ဝတ်ရုံဝါနှင့် လုံမပျို...... နဂါးနိုင်လက်ဝါး ဆယ့်ရှစ်ချက် အလဲအလှယ်

"မင်ဂိုဏ်းရဲ့ဂိုဏ်းချုပ် ကျန်းဝူကျိ လား"

ရှီဟော်လုံ၏ မျက်နှာအမူအရာသည် ရုတ်ခြည်းပင် အမျိုးမျိုး ပြောင်းလဲသွားပြီးနောက် မည်းမှောင်သော မျက်နှာထားဖြင့် ဤသို့ ပြောဆိုလေသည်။

"ဒါကြောင့်မို့လို့ မိစ္ဆာဂိုဏ်းက ဂိုဏ်းချုပ်ကြီး ရောက်လာတာကိုး။ မဆန်းတော့ပါဘူး၊ မဆန်းတော့ပါဘူး"

"မိစ္ဆာဂိုဏ်း ဟုတ်လား။ ခင်ဗျားတို့ကတော့ တောတောင်ထဲမှာပဲ ပိတ်မိနေတုန်းပဲလား"

ကျန်းဝူကျိက စိတ်မရှည်သလိုဖြင့် ပြန်လည်ပြောဆိုသည်။

"ဘာကထူးဆန်းနေတာလဲ ။ ကျုပ်တို့ကို မိစ္ဆာဂိုဏ်းလို့ ခေါ်နေတုန်းပဲလား။ ခင်ဗျားတို့ သူတောင်းစားဂိုဏ်းကလည်း ခိုးရာပါပစ္စည်း လက်ခံတာတို့၊ သူတပါးပစ္စည်း နှိုက်တာတို့ လုပ်ခဲ့တာ နည်းတာမဟုတ်ဘူး။ ဘယ်လိုမျက်နှာမျိုးနဲ့ တခြားသူတွေကို မိစ္ဆာဂိုဏ်းလို့ ခေါ်ရဲတာလဲ"

ရှီဟော်လုံ၏ မျက်နှာသည် ချက်ချင်းပင် အမျက်ဒေါသဖြင့် နီမြန်းသွားပြီးနောက် ပြောလေသည်။

"မိစ္ဆာဂိုဏ်းက မကောင်းမှုတွေ အများကြီး လုပ်ခဲ့တာပဲ၊ အဲဒီလို ခေါ်တာ ဘာမှားလို့လဲ။ မင်းလို ဂိုဏ်းချုပ်တစ်ယောက်က ဝူတန်ဂိုဏ်းရဲ့ တိမ်လွှာလှေကား ကို ဘယ်ကနေ သင်လာတာလဲ။ အမှန်အတိုင်း ပြောစမ်း"

စကားပြောနေစဉ်အတွင်း ရှီဟော်လုံ၏ ကိုယ်တွင်းအားများမှာ အရှိန်ပြင်းစွာ ထွက်ပေါ်လာပြီး သူ၏ ကျယ်ပြန့်သော ပခုံး၊ တုတ်ခိုင်သော ခါးတို့နှင့် ပေါင်းစပ်လိုက်သောအခါ ကြည့်ရသည်မှာ အလွန်ပင် ထိတ်လန့်ဖွယ် ကောင်းလှပေသည်။

"မင်ဂိုဏ်းက မကောင်းမှုတွေ အများကြီး လုပ်တယ်လို့ ဘယ်သူပြောလဲ။ အဲဒါတွေ အားလုံးက ချန်ခွန်း ဆိုတဲ့ အဖိုးကြီးရဲ့ လက်ချက်တွေပဲ"

