နတ်ဆိုးဖမ်းရန် မြို့ထဲမှထွက်ခွာခြင်း

"ယွမ်ကျစ်ဆီမှာတုန်းက ဖြစ်ခဲ့တာနဲ့ တစ်ပုံစံတည်းပါပဲ..."

သားသတ်သမားကျန်းက လက်ပြန်ရုတ်လိုက်ပြီး အားမရှိသလို ခံစားလိုက်ရကာ အသံက အက်ရှရှဖြစ်နေလေသည်။

ဘုန်းကြီးပန်ရှင်းသည် ယွမ်ကန်း၏လှည့်စားခြင်းကို ခံလိုက်ရသောကြောင့် သူ့ကို ဖိနှိပ်ထားပြီး ကျောက်စိမ်းနယ်ပယ် ခန္ဓာကိုယ်သန့်စင်ခြင်း သိုင်းပညာရပ်များကို မပေးခဲ့ခြင်းဖြစ်သည်ဟု သူက မူလက ထင်မှတ်ခဲ့မိသည်။

သို့သော် ယခုကြည့်ရသည်မှာ သူ၏ စိတ်လိုက်မာန်ပါလုပ်တတ်ပြီး မဆင်မခြင်နိုင်သော သဘာဝကြောင့် ဂိုဏ်း၏ဂိုဏ်းအတွင်းစည်း တပည့်များက သူ့အား လျှို့ဝှက်နည်းလမ်းကို မျှဝေရန် မထိုက်တန်ဟု ခံစားခဲ့ရပုံရပေသည်။

ပါရမီကောင်းသော်လည်း သူသည် တွန့်ဆုတ်ခြင်းမရှိဘဲ စွန့်ပစ်ခံခဲ့ရလေသည်။

အခြား တပ်မှူး များနှင့် လက်ထောက်အရာရှိ များသည် သူဘာပြောနေသည်ကို နားမလည်ကြသဖြင့်အနည်းငယ် ရှုပ်ထွေးသွားကြလေသည်။

ရှန်းယီသည် မြေပြင်ပေါ်ရှိ ဘုန်းကြီးပန်ရှင်းကို စိုက်ကြည့်လိုက်ပြီးနောက် သူ၏အကြည့်ကို ဖြည်းညှင်းစွာ ပြန်ရုတ်လိုက်သည်။

"ဂိုဏ်းအပြင်စည်း တပည့်တွေအကုန်လုံးကို စစ်ဆေးမေးမြန်းဖို့ ခေါ်သွားကြ။ ဂိုဏ်းအတွင်းစည်း တပည့်တွေအကုန်လုံးကိုတော့ နတ်ဆိုးနှိမ်နင်းရေးဌာနဆီ ဖမ်းဆီးခေါ်ဆောင်သွားကြ"

ခေါ်သွား နှင့် ဖမ်းဆီးခေါ်ဆောင်ဟူသော စကားလုံးများသည် စေတီတော်အတွင်းရှိ တပည့်များနှင့် တောင်တံခါးဝရှိ တပည့်များ၏မျက်နှာအမူအရာများကို ဆန့်ကျင်ဘက်နှစ်ဖက်သို့ ပြောင်းလဲသွားစေခဲ့လေသည်။

စစ်ဆေးမေးမြန်းရန် ခေါ်သွားခံရသည်ဆိုခြင်းမှာ သူတို့အနေဖြင့် ရာဇဝတ်မှုကျူးလွန်ထားခြင်းမရှိသရွေ့ မေးမြန်းစစ်ဆေးပြီးပါက ပြန်လွှတ်ပေးမည်ဟု ဆိုလိုခြင်းဖြစ်ပေသည်။

နတ်ဆိုးနှိမ်နင်းရေးဌာနသို့ ဖမ်းဆီးခေါ်ဆောင်သွားခြင်း၏အဓိပ္ပာယ်မှာမူ လုံးဝကွာခြားလေသည်။

