ပျက်ဆီးသွားသော ပင်မစကြာဝဠာ...

Vol. 60 Ch. 864

ခန်းမအတွင်း၌ ဝမ်ချူက အရှင်ကုမင်ထံမှ ခွင့်ပြုချက်ရသည်နှင့် လင်းယွမ်ကို စျေးနှုန်းများ ပြောကြားလိုက်သည်။

" နဂါးငွေ့တန်း ရတနာတွေအားလုံး စုစုပေါင်းတန်ဖိုး ဖရိုဖရဲသလင်းကျောက် သန်း ၄၀ ပေးပါမယ်။ " ဝမ်ချူက စိတ်ထဲမှ အံ့အားသင့်စွာဖြင့် ပြောလိုက်သည်။

ထိုမျှများပြားသော ဖရိုဖရဲသလင်းကျောက်များက ဖရိုဖရဲအရှင်သခင်တစ်ယောက်ပင် ထုတ်ပေးရန် တွန့်ဆုတ်နိုင်သော ပမာဏဖြစ်သည်။ ဖရိုဖရဲအရှင်သခင်များတွင် ကြီးမားသော အသုံးစရိတ်များ ရှိနေသည်။

ဥပမာ အရှင်ကုမင်ဆိုလျှင် သူကိုယ်တိုင်သုံးစွဲမှု၊ သူ၏ အဖော်ဖြစ်သော ဖရိုဖရဲနဂါးသားရဲ၏ လိုအပ်ချက်များနှင့် ကုမင်ဖရိုဖရဲကုန်းမြေ၏ အစီအရင်များကို ထိန်းသိမ်းရန် အသုံးစရိတ်များက အမှန်တကယ်ပင် များပြားလှသည်။

"ဖရိုဖရဲသလင်းကျောက် သန်း ၄၀။ " လင်းယွမ်က ခေါင်းညိမ့်လိုက်သည်။

၎င်းက သူ၏ ခန့်မှန်းချက်ထက် ကျော်လွန်နေသည်။ လင်းယွမ်က အမွေအနှစ်နေရာမှ ရတနာအားလုံးကို ရောင်းချခြင်းမဟုတ်ဘဲ တစ်ချို့တစ်ဝက်ကိုသာ ရောင်းချခဲ့ခြင်းဖြစ်သည်။ ဖရိုဖရဲသလင်းကျောက် သန်းလေးဆယ်ဆိုသည်မှာ အရှင်ကုမင်က အမြင့်ဆုံး စျေးနှုန်းကို ပေးလိုက်သည်မှာ ထင်ရှားသည်။

" အရှင်ကုမင်ကို ကျေးဇူးတင်ကြောင်းပြောလိုက်ပါဦး။ " လင်းယွမ်က ပြောလိုက်သည်။

" ပြီးတော့ ငါ ကျင့်ကြံခြင်းအရင်းအမြစ်အချို့ လိုချင်သေးတယ်။ " လင်းယွမ်က သူလိုအပ်သော အရင်းအမြစ်များကို စာရင်းပြုစုလိုက်သည်။

" ပြဿနာမရှိဘူး။ " ဝမ်ချူက ပြောလိုက်သည်။

ကုမင်ဖရိုဖရဲကုန်းမြေက အနီးရှိ ဟင်းလင်းပြင်နယ်မြေများတွင် ကုန်သွယ်မှုဗဟိုချက်တစ်ခု ဖြစ်နေပြီး လင်းယွမ် လိုအပ်သော အရင်းအမြစ်များကို အလွယ်တကူ ရရှိနိုင်သည်။

အချိန်များကုန်လွန်လာပြီး မျက်စိတစ်မှိတ်အတွင်း ဆယ်စုနှစ်တစ်ခု ကြာသွားခဲ့သည်။

ကြယ်မျက်ရည်အစိတ်အပိုင်းကမ္ဘာတွင် လင်းယွမ်က ခြေချိတ်ထိုင်နေပြီး သူ၏ ခန္ဓာကိုယ်မှ ထွက်ပေါ်နေသော အော်ရာက ပတ်ဝန်းကျင်မှ အချိန်လေဟာနယ်ကို တွန့်လိမ်ပုံပျက်သွားစေသည်။

