အခန်း (၁၆၉)

ရှန်းယွီ၏ အသိစိတ်သည် ရုပ်ခန္ဓာကိုယ်ထဲသို့ ပြန်လည်ရောက်ရှိလာသည်နှင့်တစ်ပြိုင်နက် သူ၏တစ်ကိုယ်လုံးကို စွမ်းအင်လှိုင်းတစ်ခု ဖြတ်သန်းသွားသည်ကို ခံစားလိုက်ရသည်။ သူ၏ ခန္ဓာကိုယ်မှာ မီးလျှံများအတွင်း နစ်မြုပ်နေသကဲ့သို့ ခံစားရသော်လည်း ၎င်းမှာ နာကျင်မှုကြောင့် မဟုတ်ပေ။ ဗရမ်းဗတာခန္ဓာအဆင့် ၂ သို့ တက်လှမ်းခြင်းနှင့် သူ၏ သွေးမျိုးဆက်များမှာ သွေးနှောအဆင့်သို့ အဆင့်မြင့်သွားခြင်းတို့ တစ်ပြိုင်နက်တည်း ဖြစ်ပေါ်နေခြင်းကြောင့် ဖြစ်သည်။

သူ၏ ခန္ဓာကိုယ် အစိတ်အပိုင်းအချို့မှာ ပျက်စီးသွားပြီးနောက် ပြန်လည်တည်ဆောက်နေသကဲ့သို့ ခံစားရသည်။ မော်လီကျူးများမှာ ကွဲကြေသွားပြီး ပိုမိုအစွမ်းထက်သော ပုံစံဖြင့် ပြန်လည်ဖွဲ့စည်းနေခြင်းဖြစ်သည်။ ဤကဲ့သို့သော လုပ်ငန်းစဉ်မျိုးသည် အခြားသူများအတွက်ဆိုလျှင် မခံမရပ်နိုင်အောင် နာကျင်ပေလိမ့်မည်ဖြစ်သော်လည်း၊ ရှန်းယွီအတွက်မူ အနည်းငယ် စိတ်မသက်မသာ ဖြစ်ရုံမျှသာ ရှိသည်။ သူ နေ့စဉ် ပြုလုပ်နေကျ သွေးမျိုးဆက် နိုးထမှု အခမ်းအနားနှင့် နှိုင်းယှဉ်ပါက ဤအသွင်ပြောင်းလဲမှုမှာ အလွန်ပင် သိမ်မွေ့ညင်သာနေတော့သည်။

ဗရမ်းဗတာခန္ဓာ၏ အဆင့်မြင့်မှု ပြီးဆုံးသွားသောအခါ ဗဟုသုတများမှာ သူ၏ ဦးနှောက်ထဲသို့ စီးဝင်လာသည်။ ထုံးစံအတိုင်းပင် သူ၏ ရုပ်ပိုင်းဆိုင်ရာ ခွန်အားနှင့် စွမ်းအင် ပြန်လည်ပြည့်ဖြိုးမှုမှာ သိသိသာသာ မြင့်တက်လာခဲ့သည်။ ၎င်းတို့မှာ နှစ်ဆနီးပါး တိုးတက်လာသဖြင့် သူ၏ကိုယ်မှာ ယခင်ကထက် များစွာ ပေါ့ပါးသွက်လက်သွားသလို ခံစားရသည်။

ပို၍ စိတ်ဝင်စားစရာကောင်းသည်မှာ သူသည် နောက်ထပ် ဓာတ်တစ်ခုဖြစ်သော ရေခဲဓာတ်ကို ခုခံနိုင်စွမ်းရရှိသွားခြင်း ဖြစ်သည်။ ဤအရာမှာ သတ်မှတ်ထားသည့် အစီအစဉ်အတိုင်း ဖြစ်ပေါ်လာခြင်းလား ကျပန်းဖြစ်ပေါ်ခြင်းလား သို့မဟုတ် အစောပိုင်းက ရှို့ယင်း၏ ရေခဲစွမ်းအင်များကို စုပ်ယူခဲ့ခြင်းကြောင့်လားဟု သူ ခေတ္တမျှ စဉ်းစားမိသည်။ ကောက်ချက်ချရန် အချက်အလက် မလုံလောက်သေးသဖြင့် ထိုမေးခွန်းကို နောက်မှသာ ပြန်လည်စဉ်းစားရန် ဘေးဖယ်ထားလိုက်သည်။

