အခန်း (၂၀၆)

ဧကရီ ဝင်လာသောအခါ လက်ကိုင်ပုဝါပေါ်မှ သွေးများကို မြင်လိုက်ရပြီး ချက်ချင်းပင် မျက်နှာဖြူဖျော့သွားသည်။ သူမ ဒူးထောက်ကာ ငိုကြွေးလျက် ပြောလိုက်သည်။

“အရှင်မင်းကြီး။ ကျေးဇူးပြုပြီး ဒေါသကိုထိန်းပါ။ ကျေးဇူးပြုပြီး ဒေါသမထွက်ပါနဲ့။ သွေးအန်တာ ရပ်သွားအောင် ကျွန်မတို့ မနည်းကြိုးစားထားရတာပါ။ နောက်ထပ် ပြန်ဖြစ်လို့မရဘူး။”

ဧကရာဇ်သည် နဂါးပလ္လင်ပေါ်တွင် စိတ်ပျက်လက်ပျက် ထိုင်ချလိုက်ပြီး မျက်နှာမှာ ညှိုးနွမ်းနေလျက် ကောင်းကင်သို့ မော့ကြည့်ကာ သက်ပြင်းချလိုက်သည်။

“ငါလို ဧကရာဇ်တစ်ပါးက ဘယ်လိုလုပ် ဒီလောက် သနားစရာ ကောင်းနေရတာလဲ။ ငါ့ရဲ့ ယုံကြည်ရတဲ့ ဝန်ကြီးတစ်ယောက်ကိုတောင် ငါ မကာကွယ်ပေးနိုင်ဘူး။”

“ဝမ်ဟွေ့က ငါ့ရဲ့ ငယ်သူငယ်ချင်းပဲ။ ကွေ့မင်းသားနဲ့အတူ ဆရာသခင်ကြီး နင်ဇောင်ဝူဆီမှာ သိုင်းပညာ သင်ကြားခဲ့ဖူးတယ်။ သစ္စာရှိတဲ့ ဝန်ကြီး။ တကယ်ကို သစ္စာရှိတဲ့ ဝန်ကြီးပါ။” ဧကရာဇ်က သက်ပြင်းချလိုက်သည်။

“ကွမ်ရှီးက အဲဒီလူတွေက နေ့တိုင်း လီမိသားစုနဲ့ ပူးပေါင်းပြီး အင်ပါယာဆီကနေ ငွေတွေအများကြီး စုပ်ယူနေကြတာ။ ဝမ်ဟွေ့က ကွမ်ရှီးမှာရှိတဲ့ လီမိသားစုရဲ့ အမာခံစခန်း အားလုံးကို ဖျက်စီးပြီး လီမိသားစုဝင် အားလုံးကို သတ်ပစ်ခဲ့တယ်။ ရလဒ်အနေနဲ့ လီမိသားစုရဲ့ ဝင်ငွေထက်ဝက်လောက် ပြတ်တောက်သွားပြီး ပြန်လည်နာလန်ထူဖို့ အနည်းဆုံး နှစ်အတော်ကြာ အချိန်ယူရလိမ့်မယ်။ ဒါက အနောက်တောင်ပိုင်း စော်ဘွားမဟာမိတ်အဖွဲ့ကို စည်းရုံးဖို့ သူတို့ရဲ့ ကြိုးပမ်းမှုကို နှစ်အတော်ကြာ နှောင့်နှေးစေပြီး သူတို့ရဲ့ အင်အားကို ပြင်းပြင်းထန်ထန် ထိခိုက်စေတယ်လေ။”

ဧကရီက ပြောလိုက်သည်။ “ကျန်းနန်နယ်စားမင်း ကွမ်ရှီးမှာ ရှိနေတုန်းက လီဝမ်ဟွေ့ ဘာလို့ ဒီလို မလုပ်ခဲ့တာလဲ။ အဲဒီအချိန်တုန်းကဆိုရင် လီစော်ဘွားအိမ်တော် ပုန်ကန်ဖို့ ခက်ခဲမှာပဲလေ။”