၎င်းသည် နတ်ဆိုး များအတွက် သီးသန့်ထားရှိသော ဆက်ဆံမှုမျိုး ဖြစ်သည်။ အထောက်အထား ခိုင်လုံသွားပြီဆိုသည်နှင့် ခေါင်းပြတ်မည်ဟု အဓိပ္ပာယ်ရပေသည်။

"သခင်ရှန်းက ဉာဏ်ပညာကြီးပါပေတယ်"

ဂိုဏ်းအပြင်စည်း သိုင်းပညာရှင်များသည် မြေပြင်ပေါ်သို့ ပုံရက်သားလဲကျသွားကြပြီး အသက်ကို ဝအောင်ရှူနေကြလေသည်။

သိုင်းလောကတွင် ကျင်လည်ခဲ့ဖူးသူတိုင်း၌ မရိုးဖြောင့်သော လုပ်ရပ်အချို့ ရှိကြစမြဲပင်၊ သို့သော် နတ်ဆိုးများနှင့် ပူးပေါင်းကြံစည်ခြင်းနှင့် ယှဉ်လိုက်လျှင် ထိုကိစ္စများက သေးမွှားသော ကိစ္စများသာ ဖြစ်ပေသည်။

အဆိုးဆုံးအနေဖြင့် သူတို့ ထောင်ဒဏ် ကာလတစ်ခုကျခံရနိုင်သော်လည်း သူတို့၏အသက်ကမူ ဘေးကင်းမည် ဖြစ်ပေသည်။

စေတီတော်အတွင်း၌မူဂိုဏ်းအတွင်းစည်း တပည့်များစွာသည် လက်နက်များကို ကျစ်ကျစ်ပါအောင် ဆုပ်ကိုင်ထားကြပြီဖြစ်ပြီး သူတို့၏မျက်နှာများတွင် စိုးရိမ်ပူပန်မှုများ ပေါ်လွင်နေလေသည်။

ဒု-စစ်သူကြီးများ ဦးဆောင်သော ရွှေလင်းယုန် တပ်ဖွဲ့ခေါင်းဆောင်များသည် နဂါးတစ်ကောင် ပင်လယ်ကို မွှေနှောက်သကဲ့သို့ လေးလံသော နတ်ဆိုးနှိမ်နင်းရေး သံကြိုးများကို တချွင်ချွင်မြည်စေလျက် အပေါ်သို့ အလျင်အမြန် တက်သွားကြလေသည်။

"ခင်ဗျားတို့ရဲ့ ကျောင်းထိုင်ဆရာတော် ဘယ်မှာလဲ"

ရှန်းယီက သူ၏ဓားရှည်ကို ဓားအိမ်ထဲပြန်သွင်းလိုက်လေသည်။

"..."

သားသတ်သမားကျန်းက "ယွမ်ကျစ်" ဟူသော အမည်ကို ပြောလိုက်သည်ကို ကြားလိုက်ရသောအခါ ဘုန်းကြီးပန်ရှင်း၏နှလုံးသားသည် အောက်ဆုံးထိ ထိုးကျသွားပြီး မျှော်လင့်ချက်အားလုံး ကုန်ဆုံးသွားလေသည်။

သူသည် အံကိုကြိတ်လိုက်ပြီး လူငယ်လေး၏ ဘေးတိုက်မျက်နှာကို စူးစိုက်ကြည့်လိုက်ရာ သူ၏ အမူအရာသည် စောစောက ယွမ်ကန်း၏အမူအရာနှင့် သိပ်မကွာခြားလှဘဲ အာဃာတနှင့် စိုးရိမ်ထိတ်လန့်မှုများ ပြည့်နှက်နေလေသည်။

ခေတ္တမျှ ထိပ်တိုက်တွေ့လိုက်ရုံဖြင့် သူတို့ကြားက ကွာခြားချက် ကြီးမားပုံကို သူ နားလည်သွားခဲ့ပြီ ဖြစ်သည်။

ထို့အပြင် နတ်ဆိုးနှိမ်နင်းရေး တပ်မှူး များစွာ ရှိနေသဖြင့် သူ အတောင်ပံပေါက်လျှင်ပင် ယနေ့ လွတ်မြောက်နိုင်တော့မည် မဟုတ်ပေ။