ရှီဟော်လုံသည် အနည်းငယ် နားမလည်နိုင် ဖြစ်နေသော်လည်း အမှန်တရားကို သိရှိရန် ထိုက်တန်သူတစ်ဦး ဖြစ်သည်ဟု ကျန်းဝူကျိက ယူဆမိသည်။ ထို့ကြောင့် သူ၏ မည်သူမည်ဝါဖြစ်ကြောင်းနှင့် မကြာသေးမီက သိုင်းလောကတွင် ဖြစ်ပျက်ခဲ့သော အကြောင်းအရာများကို အသေးစိတ် ရှင်းပြလေသည်။

ရှီဟော်လုံသည် ယုံတစ်ဝက်၊ မယုံတစ်ဝက်ဖြင့် နားထောင်နေသည်။ သူ၏ သိုင်းပညာမှာ အမှန်တကယ်ပင် ကောင်းမွန်စွာ မတတ်မြောက်သော်လည်း သူ၌ တရားမျှတသည့် စိတ်ဓာတ်တော့ ရှိပေသည်။ မင်ဂိုဏ်းသည် မွန်ဂိုများကို တိုက်ထုတ်ရန် အမြဲတစေ ရည်မှန်းထားကြောင်း သိရသောအခါ သူသည် စိတ်ထဲမှ တိတ်တဆိတ် ချီးကျူးမိသွားသည်။

သို့သော် သူ၏ မျက်နှာပေါ်တွင် သံသယအရိပ်အယောင်များ ရှိနေဆဲပင် ဖြစ်သည်။

ရှီဟော်လုံသည် ကျန်းဝူကျိကို စိုက်ကြည့်ရင်း သံသယဖြင့် မေးမြန်းလေသည်။

"မင်းပြောတာတွေက တကယ်လား .....အလိမ်အညာလား"

"ခင်ဗျားကို လိမ်ပြောနေရမယ့် အကြောင်းပြချက် ကျွန်တော့်မှာ ရှိလို့လား။ သိုင်းကျင့်ရင်း ကိုယ့်ကိုယ်ကိုယ် ဒုက္ခိတဖြစ်အောင် လုပ်မိတဲ့ သူတောင်းစားဂိုဏ်း ဂိုဏ်းချုပ်တစ်ယောက်ကို လိမ်ရအောင် ခင်ဗျားက အဲဒီလောက် ထိုက်တန်လို့လား"

ကျန်းဝူကျိက နှာခေါင်းရှုံ့ရင်း ပြောလိုက်သည်။

"ခင်ဗျားတို့ သူတောင်းစားဂိုဏ်းကလည်း တခြား ဂိုဏ်းကြီး ခြောက်ဂိုဏ်း လိုပဲ အမှားအမှန် မခွဲခြားနိုင်ဘဲ ကျွန်တော်တို့မင်ဂိုဏ်းကို ချောင်းမြောင်းတိုက်ခိုက်ခဲ့ကြတယ်။ ပြောစမ်းပါဦး၊ ဒီစာရင်းကို ကျွန်တော်က ခင်ဗျားတို့နဲ့ မရှင်းသင့်ဘူးလား"

ရှီဟော်လုံ၏ မျက်နှာအမူအရာမှာ တောင့်တင်းသွားသော်လည်း ဤသို့ ပြန်ပြောလေသည်။

"အဲဒါက ဟုတ်တယ်ဆိုရင်တောင် ရှဲ့ရွှန်း ကျူးလွန်ခဲ့တဲ့ မကောင်းမှုတွေကတော့ အမှန်ပဲ မဟုတ်လား။ အလွန်ဆုံးရှိလှ သူက အခြေအနေအရ လုပ်ခဲ့ရတယ်လို့ပဲ ဆိုနိုင်မယ်၊ ဒါပေမဲ့ သူသတ်ခဲ့တဲ့သူ အများစုက အပြစ်မရှိတဲ့သူတွေပဲ။ အဲဒီအတွက် ဘာမှ ရှင်းပြလို့မရဘူး။ ကျုပ် သူတောင်းစားဂိုဏ်းက လူအများကြီး ရှဲ့ရွှန်း လက်ချက်နဲ့ သေခဲ့ရတယ်၊ အဲဒီတော့ ကပ်ငြိနေတဲ့ ရန်ကြွေးကို ပြန်တောင်းတာ ဘာမှားလဲ"

