ရုပ်ခန္ဓာနတ်စွမ်းရည် လီယန်နေမင်းဖွင့်လှစ်ခြင်း...

Vol. 61 Ch. 874

" ငါက မဟာသူတော်စင် ပြန်ဝင်စားလာတဲ့သူမဟုတ်ဘူး။ " လင်းယွမ်က ခေါင်းခါလိုက်သည်။

အခြားသူများက သူ့ကို ပြန်လည်ဝင်စားလာသော မဟာသူတော်စင်ဟု ယုံကြည်နေကြသော်လည်း သူက စကြာဝဠာအတွင်း ပြန်လည်မွေးဖွားလာသော သာမန်လူတစ်ယောက်သာ ဖြစ်သည်။

ကြယ်မျက်ရည်အစိတ်အပိုင်းကမ္ဘာ၏ အပြင်ဘက်တွင် ရွှမ်ယွမ်နှင့် အခြားသူများက အရှင်ကုမင်ထွက်သွားသည်ကို ကြည့်နေကြသည်။

" အရှင်ကုမင်လို ဖရိုဖရဲအရှင်သခင်တစ်ယောက်က လင်းယွမ်ကို လာတွေ့တာလား။ "

" လင်းယွမ်က ခုမှ လွှမ်းမိုးခြင်းအဆင့်ကို ရောက်ခါစမဟုတ်လား။ "

" ဖရိုဖရဲအဆင့်နဲ့ ညီမျှတယ်ဆိုရင်တောင် အရှင်ကုမင်က ဝါရင့် ဖရိုဖရဲအရှင်သခင်တစ်ယောက်မဟုတ်လား။ "

ရှချင်က အခြားသူများနှင့် ဆွေးနွေးနေပြီး အားလုံးက မယုံကြည်နိုင်ဖြစ်နေကြသည်။ အရှင်ကုမင်က လင်းယွမ်ကို လာရောက်တွေ့ဆုံချိန်တွင် သူတို့အားလုံး အံ့အားသင့်ခဲ့ရသည်။ လမ်းစဉ်ခွဲထွက်ခြင်းအဆင့်က ဖရိုဖရဲအရှင်သခင်ကို တွေ့ဆုံရန် အရည်အချင်းမပြည့်မီကြပေ။

ရင်းမြစ်ကမ္ဘာ။

လင်းယွမ်က ခြေချိတ်ထိုင်နေသည်။

" လွှမ်းမိုးခြင်းအဆင့်..." လင်းယွမ်က ဖရိုဖရဲဟင်းလင်းပြင်မှ မူလခန္ဓာကိုယ်ထက် စော၍ လွှမ်းမိုးခြင်းအဆင့်သို့ ဝင်ရောက်သွားခဲ့သည်။

" ဒီခန္ဓာကိုယ်က မူလရင်းမြစ် သုံကြိမ်လည်း မစုပ်ယူထားဘူး။ ဖရိုဖရဲသစ်ပင်ရဲ့ အားဖြည့်မှုလည်း မရှိဘူး။ ဒါကြောင့် အတွင်းစကြာဝဠာရဲ့ အခြေခံက မူလခန္ဓာကိုယ်ထက် နိမ့်မှာပဲ။ " လင်းယွမ်က တွေးလိုက်သည်။ " ဒါပေမယ့် တိုက်ခိုက်ရေးစွမ်းအားကတော့ သိပ်မကွာခြားလောက်ဘူး။ "

ဖရိုဖရဲဟင်းလင်းပြင်နှင့်ယှဉ်လျှင် ရင်းမြစ်ကမ္ဘာတွင် လင်းယွမ်၏ အကြီးမားဆုံး အားသာချက်မှာ လီယန်နတ်ခန္ဓာပင်ဖြစ်သည်။ ထိုခန္ဓာက တိုက်ခိုက်ရေးစွမ်းအားနှင့် အခြားကဏ္ဍများတွင် မြှင့်တင်ပေးမှုက အလွန်ကြောက်စရာကောင်းလှသည်။

" ဟင် " လင်းယွမ်က ကျင့်ကြံနေပြီး လီယန်မျိုးစေ့ ၃၃၃၃၃ခုမြောက်ကို စုစည်းနေစဉ် သူ၏ ခန္ဓာကိုယ်ထဲရှိ သွေးမျိုးဆက်မှ တုန်ခါမှုတစ်ခုကို ခံစားလိုက်ရသည်။

