သွေးကန် အထွတ်အမြတ်နယ်မြေ
Vol. 11 Ch. 108
မုန့်ဝမ်သည် အလွန်ပင် စိတ်ဝင်စားသွားဟန်ရှိသော်လည်း သူမ၏ လေသံမှာမူ ဝေခွဲမရဖြစ်နေပေသည်။
“ ဒါတွေကို ကျွန်မ ဘယ်လိုလုပ် လက်ခံနိုင်ပါ့မလဲ...... ဒီလောက် အဖိုးတန်တဲ့ ရတနာတွေကို ကျွန်မအနေနဲ့...... ”
သို့သော် တင်ကွေ့ဟဲကမူ မည်သည့်စကားမျှ မဆိုဘဲ သစ်သားသေတ္တာနှင့် ကြွေပုလင်းကို မုန့်ဝမ်ရှေ့သို့ တိုးပေးလိုက်ရင်း စိတ်ရင်းစေတနာအပြည့်ဖြင့် ပြောလိုက်ပေသည်။
“ ဂျူနီယာမုန့်ဝမ်နဲ့ ငါက ဆုံစည်းခွင့်ရခဲ့တာပဲ၊ ဒါဟာ ရှားပါးတဲ့ ရေစက်တစ်ခုပဲလေ။ ဒါ့အပြင် ဒီကိစ္စမှာ ငါ့ဘက်က အရင်မှားခဲ့တာဆိုတော့ ဒီအသေးအဖွဲ့ ပစ္စည်းလေးတွေကိုတော့ ငြင်းမပယ်ပါနဲ့...... ”
သူ၏ စေတနာကို မငြင်းသာတော့သဖြင့် မုန့်ဝမ်သည် နောက်ဆုံးတွင် မြေဓာတ်ဝါ အဆီအနှစ်နှင့် သံမဏိခန္ဓာသန်မာဆေးလုံးတို့ကို လက်ခံလိုက်ပေသည်။ သူမသည် ကျေးဇူးတင်လွန်းသဖြင့် မျက်ရည်ဝဲနေသည့်အလား တင်ကွေ့ဟဲကို အလေးအနက် ဂါရဝပြုလိုက်၏။
“ စီနီယာတင်ကို ကျေးဇူးအထူးတင်ပါတယ်...... အခြေခံတည်ဆောက်ခြင်းအတွက် သင့်တော်တဲ့နေရာ ရှာတွေ့တာနဲ့ ကျွန်မ ချက်ချင်းပဲ အခြေခံတည်ဆောက်ခြင်းအဆင့်ကို တက်လှမ်းဖို့ တံခါးပိတ်ကျင့်ကြံတော့မှာပါ ”
တင်ကွေ့ဟဲသည် ကျေနပ်စွာ ခေါင်းညိတ်လိုက်ပြီး ဘာမှမဟုတ်သလိုမျိုး မေးလိုက်ပေသည်။
“ အခြေခံတည်ဆောက်ခြင်းအတွက် ဘယ်လိုကျင့်စဉ်မျိုးကို သုံးဖို့ ပြင်ဆင်ထားလဲ ”
မုန့်ဝမ်က “ ကျွန်မက သွေးလမ်းစဉ်ကျင့်စဉ်ကို ကျင့်ကြံနေတာပါ ” ဟု ပြန်ဖြေလိုက်၏။
တင်ကွေ့ဟဲသည် ခေါင်းတငြိမ့်ငြိမ့်လုပ်ရင်း သူ၏ အသိပညာကြွယ်ဝမှုနှင့် ဖော်ရွေမှုကို ပြသရန်အတွက် စေတနာရှေ့ထား၍ အကြံပေးပြန်ပေသည်။
“ ငါတို့ရဲ့ ရွှမ်ယင်ဂိုဏ်းက တည်ထောင်ခဲ့တာ နှစ်ပေါင်း သောင်းနဲ့ချီနေပြီဖြစ်လို့ အခြေခံအုတ်မြစ်က အလွန်နက်နဲတယ်။ ဂိုဏ်းထဲမှာ အထွတ်အမြတ်နယ်မြေ ခုနစ်ခုရှိပြီး တစ်ခုချင်းစီက မတူညီတဲ့ ကျင့်ကြံခြင်းလမ်းစဉ်တွေနဲ့ သက်ဆိုင်ကြတာ။
