ဒုတိယတန်းစား မိစ္ဆာဂိုဏ်း

လင်းရန်ယန် သည်လည်း ရင်ထဲ၌ အနည်းငယ် နှမြောတသဖြစ်မိသည်မှာ အမှန်ပင်။

ဂိုဏ်းတော်၏ တာဝန်များထဲတွင် တုန်ရင်ကျွန်းမှ နင်ဂျာများကို သုတ်သင်ရန်ဟူသော အချက် မပါဝင်ခဲ့ချေ။ အကယ်၍ ထိုသို့သော တာဝန်မျိုးကိုသာ ထုတ်ပြန်ခဲ့ပါက ကြီးမားလှသော ကျင့်ကြံခြင်း လောကနှစ်ခုကြား၌ ပဋိပက္ခများ ဖြစ်ပွားလာနိုင်ပြီး အလွန်အမင်း ရှုပ်ထွေးသွားနိုင်သောကြောင့်ပင် ဖြစ်သည်။

“အခုဖြစ်ရပ်ပြီးရင် တုန်ရင်ကျွန်း နင်ဂျာဂိုဏ်းကလူတွေ ၊ ငါတို့ ကောင်းကင်ဘုံအင်ပါယာဆီကို လာပြီး ပြဿနာရှာဦးမလားပဲ သိချင်မိတယ် ၊ အကယ်၍ သူတို့သာ လာခဲ့မယ်ဆိုရင်တော့ ၊ အဲဒါက တာဝန်တစ်ခု ဖြစ်လာမှာပဲ မဟုတ်လား ၊

အဲဒီလို တာဝန်ပေါ်လာခဲ့ရင်တော့ ၊ ယာမာဂူချီ ရှိန်းရင် ကို သတ်လိုက်တာနဲ့ ငါ တာဝန်ဆုလာဘ်တွေကို ရရှိမှာပဲ ”

လင်းရန်ယန်က အသာအယာ ပြုံးလိုက်၏။ ဤသို့ တွေးကြည့်လိုက်လျှင် ရှန်းရင် ထွက်ပြေးသွားနိုင်ခြင်းမှာလည်း ကောင်းသော အချက်တစ်ခုဟု ဆိုနိုင်သည်။

သို့သော်လည်း တစ်ဖက်ရန်သူမှာ ကောင်းကင်ဘုံအင်ပါယာဆီသို့ လာရောက်၍ ပြဿနာရှာရန်မှာမူ ၊ အမှန်တကယ်ပင် အသက်မရှင်ချင်တော့သည့် အခြေအနေမျိုးမှလွဲ၍ လုံးဝ မဖြစ်နိုင်ချေ။ ကောင်းကင်ဘုံအင်ပါယာ၏ ကြီးမားလှသော ဂိုဏ်းကြီးငါးခုမှာ အရပ်မျက်နှာငါးခုကို အခိုင်အမာ စောင့်ကြပ်နေကြခြင်း ဖြစ်သည်။

အကယ်၍ သူသာ ရဲရဲဝံ့ဝံ့ လာရောက်ခဲ့ပါက ၊ အလစ်အငိုက် တိုက်ခိုက်ထွက်ပြေးသည့် နည်းဗျူဟာကို အသုံးပြုလျှင်ပင် ၊ ကောင်းကင်ဘုံအင်ပါယာ၏ ပညာရှင်များက သူ့ကို လျင်မြန်စွာ ရှာဖွေတွေ့ရှိသွားကြပြီး စုပေါင်းသုတ်သင်ကြလိမ့်မည်။ အထူးသဖြင့် သူ ယခုလေးတင် အသုံးပြုခဲ့သော ထိတ်လန့်စရာ သစ်သားနဂါးအတတ်ကို နောက်ထပ် တစ်ကြိမ်ခန့်သာ အသုံးပြုနိုင်တော့မည် ဖြစ်သည်။ ၎င်းကို အသုံးပြုပြီးပါက သူ၏ သက်တမ်းမှာလည်း အဆုံးသတ်သွားလိမ့်မည်။