" ဘာလဲ။ " လင်းယွမ်က သူ၏ ခန္ဓာကိုယ်ကို ချက်ချင်း အာရုံခံလိုက်သည်။ သိုင်းတာအိုဆင့်ကဲပြောင်းလဲခြင်းလမ်းစဉ်၏ ရုပ်ခန္ဓာနတ်စွမ်းရည်က နှစ်ပေါင်းတစ်ထောင်ကျော်ကြာပြီးနောက် နိုးထလာခဲ့ပြီဖြစ်သည်။

" ရုပ်ခန္ဓာနတ်စွမ်းရည် နိုးထလာတော့မယ်။ " လင်းယွမ်က စိတ်လှုပ်ရှားသွားသည်။

ဤရုပ်ခန္ဓာနတ်စွမ်းရည်က သူ၏ ခုနှစ်ခုမြောက် ရုပ်ခန္ဓာနတ်စွမ်းရည်ဖြစ်ပြီး အစမှအဆုံး နိုးထရန် နှစ်ပေါင်းတစ်ထောင်ကျော်ကြာမြင့်ခဲ့သည်။ လင်းယွမ်က ထိုရုပ်ခန္ဓာနတ်စွမ်းရည်အပေါ် ကြီးမားသော မျှော်လင့်ချက်များ ထားရှိခဲ့သည်။

ရုပ်ခန္ဓာနတ်စွမ်းရည်က ပြည့်စုံသွားချိန်တွင် နက်နဲသော အမှတ်အသားက အသက်ဝင်လာခဲ့သည်။ သွေးမျိုးဆက်၏ အနက်ရှိုင်းဆုံးနေရာတွင် ရုပ်ခန္ဓာနတ်စွမ်းရည်အမှတ်အသားက အလင်းများ တောက်ပနေခဲ့သည်။

လင်းယွမ်က စိတ်ထဲတွင် မှောင်မိုက်သော ကမ္ဘာတစ်ခုသို့ ကျရောက်သွားသကဲ့သို့ ခံစားလိုက်ရသည်။ ထိုနေရာတွင် အလင်းရောင်လုံးဝမရှိဘဲ အေးစက်မှုနှင့် တိတ်ဆိတ်မှုတို့ ကြီးစိုးနေသည်။

ထိုအခိုက်အတန့်တွင် ကမ္ဘာ၏ တစ်နေရာ၌ မီးတောက်တစ်ခု ရုတ်တရက် တောက်လောင်လာသည်။ ထိုမီးတောက်က ထာဝရတိတ်ဆိတ်မှုကို ဖြိုခွင်းလိုက်သည်။ ထိုကမ္ဘာတွင် ပထမဆုံးအကြိမ် အလင်းရောင်နှင့် အပူဟူသော နိယာမများ ပေါ်ပေါက်လာခဲ့သည်။ မီးတောက်များ လောင်ကျွမ်းလာပြီး အလင်းနှင့်အပူများ ပျံ့နှံ့လာသည်။

နောက်ဆုံးတွင် ထိုမီးတောက်က လီယန်နေမင်းအဖြစ် ပြောင်းလဲသွားပြီး ကောင်းကင်တွင် ထာဝရတည်ရှိနေခဲ့သည်။ ထိုအလင်းရောင်ရောက်ရှိသည့်နေရာတိုင်း သူ၏ လွှမ်းမိုးမှုအောက်သို့ ရောက်ရှိသွားသည်။

လင်းယွမ်က တိတ်ဆိတ်စွာ ထိုင်နေသော်လည်း သူ၏ စိတ်က မတည်ငြိမ်နိုင်ဘဲ ရှိနေသည်။ သူက ထိုစွမ်းရည်ကို အားရုံစိုက်ခြင်းအား ရုတ်သိမ်းလိုက်သော်လည်း သူ၏ စိတ်ထဲမှ မြင်ကွင်းများက ပျောက်ကွယ်ခြင်းမရှိသေးပေ။

ယခုတစ်ကြိမ် သူနိုးထလာသော ရုပ်ခန္ဓာနတ်စွမ်းရည်က ထိုမျှအထိ နက်ရှိုင်းသော အဓိပ္ပါယ်များ ရှိလိမ့်မည်ဟု မထင်ထားခဲ့ပေ။ အပြင်ပိုင်းတွင် မှောင်မိုက်နေသော ကမ္ဘာ၌ လီယန်နေမင်းထွက်ပေါ်လာသည်ဟုသာ ထင်ရသည်။

