အခြေခံတည်ဆောက်ခြင်းအဆင့်နှင့် တိုက်ပွဲ (အပိုင်း ၂)

သူမ၏ ဝိညာဉ်စွမ်းအင်များ ပြင်းထန်စွာ တုန်ခါသွားပြီး မုန့်ချင်းရွှယ် ၏ အမြင်အာရုံများ ဝေဝါးမှောင်မိုက်သွားကာ ပါးစပ်မှလည်း သွေးများ ဝေါကနဲ အန်ထွက်လာချေ၏။

“ဒုန်း... ဒုန်း... ဒုန်း...”

သူမ ပြန်လည်မလှုပ်ရှားနိုင်မီမှာပင် နောက်ထပ် လက်သီးချက်ပေါင်းများစွာမှာ တစ်ခုပြီးတစ်ခု အရှိန်အဟုန်ဖြင့် သူမ၏ ဦးခေါင်းနောက်စေ့သို့ ထပ်ဆင့်ကျရောက်လာပြန်ပေသည်။ မုန့်ချင်းရွှယ်၏ ဦးခေါင်းနောက်စေ့မှာ ပြင်းထန်သော ထိုးနှက်ချက်များကြောင့် အတွင်းသို့ သိသိသာသာ ချိုင့်ဝင်သွားလေပေတော့သတည်း။

“အဟွတ်... အဟွတ်...”

မုန့်ချင်းရွှယ်သည် သွေးများ ထပ်မံအန်ထုတ်လိုက်ရပြီး သူမ၏ နှလုံးသားထဲတွင် ပထမဆုံးအကြိမ်အဖြစ် သေဘေးကို ကြောက်ရွံ့တုန်လှုပ်သောစိတ်များ ပြည့်နှက်လာချေ၏။ မုန့်ဝမ် မှာ သာမန် အခြေခံစွမ်းအင်အဆင့် မဟုတ်သည်မှာ ထင်ရှားလှပေသည်။ သူမကို သာမန်စံနှုန်းများဖြင့် တိုင်းတာ၍ မရနိုင်ချေ။

“တောက်… ငါ အရမ်းပေါ့ဆသွားမိတာပဲ”

မုန့်ဝမ်မှာ ဤမျှအထိ သန်မာမည်မှန်း သိခဲ့ပါက သူမအနေဖြင့် အစကတည်းက အစွမ်းအထက်ဆုံး နည်းလမ်းများကို အသုံးပြု၍ တိုက်ရိုက်သတ်ဖြတ်ခဲ့သင့်ပေသည်။ မုန့်ချင်းရွှယ်သည် နာကျင်မှုကို အံတုရင်း ဓားအဆောင်တစ်ခုကို ထုတ်ယူကာ ချက်ချင်းပင် အသက်သွင်းလိုက်လေပေ၏။

ဤဓားအဆောင်မှာ အလွန်ပင် အဖိုးတန်လှပြီး သူမ၏ အသက်ကယ်ဝှက်ဖဲလည်း ဖြစ်ချေသည်။ ဤအရာကို မုန့်ဝမ်ကဲ့သို့သောသူပေါ်တွင် အသုံးပြုရမည်ကို သူမ အမှန်တကယ်ပင် နှမြောတသ ဖြစ်နေမိပေ၏။ သို့သော် မုန့်ဝမ်၏ 'သွေးသန့်စင်ထားသော ခန္ဓာကိုယ်' မှာ အလွန်တရာ သန်မာလှသဖြင့် သူမ၏ တိုက်ခိုက်မှုအများစုကို ခုခံနိုင်ရုံမျှမက သူမ၏ အသက်ကိုပါ ခြိမ်းခြောက်နေသဖြင့် ထွက်ပြေးရန်ပင် မဖြစ်နိုင်တော့ချေ။

အကယ်၍ ဤသို့သာ ဆက်သွားနေပါက မုန့်ဝမ်၏လက်ချက်ဖြင့် သူမ သေဆုံးသွားရမည်ကို အမှန်ပင် စိုးရိမ်မိပေသည်။

“သွားစမ်!”