" နောက်ဆုံးတော့ ရွှမ်ဟွမ်မူလခန္ဓာကို အထွတ်အထိပ်ထိ ကျင့်ကြံပြီးသွားပြီ။ " လင်းယွမ်က ပြုံးလိုက်သည်။

ရွှမ်ဟွမ်မူလခန္ဓာက ရုပ်ခန္ဓာကို ကဏ္ဍပေါင်းစုံတွင် ပြည့်စုံလုနီးပါး သန့်စင်ပေးသည်။ မဟာသူတော်စင်အဆင့် ရုပ်ခန္ဓာသန့်စင်ခြင်းနည်းစနစ်ဖြစ်သော ကပ်ဘေးကိုးပါးထောလုံခန္ဓာပင်လျှင် ရုပ်ခန္ဓာ၏ ကဏ္ဍအချို့ကိုသာ တိုးတက်စေခြင်းဖြစ်သည်။

" လက်ရှိ ငါ့ရဲ့ ရုပ်ခန္ဓာက ဖရိုဖရဲအရှင်သခင်တွေရဲ့ ရုပ်ခန္ဓာနဲ့ နီးစပ်သွားပြီ။ " လင်းယွမ်က တွေးလိုက်သည်။

ရွှမ်ဟွမ်မူလခန္ဓာက လွှမ်းမိုးခြင်းအဆင့် အထွတ်အထိပ်သို့ ရောက်သွားသောကြောင့် ၎င်းက လွှမ်းမိုးခြင်းအဆင့်တွင် ပြိုင်ဘက်ကင်းသွားလေသည်။ ထို့အပြင် လင်းယွမ်၏ နက်ရှိုင်းသော အခြေခံကြောင့် သူ၏ ခန္ဓာကိုယ်က အဆက်မပြတ် တိုးတက်နေခဲ့သည်။

ယခုအချိန်တွင် လင်းယွမ်၏ ရုပ်ခန္ဓာက အကန့်အသတ်သို့ ရောက်လုနီးပါး ဖြစ်သွားခဲ့သည်။

" နောက်ထပ်က ဖရိုဖရဲအဆင့် ရွှမ်ဟွမ်မူလခန္ဓာပေါ့။ " လင်းယွမ်က ခဏစဉ်းစားပြီး ခေါင်းခါလိုက်သည်။

ဖရိုဖရဲအဆင့် ရွှမ်ဟွမ်မူလခန္ဓာက လုံလောက်သော အသက်အနှစ်သာရကို လိုအပ်ပြီး ထိုလိုအပ်ချက်က သူ လွှမ်းမိုးခြင်းအဆင့်သို့ တက်လှမ်းမှ ရရှိနိုင်ပေလိမ့်မည်။

" ဒါပေမယ့် ရွှမ်ဟွမ်မူလခန္ဓာကို အောင်မြင်ဖို့ လိုအပ်တဲ့ အရင်းအမြစ်တွေကတော့ တကယ် မလွယ်ဘူးပဲ။ " လင်းယွမ်က ခေါင်းခါလိုက်သည်။

သူ၏ လက်ရှိ ရုပ်ခန္ဓာအခြေခံဖြင့် သူက ရွှမ်ဟွမ်မူလခန္ဓာကို ဖရိုဖရဲအဆင့်ထိ ကျင့်ကြံနိုင်ခဲ့လျှင် သူ၏ ရုပ်ခန္ဓာသက်သက်ဖြင့် ဖရိုဖရဲမဟာသူတော်စင်များကို လွှမ်းမိုးနိုင်ပေလိမ့်မည်။

သို့သော် ထိုသို့သော ရုပ်ခန္ဓာကို သန့်စင်ရန်အတွက် လိုအပ်သော အရင်းအမြစ်များက တုန်လှုပ်စရာကောင်းလှသည်။ လောလောဆယ် လင်းယွမ်၏ လက်ရှိအခြေအနေဖြင့် ရရှိရန် မဖြစ်နိုင်သေးပေ။

" ဖြည်းဖြည်းပေါ့။ " လင်းယွမ်က သူ၏ အတွေးများကို ထိန်းချုပ်ပြီး ခေါင်းလောင်းသဏ္ဍန် ရတနာတစ်ခုကို ထုတ်ယူလိုက်သည်။

