ခင်ဗျားတို့ စဉ်းစားကြည့်

ဧရာမသစ်ပင်ကြီးသည် မှန်တင်ခုံပေါ်တွင် တွယ်ကပ်ပေါက်ရောက်လာပြီး မရဏ အဆောက်အအုံနှင့် အတူ ယှဉ်တွဲတည်ရှိလာသည်။ တံခါးမှာလည်း အမြစ်များဖြင့် ဖုံးလွှမ်းသွားသည်။ ထိုဧရာမပြောင်းလဲမှုကြီးက ဧည့်ခန်းမထဲရှိ လူတိုင်း၏ အာရုံကို ဆွဲဆောင်လိုက်သည်။ အခြားအထပ်များမှ ကစားသမားများသည်လည်း ဓာတ်လှေကားဖြင့် အလျင်အမြန် ဆင်းလာကြသည်။ သူတို့ထဲမှ အများစုသည် ကြောက်မက်ဖွယ်ကောင်းသော လက်နက်များကို ကိုင်ဆောင်ထားကြသည်။

မည်သူမှ မလှုပ်ရှားကြပေ။ ကောင်းမင်မှာ သူရရှိလိုက်သော ဆုလာဘ်များကို ပြန်လည်သုံးသပ်နေဆဲ ဖြစ်သည်။ သွေးသစ်စေ့သည် မှန်တင်ခုံထဲရှိ ယဇ်ပစ္စည်းများကို ဝါးမြိုလိုက်ပြီး မရဏ အဆောက်အအုံအတွင်းရှိ အဆိုးမြင်စိတ်ခံစားချက်များကို စုပ်ယူလိုက်သည်။ ၎င်းသည် မရဏ အဆောက်အအုံကို အပိုင်စီးရန် ကြိုးစားချိန်တွင် ဓားချက်ရာ၏ သတိပေးခံလိုက်ရသည်။ နောက်ဆုံးတွင် ၎င်းသည် ထိုခြိမ်းခြောက်မှုနှင့်အတူ ယှဉ်တွဲတည်ရှိရန် ရွေးချယ်လိုက်ခြင်းဖြစ်သည်။

သားစားကြူးနတ်ဘုရား၏ ပုံစံကွက်သည် မှန်တင်ခုံပေါ်တွင် ပေါ်လာပြီး ၎င်းသည် မှန်တင်ခုံ၏ တတိယမြောက် နတ်ဘုရားပုံစံကွက် ဖြစ်လာလေသည်။ ၎င်းကြောင့် ကောင်းမင်မှာ ဝင်ခွင့် အခွင့်အရေးများစွာ ရရှိခဲ့သည်။ သူသည် မရဏ အဆောက်အအုံရှိ မည်သည့်အခန်းထဲသို့မဆို လွတ်လပ်စွာ ဝင်ထွက်နိုင်ပြီး အမြစ်များကို အသုံးပြု၍ မည်သည့်ကစားသမားကိုမဆို အပြင်သို့ အတင်းအကျပ် မောင်းထုတ်နိုင်သည်။ သူ တစ်စုံတစ်ယောက်ကို မသတ်သရွေ့ ထိုဓားချက်ရာက သူ့ကို ကန့်သတ်မည်မဟုတ်ပေ။ ထို့အပြင် ကောင်းမင် ရရှိလိုက်သော အကြီးမားဆုံး ဆုလာဘ်မှာ မှန်တင်ခုံ ဖြစ်သည်။ ၎င်းသည် နှင်းတောထဲက စံအိမ်အိပ်မက်ဆိုးရှိ တံခါးနှင့် ဆင်တူသည်။သို့သော်လည်း ၎င်းက တည်နေရာတစ်ခုတည်းသို့ သွားခြင်းမဟုတ်ပေ။ ယဇ်ပစ္စည်းပေါ် မူတည်၍ မတူညီသော အိပ်မက်များဆီသို့ ဦးတည်သွားနိုင်ပေသည်။

