အခန်း (၁၉၉)

ရှန်းကွမ်ထော်၏ ရုတ်တရက်ရူးသွပ်မှုကြောင့် စနစ်တကျရှိလှသော ဆေးခန်းမသည် ခဏချင်းမှာပင် ရုန်းရင်းဆန်ခတ် ဖြစ်သွားတော့သည်။

လူအုပ်ကြီးမှာ ထွက်ပြေးလွတ်မြောက်ရန် ကြိုးစားကြသော်လည်း ဆေးခန်းမတံခါးဝတွင် သားရဲသွေးထုတ်ယူရန် စောင့်နေသူများမှာမူ အဆိုးရွားဆုံး ကံကြမ္မာနှင့် ကြုံလိုက်ရသည်။ သူတို့သည် အချိန်မီ မရှောင်နိုင်ဘဲ ရှန်းကွမ်ထော်၏ အေးစက်ထက်မြက်လှသော သိုင်းစိတ်ဓာတ် တိုက်ခိုက်မှုကြောင့် ဒဏ်ရာအပြင်းအထန် ရကုန်ကြသည်။

"သားရဲသွေး ပေါင်းစပ်တာ ကျရှုံးသွားတာလား"

ယွင်ရှန်းက ဂူဖုန်းကို ချက်ချင်းပင် မှော်ဂါထာရွတ်ဆိုရန် အချက်ပြလိုက်သည်။ ရူးသွပ်နေသော ထိုသိုင်းသမား၏ သိုင်းစိတ်ဓာတ်များ သူတို့ထံသို့ မရောက်လာစေရန် ကာကွယ်ရမည်ဖြစ်သည်။

"သားရဲသွေးပေါင်းစပ်တာ အောင်မြင်နိုင်သလို ကျရှုံးတာလည်း ရှိနိုင်တာပေါ့။ ဒါပေမဲ့ အစ်ကိုရှန်းကွမ်က အကြိမ်ပေါင်းများစွာ ပေါင်းစပ်ဖူးပြီးသားလေ။ ကျိုးကြောင်းဆင်ခြင်ကြည့်ရင် သူက ကျရှုံးစရာ အကြောင်းမရှိဘူး"

လိုင်ဟုက သားရဲသွေးပေါင်းစပ်ခြင်း၏ သဘောတရားကို အကျဉ်းချုပ် ရှင်းပြလိုက်သည်။

မှော်ဆရာများအတွက် သားရဲသွေးပေါင်းစပ်ခြင်းမှာ စိမ်းသက်လှသော်လည်း သိုင်းသမားများ၊ အထူးသဖြင့် တိုက်ကြီးပေါ်ရှိ နာမည်ကျော်သိုင်းကျောင်းများမှ သိုင်းသမားများအတွက်မူ ၎င်းမှာ အဆင့်မြင့်သိုင်းနယ်ပယ်သို့ တက်လှမ်းရန်နှင့် တစ်ဆို့မှုများကို ကျော်ဖြတ်ရန် မရှိမဖြစ် ရွေးချယ်စရာတစ်ခု ဖြစ်သည်။

လူတိုင်းသိကြသည့်အတိုင်း မိစ္ဆာသားရဲများသည် ဉာဏ်ရည်မရှိကြသော်လည်း သူတို့၏ မှော်အာရုံခံနိုင်စွမ်းနှင့် ခန္ဓာကိုယ်ဖွဲ့စည်းပုံမှာ လူသားများထက် ပိုမိုသန်မာကြသည်။ ဝူကျိတိုက်ကြီးမှ သိုင်းသမားများသည် မှော်တုတ်တံ မကိုင်ဆောင်နိုင်သော်လည်း မိစ္ဆာသားရဲသွေးကို အသုံးပြု၍ သူတို့၏ ခန္ဓာကိုယ်ကို သန်မာအောင် ပြုလုပ်နိုင်ကြသည်။

သိုင်းသမားတစ်ဦးသည် သိုင်းနယ်ပယ် အဆင့်တက်တိုင်း သားရဲသွေးကို စုဆောင်းကာ ပေါင်းစပ်မှု ပြုလုပ်လေ့ရှိသည်။ ထိုသို့ပြုလုပ်ခြင်းဖြင့် ပိုမိုကြံ့ခိုင်သော ခန္ဓာကိုယ်ကို ရရှိစေပြီး ကောင်းကင်နှင့် မြေကြီးကြားရှိ သိုင်းစိတ်ဓာတ်များကို ပိုမိုကောင်းမွန်စွာ စုပ်ယူနိုင်စေသည်။ သားရဲသွေးပေါင်းစပ်ခြင်းကို အဆင့် ၉ ဆင့် ခွဲခြားထားပြီး သိုင်းသမား၏ ကျင့်ကြံမှုနှင့် ပါရမီအပေါ် မူတည်၍ ရလဒ်များမှာ ကွာခြားလှသည်။