၎င်းက လင်းယွမ်ပျိုးထောင်ခဲ့သော ယွမ်ရှန်းကျင်းပင်ဖြစ်သည်။ နှစ်များတစ်လျှောက် လင်းယွမ်က ၎င်းကို အရင်းအမြစ်များစွာဖြင့် ပျိုးထောင်ခဲ့ပြီး ယခု ယွမ်ရှန်းကျင်းက လွှမ်းမိုးခြင်းအဆင့်သို့ ရောက်သွားခဲ့ပြီဖြစ်သည်။ ယွမ်ရှန်းကျင်းက လင်းယွမ်၏ စိတ်ဝိညာဉ်နှင့် အလွန်လိုက်ဖက်ညီနေပြီဖြစ်သည်။ ၎င်းကို အသက်သွင်းရန် အတွေးတစ်ချက်သာ လိုအပ်ပြီး စွမ်းအားကလည်း ဖရိုဖရဲအဆင့် ရတနာများနှင့် နှုင်းယှဉ်နိုင်သည်။

" စဉ်းစားကြည့်ရင် ဒီတစ်လျှောက်လုံး ငါမင်းကို တစ်ခါမှ အသုံးမပြုခဲ့ရသေးဘူးပဲ။ " လင်းယွမ်က ခေါင်းခါလိုက်သည်။

သူ၏ ပင်ကိုစရိုက်အရ ရလဒ်ကို အပြည့်အဝ မယုံကြည်ဘဲ လှုပ်ရှားခြင်းက ခဲယဉ်းလှသည်။ သူက အန္တရာယ်ရှိသော အခြေအနေများကို ရှောင်ရှားပြီး သူ၏ မူလစိတ်ဝိညာဉ်များကိုသာ အသုံးပြုလေ့ရှိသည်။ ထို့ကြောင့် ယွမ်ရှန်းကျင်းက အသုံးမပြုဘဲ ကျန်ရှိနေခြင်းဖြစ်သည်။

သို့သော် ကြိုတင်ကာကွယ်မှုများနှင့် အသက်ကယ်နည်းလမ်းများက အသုံးမပြုရလျှင်တောင် ပိုင်ဆိုင်ထားခြင်းက အကောင်းဆုံး ဖြစ်သည်။

" ငါ့ရဲ့ အတွင်းစကြာဝဠာ မူလရင်းမြစ်နဲ့ ဒါကို ပျိုးထောင်ရမယ်။ " လင်းယွမ်က ယွမ်ရှန်းကျင်းကို အတွင်းစကြာဝဠာ၏ အနက်ရှိုင်းဆုံးတွင် ထားလိုက်သည်။

ပင်မစကြာဝဠာ။

စကြာဝဠာပျက်ဆီးခြင်းက ပြီးဆုံးသွားခဲ့ပြီး စကြာဝဠာက အစက်အပြောက်တစ်ခုအတွင်းသို့ စုစည်းသွားခဲ့သည်။ ထိုအစက်အပြောက်လေးက သေးငယ်လှသော်လည်း နားလည်ရခက်အောင် ကြီးမားနေဆဲ ဖြစ်သည်။

ပတ်ဝန်းကျင်ရှိ အချိန်လေဟာနယ်ရ သိပ်သည်းသွားခဲ့ပြီး မဟာသူတော်စင်များပင်လျှင် ၎င်း၏ လျို့ဝှက်ချက်များကို မသိနိုင်ပေ။ စကြာဝဠာ၏ ပျက်စီးခြင်းနှင့် ပြန်လည်မွေးဖွားခြင်းက ဖရိုဖရဲဟင်းလင်းပြင်၏ မူလနိယာမများမှ သဘာဝအတိုင်း ပြောင်းလဲခြင်ဖြစ်ပြီး ပြင်ပအရာများ အနှောက်အယှက်မခံပေ။

ထိုစုစည်းနေသော စကြာဝဠာအတွင်း၌ ရွှမ်ဟွမ်လျို့ဝှက်နယ်မြေက ဆယ်မီတာသာ ကျယ်ဝန်းသော သေးငယ်သည့် နေရာလေးအဖြစ် ဖိသိပ်ခြင်းခံလိုက်ရသည်။ လင်းယွမ်၏ ကိုယ်ပွားက ထိုနေရာ၏ အလယ်တွင် ထိုင်နေပြီး လျို့ဝှက်နယ်မြေ၏ အပြင်ဘက်ရှိ အရာအားလုံးကို ဂရုတစိုက် လေ့လာနေသည်။

