အခက်အခဲနှင့် ရင်ဆိုင်နေရသော မီဒူဆာမျိုးနွယ်စု

တာဂိုသဲကန္တာရ၏ အနက်ရှိုင်းဆုံးနေရာရှိ ပူပြင်းလှသောနေရောင်ခြည်အောက်တွင် မြွေလူမျိုးစုတို့သည် အားသွန်ခွန်စိုက် အလုပ်လုပ်နေကြသည်။

အရင်တစ်ချိန်က ဘုရင်မကြီး မီဒူဆာထံမှ အမိန့်စာတစ်စောင် လက်ခံရရှိခဲ့သည်။ ထိုစာထဲတွင် မြွေလူမျိုးစုတို့အား နှစ်ပေါင်းတစ်ထောင်ကြာ ပိတ်လှောင်ထားခဲ့သော ဤအရပ်မှ ထွက်ခွာရန် အထုတ်အပိုးများ ပြင်ဆင်ထားကြဖို့ ဘုရင်မကြီးက သတိပေးထားသည်။

မြွေလူမျိုးစု၏ ခေါင်းဆောင်ကြီး ရှစ်ဦးသည် ဤသတင်းကို ကြားရသောအခါ အလွန်ဝမ်းမြောက်သွားကြပြီး မျိုးနွယ်စုအတွင်း စုဆောင်းထားသော အဖိုးတန်ရတနာများကို သိမ်းဆည်းရန် ချက်ချင်းပင် စီစဉ်ကြတော့သည်။

အကြီးအကဲ ယင်းရှီသည် စိတ်လှုပ်ရှားမှုကြောင့် တုန်တုန်ယင်ယင်ဖြစ်ကာ လူစုကို ဦးဆောင်ညွှန်ကြားနေသည်။ နှစ်ပေါင်းတစ်ထောင်၊ သူတို့တစ်တွေ နှစ်ပေါင်းတစ်ထောင်တိုင်တိုင် အကျဉ်းကျခံခဲ့ရပြီးပြီ။ ယခုအခါ ဘုရင်မကြီး မီဒူဆာသည် သူတို့မျိုးနွယ်စုကို တာဂိုသဲကန္တာရအပြင်ဘက်သို့ အမှန်တကယ်ပင် ဦးဆောင်ခေါ်ထုတ်သွားတော့မည်ဖြစ်သည်။

သို့သော် ထိုအချိန်မှာပင် လူရိပ်အချို့ ရုတ်တရက် ထွက်ပေါ်လာသည်။ မြွေလူမျိုးစုတို့ အထုတ်အပိုးများ ပြင်ဆင်နေသည်ကို မြင်လိုက်ရသောအခါ ဦးဆောင်လာသည့် လူလတ်ပိုင်းအမျိုးသားက မျက်မှောင်ကြုတ်လိုက်သည်။

"မြွေလူမျိုးစုတွေက ပြောင်းရွှေ့ဖို့ ပြင်နေကြတာလား၊ ဘာလို့ ဒီလောက်တောင် အကြီးအကျယ် လုပ်နေကြတာလဲ"

ဤလူလတ်ပိုင်းအမျိုးသားသည် ဖော်ပြရန်ခက်ခဲသော ကိုယ်ရည်ကိုယ်သွေးမျိုးကို ပိုင်ဆိုင်ထားသည်။ နှစ်ကာလများအလိုက် ပုံဖော်ပေးထားသော တည်ငြိမ်ရင့်ကျက်သည့် ရုပ်ရည်နှင့် အတွေ့အကြုံများက သူ့ကို ပိုမိုခန့်ညားစေသည်။

သူကား အခြားသူမဟုတ်။ ကျားမာနိုင်ငံတော်၏ ထိပ်သီးပညာရှင်ဆယ်ဦးထဲမှ တစ်ဦးဖြစ်သလို အဆင့်ခြောက် မှော်ဆေးဆရာလည်းဖြစ်သည့် ဆေးဘုရင် ဂူဟီ ပင်ဖြစ်သည်။

ဂူဟီသည် ရှေ့တွင်ရှိနေသော မြွေလူမျိုးစုကို စူးစိုက်ကြည့်နေသည်။ သူ့နောက်တွင် ကျားမာနိုင်ငံတော်မှ အခြားသော သိုင်းဘုရင်အဆင့် ပညာရှင်များဖြစ်သည့် ရန်ရှီနှင့် ဖန်လီ တို့ လိုက်ပါလာကြသည်။