တစ်ဖက်လူက ဓားပြန်သိမ်းလိုက်ခြင်းသည် သူ့ကိုလွှတ်ပေးမည်ဟု ဆိုလိုခြင်းမဟုတ်ပေ။

သေလူတစ်ယောက်အတွက် အားစိုက်ထုတ်နေစရာ မလိုတော့ကြောင်း ဆိုလိုခြင်းသာ ဖြစ်ပေသည်။

ချင်ကျိုးမြို့အတွင်း၌ နတ်ဆိုးနှိမ်နင်းရေးဌာန၏ အနီးကပ်တွဲဖက်ဒု-စစ်သူကြီး တစ်ဦးကို တိုက်ခိုက်ခြင်းကြောင့် သူ မည်သည့်သိုင်းပညာကို လေ့ကျင့်သည်ဖြစ်စေ အရေးမကြီးတော့ပေ။

သူ့အတွေးများကို အတည်ပြုလိုက်သည့်အလား တစ်စုံတစ်ယောက်သည် ချီပင်လယ်ကို ဖိနှိပ်ရန် ပြုလုပ်ထားသော သံကြိုးများဖြင့် သူ့ကို ချည်နှောင်ရန် လျင်မြန်စွာ ရောက်ရှိလာလေသည်။

ဘုန်းကြီးအို၏အသက်ရှူသံများ မြန်ဆန်လာလေသည်။ သူသည် လှပသော စေတီတော်ကို လှည့်ကြည့်လိုက်ရာ ထိတ်လန့်တုန်လှုပ်နေကြသော ဂိုဏ်းအတွင်းစည်း တပည့်များအပေါ် အကြည့်ရောက်သွားလေသည်။

သူတို့သာ နတ်ဆိုးနှိမ်နင်းရေးဌာနသို့ အခေါ်ဆောင်ခံရပါက နတ်ဆိုးများအပေါ် အသုံးပြုသော နည်းလမ်းများကို သူ ကောင်းကောင်းကြီး သိထားပေသည်။

သူတို့ထဲမှ တစ်ယောက်ယောက်က စကားတစ်ခွန်း ဟခနဲ ထွက်သွားသည်နှင့် အားလုံး ခေါင်းပြတ်ကြရမည် ဖြစ်သည်။

ဆုံးဖြတ်ချက်ကို လျင်မြန်စွာ ချလိုက်ပြီးနောက် ဘုန်းကြီးပန်ရှင်းက စူးရှစွာ အော်ပြောလိုက်လေသည်။

"သခင်ရှန်းက အာဏာကိုသုံးပြီး ပုဂ္ဂိုလ်ရေးအရ ကလဲ့စားချေချင်နေတာပဲ။ ဒီဘုန်းကြီးအိုရဲ့ အသုံးမဝင်တဲ့ အသက်ကို လိုချင်သလိုသာ ယူလိုက်ပါတော့"

"ဒါပေမဲ့ ဗာဂျာရာဂိုဏ်း ရဲ့ ဂုဏ်သိက္ခာကို ညစ်နွမ်းအောင် လုပ်ဖို့ ကြိုးစားတာကတော့ မဖြစ်နိုင်ဘူး"

သူ စကားပြောရပ်လိုက်ပြီးနောက် သူ၏မျက်နှာသည် ကြောက်မက်ဖွယ်ကောင်းအောင် ရှုံ့မဲ့သွားပြီး အံကြိတ်လျက် ပြောလိုက်သည်။

"ကျောင်းထိုင်ဆရာတော် ဘယ်မှာလဲဆိုတာ သိချင်နေတာလား။ အိပ်မက်သာ မက်နေလိုက်တော့"

သူ့စကားမဆုံးမီမှာပင် သံကြိုးခတ်ခံထားရသော သူ၏လက်မောင်းများ ရုတ်တရက် မြောက်တက်သွားပြီး သံမဏိကဲ့သို့ မာကျောသော လက်ဝါးနှစ်ဖက်လုံးဖြင့် သူ၏မေးရိုးကို တွန့်ဆုတ်ခြင်းမရှိဘဲ ရိုက်ချလိုက်လေ၏။