လျို့ဝှက်နယ်မြေ၏ အပြင်ဘက်တွင် မူလဖရိုဖရဲအခြေအနေသာ ရှိနေပြီး နိယာများနှင့် တာအိုသဘောတရားများ လွှမ်းမိုးမှု လုံးဝမရှိတော့ပေ။ စကြာဝဠာပျက်ဆီးခြင်းက နိယာမများနှင့် သဘောတရားများ အားလုံးကို အပြည့်အဝ ချေမှုန်းပစ်ခြင်းဖြစ်သည်။

သို့သော် လင်းယွမ်အတွက်မူ လျို့ဝှက်နယ်မြေ၏ အပြင်ဘက်ရှိ အသက်မဲ့နေသော ဟင်းလင်းပြင်ကြီးက အလွန်အံ့ဩဖွယ်ကောင်လှသည်။ ပြင်ပကမ္ဘာ၏ ခြောက်သွေးနေသော ပတ်ဝန်းကျင်က အဆုံးမဲ့နိယာမများ ဖြည်းညင်းစွာ မွေးဖွားဖြစ်တည်လာသည်ကို သူ အာရုံခံနိုင်သည်။

ဘာမှမရှိသော အရာမှ နိယာမများက ပုံပေါ်လာပြီး လင်းယွမ်၏ မျက်လုံးထဲတွင် ပြည့်စုံနေခဲ့သည်။ သက်ရှိများ မွေးဖွားခြင်းက အံ့ဩဖွယ်ကောင်းလှပြီး စကြာဝဠာ၏ ဖြစ်တည်ပြောင်းလဲမှုကလည်း ထိုနည်းတူပင်ဖြစ်သည်။

" အံ့ဩစရာပဲ။ " လင်းယွမ်က လေ့လာခြင်းတွင် နစ်မြှုပ်နေခဲ့သည်။

[ သင်က ကောင်းကင်ကိုဆန့်ကျင်သော နားလည်နိုင်စွမ်းဖြင့် စကြာဝဠာ၏ ပျက်စီးခြင်းနှင့် ပြန်လည်မွေးဖွားခြင်းကို လေ့လာပြီး မဟာတာအိုအပေါ် သင်၏ နားလည်မှုက ပိုမိုနက်ရှိုင်းလာပါပြီ။ ]

လင်းယွမ်၏ မျက်လုံးများထဲတွင် မရေတွက်နိုင်သော အသိအမြင်များက ထွက်ပေါ်လာသည်။ ဖရိုဖရဲဟင်းလင်းပြင်က စကြာဝဠာ၏ ပျက်စီးခြင်းနှင့် ပြန်လည်မွေးဖွားခြင်းကို ဖြစ်ပေါ်စေပြီး နိယာမများ၏ ထင်ရှားသော သရုပ်ဖော်မှုပင်ဖြစ်သည်။ သို့သော် ၎င်းကို မဟာသူတော်စင်အဆင့်အောက်ရှိသူများ မြင်တွေ့ရန် ခက်ခဲလှသည်။

စကြာဝဠာတစ်ခုအတွင်း၌ ရွှမ်ဟွမ်လျို့ဝှက်နယ်မြေကဲ့သို့ အရာတစ်ခုကို တည်ဆောက်ရန် အနည်းဆုံး ဖရိုဖရဲမဟာသူတော်စင်တစ်ယောက်၏ စွမ်းအားကို လိုအပ်ပြီး ဖရိုဖရဲမဟာသူတော်စင်အများစုပင် ၎င်းကို မလုပ်ဆောင်နိုင်ကြပေ။

" အခု ဒီစကြာဝဠာက ပြန်လည်မွေးဖွားခြင်းဖြစ်စဉ်ထဲမှာပဲ ရှိသေးတယ်။ အဲ့ဒါက စကြာဝဠာအသစ်ကို အပြည့်အဝ စတင်ပြီး နိယာမတွေနဲ့ တာအိုတွေ ပြန်လည်စတင်လာပြီး သက်ရှိတွေတဖြည်းဖြည်း နိုးထလာတဲ့အခါ ငါ့အပေါ် ကြီးမားတဲ့ သက်ရောက်မှုရှိလာလိမ့်မယ်။ " လင်းယွမ်က တွေးလိုက်သည်။

