အခန်း (၁၈၈)

"ဂိုဏ်းချုပ်လီ... အဆင်ပြေရဲ့လား"

လီယောင်း လေထဲတွင် ဝဲပျံနေသော နေရာသို့ ချဉ်းကပ်လာရင်း ဂိုဏ်းချုပ်ကြီးများက တစ်ပြိုင်နက်တည်း အော်မေးလိုက်ကြသည်။ သူမသည် ကောင်းကင်ယံတွင် ငြိမ်သက်စွာ ရပ်နေဆဲဖြစ်ပြီး သူမ၏ ငွေရောင်ဆံနွယ်များက လေထဲတွင် တလွင့်လွင့်နှင့် ကျောခိုင်းထားဆဲပင်။

တိတ်ဆိတ်မှုက စိတ်မသက်မသာ ဖြစ်စရာကောင်းလောက်အောင် ကြာရှည်နေသည်။ ဝမ်ကျန့်က သူ၏လည်ချောင်းကို တစ်ချက်ရှင်းလိုက်ပြီး ပို၍စိုးရိမ်တကြီးဖြင့် ထပ်မံခေါ်လိုက်သည်။ "ဂိုဏ်းချုပ်"

လီယောင်းသည် သူတို့ကို ရင်ဆိုင်ရန် ဖြည်းဖြည်းချင်း လှည့်ကြည့်လိုက်သည်။ သူမ၏ မျက်လုံးများနှင့် ဆုံလိုက်ရသည့် ခဏမှာပင် ဝိညာဉ်ဖွဲ့စည်းခြင်းအဆင့်ပညာရှင်အားလုံးမှာ ကိုယ်လက်သေသွားသကဲ့သို့ တောင့်တင်းသွားကြသည်။ သူမ၏ အကြည့်ထဲတွင် သူတို့၏ ဝိညာဉ်များကိုပင် တုန်လှုပ်သွားစေသည့် အေးစက်ပြီး ကရုဏာကင်းမဲ့သော သတ်ဖြတ်လိုစိတ်များ ကိန်းအောင်းနေသည်။

"ဘာလို့ အဲဒီလို အကြည့်မျိုးနဲ့ ကြည့်နေတာလဲ"

ကျင်းကွမ်က တိုးတိုးလေး ရေရွတ်လိုက်ရင်း မသိမသာ နောက်သို့ ခြေတစ်လှမ်း ဆုတ်လိုက်သည်။ အခြားဂိုဏ်းချုပ်များသည်လည်း သူ၏ လုပ်ရပ်ကို လိုက်ပါလုပ်ဆောင်မိကြပြီး သူတို့၏ ပင်ကိုယ်အသိစိတ်က သူတို့ရှေ့တွင်ရှိနေသော အန္တရာယ်အတွက် သတိပေးသံများ အဆက်မပြတ် မြည်ဟီးနေသည်။

လီယောင်းက ဘာမှပြန်မပြောပေ။ စကားတစ်လုံးမျှ မဆိုဘဲ သူမသည် တစ်ဖက်သို့ လှည့်လိုက်ကာ ကောင်းကင်ယံကို ဖြတ်သန်း၍ ပျံသန်းသွားတော့သည်။ သူမ ပျောက်ကွယ်သွားရာ မိုးပြာရောင်တိမ်တိုက်ဂိုဏ်းဆီသို့ လျှပ်စီးတန်းများသာ ကျန်ရစ်ခဲ့တော့သည်။

သူမ ထွက်ခွာသွားပြီးနောက် ဂိုဏ်းချုပ်ကြီးများသည် နှလုံးခုန်အနည်းငယ်စာမျှ တောင့်တင်းနေဆဲဖြစ်ပြီးမှ သူတို့၏ ပုခုံးပေါ်မှ ဖိအားကြီးက ဖြည်းဖြည်းချင်း လျော့ကျသွားသည်။ သူတို့အားလုံး တစ်ပြိုင်နက်တည်း သက်ပြင်းချလိုက်ကြသည်။

