အခန်း (၂၀၃)

ယွင်ရှန်းသည် နံရံနှင့်ပြင်းထန်စွာ ဆောင့်မိ၍ ဒဏ်ရာအပြင်းအထန် ရတော့မည့်ဆဲဆဲတွင် နက်မှောင်သော ဝတ်ရုံစတစ်ခုသည် သစ်ရွက်တစ်ရွက် ဝဲလွင့်လာသကဲ့သို့ ရောက်ရှိလာသည်။ သူမ၏ ခန္ဓာကိုယ်ကို ထိုဝတ်ရုံက ညင်သာစွာ ဆွဲယူထိန်းမလိုက်ပြီးနောက် တစ်စုံတစ်ဦး၏ ရင်ခွင်အတွင်းသို့ အပြည့်အဝ ရောက်ရှိသွားတော့သည်။

ယီပိုင်မင်းသည် သူ၏လက်စကို တစ်ချက်ခါလိုက်ရာ ကျန့်လီ၏ တိုက်ခိုက်မှုမှ ပါလာသော သိုင်းစိတ်ဓာတ်အကြွင်းအကျန်များသည် သူ၏လက်စအတွင်းသို့ စုပ်ယူခြင်း ခံလိုက်ရသည်။

သူမ၏ ကိုယ်အောက်တွင် သန်မာသော လက်မောင်းတစ်ဖက်၏ အားကိုးရာကို ရရှိလိုက်သဖြင့် ယွင်ရှန်း၏ နှလုံးခုန်သံမှာ တစ်ချက်မျှ တုန့်ခနဲ ဖြစ်သွားသည်။ သူမသည် မသိစိတ်ဖြင့် မော့ကြည့်လိုက်သော်လည်း အရပ်အမောင်း မမီသဖြင့် လှပစွာ ကွေးညွှတ်နေသော မေးစေ့တစ်ဝိုက်ကိုသာ မြင်လိုက်ရသည်။

ယခုနှစ်တွင် အသက် ၁၃ နှစ်ပြည့်ပြီဖြစ်သော ယီပိုင်မင်း၏ မေးစေ့ပေါ်တွင် မုတ်ဆိတ်ရည်စများ စတင်ထွက်ပေါ်နေပြီး သူ၏ လည်စိမှာလည်း ပိုမိုထင်ရှားနေပြီဖြစ်သည်။ ပါးလွှာသော နွေဦးဝတ်စုံကို ဖြတ်၍ ယီပိုင်မင်း၏ မှန်မှန်နှင့် အားရှိလှသော နှလုံးခုန်သံကို ယွင်ရှန်း ခံစားနေရရာ သူမ၏ ဦးနှောက်တစ်ခုလုံး ဝေဝေဝါးဝါး ဖြစ်သွားရသည်။

ယီပိုင်မင်းသည်လည်း သူ၏ရင်ခွင်အတွင်းရှိ ယွင်ရှန်းကို ငုံ့ကြည့်လိုက်၏။ သူ ပထမဆုံး မြင်လိုက်ရသည်မှာ အံ့အားသင့်မှုများ ပြည့်နှက်နေသည့် နက်မှောင်သော မျက်ဝန်းတစ်စုံပင် ဖြစ်သည်။ တော်ဝင်မှော်အကယ်ဒမီမှ ဤမှော်ဆရာမလေးတွင် အလွန်လှပသော မျက်ဝန်းတစ်စုံ ရှိနေကြောင်း ယီပိုင်မင်း ထိုအခိုက်အတန့်တွင် သတိပြုမိသွားသည်။

