စိတ်ဝိညာဉ်အစိတ်အပိုင်း...

Vol. 60 Ch. 860

ကျိုရှန်းအရှင်သခင်က လျို့ဝှက်ဆန်းကြယ်သော နေရာကို ရှာတွေ့ခဲ့ခြင်းဖြစ်သော်လည်း ကန်ယုလုံက အခြားနည်းလမ်းများဖြင့် အထဲသို့ ကြိုတင်ရောက်ရှိနေခဲ့သည်။ ထိုနေရာသို့ ဝင်ရောက်လိုက်သည့်အချိန်တွင် သူ၏ စိတ်ထဲ၌ စိတ်အသိတစ်ခုပေါ်လာပြီး ၎င်းက ကန်ယုလုံနှင့် ဆက်သွယ်နေသော ကလေးအသံပင်ဖြစ်သည်။

ထိုကလေးအသံက သူ့ကိုသူ လျို့ဝှက်နေရာ၏ အမွေဆက်ခံသူကို စောင့်ရှောက်သူဖြစ်သည်ဟု ပြောဆိုခဲ့ပြီး ကန်ယုလုံကို အမွေဆက်ခံသူအဖြစ် ရွေးချယ်ထားပြီဖြစ်ကြောင်း ပြောခဲ့သည်။

အစပိုင်းတွင် ကန်ယုလုံက မယုံကြည်သော်လည်း နောက်ပိုင်းတွင် ထိုကလေးအသံ၏ လမ်းညွှန်မှုများက သူ့အတွက် အကျိုးရှိခဲ့ပြီး နောက်ဆုံးတွင် ယုံကြည်သွားခဲ့သည်။ ကံဆိုးစွာဖြင့် လျို့ဝှက်နေရာကို မသိမ်းယူနိုင်မီ ကန်ယုလုံက ကျိုရှန်းအရှင်သခင်နှင့် တွေ့ဆုံခဲ့ရာ သူတို့ကြား ကြောင်းကျိုးဆက်နွယ်မှုကို ဖြစ်ပေါ်စေခဲ့သည်။

နောက်ဆုံးတွင် ကန်ယုလုံက ကျိုရှန်းအရှင်သခင်၏ ဖမ်းဆီးခြင်းကို ခံခဲ့ရသော်လည်း ထိုကလေးအသံက ပုန်းကွယ်နေနိုင်ခဲ့သည်။ အစပိုင်းတွင် လင်းယွမ်ကလည်း ထိုကလေးအသံကို ရှာမတွေ့နိုင်ဟု ထင်ခဲ့သော်လည်း အံ့ဩစရာကောင်းစွာပင် လင်းယွမ်က ထိုးဖောက်မြင်နိုင်ခဲ့သည်။

လင်းယွမ်ကလည်း အစတွင် စိတ်အသိလှိုင်းတစ်ခုကိုသာ မှိန်ဖျော့စွာ ခံစားခဲ့ရသော်လည်း မူလခန္ဓာကိုယ်ရောက်လာချိန်တွင် ၎င်းကို အတည်ပြုနိုင်ခဲ့သည်။

" စီနီယာ ကျွန်တော်..." ကန်ယုလုံက စကားပြောရန် ပြင်လိုက်သည်။

ထိုခဏတွင် ကလေးအသံက သူ၏ စိတ်ထဲတွင် ထွက်ပေါ်လာခဲ့သည်။ " ဘာမှပြောမနေတော့နဲ့။ ငါ့ကို ရှာတွေ့သွားပြီဆိုတော့ ဆက်ပြီး ပုန်းနေစရာမလိုတော့ဘူး။ "

လင်းယွမ်၏ နယ်ပယ်နှင့် အဆင့်အရ ထိုစကားကို ပြောလာလျှင် သူက သေချာပေါက် အထောက်အထားတစ်ခု ရှိပေလိမ့်မည်။ အထောက်အထားမရှိလျှင်တောင် လင်းယွမ်က သံသယဝင်နေလျှင် သူက ထွက်လာရမည်ဖြစ်သည်။