မြွေလူမျိုးစု၏ ခေါင်းဆောင်ကြီး ရှစ်ဦးသည်လည်း ဝေဟင်တွင် ရပ်နေသော လူရိပ်များကို သတိပြုမိသွားသည်။ ရှေ့ဆုံးမှ အကြီးအကဲ ယင်းရှီသည် မျက်မှောင်ကြုတ်ကာ "ကျားမာနိုင်ငံတော်ရဲ့ ဆေးဘုရင် ဂူဟီ နဲ့ သိုင်းဧကရာဇ် တစ်ဦးပါလား" ဟု ဆိုလိုက်သည်။

ဝတ်ရုံနက်ဝတ် သိုင်းဧကရာဇ်အဆင့်ရှိသူသည် ဝတ်ရုံနက်နှင့် မျက်နှာဖုံးကို ဝတ်ဆင်ထားသဖြင့် မည်သူမည်ဝါဖြစ်သည်ကို ခန့်မှန်းရခက်သော်လည်း သူ၏ ထွက်ပေါ်နေသော အရှိန်အဝါအရ ကြယ်ကိုးပွင့် သိုင်းဧကရာဇ်အဆင့်သို့ ရောက်ရှိနေသည့် အံ့ဖွယ် စွမ်းအားရှင်ဖြစ်ကြောင်း သိသာလှသည်။

ထိုလူသည် အမှန်တကယ်ပင် အရှိန်အဝါကြီးလှသည်။

ဝတ်ရုံနက် သိုင်းဧကရာဇ်က ပုခုံးတွန့်လိုက်ပြီး ဘာစကားမှ မဆိုသလို မြွေလူမျိုးစုကိုလည်း တိုက်ခိုက်ခြင်း မပြုသေးပေ။

ဆေးဘုရင် ဂူဟီက ရှေ့သို့တက်ကာ လက်အုပ်ချီနှုတ်ဆက်ရင်း "ကျွန်ုပ်က ကျားမာနိုင်ငံတော်ရဲ့ ဆေးဘုရင် ဂူဟီပါ၊ ဒီနေ့ ဘုရင်မကြီး မီဒူဆာနဲ့ တွေ့ဆုံဖို့ လာခဲ့တာပါ" ဟု ပြောလိုက်သည်။

"ငါတို့ဘုရင်မကြီးက ဒီမှာမရှိဘူး၊ ဆေးဘုရင် ဂူဟီအနေနဲ့ အသိတရားရှိရှိ ပြန်လှည့်သွားမယ်ဆိုရင် ဒီနေ့ကိစ္စကို ဘာမှမဖြစ်ခဲ့သလို သတ်မှတ်ပေးမယ်၊ မဟုတ်ဘဲ ငါတို့မျိုးနွယ်စုနယ်မြေကို ကျူးကျော်လာမယ်ဆိုရင်တော့ ငါတို့ မြွေလူမျိုးစုကို အလွယ်တကူ အနိုင်ကျင့်လို့ရမယ်လို့ မင်းတို့ တကယ်ပဲ ထင်နေကြတာလား"

ထိုအခါ နောက်မှ ဝတ်ရုံနက် သိုင်းဧကရာဇ်က မျက်ခုံးပင့်လိုက်ပြီး အေးစက်စွာ ပြောလိုက်သည်။ "ဘုရင်မကြီး မီဒူဆာ ရှိရှိ မရှိရှိ သူတို့အားလုံးကို သတ်လိုက်ရုံပဲ၊ ဂူဟီ... ငါတို့ သဘောတူညီချက်ကို မမေ့နဲ့၊ မင်း ငါ့ကို လှည့်စားမယ်ဆိုရင် တိမ်တိုက်ဂိုဏ်းရဲ့ ဂိုဏ်းချုပ် ယွင်ယွင်က မင်းကို ကာကွယ်ပေးရင်တောင် မင်းကို အစအနမကျန်အောင် ဖျက်ဆီးပစ်မယ်"

ဆေးဘုရင် ဂူဟီက "အဘိုးအို ချူယွန်း၊ ခင်ဗျားကလည်း အပိုတွေ ပြောနေပြန်ပြီ၊ ကျွန်တော်သာ ကြာပန်းစိမ်း၀င်ရိုးမီးတောက် ကို ရတာနဲ့ ခင်ဗျား လိုချင်တဲ့ အဆင့်ခုနစ်ဆေးလုံးကို ကတိအတိုင်း ပေးမှာပါ" ဟု အမြန်ပြောလိုက်သည်။