"အဲဒီလို ရှုထောင့်က ကြည့်မယ်ဆိုရင်တော့ ဘာပြဿနာမှ မရှိပါဘူး။ ရှဲ့ရွှန်း က ကျွန်တော့်ရဲ့ မွေးစားအဖေ ဖြစ်ပေမဲ့ သူကျူးလွန်ခဲ့တဲ့ မကောင်းမှုတွေအတွက် ကျုပ်ကတော့ ဘယ်တော့မှ ဘက်လိုက်ပြီး ကာကွယ်ပေးမှာ မဟုတ်ဘူး"

ရှီဟော်လုံ အံ့သြသွားရသည်မှာ ကျန်းဝူကျိသည် ထိုစကားကို အလေးအနက် ခေါင်းညိတ်၍ လက်ခံလိုက်ခြင်းပင် ဖြစ်သည်။

ထိုအခါ ရှီဟော်လုံ၏ မျက်နှာအမူအရာမှာ သိသိသာသာ ပြေလျော့သွားသည်။ သူက ခေါင်းညိတ်လျက် ပြောလေသည်။

"အပြောကောင်းသားပဲ။ မင်းက တကယ်ပဲ ကျန်းချွေ့ဆန်း ရဲ့ သားဖြစ်ပုံရတယ်၊ အနည်းဆုံးတော့ သာမန် မိစ္ဆာဂိုဏ်းသားတွေထက် ပိုပြီး အမြင်ကျယ်တာပဲ"

"ဟုတ်တယ်၊ ကျွန်တော်က တရားမျှတမှုကို အလေးထားဆုံး လူစားမျိုးပဲ။ သူတောင်းစားဂိုဏ်း ဆိုတဲ့ စည်းလုံးမှုမရှိတဲ့လူစုကြီးကို ကျွတ်တော့်ရဲ့ မင်ဂိုဏ်းက ရှင်းထုတ်ဖို့အလွယ်လေး။ လက်စားချေတယ် ဆိုတာကတော့ ကိုယ့်အရည်အချင်းနဲ့ကိုယ် လုပ်ရမှာပေါ့။ ခင်ဗျားတို့က ကျွန်တော့်ရဲ့ မွေးစားအဖေကို ရှာမတွေ့ဘဲနဲ့ သာမန် မင်ဂိုဏ်းသားတွေအပေါ် လက်စားချေဖို့ ကြိုးစားနေတာကတော့ ဂိုဏ်းကြီးတစ်ခုရဲ့ အပြုအမူမျိုး မဟုတ်ဘူး မဟုတ်လား"

ကျန်းဝူကျိက လှောင်ပြုံးဖြင့် ပြောလိုက်သည်။

"အနှစ်ချုပ်ရရင် ခင်ဗျားတို့ သူတောင်းစားဂိုဏ်းက အခုတော့ အရမ်းကို နိမ့်ကျနေပြီပဲ။ ခင်ဗျားတို့ရဲ့ လုပ်ရပ်တွေက ဟုန်ဂိုဏ်းချုပ်နဲ့ ဟွမ်ဂိုဏ်းချုပ် တို့ခေတ်က သိုင်းလောကရဲ့ တရားမျှတမှုမျိုး လုံးဝမရှိတော့ဘူး။ ခင်ဗျားတို့ရဲ့ လုပ်ရပ်တွေက သိမ်ဖျင်းလွန်းပြီး 'လောကမှာ နံပါတ်တစ်ဂိုဏ်း' ဆိုတဲ့ နာမည် နဲ့ တကယ်ကို မထိုက်တန်တော့ပါဘူး"

