မြင့်မားသော အဆင့်အတန်း

အရှေ့ဘက်ကောင်းကင်ယံ၊မဟာပျက်စီးခြင်းနယ်မြေ၏အပြင်ဒေသ

မိုးကောင်းကင်ထက်ဝယ် လေနှင့်မိုးကြိုးတို့ ပြင်းထန်နေပေသည်။တိမ်ပင်လယ်ကြားတွင် ပုံရိပ်တစ်ခုမှာ ဟိုမှဒီသို့ ကူးခတ်နေ၏။

သူ၏အဖြူရောင်ဝတ်ရုံမှာ လေထဲတွင် တဖျပ်ဖျပ်လွင့်နေပြီး လူ့လောကသို့ လာရောက်လည်ပတ်သော အင်မော်တယ်တစ်ပါးကဲ့သို့ပင် လွတ်လပ်ပေါ့ပါး၍ ကျက်သရေရှိလှပေသည်။

ထိုသူမှာ ရှန်းချန်ကောပင် ဖြစ်ပေသည်။

ထို့နောက် သူသည် ကောင်းကင်ယံရှိ တစ်နေရာသို့ ရောက်ရှိလာပြီး ရပ်တန့်လိုက်လေသည်။ သူသည် အောက်ဘက်ရှိ တိမ်ပင်လယ်ကို ငုံ့ကြည့်ကာ ပတ်ဝန်းကျင်ရှိ ကောင်းကင်နှင့်မြေပြင်၏ အငွေ့အသက်ကို အာရုံခံကြည့်သော်လည်း ဘာမျှမတွေ့ရပေ။

သူက မပြုံးဘဲ မနေနိုင်တော့ဘဲ တစ်ကိုယ်တည်း ရေရွတ်လိုက်လေသည်။

"ဒါဟာ တကယ့်ကို သူတော်စင်သခင်မရဲ့ လက်ရာပဲ။ သူတော်စင်နတ်ဘုရားအဖွဲ့အစည်းကို ဟင်းလင်းပြင်နဲ့ဘာမှမရှိတဲ့ နယ်မြေကြားမှာ တည်ဆောက်ထားတာ တကယ့်ကို ထူးခြားဆန်းပြားတဲ့ နည်းလမ်းတစ်ခုပါပဲ"

ဤနေရာသည် လွန်ခဲ့သော ရက်အနည်းငယ်က လော့ယွင်ရှီး ရွှေရောင်တံခါးကို ဖန်တီးခဲ့သည့် နေရာဖြစ်ပေသည်။

ထိုတံခါးကို ဖြတ်ကျော်ဝင်ရောက်မှသာ သူတော်စင်နတ်ဘုရားအဖွဲ့အစည်း၏ဌာနချုပ်သို့ ရောက်ရှိနိုင်မည် ဖြစ်ပေသည်။

ဝူး...

လေထဲတွင် ရှန်းချန်ကော၏ဝတ်ရုံဖြူမှာ တဖျပ်ဖျပ်မြည်နေပေသည်။ သူသည် သူ၏လက်ချောင်းများကို မြှောက်ကာ ရှုပ်ထွေးနက်နဲသော လက်ကွက်များကို ဖော်ဆောင်လိုက်ရာ ဆန်းကြယ်သော စွမ်းအားတစ်ခု ထွက်ပေါ်လာပေသည်။

တဖြည်းဖြည်းနှင့် လေထုထဲတွင် တိမ်တိုက်များ လှိုင်းထန်လာပြီး ရွှေရောင်တံခါးကြီးတစ်ခု ပေါ်ထွက်လာပေတော့သည်။

ထိုရွှေရောင်အလင်းတန်းမှာ အလွန်တောက်ပလှပေရာ တိမ်ပင်လယ်တစ်ခုလုံးကို ရွှေရောင်လွှမ်းသွားစေပြီး မြင့်မြတ်ခမ်းနားလှပေသည်။

၎င်းသည် ကောင်းကင်နှင့်မြေပြင်ကြားတွင် မျဉ်းတစ်ကြောင်း ပွင့်သွားပြီး နတ်တံခါး ပွင့်လာသကဲ့သို့ပင် ဖြစ်ပေသည်။

