အခးန် (၁၄၀၉-၁၄၁၀)

အခန်း (၁၄၀၉) တစ်ခဏတာ တိုက်ခိုက်မှု

"ခြံဝင်း တစ်ခုလုံးကို မီးရှို့လိုက်တာတောင် ရဲတိုက်ထဲက 'ဥယျာဉ်မှူး' တွေနဲ့ ခြံဝင်းပိုင်ရှင် ထွက်မလာရဲကြဘူး ဒီဘုရင်က တော်တော် သတိကြီးတယ် ကြည့်ရတာ ငါ့အထောက်အထားကို သိသွားလို့ ကြိုတင် ပြင်ဆင်ထားပုံ ရတယ် သဘောင်္ စီမံကိန်း ကို စတင်ကတည်းက တန်ပြန် တိုက်ခိုက်မယ့် အခြေအနေတွေကိုပါ သူတို့ ထည့်တွက်ထားပြီးသား နေမှာပါ"

ယန်ကျန့် ရဲတိုက် တံခါးမကြီး ရှေ့သို့ ရောက်ရှိနေပြီ ဖြစ်သည်။

တံခါးကြီး ပိတ်ထားပြီး အတွင်းဘက်တွင် လှုပ်ရှားသံ မကြားရဘဲ တိတ်ဆိတ်ငြိမ်သက်နေသည်။

သို့သော် အခြေအနေကို နှစ်ဖက်စလုံး ကောင်းကောင်း သိထားကြသည်။ သတိထားနေကြသဖြင့် မတိုက်ခိုက်ကြသေးခြင်းသာ ဖြစ်သည်။

"ရန်သူက တစ်ယောက်တည်းပါ ငါတို့ဘက်က လူတွေ ဒီလောက်များတာ သူ သေချာပေါက် သေမှာပါ ဘာလို့ ငါတို့ကို အထဲမှာပဲ နေခိုင်းနေတာလဲ တံခါးဖွင့်ပြီး ထွက်သတ်ပစ်လိုက်ရအောင်"

တချို့ ဥယျာဉ်မှူးများ သည်းမခံနိုင် ဖြစ်နေကြသည်။

"တစ်ဖက်လူက ခေါင်းဆောင် တစ်ယောက်လေ ငါတို့ ယှဉ်ဖို့ မလွယ်ဘူး ဒါပေမဲ့ စိတ်မပူပါနဲ့ သူ ဒီည အသက်ရှင်မှာ မဟုတ်ပါဘူး ဆရာကြီး ရှင်းပေးလိမ့်မယ်"

တချို့က ဝင်ပြောလိုက်သည်။

"သူ ဝင်ရဲမလား ကြည့်ရသေးတာပေါ့ ဝင်လာတာနဲ့ ငါတို့ သူ့ကို နောင်တရသွားအောင် လုပ်ပစ်မယ်"

ဒီဥယျာဉ်မှူးများသည် ယန်ကျန့်ကို ရင်ဆိုင်ရန် အသင့် ဖြစ်နေကြသည်။ သူတို့ မကြောက်ကြပေ။ ဆရာကြီး၏ အမိန့်ကြောင့်သာ ခြံဝင်း မီးလောင်နေသည်ကို ဒီအတိုင်း ကြည့်နေရခြင်း ဖြစ်သည်။ မဟုတ်လျှင် ယန်ကျန့် တံခါးဝ ရောက်ကတည်းက ထွက်တိုက်ခိုက်ပြီး ဖြစ်သည်။

တကယ်တမ်းတွင်မူ...

ခြံဝင်းပိုင်ရှင်၏ ဆုံးဖြတ်ချက် မှန်ကန်ပါသည်။

ဘုရင်အဖွဲ့အစည်း သည် ဌာနချုပ် ခေါင်းဆောင်များကို တိုက်ခိုက်ပြီး ဖိအားပေးနေသော်လည်း ခေါင်းဆောင်များ၏ တန်ပြန် တိုက်ခိုက်မှုကိုလည်း စိုးရိမ်နေကြသည်။ ထို့ကြောင့် သဘောင်္ စီမံကိန်း မအောင်မြင်မီ ပိုမို ပြင်းထန်သော လှုပ်ရှားမှုများ မပြုလုပ်ဘဲ စောင့်ဆိုင်းနေကြသည်။ စီမံကိန်း အောင်မြင်သွားပါက တစ္ဆေများ၏ တိုက်ခိုက်မှုကြောင့် ဌာနချုပ် ပြိုလဲသွားမည်ဟု ယုံကြည်ထားကြသည်။

"အချိန်အကြာကြီး ဆွဲထားလို့ မဖြစ်ဘူး တခြား 'ဘုရင်' တွေ ရောက်လာရင် အခြေအနေ ရှုပ်ထွေးကုန်လိမ့်မယ်"

ယန်ကျန့် တံခါးဝတွင် ရပ်နေသော်လည်း မလှုပ်ရှားသေးပေ။

သို့သော် တစ္ဆေမီးများက ရဲတိုက်ကြီး တစ်ခုလုံးကို လွှမ်းခြုံထားပြီ ဖြစ်သည်။ တချိန်တည်းမှာပင် တစ္ဆေရေကန် ၏ စွမ်းအားများ လျင်မြန်စွာ ပျံ့နှံ့လာပြီး နေရာတိုင်းကို တိုက်စားနေသည်။

ရဲတိုက်ကြီးတွင်လည်း သဘာဝလွန် စွမ်းအားများ ရှိနေကြောင်း သူ ခံစားမိသည်။ ပြဿနာက တံခါးမကြီးတွင် ရှိနေသည်။

ထူထဲသော သစ်သားတံခါးကြီးသည် ဟောင်းနွမ်းနေသော်လည်း လူမျက်နှာ ပုံရိပ်နှစ်ခု ထွင်းထုထားသည်။ တစ်ခုက မျက်လုံးမှိတ်ထားပြီး တစ်ခုက မျက်လုံးဖွင့်ထားသည်။ သဘာဝလွန် စွမ်းအား တစ်မျိုး ထွက်ပေါ်လာပြီး ရဲတိုက် တစ်ခုလုံးကို လွှမ်းခြုံကာ ကာကွယ်ပေးထားသည်။

သို့သော် ဒီလို ကာကွယ်မှုမျိုးက တစ္ဆေရေကန် ၏ ကျူးကျော်မှုကို မတားဆီးနိုင်ပေ။ စွမ်းအားချင်း ကွာခြားလွန်းသည်။

"လုံလောက်ပြီ"

ယန်ကျန့် ရဲတိုက်ကြီး ရေထဲ နစ်မြုပ်လုနီးပါး ဖြစ်နေသည်ကို ခံစားမိလိုက်သောအခါ တစ္ဆေမျက်လုံး ကို ဖွင့်လိုက်သည်။

နောက်တစ်ခဏတွင်...