"သူ ဘာဖြစ်နေတာလဲ"

ကျင်းကွမ်က သူ၏နဖူးမှ ချွေးများကို သုတ်ရင်း တုန်ရင်နေသော အသံဖြင့် မေးလိုက်သည်။

ဝမ်ကျန့်က ခေါင်းကိုသာ ခါလိုက်မိသည်။ ရန်သူကို သုတ်သင်ပြီးသည့်တိုင်အောင် မလျော့ပါးသွားသော ဤမျှပြင်းထန်သည့် သတ်ဖြတ်လိုစိတ်မျိုး ဖြစ်ပေါ်လာအောင် ဘာတွေများ ဖြစ်ခဲ့တာလဲ။

သူမထံမှ သူခံစားလိုက်ရသော သတ်ဖြတ်လိုသည့် အရှိန်အဝါမှာ ရာစုနှစ်ပေါင်းများစွာ သွေးချောင်းစီးခဲ့သည့် မိစ္ဆာကျင့်ကြံသူ ဝူမင်ဂိုဏ်းချုပ်ထက်ပင် ပို၍ ကြောက်စရာကောင်းနေသည်။

မလိုလားအပ်သော အတွေးတစ်ခု ဝင်ရောက်လာချိန်တွင် ဝမ်ကျန့်၏ ကျောရိုးတစ်လျှောက် စိမ့်ခနဲ ဖြစ်သွားသည်။ ဂိုဏ်းချုပ်အသစ်တစ်ယောက် မွေးဖွားလာတာကို သူ မြင်တွေ့နေရခြင်း မဟုတ်ပါစေနှင့်ဟုသာ သူ ဆုတောင်းနေမိသည်။

ဝမ်ကျန့်သည် သူ၏ မှောင်မည်းသော အတွေးများကို ဘေးဖယ်ထားလိုက်ပြီး အောက်ဘက်ရှိ ပြန့်ကျဲနေသော မဟာမိတ်တပ်ဖွဲ့များကို အသံကျယ်ကျယ်ဖြင့် လှမ်းပြောလိုက်သည်။

"အားလုံးပဲ... စစ်မြေပြင်ကို ရှင်းလင်းကြ ဒဏ်ရာရတဲ့သူတွေကို ဘေးကင်းရာကို အမြန်သယ်ဆောင်ကြ"

အောက်ဘက်ရှိ အသက်ရှင်ကျန်ရစ်သူများသည် ချက်ချင်းပင် လှုပ်ရှားလိုက်ကြသည်။

တစ်ချိန်တည်းမှာပင် လျိုဖုန်းသည် မိစ္ဆာကျင့်ကြံသူတစ်ဦး၏ အလောင်းဘေးတွင် ရပ်နေသည်။ သူ၏ သန့်ရှင်းသော ဝတ်ရုံပေါ်တွင် သွေးစများ စွန်းထင်နေသည်။ သူသည် သူ၏ဖိနပ်ဖြင့် ကျဆုံးနေသော ရန်သူ၏ ဦးခေါင်းခွံကို တဂျွတ်ဂျွတ်မြည်အောင် နင်းခြေလိုက်ရာ ဦးနှောက်နှင့် အရိုးစများမှာ လောင်ကျွမ်းနေသော မြေပြင်ပေါ်သို့ ပြန့်ကျဲသွားတော့သည်။ သူသည် သူ၏လက်မောင်းကို မြှောက်၍ ကြည့်လိုက်ရာ တိုက်ပွဲအတွင်း ထွက်ပေါ်လာခဲ့သော နဂါးအကြေးခွံများမှာ အရေပြားအောက်သို့ ဖြည်းဖြည်းချင်း ပြန်လည်ဝင်ရောက်သွားပြီး ချောမွေ့သော အသားအရေသာ ကျန်ရစ်ခဲ့တော့သည်။

"အားနည်းနေသေးတာပဲ"

