ရှီဟော်လုံ - လူပြက်ကတော့ ငါကိုယ်တိုင်ပါလား

မျက်စိတစ်မှိတ်အတွင်းမှာပင် ခုနစ်ရက်တာ အချိန်ကာလသည် ကုန်ဆုံးသွားခဲ့လေသည်။ အရာရာတိုင်းမှာ အဆင်ပြေချောမွေ့စွာ တိုးတက်လာခဲ့၏။ ဤခုနစ်ရက်အတွင်း ဂိုဏ်းချုပ်ရှီ၏ လက်ဝါးနှစ်ဖက်မှာ တစ်နေ့ထက်တစ်နေ့ သက်သာလာခဲ့ရာ ယနေ့ ခုနစ်ရက်မြောက်နေ့တွင်မူ ပတ်တီးများကို လုံးဝဖယ်ရှားလိုက်နိုင်ပြီ ဖြစ်သည်။ ဂိုဏ်းချုပ်ရှီ၏ လက်ဝါးနှစ်ဖက်မှာ မူလအတိုင်း အပြည့်အဝ ပြန်လည်ကောင်းမွန်လာခဲ့လေပြီ။

ဤကဲ့သို့ အပြည့်အဝ ပြန်လည်ကျန်းမာလာခြင်းမှာ သူတစ်ပါးပြော၍ သိရခြင်းမဟုတ်ဘဲ ဂိုဏ်းချုပ်ရှီကိုယ်တိုင် အတည်ပြုနိုင်ခြင်း ဖြစ်သည်။ ဂိုဏ်းချုပ်ရှီသည် သူ၏လက်သီးများကို တင်းတင်းဆုပ်လိုက်ပြီးနောက် အတွင်းအားများကို လက်ဝါးသို့ စုစည်းကာ ရုတ်တရက် ပြင်းထန်သော ရိုက်ချက်တစ်ခုကို ထိုးနှက်လိုက်လေသည်။

ဝုန်းခနဲ အသံနှင့်အတူ အတွင်းအားများကြောင့် လေပွေငယ်တစ်ခု ဖြစ်ပေါ်လာပြီး လက်ဝါးသိုင်းအရှိန်အဟုန်မှာ ဆယ်ပေကျော်အကွာအဝေးအထိ ရောက်ရှိသွား၏။ လေတိုးသံမှာလည်း ထူးကဲသော စွမ်းအားရှိကြောင်း သက်သေပြနေပေသည်။

ကျန်းဝူကျိသည် ဤသိုင်းပညာကို တစ်ခါမျှ မသင်ယူဖူးသော်လည်း ဤသည်မှာ နဂါးနိုင်လက်ဝါး ဆယ့်ရှစ်ချက်ထဲမှ ကွက်ကွက်ကွင်းကွင်း မြင်သာသော အကွက်တစ်ခုဖြစ်ကြောင်း တစ်ချက်ကြည့်ရုံဖြင့် သိလိုက်၏။ တစ်လောကလုံးတွင် နဂါးနိုင်လက်ဝါး ဆယ့်ရှစ်ချက်မှလွဲ၍ အခြားမည်သည့်သိုင်းပညာကမျှ ဤမျှလောက် ကြောက်မက်ဖွယ်ကောင်းသော စွမ်းအားမျိုး မရှိနိုင်ချေ။

ဂိုဏ်းချုပ်ရှီ၏ အတွင်းအားကျင့်စဉ်မှာ သီလရှင် မြဲ့ကြွယ်နှင့် အခြားသူများလောက် နက်ရှိုင်းခြင်းမရှိသော်လည်း နဂါးနိုင်လက်ဝါး ဆယ့်ရှစ်ချက်ကြောင့်သာ သီလရှင် မြဲ့ကြွယ်သည် တိမ်လွှာဓားကို အသုံးမပြုပါက ဧကန်မုချ အရေးနိမ့်ပေလိမ့်မည်။ အမှန်စင်စစ် ဤသည်မှာ ယခုအခါ ဒဏ်ရာများ အပြည့်အဝပျောက်ကင်းပြီး အထွတ်အထိပ်သို့ ပြန်ရောက်နေသည့် ဂိုဏ်းချုပ်ရှီအတွက်သာ အကျုံးဝင်ပေသည်။