နောက်တစ်ဆင့်မှာမူ သွေးမျိုးဆက် အသွင်ပြောင်းလဲခြင်းပင်။ နဂါးနှင့် ဖီးနစ်တို့၏ အနှစ်သာရများမှာ သူ၏ ခန္ဓာကိုယ်စနစ်အတွင်းသို့ ပျံ့နှံ့သွားသဖြင့် ပူနွေးသော စွမ်းအင်များ သူ၏ သွေးကြောများအတွင်းသို့ တိုးဝင်လာသည်။ သာမန်လူသားသွေး တစ်စက်ချင်းစီတိုင်းကို ထိုသွေးမျိုးဆက်များက အစားထိုးလိုက်သည်အထိ ဤလုပ်ငန်းစဉ်မှာ ဆက်လက်ဖြစ်ပေါ်နေခဲ့သည်။ ၎င်းမှာ သူ့ကို မူလအခြေအနေနှင့် လုံးဝကွဲပြားခြားနားသော တည်ရှိမှုတစ်ခုအဖြစ် ပြောင်းလဲပစ်လိုက်ခြင်း ဖြစ်သော်လည်း အံ့ဩစရာကောင်းသည်မှာ သူ၏ ခံစားချက်မှာ ယခင်ကထက် ထူးထူးခြားခြား ပြောင်းလဲသွားခြင်း မရှိပေ။

ဖီးနစ်သွေးမျိုးဆက်၏ အကျိုးကျေးဇူးများမှာ ချက်ချင်းပင် ပေါ်ထွက်လာသည်။ မီးဓာတ်နှင့် တစ်သားတည်း ဖြစ်နိုင်စွမ်းမှာ သိသိသာသာ တိုးမြင့်လာခဲ့သည်။ ရှန်းယွီသည် သူ၏လက်ကို မြှောက်၍ ကြည့်လိုက်ရာ ထိုလက်မှာ စင်ကြယ်သော မီးလျှံတစ်ခုအဖြစ်သို့ ပြောင်းလဲသွားသည်ကို မြင်လိုက်ရသည်။ အသားနှင့် အရိုးများ မဟုတ်တော့ဘဲ သူ၏ အလိုဆန္ဒအတိုင်း တုံ့ပြန်နေသည့် သက်ရှိမီးလျှံတစ်ခုသာ ဖြစ်နေတော့သည်။ သူသည် ဤအသွင်ပြောင်းမှုကို ခန္ဓာကိုယ်တစ်ခုလုံးသို့ ချဲ့ထွင်ရန် ကြိုးစားကြည့်သော်လည်း သူ၏ ထိန်းချုပ်မှုမှာ ထိုမျှအထိ တိကျသေချာမှု မရှိသေးကြောင်း တွေ့ရှိလိုက်ရသည်။ ခန္ဓာကိုယ်တစ်ခုလုံးကို ဓာတ်ဝိညာဉ်အသွင် ပြောင်းလဲနိုင်ရန်မှာ ပိုမိုလေ့ကျင့်ရန် လိုအပ်ကြောင်း သူ မှတ်သားထားလိုက်သည်။

သူ၏ ခန္ဓာကိုယ် ပြန်လည်ကုသနိုင်စွမ်းမှာလည်း အဆမတန် တိုးတက်လာခဲ့ပြီး သူ၏ ဉာဏ်

အလင်းပွင့်မှုများမှာလည်း ပိုမိုကျယ်ပြန့်လာကာ အသိအမြင်သစ်များမှာ သူ၏ အသိစိတ်ထဲသို့ ပိုမို သဘာဝကျစွာ စီးဝင်လာတော့သည်။

