ကောင်းကင်သိုင်းဂိုဏ်း

“နီးလာပြီ”

“နောက်ထပ် ခိုင်မာအောင် တည်ဆောက်ဖို့နဲ့ စုဆောင်းဖို့ အချိန်အနည်းငယ်သာ ရမယ်ဆိုရင် သိုင်းနတ်ဘုရားမင်းဆက်ဟာ စစ်နတ်ဘုရားအင်ပါယာအဖြစ် တက်လှမ်းနိုင်တော့မယ်”

ကုယန်သည် သိုင်းနတ်ဘုရားမင်းဆက် စတင်တည်ထောင်စဉ်ကထက် များစွာ ပိုမိုခိုင်မာကျစ်လျစ်လာသည့် တတိယအဆင့် စိမ်းလန်းသော ပဒုမ္မာကို ကြည့်ရင်း တွေးလိုက်သည်။ ၎င်းသည် သဘာဝအတိုင်းပင် များစွာ ပို၍ အစွမ်းထက်လာခဲ့ပြီ ဖြစ်သည်။

မင်းဆက်တစ်ခု၏ ချီကံကြမ္မာဖြစ်သော တတိယအဆင့် စိမ်းလန်းသော ပဒုမ္မာသည် အမြင့်ဆုံးအနေနှင့် နတ်ဘုရားအသွင်ပြောင်းခြင်းနယ်ပယ်ကျင့်ကြံသူများနှင့်သာ ရင်ပေါင်တန်းနိုင်သည်။

တစ်နည်းအားဖြင့် ပြောရလျှင် နိုင်ငံတစ်ခုလုံး၏ ချီကံကြမ္မာကို အသုံးပြု၍ ဖိနှိပ်မည်ဆိုလျှင်ပင် မင်းဆက်တစ်ခုသည် နတ်ဘုရားအသွင်ပြောင်းခြင်းနယ်ပယ် ကျင့်ကြံသူများကိုသာ အများဆုံး ဖိနှိပ်နိုင်သည်။

သို့သော် အင်ပါယာအဆင့်သို့ ရောက်ရှိသွားသည်နှင့် အင်ပါယာတစ်ခု၏ အားအနည်းဆုံးသော ချီကံကြမ္မာသည်ပင် တာအိုနန်းတော်နယ်ပယ်ကို ဖိနှိပ်နိုင်စွမ်းရှိပြီး၊ အမှန်တကယ် အစွမ်းထက်သော အင်ပါယာများမှာမူ သူတော်စင်များကိုပင် ဖိနှိပ်နိုင်ကြသည်။

လက်ရှိ ဓမ္မခေတ်အဆုံးတွင် သူတော်စင်များမှာ ရှားပါးလှသဖြင့် ခိုင်မာသော အခြေခံရှိသည့် အချို့သောအင်ပါယာများသည် လောကတွင် အနှိုင်းမဲ့သကဲ့သို့ ဖြစ်နေကြသည်။

လွန်ခဲ့သော မကြာမီက ရောက်ရှိလာသည့် နတ်ဘုရားလေမင်းဆက်ကို ဥပမာထားကြည့်လျှင်၊ ထိုရှေးဟောင်းအင်ပါယာ၏ ကံကြမ္မာအရှိန်အဝါသည် သူတော်စင်များနှင့်ပင် ယှဉ်ပြိုင်နိုင်စွမ်းရှိမည်ဟု ကုယန် သံသယရှိနေသည်။

ကွေ့ယွမ်မင်းဆက် နှင့် နှိုင်းယှဉ်လျှင် နတ်ဘုရားလေမင်းဆက်မှာ များစွာ ပို၍ အစွမ်းထက်လှသည်။

ကွေ့ယွမ်မင်းဆက်သည် နှစ်ပေါင်း တစ်သိန်းခန့် တည်တံ့ခဲ့သဖြင့် နတ်ဘုရားလေမင်းဆက်ထက် ပို၍ ရှေးကျသည်ဟု ဆိုနိုင်သော်လည်း ပြဿနာမှာ နှစ်ပေါင်း တစ်သိန်းအတွင်း ကွေ့ယွမ်မင်းဆက်တွင် တစ်ဝက်တစ်ပြတ်သူတော်စင်အနည်းငယ်သာ ပေါ်ထွက်ခဲ့သော်လည်း၊ နတ်ဘုရားလေမင်းဆက်တွင်မူ နှစ်ပေါင်း ရှစ်သောင်းအတွင်း သူတော်စင် ငါးဦးအထိ ပေါ်ထွက်ခဲ့ခြင်း ဖြစ်သည်။