အနီရောင် တစ္ဆေနယ်မြေ ထပ်မံ ပေါ်ထွက်လာပြီး အစိမ်းရောင် တစ္ဆေမီးများကို ဖုံးလွှမ်းသွားသည်။

၆ ထပ် တစ္ဆေနယ်မြေ ပွင့်သွားခြင်း ဖြစ်သည်။

၆ ထပ် တစ္ဆေနယ်မြေ ထဲတွင် သဘာဝလွန် စွမ်းအားများကို ရပ်တန့်စေနိုင်သည်။ တစ္ဆေဆရာများကိုလည်း ရပ်တန့်စေနိုင်သည်။ စွမ်းအားကြီးသော တစ္ဆေဆရာများအတွက် ရပ်တန့်ချိန် တိုတောင်းသော်လည်း ယခုအခါ ယန်ကျန့်၏ တစ္ဆေမျက်လုံး ၆ လုံး ငြိမ်သက်သွားနေသဖြင့် ရပ်တန့်ချိန်ကို ကြာမြင့်စွာ ထိန်းထားနိုင်သည်။

"၆ ထပ် တစ္ဆေနယ်မြေ ထဲမှာ ငါလည်း ထိခိုက်နိုင်တယ် ဒါပေမဲ့ ၇ ထပ် တစ္ဆေနယ်မြေ သုံးပြီး ပြန်လည်စတင်ခြင်း လုပ်လိုက်ရင် သက်ရောက်မှု မရှိတော့ဘူး"

ယန်ကျန့် ခန္ဓာကိုယ်မှ အနီရောင် အလင်းတန်းများ ထွက်ပေါ်လာသည်။ လက်ထဲမှ အနီရောင် လှံရှည်ကို ဝှေ့ယမ်းလိုက်သည်။

တစ္ဆေများကို အပိုင်းပိုင်း ပြတ်တောက်စေနိုင်သော တစ္ဆေဓားဖြင့် ပိတ်ထားသော တံခါးမကြီးကို ခုတ်ပိုင်းလိုက်သည်။ တံခါးပေါ်မှ လူမျက်နှာများသည် ကြောက်လန့်တကြား အမူအရာ ပြောင်းသွားကြသည်။

တံခါး ပွင့်သွားသည်နှင့် တပြိုင်နက် အနီရောင် တစ္ဆေနယ်မြေ အတွင်းထဲသို့ တိုးဝင်သွားသည်။

"သတိထား..."

တစ်စုံတစ်ယောက် အော်လိုက်သော်လည်း အသံ မဆုံးမီ ရပ်တန့်သွားသည်။

အားလုံး အနီရောင် အလင်းတန်းများ အောက်တွင် လှုပ်ရှား၍ မရတော့ပေ။ ယန်ကျန့် ရေပြင်ပေါ်တွင် နင်းလျှောက်ပြီး ဝင်လာသည်ကို မျက်စိဖွင့် ကြည့်နေရုံမှတစ်ပါး ဘာမှ မတတ်နိုင်ကြတော့ပေ။ ကိုယ့်အိမ်နောက်ဖေး လမ်းလျှောက်နေသလို အေးဆေး တည်ငြိမ်နေသည်။

"ခန္ဓာကိုယ် လှုပ်လို့မရတော့ဘူး ဘာဖြစ်တာလဲ"

ဥယျာဉ်မှူးများ မျက်လုံး ပြူးကျယ်သွားပြီး ထိတ်လန့်နေကြသည်။

"လှုပ်လို့ မရတာ မဟုတ်ဘူး နှေးသွားတာ..."

တချို့ ဥယျာဉ်မှူးများ လှုပ်ရှားနိုင်သော်လည်း အလွန် နှေးကွေးနေပြီး ခက်ခဲနေသည်။

"ဥယျာဉ်မှူး ၂၆ ယောက်လား မနည်းဘူးပဲ ဒါပေမဲ့ ဓားတစ်ချက်စာပါပဲ"

ယန်ကျန့်၏ ခြေအောက်မှ တစ္ဆေအရိပ် ကြမ်းပြင်ပေါ်တွင် ပျံ့နှံ့သွားပြီး ကြားခံပစ္စည်းများကို ရှာဖွေတွေ့ရှိလိုက်သည်။ မျက်စိရှေ့တွင် ဝိုးတဝါး လူရိပ်များစွာ ပေါ်လာသည်။ ယခင်က ဒီရဲတိုက်ထဲ ဝင်ထွက်သွားလာခဲ့ဖူးသော လူများ၏ ပုံရိပ်များ ဖြစ်သည်။

ပုံရိပ်များ ထပ်နေပြီး ပြည့်နှက်နေသော်လည်း ယန်ကျန့် မတုံ့ဆိုင်းဘဲ ၃ ချက် ဆက်တိုက် ခုတ်ပိုင်းလိုက်သည်။

မျက်စိရှေ့မှ ကြားခံပစ္စည်းများ တစ္ဆေဓားချက်ကြောင့် အပိုင်းပိုင်း ပြတ်တောက်သွားသည်။

နောက်တစ်ခဏတွင်...

ကြောက်မက်ဖွယ် တစ္ဆေဓား ကျိန်စာ ပေါက်ကွဲထွက်လာသည်။ ကြားခံပစ္စည်းများမှတစ်ဆင့် မမြင်ရသော သဘာဝလွန် တိုက်ခိုက်မှုများ ကျရောက်လာသည်။

၆ ထပ် တစ္ဆေနယ်မြေ ကြောင့် ရပ်တန့်နေသော ဥယျာဉ်မှူး တစ်ဦး မျက်လုံး ပြူးကျယ်သွားသည်။ လွတ်မြောက်ရန် မကြိုးစားရသေးမီ ခေါင်းပေါ်တွင် အက်ရာတစ်ခု ပေါ်လာပြီး ချက်ချင်း ကွဲထွက်သွားသည်။

၆ ထပ် တစ္ဆေနယ်မြေ ၏ သက်ရောက်မှုကို လစ်လျူရှုပြီး ခန္ဓာကိုယ် နှစ်ပိုင်း ကွဲထွက်သွားခြင်း ဖြစ်သည်။