ဤမျှ အဆင့်မြင့်သော ပညာရှင်တစ်ဦးအနေဖြင့် သူတစ်ပါးအတွက် ကလဲ့စားချေရန်နှင့်တင် မိမိ၏ အသက်ကို အချည်းနှီး အဆုံးရှုံးခံမည် မဟုတ်ပေ။

“ဝူး... “

ထိုအခိုက်အတန့်၌ ပတ်ဝန်းကျင်ရှိ ဟင်းလင်းပြင်အတွင်းမှ ရွှေရောင်အလင်းတန်း အမြောက်အမြား ရုတ်တရက် ပေါ်ထွက်လာတော့သည်။ ထိုအလင်းတန်းများသည် လင်းရန်ယန်၏ ခန္ဓာကိုယ်အတွင်းသို့ တစ်ခဏချင်း စီးဝင်သွားပြီးနောက် ၊ နောက်ဆုံးတွင် သူ၏ အသိအာရုံပင်လယ်အတွင်းရှိ ‘ကံတရား အလင်းလုံး’ ထံသို့ အလုံးအရင်းနှင့် စုစည်းသွားတော့သည်။

[ဒင်... သင်သည် ကံတရား ၇၅၀,၀၀၀ ရရှိခဲ့ပါသည်။ လက်ရှိ ကံတရားစုစုပေါင်း - ၈၆၀,၀၀၀ * ၁၀၀,၀၀၀ ဆ ဖြစ်ပါသည်။]

ချက်ချင်းပင် အသိပေးသံ ထွက်ပေါ်လာတော့သည်။

“အင်း... ဒီတစ်ကြိမ်မှာတော့ ငပုလေးတွေရဲ့ လုပ်ရပ်တွေကို ငါ တကယ်ပဲ တားဆီးနိုင်ခဲ့ပုံရတယ် ၊ ဧကရာဇ်မင်းလည်း သေသွားပြီဆိုတော့ ၊ ဘယ်သူက ကောင်းကင်ဘုံအင်ပါယာကို ရန်စရဲဦးမှာလဲ ၊ ဒါပေမဲ့ ဒီကံတရား ပမာဏက သိပ်ပြီး များလှတယ်တော့ မဟုတ်ဘူးပဲ ၊ ကြည့်ရတာ စစ်ပွဲက မစရသေးလို့ ထင်တယ် ၊ အကယ်၍ စစ်ပွဲစနေတဲ့အချိန်မှာသာ ငါ တားဆီးခဲ့တာဆိုရင် ၊ ကံတရား ပမာဏက အနည်းဆုံး ဆယ်ဆ ဒါမှမဟုတ် အဆပေါင်း ဆယ်ဂဏန်းလောက်အထိ တိုးလာမှာ အသေအချာပဲ ”

ရရှိလာသော ကံတရား ပမာဏကို ကြည့်ရင်း ခုနစ်သိန်းကျော်သာ ရှိရခြင်း၏ အကြောင်းရင်းကို လင်းရန်ယန် နားလည်သွားခဲ့ပြီ။

