ရရှိမှုများ

အဘိုးအိုသည် အံ့အားသင့်သွားသော်လည်း သူ၏ ဆင်ခြင်တုံတရားကိုမူ လက်မလွှတ်ခဲ့ချေ။

“ပစ္စည်းကို အရင်စစ်ဆေးပါရစေ..”

အခြေခံတည်ဆောက်ခြင်းဆေးလုံး ၏ နာမည်ကျော်ကြားမှုမှာ ကြီးမားလှသဖြင့် လူအတော်များများက ၎င်းကို အသုံးချကာ အမြတ်ထုတ်တတ်ကြပေသည်။ အကွက်ဆင်ခြင်း၊ အတုပြုလုပ်ခြင်း စသည့် နည်းလမ်းမျိုးစုံမှာ အဆုံးမရှိ ပေါ်ထွက်နေခဲ့ချေပြီ။ သို့သော်လည်း အခြေခံတည်ဆောက်ခြင်းဆေးလုံးသည် အခြေခံစွမ်းအင်အဆင့် ကျင့်ကြံသူများအတွက် ဆွဲဆောင်မှု ပြင်းထန်လွန်းလှရာ လိမ်လည်ခံရနိုင်မှန်း သိလျက်နှင့်ပင် အခြေခံတည်ဆောက်ခြင်းအဆင့်သို့ ရောက်ရှိနိုင်မည့် မည်သည့်အခွင့်အရေးကိုမျှ လက်လွတ်မခံဝံ့ကြချေ။

ထိုစကားကို ကြားသောအခါ မုန့်ဝမ်သည် တည်ငြိမ်စွာဖြင့် ဆေးပုလင်းကို ထုတ်ယူကာ အထဲရှိ ဆေးလုံးကို အဘိုးအိုအား ပြသလိုက်လေသည်။ ဤသီးသန့်ခန်းတွင် လူတိုင်း၏ စွမ်းအားကို ခွဲခြားမှုမရှိဘဲ ဖိနှိပ်ထားသည့် တားမြစ်အစီအရင်ရှိနေသဖြင့် မည်သူမျှ ဤနေရာတွင် ရမ်းကားရန် ရွေးချယ်မည်မဟုတ်ချေ။

အဘိုးအို၏ အကြည့်မှာ ဆေးလုံးပေါ်တွင် စွဲထင်နေပြီး သူ၏မျက်နှာတွင် စိတ်လှုပ်ရှားမှုများ တဖြည်းဖြည်း ပေါ်ပေါက်လာခဲ့လေသည်။ သူသည် ယခင်က အခြေခံတည်ဆောက်ခြင်းဆေးလုံးကို အနီးကပ် မြင်ဖူးခဲ့ရာ အရောင်၊ အနံ့နှင့် ပုံသဏ္ဌာန်မှာ ၉၀ ရာခိုင်နှုန်းခန့် အစစ်အမှန်နှင့် တူညီနေပေသည်။ ကျန်ရှိသော ၁၀ ရာခိုင်နှုန်းသော အန္တရာယ်မှာမူ...... ဟဲဟဲ...... ဘယ်အရာကမှ အန္တရာယ်ကင်းတာ ရှိလို့လဲ။ ၁၀ ရာခိုင်နှုန်းသော စွန့်စားမှုအတွက် သူ လောင်းကြေးထပ်ရဲပေသည်။

အဘိုးအိုသည် အသက်ကို ပြင်းပြင်းရှူကာ စိတ်လှုပ်ရှားမှုကို ထိန်းချုပ်လိုက်ပြီး သူ ကြိုတင်ပြင်ဆင်ထားသော သိုလှောင်အိတ်ကို မုန့်ဝမ်ထံ ကမ်းပေးလိုက်လေသည်။ မုန့်ဝမ်က အိတ်ကိုယူကာ အထဲရှိ ပစ္စည်းများကို စစ်ဆေးပြီးနောက် မှန်ကန်ကြောင်း အတည်ပြုပြီးမှ အခြေခံတည်ဆောက်ခြင်းဆေးလုံးကို အဘိုးအိုအား လဲလှယ်ပေးလိုက်လေသည်။

“အရောင်းအဝယ် ပြီးပါပြီ။ ဒီတံခါးကနေ ထွက်သွားတာနဲ့ တစ်ပြိုင်နက် ကျွန်မတို့ကြားမှာ ဘာပတ်သက်မှုမှ မရှိတော့ဘူးနော်။ ရှင် ဒီမှာ ခဏနားဦးမလား.....ဒါမှမဟုတ် တိုက်ရိုက်ပဲ ထွက်သွားမလား.”