မောပန်းနွမ်းနယ်မှုများက နောက်ဆုံး၌ သူ့ကို ဖိစီးလာသဖြင့် သူသည် လေးလံစွာ အသက်ရှူရင်း တိုးတိုးလေး ရေရွတ်လိုက်သည်။ သူ၏ ခြေထောက်များမှာ အားအင်ကုန်ခမ်းသွားပြီး မြေပြင်ပေါ်သို့ ပုံရက်သား လဲကျသွားတော့သည်။

ဂိုဏ်းချုပ်နှင့် လီယောင်းတို့၏ တိုက်ပွဲမြင်ကွင်းမှာ သူ၏စိတ်ထဲတွင် တဖန်ပြန်လည် ပေါ်လာသည်။ သူတို့သည် တကယ်ပဲ မျိုးဆက်တစ်ခုတည်းက ကျင့်ကြံသူများ ဟုတ်ပါ့မလား။

သူတို့နှစ်ဦးကြားက ကွာဟချက်က ဘယ်လိုလုပ်ပြီး ဒီလောက်အထိ ကြီးမားနေရတာလဲ။

သူသည် ပါရမီရှင်ဟု အခေါ်ခံရသည်ကို အမြဲတမ်း ဂုဏ်ယူခဲ့သူ ဖြစ်သော်လည်း လီယောင်း၏ စွမ်းအားကို မြင်တွေ့လိုက်ရချိန်တွင်မူ သူကိုယ်သူ သစ်သားဓားဖြင့် ကစားနေသည့် ကလေးငယ်တစ်ဦးကဲ့သို့ ခံစားလိုက်ရသည်။

သူ၏ အစောပိုင်းက အတွေးများကို သူ ပြန်လည်ရုပ်သိမ်းလိုက်သည်။ မဟုတ်သေးဘူး... သန့်စင်သော နယ်မြေများမှ ထိပ်တန်းပါရမီရှင်များပင်လျှင် သူမကို ယှဉ်နိုင်မည် မဟုတ်ပေဂိုဏ်းအကြီးအကဲများ ဖြစ်နေကြပြီဖြစ်သော ယခင်မျိုးဆက်မှ ပါရမီရှင်အချို့ဆိုလျှင် ဖြစ်

နိုင်ကောင်းသော်လည်း သူနှင့် မျိုးဆက်တူသူများထဲတွင်မူ သူမကို ယှဉ်နိုင်သူ တစ်ဦးမှ ရှိလိမ့်မည်မဟုတ်ပေ။

ထိုစဉ် အရိပ်တစ်ခုက သူ့အပေါ်သို့ ကျရောက်လာပြီး ကြမ်းတမ်းသော လက်တစ်ဖက်က သူ၏ မြင်ကွင်းထဲသို့ ရောက်ရှိလာသည်။ မော့ကြည့်လိုက်သောအခါ စိုးရိမ်တကြီး ကြည့်နေသော ဝမ်ကျန့်၏ မျက်နှာကို တွေ့လိုက်ရသည်။

"သခင်လေး... ဒီလောက်အထိ ပြင်းထန်တဲ့ တိုက်ပွဲထဲမှာ သခင်လေး ကိုယ်တိုင် ပါဝင်ဖို့ မလိုပါဘူး"

ဝမ်ကျန့်က ပြောလိုက်သည်။

လျိုဖုန်းသည် ပင်ပန်းနွမ်းနယ်နေသော အပြုံးတစ်ခုဖြင့် ကမ်းပေးထားသော လက်ကို ဆွဲကိုင်ကာ မတ်တတ်ရပ်လိုက်သည်။

"အဆင်ပြေပါတယ်။ ကိုယ်လက်နည်းနည်း လှုပ်ရှားချင်ရုံတင်ပါ"