နဂါးသွေးမျိုးဆက်၏ ပံ့ပိုးမှုမှာလည်း အလားတူပင် အံ့မခန်းလှပေ။ သူ၏ ခန္ဓာကိုယ်မှာ သိသိသာသာ ပိုမိုမာကျောလာပြီး စက္ကန့်နှင့်အမျှ တိုးပွားလာနေသော ခွန်အားများမှာ အမြင့်ဆုံးအဆင့်သို့ရောက်ကာ တည်ငြိမ်သွားသည်အထိ သူ ခံစားနေရသည်။

ရှန်းယွီသည် သူ၏ နဂါးသွေးမျိုးဆက်ထဲတွင် အခြေခံကျသော ပြောင်းလဲမှုတစ်ခု ဖြစ်ပေါ်ခဲ့သည်ဟု မခံစားဘဲ မနေနိုင်ပေ။ သူ၏ လက်မောင်းကို အာရုံစိုက်ကြည့်လိုက်သောအခါ အရေပြားပေါ်တွင် နဂါးအကြေးခွံ ဟများ ပေါ်ထွက်လာသည်ကို မြင်လိုက်ရသည်။ အစောပိုင်းက သူ၏လက်ကို မီးလျှံအဖြစ် ပြောင်းလဲခဲ့သကဲ့သို့ပင် ယခုအခါတွင်မူ သူ၏အရေပြားပေါ်တွင် နဂါးအကြေးခွံများမှာ စနစ်တကျ တစ်ခုနှင့်တစ်ခု ထပ်လျက် ထွက်ပေါ်လာခြင်းဖြစ်သည်။ ၎င်းတို့၏ ခံနိုင်ရည်အားကို သိလိုသဖြင့် သူသည် ဝိညာဉ်လက်နက်တစ်ခုကို ထုတ်ယူကာ သူ၏လက်မောင်းကို ခုတ်ကြည့်လိုက်သည်။ အစပိုင်းတွင် အသာအယာသာ စမ်းသပ်သော်လည်း အကြေးခွံများမှာ တစ်ချက်မျှပင် မပွန်းပဲ့သဖြင့် အားကို တဖြည်းဖြည်း တိုး၍ ခုတ်လိုက်သည်။

နောက်ဆုံးတွင် သူ၏ ခွန်အားအပြည့်ကို သုံးကာ စမ်းသပ်ရန် ဆုံးဖြတ်လိုက်ပြီး အားအကုန်သုံး၍ ခုတ်ချလိုက်သည်။ ဓားသွားမှာ သူ၏လက်မောင်းကို တည့်တည့်ဖြတ်သွားပြီး လုံးဝ ပြတ်ထွက်သွားတော့သည်။ သို့သော် ရှန်းယွီမှာ ထိတ်လန့်သွားခြင်းမရှိဘဲ စိတ်ဝင်တစားဖြင့်သာ ကြည့်နေမိသည်။ လက်ပြတ်သွားသော နေရာမှ မီးလျှံများ ပွင့်ထွက်လာပြီး မီးတောက်ပုံသဏ္ဌာန် လက်တစ်ဖက်အဖြစ် ပထမဦးဆုံး ဖြစ်တည်လာကာ ၎င်းမှာ လျင်မြန်စွာပင် မူလအတိုင်း ပြည့်စုံသော လက်တစ်ဖက်အဖြစ် ပြန်လည် ဖြစ်တည် သွားတော့သည်။

"ငါ့အားအကုန်သုံးရင်တော့ ပြတ်တာပဲ"

သူက မေးစေ့ကို ပွတ်ရင်း စဉ်းစားခန်း ဝင်နေမိသည်။

"ဒါက အကြေးခွံက အားနည်းတာလားဒါမှမဟုတ် ငါကပဲ အားကြီးနေတာလား"

အကြေးခွံများ၏ ခံနိုင်ရည်မှာ အထင်ကြီးစရာ ကောင်းသော်လည်း ကန့်သတ်ချက်များတော့ ရှိနေဆဲပင်။ ဖီးနစ်အသွင်ပြောင်းမှုကဲ့သို့ပင် ဤစွမ်းရည်ကို ကျွမ်းကျင်ပိုင်နိုင်ရန်မှာ လေ့ကျင့်မှုများစွာ လိုအပ်ဦးမည် ဖြစ်သည်။

