အိမ်အသစ် ရှာဖွေခြင်း

ညဘက်မှာ ရှီဖုန်းလန် က အမှောင် ကမ္ဘာ ကြမ်းတမ်းသော သားရဲကို စီးပြီး တခြား ထူးခြားဆန်းပြား သားရဲတွေနဲ့ အတူ ကစားဖို့ ထွက်သွားတုန်း ကျန်းပေရန် က သူ့ဂီတကို ဆက်လက် လေ့ကျင့်နေလေသည်။

သူ့ဂီတရဲ့ လွှမ်းမိုးနိုင်စွမ်း ဧရိယာကို ဘယ်လို ချဲ့ထွင်ရမလဲ ဆိုတာ ဆက်လက် လေ့ကျင့်နေတာ အပြင် ဘယ်တူရိယာတွေက ဘယ်လို စိတ်ခံစားမှုတွေကို လှုံ့ဆော်ဖို့ အသင့်တော်ဆုံးလဲ ဆိုတာလည်း ကျန်းပေရန် လေ့လာနေလေသည်။

ဥပမာ အော်ဟူ က ပစ်မှတ်ကို ဝမ်းနည်းစေဖို့ အထူး ကောင်းမွန်ပြီး နှဲ က ပစ်မှတ်ကို ပျော်ရွှင်စေဖို့ အထူး ထိရောက်သည် ဆိုတာမျိုးတွေ ဖြစ်လေသည်။

ဒါတွေက ဖြည်းဖြည်းချင်း လေ့လာရမယ့် အရာတွေ ဖြစ်ပြီး လုံလောက်တဲ့ စမ်းသပ်ခံ အရေအတွက် လိုအပ်လေသည်၊ လက်ရှိမှာ ကျန်းပေရန် ဆီမှာ အဲ့ဒါ မရှိသေးပေ။

ဒါကြောင့် လောလောဆယ် သီအိုရီ အဆင့်မှာသာ ရှိနေသေးလေသည်။

မကြာခင် နောက်ထပ် ၃ ရက် ကုန်ဆုံးသွားခဲ့လေသည်။

ဒီနေ့မှာ ကျန်းပေရန် က ရှီဖုန်းလန် နဲ့ ရှဲ့လင်းတန်း တို့နဲ့ အတူ "ကျင့်ကြံခြင်း တုပမှု" ကစားနေတုန်း သူ့နောက်က ပိုးအိမ် ဆီကနေ စုတ်ပြဲသံ တစ်ခု ရုတ်တရက် ကြားလိုက်ရလေသည်။

'နောက်ဆုံးတော့ ထွက်လာဖို့ ဆန္ဒ ရှိပြီပေါ့လေ'

လက်ထဲက ကတ်ပြားကို ချလိုက်ပြီး ပိုးအိမ် ဆီ လှမ်းကြည့်လိုက်ကာ မျှော်လင့်ချက် အပြည့်နဲ့ မျက်နှာထား ဖြစ်ပေါ်လာလေသည်။

လွန်ခဲ့တဲ့ ၂ ရက်တုန်းက ပိုးအိမ်ထဲက ချူယန်ဇယ် ကို ဝိညာဉ်အာရုံနဲ့ စစ်ဆေးကြည့်တုန်းက သူ့ရဲ့ ရုပ်ပိုင်းဆိုင်ရာ အခြေအနေ တည်ငြိမ်သွားပြီ ဖြစ်ကြောင်း တွေ့ရှိခဲ့ရလေသည်။

ဒါကြောင့် လွန်ခဲ့တဲ့ ရက်အနည်းငယ် အတွင်း ဘယ်နေ့မဆို ချူယန်ဇယ် ပိုးအိမ်ထဲက ထွက်လာခဲ့ရင် ကျန်းပေရန် အံ့သြမိမှာ မဟုတ်ပေ။

စုတ်ပြဲသံကို ကြားလိုက်ရတဲ့ ရှီဖုန်းလန် လည်း သိချင်စိတ်နဲ့ မတ်တတ်ရပ်လိုက်လေသည်။

အဲ့ဒီ ပိုးအိမ်ထဲမှာ ဘာရှိလဲ ဆိုတာ သူမ သိချင်နေတာ ကြာပြီ ဖြစ်လေသည်။

"ရွှပ်"

စုတ်ပြဲသံ ဆက်တိုက် ထွက်ပေါ်လာတာနဲ့ အမျှ ဧရာမ ပိုးအိမ်ကြီး ပေါ်က အက်ကွဲကြောင်းတွေ ပိုပို နက်ရှိုင်းလာပြီး ပြီးခဲ့တဲ့ တစ်ခေါက် ချူယန်ဇယ် ထွက်လာတုန်းကနဲ့ လုံးဝ ကွဲပြားခြားနားနေလေသည်။

ဒီတစ်ခေါက် ထွက်လာပုံက နည်းနည်း ပိုကြမ်းတမ်းတဲ့ အလှတရား ဆန်နေလေသည်။

နောက်ဆုံးမှာ အက်ကွဲကြောင်းတွေ ပိုးအိမ် တစ်ခုလုံးကို ဖုံးလွှမ်းသွားတဲ့ အခါ လက်တစ်ဖက် ရုတ်တရက် ထိုးထွက်လာလေသည်။

ပိုသေချာ ကြည့်ဖို့ ရှေ့တိုးသွားနေတဲ့ ရှီဖုန်းလန် ရုတ်တရက် ထွက်လာတဲ့ လက်ကြောင့် လန့်ဖျပ်သွားပြီး ပေရန်လေး နောက် အမြန် ပုန်းလိုက်လေသည်။