မုန့်ချင်းရွှယ်သည် အော်ဟစ်လိုက်ရင်း ဓားစွမ်းအင်များကို မုန့်ဝမ်ဆီသို့ ဦးတည်စေလိုက်ချေ၏။ ထိုဓားစွမ်းအင်မှာ တောက်ပသော နေမင်းကြီးကဲ့သို့ ထက်ရှသော အရှိန်အဝါများကို ထုတ်လွှတ်နေပေသည်။ အနီးသို့ မရောက်လာမီမှာပင် မုန့်ဝမ်သည် ပြင်းထန်သော ပူလောင်မှုကို ခံစားလိုက်ရသဖြင့် အလွန်ပင် စိတ်အနှောင့်အယှက် ဖြစ်ရလေပေ၏။

အကယ်၍ ဤဓားစွမ်းအင်သာ ထိမှန်သွားပါက သူမ၏ ခန္ဓာကိုယ်အတွင်းရှိ သွေးများအားလုံးမှာ ခန်းခြောက်သွားနိုင်သည့်အပြင် သူမ၏ ဝိညာဉ်အာရုံ ပင်လျှင် ပြာအဖြစ်သို့ လောင်ကျွမ်းသွားနိုင်ပေသည်။

သေလုမြောပါး အခြေအနေနှင့် ရင်ဆိုင်နေရသော်လည်း မုန့်ဝမ်မှာမူ ပိုမိုတည်ငြိမ်လာချေ၏။ ဓားစွမ်းအင်မှာ သူမကို ပစ်မှတ်ထားပြီး ဖြစ်သဖြင့် သူမအနေဖြင့် သွေးကို အရင်းပြုသော ထွက်ပြေးသည့်ကျင့်စဉ်ကို သုံးလျှင်ပင် လွတ်မြောက်နိုင်ရန် မသေချာချေ။ သို့သော် အကောင်းဆုံး အကာအကွယ်မှာ တိုက်ခိုက်ခြင်းပင် ဖြစ်ပေသည်။ မုန့်ချင်းရွှယ်ကို သတ်ပစ်နိုင်ပါက လက်ရှိအကျပ်အတည်းမှာ အလိုအလျောက် ပြေလည်သွားမည် ဖြစ်ချေ၏။

မုန့်ဝမ်သည် ထွက်ပြေးရင်း 'သွေးမိစ္ဆာကောင်းကင်ဘုံကျင့်စဉ်' ကို အစွမ်းကုန် လည်ပတ်စေကာ 'သွေးယဇ်ပူဇော်မှုကျင့်စဉ်' သူမ၏ ဝိညာဉ်အာရုံကို အားဖြည့်လိုက်လေပေသည်။ သွေးယဇ်ပူဇော်မှုကျင့်စဉ် ဆိုသည်မှာ မိမိ၏ သွေးကို ပေးဆပ်ခြင်းဖြင့် စွမ်းအားရယူခြင်း သို့မဟုတ် ဒဏ်ရာများကို ကုသခြင်းဖြစ်သည့် သာမန် သွေးလမ်းစဉ် လျှို့ဝှက်ကျင့်စဉ်တစ်ခု ဖြစ်ချေ၏။

သွေးကို ပိုမိုပူဇော်လေလေ စွမ်းအား ပိုရလေလေ ဖြစ်သော်လည်း နောက်ဆက်တွဲအနေဖြင့် သူမမှာ အလွန်အမင်း အားနည်းသွားမည် ဖြစ်ပေသည်။ သို့သော် အသက်ရှင်ရေးမှာ ပို၍ အရေးကြီးသဖြင့် မုန့်ဝမ်သည် ထိုအချက်များကို ဂရုမစိုက်နိုင်တော့ချေ။