သို့သော် အကျိုးကျေးဇူးကြီးမားသလောက် အန္တရာယ်လည်း မြင့်မားလှသည်။ မိစ္ဆာသားရဲသွေး အများစုတွင် ပြင်းထန်သော ရက်စက်ကြမ်းကြုတ်သည့် အရှိန်အဝါများ ပါဝင်နေသဖြင့် ပေါင်းစပ်မှုမှာ အလွန်စိုးရိမ်ရသည်။ အထူးသဖြင့် အဆင့်မြင့်သားရဲသွေးများနှင့် ပေါင်းစပ်ရာတွင် အနည်းငယ်မျှ ပေါ့ဆလိုက်သည်နှင့် ထိုရက်စက်သော အရှိန်အဝါက စိတ်ကို လွှမ်းမိုးသွားပြီး လူစိတ်ပျောက်ကာ မိစ္ဆာသားရဲကဲ့သို့ သတ်ဖြတ်လိုစိတ်များဖြင့် ရူးသွပ်သွားတတ်သည်။

လိုင်ဟုပြောသော အစ်ကိုရှန်းကွမ် သို့မဟုတ် ရှန်းကွမ်ထော်သည် အတွင်းခန်းမ၌ပင် ထင်ရှားသူဖြစ်ပြီး သူ၏ကျင့်ကြံမှုမှာ ချန်ပိုင်၏နောက်တွင်သာ ရှိသည်။ သူ၏အဆင့်မှာ သိုင်းသူရဲကောင်းအထွတ်အထိပ်မှာပင် တစ်နှစ်ခန့် တစ်ဆို့နေခဲ့သဖြင့် နောက်တစ်ဆင့်သို့ တက်လှမ်းရန် ကြိုးစားနေခြင်း ဖြစ်ပေလိမ့်မည်။

"သူက သိုင်းနယ်ပယ် အဆင့်တက်ဖို့အတွက် အဆင့်မြင့်လွန်းတဲ့ သားရဲသွေးကို သုံးလိုက်တာထင်တယ်"

ယွင်ရှန်းက သွေးရူးသွေးတန်းဖြစ်နေသော ရှန်းကွမ်ထော်ကို ကြည့်ရင်း မှတ်ချက်ပေးလိုက်သည်။

မကြာသေးမီကပင် သိုင်းကျောင်းအတွင်း၌ ကောလာဟလများ ပျံ့နှံ့ခဲ့သည်။ အိမ်ရှေ့စံမင်းသားထံမှ လုယူထားသော သွေးတိမ်သားရဲ၏ သွေးကိုသာ အောင်မြင်စွာ ပေါင်းစပ်နိုင်ပါက သိုင်းနယ်ပယ်အဆင့်ကို ဖောက်ထွက်နိုင်စွမ်းရှိသည်ဟူ၍ ဖြစ်သည်။ ရှန်းကွမ်ထော်သည် ထိုသွေးတိမ်သားရဲသွေးနှင့် ပေါင်းစပ်ရန် ကြိုးစားခဲ့ခြင်း ဖြစ်ပေလိမ့်မည်။

ဆေးခန်းမတစ်ခုလုံး ရုန်းရင်းဆန်ခတ်ဖြစ်နေပြီး ဒဏ်ရာရသူများပြားနေသည်ကို မြင်သောအခါ ယွင်ရှန်းသည် တစ်စုံတစ်ခုမလုပ်လျှင် အခြေအနေ ပိုဆိုးသွားမည်ကို သိလိုက်သည်။ သူမသည် လိုင်ဟုထံမှ အချက်အလက်အချို့ကို အမြန်မေးမြန်းပြီးနောက် ရုတ်တရက် အသံကုန်ဟစ်အော်လိုက်သည်။

"စီနီယာအစ်ကိုပု"

