လိုက်လံသတ်ဖြတ်ရန် ကြိုးစားသော်လည်း ပြန်လည်အသတ်ခံရခြင်း

ဝူတန်တောင်ခြေတွင်။

နတ်ဆိုးဂိုဏ်းကြီး ၆ ဂိုဏ်းသည် အရှက်တကွဲ ရှုံးနိမ့်ကာ အသည်းအသန် ထွက်ပြေးနေကြရသည်။

သူတို့နောက်တွင် အလယ်ပိုင်းလွင်ပြင်မှ သူတော်စင်ဂိုဏ်းသားများက လိုက်လံတိုက်ခိုက်နေကြ​၏။

အော်မေ့ဂိုဏ်းချုပ် သီလရှင် နှင့် ကျဲ့ခုန်း တို့မှာ ပထမအဆင့် ကျင့်ကြံသူများဖြစ်သဖြင့် သူတို့၏ ဦးဆောင်မှုအောက်တွင် နတ်ဆိုးဂိုဏ်းသားများမှာ အကျအဆုံးများနေသည်။

လင်ချွမ်ကြောင့် နတ်ဆိုးဂိုဏ်းချုပ် ၆ ဦးစလုံး ဒဏ်ရာပြင်းထန်နေသဖြင့် ထိရောက်သော ခုခံမှုပင် မလုပ်နိုင်ကြတော့ပေ။

"အသူရာ မင်းတို့ မပြေးနိုင်တော့ပါဘူး၊ အညံ့ခံရင် အသက်ချမ်းသာပေးမယ်"

ဟု အော်မေ့ဂိုဏ်းချုပ် က အော်ဟစ်လိုက်သည်။

အချို့သော နတ်ဆိုးဂိုဏ်းသားများ တုံ့ဆိုင်းသွားသော်လည်း အသူရာက "မင်းတို့လို သူတော်စင်ဂိုဏ်းဘက်ကလူတွေရဲ့ စကားကို ယုံစရာလား"

"အညံ့ခံရင် ပိုပြီး ရက်ရက်စက်စက် အသတ်ခံရမှာပဲ"

ဟု ပြန်လည်ကြုံးဝါးကာ သူ၏ တပည့်များကို စိတ်ဓာတ်မြှင့်တင်ပေးလိုက်သည်။

သူတော်စင်ဂိုဏ်းဘက်နှင့် နတ်ဆိုးဂိုဏ်းဘက်မှာ ရေနှင့်မီးကဲ့သို့ ဖြစ်နေသည်မှာ ကြာပြီဖြစ်၍ အလျှော့ပေးရန် မဖြစ်နိုင်ပေ။

ကုန်းထုံဂိုဏ်းချုပ်က "သူတို့နဲ့ စကားများမနေနဲ့၊ သတ်ကြစမ်း"

ဟု အမိန့်ပေးကာ တိုက်ပွဲကြီး ပြန်လည်စတင်တော့သည်။

ထိုစဉ် ပြင်းထန်သော ပေါက်ကွဲမှုတစ်ခုဖြစ်ပွားပြီး သူတော်စင်ဂိုဏ်းဘက်မှ တပည့်တစ်ဒါဇင်ခန့် လွင့်စင်သွားကြသည်။

ကောင်းကင်ယံမှ လူနှစ်ဦး ဆင်းသက်လာသည်ကို အားလုံး မြင်လိုက်ရသည်။

တစ်ဦးမှာ လှပလွန်းသော အနက်ရောင်ဝတ်စုံဖြင့် လင်ယန်ရွှယ် ဖြစ်ပြီး၊ ကျန်တစ်ဦးမှာတည်ကြည်သော ယဲ့ဝူရှဲ့ ပင် ဖြစ်သည်။

"ယဲ့ဝူရှဲ့"

ဟု အော်မေ့ဂိုဏ်းချုပ်က ထိတ်လန့်တကြား ရေရွတ်မိသည်။

ယဲ့ဝူရှဲ့သည် လွန်ခဲ့သော အနှစ် ၃၀ က စစ်ပွဲကို စတင်ခဲ့သူဖြစ်၍ အားလုံးက ကြောက်ရွံ့ကြကုန်​၏။

ကျဲ့ခုန်းသည်လည်း လင်ချွမ်က ယဲ့ဝူရှဲ့တို့ကို ကူညီခဲ့ဖူးသည်ကို သိနေသဖြင့် လင်ချွမ်ကို ရန်မစရဲဘဲ အခက်တွေ့နေရသည်။

လင်ယန့်ရွှယ်က "ဒီကိစ္စကို ဒီမှာတင် အဆုံးသတ်လိုက်ပါ"

"ငါ နတ်ဆိုးဂိုဏ်းသားတွေကို အနောက်ပိုင်းဒေသကို ပြန်ခေါ်သွားမယ်"

"နောက်ကနေ ထပ်လိုက်လာရင်တော့ ငါ့အကြောင်း သိစေရမယ်"

ဟု ရာဇသံပေးလိုက်သည်။

သူမသည် ရှုတောင်တန်းခရီးစဉ်အတွင်း လင်ချွမ်​၏ အကူအညီဖြင့် ပထမအဆင့်ထက်ပင် ကျော်လွန်သော အဆင့်သို့ ရောက်ရှိနေပြီ ဖြစ်သည်။

အော်မေ့ဂိုဏ်းချုပ်ကမူ မယုံကြည်ဘဲ

"မင်းလည်း ပထမအဆင့်ပဲ၊ ငါလည်း ပထမအဆင့်ပဲ၊ ဘာကို ကြောက်ရမှာလဲ"

ဟု ဆိုကာ သူမ၏ အဖိုးတန် ကောင်းကင်သတ်ဓား ထုတ်၍ လင်ယန့်ရွှယ်ကို တိုက်ခိုက်လိုက်သည်။

အော်မေ့ဂိုဏ်းချုပ်​၏ ဓားချက်မှာ လျင်မြန်ပြင်းထန်လှသော်လည်း လင်ယန်ရွှယ် အတွက်ကမူ ကလေးကစားစရာမျှသာ။ လင်ယန်ရွှယ် သည် လျှပ်စီးကဲ့သို့ လျင်မြန်စွာ လှုပ်ရှားလိုက်ပြီး အော်မေ့ဂိုဏ်းချုပ်ကို လွင့်ထွက်သွားစေကာ သူမ၏ ဓားကိုပါ လုယူလိုက်သည်။

"ဒါက အော်မေ့ဂိုဏ်းရဲ့ အဖိုးတန်ဓားလား"

"ဘာမှ မထူးခြားပါလား"

ဟု ဆိုကာ လင်ယန်ရွှယ်က သူမ၏ အတွင်းအားဖြင့် တစ်ချက်ဖိလိုက်ရာ ထိုအဖိုးတန်ဓားမှာ အပိုင်းပိုင်းပြတ်ကာ ကျိုးသွားတော့သည်။