မျက်မှောင်ကြုတ်မိခြင်း

အမှန်စင်စစ် ပွင့်ပွင့်လင်းလင်း ပြောရလျှင် သွေးနတ်ဘုရား နန်းတော် ၏ အင်အားမှာ တာအိုဂိုဏ်း တစ်ခုလုံးကို အမြစ်ပြတ် ချေမှုန်းနိုင်စွမ်း မရှိသေးချေ။ အကယ်၍ သွေးနတ်ဘုရားများထဲမှ တစ်ဦးဦးသာ ဖုတ်ကောင်ဧကရာဇ် အဆင့်သို့ ပေါက်ကွဲထွက်အောင် ကျော်ဖြတ်နိုင်ခဲ့မည်ဆိုပါက ၊ တာအိုဂိုဏ်း၏ ကံကြမ္မာမှာ သွေးနတ်ဘုရား နန်းတော်၏ သွေးချောင်းစီး သတ်ဖြတ်ခြင်းကို ခံရမည်မှာ မြေကြီးလက်ခတ်မလွဲပင် ဖြစ်သည်။

“ဖုတ်ကောင်တွေတင် မကပါဘူး ၊ တာအိုဂိုဏ်းနဲ့ စီးပွားရေးလုပ်တဲ့သူတွေ အများကြီး ရှိသေးတယ် ၊ နောက်ကျရင် မင်း တဖြည်းဖြည်း သိလာလိမ့်မယ် ”

လင်းရန်ယန် ၏ အံ့သြနေသော မျက်နှာကို ကြည့်ရင်း တတိယအကြီးအကဲက ကျေနပ်စွာ ပြုံးလိုက်ပြီးနောက် ၊ လက်ဟန်အချို့ကို ဆက်တိုက် ဖော်ဆောင်လိုက်၏။

“ဂျိန်း... ”

သင်္ဘောတံခါးမှာ ဖြည်းညှင်းစွာ ပိတ်သွားပြီးနောက် ၊ ပျံသန်းသည့် သင်္ဘောကြီးမှာ အပေါ်သို့ ဖြည်းဖြည်းချင်း မြင့်တက်လာ၏။

“ဝူး... ”

နောက်တစ်ခဏ၌ စွမ်းအင်လှိုင်းတစ်ခုနှင့်အတူ ထိုသင်္ဘောကြီးမှာ အဝေးသို့ တဟုန်ထိုး ပျံသန်းသွားတော့သည်။ ၎င်း၏ အရှိန်အဟုန်မှာ အလွန်ပင် မြန်ဆန်လှသဖြင့် တစ်နာရီလျှင် ကီလိုမီတာ နှစ်ထောင်ကျော်အထိပင် ရှိသည်။ ဤအရှိန်အတိုင်းဆိုပါက ဟိမဝန္တာ တောင်တန်းကြီး၏ ခြေရင်းသို့ ရောက်ရှိရန်မှာ အချိန်များစွာ မကြာနိုင်ပေ။

ကံမကောင်းစွာဖြင့် ကိစ္စရပ်များမှာ ထိုမျှလောက် မလွယ်ကူလှချေ။ ထိုသို့သာ လွယ်ကူနေပါက သူတို့အဖွဲ့အနေဖြင့် အလယ်ပိုင်းဒေသမှ ဤနေရာအထိ တစ်ကူးတစ်က လာနေစရာ အကြောင်းမရှိပေ။

အဖွဲ့သားများမှာ ကီလိုမီတာ ခုနစ်ဆယ် ၊ ရှစ်ဆယ်ခန့်သာ ပျံသန်းရသေးသော်လည်း ၊ အောက်ဘက် မြေပြင်၌ အရပ်မျက်နှာအနှံ့မှ စုဝေးနေကြသော နှင်းနတ်ဆိုး အုပ်စုကြီးများကို မြင်တွေ့လိုက်ရတော့သည်။ ဤနှင်းနတ်ဆိုးများမှာ ကမ္ဘာပေါ်ရှိ မည်သည့် သတ္တဝါနှင့်မျှ မတူညီကြသော်လည်း ၊ တစ်ကောင်နှင့်တစ်ကောင်မှာမူ အလွန်ပင် ဆင်တူကြ၏။

