မကျေနပ်မှုများ စတင်လာခြင်း
Vol. 10 Ch. 100
မီတာတစ်ရာခန့် ရှည်လျားသော ပျံသန်းသည့် သင်္ဘောကြီးတစ်စင်းသည် နှင်းတောင်တန်းကြီးဆီသို့ အရှိန်အဟုန်ဖြင့် ဦးတည်နေပြီးနောက် ၊ နောက်ဆုံးတွင် ရေခဲပြင်ရေနှင့် မြက်ခင်းပြင် ထိစပ်နေသော နယ်စပ်၌ ရပ်တန့်သွားတော့သည်။
“ဝုန်း... ”
ဟင်းလင်းပြင် တုန်ခါမှုတစ်ခုနှင့်အတူ ထိုပျံသန်းသည့် သင်္ဘောကြီးမှာ ယင်းနေရာမှ ချက်ချင်းပင် ပျောက်ကွယ်သွား၏။ ထို့နောက်တွင်မူ ကောင်းကင်ယံမှနေ၍ လောကီအာရုံများ ကင်းစင်နေသည့်အလား ပုံရိပ်ရှိသော လူအိုကြီးတစ်ဦးသည် အဖိုးတန်ဓားများကို လွယ်ထားကြသည့် တာအိုဆရာ ငါးဦးနှင့်အတူ ဆင်းသက်လာတော့သည်။
ထိုတာအိုဆရာ ငါးဦးအနက် လေးဦးမှာ အသက် ခုနစ်ဆယ် သို့မဟုတ် ရှစ်ဆယ်ခန့်ရှိပုံရသော်လည်း ၊ တစ်ဦးမှာမူ အသက် နှစ်ဆယ်အရွယ်ခန့်သာ ရှိသေးသည်။ သေချာပေါက် သူသည် အမှန်တကယ် အသက်နှစ်ဆယ် မဟုတ်ပေ။ သူ၏ အသက်မှာ လေးဆယ့်နှစ်နှစ် ရှိနေပြီ ဖြစ်၏။ သို့သော် မြေပြင်အရှင်သခင် အဆင့်ရှိသူတစ်ဦးမှာ သက်တမ်း နှစ်နှစ်ရာခန့် ရှည်ကြာနိုင်သည်ဖြစ်ရာ ၊ လေးဆယ့်နှစ်နှစ်အရွယ်တွင် သာမန်လူသားတို့၏ အသက်နှစ်ဆယ်အရွယ်ကဲ့သို့ နုပျိုနေခြင်းမှာ မဆန်းချေ။
၎င်းမှာ ရှူရှန်း ဓားဂိုဏ်း၏ နုပျိုမှုကို ထိန်းသိမ်းသော လျှို့ဝှက်အတတ်ပင် ဖြစ်သည်။ အလားတူ တာအိုမှော်အတတ်များမှာ ဂိုဏ်းတိုင်းတွင် ရှိကြ၏။ မော်ရှန်း တပည့်များသည် များသောအားဖြင့် ရုပ်ရည်အလှအပကို အလေးမထားကြသဖြင့် ၊ အသက်လေးဆယ်ကျော်မှသာ ရုပ်ရည်အိုမင်းမှုကို ရပ်တန့်ရန် ရွေးချယ်တတ်ကြသည်။
“ယွင်ရှောင်း … ဒီတစ်ခေါက်မှာတော့ မင်းရဲ့ ဦးလေးတူတွေ ၊ အစ်ကိုတူတွေနဲ့ အမြဲတစေ နီးနီးကပ်ကပ် နေရမယ် ၊ ဘယ်ကိုမှ တစ်ယောက်တည်း လျှောက်မသွားနဲ့ ”
ရှူရှန်းဓားဂိုဏ်း၏ အကြီးအကဲကြီး ‘ကောင်းကင်အရှင်သခင် ချင်းယွင်’ က တည်ငြိမ်စွာ မှာကြားလိုက်၏။
“နားလည်ပါပြီ အကြီးအကဲကြီး ”
