မွေးရာပါအဆင့်၏ စွမ်းပကား၊ အရှင်သခင်တစ်ဦးကို သတ်ဖြတ်ခြင်းမှာ ကြက်ကလေးတစ်ကောင်ကို သတ်ရသကဲ့သို့ လွယ်ကူလှပေသည်

"မသေမျိုး ဂူနန်းတော်က အတိအကျ ဘယ်အချိန်မှာ ပေါ်လာမှာလဲ"

လူတိုင်းသည် ချန်ယောင်ချွမ်းကို စူးစမ်းသော မျက်လုံးများဖြင့် ကြည့်လိုက်ကြသည်။ အကယ်၍ မသေမျိုး ဂူနန်းတော် ပေါ်ထွက်လာချိန် အလွန်နောက်ကျသွားပါက သူတို့၏ သက်တမ်း ကုန်ဆုံးသွားမည်ကို စိုးရိမ်နေကြခြင်း ဖြစ်သည်။

ထိုအချိန်ကျမှ အသက် ခုနစ်ဆယ်၊ ရှစ်ဆယ်အရွယ်သို့ ရောက်မှ ဂူနန်းတော်ထဲ ဝင်ခွင့်ရလျှင်လည်း သူတို့အတွက် အဓိပ္ပာယ်ရှိတော့မည် မဟုတ်ပေ။

"အဲ့ဒီအတွက် စိုးရိမ်စရာ မလိုပါဘူး"

"တကယ်တော့ မသေမျိုး တံဆိပ်ပြားကို ရရှိထားတာက မိသားစုကြီး (၃) စုတည်း မဟုတ်ဘူး။ သူတို့အပြင် တခြား ကံကောင်းတဲ့သူ အနည်းငယ်လည်း ရှိသေးတယ်"

"ငါရထားတဲ့ သတင်းအချက်အလက်တွေအရ မသေမျိုး ဂူနန်းတော်က နှစ် (၅၀) မှာ တစ်ကြိမ် ပေါ်ထွက်လေ့ရှိတယ်တဲ့"

"အချိန်တွက်ချက်မှုအရဆိုရင် နောက်လာမယ့် (၆) လအတွင်းမှာ ပေါ်လာလိမ့်မယ်။ မနက်ဖြန်လိုမျိုး အချိန်တိုအတွင်းမှာတောင် ရုတ်တရက် ပေါ်လာနိုင်ချေ ရှိတယ်"

ချန်ယောင်ချွမ်းက ခပ်မှိန်မှိန် ပြုံးလိုက်သည်။

သူသည် မသေမျိုး အမွေအနှစ်ကို ရရှိထားသည်ဟု လောကသားတို့က ထင်ကြေးပေးနေကြခြင်းမှာ မှန်ကန်လှပေသည်။ သူသည် ဂူတစ်ခုအတွင်း၌ သေလုမြောပါး ဖြစ်နေသော ကျင့်ကြံသူတစ်ဦးထံမှ အမွေအနှစ်ကို ရရှိခဲ့ခြင်း ဖြစ်သည်။ သူကိုယ်တိုင်လည်း ထိုကျင့်ကြံသူ၏ တပည့် ဖြစ်လာခဲ့သည်။

ထို့ကြောင့်ပင် သူ၏ သိုင်းပညာကျင့်ကြံမှုမှာ ဤမျှ လျင်မြန်စွာ တိုးတက်လာခဲ့ခြင်း ဖြစ်သည်။ ထို့ပြင် ထိုကျင့်ကြံသူသည် တစ်ကြိမ်က မသေမျိုး ဂူနန်းတော် အတွင်းသို့ ဝင်ရောက်ဖူးပြီး အမွေအနှစ် အချို့ကို ရရှိခဲ့ဖူးသူလည်း ဖြစ်သည်။

ကံဆိုးစွာဖြင့် ထိုသူ၏ ပါရမီမှာ မမြင့်မားလှပေ။ သေဆုံးချိန်အထိ ချီကျင့်ကြံခြင်းအဆင့် (၄) တွင်သာ ရှိနေခဲ့သည်။

ထို့ကြောင့်ပင် ချန်ယောင်ချွမ်းသည် မသေမျိုး ဂူနန်းတော်၏ အမွေအနှစ်ကို ရရှိရန် အလွန်အမင်း တောင့်တနေခြင်း ဖြစ်သည်။

