နတ်ဘုရား သုံးပါး

"ဒါက မှန်တင်ခုံဆီက တုံ့ပြန်မှု ရသွားတာလား"

အစ်ကိုချုံသည် မျက်မှောင်ကြုတ်လိုက်ပြီး ဘာမှထပ်မပြောတော့ပေ။ မရဏ အဆောက်အအုံအတွက် လိုအပ်သော ယဇ်ပစ္စည်းများကို အိပ်မက်ဆိုး အလယ်အဆင့်အချို့တွင် ရှာဖွေနိုင်မှန်း သူသိထားသည်။ ယင်းသည် ကောင်းမင်တစ်ယောက် ကံကောင်းသည်ဟု သက်သေပြနေခြင်းဖြစ်သည်။

"ဒါဆို ကျုပ်သွေးကို သုံးပြီး မှန်တင်ခုံကို နှိုးဆွရတော့မှာပေါ့"

ကောင်းမင်သည် အစ်ကိုချုံ၏ဓားကို အသုံးမပြုလိုသဖြင့် သူ၏လက်ကောက်ဝတ်ကို ကိုက်လိုက်သည်။

"အိပ်မက်ထဲမှာ ကျုပ်သွေးထွက်လို့ ရရဲ့လား"

"မင်း အိပ်မက်မက်နေတာ မဟုတ်ဘူး"

အစ်ကိုချုံက ရှင်းပြရန် ပြင်လိုက်စဉ်မှာပင် တစ်စုံတစ်ခုကို ရုတ်တရက် သတိပြုမိသွားသည်။ ကောင်းမင်မှာ သူ့သွေးကို မသုံးရသေးသော်လည်း မှန်တင်ခုံက စတင်တုံ့ပြန်နေပြီဖြစ်သည်။

အစ်ကိုချုံ အနီးကပ်ကြည့်လိုက်သည်။ ယဇ်ပစ္စည်းများပေါ်မှ အဆိုးမြင် စိတ်ခံစားချက်များကို ဝါးမြိုနေသည်မှာ မှန်တင်ခုံမဟုတ်ဘဲ ကောင်းမင် ခုနက ထည့်လိုက်သည့်အရာ ဖြစ်နေသည်ကို သူသတိထားမိလိုက်သည်။ အစ်ကိုချုံ တားဆီးရန် ပြင်လိုက်သော်လည်း ကောင်းမင်က သူ၏လက်ကောက်ဝတ်ကို ကိုက်ချလိုက်ပြီဖြစ်သည်။ ကောင်းမင်မှာ နာကျင်မှုကို မခံစားနိုင်တော့အလားပင်။သူ့လက်ဖဝါးပေါ်သို့ သွေးများ စီးကျလာသည်ကို ခွင့်ပြုထားလိုက်သည်။ထို့နောက် ထိုလက်ဖဝါးဖြင့် မှန်တင်ခုံပေါ်ရှိ ပုံစံကွက်များကို ဖိချလိုက်သည်။

ထိုအထပ်ရှိ ကစားသမားအားလုံးမှာ ထူးဆန်းသော နှလုံးခုန်သံများကို ကြားလိုက်ရသည်။ ထိုနှလုံးခုန်သံများတွင် ထူးခြားသော စည်းချက်တစ်ခုပါဝင်နေပြီး လူတိုင်းကို သိမ်မွေ့သော သက်ရောက်မှု ရှိစေသည်။ လူတိုင်းသည် လုပ်လက်စများကို ရပ်တန့်၍ ဧည့်ခန်းမရှိရာသို့ လှည့်ကြည့်လိုက်ကြသည်။

ကောင်းမင်၏သွေးသည် အဆင့်မြင့် ယဇ်ပစ္စည်းတစ်ခု ဖြစ်နေပုံရသည်။ သွေးထဲရှိ အသက်စွမ်းအားမှာ အလွန်ပင် ကျူးကျော်လိုစိတ် ပြင်းထန်ပေသည်။ ၎င်းသည် မှန်တင်ခုံပေါ်ရှိ ပုံစံကွက်များနှင့် ပေါင်းစည်းရန် ကြိုးစားနေခြင်းမဟုတ်ဘဲ လိပ်ပြာပုံစံကွက်များကို အတင်းအကျပ် သန္ဓေပြောင်းသွားစေရန် ဖိအားပေးနေခြင်းဖြစ်သည်။

"မှန်တင်ခုံပေါ်က ပုံစံကွက်တွေကို ဘယ်သူ ချန်ထားခဲ့တာလဲ"