ဒါတင် မကသေးပေ။ ခန္ဓာကိုယ်လည်း နှစ်ပိုင်း ပြတ်သွားပြီး ခြေထောက်များလည်း ကျိုးပဲ့သွားသည်။

"ဘယ်လို ဖြစ်တာလဲ"

ထိုဥယျာဉ်မှူး ကြောက်လန့်သွားသည်။

ဘာမှ မလုပ်ရသေးဘဲ တစ်စက္ကန့်အတွင်း ဒီလို အခြေအနေ ရောက်သွားသည်။

ကြောက်မက်ဖွယ် သဘာဝလွန် စွမ်းအားက သူ့ကို မကယ်တင်နိုင်ဘဲ ခန္ဓာကိုယ် အနည်းငယ် တုန်ခါသွားရုံသာ ရှိသည်။

အလားတူ ဖြစ်ရပ်များ အခြားသူများဆီတွင်လည်း ဖြစ်ပွားနေသည်။ တချို့ဆိုလျှင် ပိုမို ဆိုးရွားသည်။

"တခြားလူတွေလည်း တိုက်ခိုက်ခံရတယ် တစ္ဆေမျက်လုံး ယန်ကျန့် က လူအများကြီးကို တပြိုင်နက် တိုက်ခိုက်လိုက်တာလား"

"နောက်နေတာလား ဒါ ခေါင်းဆောင်တစ်ယောက်ရဲ့ စွမ်းအားလား ငါ ဘာမှတောင် မလုပ်ရသေးဘူး"

"ငါ သေတော့မယ် ထင်တယ်"

ဒေါသထွက်သံ၊ မကျေနပ်သံများ စိတ်ထဲတွင် ပဲ့တင်ထပ်နေသော်လည်း အသံထွက် ပြော၍ မရပေ။ တစ်စက္ကန့်အတွင်း အသတ်ခံလိုက်ရသည် ဆိုသော အမှန်တရားကို ပြောင်းလဲ၍ မရနိုင်ပေ။

ကွာခြားချက်က ကြီးမားလွန်းသည်။

၆ ထပ် တစ္ဆေနယ်မြေ နှင့် တစ္ဆေဓား ပေါင်းစပ်လိုက်ပါက ခေါင်းဆောင်အဆင့်အောက် တစ္ဆေဆရာ မည်သူမျှ ခံနိုင်ရည် မရှိပေ။ ရှောင်တိမ်း၍လည်း မရနိုင်ပေ။ တစ်ခုတည်းသော မျှော်လင့်ချက်မှာ ကိုယ့်သဘာဝလွန် စွမ်းအား၏ ထူးခြားမှုကြောင့် အသက်ဆက်ရှင်နိုင်မလား ဆိုတာပင် ဖြစ်သည်။

"လူအင်အား များတာက ငါ့ရှေ့မှာ အားသာချက် မဟုတ်ဘူး"

ယန်ကျန့် မျက်နှာသေဖြင့် ပြောလိုက်သည်။ တိုက်ခိုက်မှုကို ရပ်တန့်လိုက်ပြီး ၇ ထပ် တစ္ဆေနယ်မြေ မှ ထွက်ကာ ၆ ထပ် တစ္ဆေနယ်မြေ ကိုလည်း ပိတ်လိုက်သည်။

ရပ်တန့်စေသော စွမ်းအား ပျောက်ကွယ်သွားသည်။

ချက်ချင်းပင်...

ရဲတိုက် အတွင်းရှိ နေရာအနှံ့အပြားမှ ဥယျာဉ်မှူးများသည် ခန္ဓာကိုယ် အပိုင်းပိုင်း ပြတ်တောက်သွားပြီး မြေကြီးပေါ် လဲကျသွားကြသည်။

"သောက်ကောင်"

မြေကြီးပေါ် လိမ့်နေသော ခေါင်းပြတ်တစ်ခုက အော်ဟစ်လိုက်သည်။

ဒီတစ္ဆေဆရာက အပိုင်းပိုင်း ပြတ်တောက်သွားသော်လည်း အသက်ရှင်နေသေးသည်။ သဘာဝလွန် စွမ်းအား တစ်မျိုးက အသက်ဆက်ရှင်စေသည်။ သို့သော် တစ္ဆေဓားက ခန္ဓာကိုယ်သာမက သဘာဝလွန် စွမ်းအားကိုပါ ခွဲခြားပစ်လိုက်သဖြင့် အသက်ရှင်နေသော်လည်း ဘာမှ မလုပ်နိုင်တော့ဘဲ အော်ဟစ်ရုံသာ တတ်နိုင်တော့သည်။

"တစ်စက္ကန့်တောင် မကြာဘဲ တိုက်ပွဲ ပြီးသွားတာလား ကွာခြားချက်က ဒီလောက် ကြီးမားနေတာလား ယန်ကျန့် ငါ မယုံဘူး မင်း တစ္ဆေလောကထဲ ရောက်တာ တစ်နှစ်ကျော်ပဲ ရှိသေးတယ် ငါ့သက်တမ်းက မင်းထက် အများကြီး ပိုရှည်တယ် အရင်က မင်းကို လုပ်ကြံဖို့ တာဝန် ငါ လက်ခံမလို့ လုပ်ခဲ့သေးတယ် တခြားကောင် လက်ခံသွားလို့သာ မင်း မျက်နှာက အခု ခြံဝင်းထဲက ကောက်ရိုးရုပ်ပေါ် ရောက်မနေတာ"

အာရှသား မျက်နှာပေါက် ရှိသော ဥယျာဉ်မှူး တစ်ဦးက ပါးစပ်ပြတ်ကြီးဖြင့် အော်ဟစ် ပြောဆိုလိုက်သည်။

ဒီတစ္ဆေဆရာက သက်တမ်းရင့်ပြီး ယန်ကျန့်နှင့် ပတ်သက်မှု ရှိခဲ့ဖူးပုံ ရသည်။

"မင်းတို့ အသံတွေက ဆူညံလွန်းတယ် ရေအောက်ရောက်ပြီး ပျောက်ကွယ်သွားလိုက်ကြတော့"

