အဆိပ်ခတ်ခံရခြင်း
Vol. 12 Ch. 116
“သူ့ကို သတ်ကြစို့ ”
ကောင်းကင်အရှင်သခင် ချင်းယွင် က အေးစက်စွာ နှာခေါင်းရှုံ့လိုက်ပြီးနောက် ၊ သူ၏ အဖိုးတန်ဓားကို ချက်ချင်းပင် ဆွဲထုတ်လိုက်တော့သည်။
“ဝုန်း... ”
သို့သော်လည်း ထိုအခိုက်အတန့်၌ ထိတ်လန့်ဖွယ်ရာ ကောင်းကင်ဘုံမိုးကြိုး စွမ်းအားတစ်ခုမှာ ရှီးကျန့် ၏ လက်အတွင်းမှနေ၍ တစ်ခဏချင်းအတွင်း ပေါက်ကွဲထွက်လာ၏။ ၎င်းသည် ဟင်းလင်းပြင်ကို ထိုးဖောက်ကာ ချင်းယွင်ထံသို့ ပြင်းထန်စွာ ကျရောက်သွားတော့သည်။
“ပွတ်... ”
တစ်ခဏချင်းအတွင်းမှာပင် ၊ ဝိညာဉ်စွမ်းအင် အကာအကွယ် ကင်းမဲ့နေသော ချင်းယွင်မှာ သွေးစိမ်းရှင်ရှင်များကို ပါးစပ်အပြည့် အန်ထုတ်လိုက်၏။ တစ်ချိန်တည်းမှာပင် သူသည် မိမိ၏ သွေးများအတွင်း၌ များပြားလှသော အမည်းရောင် အရာဝတ္ထုများကို တွေ့ရှိလိုက်ရသဖြင့် ထိတ်လန့်တုန်လှုပ်သွားရသည်။
“ဒါက... ‘နတ်ဘုရားနှင့် မိစ္ဆာသေမင်းတိမ်တိုက်’ မဟုတ်လား ၊ ဒါက ဘယ်လိုလုပ်ပြီး ဖြစ်နိုင်မှာလဲ ၊ မင်း ငါတို့ကို ဘယ်တုန်းက အဆိပ်ခတ်လိုက်တာလဲ ”
ချင်းယွင်က အော်ဟစ်၍ မေးလိုက်၏။ တစ်ခဏချင်းအတွင်းမှာပင် သူ၏ ခန္ဓာကိုယ်ပတ်လည်ရှိ အရှိန်အဝါများမှာ လျင်မြန်စွာ လျော့ကျသွားတော့သည်။
“နတ်ဘုရားနှင့် မိစ္ဆာသေမင်းတိမ်တိုက်... ရှီးကျန့် ၊ မင်းကတော့ တကယ်ကို ရက်စက်တာပဲ ၊ မင်းရဲ့ ရည်ရွယ်ချက်က ဘာလဲ ”
ကျန့်တောက်ရန် သည်လည်း သူ၏ သွေးများကို အလျင်အမြန်ပင် စစ်ဆေးလိုက်ရာ ၊ အမှန်တကယ်ပင် အမည်းရောင်သွေးများ ရောနှောနေသည်ကို တွေ့ရှိလိုက်ရ၏။ ထို့ပြင် သူ၏ ခန္ဓာကိုယ်တစ်ခုလုံးရှိ စွမ်းအားများမှာလည်း လျင်မြန်စွာပင် ခမ်းခြောက်လာတော့သည်။ ဤအရာအားလုံးမှာ ကောင်းကင်အရှင်သခင်ကြီး သုံးဦးစလုံး အဆိပ်ခတ်ခံလိုက်ရပြီဖြစ်ကြောင်း ထင်ရှားစွာ ပြသနေ၏။
“ဟားဟား... ရည်ရွယ်ချက် ဟုတ်လား ၊ ရည်ရွယ်ချက်ကတော့ ရှင်းနေတာပဲ မဟုတ်လား ၊ ခင်ဗျားတို့ကို ဝါးမြိုလိုက်ရုံနဲ့ ၊ ကျွန်တော့်ရဲ့ စွမ်းအားတွေက အနည်းဆုံး ကောင်းကင်အရှင်သခင် ပဉ္စမအဆင့်အထိ မြင့်တက်သွားလိမ့်မယ် ၊
