အခန်း (၁၆၃၅-၁၆၃၇)

အခန်း (၁၆၃၅) - သတင်းပျံ့နှံ့သွားပြီး... မှောင်ခိုဈေးကွက် စတင် လှုပ်ရှားလာခြင်း

~တစ်ချိန်တည်းမှာပင်... နေမဝင် အင်ပါယာ၏ မြေအောက်ကမ္ဘာတွင် သတင်းတစ်ပုဒ် လျင်မြန်စွာ ပျံ့နှံ့သွားလေ၏။

"သူဌေး ဆန့်ကျင်ရေး မဟာမိတ်အဖွဲ့ကလို့ သံသယရှိရတဲ့ အဖွဲ့တစ်ဖွဲ့ရဲ့ တည်နေရာ ပေါက်ကြားသွားပြီ...၊ ပီကာဆိုရဲ့ နာမည်ကျော် 'အိပ်မက်' ပန်းချီကားက... မြင်းခွာ ဘီယာချက်စက်ရုံ (Horseshoe Brewery) နဲ့ အဘိုးကြီး တွမ် (Old Tom) ရဲ့ အမှိုက်ပြန်လည် သန့်စင်ရေး စခန်းမှာ ပေါ်လာတယ်တဲ့..."

"လွန်ခဲ့တဲ့ မိနစ်ပိုင်းလေးကပဲ ဖြစ်ပျက်ခဲ့တာ..."

"..."

မကြာမီ... နေမဝင် အင်ပါယာ၏ မြေအောက်ကမ္ဘာ တစ်ခုလုံး ပွက်လောရိုက်သွားတော့သည်။

မရေမတွက်နိုင်သော ကြီးကြီးငယ်ငယ် ကလပ်အသင်းများနှင့် ကမ္ဘာတစ်ဝှမ်းမှ ရွှေရှာသူများသည်... မြူခိုးမြို့တော်ရှိ အကြီးဆုံး ဆင်းရဲသား ရပ်ကွက် ဧရိယာဖြစ်သော မြင်းခွာ ဘီယာချက်စက်ရုံဆီသို့ လူများ စတင် စေလွှတ်လိုက်ကြလေတော့သည်။

*

ဒီဗွန်ရှိုင်းယား မိသားစု (Devonshire Family)။

အလွန် ဇိမ်ခံနိုင်သော ဂေါက်ကွင်း တစ်ခုတွင်... ဟန်ရှန် ဒီဗွန်ရှိုင်းယား (Hengsheng Devonshire) သည် မနေ့ညက သူနှင့် အတူ ပျော်ပါးခဲ့သော လှပသည့် နာမည်ကျော် အမျိုးသမီး တစ်ဦးက သူ့စိတ်ကျေနပ်အောင် ပြုစုပေးနေသည်ကို ကြည့်ရင်း စိတ်အခြေအနေ ကောင်းမွန်နေလေ၏။

သို့သော်ငြားလည်း... ထိုအချိန်တွင် အချိန်အခါ မဟုတ်သော ဖုန်းခေါ်ဆိုမှု တစ်ခု ဝင်ရောက်လာချေသည်။

ဟန်ရှန် ဒီဗွန်ရှိုင်းယားသည် တိတ်တဆိတ် ဆဲရေးလိုက်မိသည်။ ဖုန်းကိုင်ပြီးနောက်... သူ၏ လေသံမှာ အထူးတလည် စိတ်တိုနေပုံ ရလေ၏။

"ငါ မင်းကို (၁၀) စက္ကန့် အချိန်ပေးမယ်"

"ကျေနပ်လောက်တဲ့ အကြောင်းပြချက် မပေးနိုင်ရင်... ဒီည ငါ့ရဲ့ အချစ်တော် ခြင်္သေ့လေးနဲ့အတူ သွားအိပ်ဖို့ ပြင်ထားပေတော့"

ဖုန်းတစ်ဖက်စွန်းမှ သူ့လက်အောက်ငယ်သားမှာ အလွန် ကြောက်လန့်သွားပြီး ကပျာကယာ ပြောလိုက်လေ၏။

"ဗဲရွန် (Baron) ဟန်ရှန်...၊ သူဌေး ဆန့်ကျင်ရေး မဟာမိတ်အဖွဲ့က အဖွဲ့ငယ်လေး တစ်ဖွဲ့ရဲ့ တည်နေရာ ပေါက်ကြားသွားပါပြီ"

"မှောင်ခိုဈေးကွက်ကနေ သတင်းရပါတယ်...၊ သူတို့ရဲ့ ခြေရာကို အနီးနားက ဆင်းရဲသား ရပ်ကွက်ထဲက မြင်းခွာ ဘီယာချက်စက်ရုံ ဧရိယာမှာ တွေ့လိုက်ရတယ်လို့ ပြောပါတယ်...၊ သူတို့က 'အိပ်မက်' ပန်းချီကားကို ရောင်းဖို့ ပြင်ဆင်နေတာကိုတောင် မြင်ခဲ့ရပါတယ်တဲ့"

"ပီကာဆိုရဲ့ 'အိပ်မက်' ဟုတ်လား...၊ ဂျယ်ရီ ဘားရိုး မိသားစုရဲ့ စုဆောင်းမှုတွေထဲမှာ အဆင့် (၁၀) ချိတ်တဲ့ ရတနာလေ..." ဟန်ရှန် ဒီဗွန်ရှိုင်းယား၏ မျက်နှာထား တောင့်တင်းသွားသည်။

ဖုန်းတစ်ဖက်စွန်းမှ လူက လျင်မြန်စွာ ပြန်ဖြေလေ၏။ "ဟုတ်ပါတယ်"

"ကျွန်တော် လမ်းကြောင်းရှာပြီး အတည်ပြုခိုင်းပြီးပါပြီ...၊ သတင်းရဲ့ မှန်ကန်မှုက အရမ်း မြင့်မားပါတယ်"

"ဗဲရွန် ဟန်ရှန်...၊ ကျွန်တော်တို့ ဝင်ပါသင့်သလား"

ဟန်ရှန် ဒီဗွန်ရှိုင်းယား ချက်ချင်း ပြန်မဖြေပေ။ အစားထိုး အနေဖြင့်... သူသည် ကုလားထိုင်ပေါ်တွင် ပျင်းရိစွာ လှဲလျောင်းလိုက်ပြီး သူ့ရှေ့မှ နာမည်ကျော် အမျိုးသမီးကို တစ်ချက် ကြည့်လိုက်သည်။

နာမည်ကျော် အမျိုးသမီး အဝတ်အစားများ ဝတ်ဆင်ပြီး ဂေါက်ကွင်းမှ ထွက်ခွာသွားပြီးနောက်... သူ လျင်မြန်စွာ ပြောလိုက်လေ၏။ "မင်း ဒီသတင်းကို စုံစမ်းလို့ ရတယ် ဆိုမှတော့... ကျန်တဲ့ မြို့စား မိသားစုကြီး (၃) ခုလည်း သိနိုင်မှာပဲ"

"ဒါပေမဲ့... အဲဒီ မိသားစုတွေက အရှက်ကွဲမှာကို အရမ်း ကြောက်ကြတယ်...၊ သူတို့ ဝင်မပါဖို့ အခွင့်အလမ်း များတယ်"

"ထိပ်သီး အဖွဲ့တစ်ဖွဲ့ ခေါ်ပြီး... အခြေအနေကို ကြည့်ပြီး လှုပ်ရှားလိုက်"

ဖုန်းတစ်ဖက်စွန်းမှ လူသည် အလွန် သတိကြီးစွာ မေးလိုက်လေ၏။ "ဒါဆို... ဗဲရွန်...၊ စစ်ဆင်ရေး အတိုင်းအတာကို ကျွန်တော်တို့ ဘယ်လို ထိန်းချုပ်ရမလဲ"