ယွင်ရှောင်ဟု ခေါ်သော လူငယ်တာအိုဆရာက မောက်မာသော လေသံဖြင့် ပြန်လည်ဖြေကြားလိုက်၏။ တစ်ချိန်တည်းမှာပင် သူသည် သူ၏ပတ်ဝန်းကျင်ရှိ ဦးလေးတူနှင့် အစ်ကိုတူ ဆိုသူများကို အထင်သေးစွာ ကြည့်လိုက်မိတော့သည်။
ထိုသူများမှာ အသက် တစ်ရာ့ခုနစ်ဆယ် သို့မဟုတ် တစ်ရာ့ရှစ်ဆယ်ခန့် ရှိနေကြပြီဖြစ်သော်လည်း မြေပြင်အရှင်သခင် ဒသမအဆင့်သို့သာ ရောက်ရှိနေကြခြင်း ဖြစ်သည်။ သူကမူ အသက် လေးဆယ့်နှစ်နှစ်တွင်ပင် မြေပြင်အရှင်သခင် အဋ္ဌမအဆင့်သို့ ရောက်ရှိနေပြီ ဖြစ်၏။ သူ၏ ပါရမီမှာ ထိုသူများကို လုံးဝ လွှမ်းမိုးထားသည်။
ကျင့်ကြံခြင်းလောကတစ်ခုလုံးတွင်ပင် သူ့ကို ပါရမီရှင်အဆင့်ဟု သတ်မှတ်နိုင်သည်။ ထို့ပြင် သူ၏ ဓားဝိညာဉ်ခန္ဓာ ကြောင့် သူ၏ တိုက်ခိုက်ရေးစွမ်းရည်မှာ သာမန်ကျင့်ကြံသူများထက် များစွာ ပိုမိုအားကောင်းလှ၏။ သာမန် မြေပြင်အရှင်သခင် ဒသမအဆင့် ရှိသူတစ်ဦးပင်လျှင် သူ၏ ပြိုင်ဘက် မဟုတ်ချေ။
ထို့ကြောင့်ပင် ရှူရှန်းဓားဂိုဏ်းသည် ရာစုနှစ်ပေါင်းများစွာအတွင်း တွေ့ရခဲသော ဤပါရမီရှင်ကို ကာကွယ်ရန်အတွက် ကောင်းကင်အရှင်သခင် အဋ္ဌမအဆင့်ရှိသော ချင်းယွင်ကို ဤခရီးစဉ်အား ကြီးကြပ်ရန် စေလွှတ်ခဲ့ခြင်း ဖြစ်၏။
“ဝုန်း... ”
ထိုစဉ်မှာပင် အဝေးမှနေ၍ ပျံသန်းသည့် သင်္ဘောအချို့ ရောက်ရှိလာတော့သည်။ အားလုံးက လှမ်းကြည့်လိုက်ကြ၏။ ဤသင်္ဘော သုံးစင်းမှာ... ကျန့်ယိဂိုဏ်း ၊ လုံဟူတောင် နှင့် ချွမ်ကျန်းဂိုဏ်း တို့၏ သင်္ဘောများပင် ဖြစ်တော့သည်။
“ဝုန်း... ”
“ဝုန်း... ”
“ဝုန်း... ”
သင်္ဘော သုံးစင်းမှာ ဖြည်းညှင်းစွာ ဆင်းသက်လာသည်နှင့်အမျှ ၊ ဂိုဏ်းအသီးသီးမှ ကောင်းကင်အရှင်သခင်များသည်လည်း သူတို့၏ ပညာရှင်ကြီးများနှင့်အတူ ဆင်းသက်လာကြ၏။
ကျန့်ယိဂိုဏ်းမှ ကောင်းကင်အရှင်သခင် ရွှင်ယန် မှာ ဆဋ္ဌမအဆင့် ၊ လုံဟူတောင်မှ ကောင်းကင်အရှင်သခင် ကျန့်တောက်ရန် မှာ သတ္တမအဆင့် နှင့် ချွမ်ကျန်းဂိုဏ်းမှ ကောင်းကင်အရှင်သခင် ချုံယန် မှာ ဆဋ္ဌမအဆင့်တို့ အသီးသီး ဖြစ်ကြ၏။