၄၀ ရာခိုင်နှုန်း၊ ၅၀ ရာခိုင်နှုန်း၊ ၆၀ ရာခိုင်နှုန်း... အသက်ရှူအကြိမ် အနည်းငယ်အတွင်းမှာပင် မုန့်ဝမ်၏ ခန္ဓာကိုယ်အတွင်းရှိ သွေး ၆၀ ရာခိုင်နှုန်းကို ပူဇော်လိုက်လေပေသည်။ သွေးများ ကုန်ဆုံးသွားသည်နှင့်အမျှ မုန့်ဝမ်၏ ခန္ဓာကိုယ်မှာ မျက်ဝါးထင်ထင်ပင် ပိန်ချောင်သွားပြီး ကြောက်မက်ဖွယ်ကောင်းသော ပုံစံသို့ ပြောင်းလဲသွားချေ၏။

သူမသည် ထိုပူဇော်မှုမှ ရရှိသော စွမ်းအားအားလုံးကို ဝိညာဉ်အာရုံ အားကောင်းစေရန် အသုံးပြုလိုက်လေသည်။ သို့သော် သူမ၏ ဝိညာဉ်အာရုံ စွမ်းအားကို စမ်းစစ်ကြည့်ရာတွင် မုန့်ဝမ်သည် မျက်မှောင်ကြုတ်လိုက်မိ၏။

မလုံလောက်သေးချေ။

ဤမျှသော ဝိညာဉ်အာရုံ စွမ်းအားဖြင့်ဆိုလျှင် သူမ ထုတ်လွှတ်မည့် 'ဝိညာဉ်ခွဲအပ်'မှာ မုန့်ချင်းရွှယ်ကို ဒဏ်ရာရစေနိုင်သော်လည်း ပြင်းထန်သော ထိခိုက်မှုမျိုး သို့မဟုတ် လှုပ်ရှားနိုင်စွမ်း ကင်းမဲ့သွားစေသည်အထိ ဖြစ်စေရန် မလွယ်ကူပေ။ သူမတွင် တိုက်ခိုက်ရန် အခွင့်အရေး တစ်ကြိမ်သာ ရှိသဖြင့် အရာအားလုံးကို ပုံအောရမည် ဖြစ်ချေသည်။

မုန့်ဝမ်သည် သွေးမိစ္ဆာကောင်းကင်ဘုံကျင့်စဉ်ကို ဆက်လက်လည်ပတ်စေကာ သူမ၏ သွေးများကို ထပ်မံ ပူဇော်လိုက်လေပေ၏။ ၇၀ ရာခိုင်နှုန်း၊ ၈၀ ရာခိုင်နှုန်း၊ ၉၀ ရာခိုင်နှုန်း!

သူမ၏ ခန္ဓာကိုယ်အတွင်းရှိ သွေးအသစ် ၉၀ ရာခိုင်နှုန်းကို ပူဇော်ပြီးနောက်တွင်မှ မုန့်ဝမ်သည် မူးဝေစွာဖြင့် ရပ်တန့်လိုက်လေသည်။ သူမ ပူဇော်နိုင်သော သွေးပမာဏမှာ အဆုံးစွန်သို့ ရောက်ရှိသွားပြီဖြစ်ကြောင်း သူမ သိလိုက်ချေပြီ။ အကယ်၍ ဆက်လက်ပူဇော်နေပါက ဓားစွမ်းအင် သူမဆီ မရောက်မီမှာပင် သူမ သေဆုံးသွားပေလိမ့်မည်။

မုန့်ဝမ်သည် ဝိညာဉ်ခွဲအပ်ကို စတင် ပုံဖော်လိုက်သော်လည်း သွေးဆုံးရှုံးမှု များပြားလွန်းသဖြင့် သူမ၏ သတိမှာ ခေတ္တမျှ ဝေဝါးသွားခဲ့ရချေ၏။ ထိုခဏအတွင်းမှာပင် ဓားစွမ်းအင်မှာ သူမ၏ အနီးသို့ ရောက်လာပြီး ပြင်းထန်သော အပူချိန်ကြောင့် သူမ၏ အရေပြားများမှာ ကျွမ်းလောင်သွားလေပေသည်။