ယန်ကျန့်၏ အေးစက်သော အသံ ရဲတိုက်ကြီး အတွင်း ပဲ့တင်ထပ်သွားသည်။

အေးစက်သော ရေများသည် နေရာတိုင်း လွှမ်းမိုးသွားသည်။

အပိုင်းပိုင်း ပြတ်တောက်နေသော အလောင်းကောင်များသည် ရေနှင့် ထိတွေ့သည်နှင့် လျင်မြန်စွာ နစ်မြုပ်သွားကြသည်။ ရေတိမ်တိမ်လေးဟု ထင်ရသော်လည်း အောက်ခြေမရှိသော ရေကန်ကြီး တစ်ခုကဲ့သို့ အရာအားလုံးကို ဝါးမြိုသွားသည်။

ယန်ကျန့်သည် ဥယျာဉ်မှူးများကို ပြန်လည် နိုးထခွင့် ပေးမည် မဟုတ်ပေ။ အကောင်းဆုံး နည်းလမ်းမှာ တစ္ဆေရေကန် ထဲတွင် နှစ်မြှုပ်ပစ်လိုက်ခြင်း ဖြစ်သည်။

တစ္ဆေရေကန် ၏ စွမ်းအားသည် သက်ရှိလူသား အသိစိတ်ကို တိုက်စားပစ်နိုင်သည်။ တစ္ဆေများသာ ရှင်သန်နိုင်သည်။ သို့သော် တစ္ဆေများ ရှင်သန်လျှင်တောင် ပြန်လည် နိုးထလာဖို့ ခဲယဉ်းသည်။ အကြောင်းမှာ ခန္ဓာကိုယ် အပိုင်းပိုင်း ပြတ်တောက်နေပြီး သဘာဝလွန် စွမ်းအားများ ကွဲပြားနေသဖြင့် ရေကန်ထဲတွင် နစ်မြုပ်သည့် အနက် ကွာခြားသွားမည် ဖြစ်ရာ ပြန်လည် စုစည်းမိဖို့ မဖြစ်နိုင်သလောက် ဖြစ်သွားမည်။

တိုက်ခိုက်မှုက ကြာမြင့်သည်ဟု ထင်ရသော်လည်း လက်တွေ့တွင် စက္ကန့်ပိုင်းသာ ကြာမြင့်ခဲ့သည်။

ဒီလောက် လျင်မြန်စွာ အဆုံးသတ်သွားခြင်းက ခြံဝင်းပိုင်ရှင်ကိုပင် အံ့အားသင့်သွားစေသည်။

အရမ်း မြန်ဆန်လွန်းတယ်။ တားဆီးချိန်တောင် မရလိုက်ဘူး။ ခြံဝင်းပိုင်ရှင်၏ အမြင်အရ ယန်ကျန့် ဝင်လာလျှင်တောင် ဥယျာဉ်မှူး ၂၆ ယောက်က ဒုက္ခပေးနိုင်ပြီး အချိန်ဆွဲထားနိုင်မည်ဟု တွက်ဆထားခဲ့သည်။ ထို့ကြောင့် စောစောစီးစီး ထွက်မလာဘဲ ဥယျာဉ်မှူးများနှင့် တိုက်ခိုက်စေပြီး ယန်ကျန့်၏ ဝှက်ဖဲများကို ဖော်ထုတ်စေလိုခြင်း ဖြစ်သည်။

သူကတော့ ပုန်းအောင်းနေပြီး အရေးကြီးချိန်ကျမှ အသေအလဲ တိုက်ခိုက်ရန် စီစဉ်ထားခြင်း ဖြစ်သည်။

"မစ္စတာယန် မင်းရဲ့ လက်စွမ်းက အံ့သြစရာ ကောင်းတယ် ငါ့ဥယျာဉ်မှူးတွေ မျက်စိတစ်မှိတ် အတွင်း ပျောက်ကွယ်သွားတယ် မင်း ငါ့ကို အံ့အားသင့်စရာ လက်ဆောင်တစ်ခု ပေးလိုက်တာပဲ"

ခြံဝင်းပိုင်ရှင်၏ အက်ရှရှ အသံ ရဲတိုက်ကြီး အတွင်း ထွက်ပေါ်လာသည်။ သူ စောစော ထွက်လာရတော့မည်။

"မင်းရဲ့ ဥယျာဉ်မှူးတွေ အားနည်းလွန်းလို့ ငါလည်း အံ့သြသွားတယ် ဒါပေမဲ့ စိတ်မပူပါနဲ့ သူတို့ အရင်သွားနှင့်တာပါ မင်းအလှည့် ရောက်လာတော့မယ် မင်း ငါ့ကို မတူညီတဲ့ ခံစားမှုမျိုး ပေးနိုင်မယ်လို့ မျှော်လင့်တယ် မဟုတ်ရင် ဒီခရီးက တန်မှာ မဟုတ်ဘူး"

ယန်ကျန့် အေးစက်စွာ ပြောလိုက်သည်။ တစ္ဆေမျက်လုံး ဖြင့် ခြံဝင်းပိုင်ရှင်၏ တည်နေရာကို ရှာဖွေနေသည်။

တချိန်တည်းမှာပင် တစ္ဆေမီးများ ရဲတိုက်ကြီး အတွင်း လောင်ကျွမ်းနေပြီး အရာအားလုံးကို ပြာချပစ်ရန် ကြိုးစားနေသည်။

"ဒါ ငါ့ပိုင်နက်ပဲ ငါ မင်းကို ကောင်းကောင်း ဧည့်ခံပါ့မယ် စိတ်ချပါ"

ခြံဝင်းပိုင်ရှင်၏ အသံ ထွက်ပေါ်နေဆဲ ဖြစ်သည်။

ယန်ကျန့် တစ္ဆေမျက်လုံး ဖြင့် ရှာဖွေသော်လည်း မတွေ့ပေ။ သဘာဝလွန် နှောင့်ယှက်မှု ရှိနေသည်။ တစ္ဆေမီး ကလည်း တစ်ဖက်လူကို ထွက်လာအောင် မလုပ်နိုင်ပေ။ ကြည့်ရတာ ဒီခြံဝင်းပိုင်ရှင်က သာမန် မဟုတ်ပေ။

သို့သော် ယန်ကျန့် တိုက်ခိုက်ရာတွင် ဘယ်တော့မှ အလျှော့မပေးပေ။ အချိန်တိုအတွင်း အနိုင်အရှုံး၊ သေရေးရှင်ရေး ဆုံးဖြတ်လေ့ ရှိသည်။

"ဒီလှံကို ပစ်လိုက်ရင် စကားပြောတဲ့လူကို သေချာပေါက် ထိမှန်ရမယ်"