“မိတ်ဆွေတို့... မတွေ့ရတာ ကြာပြီ ၊ အားလုံးပဲ နေကောင်းကြရဲ့လား ”
ထိုမိတ်ဆွေ သုံးဦးကို မြင်လိုက်ရသောအခါ ၊ ကောင်းကင်အရှင်သခင် ချင်းယွင်က ပြုံးလျက် လက်အုပ်ချီ နှုတ်ဆက်လိုက်တော့သည်။
“ဒီတစ်ခေါက်မှာ မိတ်ဆွေ ချင်းယွင် ကိုယ်တိုင် ရောက်လာလိမ့်မယ်လို့ မထင်ထားဘူး ၊ ဒါက တကယ့်ကို တွေ့ရခဲတဲ့ ကိစ္စပဲ ”
“ဟား... ဟား... ရှူရှန်းဓားဂိုဏ်းမှာ ‘ယွင်ရှောင်’ လို့ ခေါ်တဲ့ ပါရမီရှင်တစ်ယောက် ပေါ်ထွက်လာတယ်လို့ ကြားတယ် ၊ ဒီလူငယ်လေးက သူပဲ ဖြစ်ရမယ် ၊ ဟုတ်ပါသလား ”
“တကယ်ပဲ... သူ့ရဲ့ ပါရမီက အံ့မခန်းပါလား ၊ အသက် လေးဆယ်မှာတင် မြေပြင်အရှင်သခင် အဋ္ဌမအဆင့်ကို ရောက်နေပြီ ၊ ပြီးတော့ ဒုတိယအဆင့် ဓားဝိညာဉ်ခန္ဓာကိုလည်း ပိုင်ဆိုင်ထားသေးတယ် ၊ တကယ်ကို လေးစားစရာပဲ ”
ကောင်းကင်အရှင်သခင် သုံးဦးစလုံးမှာ ချင်းယွင်ကို မြင်လိုက်ရသဖြင့် မှင်တက်သွားကြပြီးနောက် ၊ သူ၏ ဘေးနားရှိ မောက်မာသော လူငယ်လေးကို ဝိုင်းဝန်း ချီးကျူးလိုက်ကြ၏။
“ဟား... ဟား... မိတ်ဆွေတို့ကလည်း မြှောက်ပင့်လွန်းနေပါပြီ ၊ ဒီလိုတွေ ဆက်ပြောနေရင်တော့ ဒီကောင်လေး ဘဝင်မြင့်သွားပါဦးမယ် ၊ သူ့ရဲ့ ပါရမီက အသင့်အတင့် ရှိတယ်ဆိုပေမဲ့ ၊ အတွေ့အကြုံတွေ အများကြီး လိုအပ်နေပါသေးတယ် ၊
အဲဒါကြောင့်ပဲ ဒီတစ်ခေါက်မှာ သူ့ကို ခေါ်လာခဲ့တာပါ ၊ သူ့ရဲ့ စွမ်းအားက မြေပြင်အရှင်သခင်ရဲ့ အမြင့်ဆုံးအဆင့်မှာ ရှိနေပြီဖြစ်လို့ ၊ ကျွန်တော်တို့အတွက် ဝန်ထုပ်ဝန်ပိုးတော့ ဖြစ်မှာ မဟုတ်ပါဘူး ”
ချင်းယွင်က မြှောက်ပင့်ခံရသည်ဟု ပြောဆိုနေသော်လည်း ၊ ယွင်ရှောင်ကို ထပ်မံ၍ပင် ကြွားဝါလိုက်သေးသည်။
“ဘိုးဘေးကြီး ပြောတာ မှန်ပါတယ် ၊ တပည့်အနေနဲ့ အတွေ့အကြုံတွေ အများကြီး လိုအပ်ပါသေးတယ် ၊ ရှစ်နှစ်အတွင်းမှာ မြေပြင်အရှင်သခင် ဒသမအဆင့်ကို ရောက်အောင် ကျွန်တော် ကြိုးစားသွားမှာပါ ၊ ဒါက နည်းနည်းတော့ ခက်ခဲလိမ့်မယ် ဆိုပေမဲ့ ၊ ကျွန်တော့်မှာ ယုံကြည်မှု အပြည့် ရှိပါတယ် ”
