မြေကမ္ဘာ ဝိညာဉ်အမြစ် ပါရမီကို ပျိုးထောင်ခြင်း

ဤအချက်ကို တွေးတောမိသည်နှင့် ကျန်းဖန်သည် တုံ့ဆိုင်းမနေဘဲ သူ၏ စိတ်အာရုံထဲရှိ လျှို့ဝှက်ဇယားကွက်ကို ချက်ချင်း ဖွင့်ကြည့်လိုက်လေသည်။

[အမည် - ကျန်းဖန်]

[ကံကြမ္မာဇယား - ကောင်းကင်နှင့် ထပ်တူကျသော မဟာကောင်းချီးမင်္ဂလာ၊ စွမ်းရည် - ဘေးဒုက္ခကြီးစွာမှ လွတ်မြောက်လျှင် မဟာကံထူးမှုကို ရရှိမည်]

[သက်တမ်း - ၁၂၀]

[ဝိညာဉ်အမြစ် - မြေကမ္ဘာ ဝိညာဉ်အမြစ်]

[ကံကောင်းခြင်းအမှတ် - ၇၆၀]

[ကျင့်စဉ် - မြွေပျံသိုင်းကျမ်း (မပြည့်စုံ)၊ သတ္တမအဆင့် (ထပ်မံ မြှင့်တင်၍မရနိုင်တော့ပါ)]

[ကျွမ်းကျင်မှု - ငါးဖမ်းခြင်း (ပြီးပြည့်စုံခြင်း)]

[ရုပ်ဖျက်အတတ် (ပြီးပြည့်စုံခြင်း)၊ ချောင်မိသားစု၏ အဆိပ်ကျမ်း (ကျွမ်းကျင်မှုအဆင့်)၊ အလင်းတန်း ဓားသိုင်း (ပြီးပြည့်စုံခြင်း)]

[အဆင့် - အဆင့် (၁) ချီကျင့်ကြံခြင်းအဆင့် (၁ %)]

"ဘာ..."

ဇယားကွက်ပေါ်ရှိ အချက်အလက်များကို မြင်လိုက်ရချိန်တွင် ကျန်းဖန်၏ မျက်လုံးအစုံမှာ အံ့အားသင့်မှုကြောင့် ပြူးကျယ်သွားရ၏။ သူ၏ မြင်ကွင်းကိုပင် သူကိုယ်တိုင် မယုံကြည်နိုင်လောက်အောင် ဖြစ်သွားခဲ့ရသည်။

သူ၏ ဝိညာဉ်အမြစ် ပါရမီသည် အမှန်တကယ်ပင် 'မြေကမ္ဘာ ဝိညာဉ်အမြစ်' အဆင့်သို့ ရောက်ရှိသွားခြင်းမှာ လုံးဝကို စိတ်ကူးမယဉ်နိုင်စရာပင်။

သူ ယခင်က ရရှိထားသော ကျင့်ကြံခြင်းဆိုင်ရာ အချက်အလက်များအရ၊ ကျင့်ကြံခြင်းလောကရှိ ကျင့်ကြံသူများ၏ ဝိညာဉ်အမြစ်များကို အဆင့်နိမ့် ဝိညာဉ်အမြစ်၊ အဆင့်လတ် ဝိညာဉ်အမြစ်၊ အဆင့်မြင့် ဝိညာဉ်အမြစ်၊ မြေကမ္ဘာ ဝိညာဉ်အမြစ် နှင့် ကောင်းကင်ဘုံ ဝိညာဉ်အမြစ် ဟူ၍ အဆင့်ဆင့် ခွဲခြားထားကြောင်း သိထားရသည်။

ကျင့်ကြံသူ အမြောက်အမြားသည်ကား အဆင့်နိမ့် ဝိညာဉ်အမြစ် ပါရမီကိုသာ ပိုင်ဆိုင်ကြခြင်း ဖြစ်သည်။