ဟန်ရှန် ဒီဗွန်ရှိုင်းယား တွန့်ဆုတ်မနေဘဲ ပြန်ဖြေလိုက်သည်။ "ကမ္ဘာတစ်ဝှမ်းက ရွှေရှာသူ အဖွဲ့အစည်းတွေ အများကြီး ရောက်နေကြမှာပဲ...၊ ပြီးတော့ နာရေး အဖွဲ့အစည်းလည်း ဝင်ပါဖို့ အခွင့်အလမ်း များတယ်"

"ငါတို့ အားလုံး ရွှေသွားရှာကြတာပဲ...၊ မင်းလည်း သူများတွေရဲ့ စံနှုန်းအတိုင်း လိုက်လုပ်ပေါ့"

"အရမ်း အလွန်အကျွံ မလုပ်သရွေ့... ပြီးတော့ သေနတ်တွေ မသုံးသရွေ့... တခြားလူတွေက မင်းတို့ဟာ ငါ့လူတွေမှန်း သိရင်တောင် ဘာမှ ပြောစရာ ရှိမှာ မဟုတ်ဘူး...၊ တခုခု ဖြစ်လာရင်... ငါ မင်းတို့ကို ကာကွယ်ပေးနိုင်တယ်"

"သဘောပေါက်ပါပြီ" ဖုန်းတစ်ဖက်စွန်းမှ လူက ချက်ချင်း ပြန်ဖြေလိုက်သည်။

ဟန်ရှန် ဒီဗွန်ရှိုင်းယား ရိုးရိုးရှင်းရှင်း သတိပေးလိုက်လေ၏။ "သတင်းအသစ် တစ်ခုခု ရှိရင်... ငါ့ကို ဘယ်အချိန်ပဲ ဖြစ်ဖြစ် အသိပေး"

ထို့နောက် ဖုန်းချလိုက်သည်။

သူ ထထိုင်လိုက်ပြီး ခေတ္တမျှ စဉ်းစားခန်း ဝင်လိုက်သည်။ ထို့နောက် အခြား ဖုန်းတစ်လုံးကို ထုတ်ယူလိုက်ပြီး... သူ့ဖုန်းထဲတွင် မှတ်သားမထားသော နံပါတ်တစ်ခုကို ရိုက်နှိပ်လိုက်သည်။ စာတစ်စောင်ကို လျင်မြန်စွာ ရိုက်ပြီး ပေးပို့လိုက်လေ၏။

"ပီကာဆိုရဲ့ 'အိပ်မက်' ပေါ်လာပြီ"

"ငါ့လူတွေ စတင် လှုပ်ရှားနေကြပြီ"

စာပို့ပြီးနောက်... တစ်ဖက်လူက "၁" ဟု ပြန်စာ ပို့လာသည်အထိ စောင့်လိုက်သည်။ ထို့နောက် စာပို့မှတ်တမ်းကို လျင်မြန်စွာ ဖျက်ပစ်လိုက်ပြီး ဖုန်းကို သိမ်းလိုက်လေ၏။

သူ့ရှေ့မှ ကျယ်ပြောသော ဂေါက်ကွင်းကို ကြည့်ရင်း... ဟန်ရှန် ဒီဗွန်ရှိုင်းယား၏ မျက်လုံးများ မှောင်မိုက်သွားတော့သည်။

*

နာရေး အဖွဲ့အစည်း (Funeral Organization)၊ မာဖီးယား မိသားစု၊ ဘုရားကျောင်းနှင့် တူသော အဆောက်အအုံ တစ်ခု အတွင်း။

အနက်ရောင် ဝတ်စုံကို ဝတ်ဆင်ထားပြီး ဆံပင်ကို သပ်ရပ်စွာ ဖီးသင်ထားသော သက်လတ်ပိုင်း အမျိုးသား တစ်ဦးသည်... သူ နှစ်ပေါင်းများစွာ မြတ်နိုးစွာ သိမ်းဆည်းထားသော ဝိုင်ကို မြည်းစမ်းနေလေ၏။

မီးခိုးရောင် ဝတ်စုံနှင့် ရွှေရောင် မျက်မှန်ကို တပ်ဆင်ထားသော အမျိုးသား တစ်ဦး ရုတ်တရက် ဝင်ရောက်လာခဲ့သည်။

"ခေါင်းဆောင်...၊ မှောင်ခိုဈေးကွက်ကနေ သတင်းရပါတယ်"

"ဂျယ်ရီ ဘားရိုး မိသားစုရဲ့ တန်ဖိုးအကြီးဆုံး ပစ္စည်း (၁၀) မျိုးထဲက တစ်ခု ဖြစ်တဲ့... ပီကာဆိုရဲ့ 'အိပ်မက်' ဟာ ဆင်းရဲသား ရပ်ကွက်ထဲက မြင်းခွာ ဘီယာချက်စက်ရုံ ဧရိယာမှာ ပေါ်လာပါတယ်"

"အနီးနားက ကျွန်တော်တို့ ညီအစ်ကိုတွေက အဲဒီ ဧရိယာရဲ့ ဝင်ပေါက် ထွက်ပေါက် အားလုံးကို ပိတ်ဆို့ထားလိုက်ပါပြီ...၊ ပစ္စည်းကို အပြင် သယ်ထုတ်မသွားရသေးဘူး ဆိုတာ အတည်ပြုနိုင်ပါတယ်"

သက်လတ်ပိုင်း အမျိုးသားသည် ဝိုင်ခွက်ကို ချက်ချင်း ချလိုက်ပြီး အက်ကွဲသော အသံဖြင့် မေးလိုက်လေ၏။

"သတင်းက အတည်ပြုပြီးပြီလား"

"ဟုတ်ကဲ့...၊ အတည်ပြုပြီးပါပြီ...၊ အရင်တုန်းက သူဌေး ဆန့်ကျင်ရေး မဟာမိတ်အဖွဲ့ရဲ့ အဖွဲ့ဝင်တွေကို ခြေရာခံဖို့ တာဝန်ယူထားတဲ့ ရွှေရောင် အဖွဲ့ (Gold Team) တစ်ဖွဲ့ ရှိပါတယ်...၊ သူတို့ ပြောတာကတော့... အဲဒီ အဖွဲ့ဝင်တွေကို မြင်းခွာ ဘီယာချက်စက်ရုံနဲ့ သူ့ပတ်ဝန်းကျင် ဧရိယာတွေဆီ မောင်းထုတ်လိုက်တာ ဟုတ်ပါတယ်တဲ့...၊ သူဌေး ဆန့်ကျင်ရေး မဟာမိတ်အဖွဲ့ဝင်တွေ မြင်းခွာ ဘီယာချက်စက်ရုံမှာ ပေါ်လာတာက သူတို့ရဲ့ သုံးသပ်ချက်နဲ့ ကိုက်ညီနေပါတယ်"

ရွှေရောင် မျက်မှန်နှင့် လူက လျင်မြန်စွာ ရှင်းပြလေ၏။

"ပြီးတော့ ကျွန်တော်တို့ အဖွဲ့အစည်းထဲက ထောက်လှမ်းရေး ခွဲခြမ်းစိတ်ဖြာသူတွေကလည်း သုံးသပ်ထားပါတယ်...၊ သူဌေး ဆန့်ကျင်ရေး မဟာမိတ်အဖွဲ့ဝင်တွေ မြင်းခွာ ဘီယာချက်စက်ရုံမှာ ပေါ်လာတာက သူတို့ရဲ့ ခွဲခြမ်းစိတ်ဖြာမှု၊ သုံးသပ်ချက်တွေနဲ့ ကိုက်ညီနေပါတယ်"

