဆင့်တက်ခဲ့ခြင်း ဖြစ်ရမည်။

...

"သင့်မျိုးဆက် 'ကုယန်' သည် သိုင်းပညာသင်တန်းကျောင်းများမှ ပါရမီရှင်များကို စုစည်းကာ 'ကောင်းကင်ကင်းလှည့်အစောင့်တပ်' ကို တည်ထောင်ခဲ့ပြီး၊ ကောင်းကင်ဘုံကိုယ်စား ကင်းလှည့်ကာ လောကကြီးကို သန့်စင်စေခဲ့သည်"

"သင့်မျိုးဆက် 'ကုယန်' သည် နတ်ဘုရားအသွင်ပြောင်းခြင်းနယ်ပယ် ကျင့်ကြံသူတစ်ဦးထံမှ လမ်းညွှန်မှုရရှိကာ အစွမ်းအနည်းငယ် တိုးတက်လာသည်"

"သင့်မျိုးဆက် ' ကုရှန့်ရှင်း' သည် အရိုးသန့်စင်နယ်ပယ်အစောပိုင်းအဆင့်သို့ အောင်မြင်စွာ တက်လှမ်းနိုင်ခဲ့သည်"

(ဆုလာဘ် အမှတ် ၃၀)

"သင့်မျိုးဆက် ' ကုရှန့်အန်း 'သည် အရိုးသန့်စင်နယ်ပယ် အစောပိုင်းအဆင့်သို့ အောင်မြင်စွာ တက်လှမ်းနိုင်ခဲ့သည်"

(ဆုလာဘ် အမှတ် ၃၀)

"သင့်မျိုးဆက် ' ကုရှန့်အန်း’ သည် ကောင်းကင်ဓားကျင့်စဉ်ကို နားလည်သဘောပေါက်ခဲ့ပြီး၊ ကောင်းကင်ဓား အသိအမြင်မှာ အဆင့် ၂ သို့ ရောက်ရှိသွားသည်"

"သင့်မျိုးဆက် 'ကုရှန့်နန်' သည် အလင်းဝင်မှုတွင် နှစ်မြှုပ်သွားပြီး၊ - စိမ်းလန်းသော ပဒုမ္မာ ဓားကျမ်း၏ အသိအမြင်မှာ အဆင့် ၅ သို့ ရောက်ရှိကာ အစွမ်းများစွာ တိုးတက်လာသည်"

"သင့်မျိုးဆက် 'ကုရွှမ်း' သည် တာအိုနန်းတော်နယ်ပယ် ကျင့်ကြံသူထံမှ လမ်းညွှန်မှုရရှိကာ ကျင့်ကြံမှု အနည်းငယ် တိုးတက်လာသည်"

"သင့်မျိုးဆက် 'ကုရှို့' သည် ကျင့်ကြံသူ ၁၃၂၆ ဦး၏ တိုက်ခိုက်ခြင်းကို ခံရသည်"

"သင့်မျိုးဆက် 'ကုရှို့' သည် ကျင့်ကြံသူ ၇၄၉ ဦး၏ တိုက်ခိုက်ခြင်းကို ခံရသည်"

...

"သင့်မျိုးဆက် 'ကုရှို့' သည် ပြင်းထန်စွာ ဒဏ်ရာရရှိခဲ့သည်"

"သင့်မျိုးဆက် 'ကုရှို့' သည် ပျက်စီးခြင်းမှ ပြန်လည်မွေးဖွားလာခဲ့ပြီး သေရေးရှင်ရေး တိုက်ပွဲအတွင်း ကိုယ်အင်္ဂါသန့်စင်နယ်ပယ် ဒုတိယအလွှာသို့ တက်လှမ်းနိုင်ခဲ့သည်"

(ဆုလာဘ် အမှတ် ၈၀)

"သင့်မျိုးဆက် 'ကုရှို့' သည် နေနှင့်လလက်သီးကျမ်း၌ အောင်မြင်မှုရရှိခဲ့ပြီး အသိအမြင် အဆင့် ၆ ကို နားလည်သွားကာ အစွမ်းများစွာ တိုးတက်လာသည်"

"ကောင်းကင်ကင်းလှည့်အစောင့်တပ်"

ဤအမည်ကို မြင်သောအခါ ကုချင်းဖန် အနည်းငယ် ခေါင်းညိတ်လိုက်သည်။

လောလောဆယ်တွင် ကုယန်၌ သတင်းစုဆောင်းရန်နှင့် စောင့်ကြည့်ရန်အတွက် လျှို့ဝှက်အစောင့်တပ်များ ရှိသော်လည်း၊ ၎င်းမှာ မလုံလောက်သေးပေ။ အပေါ်ယံတွင်လည်း လောကကြီးကို ဟန့်တားနိုင်မည့် အင်အားစုတစ်ခု လိုအပ်သည်။