ယန်ကျန့် အနီရောင် လှံရှည်ကို ကိုင်လိုက်သည်။ သွေးများ လှံရှည်ပေါ်မှ စိမ့်ထွက်လာသည်။ သူ တိုးတိုးလေး ရေရွတ်လိုက်သည်။ နတ်ဆိုး ကျိန်စာ တိုက်လိုက်သကဲ့သို့ ဖြစ်နေသည်။ ခြံဝင်းပိုင်ရှင် ရုတ်တရက် ကြောက်မက်ဖွယ် အရာတစ်ခု၏ ပစ်မှတ်ထားခြင်း ခံလိုက်ရသလို ခံစားလိုက်ရသည်။

ဆုတောင်းပြီးနောက် ယန်ကျန့် လှံရှည်ကို မတုံ့ဆိုင်းဘဲ ပစ်လွှတ်လိုက်သည်။

အခန်း (၁၄၁၀) ပေါ်ထွက်လာခြင်းနှင့် တိုက်ခိုက်ခြင်း

ပစ်လွှတ်လိုက်သော လှံရှည်သည် ကြောက်မက်ဖွယ် သဘာဝလွန် စွမ်းအား၏ လွှမ်းမိုးမှုအောက်တွင် ရဲတိုက်ကြီး၏ နက်ရှိုင်းသော နေရာသို့ ပျံသန်းသွားပြီး မျက်စိတစ်မှိတ် အတွင်း ပျောက်ကွယ်သွားသည်။

သိသာထင်ရှားသည်မှာ ယန်ကျန့် ဆုတောင်းခြင်း အာနိသင် သက်ရောက်နေပြီ ဖြစ်သည်။ ယခု အချိန်မှစ၍ တစ္ဆေလှံသည် ခြံဝင်းပိုင်ရှင်ကို မထိမှန်မချင်း ရပ်တန့်မည် မဟုတ်ပေ။

"စောစောက ကြားခံပစ္စည်း သုံးပြီး တစ္ဆေဓားနဲ့ ခုတ်တုန်းက သူ့ကို ထိမှန်ခဲ့သင့်တယ် ဒါပေမဲ့ ရလဒ်ကြည့်ရတာ သိပ်မထိရောက်ခဲ့ဘူး ထင်တယ် ဒီခြံဝင်းပိုင်ရှင်က ထွက်မလာသေးဘူး ငါ့အကွက်တွေကို စောင့်ကြည့်နေပြီး အချိန်ဆွဲနေတယ် တခြားလူတွေ ရောက်လာဖို့ စောင့်နေတာ ဖြစ်မယ် ငါနဲ့ အသေအလဲ မတိုက်ခိုက်ချင်ဘူး"

ယန်ကျန့် တစ္ဆေမျက်လုံး လှုပ်ရှားသွားပြီး လှံရှည် ပျောက်ကွယ်သွားသော ဘက်ကို စိုက်ကြည့်ကာ မတုံ့ဆိုင်းဘဲ လိုက်သွားလိုက်သည်။

ဆုတောင်းပြီး တိုက်ခိုက်ခြင်းက ပထမအဆင့်သာ ဖြစ်သည်။ ဒုတိယအဆင့်က ဆုတောင်းခြင်းကို အသုံးချပြီး တစ်ဖက်လူ၏ တည်နေရာကို ရှာဖွေကာ နောက်ထပ် တိုက်ခိုက်ခွင့် ရယူရန် ဖြစ်သည်။

မှောင်မည်းနေသော ရဲတိုက်ကြီး၏ တစ်နေရာတွင် ဖြစ်သည်။ ဒီနေရာသည် တစ္ဆေမီး မရောက်ရှိနိုင်သော နေရာ ဖြစ်သည်။

အနီရောင် လှံရှည်သည် အသက်ရှိနေသကဲ့သို့ လျင်မြန်စွာ ဖြတ်သန်းသွားနေသည်။ တခါတလေ ရပ်တန့်သွားပြီး ပစ်မှတ်ကို ရှာဖွေနေသကဲ့သို့ ဖြစ်နေသည်။

တချိန်တည်းမှာပင်...

အသက် ၅၀ ခန့်ရှိမည့် အိုမင်းရင့်ရော်နေသော အမျိုးသားတစ်ဦးသည် အမှောင်ထုထဲတွင် လေးလံသော ခြေလှမ်းများဖြင့် လျှောက်လှမ်းနေသည်။ တိတ်ဆိတ်နေသော စင်္ကြံလမ်းမပေါ်တွင် ခြေတစ်လှမ်း လှမ်းလိုက်တိုင်း သူ့ခြေထောက် အရွယ်အစားနှင့် မတူညီသော အမည်းရောင် ခြေရာကြီး တစ်ခု ကျန်ရစ်ခဲ့သည်။ ထို့အပြင် သူ့နောက်တွင် စိမ်းသက်သော ခြေသံများ တဖြည်းဖြည်း ထွက်ပေါ်လာသည်။

အစပိုင်းတွင် ခြေသံ တစ်ခုတည်းသာ ရှိသော်လည်း အချိန်ကြာလာသည်နှင့်အမျှ ခြေသံများ ပိုမို များပြားလာသည်။

လမ်းတိုလေး တစ်ခု လျှောက်လိုက်ရုံဖြင့် ခြံဝင်းပိုင်ရှင်၏ နောက်တွင် ခြေသံများ ထူထပ်စွာ ထွက်ပေါ်လာပြီး မရေမတွက်နိုင်သော လူအုပ်ကြီး လိုက်ပါလာသကဲ့သို့ ဖြစ်နေသည်။ ထူးဆန်းသည်မှာ သူ့နောက်တွင် မည်သူမျှ မရှိသော်လည်း ခြေရာများသာ တစ်ခုပြီးတစ်ခု ထွက်ပေါ်လာခြင်း ဖြစ်သည်။

ခြံဝင်းပိုင်ရှင်က လမ်းပြသူ တစ်ဦးကဲ့သို့ ဖြစ်နေပြီး ခြေသံအားလုံးက သူ့နောက်သို့ လိုက်ပါနေကြသည်။