"ဟားဟား။ ကောင်းလိုက်တာ။ တကယ်ကို ကောင်းလိုက်တာ"

ဂိုဏ်းချုပ်ရှီ၏ ကြမ်းတမ်းသော မျက်နှာထက်တွင် စိတ်လှုပ်ရှားမှုများ အထင်းသား ပေါ်လွင်နေ၏။ သူသည် မိမိ၏ လက်ဝါးများ တဖြည်းဖြည်း ပြန်လည်ကောင်းမွန်လာသည်ကို ခံစားမိသော်လည်း ယနေ့အထိ စမ်းသပ်ခြင်း မပြုခဲ့ချေ။ ယခု လက်တွေ့စမ်းသပ်ကြည့်လိုက်သောအခါတွင်မူ လုံးဝ ဥဿုံ ပြန်လည်ကောင်းမွန်သွားပြီဖြစ်ကြောင်း သိလိုက်ရပေသည်။

ဤအခြေအနေကို ဂိုဏ်းချုပ်ရှီ၏ အပြည့်စုံဆုံး ပုံစံဟု ဆိုနိုင်ပေသည်။ ဒဏ်ရာမရမီက သူ၏ကျင့်ကြံမှုမှာ ယခုလောက် မနက်ရှိုင်းခဲ့သလို လွန်ခဲ့သည့် ရက်အနည်းငယ်ကလည်း အပြည့်အဝ ပြန်လည်မကောင်းမွန်သေးသဖြင့် လက်ရှိအခြေအနေနှင့် မည်သို့မျှ နှိုင်းယှဉ်၍ မရနိုင်ချေ။

ကျန်းဝူကျိသည် လက်ခုပ်တီး၍ ပြုံးလျက် "ဂိုဏ်းချုပ်ရှီရဲ့ ဒဏ်ရာတွေ အပြည့်အဝ ပျောက်ကင်းသွားတဲ့အတွက် ဂုဏ်ယူပါတယ်ဗျာ" ဟု ဆိုလိုက်သည်။

ဂိုဏ်းချုပ်ရှီမှာ ဝမ်းသာအားရ ဖြစ်နေပြီး လက်ဝါးသိုင်းကွက်များကို အကြိမ်ကြိမ် စမ်းသပ်ထုတ်ဖော်နေ၏။ တော်တော်ကြာအောင် စမ်းသပ်ပြီးမှသာ ရပ်နားလိုက်ရာ သူ၏ စိတ်လှုပ်ရှားနေမှုကို ခန့်မှန်းနိုင်ပေသည်။

"ဂိုဏ်းချုပ်ကျန်း..... ကျေးဇူးတင်လွန်းလို့ ဘယ်လိုပြောရမှန်းတောင် မသိတော့ဘူး။ ကျွန်တော့်ရဲ့ လက်ဝါးထဲက နာတာရှည်ဒဏ်ရာတွေကို ကုသပေးတဲ့အတွက် တကယ်ပဲ ကျေးဇူးတင်ပါတယ်"

ဂိုဏ်းချုပ်ရှီသည် ကျန်းဝူကျိကို ရိုသေစွာ နှုတ်ဆက်လိုက်ပြီး မျက်နှာတွင် စစ်မှန်သော ကျေးဇူးတင်ရှိမှုကို ဖော်ပြနေပေသည်။

ကျန်းဝူကျိက လက်ကို ဝေ့ယမ်းလိုက်ပြီး "ကျေးဇူးတင်စရာ မလိုပါဘူး။ ဒါက ကျွန်တော်တို့ကြားက အလဲအလှယ်တစ်ခုပဲလေ။ အခု ဂိုဏ်းချုပ်ရဲ့ လက်ဝါးဒဏ်ရာတွေ ပျောက်သွားပြီဆိုတော့ နဂါးနိုင်လက်ဝါး ဆယ့်ရှစ်ချက် သိုင်းကျမ်းကို ကျွန်တော့်ဆီ လွှဲပေးဖို့ အချိန်တန်ပြီ မဟုတ်လား" ဟု ဆို၏။

