သန့်စင်ခြင်း

“ အား! ”

ဝူယဲ့ သည် သူ၏ခန္ဓာကိုယ်အတွင်းရှိ သွေးများကို အသည်းအသန် ဖိနှိပ်ရန် ကြိုးစားသော်လည်း သူ၏ကျင့်စဉ်မှာ အမြင့်ဆုံးအဆင့်သို့ ရောက်ရှိနေပြီဖြစ်ရာ မည်မျှပင် ကြိုးစားပါစေ အချည်းနှီးသာ ဖြစ်ခဲ့သည်။ သူ၏သွေးများမှာ တဖြည်းဖြည်း ခမ်းခြောက်လာပြီး အသားအရေများမှာလည်း တွန့်လိပ်ဝင်သွားကာ ပါးရိုးများမှာ ထောင်ထွက်လာသဖြင့် ကြည့်ရသည်မှာ အလွန်ပင် ကြောက်မက်ဖွယ် ကောင်းလှသည်။

သွေးများ အမြောက်အမြား ဆုံးရှုံးသွားမှုကြောင့် ဝူယဲ့၏ အရှိန်အဝါ မှာ တဖြည်းဖြည်း အားနည်းလာပြီး လူလည်းမကျ တစ္ဆေလည်းမကျသော ပုံစံမျိုး ဖြစ်လာသည်။ ဝူယဲ့သည် နာကျည်းမှုများဖြင့် ပြည့်နှက်နေသော်လည်း ထပ်မံနှောင့်နှေးရန် မဝံ့တော့ပေ။ သူသည် သွားကို တင်းတင်းကြိတ်ကာ သူ၏ အသက်ကယ်ဝှက်ဖဲကို အသက်သွင်းလိုက်သည်။

“ ဘုန်း! ”

သူ၏ခန္ဓာကိုယ်မှ နက်မှောင်သော အလင်းကာရံတစ်ခု ထွက်ပေါ်လာပြီး သူ့ကို လုံးဝ ဖုံးအုပ်သွားတော့သည်။ ဝူယဲ့၏ ခြောက်ကပ်နေသော ခန္ဓာကိုယ်မှာ နှလုံးခုန် နှစ်ချက်စာအတွင်းမှာပင် ပုံမှန်အတိုင်း ပြန်လည်ဖြစ်လာသည်။ ထို့တင်မကသေးဘဲ သူ၏ကိုယ်ပေါ်ရှိ အရှိန်အဝါမှာလည်း အဆက်မပြတ် မြင့်တက်လာနေ၏။

ခဏချင်းအတွင်းမှာပင် ဝူယဲ့၏ ကျင့်ကြံမှုမှာ အခြေခံစွမ်းအင်အဆင့် အထွတ်အထိပ် ကို ကျော်လွန်သွားပြီး အခြေခံတည်ဆောက်ခြင်းအဆင့် သို့ အနီးကပ်ဆုံး ရောက်ရှိသွားတော့သည်။ နောက်ဆုံးတွင် သူသည် အခြေခံတည်ဆောက်ခြင်း အဆင့်တစ်ဝက်နယ်ပယ်တွင် ရပ်တန့်သွားသည်။

ကျင့်ကြံမှု မြင့်တက်လာခြင်းကြောင့် ရရှိလာသော အားသာချက်ကို အသုံးချကာ ဝူယဲ့သည် သူ၏ခန္ဓာကိုယ်အတွင်း ဆူပွက်နေသော သွေးများကို နောက်ဆုံးတွင် ဖိနှိပ်လိုက်နိုင်ပြီဖြစ်သည်။ သူသည် မုန့်ဝမ်ကို ဒေါသတကြီး ကြည့်လိုက်ရာ သူ၏မျက်နှာတွင် စာပေပညာရှင် တစ်ဦး၏ ယဉ်ကျေးသိမ်မွေ့မှုမျိုး လုံးဝ မရှိတော့ပေ။

“ နင့်ကို ငါ သတ်ပစ်မယ်! ”