သို့သော် လက်တွေ့တွင် ထိုနေ၏ အလင်းရောင် လွှမ်းခြုံသွားသည်နှင့် ပြည့်စုံသော ကမ္ဘာတစ်ခုကို ဖွင့်လှစ်ပေးခဲ့ခြင်းဖြစ်သည်။ ကမ္ဘာသစ်တစ်ခုကို ဖွင့်လှစ်ရန်မှာ လင်းယွမ်အတွက် မခက်ခဲသော်လည်း လီယန်နေမင်း ဖွင့်လှစ်ခဲ့သော ကမ္ဘာက အဆင့်အတန်း အလွန်မြင့်မလှပြီး လင်းယွမ်နေထိုင်သော ရင်းမြစ်ကမ္ဘာနှင့် ပုံတူယူထားခြင်းဖြစ်သည်။

ရင်းမြစ်ကမ္ဘာက ကျယ်ပြောလှပြီး ဖရိုဖရဲဟင်းလင်းပြင်ထက်ပင် ပို၍ ဆန်းကြယ်သည်။ ထိုသို့သော ကမ္ဘာတစ်ခုကို ဖွင့်လှစ်ရန် မဖြစ်နိုင်လောက်အောင် ခက်ခဲလှသည်။

" အလွှာဆယ့်သုံး အချိန်သက်ရှိက တကယ် ကြောက်စရာကောင်းတာပဲ။ " လင်းယွမ်က အတွေးများကို စုစည်းလိုက်သည်။

အဆုံးမဲ့ဟင်းလင်းပြင်အမွေအနှစ်ကို ဖန်တီးခဲ့သော အလွှာဆယ့်သုံး အချိန်သက်ရှိက ဖရိုဖရဲဟင်းလင်းပြင်နှင့် နှိုင်းယှဉ်နိုင်သော အတွင်းစကြာဝဠာကို ဖန်တီးလိုခဲ့သည်။

ယခု လင်းယွမ်နိုးထလာသော ရုပ်ခန္ဓာနတ်စွမ်းရည်ကလည်း အလွှာဆယ့်သုံး အချိန်သက်ရှိဖြစ်သော လီယန်ဘိုးဘေးထံမှ ဆင်းသက်လာခြင်းဖြစ်ပြီး ၎င်း၏ နောက်ဆုံးပန်းတိုင်မှာ ရင်းမြစ်ကမ္ဘာကဲ့သို့ ကျယ်ပြောလှသော ကမ္ဘာတစ်ခုကို ဖွင့်လှစ်ရန်ဖြစ်သည်။

" အလွှာဆယ့်သုံး အချိန်သက်ရှိတွေက ဒိုင်မန်းရှင်းတစ်ခုကို သိမ်းပိုက်ထားပြီးသားပဲ။ သူတို့က ရောက်ရှိနေတဲ့ ဒိုင်မန်းရှင်းတင်မဟုတ်ဘဲ အခြားဒိုင်မန်းရှင်းတွေကို စူးစမ်းဖို့ ရည်ရွယ်ထားတာပဲ။ " လင်းယွမ်က တွေးလိုက်သည်။

ဒိုင်မန်းရှင်းဆိုသည်မှာ ကျယ်ပြန့်သော အယူအဆတစ်ခုဖြစ်ပြီး ၎င်း၏ အတိုင်းအတာက ဖရိုဖရဲဟင်းလင်းပြင် သို့မဟုတ် ရင်းမြစ်ကမ္ဘာထက် သာလွန်သည်။ ဖရိုဖရဲဟင်းလင်းပြင်နှင့် ရင်းမြစ်ကမ္ဘာတို့က ဒိုင်မန်းရှင်းတစ်ခု၏ အစိတ်အပိုင်းများသာ ဖြစ်သည်။

" အခု ငါက အလွှာဆယ့်သုံး အချိန်သက်ရှိနဲ့ အဝေးကြီးလိုပါသေးတယ်။ " လင်းယွမ်က ခေါင်းခါလိုက်သည်။ အလွှာဆယ့်နှစ် အလွှာဆယ့်သုံး တစ်ဆင့်သာ လိုသော်လည်း လက်တွေ့တွင် ပန်ချီကားထဲမှ လူနှင့် အပြင်မှလူကဲ့သို့ ကွာခြားလှသည်