စင်္ကြံလမ်းမပေါ်ရှိ ပြတင်းပေါက် တစ်ခုဘေးမှ ဖြတ်သွားသောအခါ မှန်ပေါ်တွင် ကြောက်မက်ဖွယ်ရာ မြင်ကွင်းတစ်ခု ပေါ်လာသည်။ လူသူကင်းမဲ့နေသော စင်္ကြံလမ်းမပေါ်တွင် မရေမတွက်နိုင်သော လူအုပ်ကြီး ပါလာသည်ကို တွေ့လိုက်ရသည်။ ထိုလူများသည် မျက်နှာသေနှင့် ဖြစ်ပြီး အေးစက်ကာ ထုံထိုင်းနေကြသည်။ အချို့က ကိုယ်လက်အင်္ဂါ မပြည့်စုံ၊ အချို့က ပုပ်သိုးနေသည်၊ အချို့က သွေးထွက်နေသည်... ဒါတွေက လူအုပ်စု မဟုတ်ဘူး။ တစ္ဆေအုပ်စု ဖြစ်သည်။

မှန်ပေါ်မှ ပုံရိပ်သည် တစ်ခဏသာ ပေါ်လာပြီး ပျောက်ကွယ်သွားသည်။ လက်တွေ့တွင် ခြံဝင်းပိုင်ရှင်၏ နောက်တွင် မည်သူမျှ မရှိဘဲ အဆက်မပြတ် ပေါ်လာသော ခြေရာများသာ ရှိနေသည်။

ဒီခြေရာများ ပေါ်လာရခြင်းမှာ ကြမ်းပြင်ပေါ်တွင် ရေအိုင်များ ကျန်ရစ်နေသောကြောင့် ဖြစ်သည်။

"စိတ်လောကြီးတဲ့ ခေါင်းဆောင်လေးပါလား ငါ့ကို သတ်ချင်လွန်းလို့ မနေနိုင်မထိုင်နိုင် ဖြစ်နေတာပဲ ဒီလိုဆိုရင်တော့ ဒီကောင်လေးကို သင်ခန်းစာ နည်းနည်း ပေးရမယ်"

ခြံဝင်းပိုင်ရှင် မျက်နှာသေဖြင့် ပြောလိုက်သည်။ ယန်ကျန့်နှင့် မျက်နှာချင်းဆိုင် မတွေ့ရသေးသော်လည်း ယန်ကျန့်၏ လှုပ်ရှားမှု အားလုံးကို သိရှိနေပုံ ရသည်။

အဘယ်ကြောင့်ဆိုသော် ဒီနေရာသည် သူ့ရဲတိုက်၊ သူ့နန်းတော် ဖြစ်သောကြောင့် ဖြစ်သည်။ ဒီနေရာမှာ သူက ဘုရင် ဖြစ်ပြီး ဘယ်သူမှ သူ့ကို ဆန့်ကျင်လို့ မရပေ။

ဒီနေရာကို ရောက်လာပြီး သူ့ကို မလေးစားသော မည်သူမဆို ဝိညာဉ်အဖြစ် ပြောင်းလဲသွားပြီး သူ့အစေခံ ဖြစ်သွားရမည်။ သူ့နောက်သို့ ထာဝရ လိုက်ပါနေရမည်။

နောက်တစ်ခဏတွင်...

အသက် ၅၀ အရွယ် ခြံဝင်းပိုင်ရှင် ပျောက်ကွယ်သွားပြီး ရဲတိုက်ကြီး၏ အခြားတစ်နေရာတွင် ပြန်လည် ပေါ်လာသည်။

သူ ထွက်သွားပြီး မကြာမီ အနီရောင် လှံရှည် တစ်ချောင်း စင်္ကြံလမ်းမ တစ်ဖက်မှ ပျံသန်းလာသည်။ သို့သော် ပစ်မှတ်လွဲသွားသဖြင့် ခေတ္တမျှ ရပ်တန့်သွားပြီးနောက် လမ်းကြောင်းပြောင်းကာ အခြားဘက်သို့ ဆက်လက် ပျံသန်းသွားသည်။

အေးစက်သော တစ္ဆေမီးများ ရဲတိုက် အတွင်းပိုင်းသို့ ဆက်လက် လောင်ကျွမ်းနေပြီး ရေအိုင်များလည်း ပျံ့နှံ့နေကာ နေရာတိုင်းတွင် သဘာဝလွန် စွမ်းအားများ လွှမ်းခြုံထားသည်။

ခြံဝင်းပိုင်ရှင် ဆက်လက် ပုန်းအောင်းနေ၍ မရတော့ပေ။ ထို့ကြောင့် သူ ထွက်လာလိုက်သည်။

"လိုက်ရှာမနေနဲ့တော့ ငါ ဒီမှာ ရှိတယ်"

တစ္ဆေမီးများ ရပ်တန့်သွားပြီး ခြံဝင်းပိုင်ရှင်၏ ပုံရိပ် ထွက်ပေါ်လာကာ ယန်ကျန့်၏ ရှေ့တွင် ပိတ်ရပ်လိုက်သည်။

လိုက်လာသော ယန်ကျန့် ခြေလှမ်း ရပ်လိုက်သည်။ မတုံ့ဆိုင်းဘဲ တစ္ဆေမျက်လုံး ဖွင့်ကာ ၆ ထပ် တစ္ဆေနယ်မြေ ဖြင့် လွှမ်းခြုံပြီး ချက်ချင်း ရပ်တန့်ကာ ပိတ်လှောင်ရန် ကြိုးစားလိုက်သည်။

ဒီလိုလူမျိုးကို လက်တွန့်နေလို့ မဖြစ်ပေ။

"မင်းရဲ့ တစ္ဆေနယ်မြေ က ငါ့အတွက် အသုံးမဝင်ဘူး"

ခြံဝင်းပိုင်ရှင်၏ အက်ရှရှ အသံတွင် ယုံကြည်မှုနှင့် မောက်မာမှုများ ပါဝင်နေသည်။

အနီရောင် တစ္ဆေနယ်မြေ ပျံ့နှံ့သွားသော်လည်း တစ္ဆေမီး ကဲ့သို့ပင် တားဆီးခံလိုက်ရသည်။ အနီရောင် အလင်းတန်းများ အောက်တွင် လူရိပ်များ တစ်ခုနှင့်တစ်ခု ထပ်နေပြီး ထူထဲသော တံတိုင်းကြီး တစ်ခု ဖြစ်ပေါ်လာကာ မည်သူမျှ ကျော်ဖြတ်၍ မရနိုင်ပေ။ သဘာဝလွန် စွမ်းအားများကိုပင် တားဆီးထားနိုင်သည်။

ယန်ကျန့် တိုက်ခိုက်လိုက်သည်နှင့် တပြိုင်နက် ခြံဝင်းပိုင်ရှင်၏ နောက်ကျောဘက်မှ အနီရောင် လှံရှည် တစ်ချောင်း ပျံသန်းလာသည်။ ဆုတောင်းခြင်း အာနိသင်ကြောင့် လှံရှည်သည် သူ့နောက်ကျောကို တန်းတန်းမတ်မတ် ထိုးစိုက်ရန် ဝင်ရောက်လာသည်။

သို့သော် အလားတူပင်...