အဲဒီအချိန်ကျရင် ကျွန်တော့်ရဲ့ မိုးကြိုးစွမ်းအားတွေနဲ့ တတိယအဆင့်ရှိတဲ့ ‘မိုးကြိုးဝိညာဉ်ခန္ဓာ’ ကို အသုံးချပြီး ၊ ကောင်းကင်အရှင်သခင် နဝမအဆင့်နဲ့တောင် ယှဉ်နိုင်မှာ ၊ အဲဒီနေ့ကျရင်တော့ အကုန်လုံးကို စာရင်းရှင်းရမယ့်နေ့ပဲ ”
သူတို့၏ ဒေါသတကြီး အော်ဟစ်သံများကို ကြားသောအခါ ရှီးကျန့်သည် ကောင်းကင်သို့ မော့ကာ ရူးသွပ်စွာ ရယ်မောလိုက်တော့သည်။
“မင်းက ယင်ချန်း မျိုးနွယ်စုထဲက တစ်ယောက်လား ၊ မဖြစ်နိုင်တာ... ယင်ချန်းမျိုးနွယ်ဆိုတာ ဒီကမ္ဘာ့တာအိုတရားက ဘယ်လိုမှ လက်မခံတဲ့အရာပဲ ၊
သူတို့ ပေါ်လာတာနဲ့ သွေးရောင်အငွေ့အသက်တွေ ထွက်လာရမှာ ၊ ဒါပေမဲ့ မင်းမှာ ယင်ချန်းမျိုးနွယ်ရဲ့ သွေးမျိုးဆက် မရှိဘဲနဲ့ ၊ ဝိညာဉ်ဝါးမြိုခြင်း လျှို့ဝှက်အတတ်ကို ဘယ်လိုလုပ်ပြီး သုံးနိုင်နေတာလဲ ”
ချင်းယွင်က ဒေါသတကြီး အော်လိုက်၏။
ယင်ချန်းမျိုးနွယ်စု ဆိုသည်မှာ လွန်ခဲ့သော နှစ်ပေါင်းသောင်းချီက ဤကမ္ဘာပေါ်၌ ပေါ်ထွက်ခဲ့သော မျိုးနွယ်စုတစ်ခု ဖြစ်သည်ဟု ကောလာဟလများ ရှိခဲ့သည်။ သူတို့၏ ရုပ်သွင်မှာ လူသားများနှင့် မခြားနားသော်လည်း ၊ ထိုမျိုးနွယ်စုတွင် လူသားဝိညာဉ်များကို ဝါးမြိုနိုင်သည့် ‘ဝိညာဉ်ဝါးမြိုခြင်း လျှို့ဝှက်အတတ်’ ဟူသော အလွန်အစွမ်းထက်သည့် လျှို့ဝှက်ပညာတစ်ခု ရှိ၏။ သူတို့သည် မိစ္ဆာသားရဲများ၏ အမြုတေအတွင်းရှိ ဝိညာဉ်များကို ဝါးမြိုကာ မိမိတို့၏ စွမ်းအားကို မြှင့်တင်ကြတော့သည်။
အကယ်၍ ပြင်းထန်သော ဒဏ်ရာများ ရရှိခဲ့လျှင်ပင် ၊ ဝိညာဉ်စွမ်းအားကို အသုံးချ၍ အလျင်အမြန် ပြန်လည် ကုသနိုင်ကြ၏။ ထိုစဉ်က သူတို့ စတင်ပေါ်ပေါက်လာချိန်တွင် ကြီးမားလှသော ကပ်ဘေးကြီးတစ်ခု ဖြစ်ပေါ်ခဲ့ပြီး ၊ ကျင့်ကြံခြင်းလောကတစ်ခုလုံးမှာ သူတို့ကြောင့် ပျက်စီးလုနီးပါး ဖြစ်ခဲ့ရတော့သည်။ ကံကောင်းထောက်မစွာဖြင့် ၊ ထိုခေတ်ကာလ၌ ခေတ်အဆက်ဆက် ပြိုင်ဘက်ကင်းသော ပါရမီရှင်ကြီးတစ်ဦး ပေါ်ထွက်လာပြီး ယင်ချန်းမျိုးနွယ်စု တစ်ခုလုံးကို သုတ်သင်နိုင်ခဲ့သည့်အပြင် ၊ သူတို့၏ ဝင်ပေါက်ကိုပါ တိုက်ရိုက် ပိတ်ဆို့ကာ ချိပ်ပိတ်ခဲ့ခြင်း ဖြစ်၏။