အစေ့သည် ကြီးထွားလာပြီးနောက် ကောင်းမင်သည် အခြားအပင်နှစ်ပင်၏ တည်ရှိမှုကို အာရုံခံနိုင်လာသည်။ သူသည် မည်သည့်ယဇ်ပစ္စည်းမှ မသုံးဘဲ ထိုအပင်နှစ်ပင်ရှိရာ အိပ်မက်ဆိုးများဆီသို့ ခရီးသွားနိုင်ပြီဖြစ်သည်။

"ငါသာ အလိုရှိရင် ဒီမှန်တင်ခုံနဲ့ စံအိမ်အိပ်မက်ဆိုးထဲက တံခါးကို သုံးပြီး ရက်စက်တဲ့ ကစားသမားတွေကို မသေဆေးကုမ္ပဏီရဲ့ ဓာတ်ခွဲခန်းကြွက်တွေရဲ့ ဦးနှောက်ထဲအထိ ပို့ပေးလိုက်လို့ရတယ်"

ကောင်းမင်၏ မျက်လုံးများမှာ နီရဲလာပြီး ရူးသွပ်သော အကြံအစည်တစ်ခု ပေါ်လာတော့သည်။

"ငါ့ရဲ့ ဝင်ခွင့်အဆင့်ကို အဆင့် ၅ ရောက်အောင် ပိုမြန်မြန် လုပ်ရတော့မယ့်ပုံပဲ"

ကောင်းမင် ရုတ်တရက် ကျောစိမ့်သွားသည်။သူ နောက်သို့ လှည့်ကြည့်လိုက်ရာ သူ့ထံမှ သုံးမီတာခန့်အကွာတွင် လက်ညှိုးတစ်ချောင်း ရောက်နေသည်ကို တွေ့လိုက်ရသည်။

"မင်း မှန်တင်ခုံထဲကို ဘာထည့်လိုက်တာလဲ"

ထိုလူသည် လက်ကို ပြန်မချပေ။ သူသည် ဝတ်ရုံနက်ကို ခြုံထားသည်။သူ၏လက်သည်းပေါ်တွင် 'ဝိညာဉ်ပြန်လာခြင်း' ဟု ထွင်းထုထားသည် ။

"ကျောက်ကု... စိတ်အေးအေးထားပါ၊ မရဏ အဆောက်အအုံ ပျက်စီးသွားတာ မဟုတ်ပါဘူး၊ အက်ကြောင်းဟောင်းတွေတောင် ပြန်ကောင်းသွားသေးတယ်၊ ဒါတွေက ကောင်းမင် ပေးလိုက်တဲ့ ယဇ်ပစ္စည်းဟာ မရဏ အဆောက်အအုံအတွက် အများကြီး အထောက်အကူဖြစ်တယ်ဆိုတာ သက်သေပြနေတာပဲ"

အစ်ကိုချုံက တည်တည်ငြိမ်ငြိမ်ဖြင့် ကောင်းမင်နှင့် ထိုလူကြားတွင် ဝင်ရပ်လိုက်သည်။

"ငါ ထပ်မေးမယ်... မင်း မှန်တင်ခုံထဲကို ဘာထည့်လိုက်တာလဲ"

ထိုလူ၏ အသံမှာ မည်သည့် စိတ်ခံစားချက်မှ မပါဘဲ တည်ငြိမ်နေသော်လည်း စိတ်အနှောင့်အယှက် ဖြစ်စရာကောင်းလှသည် ။

"ခင်ဗျား တိုက်ချင်ရင်တော့ ကျုပ်အဆင်သင့်ပဲနော်"

ကောင်းမင်သည် မှန်တင်ခုံရှေ့တွင် မတ်တပ်ရပ်လိုက်သည်။ သားစားကြူးနတ်ဘုရား၏ အရိပ်သည် ပြန့်ကားလာသည် ။