ယွင်ရှောင်ကလည်း အလျင်အမြန်ပင် နှိမ့်ချသော အမူအရာ ဖမ်းလိုက်၏။ ဤစကားများကို ကြားလိုက်ရသောအခါ ကောင်းကင်အရှင်သခင် သုံးဦးစလုံး၏ မျက်နှာမှာ တစ်ချက် လှုပ်ခတ်သွားရတော့သည်။
ကဲ... ကဲ... ခင်ဗျားတို့ ဘိုးဘေးနဲ့ မြေး တစ်သိုက်ကတော့ တကယ်ကို ဇာတ်လမ်းခင်းနေကြတာပဲ……
“ဪ... ဒါနဲ့ မောက်ရှန်းမှာလည်း ပါရမီရှင်တစ်ယောက် ပေါ်ထွက်လာတယ်လို့ ကျွန်တော် ကြားမိတယ် ၊ အသက် တစ်ဆယ့်ရှစ်နှစ်မှာတင် မြေပြင်အရှင်သခင် ပထမအဆင့်ကို ရောက်နေပြီးတော့ ၊ ဒုတိယအဆင့် မီးဝိညာဉ်ခန္ဓာကိုပါ ပိုင်ဆိုင်ထားတယ်ဆိုလား ၊ တကယ့်ကို ထူးချွန်တဲ့ ပါရမီရှင်ပဲ ”
ထိုစဉ် ကျန့်တောက်ရန်မှာ ဆက်လက်ကြည့်မနေနိုင်တော့ဘဲ ၊ အချက်ကျကျပင် စကားဆိုလိုက်၏။ ဤစကား ထွက်လာသည်နှင့်တစ်ပြိုင်နက် ကျန်ရှိနေသော ကောင်းကင်အရှင်သခင် နှစ်ဦးစလုံးမှာလည်း အိပ်ချင်ပြေသွားကြတော့သည်။
“ကျွန်တော်လည်း ကြားပါတယ် ၊ ဒါပေမဲ့ ကျွန်တော့်ဆီက သတင်းက ပိုပြီး နောက်ကျတယ် ၊ သူက မြေပြင်အရှင်သခင် ပထမအဆင့်တင် မကဘူး ၊ အခုဆိုရင် တတိယအဆင့်ကိုတောင် ရောက်နေပြီတဲ့ ၊
မော်ရှန်းရဲ့ နံပါတ်တစ် တာအိုမှော်အတတ် ပါရမီရှင်ဖြစ်တဲ့ ‘ယိမေ’ နဲ့ ပူးပေါင်းပြီးတော့ ၊ မြေပြင်အရှင်သခင် အဋ္ဌမအဆင့်ရှိတဲ့ မိစ္ဆာကျင့်ကြံသူကိုတောင် သတ်ဖြတ်နိုင်ခဲ့တယ်လို့ ပြောကြတယ် ၊ တကယ့်ကို လူငယ်သူရဲကောင်းပဲ ”
ချွမ်ကျန်းဂိုဏ်းမှ ကောင်းကင်အရှင်သခင် အိုကြီး ချုံယန်သည်လည်း သူ၏ ဗိုက်ကို သပ်ရင်း စိတ်လှုပ်ရှားစွာဖြင့် ပြောလိုက်တော့သည်။
ဤစကားများကို ကြားလိုက်ရသောအခါ ယွင်ရှောင်၏ မျက်နှာမှာ ချက်ချင်းပင် မဲမှောင်သွား၏။ သူ အသက် တစ်ဆယ့်ရှစ်နှစ်အရွယ်တွင် မြေပြင်အရှင်သခင် အဆင့်သို့ပင် မရောက်ရှိသေးချေ။ သူ၏ ဓားဝိညာဉ်ခန္ဓာမှာလည်း ပထမအဆင့်တွင်သာ ရှိနေခဲ့ခြင်း ဖြစ်သည်။