ဤစကားများက ရှီဟော်လုံ၏ မျက်နှာကို အလွန်ပင် အနေရခက်သွားစေသည်။

သို့သော် သူသည် ပြန်လည်မချေပနိုင်ခဲ့ပေ။ အဘယ်ကြောင့်ဆိုသော် ကျန်းဝူကျိ ပြောသည်မှာ မှန်ကန်နေသောကြောင့် ဖြစ်သည်။ သူတောင်းစားဂိုဏ်းသည် ယခင်ကကဲ့သို့ ဂုဏ်ရောင်ထွန်းပြောင်ခြင်း မရှိတော့ပေ။ ရှီဟော်လုံသည် ထိုအချက်ကို စိတ်မကောင်းဖြစ်ရသော်လည်း ဘာမှမတတ်နိုင်ခဲ့ပေ။

"သူတောင်းစားဂိုဏ်း ဆုတ်ယုတ်ရတဲ့ အကြောင်းရင်းက ဂိုဏ်းချုပ် အဆက်ဆက်ရဲ့ အစွမ်းအစ မရှိမှုကြောင့်လည်း ပါသလို၊ အဓိကကတော့ ရှန်းယန် တိုက်ပွဲမှာ သူတောင်းစားဂိုဏ်းရဲ့ အထူးချွန်ဆုံး သိုင်းပညာရှင်တွေ အကျအဆုံး များခဲ့လို့ပဲ။ ဒီကိစ္စက နိုင်ငံနဲ့ လူမျိုးရဲ့ နာကျည်းချက်မို့လို့ ပြက်ရယ်ပြုဖို့ မသင့်တော်ပါဘူး"

ထိုစဉ် ကြည်လင်အေးစက်သော အသံတစ်ခု ထွက်ပေါ်လာသည်။ ကျန်းဝူကျိ ခေါင်းလှည့်ကြည့်လိုက်သောအခါ သစ်သားတံခါးမှာ ဖြည်းညှင်းစွာ ပွင့်သွားပြီး ဝတ်ရုံဝါနှင့် လုံမပျို တစ်ဦးသည် အတွင်းမှ ထွက်လာသည်ကို တွေ့ရသည်။ သူမ၏ စကားမှာ ကျန်းဝူကျိ ခုနက ကြားလိုက်ရသည့်အတိုင်းပင် ဖြစ်သည်။

ဝတ်ရုံဝါနှင့် လုံမပျိုကို မြင်လိုက်ရသောအခါ ကျန်းဝူကျိ၏ မျက်လုံးများမှာ ဝင်းလက်သွားသည်။ ဤ ဝတ်ရုံဝါနှင့် လုံမပျို မှာ မည်သူဖြစ်သည်ကို သူ မည်သို့လျှင် မသိဘဲ နေပါမည်နည်း။

ဝတ်ရုံဝါနှင့် လုံမပျိုသည် အသက်နှစ်ဆယ့်ခုနစ်နှစ် သို့မဟုတ် နှစ်ဆယ့်ရှစ်နှစ်ခန့် ရှိပုံရပြီး အလွန်ထူးကဲလှပကာ ကျော့ရှင်းသော အလှရှိသူ ဖြစ်သည်။ သူမ၏ အနှိုင်းမဲ့အလှ သို့မဟုတ် နတ်သမီးတစ်မျှ တည်ငြိမ်သော အမူအရာမှာ လူ့လောကတွင် တွေ့ရခဲသော အရာပင် ဖြစ်သည်။ နေရောင်ခြည်နှင့် ထိတွေ့မှု နည်းပါးခြင်းကြောင့်လားမသိ၊ သူမ၏ အသားအရေမှာ အနည်းငယ် ဖြူဖျော့နေသော်လည်း ထိုဖြူဖျော့မှုကပင် သူမ၏ နတ်သမီးဆန်သော အရှိန်အဝါနှင့် ကြီးကျယ်သော အလှတရားကို ပိုမိုပေါ်လွင်စေသည်။