"ဒါပေါ့..... ဒါက သဘောတူထားပြီးသား ကိစ္စပဲဟာ။ ကျွန်တော် ရှီဟော်လုံက ကတိတည်တဲ့သူပါ"

ဂိုဏ်းချုပ်ရှီသည် ကျယ်လောင်စွာ ရယ်မောလိုက်ပြီးနောက် အိတ်ကပ်ထဲမှ စာအုပ်ငယ်တစ်အုပ်ကို ထုတ်ကာ ကျန်းဝူကျိထံသို့ ကမ်းပေးလိုက်လေသည်။

ထိုစာအုပ်ငယ်မှာ တော်တော်လေး ဟောင်းနွမ်းနေပြီး အပြင်ဘက်တွင် မည်သည့်သိုင်းပညာအမည်ကိုမျှ ရေးသားထားခြင်း မရှိသော်လည်း ဖွင့်ကြည့်လိုက်သည့်အခါတွင်မူ နဂါးနိုင်လက်ဝါး ဆယ့်ရှစ်ချက်၏ ကျင့်စဉ်များကို တွေ့ရှိရပေသည်။

ကျန်းဝူကျိသည် ထိုစာအုပ်ကို ယူလိုက်ရင်း ဂိုဏ်းချုပ်ရှီ၏ စရိုက်မှာ တော်တော်လေး ကောင်းမွန်သည်ဟု တွေးမိလိုက်၏။ အကယ်၍ သူသာ ယခုအချိန်တွင် အကြောင်းပြချက် အမျိုးမျိုးပေး၍ အချိန်ဆွဲနေပါက ကျန်းဝူကျိအနေဖြင့် ရန်သူအဖြစ် ပြောင်းလဲရန် ဝန်လေးမည်မဟုတ်သော်လည်း ထိုသို့ဖြစ်လာမည့်ပုံ မပေါ်ချေ။

သိုင်းပညာ၏ စစ်မှန်မှုနှင့် ပတ်သက်၍မူ ကျန်းဝူကျိမှာ သံသယမရှိပေ။ သူ၏ လက်ရှိသိုင်းပညာ အဆင့်အတန်းအရ သိုင်းကျမ်းတစ်စောင်မှာ စစ်မှန်ခြင်း ရှိမရှိကို ခွဲခြားရန် အလွန်လွယ်ကူလှသည်။ အမှန်စင်စစ် သူသည် တစ်ကြိမ်ဖတ်ရုံဖြင့် အကုန်လုံးကို နားလည်သဘောပေါက်နိုင်သူ ဖြစ်ရာ အတုဖြစ်ပါက နားလည်နိုင်စရာ အကြောင်းမရှိချေ။ ဤသည်မှာ ဟိုးရှေးယခင်က အိုးရန်ဖုန်း တစ်ယောက် ကိုးပါးယင်သိုင်းကျမ်းအတုဖြင့် လှည့်စားခံရသကဲ့သို့ မဟုတ်ပေ။

ထို့အပြင် ဂိုဏ်းချုပ်ရှီတွင် အရည်အချင်း အတန်အသင့် ရှိသော်လည်း အမှန်တကယ်၌ သာမန်မျှသာ ဖြစ်သည်။ သူသည် နဂါးနိုင်လက်ဝါး ဆယ့်ရှစ်ချက်ကဲ့သို့ သိုင်းပညာကို ပြုပြင်ပြောင်းလဲနိုင်စွမ်း မရှိချေ။

ဂိုဏ်းချုပ်ရှီက "အမှန်အတိုင်း ပြောရရင် နဂါးနိုင်လက်ဝါး ဆယ့်ရှစ်ချက်ရဲ့ အမွေအနှစ်တွေက ဒီစာအုပ်တစ်အုပ်ထဲမှာပဲ ရှိတာပါ။ ဒါကို ရှေးဂိုဏ်းချုပ် ယယ်လူးချီက ပျောက်ပျက်မသွားအောင် ရေးသားခဲ့တာဖြစ်ပြီး မျိုးဆက်ပေါင်းများစွာ လက်ဆင့်ကမ်းလာခဲ့တာ ဖြစ်ပါတယ်။ ဂိုဏ်းချုပ်ကျန်းအနေနဲ့ မမှတ်မိမှာ စိုးရိမ်ရင် မိတ္တူကူးထားလို့ ရပါတယ်လေ။ ဒါပေမဲ့ မပျောက်စေနဲ့ဦး။ ယုတ်မာတဲ့သူတွေ လက်ထဲ မရောက်ပါစေနဲ့" ဟု မှာကြားလေသည်။