သူ၏ အခြေအနေများကို ဆက်လက် ဆန်းစစ်ကြည့်ရာတွင် သူ၏ ဝိညာဉ်အရည်အသွေးမှာ နောက်ဆုံးတွင် ထောင်ဂဏန်းအဆင့်သို့ ကျော်လွန်သွားပြီဖြစ်ကြောင်း တွေ့ရှိရသည်။ ထူးဆန်းသည်မှာ အစောပိုင်းက ဝိညာဉ်ပင်လယ်သို့ သွားရောက်စဉ်က ဝိညာဉ်ကလေးငယ်မှာ ရုပ်ပိုင်းဆိုင်ရာအရ ကြီးထွားလာခြင်းမရှိသည်ကို သူ သတိပြုမိခဲ့သည်။ သို့သော် သူ ၎င်းကို အလွန်အမင်း စိတ်မပူမိပေ။ ၎င်း၏ ဖွံ့ဖြိုးမှုမှာ အပြင်ပန်းထက် အတွင်းပိုင်းသို့ ပြောင်းလဲသွားခြင်းလည်း ဖြစ်နိုင်ပေသည်။

သူ၏ ဝိညာဉ်အမြစ်မှာလည်း ကောင်းမွန်စွာ တိုးတက်နေပြီး နောက်ဆုံးတွင် ထက်ဝက်ကျော်အဆင့်သို့ ရောက်ရှိသွားပြီဖြစ်သည်။ ၎င်းမှာ အဆင့်တက်သွားပါက မည်သို့သော ပြောင်းလဲမှုများ ယူဆောင်လာမည်ကို သူ မစောင့်နိုင်တော့ပေ။ သို့သော် သူ အနည်းငယ်တော့ စိတ်ပျက်မိသည်။

နောက်တစ်ကြိမ် ကျင့်ကြံမှု ပြန်လည်သတ်မှတ်ခြင်းပြီးပါက ၎င်းကို တက်ကြွစွာ မြှင့်တင်နိုင်မည့် နည်းလမ်းမရှိလျှင် ဤအရည်အချင်းမှာ ပြန်လည် တန့်သွားပေလိမ့်မည်။ သို့သော် သူသည် ဤကန့်သတ်ချက်အပေါ် အာရုံမစိုက်ရန် ဆုံးဖြတ်လိုက်သည်။ သူ၏ ကျင့်ကြံမှု အရှိန်အဟုန်မှာ အခြားသူများနှင့်ယှဉ်လျှင် သိသိသာသာ မြန်ဆန်နေပြီ မဟုတ်ပါလား။

ရှန်းယွီ၏ ချီစုစည်းမှုမှာ အခြေအနေ အလွန်ကောင်းမွန်နေသော်လည်း သူသည် လက်ရှိတွင် ၎င်းကို အရေးတကြီးဟု မသတ်မှတ်တော့ပေ။ ဤအဆင့်တွင် ချီကျင့်စဉ်အဆင့်များထက် ခန္ဓာကိုယ်ကျင့်စဉ်ကသာ သူ၏ ခွန်အားအစစ်အမှန်ကို အဓိက ပံ့ပိုးပေးနေခြင်း ဖြစ်သည်။ နောက်တစ်ကြိမ် ပြန်လည်သတ်မှတ်ပြီးလျှင် သူ၏ ခန္ဓာကိုယ်မှာ ၁၄ ထပ်မြောက်အဆင့်သို့ ချိုးဖျက်တက်လှမ်းတော့မည် ဖြစ်ရာထိုအချိန်ရောက်လျှင် သူသည် လူသားထက် မိစ္ဆာသတ္တဝါတစ်ကောင်နှင့် ပိုတူနေတော့မည် မဟုတ်ပါလား။

မိစ္ဆာသတ္တဝါဟု ဆိုလျှင် လီယောင်းကို သူ သတိရသွားသည်။ သူမ ခရီးထွက်သွားပြီးနောက် အခုဆိုလျှင် ဘယ်အဆင့်ကို ရောက်နေလောက်မလဲ။

လီယောင်း၏ ပါရမီမျိုးနှင့်ဆိုလျှင် သူမသည် အခြေတည်ဝိညာဉ်အဆင့်သို့ ရောက်ရှိနေပြီဟု ဆိုပါက သူ အံ့ဩနေတော့မည် မဟုတ်ပေ။