ဤသူများသည် ကျင့်ကြံခြင်းလောက၏ အနိမ့်ဆုံးအလွှာတွင် ရှိနေကြသူများဖြစ်ပြီး၊ တစ်သက်လုံး အပင်ပန်းခံ အလုပ်ကြမ်းလုပ်ရုံသာ တတ်နိုင်ကြသူများ ဖြစ်သည်။ ထိုအဆင့်မှ ထပ်မံ မြင့်တက်ရန်မှာ အခြေခံအားဖြင့် မဖြစ်နိုင်သလောက်ပင်။

အဆင့်လတ် ဝိညာဉ်အမြစ် ပါရမီရှိသူများမှာမူ အချို့သော ကျင့်ကြံခြင်း ဂိုဏ်းငယ်လေးများ၏ အာရုံစိုက်မှုကို ရရှိနိုင်သည်။

အကယ်၍ သူတို့၏ စိတ်ဓာတ်နှင့် နားလည်သဘောပေါက်မှု အားကောင်းပါက ဂိုဏ်း၏ ပြင်ပတပည့်များပင် ဖြစ်လာနိုင်၏။

ကံကောင်းခြင်းများနှင့် ကြိုးစားအားထုတ်မှုများ ပေါင်းစပ်လိုက်လျှင် 'အုတ်မြစ် တည်ဆောက်ခြင်းအဆင့်' သို့ ရောက်ရှိနိုင်သည့် မျှော်လင့်ချက် ရှိပေသည်။

အကယ်၍ တစ်စုံတစ်ယောက်သည် အဆင့်မြင့် ဝိညာဉ်အမြစ်ကို ပိုင်ဆိုင်ထားပါက မည်သည့် ဂိုဏ်း၏ စမ်းသပ်မှုကိုမျှ ခံယူစရာမလိုပေ။ တိုက်ရိုက်ပင် ဂိုဏ်းဝင်တပည့် ဖြစ်လာနိုင်ပြီး၊ ဂိုဏ်းတွင်းတပည့်အဖြစ် အလွယ်တကူ ရွေးချယ်ခံရမည် ဖြစ်သည်။

ထိုသို့သော သူများကို 'ပါရမီရှင်' များဟု ခေါ်ဆိုကြသည်။ သို့သော် ထိုကဲ့သို့သော ပါရမီရှင်များမှာ အလွန်ပင် ရှားပါးလှပြီး၊ လူတစ်ရာတွင် တစ်ယောက်ခန့်သာ ရှိတတ်ကြသည်။

'မြေကမ္ဘာ ဝိညာဉ်အမြစ်' မှာမူ ပါရမီရှင်များထဲမှ ပါရမီရှင်ပင် ဖြစ်သည်။ ထိုသူများသည် ဂိုဏ်း၏ 'စစ်မှန်‌သော တပည့်' များအဖြစ် အထူးပျိုးထောင်ခြင်း ခံရမည်ဖြစ်သည်။

နှစ်တစ်ရာမှ တစ်ယောက်သာ ပေါ်ထွန်းလေ့ရှိသည်ဟု ဆိုလျှင်ပင် လွန်မည်မထင်။

နောက်ဆုံးအဆင့်ဖြစ်သော 'ကောင်းကင်ဘုံ ဝိညာဉ်အမြစ်' မှာမူ ရှာဖွေတွေ့ရှိရန်ပင် မလွယ်ကူလှဘဲ၊ နှစ်တစ်ထောင်မှ တစ်ယောက်သာ ပေါ်ထွန်းလေ့ရှိသည်ဟု ဆိုကြသည်။ မည်သည့် ဂိုဏ်းကြီးများမဆို ထိုကဲ့သို့သော ပါရမီရှင်ကို ရရှိရန် တောင့်တနေကြမည်မှာ အမှန်ပင်။