"ပိုမိုနက်ရှိုင်းတဲ့ အိပ်မက်ဆိုးထဲက မွေးဖွားလာတဲ့ မိစ္ဆာနတ်ဘုရားတစ်ပါးပဲ၊ တစ်ချိန်က သူ့ဆီမှာ အဆုံးမရှိတဲ့နောက်လိုက်တပည့်တွေ ရှိခဲ့ဖူးတယ်၊ အခုတော့ သူဟာ သေလုနီးပါး နတ်ဘုရားအတု တစ်ပါးဖြစ်နေပြီ"

အစ်ကိုချုံက အလျင်အမြန် ပြောလိုက်သည်။ သူ၏လက်ထဲတွင် ထူးဆန်းသော ဓားတစ်လက် ထွက်ပေါ်လာသည်။

"ဒီပုံစံကွက်တွေက မိစ္ဆာနတ်ဘုရားရဲ့ ပိုင်ဆိုင်မှုလား၊ ငါ့သွေးက သူ့ရဲ့ အမွေအနှစ်ကို ဝါးမြိုနေတာလား"

သူ၏ အရေပြားပေါ်တွင် ပါးလွှာသော သွေးပုံစံကွက်များ ထွက်ပေါ်လာသည်။ဒီတစ်ကြိမ်တွင်တော့ ကောင်းမင်သည် ရှင်းရှင်းလင်းလင်း ခံစားလိုက်ရသည်။ သွေးနီရောင်မြို့တော်တစ်ခုသည် သူ၏ခန္ဓာကိုယ်ပေါ်တွင် ရိုက်နှိပ်ခံလိုက်ရသည်။ ထိုသွေးနီရောင်မြို့တော် တက်တူး၏ အလယ်ဗဟိုတွင် သူဖွင့်မရသော အခန်းတစ်ခန်း ရှိနေသည်။ ထိုအခန်းထဲတွင် နှိပ်စက်ညှင်းပန်းသည့် ကိရိယာများစွာနှင့် ကောင်းမင်၏ လျှို့ဝှက်ချက်များ ရှိနေလေသည်။

"ပြီးပြည့်စုံသော ဘဝရဲ့ အပိုင်းအစဖြစ်တဲ့ ဒီမြို့ဇုန်ထဲမှာ ငါ့ခန္ဓာကိုယ်ပေါ်က အချုပ်အနှောင်တွေကို ဖျက်ဆီးရတာ ပိုလွယ်ပုံရတယ်၊ ဒီနေရာမှာ ငါ့အပေါ် သက်ရောက်နေတဲ့ ဖိအားတွေက သိသိသာသာ နည်းသွားတယ်"

သူ၏လက်ဖဝါးပေါ်မှ သွေးများသည် မှန်တင်ခုံထဲသို့ စိမ့်ဝင်သွားသည်။ ၎င်းကို မှန်တင်ခုံက စုပ်ယူလိုက်ခြင်း မဟုတ်ဘဲ မှန်တင်ခုံပေါ်တွင် ပုံစံကွက်သစ်တစ်ခု ပေါ်လာခြင်းဖြစ်သည်။ ၎င်းသည် ကောင်းမင်အတွင်း၌ ဝှက်ထားသော အရာမှာ လိပ်ပြာပုံစံကွက်ထက် ပိုမိုအင်အားကြီးမားကြောင်း သက်သေပြနေလေသည်။

ဓားချက်ရာနှင့် လိပ်ပြာပုံစံကွက်၏ ဘေးတွင် ထူးဆန်းသောသရဲတစ်ကောင်၏ပုံစံကွက် ခပ်ပါးပါးတစ်ခု ပေါ်လာသည်။ ၎င်းတွင် မျက်နှာလေးခုနှင့် လက်ရှစ်ချောင်း ပါသည်။ ၎င်းသည် နတ်ဘုရားနှစ်ပါး ချန်ထားခဲ့သော ပုံစံကွက်များကြားထဲသို့ အတင်းတိုးလိုက်ပြီး အရာအားလုံးကို ငတ်မွတ်စွာ ဝါးမြိုလိုက်သည်။ မှန်တင်ခုံပေါ်တွင် ထိုပုံစံကွက် အပြည့်အဝပေါ်လာသည့်အခါ ကောင်းမင်၏နှလုံးခုန်သံမှာ ရပ်တန့်လုမတတ် ဖြစ်သွားသည်။ နာမည်တစ်ခုမှာ သူ၏ဦးနှောက်ထဲသို့ ပေါက်ကွဲဝင်ရောက်လာသည်။