နာကျင်မှုကြောင့် မုန့်ဝမ်၏ ဝေဝါးနေသော မျက်လုံးများ ပြန်လည်ကြည်လင်လာပြီး ရှေ့သို့ အသည်းအသန် တိုးဝင်သွားလေသည်။ တစ်ချိန်တည်းမှာပင် အားပါလှသော ဝိညာဉ်အာရုံ စွမ်းအားများ ပါဝင်သည့် ဝိညာဉ်ခွဲအပ်ကို ပုံဖော်ကာ နောက်ဘက်ရှိ မုန့်ချင်းရွှယ်ဆီသို့ ပစ်လွှတ်လိုက်လေပေတော့သတည်း။

“အား!”

မုန့်ဝမ်၏ ခန္ဓာကိုယ်မှာ ထူးဆန်းစွာ ပိန်ချောင်သွားသည်ကို မြင်ကတည်းက မုန့်ချင်းရွှယ်သည် တန်ပြန်တိုက်ခိုက်မှုကို သတိထားနေခဲ့ခြင်း ဖြစ်ချေ၏။ သို့သော် မုန့်ဝမ်အနေဖြင့် ဝိညာဉ်အာရုံကို တိုက်ခိုက်သည့် နည်းလမ်းကို အသုံးပြုနိုင်လိမ့်မည်ဟု သူမ လုံးဝ မထင်မှတ်ထားခဲ့ပေ။

မုန့်ချင်းရွှယ် တစ်စုံတစ်ခု မှားယွင်းနေပြီကို သိရှိပြီး ရှောင်တိမ်းရန် ကြိုးစားချိန်တွင် နောက်ကျသွားခဲ့ပြီ ဖြစ်လေသည်။ ဝိညာဉ်ခွဲအပ်မှာ သူမနှင့် လက်တစ်ကမ်းအကွာသို့ ရောက်ရှိနေပြီ ဖြစ်ချေ၏။ မုန့်ချင်းရွှယ်၏ မျက်နှာမှာ ဖြူလျော်သွားပြီး လက်ထဲရှိ ဓားအဆောင်မှာလည်း လွတ်ကျလုမတတ် ဖြစ်သွားကာ မုန့်ဝမ်ကို လိုက်လံတိုက်ခိုက်နေသော ဓားစွမ်းအင်မှာလည်း လမ်းကြောင်းများ ကစဉ့်ကလျား ဖြစ်သွားရချေသည်။

ဝိညာဉ်ခွဲအပ်အတွင်းရှိ ကြောက်မက်ဖွယ်ကောင်းသော စွမ်းအားကို သူမ အာရုံခံမိလိုက်ပေသည်။ ၎င်းမှာ ဝိညာဉ်အာရုံကို တိုက်ရိုက်ပစ်မှတ်ထားခြင်း ဖြစ်သဖြင့် သာမန်နည်းလမ်းများဖြင့် ကာကွယ်ရန် မဖြစ်နိုင်ချေ။ မုန့်ချင်းရွှယ်သည် ချွေးများ ပြန်လာပြီး ရွှေရောင်ဒိုင်းငယ်လေးတစ်ခုကို အမြန် အသက်သွင်းကာ သူမ၏ ရှေ့တွင် ဝိညာဉ်စွမ်းအင် အကာအကွယ်တစ်ခုကို တည်ဆောက်လိုက်လေပေ၏။

“ဝိညာဉ်ဒိုင်း အကာအကွယ် .........”