သူတို့တွင် အမွှေးအမျှင်များဖြင့် ဖုံးလွှမ်းထားသော အရေပြားများ ရှိကြသော်လည်း ၊ ရုပ်ရည်သွင်ပြင်မှာမူ တစ်ခုနှင့်တစ်ခု မတူညီဘဲ အလွန်ပင် ကြောက်မက်ဖွယ်ကောင်းလှသည်။ သူတို့၏ အရွယ်အစားမှာလည်း တစ်မီတာ ၊ နှစ်မီတာမှသည် မီတာဆယ်ဂဏန်းအထိ မြင့်မားကြ၏။

သေချာပေါက် မီတာဆယ်ဂဏန်းအထိ မြင့်သော သတ္တဝါများမှာ မိစ္ဆာသားရဲကြီး အဆင့်ရှိသော နှင်းနတ်ဆိုးများပင် ဖြစ်သည်။ သို့သော်လည်း ပျံသန်းသည့် သင်္ဘော၏ အရှိန်မှာ သာမန် ကောင်းကင်အရှင်သခင်များ၏ အရှိန်ထက်ပင် ပိုမိုမြန်ဆန်နေသည်ဖြစ်ရာ ၊ ထိုနှင်းနတ်ဆိုးကြီးများမှာ သင်္ဘောကို မြင်သည်နှင့် ရူးသွပ်စွာ လိုက်လံတိုက်ခိုက်ရန် ကြိုးပမ်းကြသော်လည်း ၊ ခဏအတွင်းမှာပင် နောက်ကွယ်၌ ကျန်ရစ်ခဲ့ကြ၏။

“ဒီနှင်းနတ်ဆိုးတွေရဲ့ အရေအတွက်က တကယ်ကို အံ့သြစရာပဲ ၊ ”

လင်းရန်ယန်သည် အောက်ဘက်သို့ ငုံ့ကြည့်ရင်း မျက်မှောင်ကြုတ်ကာ ဆိုလိုက်သည်။

“ဟုတ်တယ်... ပြီးတော့ ဟိမဝန္တာ တောင်တန်းနဲ့ နီးကပ်လာလေလေ ၊ ဒီနှင်းနတ်ဆိုးတွေက ပိုပြီးတော့ အစွမ်းထက်လာလေလေပဲ ”

အောင်းထျန်းလုံ သည်လည်း မျက်မှောင်ကြုတ်ကာ လေးနက်စွာ ဆိုလိုက်၏။

“ကြည့်ရတာ နှင်းမိစ္ဆာဘုရင် နဲ့ တွေ့ရဖို့က သိပ်မဝေးတော့ဘူး ထင်တယ် ”

“ပတ်ဝန်းကျင်က လေပြင်းတွေနဲ့ နှင်းတွေကလည်း ပိုပြီး ပြင်းထန်လာပြီ ၊ မကြာခင်မှာ သင်္ဘောကို ရပ်ပြီး ခြေကျင်ခရီး ဆက်ရလိမ့်မယ် ထင်တယ် ”

သူ၏ ဘေးနားရှိ ပညာရှင်ကြီးများကလည်း လေးနက်သော မျက်နှာထားများဖြင့် ဆိုလိုက်ကြတော့သည်။

“ဝူး... ”

မှန်ပေသည်။ နောက်ထပ် ကီလိုမီတာ အနည်းငယ်မျှ ဆက်လက် ပျံသန်းပြီးနောက် ၊ ရည်မှန်းထားသော နေရာသို့ ရောက်ရန် ကီလိုမီတာ နှစ်ဆယ်ခန့်သာ အလို၌ ပျံသန်းသည့် သင်္ဘောကြီးမှာ ဖြည်းညှင်းစွာ ရပ်တန့်သွား၏။

“အရှေ့ဘက်က လေနှင်းမုန်တိုင်းက သိပ်ပြီး ပြင်းထန်လွန်းတယ် ၊ ပြီးတော့ နှင်းမိစ္ဆာဘုရင် ပေါ်လာနိုင်တဲ့ အလားအလာလည်း ရှိနေတယ် ၊ ဒီနေရာကနေစပြီး ခြေကျင်ပဲ သွားလို့ ရတော့မယ် ”