သူ၏ ခန္ဓာကိုယ်က သာမန်လူသားဘဝမှ မွေးရာပါအဆင့်သို့ ရောက်ရှိသွားပြီးနောက်၊ အရည်အသွေးများ အဆင့်အတန်း မြင့်တက်သွား၏။ ထို့ကြောင့် မျှော်လင့်မထားဘဲ 'မြေကမ္ဘာ ဝိညာဉ်အမြစ်' ကို ပျိုးထောင်ပေးလိုက်သကဲ့သို့ ဖြစ်သွားခဲ့သည်။

အကယ်၍ သူ၏ ဤကဲ့သို့သော ပါရမီသာ ကျင့်ကြံခြင်းလောကတွင် ပေါ်ထွက်လာခဲ့ပါက၊ ဂိုဏ်းအသီးသီးမှ သူ့ကို ရရှိရန် အလုအယက် ကြိုးပမ်းကြမည်မှာ မြေကြီးလက်ခတ်မလွဲပင်။

"ဒါကြောင့်လည်း ငါက 'မသေမျိုး ဂူနန်း‌တော်' ရဲ့ စမ်းသပ်မှုကို အောင်မြင်ခဲ့တာကိုး။"

"မြေကမ္ဘာ ဝိညာဉ်အမြစ်ကို ပိုင်ဆိုင်ထားတဲ့သူကို ဘယ်ဂိုဏ်းကမှ လျစ်လျူရှုထားမှာ မဟုတ်ဘူး။"

"ဒါပေမဲ့ ငါ့ရဲ့ ပါရမီက ဘာကြောင့် မြေကမ္ဘာ ဝိညာဉ်အမြစ်အဆင့်ထိ ဖြစ်သွားရတာလဲ ဆိုတာကတော့ တကယ် မယုံနိုင်စရာပဲ။"

ကျန်းဖန်သည် အံ့အားသင့်မှုများဖြင့် တရစပ် တွေးတောနေမိသည်။

မူလက သူသည် အဆင့်လတ် သို့မဟုတ် အဆင့်မြင့် ဝိညာဉ်အမြစ်လောက် ရရှိလျှင်ပင် ကျေနပ်နေခဲ့သည်မှာ အမှန်ပင်။ ထိုအဆင့်သည်ပင် ကျင့်ကြံသူ အမြောက်အမြားထက် သာလွန်နေပြီ ဖြစ်သည်။

မြေကမ္ဘာ ဝိညာဉ်အမြစ်သို့ ရောက်ရှိသွားခြင်းမှာမူ သူ၏ စိတ်ကူးများထက်ပင် ကျော်လွန်သွားခဲ့ချေပြီ။

သို့သော် သေချာစွာ ပြန်လည်သုံးသပ်ကြည့်လိုက်လျှင်၊ 'မြွေပျံသိုင်းကျမ်း' နှင့် ပတ်သက်ဆက်နွှယ်နေသကဲ့သို့ သူ၏ 'ကံကြမ္မာဇယား' ကြောင့်လည်း ဖြစ်ရမည်။

ကံကောင်းခြင်းအမှတ် အမြောက်အမြားကို အသုံးပြုလိုက်ပြီးနောက်၊ ထိုလျှို့ဝှက်ဆန်းပြားသော စွမ်းအင်များက သူ၏ ဝိညာဉ်အမြစ် ပါရမီကို တိုးတက်စေရန် အတွက်ပါ အထောက်အကူ ဖြစ်စေခဲ့ဟန် တူသည်။

ထို့ကြောင့်ပင် သူ၏ မူလ အဆင့်မြင့် ဝိညာဉ်အမြစ် ပါရမီမှာ မြေကမ္ဘာ ဝိညာဉ်အမြစ်အဆင့်သို့ အတင်းအဓမ္မ မြှင့်တင်ခြင်း ခံလိုက်ရခြင်း ဖြစ်ပေလိမ့်မည်။

"ဒါကလည်း ကောင်းတဲ့ ကိစ္စပါပဲ။"