ဂျူနီယာညီမလေးအနေနဲ့ အခြေခံတည်ဆောက်ခြင်း အောင်မြင်နှုန်းကို မြှင့်တင်ချင်ရင် ကိုယ့်ရဲ့ကျင့်စဉ်နဲ့ ကိုက်ညီမယ့် အထွတ်အမြတ်နယ်မြေကို သွားဖို့ စဉ်းစားသင့်တယ် ”
ထိုစကားကို ကြားလိုက်ရသောအခါ မုန့်ဝမ်၏ မျက်ဝန်းများအတွင်း၌ အရောင်တစ်ချက် လက်ခနဲ ဖြစ်သွားပေသည်။
“ စီနီယာအစ်ကို...... သွေးလမ်းစဉ်အတွက် အထွတ်အမြတ်နယ်မြေက ဘယ်မှာရှိတာလဲဆိုတာ ကျွန်မကို ပြောပြပေးနိုင်မလား ”
“ သွေးလမ်းစဉ်အတွက် အထွတ်အမြတ်နယ်မြေကိုတော့ ‘ထျန်းဆန်း သွေးကန်’ လို့ ခေါ်တယ်၊ ထျန်းဆန်းတောင်အတွင်းမှာ ရှိတာပေါ့။ အဲဒီမှာ ဝိညာဉ်စွမ်းအင်တွေ ကြွယ်ဝရုံတင်မကဘဲ သွေးအရှိန်အဝါကလည်း အလွန်ထူထပ်တယ်။ သွေးလမ်းစဉ်ကျင့်စဉ်ကို ကျင့်ကြံတဲ့သူတစ်ယောက်အတွက်တော့ အခြေခံတည်ဆောက်ခြင်းအတွက် အလွန်ကောင်းမွန်တဲ့နေရာပဲ...... ဒါပေမဲ့...... ”
“ ဒါပေမဲ့ ဘာဖြစ်လို့လဲရှင့် ” မုန့်ဝမ်က အလျင်အမြန်ပင် ထပ်မံမေးမြန်းလိုက်ပေသည်။
တင်ကွေ့ဟဲက ခက်ခဲနေဟန်ဆောင်လိုက်ရင်း “ ကိုယ်ပိုင် သွေးကန်ငယ်တစ်ခုထဲကို ဝင်ဖို့အတွက် ဝိညာဉ်ကျောက်တုံး တစ်သိန်း ပေးဆောင်ရမယ်။ အဲဒါက မနည်းလှတဲ့ ပမာဏပဲလေ။ သာမန် အခြေခံတည်ဆောက်ခြင်းအဆင့် ကျင့်ကြံသူတစ်ယောက်တောင် အဲဒီပမာဏကို တတ်နိုင်ဖို့ မလွယ်ဘူး ”
မုန့်ဝမ်သည် စဉ်းစားဟန်ပြုလိုက်ပေသည်။
“ စီနီယာပြောပုံအရဆိုရင် ကိုယ်ပိုင်သွေးကန်ငယ်တွေအပြင် တခြားသူတွေနဲ့ မျှဝေသုံးစွဲလို့ရတဲ့ သွေးကန်တွေလည်း ရှိတာပေါ့ ”
“ ရှိတာပေါ့...... မျှဝေသုံးစွဲမယ်ဆိုရင်တော့ အနည်းဆုံး ဝိညာဉ်ကျောက်တုံး တစ်သောင်းပဲ ကုန်ကျမှာ။ ဒါပေမဲ့ ဂျူနီယာမုန့်ဝမ်...... မင်းက အခြေခံတည်ဆောက်ခြင်းအဆင့်ကို တက်လှမ်းဖို့ ကြိုးစားမှာဆိုတော့ တခြားသူတွေနဲ့ မျှဝေသုံးစွဲလို့ မရဘူး။
ပထမအချက်က အခြေခံတည်ဆောက်ခြင်း ပြုလုပ်နေတဲ့သူတွေဟာ ပြင်ပနှောင့်ယှက်မှုတွေကို အလွယ်တကူ ခံရတတ်ပြီး အဲဒါက ကျရှုံးမှုဆီကို ဦးတည်သွားနိုင်တယ်။ ဒုတိယအချက်ကတော့ လျှပ်စီးကပ်ဘေးဒုက္ခ ကျရောက်လာတဲ့အခါ တခြားသူတွေရဲ့ ကျင့်ကြံမှုကိုပါ ထိခိုက်စေနိုင်လို့ပဲ ”