သို့သော်လည်း ကံတရား ပမာဏ နည်းပါးမည်ကို သိနေခဲ့လျှင်ပင် ၊ လင်းရန်ယန် အနေဖြင့် ထိုစစ်ပွဲကို စတင်ခွင့် ပေးနိုင်မည် မဟုတ်​ပေ။ ငပုလေးအားလုံးကို လုံးဝဥဿုံ သုတ်သင်မပစ်ခဲ့ခြင်းမှာပင် လင်းရန်ယန်၏ ကြီးမားလှသော ကရုဏာတော်နှင့် မေတ္တာတရားကြောင့်ဟု ဆိုနိုင်သည်။ အမှန်စင်စစ် အဓိက အကြောင်းရင်းမှာ ယခုအချိန်တွင် တုန်ရင်ကျွန်းကို ဖျက်ဆီးလိုက်ခြင်းက ရှုပ်ထွေးမှုများစွာ ဖြစ်ပေါ်လာနိုင်သောကြောင့်ပင် ဖြစ်သည်။ အကယ်၍ အခြားနိုင်ငံများက ဤမြင်ကွင်းကို မြင်တွေ့သွားပြီး အလွန်အမင်း ထိတ်လန့်သွားကာ ၊ ကောင်းကင်ဘုံအင်ပါယာ ကျင့်ကြံခြင်းလောကကို စုပေါင်းတိုက်ခိုက်လာကြပါက ၊ လက်ရှိ လင်းရန်ယန်၏ စွမ်းအင်နှင့် ကိုင်တွယ်နိုင်ရန် ခက်ခဲလိမ့်မည်။

သူ၏ စွမ်းအားများ ပိုမိုတိုးတက်လာမည့် အချိန်အထိ စောင့်ဆိုင်းခြင်းကသာ အကောင်းဆုံး ဖြစ်သည်။

“ပြီးတော့ ငါ အခု ကောင်းကင်အရှင်သခင် အဆင့်ကို ရောက်သွားပြီဆိုတော့ ၊ ဒီတစ်ကြိမ် အခြေအနေပြဇယား မှာ ဘာတွေ ပြောင်းလဲသွားလဲဆိုတာ သိချင်မိတယ်”

လင်းရန်ယန်က ခေတ္တမျှ စဉ်းစားလိုက်ပြီးနောက် သူ၏ အခြေအနေပြဇယားကို ဖွင့်ကြည့်လိုက်၏။

အခြေအနေပြဇယား

အမည် - လင်းရန်ယန်

အဆင့် - ကောင်းကင်အရှင်သခင် ပထမအဆင့်

အတတ်ပညာရပ်ဝန်း အဆင့် - ဝိညာဉ်အဆင့် အနိမ့်စား (ထူးချွန်မှု +၁)

ကျင့်စဉ် - ဓာတ်ငါးပါး စစ်နည်းဗျူဟာ (တာအိုအဆင့် အမြင့်စား) ၊ ကောင်းကင်ဘုံပြစ်ဒဏ် မြင့်မြတ်ကျမ်းစာ (ဝိညာဉ်အဆင့် အမြင့်စား)

တာအိုအတတ်ပညာ - ဓာတ်ငါးပါး ဝိညာဉ်ဓားသိုင်း (ဝိညာဉ်အဆင့် အထွတ်အထိပ်) ၊ ကောင်းကင်နှင့်မြေကြီး ရေခဲပိတ်ဆို့ခြင်း (တာအိုအဆင့် အလယ်အလတ်) ၊ အဆုံးမဲ့ မိုးကြိုးဟိန်းသံ (ဝိညာဉ်အဆင့် အထွတ်အထိပ်) ၊ ဝိညာဉ်အာရုံ ဓားအစီရင် (ဝိညာဉ်အဆင့် အမြင့်စား)

အထူးစွမ်းရည်များ တိုက်ခိုက်ရေး- * အလိုအလျောက် ကျင့်ကြံခြင်း အဆင့်ငါး (6/32ဆ)

ဓာတ်ငါးပါး ဝိညာဉ်ခန္ဓာ အဆင့်လေး (2/16, 64 ဆ)

အလိုအလျောက် ငွေရရှိခြင်း အဆင့်ငါး (16/32, ဝိညာဉ်ကျောက်တုံး ၁ သိန်း/ရက်)

အလိုအလျောက် သိုင်းကျင့်ခြင်း အဆင့်ငါး (16/32, နှစ်ပေါင်း ၁ သောင်း/ရက်)

ဝိညာဉ်စွမ်းအင်ရေကန် အဆင့်လေး (1/16)

အတတ်စုံကျွမ်းကျင်မှု အဆင့်ငါး (12/32)