ဧကရာဇ်က ပြောလိုက်သည်။ “ဆုန်ချွဲရဲ့ တပ်မတော်က ကွမ်ရှီးမှာ ရှိနေတုန်း ဝမ်ဟွေ့က လီမိသားစုရဲ့ စီးပွားရေးလုပ်ငန်းတွေနဲ့ အမာခံစခန်းတွေကို ဖျက်ဆီးလိုက်မယ်ဆိုရင် ဒါက ဧကရာဇ်တစ်ပါးအနေနဲ့ ငါ့ရဲ့ ဆန္ဒလို့ အထင်ခံရလိမ့်မယ်။ အဲဒီအခါကျရင် လီမိသားစုနဲ့ တော်ဝင်မိသားစုကြားမှာ ပြန်လည်သင့်မြတ်ဖို့ လမ်းစမရှိတော့ဘဲ သူတို့ရဲ့ ပုန်ကန်မှုကို အရှိန်မြှင့်တင်ပေးသလို ဖြစ်သွားလိမ့်မယ်။ ဒါပေမဲ့ ဆုန်ချွဲရဲ့ တပ်မတော် ထွက်ခွာသွားပြီးမှ သူ ဒီလိုလုပ်တာက သူ့ရဲ့ ကိုယ်ပိုင်ဆန္ဒလို့ အထင်ခံရလိမ့်မယ်။ သူ့ရဲ့ မွေးစားသား တုပိုင်အတွက် လက်စားချေတာလို့ ဖြစ်သွားပြီး ငါ့ကို အပြစ်ကင်းစေလိမ့်မယ်။ သူက ဧကရာဇ်ဖြစ်တဲ့ ငါ့အတွက် အပြစ်အားလုံးကို ယူပေးနေတာ။”

ဧကရီက တိုးတိုးလေး ပြောလိုက်သည်။ “တကယ်ကို။ သစ္စာရှိတဲ့ ဝန်ကြီးပါပဲ။”

ဧကရာဇ်က သက်ပြင်းချလိုက်သည်။ “သူက အင်ပါယာအတွက် ငါဧကရာဇ်အတွက် အကျိုးပြုပေမဲ့ အခုသစ္စာဖောက် ဝန်ကြီးအဖြစ် စွပ်စွဲခံနေရတယ်။ တကယ့် သစ္စာဖောက် ဝန်ကြီးတွေကျတော့ ညီလာခံမှာ တရားမျှတသယောင် စိတ်အားထက်သန်သယောင် ပြောဆိုနေကြပြီး စကားလုံးတွေ စာတွေနဲ့ သူ့ကို ပြစ်တင်ရှုတ်ချနေကြတယ်။ ဒါက တကယ်ကို ရယ်စရာ ကောင်းလွန်းတယ်။ ငါ့ရဲ့ တာ့နင်မင်းဆက်က တကယ်ပဲ။”

ဧကရာဇ်သည် အသက် ၄၀ ကျော်ရုံသာ ရှိသေးသော်လည်း သူ့ဆံပင်အများစုမှာ ဖြူနေပြီ ဖြစ်သည်။ သူ့အဝတ်အစားများထဲတွင် အပြင်ဘက်မှ နဂါးဝတ်ရုံကသာ အနည်းငယ် ကြည့်ကောင်းပြီး အတွင်းမှ အဝတ်အစားများမှာ ဟောင်းနွမ်းကာ အရောင်လွင့်နေသည်။

ထို့အပြင် သူသည် အဝတ်အစားဖာထေးရာတွင် ငွေတုံးအနည်းငယ်သာ သုံးစွဲခြင်းဖြင့် ကျော်ကြားမှုနှင့် ကံကောင်းမှုကို ရှာဖွေတတ်သော ခြိုးခြံချွေတာသည့် ဧကရာဇ်ဟု ဆိုသော တာအိုကွမ်းဧကရာဇ်နှင့် မတူပေ။ သူသည် စစ်မှန်စွာပင် အလွန် ခြိုးခြံချွေတာသော ဘဝဖြင့် နေထိုင်သူ ဖြစ်သည်။

ဧကရီက ပြောလိုက်သည်။ “ဒါဆိုရင် လီဝမ်ဟွေ့ရဲ့ အဖော်ကို ကာကွယ်ပေးဖို့ မြို့တော်ကို အမြန်ဆုံး ခေါ်လာသင့်ပါတယ်။ အရှင်မင်းကြီးက အမိန့်တော် ထုတ်ပြန်ဖို့ ငြင်းဆန်နေသရွေ့ သူတို့ လီဝမ်ဟွေ့ကို သတ်နိုင်မှာ မဟုတ်ပါဘူး။”