ယခုအခါ ထိုယင်ချန်းမျိုးနွယ်စုမှ လူတစ်ဦး ဤနေရာ၌ ထပ်မံ ပေါ်ပေါက်လာသည်ကို မြင်ရသောအခါ ၊ သူတို့ မည်သို့များ ထိတ်လန့်တုန်လှုပ်ခြင်း မရှိဘဲ နေနိုင်မည်နည်း။
“သေချာပေါက် ကျွန်တော်က ယင်ချန်းမျိုးနွယ်ဝင် မဟုတ်ပါဘူး ၊ ယင်ချန်းမျိုးနွယ်ပဲ ဝိညာဉ်ဝါးမြိုခြင်း အတတ်ကို သုံးနိုင်တယ်လို့ ခင်ဗျားတို့ ထင်နေတာက တကယ်ကို ရယ်စရာကောင်းလှပါတယ် ၊
တကယ်တော့ ဒီလျှို့ဝှက်အတတ်က အနည်းငယ်ပဲ ခက်ခဲတာပါ ၊ အထူးနည်းလမ်းတစ်ခုကို သုံးပြီး ကျင့်ကြံမယ်ဆိုရင် ဘယ်သူမဆို သုံးနိုင်တာပဲ ”
ရှီးကျန့်သည် သူ၏ရှေ့၌ သေလုမျောပါး ဖြစ်နေသော လူများကို ကြည့်ရင်း လှောင်ပြုံး ပြုံးလိုက်တော့သည်။
“ဒါဆိုရင်... အဲဒီတုန်းက မိစ္ဆာမက ယင်ချန်းမျိုးနွယ်ရဲ့ မျိုးဆက်တစ်ခု ဖြစ်နေတာလား ”
ထိုစဉ်မှာပင် အဝေးတစ်နေရာမှ လုံယွီရှင်း က အော်ဟစ်၍ မေးလိုက်ပါတော့သည်။
“မိစ္ဆာမ ဟုတ်လား... ခင်ဗျားမှာ အဲဒီလို ပြောပိုင်ခွင့် မရှိဘူး ”
သူ စကားပြောလိုက်သည်နှင့် ရှီးကျန့်မှာ တစ်ခဏချင်းအတွင်း ဒေါသတကြီး ပေါက်ကွဲသွား၏။
“ဝုန်း... ”
ချက်ချင်းဆိုသလိုပင် ရှီးကျန့်သည် လျှပ်စီးတန်းတစ်ခုအဖြစ်သို့ ပြောင်းလဲသွားပြီး ၊ လုံယွီရှင်း၏ ရှေ့မှောက်သို့ တိုက်ရိုက် ရောက်ရှိသွားကာ ၊ ၎င်း၏ လည်ပင်းကို ဆုပ်ကိုင်လျက် မြေပြင်မှနေ၍ မလိုက်တော့သည်။
“အဲဒီတုန်းက... ကျွန်တော့်ရဲ့ ဂိုဏ်းတူညီမသာ ဝိညာဉ်ဝါးမြိုခြင်း အတတ်ကို သုံးပြီး ‘လုံဖျင်နန်’ ဆိုတဲ့ ခင်ဗျားတို့ လုံမိသားစုက ပါရမီရှင်ဆိုသူကို မကုပေးခဲ့ရင် ၊ သူ သေသွားတာ ကြာလှပြီ ၊
ဒါကို ခင်ဗျားတို့က ကျေးဇူးကန်းပြီးတော့ ၊ သူက ယင်ချန်းမျိုးနွယ်ဝင်ပါ ဆိုပြီး တိုင်တန်းခဲ့ကြတယ် ၊ အဲဒီလိုသာ မဟုတ်ရင် သူ ဘာဖြစ်လို့ သေရမှာလဲ ”