ကျန်းဝူကျိသည် နဂါးနိုင်လက်ဝါး ဆယ့်ရှစ်ချက်၏ အကြောင်းအရာများကို ဖတ်ရှုရင်း "ဒါအတွက်တော့ မစိုးရိမ်ပါနဲ့။ ကျွန်တော်က တစ်ခါဖတ်ရုံနဲ့ အကုန်မှတ်မိတဲ့သူမို့လို့ ပျောက်သွားမှာကို မကြောက်ပါဘူး။ အခြားသူတွေ သင်ယူသွားမှာကိုလည်း ပိုပြီးတော့တောင် မစိုးရိမ်ဘူး။ ဒီသိုင်းပညာက အလွန်မြင့်မားတဲ့ အတွင်းအားရှိဖို့ လိုတာလေ။ ဂိုဏ်းချုပ်တောင် အကုန်မတတ်သေးတာ၊ တခြားသူတွေကရော ဘယ်နှကွက် တတ်နိုင်မှာမို့လဲ။ ယုတ်မာတဲ့သူတွေ ဆိုတာက တကယ်တော့ ကြောက်စရာ မလိုပါဘူး" ဟု ပြန်ပြောလိုက်၏။

ဤစကားကို ကြားသောအခါ ဂိုဏ်းချုပ်ရှီ၏ မျက်နှာတွင် အနည်းငယ် ရှက်ကိုးရှက်ကန်း ဖြစ်သွားလေသည်။

ယခုအခါ သူ၏အတွင်းအားမှာ ယခင်ကထက် များစွာ သာလွန်နေပြီဖြစ်ပြီး ဒဏ်ရာများလည်း ပျောက်ကင်းသွားပြီဖြစ်ရာ ဆက်လက်လေ့ကျင့်ရန် ကြိုးစားနိုင်ပေသည်။ သို့သော်လည်း အတိတ်တွင် သူသည် အောင်မြင်မှုကို အလွန်အမင်း လောဘကြီးခဲ့မိ၏။ မိမိ၏ အတွင်းအားမှာ သတ်မှတ်ထားသည့် အဆင့်သို့ မရောက်သေးဘဲ နဂါးနိုင်လက်ဝါး ဆယ့်ရှစ်ချက်ကို ဇွတ်အတင်းကျင့်ကြံခဲ့သဖြင့် တောတောင်ထဲတွင် နှစ်ပေါင်းများစွာ အချိန်ကုန်ခဲ့ရခြင်း ဖြစ်သည်။ ဤသည်မှာ ငယ်စဉ်က အသိဉာဏ် နည်းပါးခဲ့မှုကြောင့်ပင် ဖြစ်ပေသည်။

ကျန်းဝူကျိမှာ မွေးရာပါ ဉာဏ်ပညာ ထက်မြက်သူဖြစ်ပြီး အံ့အားသင့်ဖွယ် မှတ်ဉာဏ်ကို ပိုင်ဆိုင်ထားသူ ဖြစ်သည်။ ကိုးပါးနေဝန်း အလင်းစွမ်းအင်နှင့် စကြဝဠာ ရွှေ့ပြောင်းခြင်းတို့၏ အထောက်အပံ့ကြောင့် မည်သည့်သိုင်းပညာကိုမဆို မယုံနိုင်လောက်အောင် မြန်ဆန်သော အရှိန်အဟုန်ဖြင့် သင်ယူနိုင်စွမ်း ရှိ၏။ နဂါးနိုင်လက်ဝါး ဆယ့်ရှစ်ချက်မှာ ရှုပ်ထွေးနက်နဲသော်လည်း သူ၏အတွင်းအားမှာ ကျင့်ကြံရန် လိုအပ်ချက်ထက် များစွာကျော်လွန်နေပြီ ဖြစ်သည်။ တစ်ကြိမ်မျှ ဖတ်ရှုပြီးနောက် သူသည် အချက်အလက် အများစုကို သင်ယူပြီးမြောက်သွားခဲ့ပြီ ဖြစ်သည်။