ခန္ဓာကိုယ်သန့်စင်ခြင်းလေ့ကျင့်သော သိုင်းပညာရှင်များသည် အလွန်ရှားပါးလှပြီး အထူးသဖြင့် ကျောက်စိမ်းနယ်ပယ်သို့ ဝင်ရောက်နိုင်သော ပါရမီရှိသူများသည် ဤလမ်းကြောင်းကို လုံးဝ စဉ်းစားလေ့မရှိကြပေ။

သူ၏ချီပင်လယ်ကို သံကြိုးများဖြင့် တင်းကြပ်စွာ ဖိနှိပ်ထားသော်လည်း ဘုန်းကြီးအိုသည် အင်အားအချို့ကို ပိုင်ဆိုင်ထားဆဲ ဖြစ်လေသည်။

သံကြိုးကို ကိုင်ထားသော ရွှေလင်းယုန် တပ်ဖွဲ့ခေါင်းဆောင်မှာ ဆွဲရမ်းခြင်းခံလိုက်ရပြီး ယိုင်နဲ့သွားလေသည်။

သူက ဆူပူကြိမ်းမောင်းရန် ပြင်လိုက်စဉ်မှာပင် သူ၏မျက်ဝန်းသူငယ်အိမ်များ ကျုံ့ဝင်သွားလေသည်။

ဂြွပ်ခနဲ အသံပြတ်သားစွာ ထွက်ပေါ်လာလေသည်။

ဘုန်းကြီးအိုသည် သူ၏လည်ပင်းကို ကိုယ်တိုင်ချိုးလိုက်ရာ သူ၏လုံးဝန်းသောခေါင်းသည် ပုံမှန်မဟုတ်သော အနေအထားဖြင့် တွဲလောင်းကျသွားလေသည်။

"ဂိုဏ်းတူဦးလေး"

ထိုမြင်ကွင်းကို မြင်လိုက်ရသောအခါ စေတီတော်အတွင်းရှိ တပည့်များသည် တုန်လှုပ်သွားကြပြီး နေရာမှာတင် အေးခဲသွားကြလေသည်။

ခဏအကြာတွင် သူတို့ ပြန်လည်သတိဝင်လာပြီး တစ်ယောက်ကိုတစ်ယောက် ကြည့်လိုက်ကြလေသည်။

ထိတ်လန့်သွားခြင်းအပြင် တစ်စုံတစ်ခုကို လျင်မြန်စွာ သဘောပေါက်သွားကြပြီး လက်နက်များကို ချက်ချင်း ပစ်ချလိုက်ကြလေသည်။

သူတို့သည် နှလုံးသားထဲမှ ကြောက်ရွံ့မှုကို အတင်းအကျပ် ဖိနှိပ်လိုက်ကြသည်။ ထိတ်လန့်မှုကြောင့် တစ်ကိုယ်လုံး ချွေးများဖြင့် ရွှဲနစ်နေသော်လည်း ပါးစပ်များကို တင်းတင်းစေ့ထားလိုက်ကြလေသည်။

ဘုန်းကြီးပန်ရှင်းသည် သူ့အသက်ကို အသုံးပြု၍ သူတို့ကို သတိပေးနေခြင်း ဖြစ်ပေ၏။

ရှန်း ဟုခေါ်သော ဤအစိုးရလက်ပါးစေ၏ ခြိမ်းခြောက်မှုကို မကြောက်ကြနှင့်။

ဗောဓိဗာဂျာရာခန္ဓာကိုယ်ကို ကျင့်ကြံခြင်းသည် သေဒဏ်ပေးထိုက်သော ပြစ်မှုမဟုတ်လော။

ဗာဂျာရာဂိုဏ်း သည် ၎င်း၏ကျင့်ကြံခြင်းနည်းလမ်းများကို ပြောင်းလဲလေ့ရှိခြင်းမှာ ဆန်းကြယ်သော ဖြစ်ရပ်မဟုတ်ပေ။