ကုသိုလ်တော် ရွှေရောင်အလင်း အဆင့်ငါး (2/32)

ဝိညာဉ်အာရုံစွမ်းအား အဆင့်လေး (0/16, အမျှင် ၆၂၅)

လေဝိညာဉ်ခန္ဓာ အဆင့်လေး (5/16)

ခန္ဓာကိုယ် ကြံ့ခိုင်မှုမြှင့်တင်ခြင်း အဆင့်ငါး (2/32)

မိုးကြိုးဝိညာဉ်ခန္ဓာ အဆင့်လေး (10/16, ၃၂၀၀%)

ရေခဲဝိညာဉ်ခန္ဓာ အဆင့်လေး (10/16)

တိုက်ခိုက်မှု ကွဲပြားခြင်း အဆင့်လေး (5/16, ၁၆ ဆ)

အလိုအလျောက် တိုက်ခိုက်ခြင်း အဆင့်နှစ် (0/4)

လက်နက် - အနန္တပြောင်းလဲခြင်းဓား (ကောင်းကင်အဆင့် အထွတ်အထိပ် ၊ ပြီးပြည့်စုံမှု)

ကုသိုလ်ကံ - ၁၀၂,၀၀၀ (*၁၀၀၀)

ပိုင်ဆိုင်မှု - အလယ်အလတ်အဆင့် ဝိညာဉ်ကျောက်တုံး ၁၈၅၅ တုံး ၊ အဆင့်မြင့် ဝိညာဉ်ကျောက်တုံး ၁ တုံး

“ငါ အဆင့်မြင့် ဝိညာဉ်ကျောက်တုံးအချို့ကို စုဆောင်းထားဖို့ လိုအပ်မယ် ထင်တယ် ၊ အဲဒီလိုမှမဟုတ်ရင် တိုက်ပွဲကြားထဲ ဝိညာဉ်စွမ်းအား ပြတ်သွားရင် အခက်တွေ့လိမ့်မယ် ”

လင်းရန်ယန်က မျက်ခုံးတစ်ချက် ပင့်လိုက်၏။

လက်ရှိတွင် လင်းရန်ယန်သည် တစ်ရက်လျှင် အဆင့်မြင့် ဝိညာဉ်ကျောက်တုံး သုံးတုံးနှင့် ညီမျှသော ပမာဏကို ရရှိနေပြီး ၊ ၎င်းမှာ သူ၏ ဝိညာဉ်စွမ်းအားကို ငါးကြိမ်တိုင်တိုင် အပြည့်ပြန်ဖြည့်ရန် လုံလောက်လှသည်။ သို့သော်လည်း လင်းရန်ယန်၏ အဆင့် မြင့်တက်လာသည်နှင့်အမျှ ၊ ဤပမာဏမှာ မလုံလောက်သည်မှာ အသေအချာပင် ဖြစ်၏။

“ဟုတ်သားပဲ ၊ ငါ ဆေးလုံးတွေလည်း ဖော်စပ်လို့ ရတာပဲ ၊ ဒါပေမဲ့ ပြီးပြည့်စုံတဲ့ ကောင်းကင်အဆင့် အထွတ်အထိပ် ဆေးလုံးတစ်လုံးက ငါ့ရဲ့ ဝိညာဉ်စွမ်းအားကို သုံးကြိမ်ပဲ ပြန်ဖြည့်ပေးနိုင်တာ ၊

ငါ့မှာ ကောင်းကင်အဆင့် ဆေးဖက်ဝင်ပစ္စည်း နှစ်ဆယ်ကျော်ပဲ ရှိတာ ၊ အနန္တပြောင်းလဲခြင်းဓားကို သန့်စင်ဖို့ ရှစ်ပုံသုံးလိုက်တော့ ၊ အခု ဆယ့်ငါးပုံပဲ ကျန်တော့တာပဲ ၊ ဒါက ရေရှည်အတွက်တော့ အဖြေမဟုတ်ဘူး ”

