စစ်ပွဲကြီး ပြန်လည်စတင်ခြင်း

ရှုတောင်တန်းသည် သာယာလှပပြီး ကျင့်ကြံသူများအတွက် အလွန်ကောင်းမွန်သော နေရာတစ်ခုဖြစ်သည်။

လင်ချွမ်သည် ဂိုဏ်းချုပ်ရီချန်းနှင့် ကျင့်ကြံခြင်းဆိုင်ရာ အသိပညာများ နေ့စဉ် နှီးနှောဖလှယ်ရင်း အေးချမ်းစွာ နေထိုင်နေခဲ့ပါသည်။

ဤကဲ့သို့သော လွတ်လပ်သော ဘဝမှာ ဝူတန်တောင်တွင် နွားကျောင်းခဲ့ရသည့်ဘဝနှင့် မခြား၍ သူသည် စိတ်ကျေနပ်မှု ရနေသည်။

သို့သော်လည်း အေးချမ်းမှုမှာ ကြာရှည်မခံခဲ့ပေ။

တစ်နေ့တွင် ရှောင်ထျန်းချွမ် ရောက်ရှိလာပြီး သူတော်စင်ဂိုဏ်းများနှင့် နတ်ဆိုးဘက်တို့ စစ်ပြန်ဖြစ်နေပြီ ဖြစ်ကြောင်းကို သတင်းပေးပို့ခဲ့သည်။

"ဘာပြောတယ်"

လင်ယန့်ရွှယ် အံ့အားသင့်သွားရ​၏။

အင်ပါယာ နန်းတော်က သိုင်းလောက အရေးထဲ ဝင်ရောက်စွက်ဖက်ပြီး သွေးထိုးပေးနေခြင်း ဖြစ်ကြောင်း ရှောင်ထျန်းချွမ်က ရှင်းပြသည်။

လင်ချွမ်သည် ကျားယွီကွမ်းတွင် ကျန်းဟယ်နှင့် တောက်ရန်တို့ကို တွေ့ခဲ့စဉ်ကတည်းက နန်းတော်၏ ရည်ရွယ်ချက်ကို ရိပ်မိခဲ့သည်။

နန်းတော်သည် သိုင်းလောကသားများ အချင်းချင်း သတ်ဖြတ်ကြစေရန် စီစဉ်နေခြင်း ဖြစ်သည်။

ထိုထက်ပို၍ စိုးရိမ်စရာ ကောင်းသည်မှာ အလယ်ပိုင်း လွင်ပြင်မှ သိုင်းသမားများမှာ နတ်ဆိုးဂိုဏ်းကို မယှဉ်နိုင်ဘဲ အရေးနိမ့်နေကာ ယခုအခါ စစ်မျက်နှာပြင်မှာ ဝူတန်တောင်သို့ပင် ရောက်ရှိလာတော့မည်။

လင်ချွမ်သည် ဝူတန်တပည့် တစ်ဦးဖြစ်ကြောင်း ဖော်ပြလိုက်ပြီး မိမိဂိုဏ်း ဘေးဒုက္ခ ရောက်နေရသည်ကို လျစ်လျူမရှုနိုင်တော့ပေ။

"နတ်ဆိုးဂိုဏ်းက ဘယ်လောက်အထိ ရောက်နေပြီလဲ"

ဟု သူက မေးလိုက်သည်။

ရှောင်ထျန်းချွမ်က

"အများဆုံး သုံးရက်ပဲ၊ သူတို့က ဝူတန်တောင်ကို နောက်ဆုံးတိုက်ပွဲ နေရာဆိုပြီး သတ်မှတ်ထားပုံရတယ်"

ဟု ပြန်ဖြေသည်။

လင်ချွမ်သည် လွန်ခဲ့သော ဆယ်နှစ်လုံးလုံး ဝူတန်တပည့်များနှင့် ရင်းနှီးခဲ့သူဖြစ်​၏။

သူတို့သည် လင်ချွမ် သိုင်းပညာ မတတ်စဉ်ကပင် ခွဲခြားဆက်ဆံခြင်း မရှိဘဲ ကြင်နာခဲ့ကြသည်။

ထိုသံယောဇဉ်ကြောင့် လင်ချွမ်သည် ဝူတန်တပည့်များ အသေအပျောက် မရှိစေရန် ချက်ချင်းပင် ထွက်ခွာခဲ့သည်။

လင်ယန်ရွှယ်နှင့် ယဲ့ဝူရှဲ့တို့မှာ နတ်ဆိုးဂိုဏ်းသားများ ဖြစ်သဖြင့် အခက်တွေ့နေသော်လည်း ရီချန်း၏ လမ်းညွှန်ချက်ကြောင့် လင်ချွမ်နောက်သို့ လိုက်ပါသွားကြသည်။

ရီချန်းသည်လည်း လင်ချွမ်နှင့် မိတ်ဆွေကောင်း ဖြစ်ရန်နှင့် အနာဂတ်တွင် အကူအညီရရန် ရည်ရွယ်ကာ ရှုရှန်းဂိုဏ်းသားများကို ခေါ်ဆောင်၍ ဝူတန်သို့ လိုက်ပါစေခဲ့​၏။

ဝူတန်တောင်တွင် တိုက်ပွဲသတင်းများကြောင့် တစ်ဂိုဏ်းလုံး အခြေအနေမှာ တင်းမာနေလျက်ရှိ​၏။

အထူးသဖြင့် မျိုးဆက်သစ် တပည့်များမှာ ကြောက်ရွံ့နေကြသော်လည်း ရွေးချယ်စရာ မရှိပေ။

လင်ရှောင်ကမူ

"ချန်အာကောသာ ဒီမှာရှိရင် ကောင်းမှာပဲ"

ဟု သက်ပြင်းချနေသည်။

ဝူတန်ဂိုဏ်းသည် တောင်ပိတ်ထားသော်လည်း လွန်ခဲ့သောနှစ်များက ဝူတန်တွင် သေဆုံးခဲ့သည့် စစ်ပွဲနတ်ဆိုး ကိစ္စကြောင့် အသူရာနတ်ဂိုဏ်း၏ ပစ်မှတ်ဖြစ်နေသည်။

ဓားနတ်ဘုရားနှင့် ယင်ဟွိုက်ယွီတို့မှာလည်း လင်ချွမ်ကို မျှော်နေကြသည်။

ထိုစဉ် ဝူတန်တပည့်တစ်ဦးမှာ ထိတ်လန့် တုန်လှုပ်စွာဖြင့် အပြေးအလွှား ရောက်လာပြီး

"အကြီးအကဲတို့… ပြဿနာတက်ကုန်ပြီ"

"နတ်ဆိုးဂိုဏ်းသားတွေ… နတ်ဆိုးဂိုဏ်းသားတွေ တောင်ပေါ်ကို တက်လာနေကြပြီ"