"ကမ္ဘာတစ်ဝှမ်းက ရွှေရှာသူ အဖွဲ့အစည်းတွေ အပါအဝင်... နေမဝင် အင်ပါယာ မြေအောက်ကမ္ဘာက သတင်းနားပါးတဲ့ အဖွဲ့တွေ အားလုံးလိုလို သတင်းရပြီး အဲဒီကို စုဝေးနေကြပါပြီ"

"'အိပ်မက်' ပန်းချီကားရဲ့ ခန့်မှန်းတန်ဖိုးက သန်း (၅၀၀) ကျော် ရှိပါတယ်...၊ လူအများကြီးနဲ့ အဖွဲ့အများကြီးက စွန့်စားဖို့ ဝန်လေးကြမှာ မဟုတ်ပါဘူး"

သက်လတ်ပိုင်း အမျိုးသားသည် ထိုလူ၏ စကားလုံးများ နောက်ကွယ်မှ အဓိပ္ပာယ်ကို နားလည်လိုက်ပုံ ရလေ၏။ ခေတ္တမျှ စဉ်းစားပြီးနောက် သူ ပြောလိုက်သည်။ "'အိပ်မက်' ကို ခြေရာခံနေတဲ့ ရွှေရောင် အဖွဲ့ တစ်ဖွဲ့ ရှိတယ် မဟုတ်လား"

"ရွှေရောင် အဖွဲ့ဝင်တွေကို အမြန်ဆုံး သွားခိုင်းလိုက်"

"ဘယ်သူမဆို ငါတို့ကို တားဆီးရဲရင်... ငါတို့ ရွှေရောင် အဖွဲ့ရဲ့ အင်အားကို ပြသလိုက်"

"ဟုတ်ကဲ့ပါ ခင်ဗျာ" ရွှေရောင် မျက်မှန်နှင့် လူက ချက်ချင်း ဦးညွှတ်လိုက်ပြီး ထွက်ခွာရန် ပြင်လိုက်သည်။

သို့သော် သက်လတ်ပိုင်း အမျိုးသားက လက်ကာပြပြီး တားလိုက်လေ၏။ သူက ထပ်လောင်း ပြောကြားလိုက်သည်။ "ဒီဗွန်ရှိုင်းယား မိသားစုလည်း အဲဒီကို သွားနေတယ်"

"သူတို့နဲ့ ပဋိပက္ခ သိပ်မဖြစ်အောင် ရှောင်ပါ"

ပြောပြောဆိုဆိုနှင့် သူသည် ရွှေရောင် မျက်မှန်နှင့်လူ နားလည်ကြောင်း ပြသသည်အထိ စောင့်ဆိုင်းလိုက်ပြီးမှ... ထွက်ခွာရန် အချက်ပြလိုက်လေ၏။

*

ရွှေရောင် မျက်မှန်နှင့် လူသည် ဘုရားကျောင်းနှင့် တူသော အဆောက်အအုံမှ ထွက်လာပြီး ခေါင်းဆောင်၏ အမိန့်ကို ပြန်လည် ပေးပို့ရန် ဖုန်းကို ထုတ်လိုက်သည်။

မြင်းခွာ ဘီယာချက်စက်ရုံ ဆင်းရဲသား ရပ်ကွက် အတွင်း... အဘိုးကြီး တွမ်၏ အမှိုက်ပြန်လည် သန့်စင်ရေး စခန်း ရှေ့တွင်... ယဲ့ဖန်သည်လည်း ဆာမီယာထံမှ ဖုန်းခေါ်ဆိုမှု တစ်ခု လက်ခံရရှိလိုက်လေ၏။

"သူဌေး...၊ ဂျယ်ရီ ဘားရိုး မိသားစုရဲ့ တန်ဖိုးကြီး ပစ္စည်း တစ်ခု ဖြစ်တဲ့ ပီကာဆိုရဲ့ 'အိပ်မက်' ပန်းချီကားက... မြင်းခွာ ဘီယာချက်စက်ရုံ ဆင်းရဲသား ရပ်ကွက်ထဲမှာ ပေါ်လာတယ် ဆိုပြီး နေမဝင် အင်ပါယာရဲ့ မှောင်ခိုဈေးကွက်က သတင်းလွှင့်လိုက်ပါတယ်"

“ဟားဟား”

ယဲ့ဖန် မနေနိုင်တော့ဘဲ ရယ်လိုက်မိသည်။

ဆာမီယာကမူ ဒီအချိန်မှာ သူ ဘာလို့ ရယ်နေသလဲ ဆိုတာကို ရှင်းရှင်းလင်းလင်း နားမလည်ပေ။ သူမ ချက်ချင်း မေးလိုက်၏။ "သတင်းအချက်အလက်မှာ ပြဿနာ ရှိနေလို့လား သူဌေး"

"ဘာလို့ ရယ်နေတာလဲ"

ယဲ့ဖန်သည် သူ့ရှေ့မှ လမ်းကြားလေး အတွင်း... လူတစ်စု သူ့ဆီသို့ လျင်မြန်စွာ ရွေ့လျားလာနေသည်ကို ကြည့်လိုက်သည်။ သူ ခေါင်းခါလိုက်လေ၏။

"ပြဿနာ မရှိပါဘူး"

"ခင်ဗျားရဲ့ သတင်းအချက်အလက်က အရမ်း တိကျပါတယ်"

"ကျွန်တော် ရယ်နေတာက... တချို့လူတွေက ကောင်းကင်ဘုံကို သွားတဲ့လမ်းကို လျှောက်ဖို့ ငြင်းဆန်ပြီး... ငရဲကို သွားဖို့ ဇွတ်အတင်း တောင်းဆိုနေကြလို့ပါ"

“...”

အခန်း (၁၆၃၆) - ခင်ဗျားတို့ လေးဖွဲ့ အရင်ဆုံး တိုက်ကြည့်ကြပါလား

~ဖုန်းတစ်ဖက်စွန်းမှ ဆာမီယာသည် ဇဝေဇဝါ ဖြစ်သွားလေ၏။ ယဲ့ဖန် ဘာကြောင့် ထိုစကားမျိုး ပြောသည်ကို သူမ နားမလည်ပေ။

သို့သော်ငြားလည်း... ယဲ့ဖန်သည် သူ့လက်ထဲတွင် 'အိပ်မက်' ပန်းချီကား ရှိနေကြောင်း သူမကို ရှင်းမပြခဲ့ပေ။

ဖုန်းချပြီးနောက်... သူသည် အခြား လမ်းကြားတစ်ခုဆီသို့ အကြည့်လွှဲလိုက်သည်။

"မြန်မြန်... မြန်မြန် လုပ်ကြ"

"ဒီနားက ဒေသခံတွေကို ငါ အခုပဲ မေးပြီးပြီ...၊ အဘိုးကြီး တွမ်ရဲ့ အမှိုက်ပြန်လည် သန့်စင်ရေး စခန်းက ဒီနားလေးမှာပဲ"

"ငါတို့ နည်းနည်းလောက် နှေးသွားရင်... ပစ္စည်းက တခြား ရွှေရှာသူတွေ လက်ထဲ ပါသွားလိမ့်မယ်"

"သောက်ကျိုးနည်း...၊ လူသာ (Luther)... မင်း မနေ့ညက မိန်းမတွေနဲ့ ပျော်ပါးလွန်းပြီး ခြေထောက်တွေ ပျော့နေတာလား...၊ ဘာလို့ ဒီလောက်တောင် နှေးကွေးနေရတာလဲ"

"တကယ်လို့ မင်းရဲ့ နှေးကွေးမှုကြောင့်... တန်ဖိုး သန်းရာချီတန်တဲ့ ဒီပန်းချီကား သူများလက်ထဲ ပါသွားရင်... တော်ကြာကျရင် မင်းကို သင်းကွပ်ပစ်မယ်...၊ နောက်နောင် ဘယ်တော့မှ မိန်းမ မတွေ့နိုင်အောင် လုပ်ပစ်မယ်"

"..."