ဝူယဲ့၏ စကားသံအဆုံးတွင် လှုပ်ခတ်နေသော တစ္ဆေမီးလျှံ အချို့မှာ စုစည်းသွားပြီး မုန့်ဝမ်ထံသို့ ပျံသန်းလာကြသည်။ ထိုတစ္ဆေမီးလျှံများမှာ အရေအတွက် နည်းပါးသော်လည်း အခြေခံစွမ်းအင်အဆင့်ထက် သာလွန်သော စွမ်းအားကို ပိုင်ဆိုင်ထားကြသည်။ သာမန် အခြေခံစွမ်းအင်အဆင့် အထွတ်အထိပ်ရှိသော တပည့်တစ်ဦးသာဆိုလျှင် ထိုမီးလျှံအစအနလေးနှင့် ထိမိရုံမျှဖြင့် ပြာအဖြစ်သို့ ချက်ချင်း လောင်ကျွမ်းသွားပေလိမ့်မည်။

မိမိထံသို့ ပျံသန်းလာသော တစ္ဆေမီးလျှံများကို မြင်သောအခါ မုန့်ဝမ်သည် 'ဝိညာဉ်ရိပ် ရွှေ့ပြောင်းခြင်း' ကို အသုံးပြုကာ ချက်ချင်းပင် ရှောင်တိမ်းလိုက်သည်။ ဝူယဲ့၏ ကျင့်ကြံမှုကို အတင်းအကျပ် မြှင့်တင်ထားသော ဤနည်းလမ်းမှာ ကြာရှည်ခံမည် မဟုတ်ကြောင်း သူမ သိထားသည်။

ထိုသို့သော အချိန်တွင် သူမအနေဖြင့် ဘာကြောင့် ထိပ်တိုက်ရင်ဆိုင်နေရမည်နည်း? အလင်းကာရံ ပျောက်ကွယ်သွားပြီး သူ၏ကျင့်ကြံမှုမှာ အခြေခံစွမ်းအင်အဆင့်သို့ ပြန်လည်ကျဆင်းသွားချိန်မှ ကိုင်တွယ်လျှင်လည်း နောက်မကျပေ။

မုန့်ဝမ် ပျောက်ကွယ်သွားသည်ကို မြင်သောအခါ ဝူယဲ့သည် တစ္ဆေမီးလျှံများကို ပတ်ဝန်းကျင်အနှံ့ ရမ်းခါစေသော်လည်း မုန့်ဝမ်၏ အရိပ်အယောင်ကိုပင် ရှာမတွေ့ပေ။ မီးလျှံအစအနအချို့မှာ ရွှယ်ရှို့ ပေါ်သို့ ကျသွားရာ သူမ၏ ထိတ်လန့်နေသော မျက်ဝန်းများအောက်မှာတင် သူမ၏ခန္ဓာကိုယ်မှာ ပြာပုံအဖြစ်သို့ ပြောင်းလဲသွားတော့သည်။

ဝူယဲ့သည် မကျေမနပ်ဖြင့် ခဏမျှ ရှာဖွေနေသေးသော်လည်း မုန့်ဝမ်ကိုမူ ရှာမတွေ့ခဲ့ပေ။ သူမသည် အလွန်လျင်မြန်စွာ ထွက်ပြေးသွားခဲ့ပြီ ဖြစ်သည်။ ဝူယဲ့သည် အနည်းငယ် မကျေမနပ် ဖြစ်သော်လည်း ဆက်လက် လိုက်မရှာတော့ဘဲ ရပ်တန့်ရန် ပြတ်သားစွာ ဆုံးဖြတ်လိုက်သည်။ တစ်ဖက်လူ၏ လွတ်မြောက်ခြင်းအတတ်မှာ ထူးဆန်းလှသလို သူမတွင် အခြားမည်သည့် နည်းလမ်းများ ရှိနေဦးမည်ကိုလည်း သူ မသိပေ။