တတိယအကြီးအကဲသည် ထိန်းချုပ်ခန်းထဲမှနေ၍ လေးနက်သော အမူအရာဖြင့် ထွက်လာတော့သည်။

“ကောင်းပါပြီ... သွားကြတာပေါ့ ”

လင်းရန်ယန်နှင့် အခြားသူများကလည်း ခေါင်းငြိမ့် ထောက်ခံလိုက်ကြပြီးနောက် ၊ အားလုံးမှာ သင်္ဘောပေါ်မှ ဆင်းသက်လိုက်ကြ၏။

ပြင်ပသို့ ရောက်ရှိသွားသည်နှင့်တစ်ပြိုင်နက် ၊ ထောင်တက်နေသော နှင်းတောင်ကြီးများမှာ လူတိုင်း၏ မျက်စိရှေ့မှောက်၌ ပေါ်ထွက်လာတော့သည်။ သူတို့၏ ပတ်ဝန်းကျင်၌မူ လေပြင်းများနှင့်အတူ နှင်းများမှာ ရူးသွပ်စွာ ဝေ့ဝဲတိုက်ခိုက်နေကြ၏။ လေနှင်းမုန်တိုင်းမှာ အလွန်ပင် ပြင်းထန်လှသဖြင့် မြေပြင်အရှင်သခင် သတ္တမအဆင့် သို့မဟုတ် အဋ္ဌမအဆင့်ရှိသော ပညာရှင်ကြီးအချို့မှာပင် ခြေဖျားခိုင်အောင် ရပ်တည်ရန် ခက်ခဲနေကြတော့သည်။

“ဝုန်း... ဝုန်း... ”

ဤအခိုက်အတန့်၌ ရှီးကျန့် ၏ ပုံရိပ်သည်လည်း မိုးကြိုးလှိုင်းများကို စီးနင်းလျက် ဆင်းသက်၏။ သူ၏ ခန္ဓာကိုယ်တစ်ခုလုံးကို ကောင်းကင်ဘုံ မိုးကြိုးစွမ်းအားဖြင့် ကာကွယ်ထားသည်ဖြစ်ရာ ၊ ထိုမျှလောက် ပြင်းထန်သော လေနှင်းမုန်တိုင်းများအကြား ပျံသန်းလာခဲ့သော်လည်း သူ၏မျက်နှာ၌ ပင်ပန်းနွမ်းနယ်သော အမူအရာ တစ်စုံတစ်ရာမျှ မရှိချေ။

“ဒီလေနှင်းတွေထဲမှာ ရေခဲစွမ်းအား ရဲ့ အငွေ့အသက်တွေ ပါနေသလိုပဲ ”

စတုတ္ထအဆင့်ရှိ ရေခဲဝိညာဉ်ခန္ဓာ ကို ပိုင်ဆိုင်ထားသော လင်းရန်ယန်မှာမူ မျက်ခုံးတစ်ချက် ပင့်လိုက်မိတော့သည်။ ပတ်ဝန်းကျင်ရှိ လေနှင်းများထဲမှနေ၍ ရေခဲစွမ်းအားများကို သူ ချက်ချင်းပင် အာရုံခံမိလိုက်၏။

ဤသည်မှာ ဤလေနှင်းမုန်တိုင်းများ၏ ရင်းမြစ်မှာ ရေခဲဝိညာဉ်ခန္ဓာ ပိုင်ဆိုင်ထားသော မိစ္ဆာဘုရင် တစ်ကောင် သို့မဟုတ် အများအပြား ရှိနေနိုင်သည်ဟု အဓိပ္ပာယ်ရသည်။ အကယ်၍ ၎င်းမှာ တစ်ကောင်တည်းသာ ဖြစ်ခဲ့မည်ဆိုပါက ၊ ၎င်း၏ စွမ်းအားမှာ ကီလိုမီတာ ရာချီသော နယ်မြေတစ်ခုလုံးကို ရေခဲပြင်အဖြစ် ပြောင်းလဲနိုင်သည်အထိ ပြင်းထန်နေခြင်းဖြစ်ရာ လင်းရန်ယန်ကို မျက်မှောင်ကြုတ်သွား၏။