ကျန်းဝူကျိ စိတ်ထဲမှ တွေးမိသည်မှာ ဤ ဝတ်ရုံဝါနှင့် လုံမပျို ၏ ရုပ်ရည်နှင့် အမူအရာမှာ ထိုခေတ်က လုရှောင်လုံနွဲ့ ၏ ပုံရိပ်အတိုင်းပင် ဖြစ်ပေလိမ့်မည်။ တကယ်ကို လှပလွန်းလှသည်တကား။

ရှီဟုန်ရှီမှာ သူမဆီသို့ ပြေးသွားရင်း ဤသို့ ခေါ်လေသည်။

"အစ်မတော် ရန်"

ရှီဟော်လုံနှင့် ဇနီးသည်တို့ကလည်း ဝတ်ရုံဝါနှင့် လုံမပျို ကို အလွန်ယဉ်ကျေးစွာဖြင့် ဦးညွှတ်နှုတ်ဆက်ကြသည်။

ဝတ်ရုံဝါနှင့် လုံမပျိုက အသာအယာ ခေါင်းညိတ်ပြပြီးနောက် ကျန်းဝူကျိတို့ဆီသို့ လျှောက်လာကာ တည်ငြိမ်စွာ ပြောဆိုသည်။

"ကျန်းဂိုဏ်းချုပ်၊ ငယ်ရွယ်ပြီး အလားအလာရှိသူ ဖြစ်တဲ့အတွက် မင်ဂိုဏ်းရဲ့ စည်းမျဉ်းဖြစ်တဲ့ မွန်ဂိုတွေကို တိုက်ထုတ်ပြီး တရုတ်ပြည်ကို ပြန်လည်တည်ထောင်ဖို့ ဆိုတာကို စွဲမြဲစွာ လိုက်နာသင့်ပါတယ်။ ဒီကိုလာတဲ့ ရည်ရွယ်ချက် ရှိတယ်ဆိုရင်လည်း ပွင့်ပွင့်လင်းလင်း ပြောသင့်တာပေါ့။ အခုလို လှည့်ပတ်ပြောနေတာမျိုးက မကောင်းပါဘူး"

သူမ၏ လေသံမှာ အလွန်ပင် နူးညံ့လှသော်လည်း အခြားကမ္ဘာတစ်ခုမှ ရောက်လာသကဲ့သို့ ခံစားချက်ကို ပေးစွမ်းနိုင်ရာ လူတို့အား သူမ၏ စကားကို ကြားရရုံဖြင့် မိမိကိုယ်ကိုယ် ရှက်ရွံ့မိစေသည်။

သူမ ကျန်းဝူကျိကို ပြောလိုက်သော စကားမှာ အစ်မဖြစ်သူက မောင်ဖြစ်သူကို ဆုံးမနေသကဲ့သို့ ရှိသည်။ အနည်းငယ် စိမ်းသက်သော ခံစားချက် ပါဝင်နေသော်လည်း လူတို့ကို သူမ၏ စကားအား စိတ်ရင်းဖြင့် သဘောတူမိအောင် ပြုလုပ်နိုင်သည်။

ကံကောင်းသည်မှာ ကျန်းဝူကျိမှာ မျက်နှာပြောင်တိုက်တက်ခြင်းပင်ဖြစ်သည်။ သူ၏ အဓိက စရိုက်မှာ လှပသော အမျိုးသမီးကို မြင်လျှင် မလှုပ်မယှက် ဖြစ်သွားတတ်ခြင်းပင် ဖြစ်ရာ မိမိကိုယ်ကိုယ် သတိဝင်မှု မရှိတော့ပေ။ ထိုအစား ဤအမျိုးသမီးကို မည်သို့ ဆွဲဆောင်ရမည်ကိုသာ စဉ်းစားနေတော့သည်။