"ပေရန်လေး ဒီပိုးအိမ်ထဲမှာ လူတစ်ယောက် ဘယ်လိုလုပ် ရှိနေတာလဲ အဲ့ဒီလူက ဘယ်သူလဲ"

"ကြည့်နေလိုက် တွေ့ရလိမ့်မယ်"

ကျန်းပေရန် စကားဆုံးတာနဲ့ ဆန့်ထွက်လာတဲ့ လက်က ပိုးအိမ် အလွှာတွေကို စတင် ခွာချလိုက်ပြီး ပုံရိပ် တစ်ခု ဖြည်းဖြည်းချင်း ထွက်ပေါ်လာလေသည်။

ပိုးအိမ်ထဲကနေ ချူယန်ဇယ် ထွက်လာတာ မြင်တော့ ရှီဖုန်းလန် အံ့သြတကြီး အာမေဋိတ် ပြုလိုက်လေသည်။

"ဒါဆို ပိုးအိမ် ဖြစ်သွားတဲ့သူက နင်ကိုး"

ပိုးအိမ်ထဲကနေ ထွက်လာကာစ ချူယန်ဇယ် နည်းနည်း ကြောင်တောင်တောင် ဖြစ်နေသေးပေမယ့် ကျန်းပေရန် ကို မြင်တာနဲ့ ချက်ချင်း ဦးညွှတ်ပြီး ပြောလိုက်လေသည်။

"ဆရာ"

"ဘယ်လို ခံစားရလဲ" သူ့ကို ဝိညာဉ်အာရုံနဲ့ စစ်ဆေးပြီးနောက် ကျန်းပေရန် မေးလိုက်လေသည်။

"ဆရာ့ကို ဖြေကြားရရင် ခံစားရတာ... အရမ်း ကောင်းပါတယ်"

ချူယန်ဇယ် လက်သီးဆုပ်ပြီး ပြန်ဖြေလိုက်လေသည်။

အပြင်ပန်းက ကြည့်ရင် ချူယန်ဇယ် လုံးဝ ပြောင်းလဲသွားခြင်း မရှိပေ။

အတွင်းပိုင်းမှာတောင် ဧကရာဇ် အဆိပ်ကောင် သူ့နှလုံးသားထဲ ရောက်ရှိနေတာကလွဲရင် ကွာခြားချက် သိပ်မရှိပေ။

ဒါပေမဲ့ ကိစ္စတွေက အဲ့လောက် ရိုးရှင်းမယ်လို့ ကျန်းပေရန် မထင်ပေ။

ဧကရာဇ် အဆိပ်ကောင် ရောက်ရှိလာမှုက သူ့ခန္ဓာကိုယ် အတွက် ကြီးမားတဲ့ ပြောင်းလဲမှု တစ်ခု ယူဆောင်လာပေးသင့်သည်၊ ဒါပေမဲ့ ဒီပြောင်းလဲမှုက ပေါ်လာဖို့ အချိန်တချို့ ယူရလောက်လေသည်။

ဒီအချိန်မှာ ရှီဖုန်းလန် ရဲ့ သိချင်စိတ် ပြန်လည် နိုးထလာလေသည်။

သူမ ချူယန်ဇယ် ဆီ လျှောက်သွားပြီး သူ့ကို အကဲခတ်လိုက်လေသည်။

ပျံသန်းသော စံအိမ် တုန်းက ဒီလူကောင်ကြီးက သာမန် လူသား တစ်ယောက်နဲ့ မတူဘူးလို့ သူမ ထင်ခဲ့ပြီးသား ဖြစ်ပေမယ့် ဒီလောက်ထိ မတူလိမ့်မယ်လို့ သူမ မမျှော်လင့်ထားခဲ့မိပေ။

ခြေတစ်လှမ်း ရှေ့တိုးလိုက်ပြီး ကျန်းပေရန် ရှီဖုန်းလန် ကို သူ့နောက် ဆွဲပို့လိုက်ကာ ချူယန်ဇယ် ရဲ့ ပခုံးကို ပုတ်လိုက်လေသည်။

"ခဏလောက် သွားနားလိုက်ပါ ဒီည ထန်တိုင်းပြည် ကို ပြန်ဖို့ ပြင်ဆင်ကြမယ်"

သူ့ဆရာရဲ့ စကားကို ကြားတော့ သူတို့ ဘယ်ရောက်နေလဲ၊ ဘာဆက်လုပ်ရမလဲ ဆိုတာ ချူယန်ဇယ် ချက်ချင်း ပြန်သတိရသွားလေသည်။

"ဆရာ ကျွန်တော် အဆင်ပြေပါတယ် ဘယ်အချိန်မဆို သွားလို့ ရပါတယ်"

"နားပါလို့ ငါ ပြောရင် ကောင်းကောင်း နားလိုက်ပါ စကားအများကြီး ပြောစရာ မလိုဘူး"

"ဟုတ်ကဲ့" ချူယန်ဇယ် ချက်ချင်း လိုက်နာလိုက်လေသည်။

ချူယန်ဇယ် တင်ပျဉ်ခွေ ထိုင်ပြီးနောက် "ကျင့်ကြံခြင်း တုပမှု" ကစားပွဲ ခုံဆီ ကျန်းပေရန် ပြန်သွားလိုက်လေသည်။

အခုချိန်ထိ ဇန်တိုင်းပြည် ကို လာရတဲ့ အဓိက ရည်ရွယ်ချက် ပြီးမြောက်သွားပြီ ဖြစ်လေသည်။

ချူယန်ဇယ် ရဲ့ ခန္ဓာကိုယ်ထဲမှာ ရှိနေပေမယ့် ဒီ ဧကရာဇ် အဆိပ်ကောင် ကို ကျန်းပေရန် ဘယ်အချိန်မဆို ပြန်ထုတ်ယူလို့ ရနိုင်လေသည်။