အခြေခံအုတ်မြစ်ချင်း ယှဉ်လျှင် ရှေ့ကတစ်ခုမှာ နောက်ကတစ်ခုကို လုံးဝ မမီပေ။

ယခုအခါ ကုယန် လုပ်ဆောင်နေသမျှမှာ နောက်နောင်တွင် အင်ပါယာအဖြစ် တက်လှမ်းနိုင်ရန်အတွက် အခြေခံအုတ်မြစ်များကို ချနေခြင်း ဖြစ်သည်။

ကိုးပြည်နယ်အတွင်း စစ်နတ်ဘုရားသင်တန်းကျောင်းများကို တည်ထောင်ခဲ့သည်မှာ နှစ်အနည်းငယ် ရှိပြီဖြစ်ရာ အစပျိုး ရလဒ်ကောင်းများ ရရှိနေပြီ ဖြစ်သည်။ သို့သော် နန်းတော်၏ အမာခံ အခြေခံအုတ်မြစ် ဖြစ်လာရန်အတွက်မူ အချိန်အနည်းငယ် ထပ်ပေးရဦးမည် ဖြစ်သည်။

ထိုအချိန်တွင် နန်းတွင်းစာကြည့်ဆောင် အပြင်ဘက်မှ စူးရှရှအသံတစ်ခု ထွက်ပေါ်လာသည်။

“အရှင်မင်းကြီးကို သတင်းပို့ပါတယ်... ကောင်းကင်ကင်းလှည့်အစောင့်တပ်မှ စစ်သေနာပတိ 'နန်ယွဲ့ရှန်း'က ဝင်ရောက်ခစားခွင့် တောင်းခံနေပါတယ်”

“ဝင်ခိုင်းလိုက်ပါ”

ကုယန်က ဖြည်းညှင်းစွာ မိန့်ကြားလိုက်သည်။ ထို့နောက် လူတစ်ဦးသည် စာကြည့်ဆောင်တံခါးကို တွန်းဖွင့်ကာ ဝင်လာပြီး၊ ကုယန်၏ ရှေ့သို့ အမြန်လှမ်းလာကာ ဒူးတစ်ဖက် ထောက်၍ လက်အုပ်ချီ ဂါရဝပြုလိုက်သည်။

“ကျွန်တော်မျိုး နန်ယွဲ့ရှန်း... အရှင်မင်းကြီးကို ဂါရဝပြုပါတယ်”

“ထပါ”

“ကျေးဇူးတင်လှပါတယ် အရှင်မင်းကြီး”

နန်ယွဲ့ရှန်းသည် မတ်တတ်ရပ်လိုက်သည်။ ကုယန်က သူ့ရှေ့မှ လူငယ်ကို ကြည့်လိုက်သည်။

အသက်ငယ်သော်လည်း သူ၏မျက်နှာတွင် ကလေးကလားနိုင်မှု လုံးဝမရှိဘဲ တည်ကြည်လေးနက်သည့် အရှိန်အဝါတစ်ခု ရှိနေသည်။

“ကိုးပြည်နယ်ရဲ့ အခြေအနေတွေ အခု ဘယ်လိုရှိလဲ”

“အစီရင်ခံပါတယ် အရှင်မင်းကြီး... ကောင်းကင်ကင်းလှည့်အစောင့်တပ်ဟာ ကိုးပြည်နယ်အနှံ့မှာ ကင်းလှည့်ဖို့ အမိန့်ရထားပါတယ်။ ရှေးဟောင်းတောရိုင်းလောကကနေ ပြဿနာရှာတဲ့ ကျင့်ကြံသူ အများစုကိုတော့ တိုက်ရိုက်နှိမ်နင်းနိုင်ခဲ့ပေမဲ့၊ လွတ်မြောက်သွားတဲ့သူ အနည်းငယ်တော့ ရှိနေပါသေးတယ်။

လက်ရှိ ကောင်းကင်ကင်းလှည့်အစောင့်တပ်ရဲ့ အင်အားနဲ့ဆိုရင် သိုင်းအရှင်သခင် တစ်ဦးကို ဝိုင်းရံနှိမ်နင်းဖို့က ပြဿနာ မရှိပေမဲ့၊ နတ်ဘုရားအသွင်ပြောင်းခြင်းနယ်ပယ် ဒါမှမဟုတ် အဲဒီထက် မြင့်တဲ့ကျင့်ကြံသူတွေနဲ့ ရင်ဆိုင်ရရင်တော့ ကျွန်တော်မျိုးတို့ အင်အားမမျှပါဘူး”