ကျန်းဝူကျိသည် လုံးဝ ရှက်ရွံ့ခြင်း မရှိဘဲ ပြုံးလျက် ပြောဆိုသည်။

"အစ်မ ပြောတာက အရမ်းကို အဓိပ္ပာယ်ရှိပါတယ်။ ဒါပေမဲ့ ကျွန်တော် ခုနက ရှီဂိုဏ်းချုပ် ကို ပြောခဲ့တာတွေက မင်ဂိုဏ်းရဲ့ အတွင်းရေးတွေကို ရှင်းပြရုံသက်သက်ပါပဲ။ သိုင်းလောကမှာ လူတွေက မင်ဂိုဏ်းကို မကောင်းမှုတွေ အများကြီး လုပ်နေတဲ့ မိစ္ဆာဂိုဏ်း လို့ ဆက်ပြီး ယုံကြည်နေတာမျိုး ကျွန်တ်ော အဖြစ်မခံနိုင်ဘူး။ အဲဒီ ချန်ခွန်း ဆိုတဲ့ လူယုတ်မာကိုတော့ ကျွန်တော်ကိုယ်တိုင် နာကျင်စွာ သေစေရမယ်၊ အဲဒါကိုတော့ ထပ်ပြောနေဖို့ မလိုတော့ပါဘူး"

စကားပြောနေစဉ်မှာပင် ကျန်းဝူကျိက ရှီဟော်လုံကို ကြည့်ကာ ပြောလေသည်။

"ရှီဂိုဏ်းချုပ် နဲ့ ကျုပ် စကားတွေ အများကြီး ထပ်မပြောတော့ပါဘူး။ ကျွန်တ်ော ဒီကိုလာတာက ရှီဂိုဏ်းချုပ် နဲ့ အလဲအလှယ်တစ်ခု လုပ်ဖို့ပါ"

"အလဲအလှယ် ဟုတ်လား။ ဘာအလဲအလှယ်လဲ"

ရှီဟော်လုံက မျက်မှောင်ကြုတ်လျက် ကျန်းဝူကျိ ဘာများ ကြံစည်နေသနည်းဟု တွေးတောမိသည်။

ထိုအခါ ကျန်းဝူကျိက ပြောလေသည်။

"ကျွန်တော်က ခင်ဗျားရဲ့ လက်ဝါးဒဏ်ရာကို ကုပေးမယ်၊ ခင်ဗျားက ကျွန်တော့်ကို နဂါးနိုင်လက်ဝါး ဆယ့်ရှစ်ချက် သင်ပေးရမယ်။ ဒါက အလဲအလှယ်ပဲ၊ တရားမျှတတယ် မဟုတ်လား"

"ဘာ.....အဲဒီလို အလဲအလှယ်မျိုးလား"

ထိုစကားကို ကြားသောအခါ ရှီဟော်လုံက ချက်ချင်းပင် ပြောဆိုသည်။

"မဖြစ်နိုင်တာ..... ကျန်းဂိုဏ်းချုပ်၊ ဒီစိတ်ကူးကို လက်လျှော့လိုက်ပါတော့"

သူ ငြင်းပယ်ရခြင်း အကြောင်းရင်းမှာ အလွန်ပင် ရိုးရှင်းပါသည်။

ပထမအချက်မှာ ရှီဟော်လုံသည် နဂါးနိုင်လက်ဝါး ဆယ့်ရှစ်ချက် မှာ သူတောင်းစားဂိုဏ်း၏ အဆင့်အမြင့်ဆုံး သိုင်းပညာဖြစ်ပြီး ပြင်ပလူကို မသင်ပေးနိုင်ဟု ယူဆသောကြောင့် ဖြစ်သည်။ အဘယ်ကြောင့် ခန့်မှန်းရခက်သော မင်ဂိုဏ်းချုပ်ကို လွယ်လွယ်ကူကူ သင်ပေးနိုင်ပါမည်နည်း။