ဂူဟီ၏ ကတိစကားကို ကြားပြီးနောက် သိုင်းဧကရာဇ်၏ မျက်နှာတွင် ရက်စက်ကြမ်းကြုတ်သော အမူအရာများ ပေါ်ပေါက်လာသည်။ သူက ချက်ချင်းပင် ညာဘက်လက်ကို ဝှေ့ယမ်းလိုက်ရာ သွေးရောင်ဓားတစ်လက်သည် လက်ထဲ၌ တိတ်တဆိတ် ပေါ်လာလေသည်။

အရှိန်အဟုန်ပြင်းသော စွမ်းအားများအောက်တွင် မြွေလူမျိုးစုမှ ပညာရှင်များသည် ထိတ်လန့်တကြား နောက်သို့ ဆုတ်သွားကြသည်။ ဤသိုင်းဧကရာဇ်၏ စွမ်းအားက ဤမျှလောက် ကြောက်စရာကောင်း‌နေလိမ့်မည်ဟု သူတို့ မမျှော်လင့်ထားခဲ့ပေ။

ဆေးဘုရင်က ဆက်လက်၍ "ဖန်လီ၊ ရန်ရှီ၊ ခင်ဗျားတို့ နှစ်ယောက် အဘိုးအို ချူယွန်းနဲ့အတူ မြွေလူမျိုးစု၏ ခေါင်းဆောင် ရှစ်ဦးကို တိုက်ပါ၊ ကျွန်‌တော်ကတော့ ကြာပန်းစိမ်း၀င်ရိုးမီးတောက် ရှိတဲ့နေရာကို သွားရှာလိုက်မယ်" ဟု ဆိုသည်။

အချိန်အတော်ကြာခဲ့ပြီဖြစ်သော်လည်း ကြာပန်းစိမ်း၀င်ရိုးမီးတောက်၏ ကျန်ရှိနေသော အရှိန်အဝါကို ဂူဟီ ခံစားနေရဆဲဖြစ်သည်။ ထိုအသိကပင် ဂူဟီ၏ မျက်လုံးများတွင် လောဘဇောများကို ပြည့်နှက်သွားစေသည်။

"ကျန်းချန်၊ မင်းက သိုင်းသူတော်စင် ပညာရှိ ဖြစ်ဖြစ် မဖြစ်ဖြစ်၊ ငါသာ ကောင်းကင်မီးတောက်ကို ရတာနဲ့ ငါ့ရဲ့ အစွမ်းက အဆပေါင်းများစွာ တိုးလာလိမ့်မယ်၊ မင်းကို မသတ်နိုင်ရင်တောင် ကောင်းကင်မီးတောက်ရဲ့ အစွမ်းနဲ့ မင်းကို ဆုငွေထုတ်ပြီး အသေသတ်ခိုင်းမယ်"

ဂူဟီသည် သူ၏ ပြတ်နေသော လက်မောင်းတစ်ဖက်ကို ကြည့်ကာ မျက်လုံးများ ပိုနီလာသည်။ ယနေ့တွင် ဘယ်လိုနည်းနှင့်ပင်ဖြစ်စေ ကြာပန်းစိမ်း၀င်ရိုးမီးတောက်ကို ရအောင်ယူရမည်။ ဤသည်မှာ ထိုလူအား လက်စားချေနိုင်မည့် တစ်ခုတည်းသော အခွင့်အရေးပင်ဖြစ်သည်။

ကြယ်ကိုးပွင့် သိုင်းဧကရာဇ်သည် ရှေ့သို့ အဟုန်ဖြင့် ပြေးဝင်သွားပြီး လက်ထဲမှ သွေးရောင်ဓားကို အားပါပါ ဝှေ့ယမ်းလိုက်သည်။ ထက်မြက်လှသော ဓားသွားသည် မြွေလူမျိုးစုတို့ကြားတွင် အသွားအပြန် ရက်စက်စွာ ကခုန်နေပြီး သွေးစက်များမှာ မြူနှင်းများကဲ့သို့ လွင့်စင်သွားတော့သည်။

"ဟဲ ဟဲ၊ အားနည်းတဲ့ ကြွက်အုပ်စုပဲ၊ ဒီနေ့တော့ မင်းတို့ အဖိုးအခကို နာနာကျင်ကျင်ရလိမ့်မယ်"

အဘိုးအို ချူယွန်းက သူ၏ ဓားသွားပေါ်ရှိ သွေးများကို လျက်ရင်း ယုတ်မာသော အမူအရာဖြင့် ဆိုလိုက်သည်။