မုန့်ဝမ်က နှုတ်ဆိတ်နေသည်ကို မြင်သောအခါ တင်ကွေ့ဟဲ၏ မျက်ဝန်းများအတွင်း၌ လှောင်ပြောင်ရိပ်တစ်ခု ဖြတ်ပြေးသွားပြီး ရက်ရောလှသည့်အလား ပြောလိုက်ပြန်ပေသည်။
“ ဂျူနီယာမုန့်ဝမ်...... စိတ်မပျက်ပါနဲ့ဦး။ ငါ သိတဲ့ နေရာကောင်းတစ်ခု ရှိပါသေးတယ်။ အထွတ်အမြတ်နယ်မြေလောက် မကောင်းပေမဲ့ အားသာချက်ကတော့ ဝိညာဉ်ကျောက်တုံးတွေ အပိုပေးစရာ မလိုတာပဲ။ သာမန်လူတွေဆိုရင် အဲဒီမှာ အခြေခံတည်ဆောက်ခြင်း ပြုလုပ်ခွင့်ရဖို့တောင် မလွယ်ဘူး။ ဒါပေမဲ့ အဲဒီနေရာက ပိုင်ရှင်နဲ့ ငါက မိတ်ဆွေကောင်းတွေမို့ မင်းအတွက် ငါ စီစဉ်ပေးလို့ ရတယ် ”
“ စီနီယာအစ်ကိုရဲ့ စေတနာကို ကျေးဇူးတင်ပါတယ်။ ဒါပေမဲ့ ကျွန်မအတွက်တော့ သွေးကန် အထွတ်အမြတ်နယ်မြေက ပိုပြီး သင့်တော်မယ်လို့ ထင်တယ် ”
မုန့်ဝမ်သည် အသာအယာ ပြုံးလိုက်ရင်း တင်ကွေ့ဟဲ၏ "စေတနာ" ကို ငြင်းပယ်လိုက်ပေသည်။ တင်ကွေ့ဟဲမှာ အံ့အားသင့်သွားကာ မသိစိတ်ဖြင့် ပြောလိုက်မိ၏။
“ အဲဒါ ဝိညာဉ်ကျောက်တုံး တစ်သိန်းတောင် ကုန်မှာလေ...... ”
“ စီနီယာရွှယ်လျန်ကျိရဲ့ ရက်ရောမှုကြောင့် ဒီအတောအတွင်းမှာ ကျွန်မ ဝိညာဉ်ကျောက်တုံးအချို့ စုဆောင်းထားမိတာ ရှိပါတယ်။ ကျွန်မဆီမှာ ရှိတာလေးအချို့ကို ပြန်ရောင်းပြီး အသိဟောင်းတွေဆီက သောင်းဂဏန်းလောက် ချေးငှားလိုက်ရင်တော့ လောက်ငသွားမှာပါ ”
ထိုစကားကို ကြားလိုက်ရသောအခါ တင်ကွေ့ဟဲသည် စိတ်ထဲမှ ကြိတ်၍ ညည်းတွားမိပေသည်။ သူ၏ မူလရည်ရွယ်ချက်မှာ စကားအဖြစ်သာ ပြောလိုက်ခြင်းဖြစ်သော်လည်း မုန့်ဝမ်က အထွတ်အမြတ်နယ်မြေသို့ တကယ်သွားရန် ပြင်ဆင်လိမ့်မည်ဟု မမျှော်လင့်ထားပေ။
သူ အနည်းငယ် နောင်တရသွားမိပေသည်။ တကယ်လို့ ဒါကို ကြိုသိခဲ့လျှင် အထွတ်အမြတ်နယ်မြေအကြောင်း ပြောပြမိမှာ မဟုတ်ပေ။
အခုတော့ ဒီမိန်းကလေးရဲ့ ဝိညာဉ်ကျောက်တုံးတွေ အလကား ကုန်တော့မှာပဲ။ သူမ သေသွားပြီးရင် ဒီဝိညာဉ်ကျောက်တုံးတွေက ငါ့ပစ္စည်းတွေ ဖြစ်လာရမှာကို......။
တင်ကွေ့ဟဲက မချိပြုံးဖြင့် ထပ်မံ အကြံပေးလိုက်၏။
“ ဂျူနီယာမုန့်ဝမ်...... နောက်တစ်ကြိမ်လောက် ပြန်စဉ်းစားပါဦး။ မင်းရဲ့ ဂိုဏ်းတူညီအစ်ကိုတွေက ဝိညာဉ်ကျောက်တုံးတွေ အလွယ်တကူ ချေးငှားပေးချင်မှ ပေးကြမှာနော် ”