" ဒီရုပ်ခန္ဓာနတ်စွမ်းရည်ကို..." လင်းယွမ်က ခဏစဉ်းစားလိုက်သည်။ " လီယန်နေမင်းဖွင့်လှစ်ခြင်းလို့ ခေါ်လိုက်တော့မယ်။ "

အမှန်တကယ် ရုပ်ခန္ဓာနတ်စွမ်းရည် ခုနှစ်ခုလုံးတွင် သီးခြားနာမည်များ မရှိဘဲ လင်းယွမ်က ထိုစွမ်းရည်များ၏ လုပ်ဆောင်ချက်များအပေါ် အခြေခံပြီး နာမည်ပေးခဲ့ခြင်းဖြစ်သည်။

ခုနှစ်ခုမြောက် ရုပ်ခန္ဓာနတ်စွမ်းရည်၏ အနှစ်သာရက ကောင်းကင်တွင် ချိတ်ဆွဲထားသော လီယန်နေမင်းပင် ဖြစ်သည်။ နေအလင်းရောင် ရောက်ရှိသော နေရာတိုင်းက သူ၏ လွှမ်းမိုးမှုနယ်မြေဖြစ်ပြီး ၎င်းက လီယန်နေမင်းဖွင့်လှစ်လိုက်သော ကမ္ဘာပင်ဖြစ်သည်။ ထို့ကြောင့် လင်းယွမ်က ၎င်းကို လီယန်နေမင်းဖွင့်လှစ်ခြင်းဟု နာမည်ပေးခဲ့ခြင်းဖြစ်သည်။

" လီယန်နေမင်း။ " လင်းယွမ်၏ ရှေ့တွင် မီးတောက်တစ်ခု ပေါ်ပေါက်လာသည်။

ထိုမီးတောက်က နက်ရှိုင်းသော အော်ရာကို ထုတ်လွှတ်နေပြီး ပတ်ဝန်ကျင်ရှိ အချိန်လေဟာနယ်က ထိုမီးတောက်နှင့် တစ်သားတည်းဖြစ်သည်။ အကယ်၍ လင်းယွမ်က ထိုမီးတောက်ထဲသို့ စွမ်းအားများ ထည့်သွင်းပြီး ၎င်း၏ လောင်ကျွမ်းမှုကို ဆက်လက်ထိန်းချုပ်နိုင်လျှင် ၎င်းက ဒုတိယလီယန်နေမင်း ဖြစ်လာပေလိမ့်မည်။

၎င်းက သီအိုရီအရသာ ဖြစ်သည်။ ပထမအချက်အနေဖြင့် လင်းယွမ်က ၎င်းကို ထိန်းသိမ်းနိုင်ရန် လုံလောက်သော စွမ်းအားမရှိပေ။ ဒုတိယအချက်အနေဖြင့် သူက ထိုသို့လုပ်ခဲ့လျှင် ကောင်းကင်မှ စစ်မှန်သော လီယန်နေမင်းက သတိပြုမိသွားပေလိမ့်မည်။

" ကောင်းကင်ကို ဖွင့်လှစ်တယ်။ " လင်းယွမ်က လောင်ကျွမ်းနေသော မီးတောက်ကို စစ်ဆေးလိုက်သည်။ " ငါ့ရဲ့ စွမ်းအားနဲ့ ရင်းမြစ်ကမ္ဘာတစ်ခုလို ကမ္ဘာတစ်ခုကို ဖွင့်လှစ်ဖို့ မဖြစ်နိုင်ပေမယ့် ဒီရုပ်ခန္ဓာနတ်စွမ်းရည်ကြောင့် အောင်မြင်သွားတာပဲ။ "

ကောင်းကင်နှင့် မြေကြီးကို ဖွင့်လှစ်ရန်အတွက် ကိုယ်ပိုင်နိယာမများနှင့် လမ်းစဉ်များကို ကမ္ဘာ၏ နိယာမများနှင့် လမ်းစဉ်များအား အစားထိုးရန် လိုအပ်သည်။ ဖရိုဖရဲဟင်းလင်းပြင်တွင်ဖြစ်စေ ရင်းမြစ်ကမ္ဘာတွင်ဖြစ်စေ နိယာမများ၊ လမ်းစဉ်များနှင့် ဖွဲ့စည်းထားခြင်းဖြစ်သည်။