ဒါကြောင့် အခု အချိန်တချို့ လိုအပ်နေသေးတဲ့ နေမင်းသတ်ဖြတ်ခြင်း ကြွေရည်သုတ်ဆေး ကလွဲရင် စနစ်ရဲ့ "အဓိက မစ်ရှင်" အတွက် လိုအပ်တဲ့ ရတနာ ပစ္စည်းတွေ အားလုံးကို သူ နောက်ဆုံးမှာ ရရှိသွားပြီ ဖြစ်လေသည်။

သူတို့ ဘယ်လို အကျိုးသက်ရောက်မှုတွေ ရှိမလဲ ဆိုတာ သူ မသိသေးပေမယ့် အနည်းဆုံးတော့ ကျန်းပေရန် စိတ်ပူစရာ ကိစ္စ တစ်ခု လျော့သွားတာတော့ အမှန်ပါပဲ။

အဲ့ဒီအချိန်မှာ ရုတ်ရုတ်သဲသဲ အသံတွေ ကြားလို့ အမှောင် ကမ္ဘာ ကြမ်းတမ်းသော သားရဲ ပျံသန်း ရောက်ရှိလာလေသည်။

အပေါက်ကြီး တစ်ခု စုတ်ပြဲနေတဲ့ ပိုးအိမ်နဲ့ အဲ့ဒီဘေးမှာ တင်ပျဉ်ခွေ ထိုင်နေတဲ့ ချူယန်ဇယ် ကို ကြည့်ပြီးနောက် ကျန်းပေရန် ဘက် လှည့်ကာ မေးလိုက်လေသည်။

"မင်း ထွက်သွားတော့မလား"

"ဟုတ်တယ်" ကျန်းပေရန် ခေါင်းညိတ်လိုက်လေသည်။

"စိတ်မပူပါနဲ့ ငါ အပြင်ရောက်တာနဲ့ မင်းတို့ နေထိုင်ဖို့ သင့်တော်တဲ့ နေရာ တစ်ခု ရှာပေးပါ့မယ်"

"ကျေးဇူးတင်ပါတယ်"

ခေါင်းညိတ်လိုက်ပြီး အမှောင် ကမ္ဘာ ကြမ်းတမ်းသော သားရဲ ရှီဖုန်းလန် ဆီ လျှောက်သွားကာ သူမကို ခေါင်းကြီးနဲ့ ပွတ်သပ်ပြီး မခွဲခွာချင်တဲ့ ညည်းညူသံတွေ ပြုလုပ်လိုက်လေသည်။

အမှောင် ကမ္ဘာ ကြမ်းတမ်းသော သားရဲရဲ့ ဝန်လေးမှုကို မြင်တော့ သူတို့ စကားဝိုင်းကို အကြမ်းဖျင်း နားလည်ထားတဲ့ ရှီဖုန်းလန် က ပေရန်လေး ကို ပြောလိုက်လေသည်။

"ပေရန်လေး ချီချီ ကို ငါနဲ့ အတူ အိမ်လိုက်ခဲ့ချင်လား မေးပေးပါလား"

ကျန်းပေရန် ခဏ မှင်သက်သွားပြီး တကယ်တော့ ဒါက စိတ်ကူးကောင်း တစ်ခုပဲလို့ တွေးမိလိုက်လေသည်။

ပျံသန်းသော စံအိမ် ကနေတဆင့် ရှီမျိုးနွယ်စု ဆီ ဒီ ထူးခြားဆန်းပြား သားရဲတွေကို ပို့ဆောင်ပေးလိုက်တာက တကယ်တော့ သူတို့အတွက် တော်တော် ကောင်းမွန်တဲ့ အိမ်တစ်ခု ဖြစ်လာနိုင်လေသည်။

ဒါကြောင့် ရှီဖုန်းလန် နဲ့ အတူ သူမအိမ်ကို လိုက်သွားချင်လား လို့ အမှောင် ကမ္ဘာ ကြမ်းတမ်းသော သားရဲ ကို ကျန်းပေရန် မေးလိုက်လေသည်။

အမှောင် ကမ္ဘာ ကြမ်းတမ်းသော သားရဲ ခဏ စဉ်းစားပေမယ့် နောက်ဆုံးမှာ ခေါင်းခါလိုက်လေသည်။

"ငါ ဒီက ထွက်ခွာရတဲ့ ရည်ရွယ်ချက်က ပိုသန်မာလာဖို့ပါ လူသားတွေရဲ့ မွေးမြူခြင်း ခံရဖို့ မဟုတ်ပါဘူး ငါ့မျိုးနွယ်တွေ ပိုများတဲ့ဒေသ တစ်ခုဆီပဲ ငါ သွားချင်တယ်"

"ကောင်းပြီ ငါ နားလည်ပါပြီ"

အမှောင် ကမ္ဘာ ကြမ်းတမ်းသော သားရဲ ရဲ့ အဖြေကို ရှီဖုန်းလန် ဆီ ပြန်လည် ပြောပြလိုက်တဲ့ အခါ သူမ သိသိသာသာ စိတ်ပျက်သွားလေသည်။

ဒါပေမဲ့ သူမနဲ့ အတူ လိုက်ခဲ့ဖို့ သားရဲကို သူမ အတင်းအကျပ် မလုပ်ခဲ့ပေ။

အဲ့ဒီအစား သူ့ရဲ့ အနီရောင် လည်ဆံမွေးတွေကို ပွတ်သပ်ပေးပြီး ပြောလိုက်လေသည်။

"ငါ့အိမ်တံခါးက မင်းအတွက် အမြဲ ပွင့်နေပါတယ်"