သူက ပြန်ဖြေလိုက်သည်။

သူ၏ စိတ်ထဲတွင်မူ ဤတိုက်ပွဲမှရရှိခဲ့သော မမျှော်လင့်ထားသည့် အကျိုးကျေးဇူးများကို သူ ပြန်လည်စဉ်းစားနေမိသည်။ မိစ္ဆာကျင့်ကြံသူ အများအပြားမှာ ထူးဆန်းသော ပုတ်သင်ညိုနှင့် မြွေအနွယ်ဝင် သွေးမျိုးဆက်များကို ပိုင်ဆိုင်ထားကြသည်။ ၎င်းတို့မှာ သူ၏ နဂါးသွေးမျိုးဆက်လောက် မစွမ်းထက်သော်လည်း သူ၏ မသေနိုင်သော သန့်စင်ခြင်း ကျမ်းစာက ထိုသူတို့၏ အဆီအနှစ်များကို စုပ်ယူသန့်စင်စေနိုင်ခဲ့သဖြင့် သူ၏ နဂါးသွေးမျိုးဆက်ကို သိသိသာသာ တိုးတက်လာစေခဲ့သည်။ ဤနှုန်းအတိုင်းဆိုလျှင် သူသည် မကြာမီ အဆင့်မြင့် သွေးမျိုးဆက်သို့ ရောက်ရှိနိုင်ပေလိမ့်မည်။

ဒါဆိုရင်ကော လီယောင်းကို ယှဉ်နိုင်ပါ့မလား။

သူသည် နောင်တရသလို ခေါင်းကို ခါလိုက်မိသည်။ ဖြစ်နိုင်ခြေ အလွန်နည်းပါးသည်။

ဝမ်ကျန့်သည် ထိုလူငယ်ကို ဂရုတစိုက် လေ့လာနေမိသည်။ သူသည် တိုက်ပွဲတစ်ခုလုံးတွင် လျိုဖုန်းကို စောင့်ကြည့်နေခဲ့ခြင်းဖြစ်ပြီး ရလဒ်များက သူ့ကို အတော်လေး အထင်ကြီးသွားစေသည်။ အလယ်ပိုင်းတိုက်ကြီးမှ ပါရမီရှင်တစ်ဦးပီပီထိုကောင်လေးသည် အခြေတည်ဝိညာဉ်နယ်ပယ် ကျင့်ကြံသူတစ်ဦးကို အမှန်တကယ် တိုက်ခိုက်သတ်ဖြတ်နိုင်ခဲ့သည်။ အားနည်းသော ကျင့်ကြံသူဖြစ်ပြီး လျိုဖုန်း၏ အားအင်များအားလုံး ကုန်ခမ်းသွားစေခဲ့သော်လည်း ၎င်းမှာ အလွန်ပင် ချီးကျူးစရာကောင်းသော စွမ်းဆောင်မှုတစ်ခု ဖြစ်သည်။

မှန်ပါသည်...

အကယ်၍သာ သူသည် လီယောင်း၏ အစွန်းကုန် သာလွန်လှသော စွမ်းအားပြပွဲကြီးကို မြင်တွေ့မထားခဲ့လျှင် ဤလုပ်ရပ်မှာ ယခုထက် ပို၍ အထင်ကြီးစရာကောင်းနေမည် ဖြစ်သည်။

ဝမ်ကျန့်သည် သက်ပြင်းတစ်ချက်ကို အရှည်ကြီး ချလိုက်မိသည်။ လျိုဖုန်း၏ ကျင့်ကြံခြင်း စိတ်ဓာတ်မှာ ဤမျှကြီးမားသော ယုံကြည်ချက် ကျဆင်းမှုကို ခံနိုင်ရည်ရှိပါစေဟုသာ သူ မျှော်လင့်နေမိသည်။ သို့မဟုတ်ပါက အတုမဲ့ ပါရမီရှင်တစ်ဦးနှင့် ဤမျှအထိ ကွာဟနေသည်ကို သိမြင်သွားခြင်းက သူ၏ ကျင့်ကြံခြင်း အခြေခံအုတ်မြစ်ကိုပင် ပြိုကွဲသွားစေနိုင်သောကြောင့်ပင်။