သို့သော် မုန့်ဝမ်ကမူ ခပ်ဖွဖွ ပြုံးလိုက်ရုံသာ ပြုပေသည်။
“ မကြိုးစားကြည့်ဘဲနဲ့ ဘယ်သိနိုင်မှာလဲ...... ”
ထိုသို့ ပြောပြီးနောက် သူမသည် ချက်ချင်း မတ်တပ်ရပ်ကာ လက်အုပ်ချီ နှုတ်ဆက်လိုက်ပြီး “ စီနီယာအစ်ကိုရဲ့ လမ်းညွှန်မှုအတွက် ကျေးဇူးတင်ပါတယ်။ ကျွန်မ ဝိညာဉ်ကျောက်တုံးတွေ သွားစုဆောင်းလိုက်ပါဦးမယ် ” ဟု ဆိုကာ ထွက်ခွာသွားလေတော့၏။
တင်ကွေ့ဟဲမှာ မုန့်ဝမ်ကို ဆက်လက် ဖျောင်းဖျရန် ပါးစပ်ဟလိုက်သော်လည်း သူမ၏ ဆုံးဖြတ်ချက်က ခိုင်မာလွန်းနေပေသည်။ ထွက်ခွာသွားသော သူမ၏ ကျောပြင်ကို ကြည့်ရင်း သူသည် သက်ပြင်းသာ ချနိုင်တော့ပေသည်။
“ ထားလိုက်ပါတော့...... သူမကို သေတွင်းထဲ ရောက်အောင် လှည့်စားနိုင်ရင်ပဲ တန်ပါတယ်။ ဘာပဲဖြစ်ဖြစ် အဲဒီမြေဓာတ်ဝါ အဆီအနှစ်က သိပ်တန်ဖိုးရှိတာ မဟုတ်ဘူး၊ သံမဏိခန္ဓာသန်မာဆေးလုံးကလည်း ငါကိုယ်တိုင် ဖော်စပ်ထားတာပဲ။
သူမသာ အခြေခံတည်ဆောက်ခြင်းအတွင်းမှာ သေသွားရင် ရွှယ်လျန်ကျိ ပြန်လာတဲ့အခါ ငါ့ကို အပြစ်တင်စရာ အကြောင်းမရှိတော့ဘူး ”
မုန့်ဝမ် ထွက်လာပြီးနောက် နှလုံးစားပိုးကောင်က သူမ၏ စိတ်ထဲတွင် ဆူညံစွာ အော်ဟစ်လေတော့သည်။
“ သခင်မ...... အဲဒီလူယုတ်မာက မကောင်းတဲ့ ရည်ရွယ်ချက်တွေ ရှိနေတာပဲ။ သူ့ကို ဘာလို့ အဲဒီလောက် အလွယ်တကူ လွှတ်ပေးလိုက်ရတာလဲ ”
မုန့်ဝမ်၏ မျက်နှာထားမှာ ပြောင်းလဲခြင်း မရှိပေ။ တင်ကွေ့ဟဲကို သတ်ရန်မှာ သူမအတွက် မခက်ခဲသော်လည်း သူမ၏ လက်ရှိ အဆင့်အတန်းမှာ ဝေယျာဝစ္စဆောင်ရွက်ပေးရသူမျှသာ ဖြစ်ပေသည်။ ဝေယျာဝစ္စဆောင်ရွက်ပေးရသူတစ်ဦးက အခြေခံတည်ဆောက်ခြင်းအဆင့် ကျင့်ကြံသူကို သတ်လိုက်ခြင်းသည် အထက်အကြီးအကဲများ၏ စူးစမ်းလိုစိတ်နှင့် အာရုံစိုက်မှုကို ခံရမည်မှာ သေချာပေသည်။
“ ငါ့ရှေ့မှာ အခြေခံတည်ဆောက်ခြင်းဆိုတဲ့ အရေးကြီးတဲ့ အလုပ်ရှိနေတာပဲ။ ဒီလို ပုရွက်ဆိတ်တစ်ကောင်ကြောင့် ဘာလို့ အရှုပ်အထွေးတွေ အဖြစ်ခံရမှာလဲ...... ”
နှလုံးစားပိုးကောင်သည် မုန့်ဝမ်၏ ဆိုလိုရင်းကို ချက်ချင်း နားလည်သွားပေသည်။