ဤသည်မှာ သူ့အတွက် ငါးကလေး တစ်ကောင်က နဂါးတံခါးကို ခုန်ကူးသကဲ့သို့ ဘဝကို အကြီးအကျယ် ပြောင်းလဲပစ်နိုင်မည့် ရွှေရောင်အခွင့်အရေးပင် ဖြစ်သည်။

"ဒါဆိုရင်တော့ တကယ် ဝမ်းသာစရာပဲ"

လူတိုင်းမှာ ဝမ်းသာအားရ ဖြစ်သွားကြသည်။

အချိန်အကြာကြီး စောင့်ရန်မလိုပါက လူတိုင်းတွင် အခွင့်အရေး တူတူရှိနေမည် မဟုတ်ပါလော။

"ဒါဆိုရင် မိသားစုကြီး (၃) စုက သိုင်းပညာ အရှင်သခင်တွေရော ပြန်လာကြဦးမှာလား"

တစ်စုံတစ်ယောက်၏ မျက်လုံးများမှာ အရောင်တောက်သွားသည်။

"တကယ်လို့ သူတို့ ပြန်လာခဲ့ရင် တို့တွေ သူတို့ကို သတ်ပြီး မသေမျိုး တံဆိပ်ပြားတွေကို လုယူနိုင်တာပေါ့"

"ဟုတ်တယ်... အမှန်အတိုင်းပြောရရင် ငါက ဒီတစ်ခေါက် မိသားစုထဲက ပါရမီရှင် လူငယ်တွေကိုပါ ခေါ်လာခဲ့တာ။ သူတို့တွေကိုပါ ဂူနန်းတော်ထဲ ခေါ်သွားနိုင်ရင် တို့တွေအတွက် ပိုပြီး အကျိုးရှိလိမ့်မယ်"

"အခွင့်အရေး ရမယ်ဆိုရင်တော့ မသေမျိုး တံဆိပ်ပြားတွေကို ထပ်ပြီး လုယူဖို့ ကြိုးစားရမှာပဲ။ တံဆိပ်ပြား များများရှိလေ ကောင်းလေပဲလေ။ ဒါပေမဲ့ အောင်မြင်ဖို့ကတော့ သေချာပေါက် မပြောနိုင်သေးဘူးပေါ့"

"ဟားဟား... တို့တွေရဲ့ အရှင်သခင် ခြောက်ယောက်သာ ပူးပေါင်းလိုက်ရင် တို့ကို ဘယ်သူယှဉ်နိုင်မှာလဲ"

အရှင်သခင်များသည် အားတက်သရော ဆွေးနွေးနေကြလေသည်။ သူတို့၏ ခွန်အားဖြင့်ဆိုလျှင် ဤလောကတွင် သူတို့ မသွားနိုင်သော နေရာမရှိဟု ယုံကြည်နေကြ၏။

ကျင့်ကြံသူများမှာမူ သာမန်လောကမှ ပျောက်ကွယ်သွားသည်မှာ ကြာလှပြီဖြစ်ရာ၊ သူတို့နှင့် တွေ့ဆုံရန်မှာ မဖြစ်နိုင်ဟုပင် သတ်မှတ်ထားကြသည်။

......

မျက်တောင်တစ်ခတ်အတွင်းမှာပင် (၇) ရက်ခန့် ကုန်လွန်သွားခဲ့သည်။

မျက်ခုံးနီ ပုန်ကန်သူတပ်၏ အုပ်ချုပ်မှုအောက်တွင် ယွင်ဇီမြို့ တစ်မြို့လုံးသည် ယခင်ကကဲ့သို့ ပြန်လည် တည်ငြိမ်လာခဲ့သည်။ အနည်းဆုံးတော့ မြို့သူမြို့သားများသည် လမ်းမပေါ်သို့ ပြန်လည် ထွက်လာနိုင်ကြပြီ ဖြစ်သည်။

သို့သော်လည်း ဆန်ဂိုဒေါင်ကြီး မီးလောင်သွားခဲ့ခြင်းကြောင့် ယွင်ဇီမြို့တွင် စားနပ်ရိက္ခာများ ပြတ်လပ်နေခဲ့သည်။

အချို့သော သာမန်လူသားများသည် အသက်ရှင်ရပ်တည်ရန်အတွက် ယွင်ဇီမြို့မှ ထွက်ခွာကာ အခြားနေရာများသို့ ရွှေ့ပြောင်းသွားကြလေသည်။