လူအများ မသိကြသော်လည်း နတ်ဆိုးနှိမ်နင်းရေးဌာနကမူ သေချာပေါက် သိထားပေသည်။

ဘုန်းကြီးပန်ရှင်းနှင့် သူ၏တပည့်များသည် တစ်ဖက်လူကို စော်ကားခဲ့ပြီး ယခုလေးတင် နတ်ဆိုးနှိမ်နင်းရေးဌာနမှ လူတစ်ဦးကိုပင် တိုက်ခိုက်ခဲ့သောကြောင့် သူတို့သည် ဤညကို ကျော်လွန်ပြီး အသက်ရှင်နိုင်တော့မည် မဟုတ်သည်မှာ သေချာပေသည်။

သို့သော် သူတို့ ဘာကို ကြောက်ရမည်နည်း။ ရှန်း ဟုခေါ်သော ထိုသူ၌သာ သက်သေအထောက်အထားရှိပါက ဤကဲ့သို့ တုံ့ဆိုင်းနေပါဦးမည်လော။

"ဒါက..."

ဟုန်လေ့သည် ရှန်းယီ၏ဘေးနားသို့ အမြန်လျှောက်လာပြီး မျက်နှာထားက အနည်းငယ် တင်းမာနေလေသည်။

"အခုချက်ချင်း စုံစမ်းဖို့ လူလွှတ်လိုက်ပါ့မယ်"

ဤအခြေအနေတွင် ဗာဂျာရာဂိုဏ်း၌ ပြဿနာရှိနေသည်ဟု ငြင်းခုံနေစရာ မလိုတော့ပေ။

တပ်မှူးများ အုံနှင့်ကျင်းနှင့် ထွက်လာသည်နှင့်အမျှ ချင်ကျိုးမြို့သည် အသင့်အနေအထားသို့ ရောက်ရှိနေပြီဖြစ်ကာ ယင်ကောင်တစ်ကောင်ပင် မလွတ်မြောက်နိုင်ပေ။

ထိပ်ပြောင်ဘုန်းကြီးအိုတစ်ပါး၏ ယတည်နေရာကို စုံစမ်းရန်မှာ မခက်ခဲသော်လည်း သူ မြို့ထဲမှ ထွက်ခွာသွားသည်နှင့်... သူ မည်မျှပင် သတိထားပါစေ သတင်းက မလွဲမသွေ ပေါက်ကြားသွားမည်သာ ဖြစ်သည်။

ဘုန်းကြီးပန်ရှင်းသည် ဂိုဏ်းသားများ၏နှုတ်ကို ပိတ်ရန်နှင့် ဤအဖိုးတန်သော အချိန်ကို ဝယ်ယူရန်အတွက် ကိုယ့်ကိုယ်ကိုယ် သတ်သေသွားခဲ့ခြင်း ဖြစ်သည်။

ကျောင်းထိုင်ဆရာတော်ကသာ တုံ့ပြန်ပြီး သက်သေများကို ဖျက်ဆီးလိုက်နိုင်ပါက ဗာဂျာရာဂိုဏ်းသည် ဆုံးရှုံးမှုကြီးမားစွာ ခံစားရမည် ဖြစ်သော်လည်း ပြန်လည်နိုးထလာနိုင်မည့် အခွင့်အရေး ရှိနေသေးသည်။

သူသည် ရှန်းယီအတွက် ကိုယ်ကျိုးအတွက် အာဏာအလွဲသုံးစားလုပ်မှုဟူသော ကြီးမားသည့် တွင်းချောက်ကြီးကိုပင် တူးဆွပေးခဲ့သေးသည်။

"..."