ထို့နောက် ရှန်းချန်ကောသည် ထိုတံခါးကို ဖြတ်ကျော်ဝင်ရောက်သွားလေသည်။

ဤအချိန်တွင် သူ တစ်ခုကို ရုတ်တရက် နားလည်သွားပေသည်။

လွန်ခဲ့သောရက်အနည်းငယ်က မြင့်မြတ်မင်းဆက်၏သံတမန် ကုလင်းဖန် ရောက်လာစဉ်က သူတော်စင်နတ်ဘုရားအဖွဲ့အစည်း၏ဌာနချုပ်သို့ တိုက်ရိုက်ရောက်ရှိလာခဲ့ခြင်း ဖြစ်ပေသည်။

၎င်းမှာ သူတော်စင်သခင်မ လော့ယွင်ရှီးက ကြိုတင်စီစဉ်ထားခြင်း ဖြစ်ကြောင်း သိသာလှပေသည်။

သို့မဟုတ်ပါက ကုလင်းဖန်သည် ဖန်ဆင်းခြင်းနယ်မြေသို့ ရောက်နေသည့်တိုင် ဤတံခါးရှိမည့် နေရာကို ခန့်မှန်းရုံသာ တတ်နိုင်မည်ဖြစ်ပြီး ဤမျှလွယ်လွယ်ကူကူ ဝင်ရောက်နိုင်မည် မဟုတ်ပေ။

လော့ယွင်ရှီးသည် အခြားသူတော်စင်နတ်ဘုရားများ၏တုံ့ပြန်မှုကို ကြည့်ရှုရန်အတွက် ကုလင်းဖန်ကို တိုက်ရိုက်ဝင်ခွင့်ပေးခဲ့ခြင်း ဖြစ်မည်ဟု ရှန်းချန်ကော နားလည်လိုက်ပေသည်။

သူသည် စိတ်ထဲမှ အတွေးများကို ဘေးဖယ်လိုက်ပြီး သူတော်စင်နတ်ဘုရားအဖွဲ့အစည်း တည်ရှိရာ နယ်မြေသို့ ရောက်ရှိလာခဲ့ပေသည်။

ဤနေရာသည် လူ့လောကနှင့် မသက်ဆိုင်သကဲ့သို့ ထင်ရပေသည်။ စိမ်းလန်းသော တောင်တန်းများနှင့် ကြည်လင်သော ရေပြင်များ ရှိနေပြီး ဝိညာဉ်စွမ်းအင်များမှာလည်း သိပ်သည်း၍ ဆန်းကြယ်လှပေသည်။

မြင့်မားသော တောင်ထိပ်ထက်တွင် ခမ်းနားထည်ဝါပြီး မြင့်မြတ်သော ခန်းမဆောင်ကြီး တည်ရှိနေပေသည်။

ရှန်းချန်ကောသည် ပင်မခန်းမဆောင်အတွင်းသို့ လျှောက်လှမ်းဝင်လာခဲ့ပေသည်။

သူ ဝင်လိုက်သည်နှင့် မြင်တွေ့လိုက်ရသည်မှာ ပလ္လင်ထက်ဝယ် ထိုင်နေသော လော့ယွင်ရှီးနှင့် အခြားသူတော်စင်နတ်ဘုရားများ အားလုံး စုံညီစွာ ရှိနေခြင်းပင် ဖြစ်ပေသည်။

ထို့နောက် သူတို့အားလုံးက ရှန်းချန်ကောထံသို့ လှည့်ကြည့်လိုက်ကြပေသည်။

"သခင်မနဲ့ သူတော်စင်နတ်ဘုရားတွေကို နှုတ်ဆက်ပါတယ်"

ရှန်းချန်ကောသည် ခန်းမ၏အောက်ခြေတွင် ရပ်ကာ ဦးစွာ လော့ယွင််ရှီးထံသို့ လက်နှစ်ဖက်ယှက်၍ အရိုအသေပေးလိုက်ပြီးနောက် အခြားသူတော်စင်နတ်ဘုရားများကို လှည့်ကြည့်လိုက်ပေသည်။

ရုတ်တရက် ရှန်းချန်ကော၏မျက်နှာအမူအရာမှာ အနည်းငယ် ပြောင်းလဲသွားပေသည်။

တစ်ခုခု မှားယွင်းနေသကဲ့သို့ ခံစားလိုက်ရသဖြင့် သူ အံ့အားသင့်သွားမိပေ၏။

ခန်းမအတွင်းရှိ လူတိုင်းက သူ့ကို ထူးဆန်းသော အကြည့်များဖြင့် ကြည့်နေကြခြင်း ဖြစ်ပေသည်။