အခြားတစ်ဖက်တွင်လည်း... နောက်ထပ် လူတစ်စု အပြေးအလွှား ရောက်ရှိလာကြသည်။

သူတို့တင် မကသေးပေ။ နောက်ထပ် အဖွဲ့တစ်ဖွဲ့လည်း လမ်းကြားထဲမှ ပြေးထွက်လုနီးပါး ဖြစ်နေချေပြီ။ အရပ်မျက်နှာ အသီးသီးမှ လမ်းကြားထဲသို့ ဝင်ရောက်နိုင်သမျှ လမ်းကြောင်းတိုင်းမှ လူများ အပြေးအလွှား ရောက်ရှိလာနေကြသည်။

ထိုလူများထဲတွင်... အချို့မှာ နေမဝင် အင်ပါယာ၏ ဒေသခံများ ဖြစ်ကြပြီး၊ အချို့မှာ အာရှသားများ ဖြစ်ကြသည်။

အရှေ့တောင်အာရှသား အချို့လည်း ပါဝင်နေသေး၏။

အဖွဲ့ပေါင်းစုံ ရောက်လာနေကြသည်မှာ ထင်ရှားလှပေသည်။

အချိန်တိုအတွင်းမှာပင်... ယဲ့ဖန်၏ ထွက်ပြေးလမ်းကြောင်း အားလုံး ပိတ်ဆို့ခံလိုက်ရတော့သည်။

ယဲ့ဖန်နှင့် မလှမ်းမကမ်းတွင် ရှိနေသော မျက်နှာတွင် အမာရွတ်နှင့်လူသည် ထိုမြင်ကွင်းကို မြင်လိုက်ရသောအခါ လန့်ဖျပ်သွားပုံ ရလေ၏။

တံတွေး တစ်ချက် မျိုချလိုက်ပြီးနောက်... သူသည် ယဲ့ဖန်နှင့် အကွာအဝေး တစ်ခု ခြားလိုက်ပြီး ဝိုင်းရံလာသော အဖွဲ့များကို ကြည့်ကာ အော်ပြောလိုက်သည်။ "ငါ ရှင်းရှင်းလင်းလင်း ပြောထားမယ်နော်...၊ ဒီကိစ္စက ငါနဲ့ ဘာမှ မဆိုင်ဘူး"

"မင်းတို့ လိုချင်တဲ့ ပစ္စည်း... ပီကာဆိုရဲ့ 'အိပ်မက်' ပန်းချီကားက... ဟောဟိုက တရုတ် ကောင်လေး လက်ထဲမှာ ရှိနေတာ"

"ငါက သူ့ဆီကနေ ပန်းချီကား အလုခံလိုက်ရတဲ့ သားကောင်ပါ"

ပြောပြောဆိုဆိုနှင့် သူသည် သူ့အပြစ်ကင်းစင်ကြောင်းနှင့် အန္တရာယ် မရှိကြောင်း သက်သေပြသကဲ့သို့ လက်နှစ်ဖက်ကို မြှောက်ပြလိုက်လေ၏။

တစ်ချိန်တည်းမှာပင်... ယဲ့ဖန်လက်ထဲမှ ပန်းချီကားကို ကြည့်ရန် လူတိုင်းကို အချက်ပြလိုက်သည်။

သူ့အချက်ပြမှုအတိုင်း... လူတိုင်းသည် ယဲ့ဖန်ကို ချက်ချင်း လှည့်ကြည့်လိုက်ကြသည်။

ထို့နောက်... ယဲ့ဖန်လက်ထဲမှ ပန်းချီကားကို မြင်လိုက်ရသောအခါ... ထိုအဖွဲ့များ၏ ခေါင်းဆောင်များ မျက်လုံးထဲတွင် လောဘရိပ်များ ယှက်သန်းသွားကြတော့သည်။

"ပီကာဆိုရဲ့ ပန်းချီကားပဲ"

"သတင်းက မှန်တာပဲ"

"ငွေ သန်းရာချီက ငါတို့ မျက်စိရှေ့မှာ ရောက်နေပြီ"

ယဲ့ဖန်သည် ပန်းချီကားကို တည်ငြိမ်စွာ သိမ်းဆည်းလိုက်ပြီး... ဘေးပတ်ဝန်းကျင်ကို ဝေ့ကြည့်လိုက်သည်။

ယခုအချိန်တွင် စုစုပေါင်း အဖွဲ့ (၄) ဖွဲ့ ရောက်ရှိနေချေသည်။

တစ်ဖွဲ့မှာ ရွှေရောင်ဆံပင်၊ မျက်လုံးပြာနှင့် လူဖြူ ခေါင်းဆောင် ဦးဆောင်သော အဖွဲ့ ဖြစ်သည်။ သူ့နောက်မှ အဖွဲ့ဝင်များကို ကြည့်ခြင်းအားဖြင့်... အမေရိကန်မှ ရွှေရှာသူ အဖွဲ့တစ်ဖွဲ့ ဖြစ်တန်ရာ၏။

ဤအဖွဲ့မှ အဖွဲ့ဝင်များသည် စစ်သည်တော် တစ်ဦး၏ ထူးခြားသော စိတ်ဓာတ် ပိုင်ဆိုင်ထားကြသည်။ အများစုမှာ အငြိမ်းစား စစ်သားများ ဖြစ်ကြလိမ့်မည်။

နောက်တစ်ဖွဲ့မှာ နေမဝင် အင်ပါယာမှ အနည်းငယ် အုံ့မှိုင်းသော မျက်နှာထားနှင့် သက်လတ်ပိုင်း အမျိုးသား တစ်ဦး ဦးဆောင်သော အဖွဲ့ ဖြစ်သည်။ သူတို့က အခင်းဖြစ်ပွားရာ နေရာသို့ ပထမဆုံး ရောက်ရှိလာကြသူများ ဖြစ်သည်။

သူတို့၏ ပြောဆိုပုံနှင့် ဤနေရာကို ရင်းနှီးကျွမ်းဝင်ပုံအရ ဆိုလျှင်... နေမဝင် အင်ပါယာမှ ဒေသခံ ရွှေရှာသူ အဖွဲ့တစ်ဖွဲ့ ဖြစ်သင့်၏။

ဤအဖွဲ့မှ အဖွဲ့ဝင် အချို့မှာ စိတ်ပျက်စရာ ကောင်းပြီး၊ အချို့မှာ အုံ့မှိုင်းနေကာ... လူကောင်း ပုံစံ မပေါက်ပေ။ သို့သော် သူတို့တွင် တိုက်ခိုက်ရေး စွမ်းရည် ရှိပုံ မရချေ။

ကျန်တဲ့ နှစ်ဖွဲ့ကတော့... ကိုရီးယား (Korea) နှင့် ဆင်နိုင်ငံ (Elephant Kingdom - ထိုင်း သို့မဟုတ် အိန္ဒိယ ဖြစ်နိုင်) မှ ဖြစ်ကြသည်။ သူတို့၏ ရုပ်ရည်သွင်ပြင်နှင့် ဝတ်စားဆင်ယင်ပုံကို ကြည့်ရုံဖြင့် လွယ်ကူစွာ ခွဲခြားသိမြင်နိုင်သည်။

ဤအဖွဲ့ နှစ်ဖွဲ့မှ အဖွဲ့ဝင်များသည် နေမဝင် အင်ပါယာနှင့် အမေရိကန် အဖွဲ့များမှ လူများထက် အရပ်အမောင်း ပိုပုကြသည်။

သို့သော်ငြားလည်း... ဤအဖွဲ့ နှစ်ဖွဲ့မှ အဖွဲ့ဝင် တစ်ဦးချင်းစီ သယ်ဆောင်ထားသော ရက်စက်ကြမ်းကြုတ်သည့် အရှိန်အဝါသည်... နေမဝင် အင်ပါယာနှင့် အမေရိကန် အဖွဲ့များထက် များစွာ သာလွန်နေလေ၏။