ဤအလင်းကာရံမှာ အလွန်ဆုံးမှ တစ်နာရီခွဲ သာ ကြာရှည်မည်ဖြစ်သည်။ အချိန်အတော်များများမှာ ကုန်ဆုံးသွားပြီဖြစ်ရာ ဤကာရံ ရှိနေစဉ်အတွင်းမှာပင် သူ အမြန်လွတ်အောင် ပြေးရပေမည်။ သို့မဟုတ်ပါက မုန့်ဝမ်သာ သူ့ကို ပြန်မှီသွားလျှင် သေလမ်းသာ ရှိတော့သည်။

ဝူယဲ့သည် လမ်းကြောင်းတစ်ခုကို ရွေးချယ်ကာ တောအုပ်အပြင်ဘက်သို့ အလျင်အမြန် ထွက်ပြေးတော့သည်။ ဝူယဲ့ ထွက်ပြေးရန် ကြိုးစားနေသည်ကို မြင်သောအခါ အဝေးတွင် ဝိညာဉ်ဖုံးကွယ် ဝတ်ရုံ ဖြင့် ပုန်းနေသော မုန့်ဝမ်သည် သူမ၏ ကိုယ်ဖျောက်အဆောင်နှင့် အရှိန်မြှင့်အဆောင် ကို အသက်သွင်းကာ သူထွက်ပြေးရာ နောက်သို့ လိုက်ပါသွားတော့သည်။

ဤငါးကြီးကို ဖမ်းမိရန် သူမ အတော်ပင် အားစိုက်ခဲ့ရသဖြင့် သူ့ကို အလွယ်တကူ လွတ်ခွင့်မပြုနိုင်ပေ။ အလင်းကာရံ၏ စွမ်းအားကြောင့် ဝူယဲ့၏ အရှိန်မှာ ပုံမှန်ထက် များစွာ ပိုမိုမြန်ဆန်နေသည်။ မုန့်ဝမ်မှာမူ ထိပ်တန်း အရှိန်မြှင့်အဆောင်နှင့် 'ဝိညာဉ်ရိပ် ရွှေ့ပြောင်းခြင်း' အတတ်ကို အသုံးပြုပြီး သူ့နောက်ကို မပြတ်အောင် အနိုင်နိုင် လိုက်နေရသည်။

ကံကောင်းထောက်မစွာဖြင့် အချိန်ကုန်လွန်လာသည်နှင့်အမျှ ဝူယဲ့၏ ကိုယ်ပေါ်ရှိ အလင်းကာရံမှာ မှိန်ဖျော့လာပြီး သူ၏အရှိန်မှာလည်း နှေးကွေးသွားခဲ့သည်။ သို့သော် ဤသို့ လိုက်လံဖမ်းဆီးရမှုကြောင့် မုန့်ဝမ်၏ ခန္ဓာကိုယ်အတွင်းရှိ ဝိညာဉ်စွမ်းအား များမှာလည်း ကုန်ခန်းလုနီးပါး ဖြစ်နေပြီဖြစ်သည်။

ဤအခြေအနေမျိုးဖြင့် ဝူယဲ့ကို ရင်ဆိုင်မည်ဆိုပါက အနိုင်ရလျှင်ပင် တစ်စုံတစ်ခု ပေးဆပ်ရပေလိမ့်မည်။ မုန့်ဝမ်သည် ခေတ္တမျှ စဉ်းစားလိုက်ပြီးနောက် သူမ၏ သိုလှောင်အိတ် ကို ပုတ်လိုက်ရာ သူမ၏ဘေးတွင် လတ်လတ်ဆတ်ဆတ် အလောင်းနှစ်လောင်း ပေါ်လာသည်။