ရှန်းယွီသည် ဆေးလုံးများကို အာရုံစိုက်သန့်စင်နေစဉ် ရုတ်တရက် ရင်းနှီးနေသော ခံစားချက်တစ်ခုကြောင့် အလုပ်မှ လန့်နိုးသွားရသည်။ ၎င်းမှာ သူတည်ဆောက်ထားသော အစီအရင် အဖျက်ဆီးခံလိုက်ရသည့် ခံစားချက်ပင်။

"တောက် အခုလေးတင် ပြင်ထားတာကို"

သူက တိုးတိုးလေး ကျိန်ဆဲလိုက်ရင်း သူ၏ ဟင်းလင်းပြင်မီးလျှံကို အမြန်ငြှိမ်းသတ်ကာ ဆေးဖော်စပ်သည့် ကိရိယာများကို သိမ်းဆည်းလိုက်သည်။ သူ၏စိတ်ထဲတွင် အဆိုးဆုံးအခြေအနေကို ချက်ချင်း တွေးမိသွားသည်ဝိညာဉ်ပုံတူ၏ အစစ်အမှန်ကိုယ်ထည်က သူ့ကို လိုက်ရှာတွေ့သွားတာလား။

အကယ်၍သာ ထိုသို့ဆိုလျှင် လီယောင်း ရှုံးနိမ့်သွားပြီဟု ဆိုလိုတာလား။

ထိုအတွေးမှာ မဖြစ်နိုင်သလိုပင်။ လီယောင်းက ဘယ်လိုလုပ် အရှုံးပေးမှာလဲ။ အခု သူ ဘာဆက်လုပ်ရမလဲ။

သူ ထွက်ပြေးရန် အမြန်လှည့်လိုက်စဉ်မှာပင် သူ၏ နောက်ကျောဘက်၌ တစ်စုံတစ်ယောက်၏ တည်ရှိမှုကို ခံစားလိုက်ရသည်။ သန်မာသော လက်မောင်းအစုံက သူ၏ ခန္ဓာကိုယ်ကို နောက်မှနေ၍ တင်းကျပ်စွာ ဖက်တွဲလိုက်သည်။

"စီနီယာအစ်ကို..."

ထိုအသံမှာ တိုးညှင်းလွန်းလှသော်လည်း သူ ချက်ချင်း မှတ်မိလိုက်သည်။

ရှန်းယွီ၏ တစ်ကိုယ်လုံးတွင် စိတ်သက်သာရာရမှုလှိုင်းတစ်ခု ဖြတ်သန်းသွားတော့သည်။ သူမ အနိုင်ရခဲ့ပြီ။ သူမသည် ဤလျှို့ဝှက်နေရာကို ဘယ်လိုရှာတွေ့တာလဲဟု ခဏမျှ တွေးတောမိသော်လည်း အဖြေကို ချက်ချင်း ရိပ်မိလိုက်သည်။ ဧကရီက သူမကို ပြောပြလိုက်ခြင်းဖြစ်မည်ဟု သူ ခန့်မှန်းလိုက်သည်။

လီယောင်း၏ လက်မောင်းများက သူ့ကို ပိုမိုတင်းကျပ်စွာ ဖက်ထားသည်။ တိုက်ပွဲအတွင်းနှင့် တိုက်ပွဲအပြီးတွင် သူမကို လွှမ်းမိုးထားသော ဒေါသတရားများမှာ သူမ၏အတွင်း၌ တောက်လောင်နေဆဲပင်။ ပြင်းထန်လှသော ဒေါသအရှိန်ကြောင့် ပေါက်ကွဲထွက်သွားတော့မတတ် ခံစားနေရသည်။ သို့သော် စီနီယာအစ်ကိုနှင့် နီးကပ်လိုက်သည့် ခဏမှာပင် ထိုဒေါသများအားလုံး အရည်ပျော်သွားပြီး လုံးဝခြားနားသော ခံစားချက်တစ်ခုနှင့် အစားထိုးသွားတော့သည်။