လင်းရန်ယန်မှာမူ မြေပြင်အရှင်သခင် အဋ္ဌမအဆင့်ရှိသော မိစ္ဆာကိုပင် ပူးပေါင်းသတ်ဖြတ်နိုင်ခဲ့သည် ဟူသော သတင်း၏ ရိုက်ချက်မှာ အလွန်ပင် ပြင်းထန်လှသည်။
“ဟုတ်ပါရဲ့... မော်ရှန်းရဲ့ ပါရမီရှင်က တကယ်ကို အစွမ်းထက်ပါတယ် ၊ လင်းရန်ယန်ကို ခဏထားလိုက်ဦး ၊ ရှီးကျန့်ကို ကြည့်ဦးလေ ၊ သူက အသက် ခြောက်ဆယ်မှာတင် ဒသမအဆင့်ကို ရောက်နေပြီး ၊ ဒုတိယအဆင့် မိုးကြိုးဝိညာဉ်ခန္ဓာကို ပိုင်ဆိုင်ထားတာ ၊ ဒါက တတိယအဆင့် ဓားဝိညာဉ်ခန္ဓာထက်တောင် ပိုပြီး အစွမ်းထက်နေသေးတယ် ၊
ပြီးတော့ လင်းကျို လည်း ရှိသေးတယ် ၊ သူက ကောင်းကင်အဆင့် တာအိုမှော်အတတ်တွေကို ကျွမ်းကျင်ထားပြီး ၊ တစ်မျိုးတည်းတောင် မဟုတ်ဘူးလို့ ပြောကြတယ် ၊ ကျွန်တော် တွေးနေမိတာက... ဒီကလေး ယွင်ရှောင်ကော မြေပြင်အဆင့် အမြင့်ဆုံး တာအိုမှော်အတတ် နှစ်မျိုးလောက်ကို ကျွမ်းကျင်နေပြီလား ဆိုတာပါပဲ ၊
ဪ... အောင်းထျန်းလုံလည်း ရှိသေးတာပဲ ၊ ဒီတစ်ခေါက်မှာ မော်ရှန်းရဲ့ ပညာရှင်ကြီး အားလုံးကို သူ ဦးဆောင်လာမယ်လို့ ကြားတယ် ၊ သူက အသက် ငါးဆယ် မပြည့်သေးခင်မှာတင် ဒသမအဆင့်ကို ရောက်နေပြီ ၊
ဒီကလေး ယွင်ရှောင်ကတော့ အသက် ငါးဆယ်မှာတောင် ဒသမအဆင့်ကို ရောက်နိုင်ပါ့မလား မသိဘူးနော် ၊ မော်ရှန်းမှာ ဘာတွေ ဖြစ်နေလဲ မသိပါဘူး ၊ ပါရမီရှင်တွေ ဒီလောက်တောင် တစ်ပြိုင်နက်တည်း ထွက်ပေါ်လာရတာ”
အမြဲတမ်း ပြုံးနေတတ်သော ကျန့်ယိဂိုဏ်းမှ ကောင်းကင်အရှင်သခင် ရွှင်ယန်မှာ ပို၍ပင် ရက်စက်လှ၏။ သူသည် ဓားဝိညာဉ်ခန္ဓာနှင့် မိုးကြိုးဝိညာဉ်ခန္ဓာကို တိုက်ရိုက် နှိုင်းယှဉ်လိုက်ခြင်းဖြင့် ၊ ယွင်ရှောင်၏ မျက်နှာကို ဖြတ်ရိုက်လိုက်သကဲ့သို့ ဖြစ်သွားတော့သည်။
၎င်းတင်မကသေးဘဲ ၊ အောင်းထျန်းလုံ၏ ကျင့်ကြံခြင်း အရှိန်အဟုန်ကိုပါ ထုတ်ဖော်ပြောဆို၍ ထပ်မံ တိုက်ခိုက်လိုက်သေးသည်။ ထို့နောက် လင်းကျို (ဦးလေးကျို) ၏ ပါရမီကိုပါ ဆွဲထည့်လိုက်၏။ ဤသည်မှာ လုံးဝကို အမှုန့်ချေလိုက်ခြင်း ပင် ဖြစ်တော့သည်။