ကန်ယုလုံက မျက်လုံးများမှိတ်၍ ပြန်ဖွင့်လိုက်သောအခါ သူ၏ မျက်လုံးများက နက်ရှိုင်းပြီး တည်ငြိမ်နေခဲ့သည်။ လင်းယွမ်က ကန်ယုလုံကို စောင့်ကြည့်နေပြီး ၎င်းကို မြင်သောအခါ သူ၏ အမူအရာက လေးနက်သွားခဲ့သည်။

" မင်းက ဖရိုဖရဲအရှင်သခင်လား။ ဒါမှမဟုတ် ဖရိုဖရဲမဟာသူတော်စင်လား။ "

လက်ရှိကန်ယုလုံက လင်းယွမ်ကို အနက်ရောင်မျှော်စင်၏ နဝမအထပ်တွင် နတ်ဆိုးကျောက်စိမ်းမျှော်စင်သခင်ချန်ခဲ့သော အမှတ်အသားနှင့် ရင်ဆိုင်နေရသကဲ့သို့ ထူးခြားသော ခံစားချက်ကို ပေးစွမ်းနေသည်။ သူ၏ အော်ရာက ဖရိုဖရဲဟင်းလင်းပြင်ကဲ့သို့ ကျယ်ပြောနေသည်။

သို့သော် အော်ရာအရ လက်ရှိကန်ယုလုံက နတ်ဆိုးကျောက်စိမ်းမျှော်စင်သခင်လောက် သန်မာခြင်းမရှိသော်လည်း ယေဘုယျအားဖြင့် အဆင့်တူပင်ဖြစ်သည်။ ထို့ကြောင့်ပင် လင်းယွမ်က သူ့ကို မဟာသူတော်စင်လားဟု မေးခဲ့ခြင်းဖြစ်သည်။

" မဟာသူတော်စင်..." ကန်ယုလုံက ပြုံးလိုက်သည်။ " တစ်ချိန်ကတော့ ဟုတ်ခဲ့ဖူးတယ်။ ဒါပေမယ့် အခုတော့ မဟုတ်တော့ဘူး။ "

" ဟုတ်ခဲ့ဖူးတယ်။ " လင်းယွမ်က ကန်ယုလုံကို ကြည့်ပြီး အနည်းငယ် နားမလည်နိုင်ဖြစ်သွား၏။

မဟာသူတော်စင်က စိတ်ဝိညာဉ်အပိုင်းအစတစ်ခုသာ ကျန်နေခဲ့လျှင်တောင် လျင်မြန်စွာ ပြန်လည်ကောင်မွန်နိုင်သည်။

" ရိုးရိုးပြောရရင် ငါက ငါကိုယ်တိုင်မဟုတ်တော့ဘူး။ ငါက ငါ့ရဲ့ မူလခန္ဓာကိုယ်ကနေ သန့်စင်ထားတဲ့ စိတ်ဝိညာဉ်အစိတ်အပိုင်းတစ်ခုပဲ။ " ကန်ယုလုံက တိုက်ရိုက် ပြောပြလိုက်သည်။

" စိတ်ဝိညာဉ်အစိတ်အပိုင်း..." လင်းယွမ်က စိတ်ထဲတွင် တွေးလိုက်သည်။

စိတ်ဝိညာဉ်အစိတ်အပိုင်းက ကိုယ်ပွားတစ်ခုနှင့် မတူပေ။ မူလခန္ဓာကိုယ်နှင့် ကိုယ်ပွားက စိတ်အသိတစ်ခုတည်း မျှဝေထားခြင်းဖြစ်သောကြောင့် တည်ရှိမှုတစ်ခုတည်းအဖြစ် ပြောနိုင်သည်။ အကယ်၍ ကိုယ်ပွားက မှတ်ဉာဏ်ညစ်ညမ်းခြင်းခံရလျှင် မူလခန္ဓာကိုယ်လည်း သက်ရောက်ခံရပေလိမ့်မည်။

သို့သော် မူလခန္ဓာကိုယ်နှင့် စိတ်ဝိညာဉ်အစိတ်အပိုင်းက တည်ရှိမှုနှစ်ခုအဖြစ် သတ်မှတ်ထားသည်။ စိတ်ဝိညာဉ်အစိတ်အပိုင်းက စိတ်အသိတစ်ခုကို ပိုင်ဆိုင်ပြီး မူလခန္ဓာကိုယ်မှ ဖြစ်သဖြင့် သူ၏ စိတ်အသိ၊ စရိုက်၊ အလေ့အကျင့်နှင့် မှတ်ဉာဏ်များက မူလခန္ဓာကိုယ်မှ ဆင်းသက်လာခြင်းဖြစ်သည်။