သူမ၏ နှုတ်ခမ်းထောင့်တွင် မကောင်းဆိုးဝါးဆန်သော အပြုံးတစ်ခု ပေါ်လာပြီးနောက် ရုတ်တရက် စိတ်ဆန္ဒအသစ်တစ်ခုက သူမကို လွှမ်းမိုးသွားသည်။ သူမ သူ့ကို တိုက်ခိုက်ချင်နေမိသည်။

[အင်း... အဲဒါတော့ မရဘူးနော်]

ဧကရီ၏ အသံမှာ လီယောင်း၏ အသိစိတ်ထဲသို့ တိုးဝင်လာပြီးနောက် အတားအဆီး ချိုးဖျက်

ခြင်းနည်းစနစ်အတွက် ပေးထားသော သူမ၏ သက်တမ်းစွမ်းအင်များကို ချက်ချင်း ဖြတ်

တောက်လိုက်သည်။

[မင်းရဲ့ ကလေးကစားစရာတွေအတွက် ငါက အရင်းအနှီး အထုတ်မခံနိုင်ဘူး]

လီယောင်း၏ ခန္ဓာကိုယ်မှ တောက်ပသော အဖြူရောင်အလင်းတန်းများ ထွက်ပေါ်လာပြီး စွမ်းအင်များမှာ ပတ်ဝန်းကျင်၌ တဖြည်းဖြည်း လွင့်ပြယ်သွားသည်။ အသွင်ပြောင်းလဲမှုမှာ ပြောင်းပြန်ပြန်ဖြစ်လာပြီး သူမ၏ ငွေရောင်ဆံပင်များမှာ အပြာရောင် ဝိညာဉ်ပုံစံသို့…..

ထို့နောက်တွင်မူ သူမ၏ နဂိုအတိုင်း အနက်ရောင်ဆံပင်များအဖြစ်သို့ ပြန်လည် ရောက်ရှိသွားသည်။ သူမ၏ တောက်ပနေသော မျက်လုံးများမှာလည်း ပုံမှန်အရောင်သို့ ပြန်လည် မှိန်သွားတော့သည်။

အတားအဆီး ချိုးဖျက်ခြင်း၏ အာနိသင် လုံးဝကုန်ဆုံးသွားသည်နှင့်အမျှ သူမ၏ ခန္ဓာကိုယ်ထဲရှိ စွမ်းအင်အားလုံးမှာ ခမ်းခြောက်သွားတော့သည်။ ရှန်းယွီကို ဖက်ထားသော သူမ၏လက်များမှာ သိသိသာသာ လျော့ရဲသွားပြီးနောက် သူမသည် ရှန်းယွီ၏ ဆေးဘက်ဝင် အပင်များပေါ်သို့ အနောက်သို့ လန်ကျသွားတော့သည်။ သူမ၏ ခြေလက်များမှာ ခဲဆွဲထားသကဲ့သို့ ရုတ်တရက် လေးလံသွားသည်။

သူမသည် အသည်းအသန် ပြန်လည်ထရပ်ရန် ကြိုးစားသော်လည်း သူမ၏ ကြွက်သားများက သူမ၏ အမိန့်ကို လုံးဝ မနာခံတော့ပေ။

"ဘာတွေဖြစ်နေတာလဲ"

သူမ ဘာမှမတတ်နိုင်ဘဲ ဖြစ်နေသည်ကို သိလိုက်ရချိန်တွင် ထိတ်လန့်မှုများ စတင်ဝင်ရောက်လာတော့သည်။

[အတားအဆီးကို ချိုးဖျက်ဖို့ ငါ့ရဲ့ သက်တမ်းကို သုံးခဲ့ရပေမဲ့ တကယ်တမ်း အဲဒီစွမ်းအားတွေကို ထုတ်ဖော်ခဲ့ရတာက မင်းရဲ့ ခန္ဓာကိုယ်လေ]