မျက်ရည်များ ဝဲနေလျက် ဧကရာဇ်က ပြောလိုက်သည်။

“အကယ်ဒမီက အဲဒီ မိုက်မဲတဲ့ ကျောင်းသားတွေ နေ့တိုင်း အစာငတ်ခံ ဆန္ဒပြရင်း သေချင်သေပါစေ။ ငါ့လက်မောင်းကို ငါ့ဘာသာ ပြန်ဖြတ်အောင် သူတို့ လုပ်နိုင်မှာ မဟုတ်ဘူး။ တူးမြောင်းကြီး ပြတ်တောက်သွားတော့ရော ဘာဖြစ်လဲ။ မြို့တော်ကို ဘယ်လောက်အထိ ဖရိုဖရဲ ဖြစ်အောင် သူတို့ လုပ်ရဲလဲ ကြည့်ရသေးတာပေါ့။ အခြေအနေတွေ တကယ် ထိန်းမနိုင်သိမ်းမရ ဖြစ်လာရင် အဲဒီ အစာငတ်နေတဲ့ လူတွေကို ဝန်ကြီးတွေနဲ့ အာဏာရှိတဲ့ မိသားစုတွေရဲ့ အိမ်တွေထဲ ဝင်ပြီး အစာတောင်းခိုင်းမိရင် ငါ့ကို အပြစ်မတင်နဲ့။”

ထို့နောက် ဧကရာဇ် သက်ပြင်းချလိုက်ပြီး ပြောလိုက်သည်။

“ဒါပေမဲ့။ လီစော်ဘွားက နယ်စပ်ကို ကျူးကျော်ဖို့ တကယ်ပဲ စစ်တပ် စေလွှတ်လိုက်ရင်တော့။ အဲဒီအခါကျရင် ငါလည်း ဝမ်ဟွေ့ကို ကာကွယ်ပေးနိုင်တော့မှာ မဟုတ်ဘူး။”

အခြေအနေက ရိုးရှင်းပါသည်။ လီရူဟိုင် စစ်တပ်ကို စည်းရုံးပြီး နယ်စပ်ကို ဖြတ်ကျော်လိုက်သည်နှင့် တစ်ပြိုင်နက် လီဝမ်ဟွေ့ သေဆုံးရမည့်နေ့ ဖြစ်ပေလိမ့်မည်။

အင်ပါယာ၏ အနောက်တောင်ဘက်တွင် အသုံးပြုရန် တပ်ဖွဲ့ဝင် မကျန်သလောက် ဖြစ်နေပြီ ဖြစ်သဖြင့် လီရူဟိုင်ကို တပ်ဆုတ်သွားစေရန် တစ်ခုတည်းသော နည်းလမ်းမှာ စော်ဘွားကို ပုန်ကန်အောင် တွန်းအားပေးမှုဖြင့် လီဝမ်ဟွေ့အပေါ် ပြစ်မှုပုံချပြီး လီရူဟိုင် တပ်ဆုတ်သွားစေရန် လီဝမ်ဟွေ့၏ ဦးခေါင်းကို အသုံးပြုရမည် ဖြစ်သည်။

ဧကရီက ပြောလိုက်သည်။ “ဒါပေမဲ့ လီဝမ်ဟွေ့က အရှင်မင်းကြီးရဲ့ သူငယ်ချင်း။ ပြီးတော့ သစ္စာအရှိဆုံး လက်အောက်ငယ်သားလေ။”

ဧကရာဇ် တိတ်ဆိတ်နေသည်။

ချောင်ချွေ့သည်လည်း ဟန်မင်းဆက် ကျင်းဧကရာဇ်၏ သစ္စာအရှိဆုံးနှင့် ယုံကြည်ရဆုံး ဝန်ကြီးများထဲမှ တစ်ဦး ဖြစ်ခဲ့သည်။