"ဒသမမြောက် သူတော်စင်နတ်ဘုရား... မြင့်မြတ်မင်းဆက်က သံတမန်အသစ် မင်းဆီကို လာတွေ့တယ်လို့ ကြားတယ်၊ ဟုတ်ပါသလား"

ဤအချိန်တွင် အထက်မှ လော့ယွင်ရှီးက စကားပြောလိုက်ရာ သူမ၏အေးစက်သော အသံမှာ ခန်းမတစ်ခုလုံး ပဲ့တင်ထပ်သွားပေသည်။

ဪ... ဤကိစ္စကိုး

ရှန်းချန်ကော နားလည်သွားပြီး ခေါင်းကို အသာအယာ ညိတ်လိုက်ပေသည်။

သူ၏မျက်နှာတွင် အပြုံးတစ်ခုနှင့်အတူ ပြောလိုက်လေသည်။

"ဟုတ်ပါတယ်... မြင့်မြတ်မင်းဆက်ရဲ့ သံတမန်အသစ် ဖုန်းလင်းတန်က ဝတ်ရုံနက်အဖွဲ့အစည်းဆီ လာတွေ့တာပါ။သူ့ရဲ့ ရည်ရွယ်ချက်က အရင်သံတမန် ကုလင်းဖန်လိုပါပဲ။ သူတော်စင်နတ်ဘုရားအဖွဲ့အစည်းကို မြင့်မြတ်မင်းဆက်ရဲ့ လက်အောက်ခံအဖြစ် သွတ်သွင်းပြီး အလုပ်အကျွေးပြုစေချင်တာပါပဲ"

ရှန်းချန်ကော၏အသံမှာ တည်ငြိမ်အေးဆေးနေပေသည်။

"သံတမန်အသစ်က သခင်မကို လာပြီး အရိုအသေမပေးဘဲ ဒသမမြောက် သူတော်စင်နတ်ဘုရားဆီ အရင်သွားတယ်ဆိုတော့... ဒသမမြောက် သူတော်စင်နတ်ဘုရားရဲ့ စွမ်းအားက ဘယ်လောက်တောင် ကြီးမားနေပြီလဲဆိုတာ ပြနေတာပဲ။ သူတော်စင်မင်းဆက်က ကျွမ်းကျင်သူတွေတောင် သူ့ကို လျစ်လျူမရှုရဲကြဘူးပဲ"

ခန်းမအတွင်းရှိ စတုတ္ထမြောက် သူတော်စင်နတ်ဘုရားက ပြုံး၍ ပြောလိုက်ရာ အလွန်ပင် ယဉ်ကျေးပျူငှာပုံရပေသည်။

လက်ရှိ ရှန်းချန်ကောကို ခန်းမအတွင်းရှိ သူတော်စင်နတ်ဘုရား အားလုံးက အလွန်အလေးထားကြပေသည်။

ထို့အပြင် အခြားရှုထောင့်မှ ကြည့်လျှင်လည်း ရှန်းချန်ကော၏ကိုယ်ပိုင်စွမ်းအားကို ဖယ်ထားလျှင်ပင် သူတော်စင်နတ်ဘုရားအဖွဲ့အစည်းအတွင်း သူ၏ အဆင့်အတန်းမှာ အလွန်မြင့်မားနေလေပြီ။

သူသည် အဖွဲ့အစည်းအတွင်း၌ အထူးခြားဆုံး ဖြစ်တည်မှု တစ်ခုပင် ဖြစ်ပေသည်။

"ကျွန်တော့်အမြင်အရတော့ သံတမန်အသစ်က သခင်မကို လာတွေ့ဖို့ မဝံ့ရဲတာ ဖြစ်ပါလိမ့်မယ်။ အရင်သံတမန် သေဆုံးသွားတာ မကြာသေးဘူးလေ"

အကြီးအကဲယွင်၏မျက်နှာတွင် အပြုံးတစ်ခု ပေါ်လာပေသည်။

သူသည် အလွန်တက်ကြွလန်းဆန်းနေပြီး ဒုတိယအကြိမ် ပြန်လည်မွေးဖွားလာသကဲ့သို့ပင် အားအင်များ ပြည့်ဝနေပုံရပေသည်။

"ခုနစ်မြောက် သူတော်စင်နတ်ဘုရား ပြောတာ မှန်တယ်"