ဤအဖွဲ့ နှစ်ဖွဲ့၏ ခေါင်းဆောင်များသည် သူတို့၏ အင်အားကို အတော်လေး ယုံကြည်မှု ရှိပုံ ရသည်။

ယဲ့ဖန်က သူတို့ကို ကြည့်နေသည်ကို သတိပြုမိလိုက်သောအခါ... ကိုရီးယား ရွှေရှာသူ အဖွဲ့၏ ခေါင်းဆောင် ဖြစ်သော ကျစ်ဆံမြီး ရှည်ရှည်နှင့် သက်လတ်ပိုင်း အမျိုးသားက ရှေ့သို့ ခြေတစ်လှမ်း တိုးလာလေ၏။ "တရုတ်လူမျိုး...၊ ပန်းချီကားကို ငါ့လက်ထဲ ထည့်လိုက်စမ်း...၊ ဒီနေရာကနေ ဘေးကင်းကင်းနဲ့ ထွက်သွားနိုင်အောင် ငါ အာမခံတယ်"

"ဒီမှာ ရှိနေတဲ့ ရွှေရှာသူ အဖွဲ့ (၄) ဖွဲ့ထဲမှာ... အင်အား အပိုင်းအရ ဆိုရင် ငါတို့က ပြိုင်ဘက်ကင်း နံပါတ်တစ်ပဲ"

"ငါတို့လက်ထဲ ထည့်ဖို့ ရွေးချယ်မှသာ... မင်း ဒီနေရာကနေ အကောင်းပကတိ အတိုင်း ပြန်ထွက်သွားနိုင်လိမ့်မယ်"

သူ့အနောက်တွင်... ဆင်နိုင်ငံ အဖွဲ့၏ ခေါင်းဆောင် ဖြစ်သော အသားမည်းမည်းနှင့် သတ္တိရှိပုံရသည့် သက်လတ်ပိုင်း အမျိုးသားကလည်း ရှေ့သို့ ခြေတစ်လှမ်း တိုးလာသည်။

"ကောင်လေး၊ ပါ့ခ်ဂျီချန် (Park Jichang) ရဲ့ တစ်ဖက်သတ် စကားတွေကို နားမထောင်နဲ့"

"ငါသာ သူ့ကို တိုက်ခိုက်ရင်... သူက ငါ့ပြိုင်ဘက် ဖြစ်ချင်မှ ဖြစ်မှာ"

"သူ့နောက်က တိုက်ကွမ်ဒို (Taekwondo) သမား အုပ်စုလိုက်ကြီး အကြောင်းကိုတော့ ပြောမနေနဲ့တော့...၊ ဘယ်သူမှ ငါတို့အဖွဲ့ကို ယှဉ်နိုင်မှာ မဟုတ်ဘူး"

"သူတို့အဖွဲ့က ဘယ်လိုလုပ် နံပါတ်တစ် ဖြစ်နိုင်မှာလဲ"

"..."

"ဒါ့အပြင်... မင်း မသိလို့ နေမှာ...၊ ကိုရီးယားက ဒီလူတွေက အရှက်မရှိဆုံး လူတန်းစားတွေပဲ"

"အရင်တုန်းက... သူတို့ ကတိဖျက်ခဲ့တာ ဘယ်နှကြိမ် ရှိပြီလဲ ဆိုတာတောင် မရေတွက်နိုင်တော့ဘူး"

"မင်းသာ သူတို့ကို ပန်းချီကား ပေးလိုက်ရင်... ချက်ချင်းပဲ မင်းကို မသိချင်ယောင် ဆောင်သွားကြလိမ့်မယ်...၊ မင်း ယုံလား"

"..."

"ပန်းချီကားကို ငါတို့လက်ထဲ ထည့်လိုက်တာ ပိုကောင်းမယ်"

"အဖွဲ့လိုက် တိုက်ခိုက်ရေး စွမ်းရည် အပိုင်းမှာ... လက်ရှိ ရောက်နေတဲ့ အဖွဲ့ (၄) ဖွဲ့ထဲမှာ ငါတို့က အသန်မာဆုံးပဲ"

"ငါတို့ တစ်ဖွဲ့တည်းကသာ မင်းရဲ့ လုံခြုံရေးကို အာမခံနိုင်တာ"

ယဲ့ဖန် ဆွံ့အသွားရသည်။

သို့သော် သူ စကားမပြောရသေးမီ... နေမဝင် အင်ပါယာ အဖွဲ့၏ တာဝန်ခံက သူ့ကို ကြည့်ပြီး ပြောလိုက်လေ၏။ "ငါ ပေါက်ကရတွေ အများကြီး မပြောချင်ဘူး...၊ မင်း တစ်ခုလောက်တော့ မှတ်ထားစေချင်တယ်"

"အဲဒါက... မင်း အခု နေမဝင် အင်ပါယာ ပိုင်နက်ထဲမှာ ရောက်နေတယ် ဆိုတာပဲ"

"ပြီးတော့... ဒါက ငါတို့ရဲ့ အမာခံ စခန်းပဲ"

"တကယ်လို့ မင်း ဒီပစ္စည်းကို ငါတို့လက်ထဲ မထည့်ဘူး ဆိုရင်... နေမဝင် အင်ပါယာကနေ မင်း မထွက်ခွာသရွေ့... ငါတို့ မင်းကို ဒုက္ခပေးနေမှာပဲ"

ဘေးနားမှ အမေရိကန် စစ်သားက နှုတ်ခမ်း အနည်းငယ် လှုပ်ရှားသွားသော်လည်း စကားမပြောပေ။

သို့သော် နောက်ဆုံးတွင်... နေမဝင် အင်ပါယာ ရွှေရှာသူ အဖွဲ့၏ တာဝန်ခံ စကားပြောပြီးနောက်... သူလည်း ဝင်ပြောလိုက်လေ၏။ "ငါတို့လည်း အတူတူပဲ"

"မင်းလက်ထဲက ပစ္စည်းကို ငါတို့ဆီ မပေးရင်... နောက်နောင် ငါတို့ ဂိုဏ်းရဲ့ ရန်သူပဲ"

သူတို့ ဘာကို ဆိုလိုသည်ကို ယဲ့ဖန် နောက်ဆုံးတွင် နားလည်သွားတော့သည်။

အဖွဲ့ (၄) ဖွဲ့လုံးက သူ့လက်ထဲမှ ပန်းချီကားကို မျက်စောင်းထိုးနေကြသည်ကို မြင်သောအခါ... သူ ပြုံးလိုက်လေ၏။ "ခင်ဗျားတို့ (၄) ဖွဲ့လုံးက ဒီပန်းချီကားကို လိုချင်နေကြတယ်...၊ ဒါပေမဲ့ ပြဿနာက ပန်းချီကားက တစ်ချပ်တည်း ရှိတာလေ...၊ ခင်ဗျားတို့ (၄) ဖွဲ့ အရင်ဆုံး တိုက်ကြည့်ကြပါလား...၊ နိုင်တဲ့သူကို ကျွန်တော် ဒီပန်းချီကား ပေးမယ်လေ... ဘယ်လိုလဲ"

"တကယ်လား" ဆင်နိုင်ငံ ရွှေရှာသူ အဖွဲ့၏ တာဝန်ခံသည် စိတ်လှုပ်ရှားသွားသည်။ ပြောရင်းနှင့် သူ့မျက်လုံးများ အရောင်လက်လာလေ၏။

ကိုရီးယား ရွှေရှာသူ အဖွဲ့၏ တာဝန်ခံ ပါ့ခ်ဂျီချန် ကတော့ အနည်းငယ် စိတ်လှုပ်ရှားနေပုံ ရပြီး... သူ့ကို ချက်ချင်း သတိထားကာ ကြည့်လိုက်သည်။