ကျင်းဧကရာဇ်သည် ချောင်ချွေ့ကို သတ်ရန် လုံးဝ ရည်ရွယ်ချက် မရှိခဲ့ပေ။ သို့သော် ပြည်ထောင် ခုနစ်ခု ပုန်ကန်မှုအတွင်း ပုန်ကန်သော မင်းသားများသည် ညီလာခံမှ အကျင့်ပျက် ဝန်ကြီးများကို ဖယ်ရှားရန်နှင့် ချောင်ချွေ့ကို ကွပ်မျက်ရန် တောင်းဆိုခဲ့ကြသည်။ ကျင်းဧကရာဇ်တွင် ရွေးချယ်စရာ မရှိတော့ဘဲ ချောင်ချွေ့ကို ခါးမှပိုင်းဖြတ်၍ ကွပ်မျက်ရန် ဝန်လေးစွာဖြင့် အမိန့်ပေးခဲ့ရသည်။

မှန်ပါသည်။ ဟန်မင်းဆက် ကျင်းဧကရာဇ်သည် ချောင်ချွေ့ကို သတ်လိုက်သော်လည်း သူသည် နယ်စားမင်း ခုနစ်ပါးကို တပ်ဆုတ်အောင် ဖိအားမပေးနိုင်ခဲ့ပေ။

သို့သော် တာ့နင်မင်းဆက်၏ ဧကရာဇ်ထျန်ယွင်ကသာ လီဝမ်ဟွေ့ကို သတ်လိုက်မည် ဆိုလျှင် လီရူဟိုင်သည် သေချာပေါက် တပ်ဆုတ်သွားပေလိမ့်မည်။ အဘယ်ကြောင့်ဆိုသော် သူ့တွင် လုပ်ဆောင်စရာ ပိုမို အရေးကြီးသော ကိစ္စများ ရှိနေသောကြောင့် ယခုအချိန်တွင် မပုန်ကန်လိုသေးပေ။ ထိုကိစ္စမှာ အနောက်တောင် စော်ဘွားမဟာမိတ်အဖွဲ့ တစ်ခုလုံးကို လျှို့ဝှက်စွာ သိမ်းပိုက်ရန် ဖြစ်သည်။ ပုန်ကန်ရမည့် အချိန် မဟုတ်သေးပေ။

“အတိုချုပ်ပြောရရင် ဒီ အရပ်ဘက်နဲ့ စစ်ဘက် အရာရှိတွေ ဘယ်လောက်ပဲ ပြဿနာရှာရှာ ဝမ်ဟွေ့ကို သတ်ဖို့ အမိန့်တော်ထုတ်ဖို့ ကိစ္စကို သူတို့ မေ့ထားလိုက်လို့ ရပြီ။ သူတို့ ပုန်ကန် ်ရဲရင် ပုန်ကန်လိုက်ကြလေ။” ဧကရာဇ်က ပြတ်သားစွာ ပြောလိုက်သည်။

ဧကရာဇ်၏ လီဝမ်ဟွေ့ကို မသတ်လိုသော ဆန္ဒမှာလည်း လုံလောက်အောင် ခိုင်မာပါသည်။ သို့သော် သူသည် ဝန်ကြီးများ၏ အရှက်မဲ့မှုနှင့် ရက်စက်ကြမ်းကြုတ်မှုကို လျှော့တွက်ထားမိဆဲ ဖြစ်သည်။ ထို့အပြင် သူ့ကို သစ္စာရှိသည်ဟု ဆိုကြသော မိန်းမစိုးဂိုဏ်းကိုလည်း လျှော့တွက်ထားမိသည်။

သူတို့သည် လီဝမ်ဟွေ့ကို မြို့တော်သို့ ခေါ်ဆောင်လာရန် လုံးဝ ရည်ရွယ်ချက် မရှိခဲ့ကြဘဲ ဧကရာဇ်အမိန့်တော်ကို ဖီဆန်မှု ၊ ပုန်ကန်ရန် ကြံစည်မှုတို့ဖြင့် ကွမ်ရှီး၌ပင် ချက်ချင်း ကွပ်မျက်ရန် စီစဉ်ထားကြသည်။ ထိုအချိန်ကျလျှင် လီဝမ်ဟွေ့ သေဆုံးရမည် သာမက ဧကရာဇ် ထျန်ယွင်သည်လည်း လူသတ်သမားကို ထောက်ခံပေးရပေလိမ့်မည်။

အရှင်မင်းကြီး။ အရှင်မင်းကြီးအတွက် လီဝမ်ဟွေ့ကို ကျွန်တော်တို့ သတ်ပေးလိုက်ပါပြီ။ ဘာလို့လဲဆိုတော့ သူက ဧကရာဇ်အမိန့်တော်ကို မနာခံခဲ့လို့ပါ။ ဟူသည့် သောက်အရေးမပါသော စကားများကိုလည်း နားထောင်ရဦးမည်။