ဤအချက်က ယွင်ဇီမြို့ကို ယခင်ကထက် ပိုမို ခြောက်ကပ်သွားစေသည်။

သေချာပေါက်ပင် အချို့သော လူများမှာမူ ယွင်မုန် ရေကန်တွင် ငါးဖမ်းရန် ရွေးချယ်ခဲ့ကြသည်။

မိုင်ပေါင်း (၈၀၀) ကျယ်ဝန်းသော ယွင်မုန်ကန်သည် ငါးသယံဇာတ အလွန်ပေါများလှပေသည်။ ငါးမိရုံနှင့်တင် မိသားစု တစ်စုလုံးကို လုပ်ကျွေးနိုင်သည် မဟုတ်ပါလော။

ဝုန်း... ဝုန်း…

ထိုအချိန်၌ ယွင်မုန်ကန်၏ နက်ရှိုင်းသော နေရာမှ တုန်ခါမှုကြီးတစ်ခု ရုတ်တရက် ဖြစ်ပေါ်လာသည်။

ငလျင်လှုပ်သကဲ့သို့ ပြင်းထန်လှပြီး၊ မိုင် (၈၀၀) ပတ်လည်ရှိ ရေပြင်ပေါ်တွင် လှိုင်းလုံးကြီးများ တရစပ် ထွက်ပေါ်လာတော့သည်။

ယွင်မုန်ကန်၏ ရေအောက်နက်ရှိုင်းသော နေရာမှ ရွှေရောင်အလင်းတန်းကြီးများ ကောင်းကင်သို့ ထိုးတက်သွား၏။ မရေမတွက်နိုင်သော ရွန်းစာလုံးများ စုစည်းသွားသကဲ့သို့ပင် ရွှေရောင် ရွန်းတိုင်ကြီးများ ဖြစ်ပေါ်လာခဲ့သည်။

ကောင်းကင်ထက်တွင်မူ တိမ်တိုက်များစွာ စုစည်းလာပြီး ရွှေရောင် ကြာပန်းပုံသဏ္ဌာန် တိမ်တိုက်ကြီးများအဖြစ် ပြောင်းလဲသွားကြသည်။

၎င်းတို့ထံမှ သန့်ရှင်းစင်ကြယ်ပြီး ရှေးကျသော အရှိန်အဝါများ ထွက်ပေါ်လာကာ ကောင်းကင်နှင့် မြေကြီးကြားရှိ စွမ်းအင်များကို ဆွဲဆောင်နေသကဲ့သို့ ရှိနေသည်။

ယွင်မုန်ကန်ထဲရှိ ငါးများသည်လည်း ထိတ်လန့်တကြားဖြင့် နေရာအနှံ့သို့ ကူးခတ်ပြေးလွှားနေကြ၏။

တစ်ချိန်တည်းမှာပင် အဆုံးမဲ့သော မြူခိုးများ ထွက်ပေါ်လာပြီး ယွင်မုန်ကန် တစ်ခုလုံးကို ဖုံးလွှမ်းသွားတော့သည်။

ဤသို့ဖြင့် ယွင်မုန်ကန်သည် ဖြူလွှလွှ မြူခိုးများအောက်တွင် ပျောက်ကွယ်သွားခဲ့ရကာ အလွန် လျှို့ဝှက်ဆန်းပြားသော ပုံစံသို့ ပြောင်းလဲသွားခဲ့သည်။

ဤသည်မှာ ယွင်မုန်ရေကန် (တိမ်တိုက်အိမ်မက် ရေကန်) ဟု အမည်တွင်ရခြင်း၏ အကြောင်းရင်းပင် ဖြစ်သည်။

ဤကဲ့သို့သော ထူးဆန်းသည့် ဖြစ်ရပ်ကြီးက ယွင်ဇီမြို့သူမြို့သားများကို အံ့အားသင့်သွားစေသည်။

အများစုမှာ ဤကဲ့သို့သော သဘာဝလွန် ဖြစ်ရပ်မျိုးကို ပထမဆုံးအကြိမ် မြင်ဖူးခြင်း ဖြစ်သည်။ အချို့မှာ ကြောက်လန့်တကြား မြေပေါ်တွင် ဝပ်စင်းကာ မသေမျိုး နတ်ဘုရားများ ကြွရောက်လာပြီဟု အော်ဟစ်နေကြတော့သည်။

"ဘာတွေ ဖြစ်နေတာလဲ... ဒီလို ထူးဆန်းတဲ့ ဖြစ်ရပ်ကြီးက ဘာကြောင့် ဖြစ်လာရတာလဲ"