ထိုကစားသမားများ အားလုံးသည် တားမြစ်ဖြစ်ရပ်ကို ကြုံတွေ့ခဲ့ရသူများဖြစ်သည်။သူတို့သည် ၎င်းကြောင့်ပင် ပြောင်းလဲသွားခဲ့ကြသူများ ဖြစ်သည်။ သူတို့ထံမှ တိုင်းတာ၍မရသော ဖိအားများ ထွက်ပေါ်နေသည်။ အစ်ကိုချုံသည် ကောင်းမင် ကြောက်လန့်သွားမည်ကို စိုးရိမ်သဖြင့် လူတိုင်းကို စိတ်အေးအေးထားရန် ပြောလိုက်သည်။သို့သော်လည်း ကောင်းမင်သည် မကြောက်ရုံတင်မက ကစားသမားများကိုပင် ရန်စနေကြောင်း သူသဘောပေါက်လိုက်မိလိုက်သည် ။

ကောင်းမင်သည် မရဏ အဆောက်အအုံအပေါ် သူ့ဝင်ခွင့် အဆင့်အတန်းမှာ မည်မျှအထိ ရှိသည်ကို စမ်းသပ်လိုနေခြင်းဖြစ်သည်။

"သူက မသေဆေးကုမ္ပဏီရဲ့ သူလျှိုမဟုတ်ဘူး၊ ဒါကြောင့် သူက ငါတို့ရန်သူ မဟုတ်ဘူး"

သတင်းအချက်အလက် ဖလှယ်ရေး စင်တာမှ အက်ရှရှအသံတစ်ခု ထွက်ပေါ်လာသည်။ 'ငါ့ဆရာက ငါ့ကို ဘေးကပ်ဆိုးထဲ လှူလိုက်တယ်' ဆိုသူက လမ်းလျှောက်လာသည်။ လူအုပ်ကြီးက ဘေးသို့ ဖယ်ပေးလိုက်ကြသည်။ ထိုလူငယ်က ခလုတ်တစ်ခုကို နှိပ်လိုက်ရာ ဧည့်ခန်းမရှိ မော်နီတာတွင် ကောင်းမင်၏အချက်အလက်များ ထွက်ပေါ်လာသည်။မှန်ပေသည် ထိုအချက်အလက်များမှာ လူအများသိနေသောအရာများ ဖြစ်သည်။ကောင်းမင်သည် ကျောင်းသားများကို ကယ်တင်ရန် သူ၏အသက်ကို ရင်းခဲ့သည်ကို တွေ့လိုက်ရသောအခါ လူအုပ်ကြီး၏ ရန်လိုမှုမှာ လျော့ပါးသွားသည်။ ထို့နောက် ကောင်းမင်ကို မသေဆေးကုမ္ပဏီက ကုသရန် ခေါ်သွားခဲ့ပြီး သူ၏ခန္ဓာကိုယ်ဒဏ်ရာများမှာ မြန်မြန်ဆန်ဆန် သက်သာလာသော်လည်း ဦးနှောက်မှာမူ ပျက်စီးသွားပုံရသည်။ ၎င်းကိုမြင်သည့်အခါ အချို့က ရယ်မောလိုက်ကြသည်။ အဘယ်ကြောင့်ဆိုသော် သူတို့အများစုမှာလည်း ကုသပေးမည်ဟု အကြောင်းပြကာ ဦးနှောက်ခွဲစိတ်မှု ခံခဲ့ရသည့် နည်းလမ်းဟောင်းဖြင့်ပင် လှည့်ဖြားခံခဲ့ရခြင်းကြောင့် ဖြစ်သည် ။

"ကောင်းမင်က ကျုပ်တို့နဲ့ အတွေ့အကြုံတူတယ်၊ သူ့ဘဝကလည်း မသေဆေးကုမ္ပဏီကြောင့် ပျက်စီးခဲ့ရတာပဲ၊ ကွာခြားချက်ကတော့ သူဟာ သူ့ဘာသာသူ ပြန်နိုးထလာနိုင်တာပဲ၊ ဒါက မသေဆေးတောင် မျှော်လင့်မထားတဲ့ အချက်ပဲ"