လှံရှည်သည် ခြံဝင်းပိုင်ရှင်နှင့် မထိတွေ့မီ လေထဲတွင် ရပ်တန့်သွားပြီး ရှေ့ဆက်မတိုးနိုင်တော့ပေ။ ပြုတ်လည်း မကျဘဲ တစ်နေရာတွင် ညပ်နေသကဲ့သို့ ဖြစ်နေသည်။

သို့သော် လှံရှည်သည် တုန်ခါနေပြီး သဘာဝလွန် အားပြိုင်မှု ဖြစ်ပွားနေဆဲ ဖြစ်သည်။ ရံဖန်ရံခါ ချုပ်နှောင်မှုကို ရုန်းထွက်ပြီး လက်မအနည်းငယ် တိုးဝင်လာသော်လည်း နှေးကွေးလွန်းနေသည်။

အနည်းဆုံးတော့ တိုက်ပွဲမပြီးမီ ယန်ကျန့်၏ လှံရှည်သည် ဒီလူကို ထိမှန်နိုင်မည် မဟုတ်ပေ။

"မင်းမှာ ဒီလောက်ပဲ စွမ်းရည် ရှိတယ် ဆိုရင်တော့ စိတ်မကောင်းပါဘူး ခဏနေရင် မင်း သေချာပေါက် သေလိမ့်မယ်"

ခြံဝင်းပိုင်ရှင်၏ နှုတ်ခမ်းထောင့်တွင် အေးစက်သော အပြုံးတစ်ခု ပေါ်လာသည်။ ရက်စက်ကြမ်းကြုတ်မှုများ ပါဝင်နေသည်။

"၆ ထပ် တစ္ဆေနယ်မြေ နဲ့ ဆုတောင်းထားတဲ့ လှံရှည်ကိုတောင် လွယ်လွယ်ကူကူ တားဆီးနိုင်တယ် ဟုတ်လား"

ယန်ကျန့် မျက်လုံးကျဉ်းမြောင်းသွားသည်။

"ဘုရင်အဖွဲ့အစည်း ရဲ့ 'ဘုရင်' တွေကို လျှော့မတွက်ခဲ့ပေမယ့် ငါ့စွမ်းရည် တော်တော်များများ ထုတ်သုံးလိုက်တာတောင် အရာမထင်ဘူး ဖြစ်နေတယ် ငါ မှားသွားတာပဲ အချိန်တိုအတွင်း 'ဘုရင်' တစ်ပါးကို သတ်ဖို့ ဆိုတာ မလွယ်ကူဘူးပဲ"

"ဒါပေမဲ့ တိုက်ပွဲက အခုမှ စတာပါ"

စကားဆုံးသည်နှင့် ပတ်ဝန်းကျင်ရှိ ရေအိုင်များသည် အရပ်လေးမျက်နှာမှ စီးဆင်းလာပြီး ချက်ချင်း စုဝေးကာ အရာအားလုံးကို လွှမ်းမိုးသွားသည်။

သို့သော် ခြံဝင်းပိုင်ရှင်သည် ရေပေါ်တွင် မတ်တတ်ရပ်နေပြီး နစ်မြုပ်မသွားသည်ကို ယန်ကျန့် တွေ့လိုက်ရသည်။ သူ့သဘာဝလွန် စွမ်းအားက ကြီးမားလွန်းလို့ တစ္ဆေရေကန် ကတောင် သူ့ကို မနှစ်မြှုပ်နိုင်တာလား။ ဒါမှမဟုတ် စောစောက ဥယျာဉ်မှူး ၂၀ ကျော်ကို နှစ်မြှုပ်လိုက်လို့ ၄၀ ရာခိုင်နှုန်းသာ ပိုင်ဆိုင်ထားတဲ့ တစ္ဆေရေကန် က ပြည့်သွားတာလား။

သို့သော် တစ္ဆေရေကန် က သူ့ကို မနှစ်မြှုပ်နိုင်သော်လည်း ကြောက်မက်ဖွယ် မြင်ကွင်းတစ်ခုကို ထင်ဟပ်ပြနေသည်။

ရေပြင်ပေါ်တွင် တစ္ဆေများ ပြည့်နှက်နေသည်။ ဒီတစ္ဆေများကို မျက်စိဖြင့် မမြင်ရသော်လည်း တစ္ဆေရေကန် ၏ ရောင်ပြန်ဟပ်မှုကြောင့် အရိပ်များကို မြင်တွေ့နေရခြင်း ဖြစ်သည်။

ဒီကြောက်မက်ဖွယ် တစ္ဆေအရိပ်များသည် ခြံဝင်းပိုင်ရှင် ဘေးတွင် ဝိုင်းရံနေပြီး မည်သည့်အရာကိုမျှ အနားကပ်ခွင့် မပေးပေ။

အနီရောင် လှံရှည် လေထဲတွင် ရပ်တန့်နေရခြင်းမှာလည်း တစ္ဆေအကောင်ရေ ၁၀ ကျော်၏ ခန္ဓာကိုယ်ကို ဖောက်ထွင်းထားပြီး ဖြစ်သော်လည်း အခြား တစ္ဆေအများအပြားက လှံတံကို ဖမ်းဆွဲထားသောကြောင့် ဖြစ်သည်။ လှံရှည်ပေါ်ရှိ ဟန်ချက်ပျက်စေသော ကျိန်စာကြောင့်သာ ရံဖန်ရံခါ လက်မအနည်းငယ် တိုးဝင်နိုင်ခြင်း ဖြစ်သည်။

အလားတူပင် တစ္ဆေမီး နှင့် တစ္ဆေမျက်လုံး ၏ တစ္ဆေနယ်မြေ သည်လည်း ဒီကြောက်မက်ဖွယ် တစ္ဆေအရိပ်များကြောင့် တားဆီးခံလိုက်ရခြင်း ဖြစ်သည်။

တစ္ဆေများကို မမြင်ရသော်လည်း ခြံဝင်းပိုင်ရှင် ဘေးတွင် ရှိနေသော သဘာဝလွန် စွမ်းအားများမှာ အစစ်အမှန် ဖြစ်သည်။