"သားစားကြူးနတ်ဘုရား"

အသားနံ့များ တလိပ်လိပ်လှိုင်းထသွားသည်။ မှန်တင်ခုံ ဘေးပတ်လည်ရှိ ယဇ်ပစ္စည်းများမှာ အစိတ်စိတ်အမြွှာမြွှာ ကွဲအက်သွားတော့သည်။ မှန်တင်ခုံအတွင်း၌ လူတိုင်းကို သတ်ဖြတ်ရန်အတွက် ထွက်လာရန် ကြိုးစားနေသော ဧရာမသတ္တဝါကြီးတစ်ကောင် ရှိနေသကဲ့သို့ဖြစ်နေသည်။

ဧည့်ခန်းမအတွင်းရှိ ထူးဆန်းသော လှုပ်ရှားမှုများက လူတိုင်း၏ အာရုံကို ဖမ်းစားလိုက်သည်။ အစ်ကိုချုံ မျက်နှာမှာ ပျက်သွားသည်။ ကောင်းမင်ကို ထိုသို့ စမ်းသပ်ခိုင်းမိခြင်းအတွက် သူ နောင်တရသွားသည်။

"မင်း အပြင်ထွက်ချင်တာလား"

မှန်တင်ခုံအတွင်းမှ အားကောင်းသော တုံ့ပြန်မှုတစ်ခု ပြန်ဖြေလာသည်။ ကောင်းမင် တွန့်ဆုတ်မနေတော့ပေ။ သူ၏ သွေးချင်းချင်းနီနေသော လက်များဖြင့် တံခါးကို ဆွဲဖွင့်လိုက်သည်။ မှန်တင်ခုံပေါ်ရှိ သားစားကြူးနတ်ဘုရား၏ ပုံစံကွက်များကလည်း ထိုနည်းတူ လုပ်ဆောင်လိုက်ကြသည်။ သူတို့နှစ်ဦး ပူးပေါင်း၍ မှန်တင်ခုံတံခါးများကို ဖွင့်လိုက်ကြသည်။ ရစ်ပတ်နေသော သွေးကြောများမှာ မရဏနတ်ဘုရား၏ သွေးကြောမျှင်များကဲ့သို့ပင်။ ငရဲမှ လွတ်မြောက်လာသော နတ်ဆိုးတစ်ကောင်မှာ မှန်တင်ခုံအတွင်း၌ ပိတ်မိနေခဲ့ခြင်းဖြစ်သည်။ ကောင်းမင်သည် ပန်ဒိုရာသေတ္တာကို ဖွင့်လိုက်သော လူသားတစ်ဦး ဖြစ်သွားခဲ့ချေပြီ။

ဆိုးယုတ်မှုများနှင့် ဖြစ်ရပ်ဆိုးများ အလုံးအရင်းဖြင့် ထွက်ပေါ်လာကြသည်။ အပင်မြစ်များ လျင်မြန်စွာ ကြီးထွားလာကြသည်။ ၎င်းတို့သည် နံရံများ၊ ကြမ်းပြင်နှင့် မျက်နှာကြက်ရှိ အက်ကြောင်းများထဲသို့ တိုးဝင်သွားကြသည်။ ၎င်းတို့သည် အခြားသော ကစားသမားများကို လိုက်လံ ဖမ်းဆီးကြသည်။ ပြတင်းပေါက် အပြင်ဘက်ရှိ အနက်ရောင်မြူခိုးများကိုပင် ဝါးမြိုရန် ကြိုးစားနေကြလေသည်။

ခြေသံများ နေရာအနှံ့မှ ထွက်ပေါ်လာတော့သည်။ မီးများ မှိတ်တုတ်မှိတ်တုတ် ဖြစ်လာသည်။ ဓာတ်လှေကား ပန်နယ်များမှာလည်း တတီတီမြည်လာ၏။ ကစားသမားများသည် မသေဆေးက သူတို့ကို ရှာတွေ့သွားပြီဟု ယူဆလိုက်ကြသည်။