“ ဟွန့်...... သူ့ကို သက်ညှာပေးလိုက်တာပဲ။ သူ့ကို နောက်ထပ် ရက်အနည်းငယ်လောက် အသက်ဆက်ခွင့် ပေးထားလိုက်ဦးမယ် ”
မုန့်ဝမ်သည် တင်ကွေ့ဟဲ၏ နန်းဆောင်မှ ထွက်ခွာလာပြီး ကျန်းလင်းထံမှ အချက်အလက်များကို အတည်ပြုပြီးနောက် ထျန်းဆန်းတောင်သို့ တိုက်ရိုက် ဦးတည်သွားလေတော့၏။ ဝိညာဉ်ကျောက်တုံးများ စုဆောင်းနေရန် မလိုပေ။
ကျင့်ကြံသူ အများအပြား၊ အထူးသဖြင့် ရှန်မိသားစုမှ ဦးလေးနှင့် တူဖြစ်သူတို့ကို ဓားပြတိုက်ခဲ့ပြီးနောက် သူမ၏ ဝိညာဉ်ကျောက်တုံး ပမာဏမှာ နှစ်သိန်းနီးပါးအထိ ရှိနေပြီ ဖြစ်ပေသည်။ သူမသည် သာမန် အခြေခံတည်ဆောက်ခြင်းအဆင့် ကျင့်ကြံသူတစ်ဦးထက်ပင် ပိုမို ကြွယ်ဝနေလေသည်။
နာရီအနည်းငယ် ကြာပြီးနောက် မုန့်ဝမ်သည် ထျန်းဆန်းတောင်ခြေသို့ ရောက်ရှိလာခဲ့၏။ ထျန်းဆန်းတောင်သည် ဆက်တိုက် တည်ရှိနေသော တောင်ထိပ် ကိုးခုဖြင့် ဖွဲ့စည်းထားပေသည်။ အဝေးမှ ကြည့်လျှင် ထိုခမ်းနားထည်ဝါသော တောင်မြင့်ကြီး ကိုးခုသည် တိမ်တိုက်များထဲသို့ ထိုးဖောက် ဝင်ရောက်နေပြီး ခန့်ညားထည်ဝါသော အရှိန်အဝါများကို ထုတ်လွှတ်နေပေသည်။
သွေးရောင်မြူခိုးများက တောင်တန်းကြီးကို လွှမ်းခြုံထားပေသည်။ ပထမတောင်ထိပ်မှ ကိုးခုမြောက်အထိ သွေးမြူခိုးများမှာ ပိုမို ထူထပ်လာပြီး ၎င်းမှ ထုတ်လွှတ်သော ဖိအားနှင့် သွေးအရှိန်အဝါများမှာလည်း ပိုမို ပြင်းထန်လာပေသည်။
မုန့်ဝမ်သည် အကြည့်ကို ရုပ်သိမ်းလိုက်ကာ ပထမတောင်ထိပ်ဆီသို့ လျှောက်လှမ်းသွားပေသည်။ တောင်ခြေတွင် စောင့်ကြပ်နေသော အခြေခံတည်ဆောက်ခြင်းအဆင့် ကျင့်ကြံသူက သူမကို တားဆီးကာ မေးမြန်းလိုက်၏။
“ ဘာကိစ္စနဲ့ လာတာလဲ ”
“ ကျွန်မက ဝေယျာဝစ္စဆောင်ရွက်ပေးရသူ မုန့်ဝမ်ပါ။ သွေးကန်ထဲမှာ အခြေခံတည်ဆောက်ခြင်း ပြုလုပ်ဖို့ လာတာပါ ”
မုန့်ဝမ်က ပြောပြောဆိုဆိုဖြင့် ခါးရှိ သစ်သားပြားကို ထုတ်ယူကာ တစ်ဖက်လူထံသို့ ကမ်းပေးလိုက်ရင်း ရိုသေစွာ ပြောလိုက်ပေသည်။
“ စီနီယာ...... ကြည့်ပါ........၊ ဒါက ကျွန်မရဲ့ အထောက်အထားပါ ”
စစ်ဆေးပြီးနောက် ပြဿနာမရှိသဖြင့် အခြေခံတည်ဆောက်ခြင်းအဆင့် ကျင့်ကြံသူက သစ်သားပြားကို သူမထံသို့ ပြန်ပေးလိုက်၏။