မုန့်ချင်းရွှယ်၏ မျက်လုံးများမှာ သွေးတက်နေပြီး ရူးသွပ်နေသော ပုံစံသို့ ပြောင်းလဲသွားချေ၏။ သူမသည် သူမ၏ ဝိညာဉ်စွမ်းအင်များကို ထိုဒိုင်းငယ်အတွင်းသို့ အဆက်မပြတ် သွန်းလောင်းကာ ဝိညာဉ်ခွဲအပ်ကို ပိတ်ဆို့ရန် အစွမ်းကုန် ကြိုးစားနေလေပေသည်။ သို့သော် ဝိညာဉ်ခွဲအပ်မှာ ထိုဒိုင်း၏ အလင်းတန်းများကို ဖောက်ထွက်ကာ သူမဆီသို့ တိုက်ရိုက် ထိုးစိုက်သွားလေပေတော့သတည်း။

မုန့်ချင်းရွှယ်၏ မျက်ဝန်းတွင် မျှော်လင့်ချက် ကင်းမဲ့သော အရိပ်အယောင်များ ဖြတ်ပြေးသွားလေသည်။ ဝိညာဉ်ခွဲအပ်၏ တိုက်ခိုက်မှုအောက်တွင် သူမ၏ ဝိညာဉ်အာရုံမှာ မထိန်းချုပ်နိုင်အောင် တုန်ခါနေသည်ကို ခံစားနေရချေ၏။

“မဖြစ်နိုင်ဘူး၊ ငါက အခြေခံတည်ဆောက်ခြင်းအဆင့် ကျင့်ကြံသူလေ... နင်က ငါ့ရဲ့ ဝိညာဉ်အာရုံကို ဘယ်လိုလုပ်ပြီး နာကျင်စေနိုင်မှာလဲ? ဒါက ပုံရိပ်ယောင်ပဲ ဖြစ်ရမယ်... ပုံရိပ်ယောင်ပဲ ဖြစ်ရမယ်...”

မုန့်ချင်းရွှယ်သည် စူးစူးဝါးဝါး အော်ဟစ်လိုက်ချေ၏။ သူမ၏ ဝိညာဉ်အာရုံမှာ အပိုင်းပိုင်းအစစ ဆွဲဖြဲခံနေရသကဲ့သို့ ခံစားနေရသဖြင့် ပြင်းထန်သော နာကျင်မှုကြောင့် သူမ၏ မျက်နှာမှာ ရုပ်ပျက်ဆင်းပျက် ဖြစ်သွားရလေပေသည်။ သူမ၏ အသံတွင် မယုံကြည်နိုင်မှုများ ပြည့်နှက်နေပြီး ချွေးအေးများလည်း အဆက်မပြတ် စီးကျနေချေ၏။

မုန့်ဝမ်သည် မုန့်ချင်းရွှယ်၏ ရုန်းကန်မှုကို အေးစက်စွာ ကြည့်နေပြီးနောက် သူမ၏ လက်ချောင်းများကြားမှ ဓားအဆောင်ကို လှမ်းယူလိုက်လေပေသည်။ သူမတွင် ကျန်ရှိနေသော နောက်ဆုံး အင်အားကို အသုံးပြုကာ သူမ၏ သိုလှောင်အိတ် ထဲမှ 'သွေးစွမ်းအင်ဆေးလုံး' တစ်ပုလင်းကို ဆွဲထုတ်လိုက်လေသည်။

ထိုဆေးလုံးများကို ပါးစပ်ထဲသို့ တစ်ပြိုင်နက် သွန်းလောင်းကာ သူမ၏ ကျင့်စဉ်ကို ခက်ခက်ခဲခဲ လည်ပတ်စေလျက် ဆေးလုံးအတွင်းရှိ သွေးစွမ်းအားများကို စုပ်ယူလိုက်လေပေ၏။ ဆေးတစ်ပုလင်းလုံးကို အစာကြေညက်အောင် လုပ်ပြီးသည့်နောက်မှသာ သူမ၏ ခေါင်းကိုက်ခြင်းနှင့် ပင်ပန်းနွမ်းနယ်မှုများမှာ အနည်းငယ် သက်သာသွားခဲ့ရလေသည်။