မျက်စိပြန်မြင်လာသည့် အချိန်မှစ၍ ယီပိုင်မင်းသည် အမျိုးသမီးများစွာကို မြင်တွေ့ခဲ့ရသည်။ မဟာကျိုးနန်းတွင်းမှ ကိုယ်လုပ်တော်များ၊ သိုင်းကျောင်းမှ အမျိုးသမီးသိုင်းသမားများ အပါအဝင် ချန်လျန်လျန်ကဲ့သို့ ထူးခြားသော အလှပဂေးများကို မြင်ဖူးခဲ့သော်လည်း ယခု သူဖက်ထားသော အမျိုးသမီး၏ မျက်ဝန်းများလောက် ကြည်လင်နက်ရှိုင်းသူ တစ်ဦးမျှ မရှိခဲ့ပေ။

ယီပိုင်မင်း၏ အမြင်တွင်မူ ယခုအချိန်၌ ယွင်ရှန်း၏ မျက်ဝန်းများသည် ထိတ်လန့်သွားသော သမင်ငယ်တစ်ကောင်ကဲ့သို့ ကြောက်ရွံ့မှု အရိပ်အယောင်များ ယှက်သန်းနေသည်ဟု ထင်မှတ်နေသည်။

ယီပိုင်မင်း၏ ဤကဲ့သို့ ကြားဖြတ်ဝင်ရောက်မှုမှာ သူ၏ သူငယ်ချင်းကောင်းနှစ်ဦးနှင့် သူ၏ ဆရာဖြစ်သူ ဒုတိယခန်းမမှူး ကျန့်လီတို့ကိုပါ အံ့အားသင့်သွားစေသည်။

ဒါက ဘယ်လိုမြင်ကွင်းလဲ။

ယီပိုင်မင်းတစ်ယောက် သူ့ပင်ကိုယ်စရိုက်တွေ ရုတ်တရက် ပြောင်းလဲသွားတာလား။

ချန်ပိုင်ကမူ ပို၍ပင် မကျေမနပ် ဖြစ်သွားကာ "ဟေး... ပိုင်မင်း မင်းရဲ့ လက်တွေက နည်းနည်းတော့ ရှည်လွန်းမနေဘူးလား။ ဒီလိုမျိုး သူရဲကောင်းဆန်ဆန် ကယ်တင်ရမယ့် အခန်းက ငါ့လို ချောမောခန့်ညားတဲ့လူနဲ့မှ လိုက်ဖက်တာ မဟုတ်လား" ဟု စနောက်လိုက်သည်။

ယီပိုင်မင်းကို ကောင်းစွာသိကျွမ်းသူများပင် ယခုမြင်ကွင်းကို အံ့အားသင့်နေကြသလို ယီပိုင်မင်းကိုယ်တိုင်လည်း သူ၏စိတ်လိုက်မာန်ပါ လုပ်ရပ်ကို နားမလည်နိုင်အောင် ဖြစ်နေရသည်။

သူမသည် သူနှင့် လုံးဝမသိကျွမ်းသည့် သူစိမ်းတစ်ဦးသာ မဟုတ်ပါလား။ သူသည် မည်သည့်အခါကမျှ မိန်းမသားများအပေါ် ကြင်နာသနားတတ်သူ မဟုတ်ခဲ့ပေ။

"ဟဲမ်း... ငါပြောမယ် ပိုင်မင်း။ မင်းသာ သူမကို အဲဒီလို ဆက်ဖက်ထားမယ်ဆိုရင်တော့ ရှန်းကွမ်ထော်တစ်ယောက် အသက်ထွက်သွားတော့မှာပဲ"

ပုကျိုရှောင်ပင် ဆက်ကြည့်ရန် ခက်ခဲလာသဖြင့် စနောက်လိုက်ရာ ယီပိုင်မင်းမှာ သတိပြန်ဝင်လာသလို ဘေးမှလူများလည်း အသိပြန်ဝင်လာကြသည်။ ယီပိုင်မင်းသည် ယွင်ရှန်းကို လွှတ်ပေးလိုက်ပြီး ဘေးသို့ တည်ငြိမ်စွာ ဖယ်ရပ်လိုက်သော်လည်း သူ၏ နားရွက်ဖျားလေးများမှာမူ အနည်းငယ် နီမြန်းနေခဲ့သည်။