ရှန်းယီသည် မြေပြင်ပေါ်ရှိ ဘုန်းကြီးပန်ရှင်းကို ကြည့်ကာ မျက်ခုံးအနည်းငယ် ပင့်လိုက်လေသည်။

သူက ပေါ့ပေါ့ပါးပါး မေးလိုက်ရုံသာ ရှိသေးသော်လည်း တုံ့ပြန်မှုက အလွန်ပြင်းထန်လှလေ၏။

ထို့နောက် သူသည် ခါးကြားမှ ငွေရောင်ခေါင်းလောင်းလေးတစ်ခုကို ထုတ်လိုက်ပြီး ချီစွမ်းအင် ထည့်သွင်းကာ ပြောလိုက်လေသည်။

"အားလုံးကို အကူညီတောင်းပါတယ်။ဗာဂျာရာဂိုဏ်းက ကျောင်းထိုင်ဆရာတော်ရဲ့တည်နေရာကို ကျွန်တော် သိချင်ပါတယ်"

အသက်ရှူချိန် အနည်းငယ်ခန့် အကြာတွင် သတင်းစကား အများအပြားသည် ချီစွမ်းအင်နှင့်အတူ ရှန်းယီ၏နားထဲသို့ ဝင်ရောက်လာလေသည်။

"အားနာမနေပါနဲ့။သူ ပင်းခန်တောင်ပေါ်မှာ ရှိပါတယ်။ လွန်ခဲ့တဲ့ လဝက်လောက်ကမှ ကျုပ်သူ့ကို တွေ့လိုက်ပါသေးတယ်"

"ဗာဂျာရာဂိုဏ်းမှာ စေတနာရှင်အလှူရှင်တွေကို ချီစုဆောင်းဖို့ တောင်ပေါ် ခေါ်သွားလေ့ရှိတဲ့ ထုံးစံတစ်ခု ရှိတယ်။ သူတို့ နေရာကို မကြာခဏ ပြောင်းတတ်ကြတယ်"

"ဟားဟားဟား... တာအိုပညာရှင်တွေရဲ့အသက်ရှူခြင်းနဲ့ ချီစုဆောင်းတဲ့ နည်းလမ်းတွေကိုတောင် ခိုးယူတတ်တဲ့ ထိပ်ပြောင်ဘုန်းကြီးအတု ဖြစ်ရတာ ထိုက်တန်ပါပေတယ်။ဒါပေမဲ့ ဒီအကြောင်းကို ကျုပ် ကြားဖူးတယ်။ ကြည်ညိုသူ အများအပြားက အဲဒီမှာ နှစ်ပေါင်းများစွာ နေကြတယ်လို့ ဆိုကြတယ်။လအနည်းငယ်ကြာတိုင်း အိမ်ကို စာပို့ပြီး ဆွေမျိုးတွေကို တရားအားထုတ်ဖို့ ဖိတ်ခေါ်တတ်ကြတယ်။ ရံဖန်ရံခါ အိမ်ပြန်လည်ပတ်ပြီးနောက် မြန်မြန်ဆန်ဆန်ပဲ ပြန်သွားတတ်ကြပြီး သူတို့စိတ်က ဘုရားတရားအပေါ်မှာပဲ အာရုံရောက်နေတတ်ကြတယ်"

ချင်ကျိုးသည် စီရင်စုဆယ်နှစ်ခု၏မြို့တော်ဖြစ်ပြီး ယခုညတွင် ဤမျှကြီးမားသော ရုတ်ရုတ်သဲသဲ ဖြစ်ရပ်ကြီး ဖြစ်ပေါ်နေခြင်း ဖြစ်သည်။

ပွဲကြည့်ရန် စုဝေးနေကြသော နတ်ဆိုးဖမ်းစီးသူ အများအပြား ရှိနေကြပြီး သူတို့က အဖြေများကို လျင်မြန်စွာ ပေးပို့လာကြခြင်း ဖြစ်သည်။

ရှန်းယီသည် ငွေရောင်ခေါင်းလောင်းကို ပြန်သိမ်းလိုက်သော်လည်း ဟုန်လေ့၏မျက်နှာအမူအရာမှာ ထူးဆန်းနေပြီး သူ့ကို အံ့အားသင့်စွာ စိုက်ကြည့်နေသည်ကို တွေ့လိုက်ရလေ၏။