ရှီဖုန်းလန် ဘာပြောလဲ ဆိုတာ အမှောင် ကမ္ဘာ ကြမ်းတမ်းသော သားရဲ နားမလည်ပေမယ့် သူမ စကားလုံးတွေထဲက ကြင်နာမှုကို ခံစားမိပြီး သူမကို ပိုမို ပြင်းထန်စွာ တိုးဝှေ့လိုက်လေသည်။

မိန်းကလေးနဲ့ သားရဲ ကြားက သဟဇာတ ဖြစ်နေတဲ့ မြင်ကွင်းကို ကြည့်ရင်း အဆင့် ၈ ထူးခြားဆန်းပြား သားရဲ တစ်ကောင်ကို ဒီလောက် အလွယ်တကူ "ဖမ်းစား" နိုင်ဖို့ ရှီဖုန်းလန် မှာ ဘယ်လို ဖွဲ့စည်းပုံမျိုး ရှိနေလဲ ဆိုတာ နောက်ကျရင် သေချာ မေးမြန်းရမယ်လို့ ကျန်းပေရန် တွေးလိုက်လေသည်။

သေချာ ဖွံ့ဖြိုးတိုးတက်အောင် လုပ်နိုင်ရင် သူမက "သားရဲ တစ်ရာ တပ်မတော်" တစ်ခု မွေးမြူပြီး လျှို့ဝှက်ဆန်းကြယ်နဂါး တိုက်ကြီး ကို သိမ်းပိုက်နိုင်လောက်လေသည်။

လက်တွေ့ကျကျ ပြောရရင် စိတ်ကူးကြည့်နိုင်သမျှ အသန်မာဆုံး ပါရမီပါပဲ။

ရှီဖုန်းလန် နဲ့ "ကျင့်ကြံခြင်း တုပမှု" ကစားပြီးတဲ့ အချိန်မှာ ညရောက်ခါနီးပြီ ဖြစ်လေသည်။

ထူးခြားဆန်းပြား သားရဲ အားလုံး အတွက် ခမ်းနားတဲ့ ညစာ တစ်နပ် ပြင်ဆင်ပေးပြီးနောက် ကျန်းပေရန် သူ့အဖွဲ့ကို ဦးဆောင်ပြီး အတားအဆီး အပြင်ဘက်၊ စိမ့်မြေ ဘေးဆီ ပြန်ခေါ်သွားလိုက်လေသည်။

သူတို့ ထွက်ခွာတော့မယ့် အချိန်မှာ သူ့ဆီ ပျံလာတဲ့ စက္ကူစွန် တစ်ကောင်ကို ကျန်းပေရန် တွေ့လိုက်ရလေသည်။

သူ ဖမ်းယူပြီး ဖွင့်ကြည့်လိုက်လေသည်။

စာက ကျူးရှန်ကျန်း ဆီက ဖြစ်ပြီး သူ အရာအားလုံး စီစဉ်ပြီးပြီ ဖြစ်ကြောင်း၊ ဘယ်အချိန်မဆို ထွက်ခွာဖို့ အသင့် ဖြစ်နေကြောင်း ဖော်ပြထားလေသည်။

ဖတ်ပြီးနောက် ကျန်းပေရန် စာပြန်ရေးလိုက်ပြီး နေရာမှာတင် စောင့်နေဖို့၊ သူ့ကိစ္စတွေ ပြီးတာနဲ့ လင်မျိုးနွယ်စုဆီ သူ့ကို ခေါ်သွားဖို့ တစ်ယောက်ယောက် စီစဉ်ပေးမယ့် အကြောင်း ပြောလိုက်လေသည်။

ကျူးရှန်ကျန်း ဆီ စာရေးပြီးနောက် ဂျူဇီမင် ဆီ နောက်တစ်စောင် ထပ်ရေးပြီး ပို့လိုက်လေသည်။

အဲ့ဒီနောက် သူ ပျံသန်းသော စံအိမ် ပေါ် တက်ပြီး ဂျူဇီမင် တို့နဲ့ ပထမဆုံး တွေ့ခဲ့တဲ့ စားသောက်ဆိုင် ဆီ ပြန်သွားလိုက်လေသည်။

မကြာခင်မှာ သီးသန့် အခန်း တံခါး ခေါက်သံ ကြားလိုက်ရလေသည်။

သူ့ဆရာက "ဝင်ခဲ့" လို့ ပြောတာ ကြားပြီးနောက် ဂျူဇီမင် တံခါးတွန်းဖွင့်ပြီး ဝင်လာလေသည်။

"ဂါရဝပြုပါတယ် ဆရာ"

ဂျူဇီမင် ရှေ့တိုးပြီး ကျန်းပေရန် ကို ဦးညွှတ်လိုက်လေသည်။

"ဒီတစ်ခေါက် မင်းကို ခေါ်လိုက်တာက ဒေသခံ တစ်ယောက် အနေနဲ့ မင်းကို တစ်ခုခု မေးချင်လို့ပါ ဇန်တိုင်းပြည် မှာ ထူးခြားဆန်းပြား သားရဲတွေစုဝေးတဲ့ နေရာတွေ ရှိလား"

ဂျူဇီမင် ခဏ မှင်သက်သွားလေသည်။

ဇန်တိုင်းပြည် မှာ ဟော်ဟုန်ဖေး အင်အားစု တည်ဆောက်ဖို့ ကူညီပေးရတဲ့ တာဝန် အကြောင်း သူ့ဆရာ မေးမြန်းဖို့ ဆင့်ခေါ်လိုက်တယ်လို့ သူ ထင်ထားခဲ့တာ ဖြစ်လေသည်။