ဤသို့ တွေးမိသည်နှင့် လင်းရန်ယန်မှာ မျက်မှောင်ကြုတ်လိုက်တော့သည်။

‘ကျင့်ကြံခြင်း ဆုတ်ယုတ်သောခေတ်’ မှာ တကယ့်ကို အခက်တွေ့လှ၏။ ကောင်းကင်အရှင်သခင် အဆင့်သို့ ရောက်ရှိသွားသူတိုင်းသည် ကျင့်ကြံခြင်းအတွက်သာ တစ်ကိုယ်တည်း အောင်းနေလေ့ရှိပြီး ၊ အပြင်ထွက်လေ့မရှိခြင်းမှာ အံ့သြစရာ မဟုတ်တော့ချေ။ သိသိသာသာ ဖြေရှင်းနိုင်သော အန္တရာယ်ရှိသည့် နေရာများကိုပင် ၊ ကောင်းကင်အရှင်သခင် အောက်အဆင့်ရှိ တပည့်များ မထိန်းချုပ်နိုင်တော့သည့် အခြေအနေမှလွဲ၍ သူတို့ကိုယ်တိုင် ဝင်ရောက်ကိုင်တွယ်လေ့ မရှိပေ။

အဓိက အကြောင်းရင်းမှာ ကောင်းကင်နှင့် မြေကြီးကြားရှိ ဝိညာဉ်စွမ်းအားများမှာ မလုံလောက်တော့ခြင်းကြောင့်ပင် ဖြစ်သည်။ အကယ်၍ ဝိညာဉ်စွမ်းအားများသာ လုံလောက်ခဲ့ပါက ၊ သူတို့ ဤကဲ့သို့ ပြုမူနေကြမည် မဟုတ်သလို ၊ မိစ္ဆာလမ်းစဉ်သို့ ရောက်ရှိသွားသူများလည်း နည်းပါးသွားလိမ့်မည်။

“ဒါပေမဲ့ ဆေးဖော်စပ်နည်းထဲမှာ ‘ဝိညာဉ်စစ်ဆေးလုံး’ ဆိုတဲ့ ဆေးလုံးတစ်မျိုး ရှိတာ ငါမှတ်မိတယ် ၊ အဲဒါက ဝိညာဉ်ကျောက်တုံးတွေကို သုံးပြီး ဖော်စပ်ရတာ ၊ ဝိညာဉ်ကျောက်တုံးတွေဆီက စွမ်းအားဆုံးရှုံးမှုကို လျှော့ချပေးနိုင်သလို ပြန်လည်ပြည့်တင်းမှု အရှိန်ကိုလည်း မြှင့်တင်ပေးနိုင်တယ် ၊

အဆင့်မြင့် ဝိညာဉ်ကျောက်တုံး တစ်တုံး ဒါမှမဟုတ် အလယ်အလတ်အဆင့် ဝိညာဉ်ကျောက်တုံး တစ်ထောင်ကနေ ဆေးလုံးတစ်လုံး ဖော်စပ်လို့ ရတယ် ၊ အဲဒါကသာ ပြီးပြည့်စုံတဲ့ အရည်အသွေး ဖြစ်မယ်ဆိုရင် ၊ ဆေးလုံးတစ်လုံးထဲမှာ ရှိတဲ့ ဝိညာဉ်စွမ်းအားက အဆင့်မြင့် ဝိညာဉ်ကျောက်တုံး သုံးတုံးစာနဲ့ ညီမျှတယ် ၊

ဒါပေမဲ့ အဲဒါကို ဖော်စပ်ဖို့ဆိုရင် အနည်းဆုံး ဝိညာဉ်အဆင့် အနိမ့်စားရဲ့ ပြီးပြည့်စုံတဲ့ ဆေးဖော်စပ်မှုအတတ် လိုအပ်တယ် ၊ ငါ့ရဲ့ ဆေးဆရာအဆင့် မြင့်လာရင်တော့ အဲဒါတွေကို အချို့ ပြင်ဆင်ထားရမယ် ”