သူ့ခန္ဓာကိုယ် တင်းမာသွားသည်။

နေမဝင် အင်ပါယာမှ လူများမှာမူ ယုံကြည်မှု ကင်းမဲ့နေပုံ ရလေ၏။ သူတို့၏ မျက်နှာထားများ ချက်ချင်း အရုပ်ဆိုး အကျည်းတန်သွားပြီး... အဖွဲ့သားများလည်း ဂနာမငြိမ် ဖြစ်လာကြသည်။

အမေရိကန် အဖွဲ့ တစ်ဖွဲ့တည်းသာ ဆုံးဖြတ်ချက် ချပြီးပုံ ရလေ၏။

သူတို့ထဲမှ တစ်စုသည် ဆင်နိုင်ငံ၊ ကိုရီးယားနှင့် နေမဝင် အင်ပါယာမှ ရွှေရှာသူ အဖွဲ့များဆီသို့ ရုတ်တရက် ဝင်ရောက် တိုက်ခိုက်လိုက်ကြပြီး... ကျန်ရစ်သော လူအနည်းငယ်ကမူ ယဲ့ဖန်ဆီသို့ ရုတ်တရက် ပြေးဝင်လာကြလေသည်။

သူတို့က... အဖွဲ့ဖော်တွေက ကျန်သည့် အဖွဲ့ (၃) ဖွဲ့ကို တားဆီးထားတုန်း... ယဲ့ဖန်လက်ထဲက ပန်းချီကားကို လုယူဖို့ ကြံစည်နေကြသည်ပင်။

"ပွဲကောင်းပြီဟေ့"

ယဲ့ဖန်သည် ထိုအခြေအနေကို မြင်လိုက်ရသောအခါ... သူတို့ကို မနေနိုင်မထိုင်နိုင် လက်မထောင်ပြလိုက်မိတော့သည်။

အခန်း (၁၆၃၇) - ငါက တောင်းပန်စကား မလိုချင်ဘူး

~သို့သော်ငြားလည်း... ယဲ့ဖန်သည် ဒီတစ်ခါ ချက်ချင်း လှုပ်ရှားခြင်း မပြုပေ။ ဘယ်ဘက်ခြမ်းရှိ ဒုတိယမြောက် အိမ်ဟောင်း၏ အပေါ်ဆုံးထပ်ကို တစ်ချက် လှမ်းကြည့်လိုက်လေ၏။

သူသည် ပေါ့ပါးစွာ ရှောင်တိမ်းလိုက်ပြီး သူ့ထံ လှမ်းလာသော လက်တစ်ဖက်ကို ကျွမ်းကျင်စွာပင် ရှောင်ကွင်းလိုက်လေသည်။ တစ်ချိန်တည်းမှာပင်... အနည်းငယ် ဒေါသထွက်သော မျက်နှာထားဖြင့် ပြောလိုက်၏။ "ငါ ဒီပစ္စည်းကို (၁၀၀) သန်း ပေးပြီး ဝယ်ထားတာ"

"မင်းတို့ ထပ်ပြီး လုဖို့ ကြိုးစားမယ် ဆိုရင်... ငါ ကိုယ့်ကိုယ်ကိုယ် ကာကွယ်ရတော့မယ်"

အမေရိကန် ရွှေရှာသူများသည် သူ့စကားကို အလေးအနက် မထားကြကြောင်း သိသာလှသည်။ မထီမဲ့မြင် ပြုလိုက်ပြီးနောက်... သူတို့ကို ဦးဆောင်လာသော လူကောင်ကြီးက သူ့လက်အောက်ငယ်သားများကို လှမ်းအော်လိုက်လေ၏။ "မြန်မြန် လုပ်ကြစမ်း"

"မိုက်ခ် (Mike) တို့အဖွဲ့က ကြာကြာ တောင့်ခံနိုင်မှာ မဟုတ်ဘူး"

"မြန်မြန်... အဲဒီ အဝါရောင် မျောက်ကောင် လက်ထဲက ပစ္စည်းကို ရအောင်ယူပြီး ဒီနေရာကနေ ထွက်ကြမယ်"

သူ့ညီအစ်ကိုများသည် ထိုစကားကို ကြားသောအခါ မျက်နှာထားများ ပို၍ တည်ကြည် လေးနက်သွားကြပြီး... အားလုံးလိုလို တပြိုင်နက်တည်း ခုန်အုပ်လာကြလေတော့သည်။

မိုက်ခ်တို့ အုပ်စု အနေဖြင့်မူ... သူတို့က ဟန့်တားရသော အပိုင်းကို တာဝန်ယူထားရခြင်း ဖြစ်သည်။ ကိုရီးယား၊ နေမဝင် အင်ပါယာနှင့် ဆင်နိုင်ငံ ရွှေရှာသူ အဖွဲ့များကို ယာယီ ဟန့်တားထားကြသည်။

ကိုရီးယားမှ ကျစ်ဆံမြီးရှည်နှင့် လူက ထိုအခြေအနေကို မြင်သောအခါ... မနေနိုင်တော့ဘဲ စူးစူးဝါးဝါး အော်ဟစ်လိုက်လေ၏။ "ဝိုင်ဝုဖ် (Wild Wolf)... ငါ မင်းကို ပြောလိုက်မယ်...၊ မင်း ငါတို့ကို တားလို့မရဘူး"

"မင်း ငါတို့ကို ယာယီ တားထားနိုင်ရင်တောင်... ကမ္ဘာအဆုံးထိ ငါတို့ မင်းကို လိုက်လာမှာ"

"အခုချက်ချင်း ရပ်လိုက်... ကြားလား"

"..."

ဆင်နိုင်ငံမှ အသားမည်းမည်း၊ သတ္တိရှိပုံရပြီး အိန္ဒိယ လေသံဖြင့် ပြောဆိုတတ်သော လူပုလေးကလည်း ဟိန်းဟောက်လိုက်လေ၏။

"အဲဒီ ပစ္စည်းက မင်းတို့ ထိလို့ ရတဲ့ အရာ မဟုတ်ဘူး"

"မင်းတို့ရဲ့ အင်အားလောက်နဲ့... ပန်းချီကားကို ခဏလောက် ရလိုက်ရင်တောင်၊ ငါတို့ အားလုံးရဲ့ လက်ထဲကနေ လွတ်အောင် မပြေးနိုင်ဘူး"

"အခြေအနေကို နားလည်တယ် ဆိုရင်... ငါ့လမ်းကနေ ဖယ်ပေးပြီး ပန်းချီကားကို လုမနေနဲ့တော့"

ပြောပြောဆိုဆိုနှင့် သူသည် လျှပ်စီးကဲ့သို့ လှုပ်ရှားလိုက်ပြီး အမေရိကန် ရွှေရှာသူ တစ်ဦး၏ လက်မောင်းကို ဖမ်းဆွဲလိုက်သည်။ ဆွဲလိုက်၊ ဆောင့်လိုက် လုပ်ပြီးနောက်... ထိုလူ၏ လက်မောင်းကို ချိုးပစ်လိုက်လေ၏။

ထို့နောက်... အမေရိကန် ရွှေရှာသူက ခေါင်းမော့ပြီး အော်ဟစ်လိုက်ချိန်မှာပင်... လက်သီးတစ်ချက်က သူ့မေးစေ့ အောက်သို့ ဝင်ရောက်သွားတော့သည်။

တစ်ချက်တည်းဖြင့် အသေသတ်ပြီးနောက်... ဝက်သေကောင် တစ်ကောင်ကဲ့သို့ အဝေးသို့ ကန်ထုတ်လိုက်လေ၏။