"ကျင့်ကြံသူ တစ်ယောက် ဖြစ်လာပြီဆိုမှတော့ ဝိညာဉ်အမြစ် ပါရမီက မြင့်လေလေ ကောင်းလေလေပဲပေါ့။"

"ကောင်းကင်နဲ့ မြေကြီးကြားက ဝိညာဉ်ချီတွေကို ငါ ဘာလို့ ဒီလောက်အထိ ကြည်လင်ပြတ်သားစွာ အာရုံခံနိုင်နေရသလဲဆိုတာ အခုမှပဲ သဘောပေါက်တော့တယ်။"

ကျန်းဖန်သည် မျက်တောင်တဖျတ်ဖျတ် ခတ်လိုက်မိသည်။ အမှန်စင်စစ် သူ၏ ကျင့်ကြံမှု အတွေ့အကြုံမှာ ယခင်က လျိုတောက်ရှီ နှင့် လီမိသားစု၏ ဘိုးဘေးတို့ ဖော်ပြခဲ့သည့် အတွေ့အကြုံများနှင့် များစွာ ကွာခြားနေသည်ကို သူ သတိထားမိသည်။

အောက်ခြေအဆင့် ကျင့်ကြံသူများ ဖြစ်ကြသော ထိုနှစ်ဦးမှာ သူတို့၏ ကျင့်ကြံမှုကာလအတွင်း ဝိညာဉ်ချီများကို ဝါးမြိုရန် အလွန်ခက်ခဲကြောင်းနှင့် အချိန်ကြာမြင့်စွာ ကျင့်ကြံသော်လည်း ချီစွမ်းအင် အနည်းငယ်ကိုသာ ပြောင်းလဲနိုင်ကြောင်း ပြောဆိုခဲ့ကြသည်။

သို့သော် ကျန်းဖန်မှာမူ သာမန်လူသားလောကတွင် ရှိနေစဉ်မှာပင် ဝိညာဉ်ချီများကို ကောင်းစွာ စုပ်ယူနိုင်ခဲ့သည်။ သူ၏ ကျင့်ကြံမှု စွမ်းဆောင်ရည်မှာ ထိုသူတို့၏ စိတ်ကူးယဉ်မှုထက်ပင် သာလွန်နေချေပြီ။

ဤသည်မှာ ပါရမီ၏ ကွာဟချက်ပင် ဖြစ်သည်။

"သက်တမ်းကလည်း ၁၂၀ ထိ တိုးသွားတာလား။"

ကျန်းဖန်သည် အတော်လေး ကျေနပ်သွားမိသည်။ မိမိ၏ သက်တမ်း ရှည်ကြာသွားခြင်းကို မည်သူက ငြင်းဆန်ပါမည်နည်း။

ချီကျင့်ကြံခြင်းအဆင့် ရှိသော ကျင့်ကြံသူများ၏ သက်တမ်း ကန့်သတ်ချက်မှာ နှစ်ပေါင်း ၁၂၀ ခန့်သာ ရှိသည်ဟု ဆိုကြသည်။

အုတ်မြစ် တည်ဆောက်ခြင်း အဆင့်သို့ ရောက်ရှိမှသာ သက်တမ်းမှာ သိသိသာသာ ထပ်မံ မြင့်တက်သွားမည် ဖြစ်သည်။

သို့သော် ယခုကြည့်ရသည်မှာ သာမန်လူသားများနှင့် ချီကျင့်ကြံသူများအကြား သက်တမ်းမှာ များစွာ ကွာခြားလှသည်တော့ မဟုတ်ပေ။

သာမန်လူသားများအနေဖြင့် သိုင်းလမ်းစဉ်ကို လိုက်စားပြီး ဝိညာဉ်အမြစ်ကို ပျိုးထောင်နိုင်ခဲ့လျှင်ပင်၊ သူတို့သည် သာမန်ကျင့်ကြံသူများနှင့် တန်းတူ အစပြုရုံသာ ရှိသေးသည်။