မည်သည့် ထူးချွန်ထက်မြက်သူပင် ဖြစ်ပါစေ၊ ကျန်းဝူကျိ၏ သိုင်းပညာ တိုးတက်မှုအရှိန်ကိုမူ မည်သို့မျှ မမှီနိုင်ချေ။

တစ်ကြိမ်ဖတ်ပြီးနောက် ကျန်းဝူကျိသည် နဂါးနိုင်လက်ဝါး ဆယ့်ရှစ်ချက် သိုင်းကျမ်းကို ဂိုဏ်းချုပ်ရှီထံ ပြန်ပေးလိုက်၏။ ထို့နောက် မျက်လုံးများကို ခဏမျှ မှိတ်ထားပြီး ခေါင်းထဲရှိ ဗဟုသုတများကို ပြန်လည် စုစည်းလိုက်သည်။ သူသည် လက်ဝါးဆယ့်ရှစ်ချက်လုံးကို သေသေချာချာ မှတ်မိသွားပြီ ဖြစ်သည်။ ထို့နောက် မျက်လုံးများကို ဖွင့်လိုက်ပြီး လက်ဝါးဖြင့် ထိုးနှက်လိုက်လေသည်။

ချက်ချင်းပင် ကျန်းဝူကျိ၏ လက်ဝါးရှေ့မှ လေထုမှာ တဝူးဝူး....မြည်ဟည်းသွားပြီး အလွန်အမင်း အရှိန်အဟုန် ပြင်းထန်လှ၏။ သို့သော်လည်း လမ်းတစ်ဝက်တွင် သူ၏လက်ဖျံမှာ ရုတ်တရက် ကွေးညွတ်သွားပြီး လက်ဝါးအားကို ပြန်လည် ရုပ်သိမ်းလိုက်လေသည်။

ဤသည်မှာ နဂါးနိုင်လက်ဝါး ဆယ့်ရှစ်ချက်၏ ပထမဆုံးအကွက်ဖြစ်သော "နဂါးပျံလွန် နောင်တရခြင်း" ပင် ဖြစ်ပေသည်။

ဂိုဏ်းချုပ်ရှီသည် ကျန်းဝူကျိက အကြောင်းအရာများကို မှတ်ရုံသာ မှတ်လိုက်သည်ဟု ထင်ထားသဖြင့် သူ၏မှတ်ဉာဏ်ကို အံ့ဩနေခြင်း ဖြစ်သည်။ သို့သော်လည်း ကျန်းဝူကျိက "နဂါးပျံလွန် နောင်တရခြင်း" ကို ချက်ချင်း ထုတ်ဖော်ပြသလိမ့်မည်ဟု မမျှော်လင့်ထားခဲ့ချေ။ သူသည် ဆွံ့အသွားပြီး စကားတစ်လုံးမျှ မပြောနိုင်တော့ဘဲ မှင်တက်ကာ ကြည့်နေမိလေသည်။

ကျန်းဝူကျိ၏ လက်ဝါးရိုက်ချက်မှာ အစပိုင်းတွင် အနည်းငယ် မချောမွေ့သေးသည်မှလွဲ၍ စွမ်းအားမှာမူ ဂိုဏ်းချုပ်ရှီကိုယ်တိုင် အသုံးပြုသည်ထက်ပင် သာလွန်နေပေသည်။ ဤသည်မှာ တကယ့်ကို ကြောက်စရာ ကောင်းလှပေသည်။

သို့သော်လည်း ဂိုဏ်းချုပ်ရှီ၏ အံ့ဩမှုများ မပြေသေးမီမှာပင် ကျန်းဝူကျိက မြေပြင်ကို ခြေဖြင့် ဆောင့်ကန်လိုက်ကာ တိမ်လွှာလှေကား ကျင့်စဉ်ကို အသုံးပြုလိုက်သည်ကို တွေ့ရပြန်၏။ သူ၏ ကိုယ်ဟန်မှာ ကောင်းကင်သို့ ပျံတက်သွားပြီး ပေတစ်ရာကျော် အမြင့်သို့ ရောက်သောအခါ လက်ဝါးဖြင့် အောက်သို့ ရိုက်ချလိုက်လေသည်။