သူ့လက်အောက်ငယ်သားများသည်လည်း အလွန် ရက်စက်ကြမ်းကြုတ်လှပြီး... အားလုံးလိုလို လူသတ်ရန် ရည်ရွယ်ချက်ဖြင့် တိုက်ခိုက်နေကြသည်။

အချိန်တိုအတွင်းမှာပင်... သူတို့ကို ပိတ်ဆို့ထားသော အမေရိကန် ရွှေရှာသူများသည် အနည်းငယ် ကြောက်လန့်သွားကြတော့သည်။

သူ့မျက်လုံးများကို တစ်ဖန် ပြန်ကြည့်လိုက်သောအခါ... မည်သူမျှ ရှေ့တိုးရဲခြင်း မရှိကြတော့ပေ။

ထိုအခြေအနေကို မြင်သောအခါ ဝိုင်ဝုဖ်လည်း ဖိအားကို ခံစားလိုက်ရပုံ ရလေ၏။

သူ့လက်အောက်ငယ်သားများက ယဲ့ဖန်ကို အကြိမ်ကြိမ် ခုန်အုပ်သော်လည်း... ယဲ့ဖန်က ရှောင်တိမ်းသွားသည်ကို မြင်သောအခါ... သူသည် လက်အောက်ငယ်သားများကို ဆွဲဖယ်လိုက်ပြီး မနေနိုင်မထိုင်နိုင် ပြောလိုက်လေ၏။

"မင်းတို့ကွာ... တုံးလိုက်ကြတာ...၊ ဖယ်ကြစမ်း"

"ငါ့ဘာသာ ငါ ရှင်းမယ်"

ပြောပြောဆိုဆိုနှင့် သူသည် အကြောအချင်များကို ဆန့်ထုတ်လိုက်ပြီး... တကယ့် ဝံပုလွေရိုင်း တစ်ကောင်ကဲ့သို့ ယဲ့ဖန်ဆီသို့ ခုန်အုပ်လိုက်လေတော့သည်။

ဝိုင်ဝုဖ် ခုန်အုပ်လာချိန်တွင်... သူ၏ မျက်လုံးများထဲမှ ရက်စက်မှုနှင့် သူ၏ လက်သီးချက်များမှ ကြမ်းတမ်းမှုများကို ယဲ့ဖန် သဘာဝကျစွာပင် အာရုံခံစားမိလိုက်သည်။

ဒီတစ်ခါ ရှောင်တိမ်းသောအခါ... ယခင်ကကဲ့သို့ ရိုးရိုးရှင်းရှင်း ရှောင်တိမ်းလိုက်ခြင်း မဟုတ်တော့ပေ။

သူ ရွေ့လျားလိုက်သည့် အချိန်တွင်... ခြေထောက်ကို မသိမသာ ဆန့်ထုတ်လိုက်ပြီး... တစ်ချိန်တည်းမှာပင် အရှိန်ကို အသုံးပြုကာ ဝိုင်ဝုဖ်၏ ပခုံးနောက်ဘက်ကို တိုက်လိုက်လေ၏။

ခြိမ်းခြောက်မှု အပြည့်ဖြင့် ဝင်ရောက်လာသော ဝိုင်ဝုဖ်သည် ဟန်ချက်ပျက်သွားပုံ ရလေသည်။ သူ ယိုင်နဲ့သွားပြီး ကြမ်းပြင်ပေါ်သို့ လဲကျသွားတော့သည်။

ဝိုင်ဝုဖ် လဲကျသွားပြီး ခေါင်းမူးနေစဉ်မှာပင်... ယဲ့ဖန် လျှောက်လာပြီး သူ့ဖနောင့်များကို တက်နင်းလိုက်လေ၏။

“ခွပ်...

ခွပ်…”

တိုးညင်းသော်လည်း ကြက်သီးထဖွယ် ကောင်းသော အရိုးကျိုးသံ နှစ်ချက် ထွက်ပေါ်လာသည်။

ဝိုင်ဝုဖ်၏ ခန္ဓာကိုယ်သည် မနေနိုင်မထိုင်နိုင် တုန်ရီသွားတော့သည်။

အသံတိတ် ညည်းတွားလိုက်ပြီးနောက်... သူ သတိလစ်သွားလေ၏။

*

"ဘော့စ်..."

"ဘော့စ်..."

"အစ်ကို ဝုဖ်..."

ဝိုင်ဝုဖ် သတိလစ်သွားသည်ကို မြင်လိုက်ရသောအခါ သူ့လက်အောက်ငယ်သားများ အနည်းငယ် ကြောင်အသွားကြသည်။

သူတို့ထဲမှ အနည်းငယ်ကမူ ဘာဖြစ်သွားမှန်း လုံးဝ မသိလိုက်ကြပေ။ ခုနကမှ သားရဲတစ်ကောင်လို ကြမ်းတမ်းနေသော ဝိုင်ဝုဖ်သည်... ယဲ့ဖန် တက်နင်းလိုက်ရုံဖြင့် ဘယ်လိုလုပ် ရုတ်တရက် လဲကျပြီး သတိလစ်သွားရတာလဲ။ ထိုလူတွင် ပုံမှန်ထက် ထူးကဲသော အရပ်အမောင်းနှင့် ကိုယ်အလေးချိန် ရှိပုံလည်း မရပေ။

သို့သော်ငြားလည်း... ကိုရီးယား၊ ဆင်နိုင်ငံနှင့် နေမဝင် အင်ပါယာ အဖွဲ့များကို ပိတ်ဆို့ရန် လူများကို ဦးဆောင်နေသော မိုက်ခ်သည် ထိုမြင်ကွင်းကို မြင်လိုက်ရသောအခါ တစ်စုံတစ်ရာကို သတိထားမိသွားပုံ ရလေ၏။

သူ လှည့်ကြည့်လိုက်ပြီး ယဲ့ဖန်ကို ကြည့်လိုက်သည်။ သို့သော် သူ့မျက်လုံးများ တုန်လှုပ်သွားပြီး အော်ပြောလိုက်လေ၏။ "ဆုတ်မယ်..."

"ဘော့စ်ကို ခေါ်ပြီး အခုချက်ချင်း ဆုတ်ကြမယ်"

"ငါတို့ ပီကာဆို ပန်းချီကားကို ဆက်ပြီး မလုတော့ဘူး"

ပြောပြောဆိုဆိုနှင့် သူသည် ရှေ့ဆုံးမှနေ၍ ယဲ့ဖန်ဆီသို့ ပြေးဝင်လာခဲ့သည်။ "ငါတို့ ဆုတ်ခွာပါ့မယ်"

"ကျေးဇူးပြုပြီး သက်ညှာပါ...၊ ငါတို့ ဘော့စ်ကို ပြန်ခေါ်သွားခွင့် ပြုပါ"

ဒီလူက သူတို့အဖွဲ့ရဲ့ ဒုတိယ ခေါင်းဆောင် ဖြစ်လိမ့်မည်ဟု ယဲ့ဖန် ခန့်မှန်းလိုက်သည်။

သူ့ကို စိုးရိမ်ထိတ်လန့်သော မျက်နှာထားဖြင့် ကြည့်နေသည်ကို မြင်သောအခါ... ယဲ့ဖန်က နှာခေါင်းရှုံ့လိုက်ပြီး ပြောလိုက်လေ၏။ "မင်းတို့က ငါ့ပစ္စည်းကို လုချင်ကြတယ်...၊ ပြီးတော့ ငါ့ကိုတောင် တိုက်ခိုက်ဖို့ ကြိုးစားခဲ့ကြသေးတယ်...၊ အခုမှ ထွက်သွားမယ်လို့ ပြောလိုက်ရုံနဲ့ ပြီးရောလို့ ထင်နေတာလား"