လာရာ လမ်းတစ်လျှောက်လုံး သူ ဖြေမယ့် အဖြေတွေကို လေ့ကျင့်လာခဲ့ပေမယ့် အခုတော့ အဲ့ဒါ မဟုတ်ပုံ ရလေသည်။

သို့သော် ခဏ ရပ်တန့်ပြီးနောက် ဂျူဇီမင် လက်သီးဆုပ်ပြီး ပြန်ဖြေလိုက်လေသည်။

"ဆရာ့ကို ဖြေကြားရရင် ရှိပါတယ် ပြီးတော့ ဒီ ထူးခြားဆန်းပြား သားရဲ အင်အားစုက တော်တော်လေး သန်မာပါတယ်"

တကယ်တော့ ပြီးခဲ့တဲ့ တစ်ခေါက် သူ့ဆရာက ထူးခြားဆန်းပြား သားရဲတွေနဲ့ ဆက်သွယ်တာ မြင်တွေ့လိုက်ရကတည်းက စိတ်ကူး တစ်ခု ဂျူဇီမင် ခေါင်းထဲ ပေါ်လာခဲ့တာ ဖြစ်လေသည်။

သူ့ဆရာကို သတင်းမပို့ခင် သတင်းအချက်အလက်တွေ ပိုမို စုဆောင်းဖို့ သူ မူလက စီစဉ်ထားပေမယ့် သူ့ဆရာက သူ့ကို အရင် မေးလိမ့်မယ်လို့ မထင်ထားခဲ့မိပေ။

"အို"

ကျန်းပေရန် နည်းနည်း အံ့သြသွားလေသည်။

အသန်မာဆုံး လူသား နိုင်ငံ အနေနဲ့ ဇန်တိုင်းပြည် မှာ တိုက်ကြီးပေါ်က အမြင့်မားဆုံး အဆင့် ကျင့်ကြံသူတွေ သဘာဝကျကျ ရှိနေလေသည်။

ဒါပေမဲ့ ဒီလို နိုင်ငံမျိုး အတွင်းထဲမှာ ဂျူဇီမင် က "တော်တော်လေး သန်မာတယ်" လို့ ဖော်ပြရတဲ့ ထူးခြားဆန်းပြား သားရဲ အင်အားစု တစ်ခု ရှိနေလေသည်။

ဒါက တကယ် မျှော်လင့်မထားတဲ့ ကိစ္စပါပဲ။

"အသေးစိတ် ပြောပြပါဦး"

"ဟုတ်ကဲ့"

နောက်တစ်ကြိမ် လက်သီးဆုပ်ပြီး ဂျူဇီမင် သူ့ သိုလှောင်လက်စွပ် ထဲက ဇန်တိုင်းပြည် မြေပုံ တစ်ချပ် ထုတ်ယူပြီး စားပွဲပေါ် ဖြန့်ခင်းကာ လက်ညှိုးထိုးပြရင်း ပြောလိုက်လေသည်။

"ဒီဧရိယာ တစ်ခုလုံးက အဲ့ဒီ ထူးခြားဆန်းပြား သားရဲတွေရဲ့ နယ်မြေပါ"

'အဲ့လောက် ကြီးတာလား'

မြေပုံကို ကြည့်လိုက်ရာ ဂျူဇီမင် ညွှန်ပြနေတဲ့ ဧရိယာက အနည်းဆုံး ဇန်တိုင်းပြည် ရဲ့ တစ်ဝက်လောက် ရှိပြီး အလယ်ပိုင်း မြေပြန့်ဒေသ မှာ တည်ရှိနေတာကြောင့် နိုင်ငံကြီး ၆ နိုင်ငံ က ကျွမ်းကျင်သူတွေ ယှဉ်ပြိုင် လုယူသင့်တဲ့ ဒေသ တစ်ခု ဖြစ်နေလေသည်။

ဒါပေမဲ့ ဒီလောက် ကြီးမားပြီး တန်ဖိုးရှိတဲ့ ဧရိယာက ထူးခြားဆန်းပြား သားရဲတွေ အပိုင် ဖြစ်နေရတယ်...

'ဒီ ထူးခြားဆန်းပြား သားရဲ အုပ်စုက ဘယ်လောက်တောင် သန်မာလို့လဲ...'

အခုချိန်မှာ ကျန်းပေရန် သေချာပေါက် ပြောနိုင်တဲ့ အရာ တစ်ခု ရှိသည်၊ ဒီ ထူးခြားဆန်းပြား သားရဲ မျိုးနွယ်စုမှာ အနက်ရောင်သူတော်စင် တစ်ပါးနဲ့ ယှဉ်ပြိုင် တိုက်ခိုက်နိုင်တဲ့ အဆင့် ၉ ထူးခြားဆန်းပြား သားရဲတွေ သေချာပေါက် ရှိနေပြီး တစ်ကောင်မက ရှိနိုင်ခြေ များလေသည်။

မဟုတ်ရင် သူတို့ ဒီလောက် ကြီးမားတဲ့ မြေနေရာကို သိမ်းပိုက်ထားနိုင်ဖို့ လုံးဝ မဖြစ်နိုင်ပေ။

'အလယ်ပိုင်း မြေပြန့်ဒေသ မှာ ဒီလောက် ကြီးမားတဲ့ ထူးခြားဆန်းပြား သားရဲ နယ်မြေ ရှိလိမ့်မယ်လို့ ထင်မထားမိဘူး

မမျှော်လင့်ထားဘူး... တကယ် မမျှော်လင့်ထားဘူး'