အကြီးအကဲ ယင်းရှီသည်လည်း ကြက်သေသေသွားပြီးနောက် တော်တော်လေးဒေါသထွက်ကာ "မင်းတို့က ဘယ်သူတွေမို့လို့ ငါတို့ မြွေလူမျိုးစုကို ဒီလို သတ်ဖြတ်နေရတာလဲ၊ ငါတို့ ဘုရင်မကြီးက သိုင်းဘိုးဘေးအဆင့် ကိုတောင် ရောက်နေပြီ၊ မင်းတို့ ကိုယ့်ကိုယ်ကိုယ် တန်ဖိုးထားတတ်မယ်ဆိုရင်"

ရွှီး...(ဓားသံ)

အကြီးအကဲ ယင်းရှီ စကားမဆုံးခင်မှာပင် ထက်မြက်လှသော ဓားသွားသည် သူ၏ ဝမ်းဗိုက်ကို ထိုးဖောက်သွားခဲ့ပြီဖြစ်သည်။ အကယ်၍ ယင်းရှီသာ အချိန်မီ မရှောင်တိမ်းနိုင်ခဲ့ပါလျှင် ယခုအချိန်တွင် အသက်ပျောက်နေလောက်ပြီဖြစ်သည်။

အဘိုးအို ချူယွန်းက အံ့ဩသွားကာ "မင်းလို သိုင်းဘုရင် အဆင့်လေးက ငါ့ရဲ့ တိုက်ခိုက်မှုကို ခန့်မှန်းနိုင်လိမ့်မယ်လို့ မထင်ထားဘူး၊ စိတ်ဝင်စားဖို့ ကောင်းသားပဲ၊ ဒါပေမဲ့လည်း ဒီနေ့ မင်း သေရမှာကတော့ အသေအချာပဲ" ဟု ဆိုသည်။

လျိုမိန့် နှင့် မိုဘတ်စ် တို့က အပြေးအလွှား ရောက်ရှိလာပြီး ယင်းရှီ၏ ဝမ်းဗိုက်ဒဏ်ရာမှ သွေးများကို သူတို့၏ ဒိုချီစွမ်းအင်များဖြင့် တားဆီးပေးလိုက်ကြသည်။

"အကြီးအကဲ၊ အဆင်ပြေရဲ့လား"

"ဘာမှမဖြစ်ဘူး" အကြီးအကဲ ယင်းရှီက သွေးများ အန်ထုတ်လိုက်ပြီး "မင်းတို့နှစ်ယောက် အမြန်ထွက်ပြေးကြတော့။ ဒီသိုင်းဧကရာဇ်က ကြယ်ကိုးပွင့် အထွတ်အထိပ်အဆင့်မှာ ရှိနေတာ။ ငါတို့ မြွေငါးကောင် အဆိပ် အမှတ်တံဆိပ် ကို သုံးရင်တောင် အချည်းနှီးပဲ ဖြစ်လိမ့်မယ်" ဟု သတိပေးလိုက်သည်။

မြွေလူမျိုးစု၏ ခေါင်းဆောင် ရှစ်ဦးအနက် အသိဉာဏ်အရှိဆုံးဖြစ်သော အကြီးအကဲ ယင်းရှီသည် ရန်သူ၏ စွမ်းအားကို ကောင်းကောင်း သဘောပေါက်ထားသည်။ အကယ်၍ သူတို့ အမြန်မထွက်ခွာပါလျှင် မြွေလူမျိုးစုတစ်ခုလုံး အမြစ်ပြတ်သွားနိုင်သည်။

မိုဘတ်စ်သည် ဓားမကြီးနှစ်လက်ကို ကိုင်ဆွဲကာ ဒေါသတကြီးဖြင့် "ဟင့်အင်း၊ ကျွန်တော်တို့ မသွားဘူး၊ ဒီနေ့ သေရမယ်ဆိုရင်တောင် မီဒူဆာမျိုးနွယ်စုရဲ့ ဂုဏ်သိက္ခာကို ကာကွယ်သွားမယ်" ဟု အော်လိုက်သည်။

"ချီးကျူးစရာ သတ္တိပဲ၊ ဒါပေမဲ့ မင်းရဲ့ ဦးနှောက်ကတော့ သိပ်အလုပ်မလုပ်ဘူးဘဲ၊ ဟဲ ဟဲ"

အဘိုးအို ချူယွန်းက မိုဘတ်စ်၏ ရှေ့သို့ ရုတ်တရက် ရောက်ရှိလာပြီး ဓားကို တစ်ပတ်လှည့်ကာ အင်အားအပြည့်ဖြင့် ခုတ်ချလိုက်သည်။ မိုဘတ်စ်၏ ဓားမကြီးနှစ်လက်စလုံး အစိတ်စိတ်အမွှာမွှာ ကြေမွသွားတော့သည်။