"ဟားဟား... မင်းတို့က ငယ်ပါသေးတယ်။ ဒါက မသေမျိုး ဂူနန်းတော် ပေါ်ထွက်လာပြီဆိုတဲ့ နိမိတ်ပဲ။ ငါသိသလောက်ဆိုရင် နှစ် (၅၀) မှာ တစ်ခါပဲ ဖြစ်တာ။ ဒီအကြောင်းကို သိတဲ့ လူကြီးပိုင်းတွေလည်း အခုဆို သေကုန်ကြပြီ ထင်ပါရဲ့"

"မယုံနိုင်စရာပဲ... ဒါဆို ယွင်မုန်ကန်ရဲ့ အောက်ခြေမှာ မသေမျိုးတွေ တကယ်ရှိတာလား"

"ဒါက အလကား ပြောနေတာ မဟုတ်ဘူးဟ။ ဒီလို ကောလာဟလတွေ ထွက်လာတယ်ဆိုကတည်းက အကြောင်းမဲ့ မဟုတ်ဘူးလေ။ ယွင်ဇီမြို့က မိသားစုကြီး (၃) စု ကြီးပွားလာတာကလည်း ဒီ မသေမျိုး ဂူနန်းတော်ကြောင့်လို့ ပြောကြတယ်"

"ဒါဆိုရင် တို့တွေလည်း မသေမျိုး ဂူနန်းတော်ထဲ ဝင်ပြီး မသေမျိုးရဲ့ မျက်နှာသာပေးမှုကို ရနိုင်မှာလား"

"လူမိုက်... အဲ့ဒီလောက် လွယ်မယ်ဆိုရင် လူတိုင်း မသေမျိုး အမွေအနှစ်ကို ရကုန်မှာပေါ့ဟ။ ယွင်မုန်ကန်ရဲ့ နက်ရှိုင်းတဲ့ နေရာကို သွားဖို့ ကြိုးစားတဲ့သူတွေ အများကြီးက ရေအောက်ထဲမှာ အရိုးစုတွေပဲ ဖြစ်သွားခဲ့ရတာ"

ယွင်ဇီမြို့သူမြို့သားများသည် အပြင်းအထန် ဆွေးနွေးနေကြသည်။ သူတို့၏ ရင်ထဲတွင်လည်း ထပ်တူ အံ့အားသင့်နေကြရ၏။

တစ်ချိန်တည်းမှာပင် ဤသဘာဝလွန် ဖြစ်ရပ်ကြောင့် အချို့သော လူများ၏ စိတ်ထဲတွင် ရည်မှန်းချက် အသစ်များ စတင် ပေါ်ပေါက်လာခဲ့သည်။

"ဘာတွေ ဖြစ်နေတာလဲ"

မြေအောက်ခန်းအတွင်း ရှိနေသော ကျန်းဖန်သည် သူ၏ ဟင်းလင်းပြင် လက်စွပ် အတွင်းရှိ လျှို့ဝှက် တံဆိပ်ပြားမှာ ရုတ်တရက် တုန်ခါလာပြီး မြည်သံများ ထွက်ပေါ်လာသည်ကို သတိထားမိလိုက်သည်။ ၎င်းသည် လက်စွပ်အတွင်းမှ အပြင်သို့ တိုက်ရိုက် ပျံထွက်လာခဲ့၏။

တံဆိပ်ပြားထံမှ ရွှေရောင်အလင်းများ ထွက်ပေါ်နေပြီး တရစပ် မြည်ဟည်းနေလေသည်။ ၎င်းသည် ယွင်မုန်ကန်၏ နက်ရှိုင်းသော နေရာမှ စွမ်းအင်များနှင့် ပဲ့တင်ထပ်နေသကဲ့သို့ ရှိနေသည်။

အမှန်စင်စစ် ဤလျှို့ဝှက် တံဆိပ်ပြားတစ်ခုတည်း မဟုတ်ဘဲ၊ အခြားသော တံဆိပ်ပြားများ အားလုံးတွင်လည်း ဤကဲ့သို့သော ထူးခြားမှုများ ပေါ်ပေါက်နေခြင်း ဖြစ်သည်။

ယွင်မုန်ကန် အနီးအနားရှိ တံဆိပ်ပြားများ အားလုံးမှာ တုံ့ပြန်မှုများ ပြသနေကြလေတော့သည်။