ထိုမိစ္ဆာ၏ စွမ်းအားမှာ သေချာပေါက် ကောင်းကင်အရှင်သခင် ဒသမအဆင့်ထက်ပင် သာလွန်နေနိုင်သည်။ ၎င်းမှာ မိစ္ဆာဧကရာဇ် အဆင့်ပင် ဖြစ်နေ၏။ အကယ်၍ ထိုသို့သာ အမှန်တကယ် ဖြစ်ခဲ့မည်ဆိုပါက ၊ လက်ရှိ ရောက်ရှိနေသူ အားလုံးမှာ ချေမှုန်းခံရမည်မှာ သေချာလှသည်။

သေချာပေါက် အခြားသော အလားအလာတစ်ခုလည်း ရှိနေ၏။ ၎င်းမှာ ထိုရင်းမြစ်နေရာ၌ ကြီးကျယ်သော မန္တန်အစီအရင်တစ်ခု ရှိနေခြင်း သို့မဟုတ် ရေခဲအမျိုးအစား ကောင်းကင်နှင့် မြေကြီး ရတနာ တစ်ခု ရှိနေခြင်းပင် ဖြစ်သည်။ သို့မဟုတ်လျှင်လည်း ၎င်းမှာ တကယ်ပင် ရေခဲနှင့် နှင်းဆိုင်ရာ လျှို့ဝှက်နယ်မြေတစ်ခု ဖြစ်နေနိုင်၏။

အတိတ်ကာလက စစ်မှန်သော ဘုရင်အဆင့်သို့ ရောက်ရန် ခြေတစ်လှမ်းသာ လိုတော့သော ပညာရှင်ကြီးပင်လျှင် သေဆုံးခဲ့ရသည်ကို ထည့်သွင်းစဉ်းစားပါက ၊ ၎င်းမှာ လျှို့ဝှက်နယ်မြေတစ်ခု ဖြစ်နိုင်ခြေ ပိုများလှသည်။

“အားလုံးပဲ... ဒီမြင့်မားတဲ့ တောင်တန်းကြီး ငါးခုကို ကျော်ဖြတ်ပြီးရင်တော့ ၊ အခုလက်ရှိ အနောက်ဘက်ဒေသ ဗုဒ္ဓဘာသာဂိုဏ်းက လူတွေ အခြေစိုက်နေတဲ့ နေရာကို ရောက်လိမ့်မယ် ”

လင်းရန်ယန် တွေးတောနေစဉ်မှာပင် ၊ အခြားသော ဂိုဏ်းလေးခုမှ လူများသည်လည်း လျှောက်လှမ်းလာကြတော့သည်။ ကောင်းကင်အရှင်သခင် ရွှင်ယန်က လေးနက်စွာ ဆိုလိုက်၏။

သို့သော်လည်း ကောင်းကင်အရှင်သခင် ချင်းယွင်၏ အနောက်၌ လိုက်ပါလာသော ယွင်ရှောင် မှာမူ ၊ လင်းရန်ယန်ကို ရန်ငြိုးတကြီးဖြင့် စိုက်ကြည့်နေပါတော့သည်။ သူသည် ယခင်က ဒဏ်ရာများမှ များစွာ ပြန်လည်သက်သာနေပြီ ဖြစ်သည်။ အကယ်၍ အကြည့်ဖြင့် လူသတ်၍ ရနိုင်မည်ဆိုပါက လင်းရန်ယန်မှာ အကြိမ်ကြိမ် သေဆုံးသွားခဲ့ပြီ ဖြစ်၏။ သို့သော် ကံမကောင်းစွာဖြင့် မျက်လုံးများမှာ လူမသတ်နိုင်ချေ။

သူ၏ အကြည့်ကို အာရုံခံမိသောအခါ လင်းရန်ယန်ကလည်း သူ၏မျက်လုံးများကို တိုက်ရိုက် စိုက်ကြည့်လိုက်ပါတော့သည်။ ထိုစူးရှသော အကြည့်တစ်ချက်ကြောင့်ပင် ယွင်ရှောင်မှာ ထိတ်လန့်သွားရကာ ခြေလှမ်းများ ယိုင်နဲ့သွားပြီး လဲကျလုနီးပါး ဖြစ်သွားရတော့သည်။

“ဟွန့်... သတ္တိနည်းလိုက်တာ ၊ ဒီလိုလူမျိုးကတော့ အလုပ်ကြီးအကိုင်ကြီးတွေ လုပ်နိုင်ဖို့ ခက်လိမ့်မယ် ”