ရှီးကျန့်က ဒေါသတကြီး အော်ဟစ်လိုက်၏။
“ဝုန်း... ဝုန်း... ဝုန်း... ”
စကားပြောပြီးသည်နှင့် သူ၏ လက်အတွင်းမှနေ၍ များပြားလှသော မိုးကြိုးစွမ်းအားများ ပေါက်ကွဲထွက်လာပြီး ၊ အဆုံးမရှိသော လျှပ်စီးများမှာ လုယွိရှင်း၏ ခန္ဓာကိုယ်အတွင်းသို့ တစ်ခဏချင်းအတွင်း စိမ့်ဝင်သွားတော့သည်။
“အား... ”
ချက်ချင်းပင် လုံယွီရှင်း၏ နှုတ်မှ စူးရှလှသော အော်ဟစ်သံကြီး ထွက်ပေါ်လာ၏။ နာကျင်လှ၏ ၊ အလွန်အမင်း နာကျင်လှသည်။ ၎င်းကို ချက်ချင်း သေမသွားစေရန်အတွက် ရှီးကျန့်သည် ကောင်းကင်ဘုံမိုးကြိုး စွမ်းအားကိုပင် အသုံးမပြုခဲ့ချေ။ လျှပ်စီးများ၏ လောင်မြိုက်မှုကို ခံစားနေရသော လုံယွီရှင်းမှာ တစ်ကိုယ်လုံး ရူးသွပ်မတတ် တုန်ယင်နေတော့သည်။
“မင်း... မင်းက ဝိညာဉ်လောကရဲ့ ပြစ်ဒဏ်ပေးရေးဌာနက ဝိညာဉ်သံတမန် မဟုတ်ဘူးလား ၊ ဒါက ဘယ်လိုလုပ်ပြီး ဖြစ်နိုင်မှာလဲ ”
နာကျင်မှုများကြားမှ လုံယွီရှင်းက မယုံကြည်နိုင်စွာဖြင့် အော်ဟစ်လိုက်၏။ ဂိုဏ်းချုပ်နှင့် အကြီးအကဲများ မှားယွင်းခဲ့သည်ဆိုလျှင်တောင်မှ ၊ ဝိညာဉ်လောကက အသိအမှတ်ပြုထားသည့် ဝိညာဉ်သံတမန် တံဆိပ်ပြားကတော့ အတုဖြစ်နိုင်စရာ မရှိချေ။
“ဟင်း... ခင်ဗျား ပြောနေတာ ဒါကိုလား ”
သူ၏ စကားကို ကြားသောအခါ ရှီးကျန့်သည် ဟင်းလင်းပြင်ထဲမှနေ၍ အရာတစ်ခုကို အသာအယာ ဆုပ်ကိုင်လိုက်၏။
“ဝူး... ”
ချက်ချင်းဆိုသလိုပင် နက်မှောင်သော တံဆိပ်ပြားတစ်ခုမှာ သူ၏လက်ထဲ၌ ပေါ်ထွက်လာတော့သည်။ သို့သော်လည်း ထိုအခိုက်အတန့်၌ ထိုတံဆိပ်ပြားပေါ်တွင် သွေးရောင်လွှမ်းသော အနီရောင် ပုံရိပ်များစွာ ပေါ်ထွက်လာပြီးနောက် ၊ ထိုပုံရိပ်များ၏ တိုက်စားမှုအောက်၌ တံဆိပ်ပြားမှာ တစ်ခဏချင်းအတွင်း ပြာအဖြစ်သို့ ပြောင်းလဲသွား၏။
ထင်ရှားသည်မှာ ၊ ဝိညာဉ်လောကက အသိအမှတ်ပြုထားသော ရှီးကျန့်၏ ဝိညာဉ်သံတမန် အဆင့်အတန်းမှာ ပျောက်ကွယ်သွားခဲ့ပြီ ဖြစ်သည်။