ကျန်းပေရန် ရဲ့ မူလ အထင်အမြင်မှာ ထူးခြားဆန်းပြား သားရဲတွေ ဆိုတာ လူသားတွေ အလွယ်တကူ သတိမထားမိတဲ့ နေရာတွေမှာ ပုန်းအောင်းပြီးမှသာ အသက်ရှင်နိုင်တယ်လို့ ထင်ခဲ့တာ ဖြစ်လေသည်။

အလယ်ပိုင်း မြေပြန့်ဒေသ မှာ လူသား နိုင်ငံ တစ်နိုင်ငံနဲ့ ထိပ်တိုက် ရင်ဆိုင်နိုင်တဲ့ ထူးခြားဆန်းပြား သားရဲ အုပ်စု တစ်ခု ရှိလိမ့်မယ်လို့ သူ ဘယ်တုန်းကမှ မထင်ခဲ့မိပေ။

ဒီအချိန်မှာ ဒေသကို ညွှန်ပြပြီးနောက် ဂျူဇီမင် ဆက်ပြောလိုက်လေသည်။

"ဒီဧရိယာကို ရှေးဟောင်း အပျက်အစီးများ လို့ သိကြတယ် တချို့လူတွေက ရှေးဟောင်း စစ်မြေပြင် လို့ ခေါ်ရတာလည်း ကြိုက်ကြတယ် အနက်ရောင်ဧကရာဇ် တစ်ပါး ဒီမှာ တိုက်ခိုက်ခဲ့ဖူးတယ်လို့ ကောလာဟလတွေ ရှိတယ် ဒါကြောင့် ဒီနေရာက ဝိညာဉ်စွမ်းအင်က အလွန် ဖရိုဖရဲ ဖြစ်နေပြီး ကျင့်ကြံသူ အများစု အတွက် လိုက်လျောညီထွေ နေထိုင်ဖို့ အရမ်း ခက်ခဲတယ်"

'ဘုရားရေ... ရှေးဟောင်း စစ်မြေပြင် နဲ့ အနက်ရောင်ဧကရာဇ် တဲ့

ဒီနာမည် နှစ်ခုတည်းနဲ့တင် အနက်ရောင်သူတော်စင် အုပ်စု တစ်ခုကို ရူးသွပ်သွားစေဖို့ လုံလောက်နေပါပြီ ဒါပေမဲ့ သူတို့ ဒီနေရာကို အောင်နိုင်အောင် မတိုက်ခိုက်နိုင်ကြသေးဘူး...'

'ဒီနေရာမှာ အဆင့် ၉ ထူးခြားဆန်းပြား သားရဲတွေ ပြည့်နှက်နေတာများလား'

ဒါပေမဲ့ ကျန်းပေရန် ဒီအတွေးကို အမြန် ပယ်ဖျက်လိုက်လေသည်။

အဆင့် ၉ ထူးခြားဆန်းပြား သားရဲတွေသာ တကယ် အဲ့လောက် များပြားနေရင် လူသားမျိုးနွယ်စုကို ပြန်လည် တိုက်ခိုက်မယ့်သူတွေက ထူးခြားဆန်းပြား သားရဲတွေ ဖြစ်နေမှာ ဖြစ်ပြီး၊ အလယ်ပိုင်း မြေပြန့်ဒေသ မှာ လူသားတွေ လွှမ်းမိုးထားနိုင်မှာ မဟုတ်ပေ။

မြေပုံကို အကြာကြီး စိုက်ကြည့်ပြီးနောက် ကျန်းပေရန် မေးလိုက်လေသည်။

"သတင်းအချက်အလက် ဘယ်လောက်များများ သိထားလဲ"

သူ့ဆရာ ဘာမေးနေလဲ ဆိုတာ ဂျူဇီမင် သဘာဝကျကျ သိတာကြောင့် ချက်ချင်း ပြန်ဖြေလိုက်လေသည်။

"အသေးစိတ် အချက်အလက်တွေကို စုံစမ်းပြီး စုစည်းဖို့ ကျွန်တော် ပြန်သွားရပါဦးမယ် ဒါပေမဲ့ ရှေးဟောင်း အပျက်အစီးများ ကို သွားရောက်ဖူးတဲ့ ကျင့်ကြံသူတိုင်းရဲ့ စိတ်ထဲမှာ စွဲထင်နေတဲ့ စွမ်းအားကြီး ကြမ်းတမ်းသော သားရဲ ၄ ကောင် ရှိပါတယ်"

"သူတို့က စိမ်းပြာ နဂါး၊ ရိုင်းစိုင်းသော အစွယ် သားရဲ၊ ရွှေရောင် သံချပ်ကာ ချီလင် နဲ့ အတောင်ပံပါ သတင်းစကားပါးသူ သားရဲ တို့ ဖြစ်ကြပါတယ်"

"ဒါပေမဲ့ လူသားဘက်က ရှုံးနိမ့်ခဲ့ပြီး အနက်ရောင်သူတော်စင်တွေတောင် သူတို့လက်ချက်နဲ့ အကြီးအကျယ် ဆုံးရှုံးခဲ့ရတာကြောင့် သတင်းအချက်အလက် သိပ်မပေါက်ကြားလာခဲ့ပါဘူး ဘာပဲဖြစ်ဖြစ် ဘယ်သူမှ ပေါ့ပေါ့ဆဆ မပြောရဲကြဘူးလေ..."