ဘုန်းခနဲ အသံနှင့်အတူ မြေပြင်ပေါ်ရှိ လူတစ်ဝက်ခန့် အရွယ်အစားရှိသော ကျောက်တုံးကြီးမှာ ကျန်းဝူကျိ၏ လက်ဝါးရိုက်ချက်ကြောင့် ချက်ချင်းပင် အစိတ်စိတ်အမွှာမွှာ ကွဲအက်သွားတော့သည်။

ဤသည်မှာ နဂါးနိုင်လက်ဝါး ဆယ့်ရှစ်ချက်၏ ဒုတိယမြောက်အကွက် ဖြစ်သော "ကောင်းကင်ယံမှ နဂါးပျံ" ပင် ဖြစ်ပေသည်။

ဂိုဏ်းချုပ်ရှီမှာ ဤအချိန်တွင် ပို၍ပင် အံ့အားသင့်သွားရ၏။ သူသည် အတိတ်က နဂါးနိုင်လက်ဝါး ဆယ့်ရှစ်ချက်ကို ကျင့်ကြံစဉ်က "နဂါးပျံလွန် နောင်တရခြင်း" အကွက်မှ "နောင်တ" ဆိုသည့် စာလုံး၏ အဓိပ္ပာယ်ကို ဖော်ဆောင်နိုင်ရန် လပေါင်းများစွာ လေ့ကျင့်ခဲ့ရသည်ကို ရှင်းရှင်းလင်းလင်း မှတ်မိနေပေသည်။ အင်အားကို ပြန်လည်ရုပ်သိမ်းသည့် ထိုထိန်းချုပ်မှုကို သူ ဘယ်သောအခါမှ ကောင်းမွန်စွာ မလုပ်ဆောင်နိုင်ခဲ့ချေ။ သို့သော်လည်း ယခုအခါ ကျန်းဝူကျိမှာ တစ်ကြိမ်တည်း ဖတ်ရုံဖြင့် အကွက်နှစ်ကွက်ကို ချက်ချင်း ထုတ်ဖော်နိုင်နေလေပြီ။

အကယ်၍သာ ကြိုတင်မသိထားပါက ဂိုဏ်းချုပ်ရှီအနေဖြင့် ကျန်းဝူကျိသည် သူ့ကို တမင်သက်သက် လှည့်စားနေသည်ဟုပင် ထင်မိပေလိမည်။

သို့သော် ပို၍ အံ့အားသင့်စရာကောင်းသည့် အရာများမှာ လာပါဦးမည်။

ကျန်းဝူကျိသည် တဖြည်းဖြည်းချင်း လေ့လာစမ်းသပ်ရင်း အကွက်များကို တစ်ကွက်ပြီးတစ်ကွက် ထုတ်ဖော်ပြသနေ၏။ သူသည် "လယ်ပြင်၌ နဂါးပေါ်ထွန်းခြင်း"၊ "နဂါးပုန်းကို မသုံးရ" နှင့် "တစ်ရာကျော် ဝေးကွာသော အရပ်ကို တုန်လှုပ်စေခြင်း" စသည့် အကွက်များကို ပြသခဲ့ပြီးဖြစ်သည်။ နာရီဝက်မပြည့်မီ အချိန်အတွင်းမှာပင် ကျန်းဝူကျိမှာ ပိုမိုကျွမ်းကျင်လာပြီး နဂါးနိုင်လက်ဝါး ဆယ့်ရှစ်ချက်၏ အကွက်အားလုံးကို သိသိသာသာ သင်ယူပြီးမြောက်သွားလေပြီ။

ဂိုဏ်းချုပ်ရှီမှာ မျက်လုံးအပြူးသား၊ ပါးစပ်အဟောင်းသားနှင့် သွားရည်များပင် ကျလုမတတ် ငေးကြည့်နေမိ၏။