မိမိ၏ ဂုဏ်ယူရသော တပည့်ဖြစ်သူမှာ ဤမျှအထိ သနားစရာကောင်းနေသည်ကို မြင်သောအခါ ၊ မျက်နှာကို အလေးထားသော ကောင်းကင်အရှင်သခင် ချင်းယွင်က အေးစက်စွာ နှာခေါင်းရှုံ့လိုက်၏။

“အဲဒါဆိုရင်လည်း အမြန်ပဲ သွားပြီး ပူးပေါင်းကြတာပေါ့ ၊ ငါတော့ ဒီကျိန်စာသင့်နေတဲ့ နေရာမှာ နောက်ထပ် တစ်စက္ကန့်တောင် မနေချင်တော့ဘူး ၊ အရမ်းအေးလွန်းတယ် ”

တတိယအကြီးအကဲမှာမူ တုန်တုန်ယင်ယင်ဖြင့် ဆိုကာ သူတို့ကို တိုက်တွန်းနေတော့သည်။

အမှန်စင်စစ် ပတ်ဝန်းကျင်ရှိ အအေးဓာတ်မှာ အလွန်ပင် ထူးဆန်းလှ၏။ ၎င်းမှာ ကျင့်ကြံခြင်းအဆင့်အတန်းကို ခွဲခြားခြင်း မရှိဘဲ ၊ ကောင်းကင်အရှင်သခင်နှင့် ပညာရှင်ကြီးများအတွက် အအေးဒဏ် ခံစားရမှုမှာ ဆင်တူနေခြင်း ဖြစ်သည်။

ရေခဲဝိညာဉ်ခန္ဓာ ပိုင်ဆိုင်ထားသော လင်းရန်ယန်ကဲ့သို့သော သူများသာလျှင် မည်သည့် ဝေဒနာမျှ မခံစားရခြင်း ဖြစ်၏။ အမှန်တကယ်တော့ ဤကဲ့သို့သော နေရာမျိုး၌ ကျင့်ကြံခြင်းမှာ သူ၏ ကျင့်စဉ်စွမ်းအားများကို မြန်မြန်ဆန်ဆန်ဖြင့် ပြန်လည်ပြည့်ဖြိုး စေသည်။

မဆိုင်းမတွပင် အဖွဲ့သားများမှာ အရှေ့ဘက်ရှိ နှင်းဖုံးတောင်တန်းများဆီသို့ လျင်မြန်စွာ လျှောက်လှမ်းသွားကြတော့သည်။

“ဟိန်း... ”

သို့သော်လည်း သူတို့ သိပ်မဝေးသေးသော နေရာသို့ ရောက်သောအခါ ၊ ဟင်းလင်းပြင်အတွင်းမှနေ၍ နှင်းနတ်ဆိုးတစ်ကောင်၏ ဟိန်းဟောက်သံ ထွက်ပေါ်လာ၏။

နောက်တစ်ခဏ၌ မီတာသုံးဆယ်ကျော် မြင့်မားသော နှင်းနတ်ဆိုးကြီးတစ်ကောင်မှာ မြေပြင်အောက်မှနေ၍ ဝုန်းခနဲ ထွက်ပေါ်လာပြီးနောက် ၊ လူတိုင်းကို ကိုက်ခဲရန်အတွက် ခုန်အုပ်လိုက်တော့သည်။

“ရှပ်... ”

ရုတ်တရက် ဓားသံတစ်ချက် ဟိန်းထွက်သွားပြီးနောက် ၊ တစ်ခဏအတွင်းမှာပင် ထိုနှင်းနတ်ဆိုးကြီးမှာ ဓားချက်တစ်ချက်တည်းဖြင့် ပိုင်းဖြတ်ခံလိုက်ရ၏။

“ထိပ်တန်း မိစ္ဆာသားရဲကြီး တစ်ကောင်ကများ ငါတို့ကို လာပြီး ရန်စရဲတယ် ၊ တကယ်ကို သေတွင်းကို တူးနေတာပဲ ”