လင်းယွမ်နားလည်ထားသော နိယာမများနှင့် လမ်းစဉ်များကို မှီခိုလျှင် ထိုကောင်းကင်နှင့် မြေကြီးကို ဖွင့်လှစ်ခြင်းက အရူးအိပ်မက်နှင့် တူပေသည်။

" ဒါက နတ်စွမ်းရည်ပဲ။ " လင်းယွမ်က စိတ်လှုပ်ရှားစွာ ရေရွတ်လိုက်သည်။

သူက ၎င်းကို အပြည့်အဝ နားမလည်သေးသော်လည်း ထုတ်ဖော်ပြီး အသုံးပြုနိုင်စွမ်းရှိသည်။ ထိုသို့ထုတ်ဖော်ရသော စွမ်းရည်များက အမှန်တကယ် နားလည်ခြင်းနှင့်ယှဉ်လျှင် အတော်လေး အားနည်းလှသည်။ သို့သော် ၎င်းက အဆင့်တူများကို အလွယ်တကူ ချေမှုန်းနိုင်စွမ်းရှိသည်။

" ငါ့ရဲ့ လက်ရှိစွမ်းအားနဲ့ ဒီစွမ်းရည်ကို ထုတ်သုံးရင် လီယန်နေမင်းအခြေအနေကို သုံးစက္ကန့်လောက်ပဲ ထိန်းထားနိုင်လိမ့်မယ်။ " လင်းယွမ်က တွေးလိုက်သည်။ " ဒါပေမယ့် ဒီသုံးစက္ကန့်အတွင်းမှာ ဖရိုဖရဲအရှင်သခင်တစ်ယောက်တောင် တောင့်ခံနိုင်မှာမဟုတ်ဘူး။ ဖရိုဖရဲမဟာသူတော်စင်တစ်ပါးပဲ အသက်ရှင်နိုင်လိမ့်မယ်။ "

လီယန်နေမင်းဖွင့်လှစ်ခြင်းဟူသော နတ်စွမ်းရည်က အလွှာဆယ့်သုံး နည်းစနစ်တစ်ခုနှင့် ညီမျှသည်။ သို့သော် လင်းယွမ်၏ စွမ်းအားကန့်သတ်ချက်ကြောင့် ထိုစွမ်းရည်ကို အပြည့်အဝ အသုံးပြုနိုင်ခြင်းမရှိပေ။

သို့သော် ၎င်းက လွှမ်းမိုးခြင်းအဆင့်နှင့် ဖရိုဖရဲအရှင်သခင်ကို သတ်ဖြတ်နိုင်သည်။ လွှမ်းမိုးခြင်းအဆင့်မှ ဖရိုဖရဲအရှင်သခင်ကြား ကွာဟချက်မှာ ကောင်းကင်နှင့် မြေကြီးကဲ့သို့ ဖြစ်သည်။ ရှေးဟောင်းနိုင်ငံများ၏ တော်ဝင်မိသားစုများက လွှမ်းမိုးခြင်းအဆင့်နှင့် ဖရိုဖရဲအဆင့်ကို စိန်ခေါ်နိုင်ရုံသာ တတ်နိုင်သည်။

နက်ရှိုင်းသော အခြေခံအုတ်မြစ်ရှိသည့် လင်းယွမ်ပင်လျှင် လွှမ်းမိုးခြင်းအဆင့် အထွတ်အထိပ်သို့ ရောက်ရှိပြီး အဆုံးမဲ့ဟင်းလင်းပြင်ကဲ့သို့ အမွေအနှစ်များကို ကျင့်ကြံပြီးမှသာ ဖရိုဖရဲအဆင့် အထွတ်အထိပ်တစ်ယောက်ကို သတ်ဖြတ်နိုင်ရန် ယုံကြည်မှုရှိခြင်းဖြစ်သည်။

" ဒီရုပ်ခန္ဓာနတ်စွမ်းရည်နဲ့ဆိုရင် ငါ ဖရိုဖရဲအဆင့်ကို ရောက်ရင် ဖရိုဖရဲအရှင်သခင်နဲ့ မဟာသူတော်စင်တွေက ငါ့ကို ယှဉ်နိုင်မှာ မဟုတ်တော့ဘူး။ " လင်းယွမ်က တွေးလိုက်သည်။