ဒုတိယအချက်မှာ ထိုစဉ်က သူ၏ လက်ဝါးနှင့် လက်မောင်းရှိ အကြောများ ပြင်းထန်စွာ ထိခိုက်ခဲ့သော်လည်း နှစ်ပေါင်းများစွာ ကြာပြီးနောက် ခုနစ်ဆယ်မှ ရှစ်ဆယ် ရာခိုင်နှုန်းခန့် ပြန်လည်သက်သာနေပြီ ဖြစ်သည်။ ဝတ်ရုံဝါနှင့် လုံမပျို ကလည်း သူ့ကို အများကြီး ကူညီပေးခဲ့သည်မှာ ပြောနေစရာပင် မလိုတော့ပေ။ ရှီဟော်လုံက သူ မကြာခင် ပြန်ကောင်းလာတော့မည်ဟု ယူဆထားရာ အခြားဘာကိုမှ ဂရုစိုက်ရန် မလိုဟု ထင်နေသည်။

ကျန်းဝူကျိကမူ သူ၏ ငြင်းပယ်မှုကို အံ့သြခြင်း မရှိပေ။ သူက ပြုံးရုံမျှသာ ပြုံးလျက် ပြောလေသည်။

"ရှီဂိုဏ်းချုပ်၊ ခင်ဗျားက နဂါးနိုင်လက်ဝါး ဆယ့်ရှစ်ချက် ကို အကုန်လုံးလည်း မတတ်သေးဘူး၊ တခြားတစ်ယောက်ကိုလည်း မသင်ပေးရသေးဘူး။ အကယ်၍ ခင်ဗျား တစ်ခုခု ဖြစ်သွားရင် ဒီလို အနှိုင်းမဲ့ လက်ဝါးသိုင်းပညာကြီးက ထာဝရ ပျောက်ကွယ်သွားမှာ မဟုတ်လား။ ခင်ဗျား အခုလို လုပ်နေတာက နည်းနည်းတော့ အတ္တကြီးလွန်းရာ ရောက်နေပြီဗျ"

ရှီဟော်လုံက လှောင်ရယ်လျက် "မင်းနဲ့ အခုလို အလဲအလှယ် လုပ်တာကကော အတ္တမကြီးဘူးလား"

"ဒါပေါ့"

ကျန်းဝူကျိက တည်ငြိမ်သော လေသံဖြင့် ပြောဆိုသည်။

"တခြားအကြောင်းတွေ မပြောပါနဲ့ဦး၊ ခင်ဗျားရဲ့ လက်မောင်းနဲ့ လက်ဝါးက ဒဏ်ရာတွေကိုပဲ ကြည့်လိုက်ပါ။ အခုတော့ အများကြီး ပြန်ကောင်းလာသလို ထင်ရပေမဲ့ တကယ်ပဲ အရှင်းပျောက်နိုင်မယ်လို့ ထင်လို့လား။ နဂါးနိုင်လက်ဝါး ဆယ့်ရှစ်ချက် ကို အတင်းအကျပ် ကျင့်ကြံခဲ့မိတဲ့ နောက်ဆက်တွဲ ပြဿနာတွေက အဲဒီလောက် ရှင်းရတာ မလွယ်ဘူး။

အဲဒါက ဖုံးကွယ်နေတဲ့ ရောဂါဝေဒနာပဲ။ သေချာ မကုသရင် ခင်ဗျား ဘယ်တော့မှ ပြန်မကောင်းလာနိုင်ဘဲ တစ်သက်လုံး သူရဲဘောကြောင်တဲ့သူ ဖြစ်နေလိမ့်မယ်။ အနှိုင်းမဲ့သိုင်းပညာရှိပေမဲ့ လွယ်လွယ်နဲ့ မသုံးရဲတဲ့ ဘဝပေါ့။ ခင်ဗျားက ဇနီးနဲ့ သမီးကိုပဲ အားကိုးနေရမလား၊ ဒါမှမဟုတ် အစ်မတော် ရန် ဆီမှာပဲ အကူအညီ တောင်းနေမလား။ ခင်ဗျား စိတ်ထဲမှာ နေရ မခက်ဘူးလား"