ထိုလူငယ်သည် သူ့အသက်အရွယ်ထက် ရင့်ကျက်ပုံရသည်။သူသည် ကစားသမားများ၏ ယုံကြည်မှုကိုလည်း ရရှိထားသည် ။

"ဒီနေရာက ငါတို့ရဲ့ စုရပ်အနည်းငယ်ထဲက တစ်ခုပဲ၊ ဘာမှ မှားယွင်းသွားလို့မရဘူး"

ကျောက်ကုသည် သူ၏လက်ညှိုးကို ပြန်ချလိုက်သော်လည်း သူ၏ သဘောထားမှာ ပြင်းထန်နေဆဲဖြစ်သည် ။

"ဒီပြောင်းလဲမှုရဲ့ နောက်ကွယ်က ဘာလဲဆိုတာ ငါတို့ သိမှရမယ်"

အစ်ကိုချုံမှာ အကူညီမဲ့သွားသည်။သူသည် သူ့မျက်နှာပေါ်မှ ဒဏ်ရာများကို ကုတ်ဖြစ်လိုက်ပြီး နောက်ဆုံးတွင် ကောင်းမင်ဘက်သို့ လှည့်လာသည်။

"လူတိုင်းကို ပြောပြလိုက်ပါလား၊ အားလုံး ခြေတစ်လှမ်းစီ ဆုတ်ပေးကြတာပေါ့၊ ဘယ်လိုပဲဖြစ်ဖြစ် ငါတို့က မဟာမိတ်တွေပဲလေ၊ မင်း သူတို့ရဲ့ ယုံကြည်မှုကို ရသွားရင် သူတို့က မင်းရဲ့ကျောကို လုံအောင် ကြည့်ပေးကြလိမ့်မယ်"

"ကျုပ် မပြောချင်လို့ မဟုတ်ပါဘူး၊ ဒါပေမဲ့ ကျုပ် ခင်ဗျားတို့ကို မယုံသေးဘူး၊ မသေဆေးထဲကို ထိုးဖောက်ဝင်ရောက်နိုင်ဖို့ ကျုပ် အများကြီး ကြိုးစားခဲ့ရတာ၊ ဒီထဲက တစ်ယောက်ယောက်က သူတို့အတွက် အလုပ်လုပ်နေရင် ကျုပ် ချက်ချင်းဖော်ထုတ်ခံလိုက်ရမှာပေါ့"

ကောင်းမင်က အပေးအယူလုပ်လိုက်သည်။

"ဒါပေမဲ့ ဒီလျှို့ဝှက်ချက်ကို ဒီက စီမံခန့်ခွဲသူတွေကိုတော့ ကျုပ် မျှဝေနိုင်ပါတယ်"

အစ်ကိုချုံက သဘောပေါက်သွားသည်။ ထိုလူငယ်နှင့် ကစားသမားအချို့ကို အချက်ပြလိုက်သည်။ သူတို့သည် ဧည့်ခန်းမမှ ထွက်ခွာ၍ ဘေးဘက်ရှိ အခန်းငယ်တစ်ခုထဲသို့ ဝင်လိုက်ကြသည် ။

"အခု ပြောလို့ရပြီလား"

သတင်းအချက်အလက် လဲလှယ်ရေးစင်တာမှ လူငယ်သည် အဝတ်အမည်းဖြင့် ဖုံးအုပ်ထားသော ဖန်ပုလင်းကြီးကို ပွေ့ချီထားသည်။ ထိုအိုးထဲတွင် ရှပင်း ရှိနေခြင်းဖြစ်နိုင်သည် ။