ရှန်းကွမ်ထော်၏ ခန္ဓာကိုယ်မှာ တုန့်ခနဲ ဖြစ်သွားပြီး တွေဝေသွားဟန်ဖြင့် နောက်သို့ လှည့်ကြည့်လိုက်သည်။ ထိုအခိုက်အတန့်မှာပင် ယွင်ရှန်း၏ ခန္ဓာကိုယ်မှာ လိပ်ပြာတစ်ကောင်အလား လျင်မြန်စွာ လှုပ်ရှားသွားပြီး ရှန်းကွမ်ထော်၏ နောက်ကျောဘက်သို့ ရောက်ရှိသွားသည်။ သူမ၏လက်ထဲတွင် အရိုးအပ်တစ်ချောင်းကို ကိုင်ထားပြီး ရှန်းကွမ်ထော်၏ အိပ်ပျော်စေသော အပ်စိုက်မှတ်ကို ချိန်ရွယ်လိုက်သည်။

ရှန်းကွမ်ထော်သည် သူ၏ရှေ့တွင် မည်သူ့ကိုမျှ မတွေ့ရသဖြင့် ပို၍ပင် ဒေါသထွက်သွားသည်။ နောက်ကျောမှ တစ်စုံတစ်ဦး တိုက်ခိုက်လာသည်ကို အာရုံခံမိသောအခါ ယွင်ရှန်း၏ အရိုးအပ် စိုက်ဝင်တော့မည့်ဆဲဆဲတွင် သူ၏ခန္ဓာကိုယ်မျက်နှာပြင်မှ သိုင်းစိတ်ဓာတ်အလွှာတစ်ခု ထွက်ပေါ်လာပြီး ယွင်ရှန်း၏ တိုက်ခိုက်မှုကို အနည်းငယ် တွန်းကန်လိုက်သည်။

ကံကောင်းသည်မှာ ယွင်ရှန်းသည် ကြိုတင်သတိထားမိခဲ့သည်။ အပြင်အပ်က ကျရှုံးသွားသော်လည်း သူမ၏ လျှို့ဝှက်အပ်စွမ်းအားက ရှန်းကွမ်ထော်၏ ကိုယ်ထဲသို့ မညှာမတာ ထိုးဖောက်ဝင်ရောက်သွားသည်။ နောက်တစ်ခဏ၌ ရူးသွပ်နေသော ရှန်းကွမ်ထော်မှာ ယိုင်ထိုးသွားပြီး မြေကြီးပေါ်သို့ ဘုတ်ခနဲ လဲကျသွားတော့သည်။

ထိုအချိန်တွင် ဆေးခန်းမအတွင်းမှ အကြီးအကဲတစ်ဦး ပြေးထွက်လာသည်။ ရှန်းကွမ်ထော်၏ ဘေးတွင် ရပ်နေသော ယွင်ရှန်းကို မြင်သောအခါ သူက ဒေါသတကြီး ကြိမ်းမောင်းလိုက်သည်။

"မင်းက ဘယ်သူလဲ"

"အကြီးအကဲကျန်း... သူမက မှော်အကယ်ဒမီက ဖလှယ်ရေးကျောင်းသားပါ။ ကျွန်တော်တို့ သားရဲသွေးလာထုတ်တာ အစ်ကိုရှန်းကွမ် သောင်းကျန်းနေတာနဲ့ တိုးလို့ပါ"

လိုင်ဟုက အပြေးအလွှား ရှေ့သို့တိုးကာ ရိုသေစွာ လျှောက်တင်လိုက်သည်။

ယွင်ရှန်းသည် ထိုလူ၏ အမည်နှင့် ပုံပန်းသဏ္ဍာန်ကို ကြည့်လိုက်ရာ ကျန်းကျစ်ဖော်နှင့် ၇၀၊ ၈၀ ရာခိုင်နှုန်းခန့် ဆင်တူနေသည်ကို သတိပြုမိသည်။ အနည်းငယ် ပိုအိုမင်းနေရုံသာ ရှိသည်။ သူသည် ဆေးဆရာဝတ်ရုံကို ဝတ်ဆင်ထားပြီး ခါးပတ်တွင် ဆေးဘုရင်နန်းတော်မှ ပေးအပ်ထားသော အရပ်လေးမျက်နှာ လှည့်လည်ကုသသူ ဆေးဆရာတံဆိပ်ကို ချိတ်ဆွဲထားသည်။