အဘိုးအိုက ခေတ္တမျှ စဉ်းစားပြီးနောက် သတိကြီးစွာဖြင့် “အခုပဲ ထွက်သွားပါ့မယ်” ဟု ဆိုလိုက်လေသည်။ အရောင်းအဝယ်တွင် ကျင့်ကြံသူ ခြောက်ဦး ပါဝင်ခဲ့ရာ လေးဦးမှာ ထွက်သွားကြပြီဖြစ်သဖြင့် သူ့ကို စောင့်ကြည့်နေသူ သိပ်မရှိနိုင်တော့ဟု သူ တွက်ဆလိုက်ခြင်း ဖြစ်ပေသည်။

မုန့်ဝမ်သည် သူ ထွက်သွားသည်ကို ကြည့်ရင်း ပြုံးလိုက်မိချေ၏။ ထိုလူများက သူတို့ အမြတ်ရသည်ဟု ထင်နေကြသော်လည်း သူမကမူ လုံးဝ ရှုံးစရာမရှိပေ။ မှန်ပေသည်။ မုန့်ဝမ်၏ အရောင်းအဝယ် ပြုလုပ်သူမှာ ထိုအဘိုးအို တစ်ဦးတည်း မဟုတ်ဘဲ ဤသီးသန့်ခန်းထဲသို့ ဝင်လာသူ အားလုံး ဖြစ်ပေသည်။

သူမတွင် အခြေခံတည်ဆောက်ခြင်းဆေးလုံးအတု တစ်လုံးတည်းသာ ရှိသော်လည်း ပုံရိပ်ယောင်အတတ်ကို အသုံးချကာ အတုအယောင်များကို ဖန်တီးနိုင်ပေသည်။ သူမသည် အခြေခံတည်ဆောက်ခြင်းဆေးလုံးကို ကြိုတင်၍ ခြောက်ပုံပုံထားပြီးနောက် ပုံရိပ်ယောင်ကျင့်စဉ်များဖြင့် သူတို့၏ အာရုံကို လှည့်စားကာ ဆေးလုံးအပြည့်အစုံ ရရှိသွားသည်ဟု ယုံကြည်အောင် လုပ်ဆောင်ခဲ့ခြင်း ဖြစ်ပေသည်။

အကယ်၍ ထိုလူများက ဆေးပုလင်းကို ဖွင့်ပြီး သေချာစွာ စစ်ဆေးမည်ဆိုပါက လိမ်လည်ခံရကြောင်း သိသွားကြပေလိမ့်မည်။ သို့သော် ပြဿနာမှာ ဤမြေအောက် တိုက်ပွဲကွင်းပြင်ကဲ့သို့ လူရှုပ်သော နေရာမျိုးတွင် လူအများ၏ ပစ်မှတ်ထားခြင်းကို ခံရလွယ်ပေသည်။ သူတို့အနေဖြင့် ဤသို့သော နေရာမျိုးတွင် အခြေခံတည်ဆောက်ခြင်းဆေးလုံးကို လူမြင်ကွင်း၌ ထုတ်စစ်ဝံ့ကြပါ့မလား။ သူတို့ မဝံ့ရဲကြသည်မှာ သေချာပေသည်။ သူတို့သည် ဘေးကင်းသည်ဟု ယူဆရသော နေရာသို့ ရောက်မှသာ သေချာစွာ စစ်ဆေးကြပေလိမ့်မည်။

ထိုအချိန်ရောက်လျှင် မုန့်ဝမ်သည် အေးဆေးတည်ငြိမ်သော ကျန်းဝမ်အာအဖြစ်သို့ ပြန်လည် ရောက်ရှိနေခဲ့ပြီ ဖြစ်ပေသည်။ ထန်ဝမ်အာလိမ်လည်ခဲ့သော ကိစ္စများမှာ ကျန်းဝမ်အာနှင့် ဘာသက်ဆိုင်မည်နည်း။