နန်ယွဲ့ရှန်းက ခါးသီးသော အပြုံးတစ်ခုနှင့် ပြောလိုက်သည်။

ထိုစကားကို ကြားသောအခါ ကုယန်၏ မျက်နှာတွင် မည်သည့်အမူအရာမျှ ပေါ်မလာပေ။

ကောင်းကင်ကင်းလှည့်အစောင့်တပ်ကို တည်ထောင်ခဲ့သည်မှာ လပိုင်းမျှသာ ရှိသေးသဖြင့် ၎င်း၏အစွမ်းမှာ သိပ်မခိုင်မာသေးသည်မှာ သဘာဝပင်။ နန်ယွဲ့ရှန်းသည် တစ်ချိန်က စစ်နတ်ဘုရားသင်တန်းကျောင်း၏ ပါရမီရှင်တစ်ဦးဖြစ်ပြီး သိုင်းပညာလောကထဲသို့ ဝင်ရောက်ခဲ့သည်မှာ နှစ်အနည်းငယ်သာ ရှိသေးသော်လည်း အရိုးသန့်စင်နယ်ပယ်သို့ ရောက်ရှိနေပြီ ဖြစ်သည်။

ဤကဲ့သို့ ပါရမီမျိုးနှင့်ဆိုလျှင် သူသည် အနည်းဆုံး နတ်ဘုရားအသွင်ပြောင်းခြင်းနယ်ပယ်သို့ ရောက်ရှိနိုင်သလို၊ တာအိုနန်းတော်နယ်ပယ်သို့ ဝင်ရောက်နိုင်မည့် အခွင့်အရေးပင် ရှိနေသည်။

၎င်းအပြင် သူသည် နောက်ခံသမိုင်းကြောင်း ကောင်းမွန်ပြီး နန်းတော်အပေါ် အလွန်သစ္စာရှိသူ ဖြစ်သောကြောင့် ကုယန်က သူ့ကို ကောင်းကင်ကင်းလှည့်အစောင့်တပ်၏ စစ်သေနာပတိအဖြစ် ခန့်အပ်ခဲ့ခြင်း ဖြစ်သည်။

နန်ယွဲ့ရှန်း၏ အစွမ်းကို မြှင့်တင်ပေးရန်အတွက် ကုယန်သည် သူ့ထံတွင် ကျန်ရှိနေသော သိုင်းအရှင်သခင်အဆင့်တက်ဆေးများကို ပေးခဲ့သဖြင့်၊ သူသည် သိုင်းရှင်သခင် အထွတ်အထိပ်အဆင့်သို့ တစ်ရှိန်ထိုး တက်လှမ်းနိုင်ခဲ့ခြင်း ဖြစ်သည်။

သို့သော် သိုင်းအရှင်သခင် အထွတ်အထိပ်အဆင့် ရောက်နေပြီး နဝမအဆင့်စစ်မှန်သော ရည်ရွယ်ချက်ကို ကျွမ်းကျင်နေသော်လည်း၊ နတ်ဘုရားအသွင်ပြောင်းခြင်းနယ်ပယ် ကျင့်ကြံသူတစ်ဦး၏ ရှေ့တွင်မူ သူသည် ယှဉ်နိုင်စွမ်း မရှိသေးပေ။

“ကောင်းကင်ကင်းလှည့်အစောင့်တပ်က အသစ်ဖွဲ့စည်းထားတာဆိုတော့ အင်အားမလုံလောက်တာက သဘာဝပါပဲ။ မင်းရဲ့ အမြင်အရဆိုရင်... ကောင်းကင်ကင်းလှည့်အစောင့်တပ်ထဲက လူဘယ်နှယောက်လောက်က နောင်မှာ နတ်ဘုရားအသွင်ပြောင်းခြင်းနယ်ပယ်ကို တက်လှမ်းနိုင်ဖို့ မျှော်လင့်ချက် ရှိသလဲ”

“လောလောဆယ် ကောင်းကင်ကင်းလှည့်အစောင့်တပ်မှာ အဖွဲ့ဝင် သုံးထောင် ရှိပါတယ်။ ရှေ့ကို ကြည့်မယ်ဆိုရင်တော့ အများဆုံး လူတစ်ရာလောက်ပဲ နတ်ဘုရားအသွင်ပြောင်းခြင်းနယ်ပယ်ကို ရောက်နိုင်ဖို့ အခွင့်အရေး ရှိပါတယ်”

နန်ယွဲ့ရှန်းက ခေါင်းကို အနည်းငယ် ခါယမ်းရင်း အားမလိုအားမရ ဖြစ်နေသော အမူအရာဖြင့် ပြောလိုက်သည်။

နတ်ဘုရားအသွင်ပြောင်းခြင်းနယ်ပယ်သို့ ဝင်ရောက်ရန်မှာ မလွယ်ကူပေ။ ကောင်းကင်ကင်းလှည့်အစောင့်တပ်မှ လူများသည် သိုင်းသင်တန်းကျောင်းများမှ ရွေးချယ်ထားသော ပါရမီရှင်များ ဖြစ်သော်လည်း ပါရမီချင်းမှာ အဆင့်ကွာခြားမှု ရှိကြသည်။