"တစ္ဆေဆရာ တစ်ယောက်တည်းက ဒီလောက်များတဲ့ တစ္ဆေတွေကို ထိန်းချုပ်ထားနိုင်တာလား"

ယန်ကျန့် မျက်လုံး ပြူးကျယ်သွားသည်။

သို့သော် ခြံဝင်းပိုင်ရှင်က ယန်ကျန့်ကို စဉ်းစားချိန် ပေးမနေပေ။ သူ ယန်ကျန့်ဆီသို့ လျှောက်လာသည်။ ပတ်ဝန်းကျင်တွင် ခြေသံများ ဆူညံစွာ ထွက်ပေါ်လာပြီး ရဲတိုက်ကြီး တစ်ခုလုံး တုန်ခါနေသည်။ မရေမတွက်နိုင်သော ဝိညာဉ်များ၊ တစ္ဆေများ အားလုံး ထွက်ပေါ်လာပြီး နေရာတိုင်းကို ပိတ်ဆို့ထားသကဲ့သို့ ဖြစ်နေသည်။

ယန်ကျန့် ရှေ့သို့ ခြေတစ်လှမ်း တိုးရန် ကြိုးစားသော်လည်း ခန္ဓာကိုယ် ညပ်နေသလို ဖြစ်သွားသည်။ မမြင်ရသော နံရံတစ်ခုက လမ်းပိတ်ထားသည်။

အခြားဘက်သို့ သွားရန် ကြိုးစားသော်လည်း အတူတူပင် ဖြစ်သည်။

တစ္ဆေနယ်မြေ ကို အသုံးပြုရန် ကြိုးစားသော်လည်း တစ္ဆေမျက်လုံး ၏ အမြင်အာရုံ ဝေဝါးနေပြီး ကြောက်မက်ဖွယ် ပုံရိပ်များ စုဝေးနေသည်ကိုသာ ဝိုးတဝါး မြင်ရသည်။ သိပ်သည်းလွန်းသော သဘာဝလွန် စွမ်းအားများက အမြင်အာရုံကို ပိတ်ဆို့ထားသည်။

အရပ်လေးမျက်နှာလုံး နံရံများ ဖြစ်နေသည်။ ခေါင်းပေါ်နှင့် ခြေအောက်တွင်လည်း ထို့အတူပင်….

ယန်ကျန့်သည် ထောင်ချောက်တစ်ခုထဲ ရောက်သွားသကဲ့သို့ ဖြစ်နေပြီး ထိုထောင်ချောက်သည် လျင်မြန်စွာ ကျုံ့ဝင်လာကာ သူ့ကို ချည်နှောင်ထားသကဲ့သို့ လှုပ်ရှား၍ မရအောင် ဖြစ်စေသည်။

"မင်းခေါင်းကို ရိုက်ခွဲပစ်လိုက်မယ်"

ခြံဝင်းပိုင်ရှင်၏ လက်ထဲတွင် အမည်းရောင် တောင်ဝှေးတစ်ချောင်း ရောက်ရှိနေသည်။ တောင်ဝှေးပေါ်တွင် ကြောက်မက်ဖွယ် လူမျက်နှာပုံများ ထွင်းထုထားသည်။ တောင်ဝှေးက အလွန် လေးလံပုံရပြီး မြေကြီးကို ထောက်လိုက်ရုံဖြင့် ကြမ်းပြင် ကွဲအက်သွားသည်။

သိသာထင်ရှားသည်မှာ ဒါသည် ကြောက်မက်ဖွယ် သဘာဝလွန် လက်နက်တစ်ခု ဖြစ်သည်။

ခြံဝင်းပိုင်ရှင် ယန်ကျန့်အနား မကပ်ပေ။ ယန်ကျန့်တွင် ဝှက်ဖဲ ကျန်နေသေးသည်ဟု ယူဆပုံရသည်။ သို့မဟုတ် ထောင်ချောက် ဖြစ်နေမည်ကို စိုးရိမ်ပုံ ရသည်။

ခေါင်းဆောင်တစ်ယောက်ကို လွယ်လွယ်ကူကူ ဖမ်းဆီးလို့ မရဘူးလေ။

ထို့ကြောင့် သူ အမည်းရောင် တောင်ဝှေးကို လှမ်းပစ်လိုက်သည်။

"စမ်းကြည့်လိုက် မင်း ရှောင်နိုင်မလားလို့"

ခြံဝင်းပိုင်ရှင်၏ အက်ရှရှ အသံ ထွက်ပေါ်လာသည်။

အမည်းရောင် တောင်ဝှေး ပျံသန်းလာသည်။ လမ်းကြောင်းကို ခန့်မှန်းရန် လွယ်ကူသည်။ ယန်ကျန့် လှုပ်ရှားနိုင်လျှင် လွယ်လွယ်ကူကူ ရှောင်တိမ်းနိုင်သည်။

သို့သော် တကယ်တမ်း တောင်ဝှေး ရောက်လာသောအခါ ယန်ကျန့် အတင်းအကျပ် ကိုယ်ကို စောင်းလိုက်သော်လည်း လုံးဝ လွတ်အောင် မရှောင်နိုင်ခဲ့ပေ။

သူ့ပခုံး ရိုက်မိသွားသည်။

အနည်းငယ် ထိမိရုံဖြင့် ပခုံးသား တစ်စ ပြုတ်ထွက်သွားပြီး အမှုန့် ဖြစ်သွားသည်။ ထိုဖြစ်စဉ်က ရပ်တန့်မသွားဘဲ ဒဏ်ရာမှတစ်ဆင့် ခန္ဓာကိုယ် တစ်ခုလုံးသို့ ပျံ့နှံ့သွားသည်။ ခန္ဓာကိုယ်သည် မယုံနိုင်လောက်အောင် လျင်မြန်သော နှုန်းဖြင့် ဆွေးမြေ့ပျက်စီးသွားပြီး ၁၀ စက္ကန့်အတွင်း အမှုန့် ဖြစ်သွားကာ ဘာမှ မကျန်ရစ်တော့မည့် အခြေအနေ ဖြစ်နေသည်။

"ဟန်ဆောင်နေတာ မဟုတ်ဘူးပဲ ဒီလိုဆိုရင်တော့ ပျောက်ကွယ်သွားလိုက်ပေတော့"

ခြံဝင်းပိုင်ရှင် မူလနေရာတွင် ရပ်နေပြီး အနားမကပ်ဘဲ ယန်ကျန့် သေဆုံးသွားမည့် အချိန်ကို စောင့်ကြည့်နေလိုက်သည်။