ဒုတိယခန်းမမှူး ကျန့်လီကလည်း သူတို့နှစ်ဦးကို ပြုံးစစဖြင့် ကြည့်နေသည်။

ဟဲဟဲ... ပိုင်မင်းတစ်ယောက်တော့ လမ်းမှန်ပေါ် ရောက်လာပြီထင်တယ်။

ကျန့်လီသည် သူ၏တပည့်မှာ မိန်းကလေးများအပေါ် စိတ်ဝင်စားမှုမရှိဟု အမြဲညည်းညူခဲ့ဖူးရာ ယနေ့ မြင်တွေ့လိုက်ရသော မြင်ကွင်းကြောင့် စိတ်ကျေနပ်သွားပုံရသည်။ လောကအတွေ့အကြုံများသူပီပီ ကျန့်လီသည် လေထုအတွင်းရှိ ထူးခြားသော အငွေ့အသက်ကို ခံစားမိနေသည်။

"တကယ်ကို ခေါင်းမာတဲ့ ကလေးမလေးပဲ။ ကောင်းပြီလေ... မင်းရဲ့ မှော်စွမ်းအင် ပိတ်ပင်မှုကို ငါ ဖြေလျှော့ပေးမယ်။ မင်းရဲ့ သူငယ်ချင်း နှစ်ယောက်ကိုလည်း ဖွင့်ပေးမယ်။ ဒါပေမဲ့ မင်း ရှန်းကွမ်ထော်ကို သေချာပေါက် ကုသပေးရမယ်"

ကျန့်လီက ပြောသည်။ ယွင်ရှန်း၏ မတုန်မလှုပ် ခိုင်မာသော စိတ်ဓာတ်က သူ့ကို အံ့အားသင့်စေခဲ့သည်။

"ဒုတိယခန်းမမှူးကို စိတ်ပျက်အောင် မလုပ်စေရပါဘူး"

ယွင်ရှန်းသည် သူမ၏ ရည်မှန်းချက် အောင်မြင်သွားသဖြင့် သက်ပြင်းချလိုက်မိသည်။

ကျန့်လီသည် သူ၏စကားအတိုင်းပင် သူ၏သိုင်းစိတ်ဓာတ်ကို အသုံးပြု၍ ယွင်ရှန်း၏ ကိုယ်ပေါ်ရှိ မှော်စွမ်းအင် ပိတ်ပင်ခြင်းကို ချက်ချင်း ဖြေလျှော့ပေးလိုက်သည်။ မှော်စွမ်းအားများ ပြန်လည်ရရှိလာသည်နှင့် ယွင်ရှန်းသည် ကုသမှုလုပ်ငန်းစဉ်ကို ချက်ချင်း စတင်တော့သည်။

"ဒီသားရဲသွေး နမူနာတွေကို စမ်းသပ်ကြည့်ဖို့ ကျွန်မကို ကူညီပေးပါ။ သားရဲသွေး ပေါင်းစပ်တဲ့ ဖြစ်စဉ်ကို ကျွန်မ ကိုယ်တိုင် မြင်တွေ့ဖို့ လိုအပ်တယ်"

ယွင်ရှန်းက ပြောသည်။

ရှန်းကွမ်ထော်သည် သားရဲသွေးပေါင်းစပ်ခြင်းကို ၃ ကြိမ် ပြုလုပ်ခဲ့ပြီး ယခုအကြိမ်နှင့်ဆိုလျှင် ၄ ကြိမ်ရှိပြီဖြစ်သည်။ စောစောက ယီပိုင်မင်း ရှေ့သို့ တက်လာချိန်တွင် ယွင်ရှန်း မတားဆီးခဲ့ခြင်းမှာ သူသည် သန်မာထွားကျိုင်းသူဖြစ်ကြောင်း သူမ သိထားသောကြောင့်ပင် ဖြစ်သည်။