**--**--**--**--**--**--**--**

ကွမ်ရှီးပြည်နယ်။ လျန်ကျိုးစီရင်စုရှိ သွေးကွမ်ရင်မယ်တော်၏ နေအိမ်။

စစ်သည် ရာပေါင်းများစွာသည် တုပိုင်နှင့် လီဝမ်ဟွေ့ကို ဝိုင်းရံထားကြသည်။

တော်ဝင်မြင်းဇောင်း ဒုတိယညွှန်ကြားရေးမှူး ကျန့်လင်းသည် သူ့မျက်နှာပေါ်မှ မောက်မာသော အပြုံးကို ဖုံးကွယ်ထားခြင်း မရှိဘဲ ပြောလိုက်သည်။

“အစ်ကိုဝမ်ဟွေ့။ ခင်ဗျားက ဧကရာဇ်အမိန့်တော်ကို ဖီဆန်ပြီး ပုန်ကန်မှုနဲ့ ဒီနေရာမှာတင် အသတ်ခံမလား။ ဒါမှမဟုတ် ခင်ဗျားရဲ့ တရားမျှတဟန်ဆောင်တဲ့ မျက်နှာဖုံးကို စွန့်ခွာပြီး ခင်ဗျားရဲ့ မွေးစားသားကို စတေးလိုက်မလား။”

လီဝမ်ဟွေ့သည် ပြင်းထန်သော နာကျင်မှုဖြင့် မျက်လုံးများကို မှိတ်ထားလိုက်သည်။ သူ့နာကျင်မှုမှာ ရွေးချယ်မှု ပြုလုပ်ရမည် ဖြစ်သောကြောင့် မဟုတ်ဘဲ တော်ဝင်မြင်းဇောင်းဦးစီးဌာနသည်လည်း အရှင်မင်းကြီးကို အခွင့်ကောင်းယူကာ အရှင်မင်းကြီး၏ ဆန္ဒကိုပင် ကစားစရာ လုပ်နေကြပြီ ဖြစ်သောကြောင့် ဖြစ်သည်။

မိန်မစိုးဂိုဏ်းသည်လည်း သစ္စာမစောင့်တည်တော့ချေ။ ဤသည်မှာ အင်ပါယာပျက်သုဉ်းမည့် နိမိတ်လက္ခဏာပင် ဖြစ်သည်။

“အခြေအနေတွေက တကယ်ပဲ ပြန်လည်ပြုပြင်လို့ မရတော့လောက်အောင် ယိုယွင်းသွားပြီလား။”

“ငါ့သား တုချန် အရွယ်မရောက်ခင်မှာပဲ အင်ပါယာက ပျက်စီးသွားဖို့ ဖြစ်နိုင်နေပြီလား။”

“ဆရာသခင်ကြီး နင်ဇောင်ဝူ ဒီလောက် စိတ်ဓာတ်ကျနေတာ အံ့သြစရာ မဟုတ်တော့ပါဘူး။”

ကျန့်လင်း ရယ်မောလိုက်ပြီး ပြောလိုက်သည်။ “အစ်ကိုဝမ်ဟွေ့။ ခင်ဗျားက တရားမျှတတဲ့ လူတစ်ယောက်အဖြစ် ဆက်ရှိနေဖို့ ကျုပ် မျှော်လင့်ပါတယ်။ ဒါဆိုရင် ကျုပ်တို့က ခင်ဗျားနဲ့ ခင်ဗျားသားကို ဒီနေရာမှာတင် သတ်လိုက်ကြတာပေါ့။ အဲဒါက နှစ်ဖက်စလုံးအတွက် ပိုမကောင်းဘူးလား။ ခင်ဗျား သေသွားပေမဲ့ ခင်ဗျားရဲ့ ဂုဏ်သတင်းက ဆက်လက် ရှင်သန်နေမှာဖြစ်ပြီး ခင်ဗျားရဲ့ ပုံရိပ်ကလည်း ပျက်စီးသွားမှာ မဟုတ်ဘူး။”