‘ဝိညာဉ်စစ်ဆေးလုံး’ ၏ အာနိသင်ကို ပြန်လည်သတိရလိုက်သဖြင့် လင်းရန်ယန်မှာ အနည်းငယ် စိတ်သက်သာရာ ရသွားတော့သည်။ ဤသို့ဆိုပါက သူ နေ့စဉ်ရရှိသော ဝိညာဉ်ကျောက်တုံးများဖြင့် သူ၏ ဝိညာဉ်စွမ်းအားကို ၁၅ ကြိမ်တိုင်တိုင် အပြည့်ပြန်ဖြည့်နိုင်မည် ဖြစ်သည်။

သေချာပေါက် ဝိညာဉ်ကျောက်တုံး ပြဿနာကို အမှန်တကယ် ဖြေရှင်းရန်အတွက်မှာမူ ၊ သူ၏ ‘အလိုအလျောက် အားဖြည့်ခြင်း’ အထူးစွမ်းရည်ကိုသာ အားကိုးရမည် ဖြစ်သည်။ ထိုစွမ်းရည်မှာ အဆင့် ၆ သို့ ရောက်ရှိသွားပါက ၊ နေ့စဉ်ရရှိမည့် ဝိညာဉ်ကျောက်တုံး ပမာဏမှာ အနည်းဆုံး အဆင့်မြင့် ဝိညာဉ်ကျောက်တုံး အတုံး ၃၀ ခန့်ရှိ ဝိညာဉ်စွမ်းအားနှင့် ညီမျှလိမ့်မည်။ ထို့အပြင် ဆေးဖော်စပ်မှုအတတ်၏ အကူအညီဖြင့် စုပ်ယူမှုစွမ်းရည်ကို သုံးဆ မြှင့်တင်လိုက်မည်ဆိုပါက ၊ ဆေးလုံးပေါင်း တစ်ရာခန့် ရရှိလိမ့်မည်။ ထိုပမာဏမှာ လင်းရန်ယန် ‘ကောင်းကင်အရှင်သခင် သတ္တမအဆင့်’ သို့ ရောက်ရှိသည်အထိ အသုံးပြုရန် လုံလောက်သည်။

“အထူးစွမ်းရည်တွေက တကယ့် အကောင်းဆုံး လမ်းစဉ်ပဲ ”

“ဟုတ်သားပဲ... မော်ရှန်း ကနေ စီစဉ်ထားတဲ့ ‘အအေးလွန်ကဲတဲ့ အန္တရာယ်ဇုန်’ ခရီးစဉ်က ဒီနေ့ စတင်တော့မှာပဲ ၊ မနက်ဖြန်ဆိုရင် သူတို့ အနောက်ဘက် ဒေသကို ရောက်ကြတော့မယ် ၊ ငါ အမြန်ဆုံး ပြန်မသွားရင်တော့ မှီတော့မှာ မဟုတ်ဘူး ၊ ဒီတစ်ကြိမ်မှာ အထူးစွမ်းရည် ၄၀ ထိ ရဖို့ သေချာနေတာ ၊

အကယ်၍ ငါသာ S-အဆင့် ဒါမှမဟုတ် SS-အဆင့် နဲ့ အောင်မြင်အောင် လုပ်နိုင်မယ်ဆိုရင် ၊ ရရှိမည့် အထူးစွမ်းရည် ပမာဏက ငါ့ရဲ့ စွမ်းအားကို နောက်ထပ် တစ်ဆင့် ထပ်ပြီး မြှင့်တင်ပေးနိုင်လိမ့်မယ် ”

ဤသို့ တွေးမိသည်နှင့် လင်းရန်ယန်မှာ ပြုံးလိုက်တော့သည်။ သူသည် တုံ့ဆိုင်းမနေဘဲ ကောင်းကင်သို့ ပျံတက်လိုက်ပြီး ၊ ကောင်းကင်ဘုံအင်ပါယာဆီသို့ တစ်ဟုန်ထိုး ပျံသန်းသွား၏။