ဝူကျိတိုက်ကြီးတွင် သားရဲသွေးပေါင်းစပ်ခြင်းဆိုသည်မှာ သားရဲသွေးများ ရောစပ်ထားသည့် ရေပူကန်အတွင်း စိမ်ရခြင်းကို ဆိုလိုခြင်းဖြစ်သည်။ ဤလုပ်ငန်းစဉ်ကို လုပ်ဆောင်သူများသည် သားရဲသွေးများ သူတို့၏ အရိုးနှင့် ကြွက်သားများအတွင်းသို့ အပြည့်အဝ စိမ့်ဝင်သွားသည်အထိ ရေပူထဲတွင် စိမ်နေရမည်ဖြစ်သည်။ သို့မှသာ သားရဲသွေးနှင့် ခန္ဓာကိုယ်သည် စနစ်တကျ ပေါင်းစပ်နိုင်မည်ဖြစ်ရာ ရေချိုးကန်အတွင်းဝင်မည့်သူသည် အဝတ်အစားအားလုံးကို ချွတ်ထားရန် လိုအပ်ပေသည်။

"ကျန်တဲ့လူတွေ အပြင်ထွက်ကြရအောင်။ အကြီးအကဲကျန်းနဲ့ သူမကိုပဲ ဒီမှာ ထားခဲ့လိုက်ပါ"

ကျန့်လီက ပြောသည်။ သူသည် သူ၏တပည့်ဖြစ်သူ ရေချိုးနေသည်ကို ထိုင်ကြည့်နေရန် ဆန္ဒမရှိပေ။ ချန်ပိုင်မှာမူ မထွက်ချင်သော်လည်း ပုကျိုရှောင်က အတင်းဆွဲခေါ်သွားသဖြင့် ပါသွားရတော့သည်။

ယွင်ရှန်းမှာမူ စိတ်ထဲမှ ငိုချင်းချနေမိသည်။ စပ်စုတဲ့ကြောင်လေး အသက်တိုတယ်ဆိုသည့် စကားအတိုင်း သူမကိုယ်တိုင် စပ်စုမိသည်ကို နောင်တရနေမိ၏။ အကယ်၍ သားရဲသွေးမှာ ပြဿနာရှိကြောင်း သူမ ထုတ်မပြောခဲ့ပါက ယခုကဲ့သို့ အခြေအနေမျိုး ကြုံတွေ့ရလိမ့်မည် မဟုတ်ပေ။

ယီပိုင်မင်းသည် သူ၏ အပြင်ဝတ်ရုံကို ချွတ်လိုက်ရာ ပိုးသားကဲ့သို့ နူးညံ့ဖြူစင်သော အတွင်းဝတ်စုံ ပေါ်လာသည်။ သူသည် အေးအေးဆေးဆေးပင် ဆက်လက်ချွတ်နေသော်လည်း ယွင်ရှန်းမှာမူ အနေရခက်နေရှာသည်။

ထားလိုက်ပါတော့... ဒါက ရှုံးတာမှ မဟုတ်တာ။ ချောတဲ့လူတစ်ယောက် ရေချိုးတာကို အလကားကြည့်ရတာပဲ။ လူတိုင်း ဒီလိုအခွင့်အရေး ရတာမှ မဟုတ်တာ။

ယွင်ရှန်းက မိမိကိုယ်ကို အကြိမ်ကြိမ် နှစ်သိမ့်နေမိသည်။ သူမသည် စိတ်ကိုတင်းကာ ဆက်ကြည့်ရန် ဆုံးဖြတ်လိုက်သည်။

ယွင်ရှန်းသည် ယီပိုင်မင်းကို ကြည့်လေလေ စိတ်ထဲမှ ချီးကျူးမိလေလေ ဖြစ်နေသည်။ ယီပိုင်မင်းတွင် ဤမျှ ကြည့်ကောင်းသော ကိုယ်လုံးကိုယ်ပေါက်ရှိလိမ့်မည်ဟု သူမ ထင်မထားခဲ့ပေ။