ဧကရီက ရှင်းပြသည်။

[ဒါကြောင့် ခန္ဓာကိုယ်က ပြန်လည်သက်ရောက်လာတဲ့ ဒဏ်ကိုတော့ ရှောင်လွှဲလို့မရဘူး]

လီယောင်းသည် ဘာဖြစ်နေသည်ကို နောက်ဆုံးတွင် နားလည်သွားတော့သည်။ သူမ၏ ခန္ဓာကိုယ်သည် သဘာဝအတိုင်း တောင့်ခံနိုင်စွမ်းထက် ကျော်လွန်၍ မဖြစ်နိုင်သော လှုပ်ရှားမှုများနှင့် နည်းစနစ်များကို အတင်းအဓမ္မ လုပ်ဆောင်ခဲ့ရသည်။ ယခုမူ ထိုအတွက် ပေးဆပ်ရမည့်အချိန် ရောက်လာပြီဖြစ်သည်။

တကယ်တော့ ဤအခြေအနေက သူမအတွက် မဆိုးလှဟု ဆိုရမည်။ သူမသည် အားအင်ကုန်ခမ်းကာ ခုခံနိုင်စွမ်းမရှိဘဲ စီနီယာအစ်ကို၏ ရှေ့တွင် ကူကယ်ရာမဲ့ လဲလျောင်းနေရသည်။ အကယ်၍ သူက သူမကို အခွင့်ကောင်းယူပြီး အနည်းငယ်လောက် အနိုင်ကျင့်မည်ဆိုလျှင်ပင်... သူမ လုံးဝ စိတ်ဆိုးမည်မဟုတ်ပေ။ ထိုသို့တွေးလိုက်ရုံနှင့်ပင် သူမ၏ နှလုံးခုန်သံများ မြန်လာတော့သည်။

"ယောင်းယောင်း... အဆင်ပြေရဲ့လား"

ရှန်းယွီ၏ စိုးရိမ်တကြီး မေးသံကြောင့် သူမ၏ အတွေးများ ပြတ်တောက်သွားသည်။ သူသည် သူမ၏ ဘေးတွင် ဒူးထောက်ထိုင်ကာ ပခုံးကို ညင်သာစွာ လှုပ်ခါလိုက်သည်။ သူမဘက်က ဘာမှပြန်မပြောသဖြင့် သူ၏ မျက်မှောင်များမှာ ပို၍ ကြုတ်သွားတော့သည်။

မည်သည့် တုံ့ပြန်မှုမျှ မရှိသဖြင့် သူသည် သူမ၏ အခြေအနေကို စစ်ဆေးရန်နှင့် နှလုံးခုန်နှုန်းကို တိုင်းတာရန်အတွက် သူ၏ နွေးထွေးသော လက်ဖဝါးကို သူမ၏ ရင်ဘတ်ပေါ်သို့ တိုက်ရိုက် တင်လိုက်သည်။

'ဟုတ်ပြီ ဟုတ်ပြီ ဟုတ်ပြီ ဆက်လုပ်…'

လီယောင်းသည် စိတ်ထဲမှ အော်ဟစ်နေမိသည်။

သို့သော် သူမ ထိုခံစားချက်ကို အပြည့်အဝ မခံစားရသေးမီမှာပင် ရှန်းယွီသည် မျက်မှောင်ကြုတ်ကာ သူ၏လက်ကို လည်ပင်းဆီသို့ ရွှေ့လိုက်သည်။ သူမ၏ အသက်ရှင်သန်မှု လက္ခဏာများကို ပိုမိုတိကျစွာ သိရှိနိုင်ရန် သူ ကြိုးစားခြင်း ဖြစ်သည်။

'မဟုတ်ဘူး မဟုတ်ဘူး မဟုတ်ဘူး'