သူသည် နှစ်ပေါင်းများစွာ ပင်ပင်ပန်းပန်း ကျင့်ကြံခဲ့ရပြီး မိမိ၏ လက်ဝါးများကိုပင် ဒုက္ခပေးခဲ့ရသော်လည်း နဂါးနိုင်လက်ဝါး ဆယ့်ရှစ်ချက်ထဲမှ တစ်ဆယ့်နှစ်ကွက်ကိုသာ တတ်မြောက်ခဲ့ခြင်း ဖြစ်သည်။ ထိုသို့ တတ်မြောက်ထားခြင်းဖြင့်ပင် လောကတွင် သူ့ကို ယှဉ်နိုင်သူ အနည်းငယ်သာ ရှိသည်ဟု ယူဆထားခဲ့၏။

သို့သော် ယခု ကျန်းဝူကျိကို ကြည့်ပါဦး။ သူသည် တစ်ကြိမ်တည်း ဖတ်ရုံဖြင့် တစ်ဆယ့်ရှစ်ကွက်လုံးကို အကုန်အစင် တတ်မြောက်သွားသည် မဟုတ်ပါလား။

ဂိုဏ်းချုပ်ရှီ၏ ရင်ထဲမှ အံ့ဩတုန်လှုပ်မှုများကို မည်သည့် စကားလုံးနှင့်မျှ ဖော်ပြ၍ မရနိုင်တော့ချေ။ သူသည် ပြိုင်ဘက်ကင်း ပါရမီရှင်ဆိုသည်မှာ မည်သို့သော အရာမျိုးဖြစ်ကြောင်း ပထမဆုံးအကြိမ် လက်တွေ့ခံစားလိုက်ရခြင်း ဖြစ်ပေသည်။

ယခင်က ကျန်းဝူကျိ ပြောခဲ့သော စကားကို သူ ပြန်လည် သတိရလိုက်၏။ အကယ်၍ နောက်တက်မည့် သူတောင်းစားဂိုဏ်းချုပ်သည် နဂါးနိုင်လက်ဝါး ဆယ့်ရှစ်ချက်ကို သင်ယူလိုပါက ကျန်းဝူကျိထံတွင် လာရောက်သင်ယူနိုင်သည်ဟု ဆိုခဲ့ဖူးသည်။ ထိုစဉ်က ဂိုဏ်းချုပ်ရှီသည် ဤစကားကို အလေးအနက် မထားခဲ့ဘဲ "ငါကိုယ်တိုင်ပဲ နောက်ဂိုဏ်းချုပ်ကို သိုင်းပညာ သင်ပေးမှာ မဟုတ်လား" ဟု တွေးခဲ့မိသည်။

သို့သော် ယခုတွင်မူ ဂိုဏ်းချုပ်ရှီသည် လူပြက်မှာ မိမိကိုယ်တိုင်သာ ဖြစ်ကြောင်း နားလည်သွားခဲ့လေပြီ။ ကျန်းဝူကျိသည် ဆယ့်ရှစ်ကွက်လုံးကို ဤမျှလွယ်ကူစွာ သင်ယူနိုင်ခဲ့ရာ သူ၏ သင်ကြားပြသမှုမှာ ကျန်းဝူကျိနှင့် မည်သို့ နှိုင်းယှဉ်နိုင်ပါမည်နည်း။ သူတို့နှစ်ဦးမှာ အဆင့်အတန်းချင်း လုံးဝ မတူညီကြချေ။

နောင်တစ်ချိန်တွင် သူသည် နဂါးနိုင်လက်ဝါး ဆယ့်ရှစ်ချက်ကို ဆက်လက်ကျင့်ကြံလိုပါက ကျန်းဝူကျိထံမှ လမ်းညွှန်မှု တောင်းခံရပေလိမ့်မည်ဟု ဂိုဏ်းချုပ်ရှီ တွေးမိလိုက်၏။ အမှန်စင်စစ် ယခုအခါ ကျန်းဝူကျိသည် နဂါးနိုင်လက်ဝါး ဆယ့်ရှစ်ချက်ကို အပြည့်အဝ တတ်မြောက်ထားသည့် လောကတွင် တစ်ဦးတည်းသော အစွမ်းထက်သူ ဖြစ်နေပေတော့သည်။

---