လီဝမ်ဟွေ့ မျက်လုံးများကို မှိတ်ထားဆဲ ဖြစ်သည်။

ကျန့်လင်း ရယ်မောလိုက်ပြီး ပြောလိုက်သည်။ “တုပိုင်က ခင်ဗျားရဲ့ အသည်းနှလုံး အားနည်းချက်ပါလို့ ခင်ဗျား ပါးစပ်က ပြောနေမှတော့ အဲဒီ အားနည်းချက်ကို ရန်စပြီး ဆွဲဖြဲပစ်လိုက်ရင်တောင် တခြားသူတွေကို အပြစ်မတင်နဲ့တော့။ တုပိုင်ရဲ့ အသက်ကို ခင်ဗျား ဂရုမစိုက်ဘူးဆိုရင် ဘယ်သူက ခင်ဗျားကို ဘာလုပ်နိုင်မှာလဲ။”

လီဝမ်ဟွေ့ မျက်လုံးများ ဖွင့်လိုက်သောအခါ မျက်လုံးအိမ်များသည် သွေးရောင်လွှမ်းနေပြီ ဖြစ်သည်။ သူ ဟိန်းဟောက်လိုက်သည်။

“ကျန့်လင်း။ ငါတို့က သဘောထားကွဲလွဲနေရင်တောင် မင်းက ဘယ်လိုလုပ် အရှင်မင်းကြီးကို အခွင့်ကောင်းယူပြီး အမိန့်တော်တွေကို ကစားရဲရတာလဲ။ မင်းက မိန်းမစိုးဂိုဏ်းဝင် တစ်ယောက်ပဲ။ မင်း အာဏာရလာတာနဲ့ အရပ်ဘက် ၊ စစ်ဘက် အရာရှိတွေနဲ့ တန်းတူဖြစ်ပြီး ဧကရာဇ်အာဏာကို ကြိုးကိုင်နိုင်ပြီလို့ ထင်နေတာလား။ မင်းက မင်းရဲ့ ကိုယ်ပိုင် အခြေခံအုတ်မြစ်ကို ဖျက်ဆီးနေတာပဲ။ ဧကရာဇ်မင်းမြတ်က ငါတို့ရဲ့ တစ်ခုတည်းသော အခြေခံအုတ်မြစ်ကွ။”

“အို။ ငါတို့က ဘယ်လိုလုပ် ရဲမှာလဲ။” ကျန့်လင်း ရယ်မောလိုက်ပြီးနောက် သူ့အမူအရာမှာ တည်ကြည်သွားပြီး ပြောလိုက်သည်။

“ငါတို့က မိန်းမစိုးဂိုဏ်းပဲ။ ငါတို့က ဂိုဏ်းတစ်ခု ဖြစ်တဲ့အတွက် ငါတို့မှာ လွတ်လပ်တဲ့ ဆန္ဒနဲ့ ကြီးမားတဲ့ အာဏာရှိတယ်။”

“ငါ နားလည်ပြီ။ ငါ နားလည်ပြီ။” လီဝမ်ဟွေ့က ပြောလိုက်သည်။

“မင်းတို့ထဲက တချို့က အရပ်ဘက် ၊ စစ်ဘက် အရာရှိတွေနဲ့ တန်းတူရပ်တည်ပြီး အင်ပါယာကို အတူတကွ အုပ်ချုပ်ဖို့ ၊ အာဏာချိန်ခွင်လျှာ သုံးခု ညီမျှစေဖို့နဲ့ အရှင်မင်းကြီးကို ကြိုးကိုင်ဖို့ အိပ်မက်မက်နေကြတာကိုး။”

ကျန့်လင်းက လေးနက်စွာ ပြောလိုက်သည်။ “အဓိပ္ပာယ်မရှိတာတွေ မပြောနဲ့။ ဧကရာဇ်မင်းမြတ်အပေါ်ထားတဲ့ ငါတို့ရဲ့ သစ္စာတရားက နေ့ခင်းဘက်လို ရှင်းလင်းနေတယ်။ အဲဒီလိုသာ မဟုတ်ရင် ဧကရာဇ်အမိန့်တော်ကို မနာခံမှုနဲ့ ကျောင်းနေဖက် သံယောဇဉ်ကို မငဲ့ဘဲ လီဝမ်ဟွေ့ဆိုတဲ့ မင်းကို ငါတို့ သတ်မှာ မဟုတ်ဘူး။ လက်အောက်ငယ်သား တစ်ယောက်က သူ့သခင်ရဲ့ ဂုဏ်သိက္ခာအတွက် သေပေးသင့်တယ်ဆိုတာ အမှန်ပဲ မဟုတ်လား။”