သူမသည် အလောင်းတစ်လောင်းစီပေါ်သို့ လက်တစ်ဖက်စီ တင်လိုက်ရာ သူမ၏ကျင့်စဉ်မှာ ရူးသွပ်စွာ လည်ပတ်သွားပြီး မျက်စိတစ်မှိတ်အတွင်းမှာပင် ထိုအလောင်းနှစ်လောင်းမှ သွေးများကို သန့်စင်စုပ်ယူလိုက်တော့သည်။ ကျင့်ကြံသူတစ်ဦး သေဆုံးသွားပြီးနောက် သူ၏အတွင်းစွမ်းအား အများစုမှာ ဆုံးရှုံးသွားသဖြင့် ၎င်းဖြင့် ကျင့်ကြံခြင်း၏ အကျိုးအာနိသင်မှာ များစွာ လျော့နည်းသွားတတ်သည်။

သို့သော် သွေးလမ်းစဉ် နည်းလမ်းကို အသုံးပြု၍ ကျင့်ကြံမှု ပြန်လည်ဖြည့်တင်းခြင်းမှာ သာမန်နည်းလမ်းများထက် များစွာ မြန်ဆန်လှသည်။ အာနိသင် နည်းသော်လည်း အလကားရသည့်အရာ ဖြစ်သဖြင့် သူမအတွက် အရေးမကြီးပေ။ အလောင်းနှစ်လောင်းကို သန့်စင်ပြီးနောက် မုန့်ဝမ်၏ ဝိညာဉ်စွမ်းအားမှာ ၁၀ ရာခိုင်နှုန်းခန့်သာ ပြန်လည်ပြည့်တင်းလာခဲ့သည်။

အဝေးမှ ဝူယဲ့သည် တစ်စုံတစ်ခုကို အာရုံခံမိသွားပုံရပြီး မုန့်ဝမ်ရှိရာဘက်သို့ ရုတ်တရက် လှည့်ကြည့်လိုက်သည်။ ခြောက်ကပ်နေသော အလောင်းနှစ်လောင်းကို မြင်လိုက်ရသောအခါ သူ၏ မျက်လုံးသူငယ်အိမ်များမှာ ကျဉ်းမြောင်းသွားတော့သည်။ မုန့်ဝမ်သည် ထွက်ပြေးသွားခြင်း မရှိဘဲ သူမ၏အနားမှာပင် ပုန်းအောင်းနေရုံသာမက သူ့နောက်ကိုပင် လိုက်လာခဲ့ခြင်းဖြစ်သည်။ သူမရှိနေသည်ကို လုံးဝ သတိမထားမိခဲ့ပေ!

၎င်းကို သိရှိသွားသောအခါ ဝူယဲ့၏ မျက်နှာမှာ အတော်ပင် ပျက်သွားတော့သည်။ စောစောက အခြေခံတည်ဆောက်ခြင်းအဆင့် စီနီယာပေးထားသော အသက်ကယ်ဝှက်ဖဲသာ မရှိပါက သူ တစ်ခါသေပြီးနေပြီ ဖြစ်ကြောင်း သူ ကောင်းကောင်း သိထားသည်။ သို့သော် ယခုမူ သူ၏ ဝှက်ဖဲမှာ ကုန်သွားပြီဖြစ်သလို မုန့်ဝမ်၏ သွေးကျိန်စာအတတ် ကို တုန့်ပြန်နိုင်မည့် အခြားနည်းလမ်းလည်း သူ့တွင် မရှိတော့ပေ။ သူမက မိမိဘာသာ ကိုယ်ထင်ပြလိုက်သည့် အချိန်ကတည်းက သူ ရှုံးနိမ့်သွားခဲ့ပြီ ဖြစ်သည်။

အတွေးပေါင်းများစွာမှာ ဝူယဲ့၏ စိတ်ထဲတွင် ဖြတ်ပြေးသွားသည်။ နောက်ဆုံးတွင် သူသည် ရိုသေသော အပြုံးဖြင့် အလောင်းခြောက်များ ရှိရာဘက်သို့ ဦးညွှတ်လိုက်သည်။

“ ဂျူနီယာ ဝူယဲ့ က စီနီယာအစ်မ မုန့်ကို နှုတ်ဆက်ပါတယ် ”