ထို့ပြင် သာမန်လူသား တစ်ယောက်အတွက် မွေးရာပါအဆင့်သို့ ရောက်ရှိရန်မှာ အထူးအခွင့်အရေးများ မရှိပါက အနည်းဆုံး နှစ်ပေါင်း ၄၀ သို့မဟုတ် ၅၀ ခန့် ကြာမြင့်တတ်ပေသည်။

ထိုသို့ဆိုလျှင် ရှေ့ဆက်တိုးရန် မျှော်လင့်ချက်မှာ ပို၍ပင် နည်းပါးသွားမည် ဖြစ်သည်။ ထို့ကြောင့်လည်း ရှေးယခင်ကတည်းက သာမန်လူသားဘဝမှနေ၍ မသေမျိုးလမ်းစဉ်သို့ ရောက်ရှိနိုင်သူ အလွန်နည်းပါးခြင်း ဖြစ်သည်။

လုံးဝ မဖြစ်နိုင်သည်တော့ မဟုတ်သော်လည်း အခွင့်အရေးမှာ အလွန်ပင် နည်းပါးလှပေသည်။

ဟူး

နောက်ထပ် တစ်နာရီခန့် ကုန်လွန်သွားပြီးနောက် ကျန်းဖန်သည် သူ၏ ကျင့်ကြံမှု အခြေအနေကို သေချာ တည်ငြိမ်စေလိုက်သည်။ ပြီးနောက် ကျင့်ကြံဆောင်အတွင်းမှ ထွက်လာခဲ့လေသည်။

ထိုအချိန်တွင် စုဝေဝေသည် အစားအသောက်များကို ပြင်ဆင်ပြီးစီးနေပြီ ဖြစ်၏ယ အခန်းတစ်ခုလုံးမှာလည်း မြိန်ယှက်ဖွယ်ရာ ဟင်းရနံ့များဖြင့် ပြည့်နှက်နေသည်။

သူမသည် အနီရောင် ပိုးသားညဝတ်အင်္ကျီကို ဝတ်ဆင်ထားရာ သူမ၏ လှပသွယ်လျသော ကိုယ်လုံးလေးမှာ ဆွဲဆောင်မှု အပြည့်ဖြင့် ထင်ပေါ်နေလေသည်။

သူမ၏ လှုပ်ရှားမှုတိုင်းတွင် ဖော်ပြ၍မရနိုင်သော ကျက်သရေရှိမှုနှင့် ညို့ယူနိုင်စွမ်းများ ကိန်းဝပ်နေသကဲ့သို့ပင်။

သူမ၏ ကိုယ်ခန္ဓာမှာလည်း တဖြည်းဖြည်း ပြောင်းလဲတိုးတက်လာနေပုံရသည်။ သူမထံမှ ထွက်ပေါ်နေသော ဆွဲဆောင်မှုမှာ ပိုမို အားကောင်းလာခဲ့သည်။ သူမ၏ အပြုံးတစ်ခုတည်းနှင့်တင် လူတစ်ယောက်ကို မိန်းမောသွားစေရန် လုံလောက်နေပြီ ဖြစ်သည်။

"ယောကျာ်း..."

ကျန်းဖန် ထွက်လာသည်ကို မြင်သည်နှင့် စုဝေဝေသည် ဝမ်းသာအားရ ကြိုဆိုလိုက်သည်။

သို့သော် သူမ၏ လှပသော မျက်လုံးအစုံဖြင့် သေချာကြည့်လိုက်ပြီးနောက် တစ်ခုခု ထူးခြားနေသည်ကို ခံစားလိုက်မိကာ -

"ယောကျာ်းရဲ့ ပုံစံက အရင်ကနဲ့ မတူတော့သလိုပဲ။ ကျင့်ကြံမှုမှာ တစ်ခုခု ထပ်ပြီး တိုးတက်သွားတာလားဟင်"