“ သွေးကန်ထဲမှာ အခြေခံတည်ဆောက်ခြင်း ပြုလုပ်ဖို့ဆိုရင် သီးခြား သွေးကန်ငယ်တစ်ခုမှာ တစ်လကြာ နေထိုင်ဖို့အတွက် ဝိညာဉ်ကျောက်တုံး တစ်သိန်း ပေးဆောင်ရမယ် ”
မုန့်ဝမ်သည် ပြင်ဆင်ထားသော ဝိညာဉ်ကျောက်တုံးများကို ပေးအပ်လိုက်ပြီး အလိုက်တသိဖြင့် ဝိညာဉ်ကျောက်တုံး ငါးထောင်ကိုလည်း အပို ထည့်ပေးလိုက်ပေသည်။ အခြေခံတည်ဆောက်ခြင်းအဆင့် ကျင့်ကြံသူသည် သိုလှောင်အိတ်ကို ကြည့်လိုက်သည်နှင့် သူ၏ မျက်နှာပေါ်ရှိ အရေးအကြောင်းများမှာ ချက်ချင်း ပြေလျော့သွားကာ မျက်ဝန်းများတွင် အပြုံးရိပ်များ ပြည့်နှက်သွားလေတော့၏။
သူသည် သွေးရောင်တိုကင်တစ်ခုကို ထုတ်ယူကာ မုန့်ဝမ်ထံသို့ ကမ်းပေးရင်း တိုးတိုးတိတ်တိတ် ပြောလိုက်ပေသည်။
“ သီအိုရီအရတော့ သွေးကန်ငယ်တိုင်းဟာ ပင်မသွေးကန်ကြီးနဲ့ ဆက်သွယ်ထားပြီး အားလုံးက အရင်းအမြစ် အတူတူရကြတာပဲ။ ဒါပေမဲ့ လက်တွေ့မှာတော့ ပင်မသွေးကန်နဲ့ ပိုနီးတဲ့နေရာက သွေးအရှိန်အဝါကို ပိုပြီး မြန်မြန်ဆန်ဆန် ရရှိနိုင်တယ်။ ငါ မင်းအတွက် ရွေးပေးလိုက်တဲ့ သွေးကန်ငယ်က ပင်မသွေးကန်နဲ့ အနီးဆုံးနေရာတွေထဲက တစ်ခုပဲ ”
နှလုံးစားပိုးကောင်၏ အကူအညီအရ သူပြောသမျှမှာ အမှန်ပင် ဖြစ်ပေသည်။ မုန့်ဝမ်သည် စိတ်ထဲမှ သက်ပြင်းချလိုက်မိ၏။ ဤဝိညာဉ်ကျောက်တုံး ငါးထောင်မှာ အလဟဿ မဖြစ်သွားချေ။
သူမသည် သွေးရောင်တိုကင်ကို ကျေးဇူးတင်စွာ လက်ခံလိုက်ရင်း အသံကို နှိမ့်၍ ပြောလိုက်ပေသည်။
“ စီနီယာကို ကျေးဇူးအထူးတင်ပါတယ်...... ”
အခြေခံတည်ဆောက်ခြင်းအဆင့် ကျင့်ကြံသူသည် နားလည်မှုရှိစွာ ပြုံးလိုက်ပေသည်။
“ သွေးကန်ထဲကို ဝင်မယ့်သူတိုင်း မှတ်ထားရမှာက သွေးကန်ထဲက သွေးရေတွေကို ကျင့်ကြံဖို့အတွက်ပဲ သုံးရမယ်၊ အပြင်ကို ယူသွားလို့ မရဘူး။ ချိုးဖောက်တဲ့သူကို သွေးကန်ရဲ့ နစ်နာမှုအတွက် ဝိညာဉ်ကျောက်တုံး ဆယ်ဆ လျော်ကြေးပေးဆောင်စေမယ့်အပြင် အထွတ်အမြတ်နယ်မြေကနေ ထာဝရ နှင်ထုတ်ခံရမယ် ”
ပြောပြီးနောက် သူသည် မုန့်ဝမ်ကို ထျန်းဆန်းတောင်၏ ပထမတောင်ထိပ်အတွင်းသို့ ဝင်ရောက်ခွင့် ပြုလိုက်လေသည်။