သူ၏ အနှိုင်းမဲ့တာအိုခန္ဓာကိုယ်မှာလည်း တဖြည်းဖြည်း တိုးတက်နေသော်လည်း အဆင့်တက်ရန် လိုအပ်ချက်မှာ အလှမ်းဝေးနေဆဲပင်။ ၎င်းအဆင့် ၂ မရောက်မီမှာပင် ဗရမ်းဗတာခန္ဓာက အဆင့် ၃ သို့ အရင်ရောက်သွားမည်လားဟု သူ တွေးနေမိသည်။

ဟင်းလင်းပြင်မီးလျှံ၏ ဖွံ့ဖြိုးမှုမှာလည်း ပြန်လည် မြန်ဆန်လာခဲ့သည်။ သို့သော် သူ၏ ခန့်မှန်းချက်အရ ထိုမီးလျှံအတွင်း၌ တွေ့မြင်ခဲ့ရသော ထူးဆန်းသည့် သတ္တဝါမှာ အဆင့် ၄ သို့ ရောက်လျှင်ပင် နိုးထလာဦးမည် မဟုတ်ပေ။ အဆင့် ၄ မှာ အလယ်အလတ်အဆင့်သာ ရှိသေးသဖြင့် အခြေခံကျသော အပြောင်းအလဲများ ဖြစ်လာဦးမည် မဟုတ်ဘဲ အဆင့်မြင့်အဆင့်များသို့ ရောက်မှသာ အမှန်တကယ် နိုးထလာနိုင်ဖွယ် ရှိသည်။ ၎င်းမှာ အလွန်ဝေးကွာနေသေးသဖြင့် သူ ဆက်မတွေးတော့ရန် ဆုံးဖြတ်လိုက်သည်။

တိုက်ပွဲပုံရိပ်ယောင်များမှ ထွက်လာချိန်တွင် အတွေ့အကြုံမှတ်များ ပြန်လည်သတ်မှတ်ပြီးသွားသော်လည်း သူ၏ သိုင်းပညာရပ်များမှာ အထင်ကြီးစရာကောင်းလောက်အောင် တိုးတက်နေခဲ့သည်။ သူ၏ တိုးတက်လာသောညဏ်အလင်းကောင်းမှုကြောင့် ခန္ဓာကိုယ်၏ ကြွက်သားမှတ်ဉာဏ် မကူညီနိုင်သော်လည်း ခက်ခဲနက်နဲသော သိုင်းကွက်များကို သူ၏ အသိစိတ်ဖြင့် နားလည်သဘောပေါက်ကာ သူ၏ တိုက်ခိုက်ရေးစတိုင်ထဲတွင် ပေါင်းစပ်ထည့်သွင်းနိုင်ခဲ့သည်။ သိုင်းပညာရပ်များသည် ရုပ်ပိုင်းဆိုင်ရာ လေ့ကျင့်မှုအပေါ်တွင်သာ အဓိက မူတည်သော်လည်း ရှန်းယွီကမူ ဤတိုးတက်မှုနှုန်းကိုပင် အားမရသေးပေ။ သူသည် မိမိကိုယ်မိမိ ယခုထက် ပို၍ တွန်းအားပေးရန် လိုအပ်နေသေးသည်။