ဒီအချက်ကို ကျန်းပေရန် ကောင်းကောင်း နားလည်လေသည်။

ကိုယ့်ဘိုးဘေး အော်ဟစ် အရိုက်ခံရတာ မြင်လိုက်ရတယ် ဆိုပြီး ဘယ်ဂျူနီယာက ပြောရဲမှာလဲ။

ဒါကြောင့် ရှေးဟောင်း အပျက်အစီးများ ထဲက ထူးခြားဆန်းပြား သားရဲတွေ ဘယ်လောက် သန်မာလဲ ဆိုတာ တကယ် နားလည်ဖို့ ဆိုရင် ကိုယ်တိုင် သွားရောက်ခဲ့ဖူးတဲ့ အဲ့ဒီ အနက်ရောင်သူတော်စင်တွေကို မေးမြန်းမှ ရလောက်လေသည်။

'ရှီဟုန်ယွင် များ ရောက်ဖူးလား မသိဘူး...'

ဒါပေမဲ့ နောက်တော့ ကျန်းပေရန် တွေးမိလိုက်လေသည်။

ရှီဟုန်ယွင် နဲ့ သူ့ဆက်ဆံရေးက "အဲ့ဒီတုန်းက ရှေးဟောင်း အပျက်အစီးများ ထဲမှာ ခင်ဗျား ဘယ်လို အရိုက်ခံခဲ့ရလဲ" ဆိုပြီး မေးခွန်းတွေ မေးနိုင်လောက်အောင် မရင်းနှီးပေ။

အဲ့ဒီနောက် ရှေးဟောင်း အပျက်အစီးများ အကြောင်း ဂျူဇီမင် ရှင်းပြတဲ့ နောက်ထပ် သတင်းအချက်အလက် တချို့ကို သူ နားထောင်လိုက်လေသည်။

အတိုချုပ် ပြောရရင် စကားလုံး တစ်လုံးတည်းနဲ့ အနှစ်ချုပ်လို့ ရလေသည်။

မရေရာဘူး။

သူ ပြောသလိုပါပဲ၊ ရှေးဟောင်း အပျက်အစီးများ ထဲ ဝင်ရဲပြီး အဲ့ဒီ ကြမ်းတမ်းသော သားရဲတွေကို စိန်ခေါ်ရဲသူတွေ အားလုံးက အနက်ရောင်သူတော်စင် အဆင့် ကျွမ်းကျင်သူတွေ ဖြစ်ကြလေသည်။

သူတို့သာ အနိုင်ရခဲ့ရင် သူတို့ရဲ့ ကျော်ကြားမှုက ကမ္ဘာအနှံ့ ပျံ့နှံ့သွားမှာ ဖြစ်ပြီး ကလေး တစ်ယောက်တောင် အနက်ရောင်သူတော်စင် ၃ ပါးက ကြမ်းတမ်းသော သားရဲ ၄ ကောင်ကို တိုက်ခိုက်တဲ့ ဇာတ်လမ်း အနည်းငယ်လောက် ပြောပြနိုင်လောက်လေသည်။

ဒါပေမဲ့ ပြဿနာက သူတို့ ရှုံးနိမ့်ခဲ့တယ်...

ဒါကြောင့် ဘယ်သူက ထုတ်ပြောရဲမှာလဲ။ ဘယ်သူမှ သေချင်နေတာ မဟုတ်ဘူးလေ။

ဒါကြောင့် ရှေးဟောင်း အပျက်အစီးများ နဲ့ ပတ်သက်တဲ့ ဂျူဇီမင် ရဲ့ ထောက်လှမ်းရေး သတင်းတွေ အားလုံးက အလွန် မရေရာပြီး ယေဘုယျ သဘောတရား ရဖို့တောင် ခက်ခဲလေသည်။

သူ ပေးတဲ့ သတင်းအချက်အလက်တွေက သိပ်တန်ဖိုးမရှိဘူး ဆိုတာ ဂျူဇီမင် ရှင်းရှင်းလင်းလင်း သိလေသည်။

ဒါကြောင့် ရှေးဟောင်း အပျက်အစီးများ ရဲ့ ပထဝီဝင် သတင်းအချက်အလက်တွေ ပြောပြီးတဲ့ အခါ သူ ထပ်ဖြည့်ပြောလိုက်လေသည်။

"ကျေးဇူးပြုပြီး စိတ်ချပါ ဆရာ ကျွန်တော် ပြန်ရောက်တဲ့ အခါ ဆရာ့အတွက် ရှေးဟောင်း အပျက်အစီးများ အကြောင်း သတင်းအချက်အလက်တွေ ပိုမို ရှာဖွေပေးပါ့မယ်"

"အင်း" ကျန်းပေရန် ခေါင်းညိတ်လိုက်လေသည်။

သူ ဒီ ရှေးဟောင်း အပျက်အစီးများ ကို တကယ် စိတ်ဝင်စားနေတာ ဖြစ်လေသည်။

"ဆရာ ပြီးခဲ့တဲ့ တစ်ခေါက် ကျွန်တော် မေးချင်ပေမယ့် မေးသင့် မမေးသင့် မသေချာတဲ့ ကိစ္စ တစ်ခု တကယ်တော့ ရှိပါတယ်..."