ပုံမှန်အားဖြင့် အင်အားကြီးသူများက စိတ်ဝိညာဉ်အစိတ်အပိုင်းကို သန့်စင်ရန် ဆန္ဒမရှိကြပေ။ အကြောင်းမှာ သခင်ကို ပြန်လည်ဝါးမျိုနိုင်သောကြောင့် ဖြစ်သည်။

" မှန်တယ်။ " ကန်ယုလုံက ခေါင်းညိမ့်လိုက်သည်။

စိတ်ဝိညာဉ်အစိတ်အပိုင်းက မူလခန္ဓာကိုယ်မှ အရာအားလုံးကို ရရှိနိုင်သော်လည်း စွမ်းအား နယ်ပယ်နှင့် နိယာမနားလည်မှုများကို ရရှိနိုင်ခြင်းမရှိပေ။ ထို့ကြောင့် မဟာသူတော်စင်အဆင့်ကို ပြန်လည်ရရှိရန် မဖြစ်နိုင်ပေ။

အကယ်၍ စိတ်ဝိညာဉ်အစိတ်အပိုင်းက နိယာမနားလည်မှုများကို ရရှိနိုင်လျှင် မဟာသူတော်စင်များက စိတ်ဝိညာဉ်အစိတ်အပိုင်းများကို များစွာသန့်စင်ပြီး လောကကြီး ဖရိုဖရဲဖြစ်သွားပေလိမ့်မည်။ မည်သို့ပင်ဖြစ်စေ စွမ်းအားနှင့် နိယာမနားလည်မှုများကို ရရှိနိုင်ခြင်းမရှိလျှင်တောင် မဟာသူတော်စင်၏ အမြင်က ကျန်ရှိနေဆဲ ဖြစ်သည်။

ထို့အပြင် ကြွယ်ဝသော ကျင့်ကြံခြင်းအတွေ့အကြံများကြောင့် အခြားသူများကို လွယ်ကူစွာ လမ်းညွှန်ပေးနိုင်သည်။ ထို့ကြောင့် မဟာသူတော်စင်တစ်ပါးက စိတ်ဝိညာဉ်အစိတ်အပိုင်းကို သန့်စင်လျှင် ၎င်းက အမွေဆက်ခံသူကို လေ့ကျင့်ပေးရန်အတွက်သာ ဖြစ်သည်။

အရေးကြီးဆုံးမှာ မဟာသူတော်စင်တစ်ပါးက မူလခန္ဓာကိုယ်နှင့် ကိုယ်ပွားများ အားလုံး သေဆုံးသွားလျှင်တောင် စိတ်ဝိညာဉ်အစိတ်အပိုင်က သက်ရောက်မှုမရှိပေ။

" မင်းရဲ့ မူလခန္ဓာကိုယ်က အခုဘယ်လိုဖြစ်သွားလဲ။ " လင်းယွမ်က မေးလိုက်သည်။

" ငါ့ရဲ့ မူလခန္ဓာကိုယ်လား။ " ကန်ယုလုံက ခဏတိတ်ဆိတ်သွားပြီး ပြန်ဖြေလိုက်သည်။ " အခုတော့ အချိန်စက်ဝန်းတစ်ခုထဲမှာ ပိတ်မိနေလောက်ပြီ။ "

" နားလည်ပြီ။ " လင်းယွမ်က သဘောသပေါက်သွားသည်။

အချိန်စက်ဝန်အတွင်း ပိတ်မိခြင်းက အလွှာဆယ့်သုံးသို့ တက်လှမ်းရန် ကြိုးစားခြင်းကို ဆိုလိုသည်။ ဖရိုဖရဲအဆင့် အထွတ်အထိပ်တွင် အလွှာဆယ့်သုံးသို့ တက်လှမ်းသောအခါ တစ်စုံတစ်ယောက်က ရှောင်လွှဲနိုင်ခြင်းမရှိဘဲ အချိန်စက်ဝန်းတစ်ခုထဲသို့ ကျရောက်သွားပေလိမ့်မည်။ ထိုအချိန်စက်ဝန်းကို ချိုးဖျက်နိုင်မှသာ အလွှာဆယ့်သုံးသို့ တက်လှမ်းနိုင်မည်ဖြစ်သည်။