အဋ္ဌမမြောက် သူတော်စင်နတ်ဘုရားက ရှန်းချန်ကောကို လေးစားသော အကြည့်ဖြင့် ကြည့်ကာ ပြောလိုက်လေသည်

"သံတမန်အသစ်က သခင်မကို လာတွေ့ဖို့ မရဲဘူး။ ဒါကြောင့် ဒသမမြောက် သူတော်စင်နတ်ဘုရားကနေတစ်ဆင့် သတင်းစကား ပါးလိုက်တာ မဟုတ်လား"

"အဲဒီသဘောမျိုးပဲ ရှိပါမယ်"

ရှန်းချန်ကောက ဝင်ပြောလိုက်ပြီးနောက် ပလ္လင်ထက်ရှိ လော့ယွင်ရှီးကို လှည့်ကြည့်ကာ ပြောလိုက်လေသည်။

"နောက်ထပ် တစ်ခုရှိပါသေးတယ်။ ဒီတစ်ခါလာတဲ့ သံတမန်က မြင့်မြတ်မင်းဆက်ရဲ့ထိပ်သီးမျိုးနွယ် ဆယ်စုထဲက တစ်ခုဖြစ်တဲ့ ဖုန်းမိသားစုကပါ။ အရင်တစ်ခေါက် ကုမိသားစုက ကုလင်းဖန်နဲ့ မတူဘဲ ဒီလူက တကယ့်ကို ယဉ်ကျေးပျူငှာပြီး နူးညံ့သိမ်မွေ့ပါတယ်။ သူက သူတော်စင်ဘုရင်ရဲ့ အလိုတော်ကို ပြောပြရုံတင်မကဘဲ ဖုန်းမိသားစု ကိုယ်စား ကျွန်တော့်ကိုလည်း ဖိတ်ကြားသွားပါတယ်"

ရှန်းချန်ကော စကားဆုံးသည်နှင့် ခန်းမအတွင်း၌ လူစုလူဝေး၏ဆွေးနွေးသံများမှာ လှိုင်းတံပိုးကဲ့သို့ ပဲ့တင်ထပ်သွားပေတော့သည်။

"မဖြစ်ဘူး... မသွားပါနဲ့"

အကြီးအကဲယွင်က ဦးစွာ စကားပြောလိုက်ပေသည်။

သူ၏မျက်နှာမှာ ထူးထူးခြားခြား လေးနက်နေပြီး လော်ယွန်းရှီထံ ဦးညွှတ်လိုက်လေသည်။

ထို့နောက် သူက ရှန်းချန်ကောဘက် လှည့်ကာ ပြောလိုက်လေသည်။

"ဒသမမြောက် သူတော်စင်နတ်ဘုရားကို ဧည့်သည်အဖြစ် ဖိတ်ကြားတာက သိပ်ပြီး ထူးဆန်းလွန်းတယ်။ အဲဒါ ထောင်ချောက်တစ်ခု ဖြစ်မှာကို ကျွန်တော် စိုးရိမ်မိပါတယ်"

"ဘာကြောင့် ဒီလိုပြောရသလဲ... အကြီးအကဲယွင်" ရှန်းချန်ကောက မေးလိုက်ပေသည်။

အကြီးအကဲယွင်၏မျက်နှာမှာ တည်ကြည်လေးနက်နေပေ၏။

"မြင့်မြတ်မင်းဆက်ရဲ့ဘုရင်က အဖွဲ့အစည်းကို လွှဲပြောင်းရယူချင်နေတာ။ ဒါကြောင့် အမိန့်တော် ပေးပို့ဖို့ သံတမန် လွှတ်လိုက်တာပဲ။ ဒါပေမဲ့ အရင်သံတမန် ကုလင်းဖန်က ဒသမမြောက် သူတော်စင်နတ်ဘုရား လက်ချက်နဲ့ သေဆုံးသွားခဲ့ရတယ်။ ဒါဟာ မြင့်မြတ်မင်းဆက်ကို အမျက်ထွက်စေမှာ အသေအချာပဲ"

"ကျွန်တော့်အမြင်အရတော့ သံတမန်အသစ် ဖုန်းလင်းတန်ဟာ ဒသမမြောက် သူတော်စင်နတ်ဘုရားကို ဖမ်းဆီးဖို့ မြင့်မြတ်မင်းဆက်က လွှတ်လိုက်တာပဲ ဖြစ်ပါလိမ့်မယ်။ သူက ဒသမမြောက် သူတော်စင်နတ်ဘုရားရဲ့ စွမ်းရည်တွေကို ကြားသိထားလို့ ထိပ်တိုက်ရင်ဆိုင်ဖို့ မရဲတာကြောင့် လှည့်ဖြားပြီး မြင့်မြတ်မင်းဆက်ဆီ ခေါ်သွားဖို့ ကြိုးစားတာ ဖြစ်နိုင်တယ်"