အံ့ဩစရာကောင်းသည်မှာ အတွေ့အကြုံမှတ် ရရှိမှုနည်းသော်လည်း သူ၏ ဟင်းချက်ပညာမှာ အဆင့် ၂ သို့ ရောက်ရှိသွားခြင်းပင်။ ဒုတိယအဆင့် ဝိညာဉ်ဟင်းလျာများဆိုင်ရာ အသိပညာများမှာ သူ၏ ဦးနှောက်ထဲသို့ စီးဝင်လာခဲ့သည်။ ရှန်းယွီသည် ထိုဗဟုသုတများကို ရရှိလိုက်ချိန်တွင် တကယ်ပင် အံ့အားသင့်သွားရသည်။ အဆင့်မြင့်နယ်ပယ်များတွင် အဆင့်တစ်ခုနှင့်တစ်ခု ကွာခြားချက်မှာ ကောင်းကင်နှင့် မြေကြီးကဲ့သို့ပင်။ ဒုတိယအဆင့် ဟင်းချက်ပညာမှာ တတိယအဆင့်နှင့်ယှဉ်လျှင် လုံးဝ ခြားနားသော နယ်ပယ်တစ်ခု ဖြစ်နေသည်။ ဒုတိယအဆင့်ကပင် ဤမျှ ထူးခြားနေလျှင် ပထမအဆင့်သို့ ရောက်ပါက မည်မျှအထိ ပြောင်းလဲသွားမည်ကို သူ စိတ်ကူးပင် မယဉ်နိုင်တော့ပေ။

ယခုလက်ရှိ သူ၏ ဟင်းချက်ကျွမ်းကျင်မှုသာ လူသိရှင်ကြားဖြစ်သွားပါက သူသည် ဟင်းချက်နတ်ဘုရားအဖြစ် အလွယ်တကူ တင်မြှောက်ခံရပေလိမ့်မည်။ အဆင့်မြင့် ပညာရှင်ကြီးများပင်လျှင် သူ့ကို ရိုသေကြရပေလိမ့်မည်။ သို့သော် ရှန်းယွီကမူ ထိုကဲ့သို့ ကျော်ကြားမှုကို မလိုလားပေ ၎င်းမှာ ပြဿနာကို ဖိတ်ခေါ်နေခြင်းသာ ဖြစ်သည်။

အခြားသော ပညာရပ်များမှာလည်း တိုးတက်မှု အလားအလာ ကောင်းနေသည်။ ဆေးဖော်

စပ်ခြင်း၊ အစီအရင်နှင့် ပန်းပဲပညာတို့မှာ နောက်တစ်ကြိမ် ပြန်လည်သတ်မှတ်ပြီးလျှင် အဆင့်တက်သွားနိုင်ဖွယ် ရှိသည်။ အဆောင်စာရွက်ပြုလုပ်ခြင်းမှာမူ ယနေ့မကုန်မီမှာပင် အဆင့်တက်သွားနိုင်သည်။ အသစ်ရရှိထားသော စိုက်ပျိုးရေးနှင့် ဆေးပညာတို့မှာလည်း အဆင့် ၈ သို့ ရောက်ရှိသွားပြီဖြစ်ရာ အသုံးဝင်သော ဗဟုသုတများကို စတင် အသုံးပြုနိုင်ပြီ ဖြစ်သည်။

ရှန်းယွီသည် စနစ်မျက်နှာပြင်ကို ကျေနပ်စွာ ပိတ်လိုက်ပြီး သူ၏ခန္ဓာကိုယ်မှာလည်း ကြီးထွားမှုမှ တည်ငြိမ်သွားပြီဖြစ်ကြောင်း သတိပြုလိုက်သည်။ ယုံကြည်မှုအပြည့်ရှိသော အပြုံးတစ်ခုမှာ သူ၏မျက်နှာတွင် ပေါ်လာပြီး သူ၏ ခွန်အားအသစ်ကို စမ်းသပ်ရန် ဆုံးဖြတ်လိုက်သည်။ သူသည် သတ္တိရှိရှိဖြင့် အမြင့်ဆုံးအဆင့်ရှိသော မိန်လင်း၏ ပုံရိပ်ယောင်ကို စိန်ခေါ်ရန် ရွေးချယ်လိုက်သည်။ ဤမျှလောက် ပြည့်စုံသော တိုးတက်မှုများ ရရှိထားပြီးမှတော့ သူမကို အနိုင်ယူရန်မှာ သိပ်မခက်ခဲလောက်တော့ဟု သူ တွေးနေမိသည်။ သူ၏ စွမ်းဆောင်ရည်အားလုံးကို ပေါင်းစပ်လိုက်လျှင် သူ၏ တိုက်ခိုက်နိုင်စွမ်းမှာ ယခင်ကထက် ဆယ်ဆနီးပါး တိုးတက်သွားခဲ့ပြီ မဟုတ်ပါလား။