ချက်ချင်းဆိုသလိုပင် ယွင်ရှောင်၏ မျက်နှာမှာ ဒေါသကြောင့် ခရမ်းရောင် သန်းသွားတော့သည်။
ကောင်းကင်အရှင်သခင် ချင်းယွင်သည်လည်း သူ၏ နှုတ်ခမ်းကို တွန့်ချိုးလိုက်မိ၏။ သူသည် သူ၏ တပည့်ကို အနည်းငယ်မျှသာ ကြွားဝါလိုက်ခြင်း ဖြစ်သော်လည်း ၊ အဘယ်ကြောင့် ဤမျှအထိ ဝိုင်းဝန်း တိုက်ခိုက်ခြင်း ခံနေရသနည်းကို သူ နားမလည်နိုင်တော့ချေ။
“လက်ရှိမှာ ပါရမီရှင် ဖြစ်နေတာက ဘာမှ မဟုတ်ပါဘူး ၊
အရွယ်ရောက်လာတဲ့ ပါရမီရှင်မှသာ တကယ့် ပါရမီရှင်လို့ ခေါ်လို့ရမှာပါ ၊ အကယ်၍ လမ်းခုလတ်မှာ သေသွားခဲ့ရင်တော့ ပါရမီရှင် မဟုတ်တော့ပါဘူး ၊ ဒီ အအေးလွန်ကဲတဲ့ အန္တရာယ်ဇုန်က အလွန်အန္တရာယ် များလှပါတယ် ၊ အကယ်၍ မတော်တဆ သေသွားခဲ့ရင်တော့ နှမြောစရာပဲ ”
ယွင်ရှောင်က မနေနိုင်တော့ဘဲ ပြန်လည် တုံ့ပြန်လိုက်၏။ သူ၏ စကား ထွက်လာသည်နှင့်တစ်ပြိုင်နက် ၊ ပတ်ဝန်းကျင်ရှိ ကောင်းကင်အရှင်သခင်ကြီးများ အားလုံးမှာ မျက်မှောင်ကြုတ်သွားကြတော့သည်။
ချင်းယွင်ကိုယ်တိုင်ပင်လျှင် မကျေမနပ် ဖြစ်သွားရသည်။ တစ်ပါးသူကို အရွယ်မရောက်သေးဘူးဟု ပြောဆိုနေသော မင်းကော... အရွယ်ရောက်နေပြီလား။ ထို့ပြင် ဤစကားများကို နားထောင်ရသည်မှာ မိစ္ဆာကျင့်ကြံသူတစ်ဦး၏ ပြောစကားနှင့် မည်သို့မျှ မခြားနားလှပေ။
သို့သော်လည်း ကောင်းကင်အရှင်သခင်ကြီးများမှာ အသက်ရာကျော် ရှိနေကြပြီ ဖြစ်သည်။ သူတို့အနေဖြင့် ဤစကားတစ်ခွန်းတည်းအတွက်နှင့် လူငယ်တစ်ဦးကို ပြန်လည် ကြိမ်းမောင်းနေပါက ၊ သူတို့ကို စိတ်ကျဉ်းမြောင်းသူများဟု အထင်ခံရလိမ့်မည်။
“ဝုန်း... ”
ထိုစဉ် အဝေးမှနေ၍ ဟိန်းဟောက်သံတစ်ခု ထွက်ပေါ်လာတော့သည်။
“ဟင်... မော်ရှန်းက လူတွေ ပျံသန်းပြီး လာနေကြတာလား ”
ဟိန်းဟောက်သံကို ကြားလိုက်ရသဖြင့် အားလုံးမှာ မှင်တက်သွားကြပြီးနောက် ၊ အသံလာရာဆီသို့ လှမ်းကြည့်လိုက်ကြတော့သည်။