အကြီးအကဲယွင်၏အသံမှာ လေးလံနေပြီး အမူအရာမှာလည်း အလွန် လေးနက်နေပေသည်။

သူသည် မဟာပျက်စီးခြင်းနယ်မြေတွင် နှစ်ပေါင်း ရာချီ နေထိုင်ခဲ့သူ ဖြစ်သဖြင့် ကောက်ကျစ်စဉ်းလဲမှု ပေါင်းစုံကို မြင်တွေ့ခဲ့ရဖူးသဖြင့် သူ၏စဉ်းစားဆင်ခြင်မှုမှာ အလွန် အသေးစိတ်လှပေသည်။

ရှန်းချန်ကော လှည့်ဖြားခံရပြီး မြင့်မြတ်မင်းဆက်တွင် အသက်ဆုံးရှုံးသွားမည်ကို သူ စိုးရိမ်နေခြင်း ဖြစ်ပေသည်။

အကယ်၍ထိုသို့ဖြစ်လာလျှင် သူတို့အနေဖြင့် အရှေ့ကောင်းကင်ယံမှနေ၍ မိုင်ထောင်ချီဝေးကွာသော မြင့်မြတ်မင်းဆက်အထိ သွားရောက်ပြီး လူသွားလုရန် ဝံ့ရဲပါမည်လော။

သူ၏အမြင်အရ ရှန်းချန်ကောသာ ထိုဖိတ်ကြားချက်ကို လက်ခံလိုက်ပါက ကျားတွင်းထဲသို့ ကိုယ်တိုင်ဝင်သွားသော သိုးတစ်ကောင်ကဲ့သို့ ဖြစ်ပေလိမ့်မည်။

"ခုနစ်မြောက် သူတော်စင်နတ်ဘုရား ပြောတာ မှန်ပါတယ်"

အဋ္ဌမမြောက် သူတော်စင်နတ်ဘုရားကလည်း ထောက်ခံလိုက်ပေသည်။

နဝမမြောက် သူတော်စင်နတ်ဘုရားကလည်း ခေါင်းညိတ်ပြပေသည်။ သူတော်စင်နတ်ဘုရား ဆယ်ပါးအနက် ရှန်းချန်ကောအပေါ် သံယောဇဉ် အရှိဆုံးမှာ ခုနစ်၊ ရှစ် နှင့် ကိုး မြောက် သူတော်စင်နတ်ဘုရားများ ဖြစ်ကြပေသည်။

သူတို့သည် ရှေးဟောင်းနတ်ဘုရားတွင်းနက်တွင် အတူတူ တိုက်ပွဲဝင်ခဲ့ကြပြီး ဓားနတ်ဘုရားဧကရာဇ်ကို နှိမ်နင်းကာ ရှေးဟောင်းနတ်ဘုရားမျိုးနွယ်စုမှ ကျွမ်းကျင်သူများကို သတ်ဖြတ်ခဲ့ကြသူများ မဟုတ်ပါလား။

သူတို့ သုံးဦးမှာ ရှန်းချန်ကောနှင့် အရင်းနှီးဆုံး ဖြစ်သဖြင့် သူ၏ဘေးကင်းလုံခြုံမှုကို အလေးအထားဆုံး ဖြစ်ကြပေသည်။

ရှန်းချန်ကော တစ်စုံတစ်ရာ ဖြစ်သွားမည်ကို သူတို့ အလိုမရှိကြပေ။

"ဒီကိစ္စက တကယ်ပဲ ထူးဆန်းတယ်။ ငါတို့ သတိထားရမယ်"

တတိယမြောက် သူတော်စင်နတ်ဘုရား မုရုံရမ်ယန် ကလည်း ဝင်ပြောလိုက်လေသည်။

သူမ၏မျက်ခုံးများကြားတွင် ရဲရင့်သော အငွေ့အသက်များ ရှိနေပြီး အမျိုးသားများထက်ပင် မနိမ့်ကျသော သူရဲကောင်းပီသသည့်အမျိုးသမီးတစ်ဦး ဖြစ်ပေသတည်း။