အစ်ကိုချုံမှာ ချွေးစေးများ ထွက်နေတော့သည်။ သူ ဤမျှအထိ မထိတ်လန့်ခဲ့ရသည်မှာ အချိန်အတော်ကြာလှပြီဖြစ်သည်။ ကုန်သည်များနှင့် ကစားသမားများ စုဝေးလာကြသည်။ သူတို့၏မျက်နှာများတွင် အံ့သြမှုနှင့် တုန်လှုပ်မှုများ အရောင်ဟပ်နေလေသည်။သူတို့ အန္တရာယ်နှင့် ရင်ဆိုင်ရချိန်တွင် မည်သူမှ ထွက်မပြေးကြပေ။ သူတို့အားလုံး သူတို့၏ လက်နက်များကို ထုတ်လိုက်ကြပြီး တိုက်ပွဲဝင်ရန် အသင့်ပြင်လိုက်ကြသည်။

ဤလူများသည် မသေဆေးကုမ္ပဏီ၏ စမ်းသပ်သူများထက် ပို၍ ရက်စက်ကြမ်းတမ်းသူများဖြစ်သည်။

ကောင်းမင်၏လက်များ၊ သားစားကြူးနတ်ဘုရား၏ လက်များနှင့် အစေ့မှထွက်လာသော အမြစ်များသည် တစ်ခုနှင့်တစ်ခု ထိတွေ့သွားကြသည်။ ကောင်းမင်၏ စိတ်ထဲတွင် ထွင်းထုထားသော မှတ်ဉာဏ်များ လွတ်ထွက်လာတော့သည်။ ကောင်းမင်သည် သူ၏ သေဆုံးမှတ်ဉာဏ်များကို မြင်လိုက်ရသည်။ သူ၏ခန္ဓာကိုယ်မှာ မရေမတွက်နိုင်သော သေဆုံးမှုများပြီးနောက်မှ မျှော်လင့်ချက်များဖြင့် ပြန်လည်စုစည်းထားခြင်းဖြစ်သည်။ ၎င်းသည် အကြိမ်ကြိမ် ရုန်းကန်ခဲ့ပြီးနောက် ကံကြမ္မာကို ထိုးဖောက်သွားသော အလင်းရောင်ပင် ဖြစ်သည်။

နှလုံးခုန်သံ တစ်ချက်စီတိုင်းနှင့်အတူ ထိုသုံးခု၏ ပေါင်းစည်းမှုမှာ ပိုမိုနက်ရှိုင်းလာသည်။ ကောင်းမင်သည် သူ့ခန္ဓာကိုယ်အတွင်း၌ သရဲများစွာ ပုန်းအောင်းနေကြသကဲ့သို့ ခံစားရသည်။ အချို့မှာ သေဆုံးသွားခဲ့သော သူ၏ ကိုယ်ပွားဗားရှင်းများဖြစ်သည်။ အိပ်မက်ဆိုးထဲမှ ဝိညာဉ်များလည်း ပါဝင်နေသည်။

သူသည် 'ပြီးပြည့်စုံသော ဘဝ' ထဲတွင် လက်တွေ့ကမ္ဘာ၏ ကန့်သတ်ချက်များ မရှိတော့သဖြင့် ဖြစ်ပျက်နေသမျှကို ပြင်းထန်စွာ ခံစားနေရသည်။ သူသည် အနက်ရှိုင်းဆုံးကမ္ဘာမှ ဝိညာဉ်များစွာကို သူ၏ရင်ဘတ်ထဲတွင် သိမ်းဆည်းထားခဲ့သည်ဟု ထင်ရသည်။သူသည် သူ၏ခန္ဓာကိုယ်အား အိုးတစ်လုံးကဲ့သို့ အသုံးချ၍ ၎င်းတို့ကို အပြင်သို့ သယ်ဆောင်လာခဲ့ခြင်း ဖြစ်သည် ။

ကောင်းမင်သည် မှန်တင်ခုံပေါ်မှ သရဲ၏လက်ကို ဆုပ်ကိုင်ချင်သော်လည်း ၎င်းက အရိပ်တစ်ခုသာ ဖြစ်နေသည်။ အကယ်၍ သူသည် သားစားကြူးနတ်ဘုရား၏ လက်ကို အမှန်တကယ် ဆုပ်ကိုင်နိုင်ခဲ့လျှင် အရာအားလုံး သူ့ဆီသို့ ပြန်ရောက်လာလိမ့်မည်ဟု ကောင်းမင် ရုတ်တရက် စိတ်ကူးရလိုက်သည်။