မုန့်ဝမ် တံခါးကို တွန်းဖွင့်လိုက်သည်နှင့် အကြည့်အချို့ သူမဆီသို့ တိုက်ရိုက် ကျရောက်လာခဲ့လေသည်။ ကျင့်ကြံသူ အများစုမှာ တိုက်ပွဲကွင်းပြင်ကို အာရုံစိုက်နေကြသော်လည်း အနည်းငယ်သော သူများမှာမူ အခြေခံတည်ဆောက်ခြင်းဆေးလုံးကို လိုချင်တပ်မက်နေကြဆဲ ဖြစ်ပေသည်။ မုန့်ဝမ်သည် ထိုအကြည့်များကို လျစ်လျူရှုကာ ထွက်ပေါက်ဆီသို့ အရှိန်အဟုန်ဖြင့် လျှောက်သွားခဲ့လေသည်။ ယနေ့ ရည်မှန်းချက် အောင်မြင်ပြီ ဖြစ်သဖြင့် ပြန်ရမည့် အချိန်ရောက်ပြီ ဖြစ်ပေသည်။ နောက်နောင်တွင်လည်း ဤမြေအောက် တိုက်ပွဲကွင်းပြင်သို့ သူမ ထပ်လာတော့မည် မဟုတ်ချေ။

မုန့်ဝမ် ထွက်သွားသည်နှင့် လူရိပ်အချို့ကလည်း သူမနောက်သို့ တစ်ဦးပြီးတစ်ဦး လိုက်ပါသွားကြလေသည်။ မုန့်ဝမ်၏ အမူအရာမှာ ပြောင်းလဲခြင်း မရှိသော်လည်း ခြေလှမ်းကိုမူ မသိမသာ မြှင့်လိုက်လေသည်။ သူမနောက်မှ လိုက်လာသူများကလည်း အရှိန်မြှင့်လိုက်ကြချေပြီ။ သူတို့၏ မျက်လုံးထဲတွင် မုန့်ဝမ်မှာ အသားအဆီ ပြည့်ဝနေသော သိုးသူငယ်တစ်ကောင်အလား ဖြစ်နေပေသည်။ သူမတွင်ရှိသော ဆေးလုံးမှာ ရောင်းထွက်သွားပြီ ဆိုသော်လည်း ဆေးလုံးရောင်းရ၍ ရရှိလာသော ပစ္စည်းများမှာလည်း အလားတူပင် ဆွဲဆောင်မှု ရှိနေပေသည်။

သို့သော် မျက်တောင်တစ်ခတ်အတွင်းမှာပင် မုန့်ဝမ်၏ ပုံရိပ်မှာ သူတို့၏ မျက်စိရှေ့တွင်တင် လေထဲ၌ ပျောက်ကွယ်သွားခဲ့လေတော့သည်။ ထိုလူများမှာ မျက်မှောင်ကြုတ်သွားကြပြီး လူရိပ်များကို ဖုံးကွယ်မနေတော့ဘဲ ကွင်းပြင်အပြင်ဘက်သို့ ပြေးထွက်ကာ ဘယ်ညာ လှည့်ပတ်ရှာဖွေကြသော်လည်း မုန့်ဝမ်၏ အရိပ်အယောင်ကိုပင် မတွေ့ရတော့ချေ။

နာရီဝက်ခန့် ကြာပြီးနောက် မုန့်ဝမ်သည် အရှိန်အဝါဖုံးလွှမ်းသည့် ဝတ်ရုံ၏ အကာအကွယ်ဖြင့် ရှန်မောင်နှမများ ငှားရမ်းထားသော ဟောင်းနွမ်းသည့် အိမ်ရာဝင်းထဲသို့ ပြန်ရောက်လာခဲ့လေသည်။ ယခုမှာ နံနက် ၇ နာရီ ၄၅ မိနစ် ရှိနေပြီဖြစ်ရာ မကြာမီ မိုးလင်းတော့မည် ဖြစ်ပေသည်။ သူမ၏ လှုပ်ရှားမှုများက ရှန်မောင်နှမများကို မနှောင့်ယှက်မိကြောင်း အတည်ပြုပြီးနောက် မုန့်ဝမ်သည် အနောက်ဘက် အခန်းသို့ ပြန်ဝင်ခဲ့လေသည်။

အခန်းထဲတွင် အကာအကွယ်နှင့် အထီးကျန်စေသော အစီအရင်အချို့ကို တပ်ဆင်ပြီးနောက် သူမသည် ယနေ့ရရှိလာသော ပစ္စည်းများကို စတင် စစ်ဆေးလေတော့သည်။