မုန့်ဝမ်သည် အခြားအလောင်းနှစ်လောင်းကို ထပ်မံထုတ်ယူကာ သန့်စင်ပြီးနောက် ဝူယဲ့ဘက်သို့ ကြည့်လိုက်သည်။

“ နင် ဝိညာဉ်နယ်မြေထဲကနေ ရထားသမျှ အကုန်လုံးကို အပ်လိုက်စမ်း ”

ဝူယဲ့က ခါးသီးစွာ ပြုံးလိုက်သော်လည်း အသက်နှင့် ရင်းရမည့် အခြေအနေတွင် သူသည် အလွန်ပင် ပါးနပ်သူဖြစ်သည်။ သူသည် အားအနည်းငယ်ကို အသုံးပြုကာ သိုလှောင်အိတ်အချို့ကို မုန့်ဝမ်ထံသို့ တွန်းပို့ပေးလိုက်သည်။

“ စီနီယာအစ်မ မုန့်... ကျွန်တော် ဝိညာဉ်နယ်မြေထဲကနေ ရထားသမျှ အကုန်လုံး ဒီထဲမှာ ရှိပါတယ်။ ဒါအပြင် ကျွန်တော် သက်ရှည်သီးရှိတဲ့နေရာကိုလည်း သိပါတယ်။ အကယ်၍ စီနီယာအစ်မသာ သက်ရှည်သီးကို စိတ်ဝင်စားမယ်ဆိုရင် အဲဒါကို ရအောင် ဂျူနီယာက အစွမ်းကုန် ကူညီပေးပါ့မယ် ”

မုန့်ဝမ်သည် ဝူယဲ့၏ ရှေ့မှာပင် သိုလှောင်အိတ်ထဲရှိ ပစ္စည်းများကို စစ်ဆေးလိုက်သည်။ ပစ္စည်းများကို မည်သူမျှ မပြုပြင်ထားကြောင်း အတည်ပြုပြီးနောက် သူမ၏ ကိုယ်ပိုင်သိုလှောင်အိတ်ထဲသို့ တန်ဖိုးအလိုက် ခွဲခြားထည့်လိုက်သည်။

“ အခြေခံတည်ဆောက်ခြင်းအဆင့် စီနီယာတွေ ရှာခိုင်းထားတာတွေ အကုန်တွေ့ခဲ့လား? ”

ဝူယဲ့မှာ မှင်တက်သွားသည်။ ပစ္စည်းများမှာ မုန့်ဝမ်၏ လက်ထဲတွင် ရှိနေပြီဖြစ်ရာ ဘာရှိသည်၊ ဘာမရှိသည်ကို သူမက အသိဆုံး မဟုတ်ပါလား? ထိုသို့ တွေးမိသော်လည်း သူ၏မျက်နှာတွင်မူ မရိုမသေဟန် မပြဝံ့ဘဲ ရိုးရိုးသားသားပင် ပြန်ဖြေလိုက်သည်။

“ စီနီယာအစ်မကို တင်ပြရရင်... ကျွန်တော် ဝူဝူးသီး ခြောက်လုံး၊အဖြူရောင်ငှက်မွေးပန်းလေးပွင့်နဲ့ ခရမ်းရောင် သဲကျောက်တစ်ဝက်ကို ရှာတွေ့ခဲ့ပါတယ် ”

မုန့်ဝမ်သည် ဝူယဲ့ကို ကြည့်လိုက်ရာ သူမ၏ မျက်ဝန်းများမှာ ရုတ်တရက် စူးရှသွားတော့သည်။

“ ဝူဝူးသီး ခြောက်လုံး၊ ငှက်မွေးပန်း လေးပွင့် ရှိနေပြီးတော့ ဘာလို့ ခရမ်းရောင် သဲကျောက်က တစ်ဝက်ပဲ ရှိနေရတာလဲ? နင် တစ်ခုခုကို ဝှက်ထားတာလား? ”