ကောင်းကင်ကင်းလှည့်အစောင့်တပ်မှာ ထိုကဲ့သို့သော အဖွဲ့အစည်းပင် ဖြစ်သည်။

တစ်နိုင်ငံလုံးရှိ သိုင်းသင်တန်းကျောင်းများမှ ပါရမီရှင်များကို ရွေးချယ်ကာ ဤတပ်ဖွဲ့ကို ဖွဲ့စည်းခြင်းမှာ အလွန်ကောင်းမွန်သော နည်းလမ်းဖြစ်သည်။ အခြားသော ဂိုဏ်းဂဏများ သို့မဟုတ် လေလွင့်ကျင့်ကြံသူများကို ခေါ်ယူပါက နောက်ခံသမိုင်းကြောင်းမှာ သန့်ရှင်းချင်မှ သန့်ရှင်းမည်။

သို့သော် သိုင်းသင်တန်းကျောင်းများမှာမူ မတူပေ။

စစ်နတ်ဘုရားသင်တန်းကျောင်းများကို သိုင်းနတ်ဘုရားမင်းဆက်က အထူးတည်ထောင်ထားခြင်းဖြစ်ပြီး၊ ကိုးပြည်နယ်၏ နိုင်ငံသားများသည် သတ်မှတ်ထားသော အသက်အရွယ်သို့ ရောက်သည်နှင့် ဝင်ရောက်ကျင့်ကြံနိုင်သည်။ အဆင့်ဆင့် ရွေးချယ်မှုများမှတစ်ဆင့် ပါရမီမရှိသူများကို ဖယ်ထုတ်ကာ အတော်ဆုံးလူများကို စနစ်တကျ ပျိုးထောင်ပေးခြင်း ဖြစ်သည်။

ဤနည်းဖြင့် လေ့ကျင့်ပေးထားသော ပါရမီရှင်များသည် နန်းတော်အပေါ် အလွန်ပင် သစ္စာရှိကြသည်။ ၎င်းတို့ထဲမှ သစ္စာအရှိဆုံးသူများကို ရွေးချယ်ကာ နန်းတော်၏ ချွန်ထက်သော ဓားတစ်လက်အဖြစ် ကောင်းကင်ကင်းလှည့်အစောင့်တပ်ကို ဖွဲ့စည်းခြင်းမှာ လွန်စွာ ကျိုးကြောင်းဆီလျော်လှသည်။

သို့သော် ကုချင်းဖန် နားလည်သည်မှာ ကောင်းကင်ကင်းလှည့်အစောင့်တပ်ကို အမှန်တကယ် အစွမ်းထက်လာအောင် လုပ်ရန်မှာ တစ်ညတည်းနှင့် မဖြစ်နိုင်ပေ။ ဘာပဲဖြစ်ဖြစ် သိုင်းနတ်ဘုရားမင်းဆက်၏ အခြေခံအုတ်မြစ်မှာ အားနည်းလွန်းနေသေးသည်။

"ဒါပေမဲ့ "

"ပြီးခဲ့တဲ့တုန်းက ကျဆုံးသွားတဲ့ ကျင့်ကြံသူ တစ်သိန်းကျော်ရဲ့ အရင်းအမြစ်တွေအားလုံးက နန်းတော်လက်ထဲ ရောက်နေတာပဲ။ အဲဒီအရင်းအမြစ်အားလုံးကို ကောင်းကင်ကင်းလှည့်အစောင့်တပ်အတွက် အသုံးပြုမယ်ဆိုရင် အစွမ်းထက်တဲ့ စစ်သည်တွေ ပေါ်ထွက်လာဖို့ ဖြစ်နိုင်ခြေ ရှိတယ်"

ကုချင်းဖန် စဉ်းစားနေမိသည်။

ထိုကျင့်ကြံသူ တစ်သိန်းကျော် ချန်ထားခဲ့သော သိုလှောင်လက်စွပ်များထဲတွင် ကောင်းကင်နှင့် မြေကြီးရတနာများစွာ ပါဝင်သည်။ ဤရတနာများသည် သူကဲ့သို့ အဆင့်မြင့်သူအတွက် အသုံးမဝင်သော်လည်း၊ သာမန်ကျင့်ကြံသူများအတွက်မူ ထိပ်တန်းရတနာများ ဖြစ်သည်။

၎င်းတို့ကို သုံးစွဲခြင်းဖြင့် အဆင့်တက်ရန်မှာ ပြဿနာ မဟုတ်ပေ။ တာအိုနန်းတော်နယ်ပယ်အဆင့် စစ်သည်များ မပေါ်ထွက်နိုင်လျှင်ပင် သိုင်းသခင်အုပ်စုတစ်စုကိုတော့ သေချာပေါက် ပျိုးထောင်ပေးနိုင်သည်။ ကံကောင်းလျှင် နတ်ဘုရားအသွင်ပြောင်းခြင်းနယ်ပယ်ကျင့်ကြံသူအချို့ပင် ပေါ်ထွက်လာနိုင်သည်။