"ဘာဖြစ်လို့လဲ"

"ဟင့်အင်း၊ ဘာမှမဖြစ်ပါဘူး"

ဟုန်လေ့သည် လက်ကာပြလိုက်ပြီး တံတွေးမြိုချလိုက်လေသည်။

ဒု-စစ်သူကြီးအဖြစ် နှစ်ပေါင်းများစွာ တာဝန်ထမ်းဆောင်ခဲ့သူ ပီပီ သူသည် နတ်ဆိုးဖမ်းစီးသူများနှင့် ဆက်ဆံခဲ့ဖူးသော်လည်း ငွေရောင်ခေါင်းလောင်းကို ကိုယ်တိုင်မြင်တွေ့ဖူးခြင်းမှာ ဤသည်က ပထမဆုံးအကြိမ် ဖြစ်လေသည်။

ထိုအရူးများကို တွေးမိရင်း ဟုန်လေ့ ခေါင်းခါလိုက်လေသည်။ ထိုကဲ့သို့သောအရာများကို မမြင်ရခြင်းက အကောင်းဆုံးပင်။

ကျောက်စိမ်းပြည့်စုံခြင်းနယ်ပယ် သည် ငွေရောင်ခေါင်းလောင်းကို ကိုင်ဆောင်ရန် အနိမ့်ဆုံး စံသတ်မှတ်ချက်မျှသာ ဖြစ်သည်ဟု ဆိုနိုင်သည်။

ဤခေါင်းလောင်းကို ကိုင်ဆောင်ပြီး အသက်ရှင်ကျန်ရစ်သူ မည်သူမဆိုသည် အမြုတေဖွဲ့စည်းခြင်း အဆင့် ကျွမ်းကျင်သူများဖြစ်သည်ဟု ကောလာဟလများ ရှိလေသည်။

သူတို့၏သက်တမ်းတိုတောင်းရခြင်းမှာ နတ်ဆိုးဖမ်းစီးသူများ၏တင်းကျပ်သော စည်းမျဉ်းများကြောင့် မဟုတ်ပေ။

အဓိကအားဖြင့် သာမန် နတ်ဆိုးဖမ်းစီးသူများကြားမှ ထူးချွန်ပြောင်မြောက်စွာ ထွက်ပေါ်လာနိုင်ခြင်းကပင် သူတို့၏စိတ်သည် ပုံမှန်မဟုတ်ကြောင်း သက်သေပြနေပြီ ဖြစ်သည်။

တစ်ကိုယ်တည်း လှည့်လည်သွားလာရင်း အဆင့်မြင့် နတ်ဆိုးတစ်ကောင်၏နယ်မြေထဲသို့ မတော်တဆ ဝင်ရောက်မိပါက ထွက်ပြေးရန် မစဉ်းစားတတ်ကြပေ။

ဆုကြေးငွေနှင့် လဲလှယ်ရန်အတွက် နတ်ဆိုးထံမှ ချီစွမ်းအင် တစ်မျှင်လောက်တော့ ရအောင်ယူရမည်၊ သို့မဟုတ်ပါက ရှုံးလေသည်ဟု သူတို့က ယူဆတတ်ကြသည်။

သခင်ရှန်းက စစ်သူကြီးချန် နှင့် မရင်းနှီးခြင်းမှာ အံ့သြစရာ မဟုတ်တော့ပေ။

ဤအရာ ပြဿနာကိုး။

ဟုန်လေ့သည် ထူးဆန်းသော အမူအရာဖြင့် ကိုယ်ကိုကိုင်းလိုက်ကာ ဘုန်းကြီးပန်ရှင်း၏အလောင်းကို ကောက်ယူရင်း နှုတ်ခမ်းသပ်လိုက်လေသည်။

"ခင်ဗျားက ဘာလို့ ဒီလောက် အလျင်လိုနေရတာလဲ..."