သူသည် လော်ချင်း ပြောပြဖူးသော ကျန်းကျစ်ဖော်၏ ဖခင်၊ ဝူရွှမ်း ဝူကျိခန်းမ ဆေးခန်းမ၏ တာဝန်ခံ အကြီးအကဲကျန်းပင် ဖြစ်ပေလိမ့်မည်။ အကြီးအကဲကျန်းသည် ယွင်ရှန်းမှာ တော်ဝင်မှော်အကယ်ဒမီမှ ကျောင်းသားဖြစ်ကြောင်း ကြားလိုက်ရချိန်တွင် နှာခေါင်းတစ်ချက် ရှုံ့လိုက်ကာ မထီမဲ့မြင် ပြုလိုက်တော့သည်။

အကြီးအကဲကျန်းသည် မူလက ဆေးဘုရင်နန်းတော်မှ ဆေးသမားတစ်ဦး ဖြစ်သော်လည်း ဆေးဖော်စပ်ခြင်းအတတ်တွင် ကျွမ်းကျင်မှုအချို့ ရှိခဲ့သည်။ သူသည် ခေါင်းလောင်းဆရာဝန်အရည်အချင်း စစ်ဆေးမှု အောင်မြင်ပြီးနောက် ဆေးဘုရင်နန်းတော်မှ ထွက်ခွာခဲ့သည်။

ထို့နောက် တိုက်ဆိုင်စွာပင် နန်းတော်တွင်း ဆေးဆရာဟောင်းတစ်ဦး၏ ဆေးဖော်စပ်နည်း မှတ်တမ်းများကို ရရှိခဲ့ရာ ထိုဗဟုသုတများဖြင့် ဝူရွှမ်း ဝူကျိခန်းမ၏ ဆေးခန်းမသို့ ဝင်ရောက်လာခဲ့ခြင်းဖြစ်သည်။ သူသည် မိမိကိုယ်ကို ဆေးဖော်စပ်ရာတွင် ပြိုင်ဘက်ကင်းသည်ဟု ယူဆထားသဖြင့် သိုင်းကျောင်းအတွင်းရှိ မည်သူ့ကိုမျှ အလေးမထားဘဲ မောက်မာစွာ ဆက်ဆံလေ့ရှိသည်။

မကြာသေးမီက သူ၏တစ်ဦးတည်းသောသား ကျန်းကျစ်ဖော် ဖျားနာသောအခါ အကြီးအကဲကျန်း ကိုယ်တိုင် စစ်ဆေးခဲ့ရာ ၎င်းမှာ သာမန်ဖျားနာခြင်းမဟုတ်ဘဲ အရေပြားပေါ်ရှိ ထူးခြားသော နံ့သာမှုန့်တစ်မျိုးကြောင့်ဖြစ်ကြောင်း သိလိုက်ရသည်။ သူ့သားကို အဆိပ်ခတ်ဝံ့သူ ရှိနေသဖြင့် ဒေါသထွက်ကာ မေးမြန်းကြည့်ရာမှ ကျန်းကျစ်ဖော်သည် အပြင်ခန်းမမှ အမျိုးသမီးသိုင်းသမားများထံမှ ရနံ့တစ်ခုကို ရှူမိခဲ့ကြောင်း ပေါ်ပေါက်လာသည်။

ထိုရနံ့ကို ရှူမိပြီးနောက် ကျန်းကျစ်ဖော်၏ တစ်ကိုယ်လုံးတွင် အနီစက်များ ထွက်လာပြီး ထိလိုက်သည်နှင့် မခံမရပ်နိုင်အောင် ယားယံလာခြင်းဖြစ်သည်။ အကြီးအကဲကျန်းသည် အမျိုးသမီးသိုင်းသမား အချို့ကို ခေါ်ယူစစ်ဆေးရာမှ ဆေးအိတ်လေးများကို တွေ့ရှိခဲ့ပြီး ၎င်းမှာ တော်ဝင်မှော်အကယ်ဒမီမှ မှော်ဆရာမလေး ယွင်ရှန်းထံမှ လာခြင်းဖြစ်ကြောင်း အဖြေထွက်လာသည်။

ထိုအခါမှ ကျန်းသားအဖနှစ်ဦးသည် ယွင်ရှန်းက လက်တုံ့ပြန်လိုက်ခြင်းဖြစ်ကြောင်း သိသွားကြတော့သည်။ ပို၍ ဒေါသထွက်စရာကောင်းသည်မှာ အကြီးအကဲကျန်းသည် ဤကိစ္စကို လူသိရှင်ကြား မထုတ်ဖော်ရဲခြင်းပင်။ အဘယ်ကြောင့်ဆိုသော် ကျန်းကျစ်ဖော်သာ အမျိုးသမီးသိုင်းသမားများကို ကိုယ်ထိလက်ရောက် မနှောင့်ယှက်ခဲ့ပါက ဤနံ့သာမှုန့်နှင့် ထိတွေ့မိစရာ အကြောင်းမရှိသောကြောင့် ဖြစ်သည်။