“ ကျွန်တော့်ကို အထင်မလွဲပါနဲ့ စီနီယာအစ်မ! ဒါတွေက စီနီယာတွေ အထူးမှာကြားထားတဲ့ ပစ္စည်းတွေပဲ၊ ကျွန်တော် ဘယ်လိုလုပ် ဝှက်ထားရဲမှာလဲ? ” ဝူယဲ့သည် အပြစ်မရှိကြောင်း အသည်းအသန် ရှင်းပြပြီးနောက် ဆက်ပြောသည်။

“ ခရမ်းရောင် သဲကျောက်ကို စောင့်ကြပ်နေတာက အခြေခံတည်ဆောက်ခြင်းအဆင့် သုံး ရှိတဲ့ ဝိညာဉ်သားရဲပါ။ ရွှန်ထျန်းဓားဂိုဏ်း က ရဲလင်လော့ နဲ့ ကျွန်တော် ပူးပေါင်းပြီး အပင်ပန်းခံ တိုက်ခိုက်ခဲ့မှ ဒီသဲကျောက်တုံးကို ရခဲ့တာပါ။ အဲဒီနောက်မှာ ရဲလင်လော့က သဲကျောက်ကို နှစ်ခြမ်းခွဲလိုက်လို့ ကျွန်တော့်ဆီမှာ ဒီလောက်ပဲ ကျန်ခဲ့တာပါ ”

ခရမ်းရောင် သဲကျောက်ရဲ့ နောက်တစ်ဝက်က ရဲလင်လော့ လက်ထဲမှာ ရှိနေတာပေါ့?

မုန့်ဝမ်သည် ခဏမျှ စဉ်းစားလိုက်ပြီးနောက် ရုတ်တရက် လှုပ်ရှားကာ ဝူယဲ့ကို တိုက်ခိုက်လိုက်သည်။ ဝူယဲ့မှာ အလွန်အမင်း ထိတ်လန့်သွားပြီး ရှောင်တိမ်းရင်း အသနားခံတော့သည်။

“ စီနီယာအစ်မ မုန့်... စီနီယာအစ်မ သက်ရှည်သီးကို မလိုချင်ဘူးလား? အဲဒီလို ရတနာမျိုးကိုသာ ရရင် စီနီယာတွေက စီနီယာအစ်မကို အတော်လေး အလေးထားကြမှာပါ! ”

မုန့်ဝမ်က ဘာမှပြန်မပြောဘဲ ဝူယဲ့၏ ကျောပြင်ကို မထင်မှတ်ထားသောရူထောင့်တစ်ခုမှ ရိုက်ချလိုက်ရာ သူ၏ ထိတ်လန့်နေသော မျက်ဝန်းများအောက်မှာပင် သူ၏ခန္ဓာကိုယ်အတွင်းရှိ သွေးအားလုံးကို သန့်စင်စုပ်ယူလိုက်တော့သည်။

ဝူယဲ့ မသိခဲ့သောအချက်မှာ မုန့်ဝမ်အတွက်မူ အပ်နှံရန် ခရမ်းရောင် သဲကျောက် ရှိနေလျှင်ပင် လုံလောက်နေပြီ ဖြစ်သည်။ တစ်ဝက်ပဲဖြစ်ဖြစ်၊ အပိုင်းတစ်ရာပဲဖြစ်ဖြစ် အရေးမကြီးပေ။ ဤပစ္စည်း သူမ၏လက်ထဲတွင် ရှိနေခြင်းမှာ သူမသည် ရွှယ်လျန်ကျိ အတွက် အသက်နှင့်ရင်း၍ ကြိုးစားခဲ့ကြောင်း သက်သေပြနေခြင်းပင်။

ခရမ်းရောင် သဲကျောက် နောက်တစ်ဝက်အတွက်မူ ရလျှင်လည်းကောင်းသည်၊ မရလျှင်လည်း ကိစ္စမရှိပေ။ အမှန်တော့ သူမသည် ရွှယ်လျန်ကျိအတွက် တကယ်တမ်း အသက်ပေးရန် ဆုံးဖြတ်ထားသူ မဟုတ်ပေ။