လီဝမ်ဟွေ့ ငြိမ်သက်သွားပြီး ခေါင်းငုံ့ကာ ဖြည်းညှင်းစွာ ပြောလိုက်သည်။

“မင်းက ငါ့ကို ဧကရာဇ်အမိန့်တော် ဖီဆန်စေချင်ပြီး ပုန်ကန်မှုနဲ့ အပြစ်ပုံချချင်တာလား။ ဒါဆိုရင် မင်းရဲ့ ဆန္ဒကို ငါဖြည့်ဆည်းပေးမယ်။ ကျန့်လင်း။ ငါ မင်းရဲ့ မိသားစုဝင် ၁၃၂ ယောက်လုံးကို သတ်ပစ်မယ်။ ငါ မင်းတို့အားလုံးကို ရှင်းပစ်မယ်။”

“သတ်။ သတ်။ သတ်။”

လီဝမ်ဟွေ့သည် ဒဏ်ရာရထားသော သားရဲတစ်ကောင်ကဲ့သို့ အက်ကွဲစွာ အော်ဟစ်လိုက်သည်။ ရုတ်တရက် မြေပြင်ပေါ်ရှိ လျှို့ဝှက်လမ်းကြောင်း အပေါက်များစွာ ပွင့်လာသည်။ ထောင်ပေါင်းများစွာသော စစ်သည်များသည် အရပ်မျက်နှာ အသီးသီးမှ ထွက်ပေါ်လာကြသည်။

“ဘုန်းးး။ ဘုန်းးး။ ဘုန်းးး။ ဘုန်းးး။။” အပြင်ဘက်တွင် အရှေ့ဘက်ကွပ်ကဲရေးရုံး စစ်သည်များ သည် ဒီရေအလား ဝင်ရောက်လာကြသည်။ သူတို့သည် ကျန့်လင်း ခေါ်ဆောင်လာသော လူရာပေါင်းများစွာကို ဝိုင်းရံလိုက်ကြသည်။

တော်ဝင်မြင်းဇောင်း ဒုတိယညွှန်ကြားရေးမှူး ကျန့်လင်း မျက်နှာပျက်သွားပြီး ပြောလိုက်သည်။

“လီဝမ်ဟွေ့။ ငါ့လက်ထဲမှာ ဧကရာဇ်အမိန့်တော် ရှိတယ်။ မင်း ပုန်ကန်ဖို့ ကြံစည်နေတာလား။”

လီဝမ်ဟွေ့က တည်ငြိမ်စွာ ပြောလိုက်သည်။ “ငါက ဘယ်လိုပဲဖြစ်ဖြစ် အဖမ်းခံမလို့ လုပ်ထားပြီးသား။ ဒါပေမဲ့ မင်းက ငါ့ကို အတင်းအကြပ် ဖိအားပေးခဲ့တယ်။ မင်းက ငါ့ကို ဧကရာဇ်အမိန့်တော် ဖီဆန်စေချင်တယ်ပေါ့။ ကောင်းပြီလေ။ ဖြစ်စေရမယ်။”

လီဝမ်ဟွေ့သည် မိန်းမစိုးဂိုဏ်းမှ လူတစ်စုကြောင့် တကယ်ပင် ရင်နာရသည်။

“သတ်။ သတ်။ သတ်။ အကုန်လုံးကို သတ်ပစ်။ တစ်ယောက်မှ အရှင်မထားနဲ့။”

“စစ်သည်တို့။ အမိန့်ပေးလိုက်။ ရှန်တုန်းကို သွားပြီး ကျန့်လင်းရဲ့ မျိုးနွယ်စု တစ်ခုလုံးကို သုတ်သင်ရှင်းလင်းပစ်ကြ။ သူ့ရဲ့ ဘိုးဘွားပိုင် သင်္ချိုင်းတွေကို တူးဆွပြီး သူ့အရိုးတွေကို ခြေထောက်နဲ့နင်းချေပစ်စမ်းကွာ။”

“သတ်။ သတ်။ သတ်။”

အပိုင်း ၂၀၆ ပြီး။