သို့သော် အကြီးအကဲကျန်းသည် အရှုံးပေးမည့်သူ မဟုတ်ပေ။ ယနေ့ ယွင်ရှန်းတို့ သူ၏ခြေရင်းသို့ ရောက်လာချိန်တွင် သင်ခန်းစာကောင်းကောင်းပေးရန် အခွင့်အရေးကို သူ လက်လွတ်ခံမည်မဟုတ်ပါ။

"ဒီနေ့အတွက် သားရဲသွေးတွေ အကုန်ကုန်သွားပြီ။ ဒီနေ့တင်မကဘူး။ နောက်လလည်း လာမတောင်းနဲ့တော့။ ဆေးခန်းမက သားရဲသွေး ဆေးလုံးတွေကို သိုင်းသမားတွေအတွက်ပဲ ထုတ်ပေးတာ။ ပြီးတော့ လိုင်ဟု... မင်းက သိုင်းသမားတစ်ယောက်ဖြစ်ပြီး မှော်ဆရာတွေနဲ့ ပေါင်းပြီး ကိုယ့်ဂုဏ်သိက္ခာကို ဖျက်ဆီးနေမှတော့ နောက်ဆို သားရဲသွေးလာထုတ်ဖို့ မလိုတော့ဘူး"

ဆေးခန်းမ၏ အကြီးအကဲဖြစ်သူ ကျန်းသည် ဆေးလုံးနှင့် သားရဲသွေး ခွဲတမ်းများကို ချုပ်ကိုင်ထားသူဖြစ်ရာ သူ၏စကားမှာ လိုင်ဟုကိုပါ အကြီးအကဲ ဒုက္ခပေးလိုက်ခြင်းပင်။

"အကြီးအကဲကျန်း"

လိုင်ဟုမှာ မှင်တက်သွားရသည်။

အသက် ၁၃၊ ၁၄ နှစ်အရွယ်သည် သိုင်းသမားတစ်ဦးအတွက် ခန္ဓာကိုယ်ကို သန်မာအောင် တည်ဆောက်ရမည့် ရွှေရောင်အချိန်ကာလ ဖြစ်သည်။ သားရဲသွေးမရှိပါက သူသည် ရွယ်တူများ၏နောက်တွင် များစွာ ကျန်ရစ်ခဲ့မည်ဖြစ်ပြီး နောင်တွင် အတွင်းခန်းမသို့ ဝင်ရောက်ခွင့်ရရန် မည်သို့မျှ မျှော်လင့်ချက် ရှိတော့မည်မဟုတ်ပေ။

အကြီးအကဲကျန်းမှာမူ ဂုဏ်ယူဝင့်ကြွားနေသည်။ သူ့အတွက် လိုင်ဟုကဲ့သို့ နောက်ခံမရှိသလို ပါရမီလည်း အလယ်အလတ်သာရှိသော ကျောင်းသားတစ်ဦးကို အဖက်လုပ်၍ ရန်ငြိုးဖွဲ့ရန်ပင် မလိုဟု ထင်နေသည်။

ယွင်ရှန်းသည် ဒေါသကြောင့် အံကို ကျစ်ကျစ်ပါအောင် ကြိတ်ထားလိုက်သည်။ အဖေတူသားဆိုတာ ဒါမျိုးကို ပြောတာပဲ။ ကျန်းကျစ်ဖော်ကဲ့သို့ ရိုင်းစိုင်းသူ၏ ဖခင်မှာလည်း ကောင်းမွန်သောသူ မဖြစ်နိုင်သည်မှာ သိသာလှသည်။

"လိုင်ဟု... သူ့ကို မတောင်းပန်နဲ့။ ငါတို့တွေ သူ့ရဲ့ သားရဲသွေးကို မလိုချင်ဘူး။ အစ်ကိုရှန်းကွမ် ဒီလိုဖြစ်သွားတာကလည်း သူဖော်စပ်ပေးတဲ့ သားရဲသွေးတွေကြောင့်ပဲ မဟုတ်လား"

ယွင်ရှန်းက ထေ့ငေါ့၍ ပြောလိုက်သည်။ ဤကဲ့သို့သောလူမျိုးကို နှိမ့်ချတောင်းပန်ရန် သူမ လုံးဝဆန္ဒမရှိပေ။