"ဘယ်လိုလုပ် ဖြစ်နိုင်မှာလဲ"

မိုဘတ်စ်၏ မျက်နှာ အကြီးအကျယ် ပျက်သွားသည်။ သူ့မသိစိတ်က အလိုလို ပြန်တိုက်ခိုက်ရန် ကြိုးစားသော်လည်း ပြိုင်ဘက်၏ ကန်ချက်ကြောင့် လွင့်ထွက်သွားကာ မြွေလူမျိုးစု၏ ဘိုးဘေးနတ်ကွန်းခန်းမထဲသို့ ပြင်းထန်စွာ ဝင်ဆောင့်မိပြီး ဖုန်မှုန့်များ ထသွားတော့သည်။

ကျန်ရှိနေသော မြွေလူမျိုးစု၏ သိုင်းဘုရင်များသည်လည်း မှင်တက်သွားကြသည်။ ဤသည်မှာ ကြယ်ကိုးပွင့် သိုင်းဧကရာဇ်၏ စစ်မှန်သော စွမ်းအားလော။ အမှန်တကယ်ပင် ကြောက်စရာ ကောင်းလှပါတကား။

အဘိုးအို ချူယွန်းက နှာခေါင်းရှုံ့လိုက်ပြီး "ညစ်ပတ်တဲ့ ပိုးမွှားတစ်သိုက်ပဲ၊ သတ်ကြစမ်း၊ တစ်ယောက်မှ အသက်မရှင်စေနဲ့" ဟု အမိန့်ပေးလိုက်သည်။

"ဟုတ်ကဲ့"

စစ်သင်္ဘောပေါ်မှ ပညာရှင်များသည် ဒီရေအလား မြွေလူမျိုးစုတို့ရှိရာသို့ ဆင်းသက်လာကြသည်။ သူတို့ ဖြတ်သန်းသွားရာ နေရာတိုင်းတွင် သွေးချောင်းစီးကာ အလောင်းများ ပြန့်ကြဲနေတော့သည်။

မြွေလူမျိုးစုတို့၏ ငိုကြွေးသံများ တစ်ပြည်လုံး ပဲ့တင်ထပ်သွားပြီး ကောင်းကင်ယံတွင် မီးတောက်များ ထိန်ထိန်ညီးနေသည်။

"ရပ်လိုက်ကြစမ်း"

ထိုစဉ်မှာပင် အဝေးမှ ရုတ်တရက် ဟိန်းသံကြီး ပေါ်ထွက်လာပြီး ထိပ်သီး သိုင်းဧကရာဇ် လေးဦး၏ အရှိန်အဝါများ ချက်ချင်း ထွက်ပေါ်လာသည်။ မြွေလူမျိုးစု၏ ထိပ်သီးပညာရှင်သည် အောက်တွင် ပြန့်ကြဲနေသော ခန္ဓာကိုယ်အစိတ်အပိုင်းများကို အေးစက်စွာ ကြည့်လိုက်ပြီးနောက် ဒေါသကြောင့် မျက်လုံးများ သွေးရောင်လွှမ်းသွားတော့သည်။

ယင်းရှီက အမြန်ပင် ဦးညွှတ်လိုက်ပြီး "အကြီးအကဲ လေးဦးကို ဂါရဝပြုပါတယ်" ဟု ဆိုသည်။

အမှန်စင်စစ် ဤသူများသည် နှစ်ပေါင်းများစွာက အနားယူနေခဲ့သော မြွေလူမျိုးစု၏ ထိပ်သီး သိုင်းဧကရာဇ် လေးဦးပင်ဖြစ်သည်။ သူတို့သည် မီဒူဆာမျိုးနွယ်စုကို မျိုးဆက်အလိုက် စောင့်ရှောက်လာခဲ့ကြသူများဖြစ်ရာ အသက်အန္တရာယ်နှင့် ရင်ဆိုင်ရချိန်တွင် ခြိမ်းခြောက်မှုများကို ဟန့်တားရန် ရှေ့သို့ ထွက်လာလေ့ရှိကြသည်။

ဆံပင်ဖြူနှင့်မြွေလူမျိုးစု သိုင်းဧကရာဇ်က အံကိုကြိတ်ရင်း မေးလိုက်သည်။ "မင်းတို့က ဘယ်သူတွေမို့လို့ ဒီလို လုပ်ရတာလဲ"