သို့သော်လည်း နတ်ဘုရားအသွင်ပြောင်းခြင်းနယ်ပယ်သို့ တက်လှမ်းရန်မှာ မလွယ်ကူလှပေ။

ကိုယ်ခန္ဓာသန့်စင်ခြင်း အဆင့်ငါးဆင့်၊ သိုင်းပညာရှင်နှင့် သိုင်းအရှင်သခင် အဆင့်တို့မှာ တစ်မှတ်တိုင်စီ ဖြစ်သော်လည်း၊ သိုင်းအရှင်သခင်မှ နတ်ဘုရားအသွင်ပြောင်းခြင်းနယ်ပယ်သို့ ကူးပြောင်းခြင်းမှာမူ အကြီးမားဆုံးသော မှတ်တိုင်ကြီး ဖြစ်သည်။

နတ်ဘုရားအသွင်ပြောင်းခြင်းနယ်ပယ်သို့ ရောက်မှသာ ကျင့်ကြံသူတစ်ဦးသည် သာမန်လူသားခန္ဓာကိုယ်မှ ကျော်လွန်ကာ စစ်မှန်သော ထူးကဲသူတစ်ဦး ဖြစ်လာခြင်းဖြစ်သည်။ ၎င်းတို့သည် ပြတ်တောက်သွားသော ခြေလက်များကိုပင် ပြန်လည်ပေါက်စေနိုင်သော စွမ်းအားရှိကြသည်။

လက်ရှိတွင် သိုင်းနတ်ဘုရားမင်းဆက်သည် ပြင်ပနယ်မြေများနှင့် ဆက်သွယ်မိသွားပြီဖြစ်ရာ၊ ပြင်ပမှ အစွမ်းထက်သူများ ကိုးပြည်နယ်သို့ အလုံးအရင်းနှင့် ဝင်လာနေကြသဖြင့် သိုင်းအရှင်သခင်အဆင့်မှာပင် ချီးကျူးစရာ ဖြစ်နေပြီဖြစ်သည်။

ကုချင်းဖန်၏ အမြင်တွင် သိုင်းနတ်ဘုရားမင်းဆက် ပေါ်ထွက်လာသည့် အချိန်မှာ အလွန်ပင် ကောင်းမွန်လှသည်။ မဟာခေတ်ကြီး မရောက်သေးသော်လည်း ဓမ္မခေတ်အဆုံး၏ အဆုံးသတ်ဖြစ်နေသဖြင့် ခိုင်မာအောင် တည်ဆောက်ရန် နှစ်ပေါင်း တစ်ထောင်၊ နှစ်ထောင်ခန့် အချိန်ရနေသည်။ သူ၏ အစွမ်းရှိနေသရွေ့ သိုင်းနတ်ဘုရားမင်းဆက်မှာ မလှုပ်မယှက် တည်ရှိနေဦးမည်ဖြစ်သည်။

ထို့နောက် ကုရှို့ အကြောင်းကို သူ ပြန်ကြည့်လိုက်သည်။

ပြီးခဲ့သော သုံးလအတွင်း သူ အချက်အလက်ပြဇယားကို မကြည့်ဖြစ်သဖြင့် အချက်အလက်များမှာ စုပုံနေပြီး အများစုမှာ ကုရှို့အကြောင်း ဖြစ်နေသည်။ ကုရှို့မှာ အမြဲတမ်း တိုက်ခိုက်ခံရခြင်းနှင့် ဒဏ်ရာရခြင်းများကြားတွင် ကျင်လည်နေရပုံရပြီး၊ ယခုအချိန်ထိ သူ မည်သည့်ပြဿနာများ ရှာထားသည်ကို ကုချင်းဖန် ရှင်းရှင်းလင်းလင်း မသိရသေးပေ။

ဟုန်ယဲသည် အရှေ့နယ်မြေတွင် ခြေကုပ်ယူကာ အင်အားစုငယ်တစ်ခုကို လျှို့ဝှက်တည်ထောင်ပြီး ကုရှို့၏ သတင်းကို စုံစမ်းနေသည်။ သို့သော် သုံးလကြာသွားသည့်တိုင် ကုရှို့၏သတင်းကို မရရှိသေးပေ။

ဟုန်ယဲက ကုရှို့သည် အရှေ့နယ်မြေတွင် မရှိတော့ဘဲ အခြားနယ်မြေတစ်ခုသို့ ရောက်သွားနိုင်သည်ဟု သံသယရှိနေသည်။ ရှေးဟောင်းတောရိုင်းလောက၏ နယ်မြေငါးခုမှာ အလွန်ပင် ကျယ်ပြောလှရာ လျှို့ဝှက်အစောင့်တပ်၏ လက်ရှိအစွမ်းနှင့် အခြားနယ်မြေများအထိ လက်လှမ်းမီရန်မှာ အလွန်ခက်ခဲလှသည်။