ပါရမီရှင်ဟု အမည်တပ်ထားသူ အများစုအတွက် နောင်တွင် သိုင်းအရှင်သခင်အဆင့်သို့ ရောက်ရှိနိုင်လျှင်ပင် တော်တော်လေး ကောင်းမွန်လှပြီ ဖြစ်သည်။ နတ်ဘုရားအသွင်ပြောင်းခြင်းနယ်ပယ်သို့ တက်လှမ်းရန်မှာမူ အမှန်တကယ် မလွယ်ကူလှပေ။

ဤသည်မှာပင် သိုင်းနတ်ဘုရားမင်းဆက်မှ ထောက်ပံ့ပေးထားသော အရင်းအမြစ်များနှင့် ဝိညာဉ်စွမ်းအင်များ တိုးပွားလာမှုကြောင့် ဖြစ်သည်။ အတိတ်ကဆိုလျှင် အများစုမှာ သိုင်းသခင်အဆင့် လောက်သာ ရောက်နိုင်ပေလိမ့်မည်။

“နတ်ဘုရားအသွင်ပြောင်းခြင်းနယ်ပယ်ကို တက်လှမ်းဖို့က မလွယ်ဘူးဆိုပေမဲ့ ကောင်းကင်ကင်းလှည့်အစောင့်တပ်ရဲ့ စစ်သေနာပတိတစ်ယောက်အနေနဲ့ သိုင်းအရှင်သခင် အထွတ်အထိပ်အဆင့်ဆိုတာကတော့ တကယ်ကို မလုံလောက်သေးပါဘူး”

ကုယန်က ထိုသို့ပြောရင်း တစ်ဖက်လူထံသို့ သိုလှောင်အိတ်တစ်အိတ်ကို ပစ်ပေးလိုက်သည်။

“အဲဒီထဲမှာ ငါ မင်းအတွက် ပြင်ဆင်ထားတာတွေ ရှိတယ်။ အဆင့်နိမ့် နတ်ဘုရားသွေးကျောက်တုံး ပိဿာ ၃၀၀ နဲ့ နတ်ဘုရားသွေးဆေးလုံးသုံးပုလင်း ပါဝင်တယ်။ အမြန်ဆုံး အချိန်အတွင်းမှာ နတ်ဘုရားအသွင်ပြောင်းခြင်းနယ်ပယ်ကို ရောက်အောင် ကြိုးစားပါ”

“ကျွန်တော်မျိုး အရှင်မင်းကြီးရဲ့ မျှော်လင့်ချက်တွေကို သေချာပေါက် အကောင်အထည်ဖော်ပါ့မယ်”

နန်ယွဲ့ရှန်းသည် သိုလှောင်အိတ်ကို ကျစ်ကျစ်ပါအောင် ဆုပ်ကိုင်ထားပြီး သူ၏မျက်နှာတွင် ကျေးဇူးတင်မှုများ ပြည့်နှက်နေသည်။

နတ်ဘုရားသွေးကျောက်တုံး နှင့် နတ်ဘုရားသွေးဆေးလုံး။

ဤပစ္စည်းနှစ်မျိုးလုံးမှာ ကောင်းကင်ကင်းလှည့်အစောင့်တပ်မှ လူများအတွက် အလွယ်တကူ မထိတွေ့နိုင်သော ရတနာများ ဖြစ်သည်။

နန်ယွဲ့ရှန်းကဲ့သို့ သိုင်းအရှင်သခင် အထွတ်အထိပ်အဆင့် ကျင့်ကြံသူတစ်ဦးအတွက်ပင်လျှင် တစ်လစာ လစာမှာ အဆင့်နိမ့် နတ်ဘုရားသွေးကျောက်တုံး ၅ ပိဿာနှင့် နတ်ဘုရားသွေးဆေးလုံး တစ်ပုလင်းသာ ရရှိခြင်း ဖြစ်သည်။

နတ်ဘုရားသွေးကျောက်တုံး၏ အသုံးဝင်ပုံကို နန်ယွဲ့ရှန်း ကောင်းစွာ သိရှိသည်။ ၎င်းသည် နတ်ဘုရားအသွင်ပြောင်းခြင်းနယ်ပယ် ကျင့်ကြံသူများအတွက် အဓိက အရင်းအမြစ် ဖြစ်သည်။ အကယ်၍ သိုင်းအရှင်သခင် အထွတ်အထိပ်အဆင့် ကျင့်ကြံသူများသည် နတ်ဘုရားသွေးကျောက်တုံးများကို သန့်စင်နိုင်လျှင် နတ်ဘုရားအသွင်ပြောင်းခြင်းနယ်ပယ်သို့ အဆင့်တက်ရန် ပိုမိုမြန်ဆန်စေမည် ဖြစ်သည်။