" အဲ့ဒီအချိန်ကျရင် ငါက စကြာဝဠာပျက်စီးခြင်းနဲ့ ပြန်လည်မွေးဖွားခြင်း ဖြစ်စဉ်တစ်ခုလုံးကို မြင်တွေ့နေရပြီးဖြစ်လို့ နိယာမတွေအပေါ် ငါ့ရဲ့ နားလည်မှုကလည်း သိသိသာသာ တိုးတက်သွားလိမ့်မယ်။ စကြာဝဠာတစ်ခုကို အားစိုက်စရာမလိုဘဲ ဖန်တီးနိုင်တဲ့အဆင့်ထိ ရောက်သွားနိုင်တယ်။ " လင်းယွမ်က တွေးလိုက်သည်။

အလွှာဆယ့်နှစ်သို့ တက်လှမ်းချိန်တွင် အတွင်းကမ္ဘာက အတွင်းစကြာဝဠာအဖြစ် ပြောင်းလဲသွားသော်လည်း ထိုအတွင်းစကြာဝဠာကို အားကောင်းလာအောင် ပျိုးထောင်ပေးရခြင်းဖြစ်သည်။ ၎င်းက အားစိုက်စရာမလိုဘဲ စကြာဝဠာတစ်ခုကို ဖန်တီးခြင်းနှင့် ဝေးကွာနေဆဲ ဖြစ်သည်။

ဖရိုဖရဲဟင်းလင်းပြင်တွင် ဖရိုဖရဲအရှင်သခင်များက သူတို့၏ ကိုယ်ပိုင်ဖရိုဖရဲကုန်းမြေများကို တည်ထောင်ကြသည်။ သို့သော် မဟာသူတော်စင်များက စကြာဝဠာတစ်ခုကို ဖန်တီးလေ့ရှိကြသည်။ ထိုကဲ့သို့သော စကြာဝဠာများက ဖရိုဖရဲဟင်းလင်းပြင်မှ ပျိုးထောင်ပေးခြင်းမဟုတ်သဖြင့် ပျက်စီးနိုင်သော်လည်း ဖရိုဖရဲကုန်းမြေများနှင့် ယှဉ်လျှင် အရွယ်အစားနှင့် သက်ရှိများကို ပျိုးထောင်နိုင်စွမ်းက များစွာမြင့်မားလှသည်။

ထူးချွန်သော မဟာသူတော်စင်များ၏ သီးသန့်ဖန်တီးထားသော စကြာဝဠာများက အတိုင်းအတာတစ်ခုအထိ နိယာမများကို သတ်မှတ်နိုင်ပြီး သီးခြားသက်ရှိများကို ပျိုးထောင်ခြင်း စသည်တို့ကို ပြုလုပ်နိုင်သည်။

" စကြာဝဠာတစ်ခုကို ဖန်တီးဖို့က နိယာမတွေအပေါ် နားလည်မှုက အထွတ်အထိပ်ကို ရောက်ရှိသွားတာပဲ။ " လင်းယွမ်က တွေ့လိုက်သည်။ အကယ်၍ မရေတွက်နိုင်သော နိယညမများကို နားမလည်ခဲ့လျှင် ပြည့်စုံသော စကြာဝဠာတစ်ခုကို အလွယ်တကူ ဖန်တီးနိုင်မည်မဟုတ်ပေ။

" နှမြောစရာကောင်းတာ ဒီစကြာဝဠာက ပြန်လည်မွေးဖွားဖို့ အချိန်လိုအပ်နေသေးတယ်။ စကြာဝဠာပျက်ဆီးချိန်မှာ ငါက သက်ရှိအများကြီးကို ခေါ်ထုတ်သွားလို့ ပြန်လည်မွေးဖွားဖို့ စွမ်းအားမလုံလောက်လို့ သာမန်ထက် အချိန်ပိုယူနေတာဖြစ်နိုင်တယ်။ " လင်းယွမ်က တွေးလိုက်သည်။