အချိန်စက်ဝန်းကို ချိုးဖျက်နိုင်ခြင်းမရှိလျှင် အချိန်စက်ဝန်းအတွင်း၌ ပိတ်မိနေပေလိမ့်မည်။ ပုံမှန်အခြေအနေတွင် ဖရိုဖရဲမဟာသူတော်စင်များဖြစ်စေ ဖရိုဖရဲမဟာသူတော်စင်များဖြစ်စေ အလွှာဆယ့်သုံးသို့ တက်လှမ်းရန် ကြိုးစားနိုင်သည်။

" အချိန်စက်ဝန်းဆိုတာ တကယ်ဘယ်လိုမျိုးလဲ။ " လင်းယွမ်က သိလိုစိတ်ဖြင့် မေးလိုက်သည်။

ယခင် သူက လမ်းစဉ်တစ်သောင်းမျက်လုံးနှင့် ထိုအကြောင်းကို ဆွေးနွေးခဲ့သည်။ ဖရိုဖရဲအဆင့် အထွတ်အထိပ်သို့ မရောက်မချင်း ထိုအကြောင်းကို နက်ရှိုင်းစွာ နားလည်ရန် မလိုအပ်ကြောင်းသာ ပြောခဲ့သည်။

" ငါလည်းမသိဘူး။ ငါ့ရဲ့ မူလခန္ဓာကိုယ်က အဲ့ဒီမှတ်ဉာဏ်တွေကို မထားခဲ့ဘူး။ ဒါမှမဟုတ် အဲ့ဒီအကြောင်းကို မသိစေချင်တာလည်း ဖြစ်နိုင်တယ်။ " ကန်ယုလုံက ခေါင်းခါပြီး ပြန်ဖြေလိုက်သည်။

" မင်းရဲ့ မူလခန္ဓာကိုယ်က တစ်နေ့မှာ အချိန်စက်ဝန်းက လွတ်မြောက်နိုင်ပါလိမ့်မယ်။ " လင်းယွမ်က ကန်ယုလုံထံမှ စိတ်ဓာတ်ကျမှုကို ခံစားရပြီး အားပေးစကား ပြောလိုက်သည်။

ယေဘုယျအားဖြင့် အချိန်စက်ဝန်းထဲတွင် ပိတ်မိနေသော ဖရိုဖရဲအဆင့်များက လွတ်မြောက်နိုင်ခြေရှိသည်။ သို့သော် ၎င်းက သီအိုရီအရသာဖြစ်သည်။ စကြာဝဠာခေတ်ဆယ်ခုအတွင်း မလွတ်မြောက်နိုင်လျှင် နောက်ပိုင်းတွင် အခွင့်အရေးက အလွန်နည်းသွားပြီဖြစ်သည်။

" မျှော်လင့်ချက်တော့ သိပ်မရှိလောက်ဘူး။ " ကန်ယုလုံက လင်းယွမ်ကို ကြည့်ပြီး သူ၏ အမူအရာက ပုံမှန်အတိုင်း ပြန်ဖြစ်သွားသည်။ " ငါမင်းနဲ့ အပေးအယူတစ်ခုလုပ်ချင်တယ်။ "

" ဘယ်လိုအပေးအယူလဲ။ " လင်းယွမ်က ကန်ယုလုံကို ကြည့်လိုက်သည်။

" မင်းရဲ့ စွမ်းအားနဲ့ဆိုရင် ငါပေးမယ့် သန့်စင်နည်းစနစ်ကို အသုံးပြုပြီး ကြောင်းကျိုးဝတ်ရုံကို ဖန်တီးနိုင်လိမ့်မယ်။ ကြောင်းကျိုးဝတ်ရုံက ကြောင်းကျိုးဆက်နွယ်မှုကို ကာကွယ်ပေးနိုင်တယ်။ " ကန်ယုလုံက ပြောလိုက်သည်။