"ငါတို့ တောင်းပန်ပါ့မယ်" မိုက်ခ်က လျင်မြန်စွာ ပြောလိုက်သည်။

"ငါက တောင်းပန်စကား မလိုချင်ဘူး" ယဲ့ဖန်၏ ပုံစံမှာ မနှေးလွန်း မမြန်လွန်း ဖြစ်နေလေ၏။

ယခုအခါ အချိန်နှင့် အခွင့်အရေးသည် သူ့လက်ထဲတွင် အပြည့်အဝ ရှိနေချေပြီ။

အမေရိကန် ရွှေရှာသူများသည် ခုနကမှ သူ့ပန်းချီကားကို လုယူရန် ကြိုးစားခဲ့ကြသည်။ သူတို့သည် သူ့ကိုသာမက ကိုရီးယား၊ ဆင်နိုင်ငံနှင့် နေမဝင် အင်ပါယာမှ ရွှေရှာသူများကိုပါ ရန်စမိလျက်သား ဖြစ်သွားခဲ့လေ၏။

ယခုအချိန်တွင်... ဆင်နိုင်ငံနှင့် ကိုရီးယား ရွှေရှာသူ အဖွဲ့များသည် သူတို့၏ ခံစစ်စည်းကို လုံးဝ ဖောက်ထွက်လာနိုင်ခဲ့ပြီး အနားသို့ ရောက်ရှိလာကြပြီ ဖြစ်သည်။

သူ ဘာမှ ထပ်လုပ်စရာ မလိုတော့ပေ။ မိုက်ခ်နှင့် အခြားသူများ သေချာပေါက် ဒုက္ခရောက်တော့မည်။

မိုက်ခ် ကိုယ်တိုင်လည်း လက်ရှိ အခြေအနေကို မြင်တွေ့နေရသည်။

ယဲ့ဖန်က အလျှော့ပေးရန် ဆန္ဒ မရှိသည်ကို မြင်လိုက်ရသောအခါ... သူသည် လှုပ်ရှားရန် မရဲတော့ပေ။ ထို့အပြင် သူ့ဘော့စ်ကို ထားခဲ့ရန်လည်း မရဲချေ။

ယဲ့ဖန် လှည့်ကြည့်လိုက်ပြီး... ဆင်နိုင်ငံ ရွှေရှာသူ အဖွဲ့နှင့် ပါ့ခ်ဂျီချန်ကို ကြည့်လိုက်သည်။

"ငါတို့ ဒီပြိုင်ပွဲကနေ နှုတ်ထွက်ပါ့မယ်လို့ ကတိပေးပါတယ်..."

သို့သော် ပါ့ခ်ဂျီချန်နှင့် ဆင်နိုင်ငံ ရွှေရှာသူ အဖွဲ့၏ ခေါင်းဆောင်တို့သည် ဒေါသကို မြိုသိပ်ထားကြသည်။ သူ စကားမဆုံးမီမှာပင်... သူတို့ တပြိုင်နက်တည်း တိုက်ခိုက်လိုက်ကြတော့သည်။

ပါ့ခ်ဂျီချန်၏ ပထမဆုံး လှုပ်ရှားမှုမှာ တိုက်ကွမ်ဒို၏ သေစေနိုင်သော စွမ်းရည် ဖြစ်သည့်... 'ကောင်းကင်ဓား လိပ်ပြာကန်ချက်' ပင်။

ဆင်နိုင်ငံ ရွှေရှာသူ အဖွဲ့၏ ခေါင်းဆောင်ကမူ တိုတောင်းပြီး လျင်မြန်သော လှုပ်ရှားမှုကို အသုံးပြုလိုက်သည်။ သူ့လက်သီးချက်သည် မိုးကြိုးကဲ့သို့ ပြင်းထန်လှပေ၏။

ပူးပေါင်း တိုက်ခိုက်မှု တစ်ကြိမ်တည်းဖြင့်... မိုက်ခ်၏ လက်မောင်းများ ကျိုးပဲ့သွားတော့သည်။ သူ ယိုင်နဲ့သွားပြီး သွေးအနည်းငယ် အန်ထုတ်လိုက်ကာ... မနည်း အားယူပြီးမှ မတ်တပ်ရပ်နိုင်တော့သည်။

သူ့တွင် ခြိမ်းခြောက်နိုင်စွမ်း သို့မဟုတ် တိုက်ခိုက်နိုင်စွမ်း မရှိတော့ပေ။

"သန်မာလိုက်တာ" အခြား အမေရိကန် ရွှေရှာသူ အဖွဲ့ဝင်များသည် ထိုမြင်ကွင်းကို မြင်လိုက်ရသောအခါ အနည်းငယ် ကြောက်လန့်သွားကြသည်။

သူတို့ မျက်လုံးထဲတွင် ဒေါသနှင့် နာကြည်းမှုများ ရှိနေသော်လည်း... ဘယ်သူမှ အသံကျယ်ကျယ် မထွက်ရဲကြပေ။ ရှေ့ထွက်ပြီး တားဆီးဖို့ ဆိုသည်မှာ ဝေလာဝေး။

"ဒီနှစ်ယောက်က လူသားပုံစံ လက်နက်တွေများလား"

"ဒုတိယ ခေါင်းဆောင် မိုက်ခ်က အထူးတပ်ဖွဲ့ဝင် တစ်ယောက်လေ...၊ သူ့ရဲ့ ခန္ဓာကိုယ် ကြံ့ခိုင်မှုက ငါတို့ထဲမှာ အကောင်းဆုံးပဲ"

"ဒါပေမဲ့ သူတို့နှစ်ယောက်ရဲ့ ကန်ချက်နဲ့ လက်သီးချက်တွေကြောင့်... သူ ဒဏ်ရာ အပြင်းအထန် ရပြီး သေလုနီးပါး ဖြစ်သွားပြီ"

ယဲ့ဖန်လည်း တိတ်တဆိတ် ခေါင်းညိတ်လိုက်သည်။

ပါ့ခ်ဂျီချန်တွင် တိုက်ကွမ်ဒို အခြေခံ ရှိသည်။

သူသည် တိုက်ကွမ်ဒို ခါးပတ်နက် (၉) ထပ် (သို့မဟုတ်) ထို့ထက်မြင့်သော အဆင့်ရှိသည့် ကျွမ်းကျင်သူ တစ်ဦး ဖြစ်ချေသည်။

သူ၏ ခန္ဓာကိုယ် ကြံ့ခိုင်မှုနှင့် ပေါက်ကွဲအားသည် အလင်းကျင့်စဉ် သိုင်းပညာရှင် တစ်ဦးနှင့် နီးစပ်နေပြီ ဖြစ်သည်။

ဆင်နိုင်ငံမှ အသားမည်းမည်းနှင့် ကြံ့ခိုင်သော လူမှာမူ... မွေထိုင်း အခြေခံ (၁၀၀) ရာခိုင်နှုန်း ရှိသူ ဖြစ်သည်။

သူ့ခွန်အားက သူ့ထက် မနိမ့်ပါပေ။

ဒီနှစ်ယောက်သာ ပူးပေါင်းလိုက်မည် ဆိုလျှင်... အာရှသားတွေထက် သဘာဝအလျောက် ခန္ဓာကိုယ် ကြံ့ခိုင်မှု ပိုကောင်းသည့် အမေရိကန် အထူးတပ်ဖွဲ့ဝင်တွေတောင်... တစ်ချက်တည်း ခံနိုင်မှာ မဟုတ်ပေ။

သူတို့နှစ်ဦး ဒေါသ ဖြေဖျောက်ပြီးနောက် သူ့ကို ပြန်လှည့်ကြည့်လာကြသည်ကို မြင်သောအခါ... ယဲ့ဖန်၏ မျက်နှာထား ပြောင်းလဲခြင်း မရှိပေ။

"ငါ ဒီပန်းချီကားကို သန်း (၁၀၀) ပေးပြီး ဝယ်ခဲ့တာ”