"ကျုပ် ခွဲစိတ်မှုခံနေရတုန်းက အနက်ရှိုင်းဆုံးအဆင့် အိပ်မက်ဆိုးတစ်ခုထဲကို ရောက်သွားခဲ့တယ်၊ အဲ့ဒီတုန်းက အဲ့ဒီအိပ်မက်ထဲကနေ ယူလာခဲ့တဲ့ အစေ့တစ်စေ့ကို မှန်တင်ခုံထဲ ထည့်လိုက်တာပါ၊ ကျုပ်သွေးနဲ့ အဲ့ဒီအပင်ကို ကြီးထွားစေခဲ့တာလို့ ကျုပ်ယုံကြည်တယ်၊ အဲ့ဒီလို အစေ့ သုံးစေ့ရှိတယ် ၊ နှစ်စေ့ကိုတော့ မသေဆေးကုမ္ပဏီပိုင်တဲ့ အိပ်မက်ဆိုးနှစ်ခုထဲမှာ ကျုပ် စိုက်ခဲ့ပြီးပြီ"

ကစားသမားများသည် ကောင်းမင်၏ စကားကို အာရုံစိုက်၍ နားထောင်နေကြသည်။

"အဲ့ဒီအပင်သုံးပင်က တစ်ခုနဲ့တစ်ခု ချိတ်ဆက်နေပြီး အိပ်မက်ဆိုးတွေထဲမှာ အဆုံးမရှိ ကြီးထွားနေကြတယ်၊ သူတို့က အဆိုးမြင် စိတ်ခံစားချက်တွေနဲ့ ဝိညာဉ်တွေကို စားသုံးကြတယ်၊ လုံလောက်တဲ့အချိန်ရရင် သူတို့ဟာ မတူညီတဲ့ အိပ်မက်ဆိုးတွေကို ထိုးဖောက်ပြီး ကျုပ် အသုံးပြုလို့ရမယ့် လမ်းကြောင်းတွေ ဖြစ်လာလိမ့်မယ်"

ကောင်းမင် ထိုသို့ပြောလိုက်သည့်အခါ ကစားသမားများ၏ မျက်လုံးများ ပြောင်းလဲသွားသည်။ ၎င်းသည် ဘာကိုဆိုလိုကြောင်း သူတို့ သဘောပေါက်သွားကြသည် ။

အကယ်၍ ကောင်းမင်သာ မသေဆေးကုမ္ပဏီဘက်က ဖြစ်နေခဲ့လျှင် သူသည် ထိုအပင်များကို အသုံးပြု၍ မသေဆေးကုမ္ပဏီကို ဤမရဏအဆောက်အအုံထဲသို့ ခေါ်ဆောင်လာနိုင်ပေသည်။ ဖန်ပုလင်းကြီးပင် တုန်ခါသွားသည်။ စီမံခန့်ခွဲသူများ တစ်ယောက်ကိုတစ်ယောက် ကြည့်လိုက်ကြသည်။ လေထုမှာ အေးစက်သွားသည် ။

"ကိုယ့်ကိုယ်ကိုယ် ပြန်ကြည့်ကြပါဦး"

ကောင်းမင်က စားပွဲကို ခေါက်လိုက်သည်။

"ဒီစွမ်းအားကို သုံးပြီး မသေဆေးကုမ္ပဏီရဲ့ လျှို့ဝှက်ဓာတ်ခွဲခန်းတွေထဲ ဝင်ဖို့ ခင်ဗျားတို့ စဉ်းစားဖူးလား၊ ကလဲ့စားချေဖို့ မစဉ်းစားဖူးဘူးလား"

ကောင်းမင်၏ စကားများသည် ဆွဲဆောင်မှုများဖြင့် ပြည့်နှက်နေသည် ။

"ခင်ဗျားတို့ ဘာပဲတွေးတွေး ကျုပ်ကတော့ အနက်ရှိုင်းဆုံးကမ္ဘာဆီကို ပြန်သွားနိုင်မယ့် လမ်းကြောင်းတစ်ခုကို ပြန်တည်ဆောက်ဖို့ ရည်ရွယ်ထားတယ်၊ ကျုပ်မှာ အဲ့ဒီကို ပြန်သွားရမယ့် ကိုယ်ပိုင်အကြောင်းပြချက် ရှိနေတယ်"