“ဒီတံဆိပ်ပြားသာ မရှိရင်... ကျွန်တော် မော်ရှန်းဂိုဏ်းကို ပြန်သွားတဲ့အချိန်မှာ ၊ ဂိုဏ်းချုပ်နဲ့ အကြီးအကဲတွေက ကျွန်တော့်ကို ချုပ်နှောင်ထားကြမှာပေါ့ ၊ ဒါဆိုရင် ခင်ဗျားတို့ အားလုံးကို သတ်ဖို့ ဒီထောင်ချောက်ကို ကျွန်တော် ဘယ်လိုလုပ်ပြီး ဆင်နိုင်မှာလဲ ”
ရှီးကျန့်သည် အေးစက်လှသော အကြည့်များဖြင့် လှောင်ပြုံး ပြုံးလိုက်၏။ ဤနေ့ရက်အတွက် သူသည် လွန်ခဲ့သော ဆယ်နှစ်ကျော်ကတည်းက စတင် စီစဉ်ခဲ့ခြင်း ဖြစ်သည်။ ထိုနှစ်များတစ်လျှောက်လုံး သူသည် မိစ္ဆာကျင့်ကြံသူများ ပေါများရာ နေရာများ၌ ပုန်းအောင်းနေထိုင်ရင်း ၊ သူတို့ကို နှံ့စပ်စွာ သုတ်သင်ခဲ့၏။
ဤအရာအားလုံးမှာ ဝိညာဉ်သံတမန် တံဆိပ်ပြားတစ်ခု ရရှိရန်အတွက်သာ ဖြစ်သည်။ သေချာပေါက် သူသည် မိစ္ဆာကျင့်ကြံသူများကြား၌ ပုန်းအောင်းနေခဲ့သဖြင့် ၊ ဖြောင့်မတ်သော တပည့်များစွာက သူသည် မိစ္ဆာလမ်းစဉ်သို့ ကျရောက်နေပြီဟု တိုင်တန်းခဲ့ကြ၏။ ရှီးကျန့်၏ ရက်စက်ကြမ်းကြုတ်သော အမူအရာနှင့် ပေါင်းစပ်လိုက်သောအခါ လူအများစုမှာ ထိုသတင်းကို ယုံကြည်ခဲ့ကြသည်။
သူ မမျှော်လင့်ထားသည်မှာ ပြစ်ဒဏ်ပေးရေးဌာန၏ ဝိညာဉ်သံတမန် တံဆိပ်ပြားကို တစ်ခါတည်းနှင့် ရရှိခဲ့ခြင်းပင် ဖြစ်၏။ ၎င်းမှာ အံ့သြဖွယ်ရာ ဆုလာဘ်တစ်ခု ဖြစ်သော်လည်း ၊ သူသည် လုံးဝ ဂရုမစိုက်ပေ။ သူ၏ မျက်လုံးထဲ၌ ကလဲ့စားချေခြင်းထက် အရေးကြီးသောအရာ မရှိချေ။
သူ စကားပြောလိုက်သည်နှင့် ချင်းယွင်နှင့် အခြားသူများ၏ ရင်ထဲ၌ အေးစိမ့်သွားရတော့သည်။ ကလဲ့စားချေရန်အတွက် လူတစ်ဦးမှာ ဤမျှအထိ လုပ်ဆောင်နိုင်လိမ့်မည်ဟု သူတို့ ထင်မှတ်မထားခဲ့ကြချေ။ တစ်ချိန်တည်းမှာပင် သူတို့ တောင့်တနေကြသော ဝိညာဉ်သံတမန် တံဆိပ်ပြားမှာလည်း ရှီးကျန့်၏ မျက်လုံးထဲ၌ အမှိုက်တစ်ခုမျှသာ တန်ဖိုးရှိနေသည်ကို မြင်လိုက်ရတော့သည်။
“လုံယွီရှင်း... မင်းတို့ မော်ရှန်းဂိုဏ်းက ဘာတွေများ လုပ်ခဲ့လို့ မကျေနပ်နိုင်အောင် ဖြစ်နေရတာလဲ ”