သို့သော်လည်း သူ ထွက်ခွာသွားပြီး မကြာမီမှာပင် ၊ မူလ ဖူဂျီတောင်၏ နက်ရှိုင်းသော အတွင်းပိုင်းမှနေ၍ ၊ မီတာထောင်ချီ ကျယ်ပြောလှသော ဧရာမ မျက်လုံးတစ်စုံမှာ တဖြည်းဖြည်း ပွင့်လာတော့သည်။

တစ်ချိန်တည်းမှာပင် ၊ ‘မူးယစ်နတ်မိမယ်’ စားသောက်ဆိုင်၏ ဧည့်သည်ဆောင်အတွင်း၌... …

“အား... နာလိုက်တာ ဆရာကြီး ၊ ဦးလေး လေး က အခုထိ ဘာလို့ ပြန်မလာသေးတာလဲ ”

ချိုးရှန်း မှာ တစ်ကိုယ်လုံး ပတ်တီးများဖြင့် ကုတင်ပေါ်တွင် လဲလျောင်းရင်း နာကျင်စွာ အော်ဟစ်နေတော့သည်။

“သည်းခံလိုက်စမ်းပါ ၊ လင်းရန်ယန် က မကြာခင် ပြန်ရောက်လာတော့မှာ ”

ဦးလေး ကိုး က မတတ်သာသလို ပြောလိုက်၏။ ယခုအချိန်၌ သူသည်လည်း လင်းရန်ယန် ဘေးကင်းရဲ့လားဆိုသည်ကို စိတ်ပူနေမိသည်မှာ အမှန်ပင်။ အဘယ်ကြောင့်ဆိုသော် ထိုကလေးက သူသည် ‘မသေမျိုးဂိုဏ်း’ ကို သွားရောက် သုတ်သင်မည်ဟု ပြောသွားခဲ့သောကြောင့်ပင်ညဖြစ်၏။ ထိုဂိုဏ်းမှာ ဒုတိယတန်းစား မိစ္ဆာဂိုဏ်းတစ်ခု ဖြစ်၍အန္တရာယ်များလှသည်။

တိုက်ပွဲမှာ မနေ့ညကတည်းက ပြီးဆုံးသွားခဲ့သင့်သော်လည်း ၊ သူ ပုန်းအောင်းနေသော ရင်ခွဲရုံမှာ ရုတ်တရက် ပြိုကျသွားလိမ့်မည်ဟု မည်သူက ထင်ထားပါမည်နည်း။ မြင်းစီးဓားပြတွေကို မျှားခေါ်ရန်အတွက် ရင်ခွဲရုံထဲ၌ တွဲလောင်းဆွဲခြင်း ခံထားရသော ချိုးရှန်း မှာ ၊ ပြိုကျသွားသော အဆောက်အဦးအောက်တွင် ပိမိသွားပြီး သေလုနီးပါး ဖြစ်သွားရတော့သည်။

“မနေ့က ငါက ငါးစာ မလုပ်ရလို့ တော်သေးတာပေါ့ ၊ ငါက ကုတင်အောက်မှာပဲ ပုန်းနေခဲ့တာ ၊ မဟုတ်ရင် ငါလည်း အခုလို ခံစားနေရမှာပဲ ”

ချိုးရှန်း ၏ သနားစဖွယ် အခြေအနေကို ကြည့်ရင်း ဝိန်ချိုက်က ကံကောင်းသည်ဟု မှတ်ချက်ပေးလိုက်တော့သည်။ အားနည်းခြင်းမှာလည်း တစ်ခါတစ်ရံ အကျိုးကျေးဇူး ရှိတတ်၏။ သို့သော်လည်း အကယ်၍ သူသာ ထိုနေရာ၌ ပိမိခဲ့ပါက ၊ သူသည် သေချာပေါက် သေဆုံးသွားလိမ့်မည်။