ကောင်းမင်သည် သူ့ရင်ဘတ်အတွင်းမှ သရဲများ၏ အော်ဟစ်သံများကို နားထောင်လိုက်သည်။ ၎င်းတို့သည် အပြင်သို့ထွက်၍ အရာအားလုံးကို ခံစားရန် မစောင့်ဆိုင်းနိုင်ကြတော့ပေ။ သို့သော် ကောင်းမင်သည် တဖြည်းဖြည်း ပြန်လည်တည်ငြိမ်လာသည်။ သူသည် အိပ်မက်ဆိုးမှ နိုးထလာခဲ့ခြင်းဖြစ်သည်။ သူ၏နှလုံးသားသည် သရဲများ၊ မိစ္ဆာများဖြင့် ပြည့်နှက်နေလေသည်။ ဖြစ်နိုင်သည်မှာ သူ၏ ပျောက်ဆုံးနေသော မှတ်ဉာဏ်များကို ရှာတွေ့သောအခါ ထိုသရဲများသည် သူ၏နှလုံးသားထဲမှ တွားထွက်လာပြီး တည်ငြိမ်နေသော လက်တွေ့ဘဝကို ဖျက်ဆီးပစ်လိမ့်မည်။

ဒါပေမဲ့ အဲ့ဒါက မှန်ကန်တဲ့အရာပဲလား။ အမှန်တရားကို ထုတ်ပြပြီး အိပ်မက်ဆိုးကို လက်တွေ့အဖြစ် ပြောင်းလဲပစ်ဖို့လား။ ကောင်းမင်သည်လည်း သူ၏လက်ရှိဘဝကို ဆုံးရှုံးရပေလိမ့်မည်။ သူ၏အိမ်၊ လျိုယီနှင့် ကံကြမ္မာကပေးထားသော လက်ဆောင်များကို သူဆုံးရှုံးရပေလိမ့်မည်။

လျင်မြန်စွာ ကြီးထွားလာသော အမြစ်များသည် ထိုအထပ်၏ သုံးပုံနှစ်ပုံကို သိမ်းပိုက်လိုက်သည်။ ၎င်းတို့သည် ဓာတ်လှေကားတွင်းမှတစ်ဆင့် အခြားအထပ်များဆီသို့ တွားတက်ရန် ကြိုးစားလိုက်သည့်အခါ မှန်တင်ခုံပေါ်မှ သာမန်ဓားချက်ရာမှာ သတိပေးချက်တစ်ခုအလား ရုတ်တရက် လင်းလက်လာလေသည်။

ထိုဓားချက်ရာမှာ တိမ်သည်။ ၎င်းသည် မှန်တင်ခုံကိုပင် ထိခိုက်စေခြင်းမရှိပေ။၎င်းသည် လိပ်ပြာပုံစံကွက်များကိုသာ ဖြတ်တောက်ထားခြင်းဖြစ်သည်။ သို့သော် ထိုမျှနှင့်ပင် ဓားချက်ရာသည် အမြစ်များကို တည်ငြိမ်သွားစေခဲ့သည်။ ၎င်းသည် မရဏအဆောက်အအုံ၏ ဖွဲ့စည်းပုံကို ဖျက်ဆီးခြင်း သို့မဟုတ် ကစားသမားများကို ဒုက္ခပေးခြင်း မရှိတော့ဘဲ မှန်တင်ခုံနှင့်အတူ ယှဉ်တွဲတည်ရှိရန် ရွေးချယ်လိုက်သည်။

အပင်မြစ်များက နံရံထဲသို့ တွားဝင်သွားကြသည်။ ပြတင်းပေါက် အပြင်ဘက်ရှိ အနက်ရောင် မြူခိုးများမှာ နောက်ဆုတ်သွားကြသည်။ မရဏအဆောက်အအုံ၏ နယ်မြေမှာ သိသိသာသာ ကျယ်ပြန့်လာလေသည်။ မြူခိုးထဲသို့ ရောက်သွားသော အမြစ်များသည် ဆန့်ထွက်သွားပြီး မရဏ အဆောက်အအုံ၏ အက်ကြောင်းများကို ကုသရန်အတွက် မြူခိုးထဲမှ တစ်စုံတစ်ခုကို စုပ်ယူနေဆဲဖြစ်ကြောင်း ကစားသမားအားလုံး သတိပြုမိလိုက်ကြသည်။

အစ်ကိုချုံက ဓားကို ပြန်ချလိုက်သည်။ သူ ကောင်းမင်ကို လှမ်းကြည့်လိုက်သည်။ ကောင်းမင်သည် မှန်တင်ခုံရှေ့တွင် ခေါင်းငုံ့၍ မတ်တပ်ရပ်နေပြီး ဘာမှမပြောပေ။