ယွင်ရှောင်သည် လူအုပ်၏ အရှေ့ဆုံး၌ ရပ်လျက် သူ၏ အဖိုးတန်ဓားကို ဟန်ပါပါဖြင့် အိမ်ထဲသို့ ပြန်ထည့်လိုက်တော့သည်။

“ဒီယွင်ရှောင်က တကယ်ကို ပါရမီရှင်ပဲ ၊ မြေကမ္ဘာအရှင်သခင် အဋ္ဌမအဆင့်နဲ့တင် ဒသမအဆင့်ရှိတဲ့ နှင်းနတ်ဆိုးကို ဓားချက်တစ်ချက်တည်းနဲ့ သတ်နိုင်တယ် ”

“ဟုတ်ပါရဲ့... ဒီပါရမီက တကယ်ကို အစွမ်းထက်လွန်းတယ်”

ပတ်ဝန်းကျင်ရှိ ဂိုဏ်းအသီးသီးမှ ပညာရှင်ကြီးများက မနေနိုင်ဘဲ ချီးကျူးလိုက်ကြ၏။ ထိုချီးကျူးစကားများကို ကြားသောအခါ ယွင်ရှောင်မှာ တစ်ဖန် ဘဝင်ပြန်မြင့်လာတော့သည်။

“ဟိန်း... ”

“ဝူး... ”

“ဟိန်း... ”

သို့သော်လည်း ထိုအခိုက်အတန့်မှာပင် အရပ်မျက်နှာအနှံ့မှနေ၍ တိရစ္ဆာန်များ၏ ဟိန်းဟောက်သံများမှာ တစ်ခုပြီးတစ်ခု ထွက်ပေါ်လာ၏။

“ဟိန်း... ”

ထိုသားရဲဟိန်းသံများအကြား၌ပင် နှင်းတောင်၏ ထိပ်ဖျားမှနေ၍ မြေကမ္ဘာတစ်ခုလုံး တုန်ခါသွားစေလောက်သော ဟိန်းဟောက်သံကြီးတစ်ခု ထွက်ပေါ်လာတော့သည်။ ထိုထိတ်လန့်ဖွယ်ရာ ဟိန်းဟောက်သံကြောင့် ပတ်ဝန်းကျင်ရှိ နှင်းတောင်များမှာ ပြင်းထန်စွာ တုန်ခါသွားပါတော့၏။

“ဝုန်း... ဝုန်း... ဝုန်း... ”

နောက်တစ်ခဏ၌ ပတ်ဝန်းကျင်ရှိ နှင်းတောင်များပေါ်မှနေ၍ တဝုန်းဝုန်း မြည်ဟည်းသံများ ထွက်ပေါ်လာတော့သည်။ ထို့နောက်တွင်မူ အဆုံးမဲ့လှသော နှင်းလှိုင်းကြီးများမှာ လူတိုင်း၏ အပေါ်သို့ အရှိန်အဟုန်ဖြင့် ပြိုကျလာ၏။

မီတာဆယ်ဂဏန်းအထိ မြင့်မားသော ထိုနှင်းလှိုင်းကြီးများကို မြင်လိုက်ရသောအခါ ၊ လူတိုင်း၏ မျက်နှာမှာ သိသိသာသာ ပြောင်းလဲသွားရတော့သည်။

“မကောင်းတော့ဘူး... ဒါက နှင်းပြို တာပဲ ”

ကောင်းကင်အရှင်သခင် ကျန့်တောက်ရန်က အော်ဟစ်လိုက်၏။

လူတိုင်း၏ ရင်ထဲ၌ ထိတ်လန့်တုန်လှုပ်သွားရတော့သည်။ သေချာပေါက် သူတို့သည် သာမန်နှင်းပြိုမှုများကို ကြောက်ရွံ့ခြင်း မရှိချေ။ သို့သော်လည်း လက်ရှိဖြစ်ပေါ်နေသော နှင်းပြိုမှုမှာ သာမန်မဟုတ်သည်မှာ ထင်ရှားလှ၏။ ၎င်းမှာ ပြင်းထန်သော မိစ္ဆာစွမ်းအင် များ ပြည့်နှက်နေပြီး ၊ နှင်းမိစ္ဆာဘုရင်၏ စွမ်းအားကြောင့် ဖြစ်ပေါ်လာသော နှင်းပြိုမှုပင် ဖြစ်၏။