မကြာမီတွင် ဗာဂျာရာဂိုဏ်း၏ဂိုဏ်းအတွင်းစည်း တပည့်အားလုံးကို နတ်ဆိုးနှိမ်နင်းရေး သံကြိုးများဖြင့် ချည်နှောင်လိုက်ကြလေသည်။

ဘုန်းကြီးပန်ရှင်း၏ယခင်နမူနာကြောင့် တပ်မှူး များသည် သံကြိုးများကို အထူးတလည် အပိုအထပ်ထပ် ရစ်ပတ်လိုက်ကြပြီး အချိန်အကြာကြီး အသုံးမပြုရသေးသော အထူးငွေရောင်ချိတ်များကို ထုတ်ကာ သူတို့၏ပခုံးရိုးများကို ထိုးဖောက် ချိတ်ဆွဲလိုက်ကြလေသည်။

"သခင်ရှန်း၊ တကယ်လို့ မြို့ပြင်ထွက်မယ်ဆိုရင် အနီးကပ်တွဲဖက်ဒု-စစ်သူကြီး တစ်ယောက်က အများဆုံး လူတစ်ရာ့နှစ်ဆယ်ပဲ ခေါ်သွားလို့ရပါတယ်။ဒု-စစ်သူကြီး သုံးယောက်ဆိုတော့... ခင်ဗျားမှာ ကိုယ်ပိုင်အဖွဲ့ မရှိပေမဲ့ ခင်ဗျားအတွက် လူအချို့ကို ယာယီ စုစည်းပေးလို့ရပါတယ်။ ဒီလောက်လူအင်အားနဲ့ လုံလောက်ပါ့မလားလို့ စိုးရိမ်မိရုံပါပဲ"

ဟုန်လေ့သည် ပန်ရှင်း၏အလောင်းကို ကိုင်ထားရင်း ရှန်းယီကို သတိပေးလိုက်လေသည်။

ဤကိစ္စသည် ပြီးဆုံးရန် ခြေတစ်လှမ်းသာ လိုတော့သည့်ပုံ ပေါက်နေသော်လည်း ထိပ်ပြောင်ဘုန်းကြီးအို၏ကျင့်ကြံခြင်းအဆင့်သည် ကောလာဟလများအတိုင်း အမှန်တကယ် တိုးတက်နေခဲ့ပါက ထိုနောက်ဆုံးခြေလှမ်းသည် လှမ်းရအလွန်ခက်ခဲပေလိမ့်မည်။

ချင်းဖုန်းတောင်ပေါ်တွင်တုန်းက ချန်ချမ်ခွင်းသည် အဓိက စစ်သူကြီးဖြစ်ပြီး မတော်တဆမှု အားလုံးအတွက် တာဝန်ရှိသူဖြစ်သည်။

ဂိုဏ်းချုပ်ကို သတ်ဖြတ်ရန်၊ ဘိုးဘေးဓားကို ဖျက်ဆီးရန်နှင့် နောက်ဆုံးတွင် ကျောင်းနဂါးကို ရှာဖွေချေမှုန်းရန် သူက တာဝန်ယူရသော်လည်း ရှန်းယီက သူ့ထက် ဦးအောင် လုပ်ဆောင်နိုင်ခဲ့သည်။

ယခုအခါတွင် ရှန်းယီသည် နတ်ဆိုးများကို ချေမှုန်းရန် တပ်မှူးများကို ကိုယ်တိုင် ဦးဆောင်နေပြီး စစ်သူကြီးချန် ထံသို့ သတင်းမပို့ထားသည်မှာ ထင်ရှားလေသည်။

ကြီးမားသော အာဏာကို ရယူသုံးစွဲနေချိန်တွင် သူသည် ထိုက်တန်သော တာဝန်များကိုလည်း ထမ်းဆောင်ရမည် ဖြစ်သည်။

အကယ်၍ သူသာ ကျရှုံးသွားခဲ့ပါက သူ့အသက်အပြင် ချင်ကျိုးရုံးတော်တစ်ခုလုံး၏မျက်နှာကိုပါ အိုးမဲသုတ်ရာကျမည်။

စာစဉ်၁၀ပြီး#