ထို့နောက် မုန့်ဝမ်သည် သူမ၏ သိုလှောင်လက်စွပ်ထဲမှ 'မိစ္ဆာသားရဲ' (Yao Beast) အလောင်းအချို့ကို ထုတ်ယူကာ သန့်စင်လိုက်လေပေသည်။ ကံဆိုးစွာဖြင့် သူမသည် မြူစိမ်းနဂါးကို စုပ်ယူပြီးနောက်တွင် ခန္ဓာကိုယ်ကြံ့ခိုင်မှုနှင့် သွေးစွမ်းအားမှာ အလွန်တရာ မြင့်မားသွားခဲ့သဖြင့် ဤသာမန် အခြေခံစွမ်းအင်အဆင့် မိစ္ဆာသားရဲများမှာ သူမအတွက် များစွာ အသုံးမဝင်တော့ချေ။

မုန့်ဝမ်သည် သူမ၏ အကြည့်ကို မုန့်ချင်းရွှယ်ဆီသို့ ပြန်လည်လှည့်လိုက်လေသည်။ မုန့်ချင်းရွှယ်မှာ အခြေခံတည်ဆောက်ခြင်းအဆင့် ကျင့်ကြံသူ ဖြစ်သည့်အတိုင်း သွေးယဇ်ပူဇော်မှုကျင့်စဉ်ဖြင့် အားဖြည့်ထားသော ဝိညာဉ်ခွဲအပ်ကို တိုက်ရိုက်ထိမှန်ခဲ့သော်လည်း သေဆုံးခြင်း မရှိသေးပေ။ သို့သော် ဝိညာဉ်အာရုံမှာ ပြင်းထန်စွာ ပျက်စီးသွားခဲ့သဖြင့် အသက်တစ်ရှူစာမျှသာ ကျန်ရှိတော့ပြီး သေရန် လက်တစ်ကမ်းအကွာသို့ ရောက်ရှိနေပြီ ဖြစ်ချေ၏။

မုန့်ဝမ်သည် သွေးမိစ္ဆာကောင်းကင်ဘုံကျင့်စဉ်ကို တိုက်ရိုက်လည်ပတ်စေကာ မုန့်ချင်းရွှယ်၏ အသက်သွေးများကို စုပ်ယူသန့်စင်ရန် ပြင်လိုက်လေပေသည်။ အသက်ရှင်နေသော အခြေခံတည်ဆောက်ခြင်းအဆင့် ကျင့်ကြံသူတစ်ဦး၏ သွေးစွမ်းအားမှာ သေပြီးသားလူထက် များစွာ ပိုမိုပြည့်ဝလှပေ၏။ သူမ အသက်မထွက်မီမှာပင် အမြန်သန့်စင်ရပေမည်။

“မုန့်ဝမ်... ငါ့ကို မသတ်ပါနဲ့...”

မုန့်ချင်းရွှယ်သည် တောင်းပန်တိုးလျှိုးသော၊ ကြောက်ရွံ့နေသော မျက်နှာဖြင့် မုန့်ဝမ်ကို ကြည့်လိုက်လေ၏။

“နင့်နောက်ကို လိုက်မနေဖို့ မိသားစုကို ငါ ဖျောင်းဖျပေးပါ့မယ်။ နင့်ကို ဝိညာဉ်ကျောက်တုံးတွေ အများကြီး ပေးပြီး လျော်ကြေးပေးခိုင်းပါ့မယ်။ ဒါတင်မကသေးဘူး... နင်ကျင့်စဉ်ကျင့်ဖို့အတွက် တစ်ကိုယ်တော် ကျင့်ကြံသူ အချို့ကိုတောင် ငါ ဖမ်းပေးပါ့မယ်။ နင် ဘာလိုချင်လဲ ပြောပါ... ငါ အားလုံးပေးပါ့မယ်။ နင့်ရဲ့ ဒေါ်လေးတစ်ယောက် ဖြစ်နေတာကို ထောက်ထားပြီး ငါ့အသက်ကို ချမ်းသာပေးပါ”

မုန့်ဝမ်၏ ကျင့်စဉ်လည်ပတ်မှုမှာ ရပ်တန့်သွားခြင်း မရှိသော်လည်း သူမ၏ မျက်နှာတွင် စိတ်ဝင်စားဟန် ပေါ်လာချေ၏။

“နင် ပြောတာ တကယ်လား...........”