ပထမဆုံးအနေဖြင့် ကံဆိုးသူ ရှုမ်းချန်းထံမှ ရရှိသည့် ပစ္စည်းများ ဖြစ်ပေသည်။ အရည်အသွေးမြင့် ဝိညာဉ်လက်နက် “ရေခဲဝိညာဉ်ဓား”၊ ဝိညာဉ်ကျောက်တုံး ခုနစ်ထောင်ခန့်၊ အရည်အသွေးနိမ့် ခန္ဓာကိုယ်ကျင့်ကြံခြင်း ကျင့်စဉ်တစ်ခု၊ ဆေးလုံးအချို့၊ ကုန်ကြမ်းများနှင့် တခြားသော အထွေထွေ ပစ္စည်းများ ဖြစ်ပေသည်။ ထို့ပြင် ရှုမ်းချန်း၏ အလောင်းလည်း ပါဝင်ပေသည်။ မုန့်ဝမ်သည် အလောင်းကို ထိုနေရာမှာတင် သန့်စင်လိုက်ရာ သူမ၏ သွေးစွမ်းအင်မှာ အနည်းငယ် ပြန်လည် ပြည့်ဝလာခဲ့လေသည်။

အသုံးဝင်သော ပစ္စည်းများကို ခွဲခြားသိမ်းဆည်းပြီး အသုံးမလိုသည်များကို သိုလှောင်အိတ်တစ်ခုထဲသို့ စုထည့်လိုက်ပြီးနောက် ယနေ့ည၏ အဓိက အနှစ်သာရများသို့ ရောက်ရှိလာခဲ့လေသည်။ မုန့်ဝမ်သည် သိုလှောင်အိတ် ငါးအိတ်ကို ထုတ်ယူကာ အထဲရှိ ပစ္စည်းအားလုံးကို တစ်ပြိုင်နက် သွန်ချလိုက်လေသည်။

လက်သီးဆုပ်ခန့်ရှိသော ရွှေနီသတ္တုရိုင်း တစ်တုံး၊ သွေးအနှစ်ကျောက်တုံး သုံးတုံး။ မိုးကြိုးမုန်တိုင်း အဆောင် သုံးခုဖြစ်ပြီး တစ်ခုချင်းစီမှာ အခြေခံတည်ဆောက်ခြင်း အစောပိုင်းအဆင့် ကျင့်ကြံသူတစ်ဦး၏ အစွမ်းကုန် တိုက်ခိုက်မှုနှင့် ညီမျှပေသည်။ ဝိညာဉ်စွမ်းအင်များကို ချက်ချင်း ပြန်လည်ပြည့်ဝစေနိုင်သော ထူးခြားသည့် ဝိညာဉ်ကျောက်စိမ်း အဆီအနှစ် ငါးစက်။ အခြေခံတည်ဆောက်ခြင်းအဆင့်ရှိ စွမ်းအင်ထိန်းချုပ်ခြင်း အတတ်ပညာ ပါဝင်သော ကျောက်စိမ်းပေလွှာ တစ်ခု။

ထို့ပြင် မုန့်ဝမ်ကို အစိတ်လှုပ်ရှားစေဆုံး အရာမှာ အခြေခံတည်ဆောက်ခြင်းအဆင့်ရှိ မိစ္ဆာသားရဲ အလောင်း တစ်ခုလုံးပင် ဖြစ်ပေသည်။ ဟန်ယွဲ့မြို့မှာ တကယ့်ကို နေရာကောင်း တစ်ခုပင်...... နှစ်ရက်အတွင်းမှာပင် မုန့်ဝမ်သည် မုန့်ချင်းရွှယ်ကို သတ်စဉ်က ရရှိခဲ့သည်ထက် ပိုမိုများပြားသော ရလဒ်များကို ရရှိခဲ့ချေပြီ။

မုန့်ဝမ်သည် ပစ္စည်းများကို တစ်ခုချင်းစီ သိမ်းဆည်းလိုက်ပြီးနောက် နောက်ဆုံးတွင် စွမ်းအင်ထိန်းချုပ်ခြင်း အတတ်ပညာ မှတ်တမ်းတင်ထားသော ကျောက်စိမ်းပေလွှာ တစ်ခုသာ ကျန်တော့ပေသည်။ စွမ်းအင်ထိန်းချုပ်ခြင်း အတတ်ပညာမှာ ကျင့်ကြံခြင်းလောကတွင် အလွန်ပင် သာမန်ကာလျှံကာ ကျင့်စဉ်တစ်ခု ဖြစ်သော်လည်း ၎င်း၏ နိယာမမှာ အလွန်ပင် ရိုးရှင်းပေသည်။