ဤအခိုက်အတန့်၌ ချင်းယွင်ပင်လျှင် အပြစ်တင်စကား မဆိုဘဲ မနေနိုင်တော့ချေ။ ရှီးကျန့်သည် ဂိုဏ်း၏ အကြီးအကဲ၏ မြစ်တော်စပ်သူဖြစ်ပြီး ၊ ဂိုဏ်းချုပ်၏ တပည့်လည်း ဖြစ်၏။ ထိုမျှ အစွမ်းထက်သော ပါရမီကို ပိုင်ဆိုင်ထားသူအား ဂိုဏ်းကို ပြန်လည် တိုက်ခိုက်သည်အထိ ဖြစ်စေခဲ့ခြင်းမှာ တကယ်ပင် ထိတ်လန့်ဖွယ် ကောင်းလှသည်။
“အဖိုးကြီး... ခင်ဗျား ဘာတွေ လျှောက်ပြောနေတာလဲ ၊ အဲဒီမိစ္ဆာမက အဲဒီတုန်းက ကျင့်ကြံသူ အများကြီးရဲ့ ဝိညာဉ်တွေကို ဝါးမြိုခဲ့တာ ၊ ငါတို့ မော်ရှန်းဂိုဏ်းက ဥပဒေအတိုင်း စီရင်ခဲ့ရုံတင် ၊ ရှီးကျန့်နဲ့ ရခဲ့တဲ့ သူ့ရဲ့သားကိုတောင် ငါတို့ ဘာမှမလုပ်ခဲ့ဘူး ၊
ရှီးကျန့်... မင်းကတော့ တကယ်ကို ရူးနေပြီ ၊ အဲဒီလို မိစ္ဆာမမျိုးက အကြိမ်ပေါင်း တစ်သောင်းလောက် သေသင့်တာ ၊ ဒါကို မင်းက သူ့အတွက်နဲ့ ကလဲ့စား ပြန်ချေနေသေးတယ်လား ”
လုံယွီရှင်းက ဒေါသတကြီး အော်ဟစ်လိုက်၏။
“မင်း... သူ့ကို ထပ်ပြီး စော်ကားဝံ့သေးတယ်ပေါ့... သေလိုက်တော့ ”
ကံမကောင်းစွာဖြင့် ရှီးကျန့်မှာ လုံးဝ ရူးသွပ်သွားခဲ့ပြီ ဖြစ်ရာ ၊ လုံယွီရှင်း ဟိန်းဟောက်လိုက်တော့သည်။ နောက်တစ်ခဏ၌ အဆုံးမရှိသော ကောင်းကင်ဘုံမိုးကြိုး စွမ်းအားများ ပေါက်ကွဲထွက်လာပြီး ၊ လုံယွီရှင်းကို တစ်ခဏချင်းအတွင်း ပြာအဖြစ်သို့ ပြောင်းလဲပစ်လိုက်၏။
တစ်ချိန်တည်းမှာပင် သူသည် တစ်ဖက်လူ၏ ဝိညာဉ်ကို ထုတ်ယူကာ တိုက်ရိုက် ဝါးမြိုလိုက်တော့သည်။ တစ်ခဏချင်းအတွင်းမှာပင် သူ၏ အရှိန်အဝါမှာ ထပ်မံ၍ မြင့်တက်လာ၏။ ထို့နောက်တွင် ရှီးကျန့်သည် သူ၏ အကြည့်များကို ချင်းယွင်နှင့် ကျန့်တောက်ရန်တို့ထံသို့ လှည့်လိုက်တော့သည်။
“သေစမ်း ”
မဆိုင်းမတွပင် သူသည် လက်ဝါးကို ရိုက်နှက်လိုက်၏။
“ဝုန်း... ”
“ဝုန်း... ”
အစွမ်းထက်လှသော စွမ်းအားနှစ်ခု၏ တိုက်ခိုက်မှုအောက်၌ ၊ ကောင်းကင်အရှင်သခင် အဋ္ဌမအဆင့်ရှိသော ချင်းယွင်နှင့် သတ္တမအဆင့်ရှိသော ကျန့်တောက်ရန်တို့မှာ တစ်ခဏချင်းအတွင်း ပြာအဖြစ်သို့ ပြောင်းလဲသွားတော့သည်။ သူတို့၏ ဝိညာဉ်များပင်လျှင် ရှီးကျန့်၏ ဝါးမြိုခြင်းကို ခံလိုက်ရ၏။