ထူးထူးဆန်းဆန်းတွေ မတွေးနဲ့။ ခန္ဓာဗေဒ စစ်ဆေးဖို့ စားပွဲပေါ်တင်ထားတဲ့ ရုပ်အလောင်းတစ်ခုလို့ပဲ သဘောထားလိုက်စမ်း။

ရုပ်အလောင်းဆိုသော်ငြားလည်း ဤရုပ်အလောင်းမှာ အလွန်ပင် အလှအပဆိုင်ရာ အနုပညာမြောက်လှသည်။ ခြေတံရှည်ရှည်နှင့် ကြွက်သားများမှာလည်း တကယ့်ကို အားကျစရာပင်။ ယွင်ရှန်းသည် သူမ၏ ဆေးပညာဆိုင်ရာ ကျွမ်းကျင်မှုအမြင်ဖြင့်သာ အာရုံစိုက်ရန် ကြိုးစားနေသည်။

သူမ၏ အရှက်အကြောက်မရှိ စူးစိုက်ကြည့်နေသည့် အကြည့်ကို သတိပြုမိသွားပုံရသော ယီပိုင်မင်း၏ မျက်ခုံးများ အနည်းငယ် ပင့်တက်သွားပြီး နှုတ်ခမ်းတွင် နောက်ပြောင်လိုသော အပြုံးတစ်ခု ပေါ်လာသည်။ သူသည် သူ၏ လှုပ်ရှားမှုများကို ရုတ်တရက် မြန်ဆန်လိုက်ရာ ခဏချင်းမှာပင် သန်မာထွားကျိုင်းသော အမျိုးသားတစ်ဦး၏ ခန္ဓာကိုယ်မှာ ယွင်ရှန်း၏ရှေ့တွင် ဗလာကျင်းသွားတော့သည်။

ယွင်ရှန်းမှာ အသက်ရှူပင် မှားသွားရပြီး သူမ၏ မျက်နှာလေးမှာ ရေနွေးငွေ့ကြောင့်လား သို့မဟုတ် ယီပိုင်မင်း၏ မြန်ဆန်လှသော လုပ်ရပ်ကြောင့်လားမသိဘဲ နီမြန်းသွားရသည်။

"တော်ပြီ ဆက်မချွတ်နဲ့တော့"

ယွင်ရှန်းမှာ တည်ငြိမ်မှုကို လက်လွှတ်လိုက်ရသည်။

"ပေါင်းစပ်မှုကို အခုပဲ စလိုက်တော့။ ခံစားရသမျှ အကုန်လုံးကို ကျွန်မကို ပြောပြပါ။ သားရဲသွေး လေးမျိုးစလုံးကို ကျွန်မ တစ်လှည့်စီ ထည့်ပေးသွားမယ်"

သူမက စိတ်တိုတိုဖြင့် ပြောလိုက်သည်။

ယီပိုင်မင်း၏ ကိုယ်ပေါ်တွင် ပါးလွှာသော အတွင်းခံဘောင်းဘီတစ်ထည်သာ ကျန်တော့ပြီး ၎င်းမှာလည်း ရေစိုသွားသည့်အခါ ဘာမှဝတ်မထားသကဲ့သို့ပင်။ သွေးတိမ်သားရဲသွေးမှာ အလွန်ပင် ညှီစော်နံလှသဖြင့် ယီပိုင်မင်း မျက်မှောင်ကြုတ်လိုက်မိသည်။

ဆေးခန်းမအပြင်ဘက်တွင်မူ လူရှုပ်လေး ချန်ပိုင်သည် အခြေအနေကို သိလိုသဖြင့် တံခါးဝတွင် ကပ်ကာ အထဲသို့ ချောင်းကြည့်ရန် ကြိုးစားနေသည်။ သို့သော် အခန်းတစ်ခုလုံးမှာ ဝေဝေဝါးဝါး ရေနွေးငွေ့များဖြင့် ပြည့်နှက်နေသဖြင့် သူ ဘာကိုမျှ ရှင်းရှင်းလင်းလင်း မမြင်ရပေ။