သတ်မှတ်ထားသော နည်းလမ်းများမှတစ်ဆင့် ခန္ဓာကိုယ်အတွင်းရှိ ဝိညာဉ်စွမ်းအင်များကို ထိန်းချုပ်ကာ ကျင့်ကြံသူ၏ အလိုအတိုင်း စီးဆင်းစေခြင်းဖြင့် မိမိ၏ အရှိန်အဝါကို ထုတ်လွှတ်ခြင်း သို့မဟုတ် ဖုံးကွယ်ခြင်းများကို ပြုလုပ်နိုင်ပေသည်။ အတိုချုပ်ပြောရလျှင် ဤအတတ်ပညာကို သင်ယူခြင်းဖြင့် မိမိ၏ အရှိန်အဝါကို လွတ်လပ်စွာ ထိန်းချုပ်နိုင်ကာ အခြားသူများက မိမိ၏ အဆင့်အစစ်အမှန်ကို မသိနိုင်အောင် ပြုလုပ်နိုင်ခြင်း ဖြစ်ပေသည်။ အဆင့်မြင့်သွားပါက အခြားသော အဆင့်များ၏ အရှိန်အဝါ လှိုင်းများကိုပင် တုပနိုင်မည် ဖြစ်ပေသည်။

မုန့်ဝမ်သည် ဤအရာကို အမြဲတမ်း စိတ်ဝင်စားခဲ့သော်လည်း ယခင်က သူမ ရရှိနိုင်သော ကျင့်စဉ်များမှာ အခြေခံစွမ်းအင်အဆင့် ကျင့်စဉ်များသာ ဖြစ်သဖြင့် နည်းစနစ်များမှာ ကြမ်းတမ်းလှသလို အမှားအယွင်းများလည်း လူမိရန် လွယ်ကူလှပေသည်။ သို့သော် ယခုမူ အခြေခံတည်ဆောက်ခြင်းအဆင့်ရှိ ကျင့်စဉ်ကို ရရှိထားပြီဖြစ်ရာ သူမ သေချာစွာ လေ့လာနိုင်ပေပြီ။

မုန့်ဝမ် ကျောက်စိမ်းပေလွှာကို ယူကာ စစ်ဆေးပြီးနောက် ဘာပြဿနာမျှ မရှိကြောင်း အတည်ပြုပြီးမှ နဖူးပြင်သို့ ကပ်လိုက်လေသည်။ အလင်းဖြူတစ်ခု ကျောက်စိမ်းပေလွှာအတွင်းမှ ထွက်ပေါ်လာပြီး မုန့်ဝမ်၏ နဖူးအတွင်းသို့ ဝင်ရောက်သွားခဲ့လေသည်။ အမွှေးတိုင် တစ်ဝက်စာခန့် ကြာပြီးနောက် မုန့်ဝမ် မျက်လုံးဖွင့်လိုက်ချိန်တွင် သူမလက်ထဲရှိ ကျောက်စိမ်းပေလွှာမှာ အမှုန့်များအဖြစ် ပြောင်းလဲသွားခဲ့ချေပြီ။

သူမသည် လက်ထဲရှိ အမှုန့်များကို အသာအယာ ခါထုတ်လိုက်ရင်း တိုးတိုးလေး ရေရွတ်လိုက်လေသည်။

“အခြေခံတည်ဆောက်ခြင်းအဆင့် နည်းလမ်းဆိုတော့လည်း ဟုတ်သားပဲ...... ကျင့်စဉ်တစ်ခုလုံးကို ကျောက်စိမ်းပေလွှာ အသေးလေးထဲမှာ ချိပ်ပိတ်ထားနိုင်ပြီး အချိန်တိုအတွင်းမှာ အစွမ်းထက်တဲ့ အတတ်ပညာတစ်ခုကို သင်ယူနိုင်စေတာပဲl

ထိုသို့ပြောရင်း မုန့်ဝမ်သည် စိတ်ထဲတွင် ရရှိလာသော နည်းလမ်းများအတိုင်း ခန္ဓာကိုယ်အတွင်းရှိ ဝိညာဉ်စွမ်းအင် ပြောင်းလဲမှုများကို စတင် ခံစားကြည့်လိုက်လေသည်။ ခဏမျှ ခံစားကြည့်ပြီးနောက် သူမ၏ မျက်ခုံးများမှာ အနည်းငယ် ကြုတ်သွားခဲ့လေသည်။ ကျောက်စိမ်းပေလွှာအတွင်းမှ ရှင်းပြချက်များမှာ အလွန်ပင် ရှင်းလင်းသော်လည်း နားလည်ခြင်းနှင့် အမှန်တကယ် ကျင့်ကြံနိုင်ခြင်းမှာ တခြားစီ ဖြစ်ပေသည်။ ဤအခြေခံတည်ဆောက်ခြင်းအဆင့် အတတ်ပညာကို လုံးဝ တတ်မြောက်နိုင်ရန်အတွက်မူ သူမအနေဖြင့် ကြိုးစားလေ့ကျင့်ရန် လိုအပ်ဦးမည်ပင်။