"မေးလေ"

"ဆရာ က ထူးခြားဆန်းပြား သားရဲ အားလုံးနဲ့ ဘာသာစကား အသုံးပြုပြီး ဆက်သွယ်နိုင်တာလား"

"မှန်တယ်"

"ဆရာ က တကယ် ထူးခြားလွန်းပါတယ်" မြှောက်ပင့်စကား အနည်းငယ် ပြောပြီးနောက် ဂျူဇီမင် ဆက်ပြောလိုက်လေသည်။

"တကယ်တော့ ဇန်တိုင်းပြည်၊ ဒါမှမဟုတ် လူသားဘက်က ရှေးဟောင်း အပျက်အစီးများ ထဲက ထူးခြားဆန်းပြား သားရဲတွေနဲ့ ကောင်းကောင်းမွန်မွန် ဆွေးနွေးမှု ပြုလုပ်ချင်နေတာ ကြာပါပြီ၊ အရောင်းအဝယ် ကနေတဆင့် အပျက်အစီးများ အကြောင်း သတင်းအချက်အလက် ရယူဖို့နဲ့ ပူးပေါင်းဆောင်ရွက်ရေး သဘောတူညီချက် ရယူဖို့တောင် ရည်ရွယ်ထားကြပါတယ် ဒါပေမဲ့ အခုထိ ဘယ် သားရဲ ထိန်းကျောင်းသူမှ မအောင်မြင်ခဲ့ဘူး"

'တိုက်လို့ မနိုင်ရင် စကားပြောပြီး ထွက်ပေါက်ရှာဖို့ ကြိုးစားကြတာပေါ့... ဒါက လူသား အရမ်း ဆန်ပေမယ့် အဲ့ဒီ ထူးခြားဆန်းပြား သားရဲတွေက အလိမ်ခံရမှာ မဟုတ်ဘူးလို့ ငါ ထင်တယ်'

ထူးခြားဆန်းပြား သားရဲ ဘာသာစကား ကျွမ်းကျင်သူ တစ်ယောက် အနေနဲ့ သူတို့ ဘာသာစကားကို စနစ်တကျ သင်ယူဖို့ မဖြစ်နိုင်ဘူး ဆိုတာ ကျန်းပေရန် ကောင်းကောင်း သိလေသည်။

ဒါက ဘာသာစကား တစ်ခု လုံးဝ မဟုတ်ဘဲ "စကားပြောသလိုမျိုး" ပုံစံနဲ့ "နှလုံးသား" ချင်း ဆက်သွယ်တဲ့ နည်းလမ်း သက်သက်သာ ဖြစ်လေသည်။

တူညီတဲ့ "ကလပ် ကလပ် ကလပ်" အသံ တစ်ခုတည်းက အဓိပ္ပာယ်ပေါင်း ၁၀ သန်းလောက် ဖော်ပြနိုင်လေသည်။

ဒါကို လူတစ်ယောက်က ဘယ်လိုလုပ် သင်ယူနိုင်မှာလဲ။

လောလောဆယ်တော့ ထူးခြားဆန်းပြား သားရဲတွေနဲ့ ဆက်သွယ်နိုင်သူက သူတစ်ယောက်တည်းသာ ရှိတာ မှန်ပါတယ်၊ ဒါပေမဲ့ လူသားတွေနဲ့ ထူးခြားဆန်းပြား သားရဲတွေ ကြား ပွဲစား အဖြစ် ဆောင်ရွက်ဖို့ ဆိုတာကတော့...

ကျန်းပေရန် သေချာပေါက် မလိုလားပေ။

ပထမ၊ ဒါက အရမ်း ထင်ပေါ်လွန်းပြီး သူ့ရဲ့ ဖွံ့ဖြိုးတိုးတက်မှု မူဝါဒနဲ့ လုံးဝ ဆန့်ကျင်ဘက် ဖြစ်လေသည်။

ဒုတိယ၊ လူသားတွေနဲ့ ထူးခြားဆန်းပြား သားရဲတွေ ကြား ပွဲစား အဖြစ် ဆောင်ရွက်နိုင်သူက သူတစ်ယောက်တည်းသာ ရှိပြီး လူတိုင်းက သူ့ကို နိုင်ငံတော် ရတနာ တစ်ပါးလို ကာကွယ်ပေးသင့်တယ် ဆိုပေမယ့် ဒါက စိတ်ကူးယဉ် အခြေအနေမှာသာ ဖြစ်နိုင်လေသည်။

ဒီကိစ္စက မျိုးနွယ်စုကြီးတွေ (သို့) ဂိုဏ်းကြီးတွေက သူ့ကို "လူသား မှော်ရတနာ" အဖြစ် အသုံးပြုဖို့ နေအိမ် အကျယ်ချုပ် ချထားတာမျိုး မလွဲမသွေ ဦးတည်သွားစေလိမ့်မည်။

အဲ့ဒီနောက် "ငါ မရနိုင်ရင် ဖျက်ဆီးပစ်မယ်" ဆိုတဲ့ စိတ်ဓာတ်နဲ့ အစွန်းရောက်သမား အနည်းငယ်နဲ့ တွေ့ရင် သူ အသက်ဆုံးရှုံးနိုင်ခြေ ရှိလေသည်။

ဒါကြောင့် အတိုချုပ် ပြောရရင် ပွဲစား လုပ်တာက အကျိုးကျေးဇူးတွေ အများကြီး ရှိနိုင်ပေမယ့် အန္တရာယ်ကလည်း အရမ်း များလွန်းလေသည်။

သူ သေချာပေါက် လုပ်မှာ မဟုတ်ပေ။

သူ့ဆရာက ဘာတုံ့ပြန်မှုမှ မပေးတာ မြင်တော့ ဒီကိစ္စကို စိတ်မဝင်စားမှန်း ဂျူဇီမင် သိလိုက်ပြီး တိတ်ဆိတ်နေလိုက်ကာ ထပ်မပြောတော့ပေ။

ဒီအချိန်မှာ ကျန်းပေရန် နောက်ထပ် မေးခွန်း တစ်ခု စဉ်းစားနေလေသည်။

'ငါ ပွဲစား မလုပ်နိုင်ဘူး... ဒါပေမဲ့ အဲ့ဒီ ထူးခြားဆန်းပြား သားရဲတွေနဲ့ ငါ တိုက်ရိုက် သွားပြီး မိတ်ဖွဲ့လို့ ရမလား'