" ငါ ရွေးချယ်ထားတဲ့ ဆက်ခံသူက အရမ်းအားနည်းသေးတယ်။ ကြောင်းကျိုးနိယာမအပေါ် နားလည်မှုကလည်း မလုံလောက်သေးဘူး။ အဲ့ဒါကြောင့်သာမဟုတ်ရင် ကျိုရှန်းအရှင်သခင်ရဲ့ ဖမ်းဆီးခြင်းကို ခံရမှာမဟုတ်ဘူး။ " ကန်ယုလုံက သက်ပြင်းချလိုက်သည်။

ယခုအချိန်တွင် ကန်ယုလုံက ဘေးကင်းသော်လည်း လင်းယွမ်၏ ကာကွယ်မှုအောက်မှ ထွက်ခွာသွားလျှင် ကျိုရှန်းအရှင်သခင်က ကြောင်းကျိုးဆက်နွယ်မှုမှတစ်ဆင့် သူ့ကို ပြန်လည်ခြေရာခံနိုင်လေသည်။ ကန်ယုလုံက လင်းယွမ်ကို လျို့ဝှက်နေရာ ပေးပြီးဖြစ်သော်လည်း ကျိုရှန်းအရှင်သခင်က သူ၏ ဒေါသကို ဖြေဖျောက်ရန် သူ့ကို ရှာဖွေနိုင်သည်။

" ကြောင်းကျိုးဝတ်ရုံ..." လင်းယွမ်၏ အမူအရာက ပြောင်းလဲခြင်း မရှိပေ။

" အပေးအယူဆိုတော့ မင်းက ငါ့ကို ဘာပြန်ပေမှာလဲ။ "

" အဲ့ဒီအမွေအနှစ်နေရာက ငါ့ရဲ့ မူလခန္ဓာကိုယ်ထားခဲ့တာ မှန်တယ်။ ပြီးတော့ မဟာသူတော်စင်အဆင့် အမွေအနှစ်အချို့လည်း ရှိနေတယ်။ " ကန်ယုလုံက ခဏရပ်ပြီး ဆက်ပြောလိုက်သည်။ " ဒါပေမယ့် အမွေအနှစ်အားလုံးက မပြည့်စုံဘူး။ အဓိကအစိတ်အပိုင်းတွေ ပျောက်နေတယ်။ "

၎င်းက အမွေအနှစ်နေရာကို အတင်အကျပ် ဝင်ရောက်ပြီး အထဲမှ အရာများ ရန်သူလက်ထဲသို့ ကျဆင်းသွားမည့် အန္တရာယ်ကို တားဆီးရန် ပြင်ဆင်ထားခြင်းဖြစ်သည်။ အဓိကအစိတ်အပိုင်းများ မပါလျှင် အမွေအနှစ်များ၏ တန်ဖိုးက များစွာ လျော့နည်းသွားပေလိမ့်မည်။

လင်းယွမ် ယခင်က ရရှိခဲ့သော ရွှမ်ဟွမ်လျို့ဝှက်နယ်မြေနှင့် နတ်ဆိုးကျောက်စိမ်းမျှော်စင်တို့၏ အမွေအနှစ်များတွင်လည်း အလားတူနည်းလမ်းများရှိပြီး အမွေအနှစ်၏ အရေးကြီးသော အစိတ်အပိုင်းများကို ကာကွယ်သူများက ထိန်းသိမ်းထားခြင်းဖြစ်သည်။

အကယ်၍ တစ်စုံတစ်ယောက်က အမွေအနှစ်ကို မှန်ကန်သော နည်းလမ်းနှင့်မရရှိလျှင် အမွေအနှစ်၏ အဓိကအစိတ်အပိုင်းများကို ရရှိနိုင်မည်မဟုတ်ပေ။

" ပြီးတော့ ငါ့ မူလခန္ဓာကိုယ်ရဲ့ ကျင့်ကြံခြင်နဲ့ပက်သက်တဲ့ မှတ်ဉာဏ်တွေကိုလည်း မျှဝေပေးမယ်။ " ကန်ယုလုံက ကမ်းလှမ်းလိုက်သည်။ ဤသည်မှာ သူပေးနိုင်သမျှ အမြင့်ဆုံးတန်ဖိုးဖြစ်သည်။ စိတ်ဝိညာဉ်အစိတ်အပိုင်းတစ်ခုအနေဖြင့် တန်ဖိုးအရှိဆုံးမှာ မှတ်ဉာဏ်များပင်ဖြစ်သည်။