သူ၏ ဆေးပညာအတတ်ဖြင့် သေချာစွာ စစ်ဆေးပြီးနောက် သူမတွင် ပြင်းထန်သော ဒဏ်ရာမရှိဘဲ အစွန်းကုန် ပင်ပန်းနွမ်းနယ်နေခြင်းသာ ဖြစ်ကြောင်း ရှန်းယွီ အတည်ပြုနိုင်ခဲ့သည်။ သူသည် စိတ်အေးသွားသော အမူအရာဖြင့် လက်ကို ဖယ်လိုက်ပြီး သူ၏ သိုလှောင်လက်စွပ်ထဲသို့ လက်နှိုက်လိုက်သည်။

ကံကောင်းထောက်မစွာဖြင့် သူသည် ဤကဲ့သို့သော အခြေအနေမျိုးကို ကြိုတင်တွက်ဆထားပြီး ပြင်ဆင်ထားခဲ့သည်။ ဂိုဏ်းချုပ်ကြီးများ ပေးထားသော ဆေးဖော်စပ်ပစ္စည်းများကို အသုံးပြု၍ ဝိညာဉ်ဖွဲ့စည်းခြင်းအဆင့်ရှိသူများအတွက် အထူးရည်ရွယ်သော အဆင့် ၅ ကုသရေးဆေးလုံး အချို့ကို သူ ဖော်စပ်ထားခဲ့ခြင်း ဖြစ်သည်။ သူ၏ အောင်မြင်နှုန်းမှာ အတော်လေး ကောင်းမွန်သဖြင့် သူ့အတွက် ပိုလျှံနေသော ဆေးလုံး သုံးလုံးကို သိမ်းထားနိုင်ခဲ့သည်။

သူသည် အဖိုးတန်သော ဆေးလုံးတစ်လုံးကို သူမ၏ နှုတ်ခမ်းနားသို့ ဂရုတစိုက် တေ့ပေးလိုက်သော်လည်း လီယောင်းကမူ ဇွတ်တရွတ်နှင့် ပါးစပ်ကို မဖွင့်ဘဲ နေသည်။ သူက ညင်သာစွာ ချော့မော့သော်လည်း သူမက တမင်တကာ ခုခံနေကြောင်း သူ သိလိုက်ရသည်။

သူသည် သူမ၏ ပေါင်ကို တစ်ချက် ဆိတ်လိုက်ရာ သူမ နာကျင်မှုကြောင့် မျက်နှာပျက်သွားသည်။ သို့သော်လည်း သူမ၏ ပါးစပ်ကိုမူ တင်းတင်းစေ့ထားဆဲပင်။

သူမ သူ့ထံမှ ဘာကို လိုချင်နေတာလဲဟု သူ တွေးတောမိသည်။ ထို့နောက် သူမ၏ နှုတ်ခမ်းပုံစံလေးကို သေချာကြည့်လိုက်ရာ တစ်စုံတစ်ခုကို တောင်းဆိုနေသည့် အမူအရာဖြစ်နေကြောင်း တွေ့လိုက်ရသဖြင့် သူမ၏ အကဲပိုလွန်းလှသော လုပ်ရပ်ကြောင့် သူ မပြုံးဘဲ မနေနိုင်တော့ပေ။

သူမသည် ဝိညာဉ်ဖွဲ့စည်းခြင်းအဆင့် ပညာရှင်များကိုပင် ထိတ်လန့်စေသည့် ရန်သူများကို အနိုင်ယူနိုင်လောက်အောင် အစွမ်းထက်လှသော်လည်း တစ်ခါတစ်ရံတွင်မူ ယခုကဲ့သို့ ကလေးဆန်စွာ ပြုမူတတ်သေးသည်။

သူသည် သက်ပြင်းတစ်ချက်ကို အရှုံးပေးသလို ချလိုက်ရင်း ဆေးလုံးကို သူ၏ ပါးစပ်ထဲသို့ ထည့်လိုက်သည်။ ထို့နောက် သူမ၏ အနားသို့ ငုံ့ချလိုက်ကာ အနမ်းတစ်ခုမှတစ်ဆင့် ဆေးလုံးကို သူမ၏ ပါးစပ်ထဲသို့ ကူးပြောင်းပေးလိုက်တော့သည်။