အခန်း (၂၁၈)

ယွင်မောင်နှမနှစ်ဦး ထိပ်တိုက်ရင်ဆိုင်နေကြပြီဖြစ်ရာ အခြေအနေမှာ အလွန်ဆိုးရွားနေကြောင်း ရိပ်မိသွားသော စားသောက်ဆိုင်ပိုင်ရှင်သည် ဆိုင်ကို အမြန်ပိတ်လိုက်ပြီး ဧည့်သည်များကိုလည်း လူစုခွဲလိုက်တော့သည်။ အပေါ်ထပ်ရှိ သီးသန့်ခန်းအချို့မှာမူ တိတ်ဆိတ်နေဆဲဖြစ်သော်လည်း ဆိုင်ရှင်မှာမူ ထိုအရာများကို ဂရုမစိုက်နိုင်တော့ဘဲ စားပွဲထိုးအချို့နှင့်အတူ ကောင်တာအောက်တွင် ငြိမ်သက်စွာ ပုန်းအောင်းနေရရှာသည်။

"သူ့ကို ဖမ်းလိုက်စမ်း..."

ယန်ချန်းရွှယ်က ဟိန်းဟောက်လိုက်သော်လည်း စကားတစ်ခွန်းလုံးပင် ဆုံးအောင် မပြောနိုင်လိုက်ပေ။ သူမ၏ သိုင်းဝိညာဉ်ကိုပင် အပြည့်အဝ ထုတ်ဖော်ခွင့်မရသေးမီမှာပင် သူမ၏ ခြေထောက်အောက်ရှိ မြေပြင်မှာ တုန်ခါသွားသည်ကို ခံစားလိုက်ရသည်။

သိုင်းပညာရှင်တစ်ဦး၏ ဗီဇအရ မြေအောက်တွင် တစ်စုံတစ်ခု မှားယွင်းနေပြီဖြစ်ကြောင်း ယန်ချန်းရွှယ် သိလိုက်သည်။ ထိုစဉ်မှာပင် သူမသည် ဟိုမှော်ဆရာမလေးက သူမ၏ မှော်တောင်ဝှေးကို အပေါ်သို့ မြှောက်တင်ထားသည်ကို မြင်လိုက်ရသည်။

သူမက မှော်ပညာကို ဒီလောက်မြန်မြန် သုံးလိုက်နိုင်ပြီလား။

ဗုန်း….

စားသောက်ဆိုင်၏ ကြမ်းပြင်အုတ်ကြွပ်များမှာ လွင့်စင်သွားပြီး ကြမ်းပြင်အောက်မှနေ၍ မြှားများအလား မြန်ဆန်လှသော ရေနွေးငွေ့တန်းများ ပန်းထွက်လာသည်။ ထိုရေနွေးငွေ့များသည် အရှိန်အဟုန်ဖြင့် စုစည်းကာ လိမ်ယှက်သွားပြီးနောက် နောက်ဆုံးတွင် အပြာရောင် ရေနဂါးပတ်ကြီးတစ်ကောင်အဖြစ် ပြောင်းလဲသွားတော့သည်။

ယန်ချန်းလန်မှာလည်း မှင်သက်သွားရသည်။ သူ၏ဘေးတွင် ရပ်နေသော ယွင်ရှန်းမှာ မှော်တောင်ဝှေးကို ကိုင်ဆောင်ထားပြီး သူမ၏ နှုတ်ခမ်းနီနီလေးများမှာ မန္တန်တစ်ခုကို တိုးညှင်းစွာ ရွတ်ဆိုနေသည်ကို သူ မြင်လိုက်ရသည်။

ထိုရေနဂါးပတ်ကြီးထံမှ ထွက်ပေါ်လာသော ထူထပ်လှသော ရေမှော်စွမ်းအင်များ၏ အရှိန်အဝါအောက်တွင် စစ်သူကြီးအိမ်တော်မှ ကိုယ်ရံတော်များမှာ ပုရွက်ဆိတ်ငယ်များအလား သေးငယ်သွားတော့သည်။ နဂါးပတ်ကြီးသည် လေထဲတွင် ခွေပတ်လိုက်ပြီးနောက် ၎င်း၏ ပါးစပ်မှနေ၍ ဖျော့တော့သော အပြာရောင် အစင်းကြောင်းများကို မှုတ်ထုတ်လိုက်သည်။

စည်ပိုင်းတစ်ခုအလား ထွားကြိုင်းလှသော ထိုရေနဂါးပတ်ကြီးသည် ၎င်း၏ ကျယ်လောင်လှသော ပါးစပ်ကြီးကို ဖွင့်ကာ ဟိန်းဟောက်လိုက်ပြီး အမြီးဖြင့် တစ်ချက်ဝှေ့ယမ်းလိုက်ရာ စစ်သူကြီးအိမ်တော်မှ ကိုယ်ရံတော်အချို့မှာ အတင်းအဓမ္မ ပတ်ချည်ခြင်းကို ခံလိုက်ရတော့သည်။

အလယ်အလတ်အဆင့် မှော်အတတ်ဖြစ်သော ရေနဂါးပတ်အသွင်ပြောင်း ချည်နှောင်ခြင်းပင်။

ထိုရေနဂါးပတ်ကြီး၏ ခွန်အားမှာ အလွန်ပင် ကြီးမားလှပြီး ကီလိုဂရမ် ငါးရာခန့် ရှိသည်။ ပြင်းထန်လှသော ရေမှော်စွမ်းအင်များနှင့်အတူ ကိုယ်ရံတော်အချို့၏ နံရိုးများကို ချက်ချင်းပင် ချေမွပစ်လိုက်ရာ ၎င်းတို့မှာ နာကျင်လွန်းသဖြင့် အသနားခံကာ အော်ဟစ်နေကြရတော့သည်။

တောက် ဒီမှော်ဆရာမလေးရဲ့ စွမ်းအားက ဒီလောက်တောင် ကြောက်ဖို့ကောင်းတာလား။

အလယ်အလတ်အဆင့် မှော်အတတ်ဖြစ်သော ဤရေနဂါးပတ်ကို မျက်တောင်တစ်ခတ်အတွင်း ဖန်တီးနိုင်သည်ဆိုပါက သူမ၏ စွမ်းအားမှာ အနည်းဆုံး မှော်ဆရာကြီးအဆင့်မှာ ရှိနေရမည်ဖြစ်သည်။

ဤအချိန်တွင် ယန်ချန်းရွှယ်သည် အခြေအနေမဟန်တော့ကြောင်း သိလိုက်သဖြင့် အပေါ်သို့ ခုန်တက်ကာ မလှမ်းမကမ်းတွင်ရှိသော ဟွမ်ချွဲကို ဦးတည်လိုက်သည်။ ထိုမိန်းကလေးကို ဖမ်းဆီးနိုင်ပါက ယွင်ရှန်းကို အကြပ်ကိုင်နိုင်မည်ဟု သူမ တွေးတောလိုက်ခြင်း ဖြစ်သည်။ သို့သော် ယန်ချန်းရွှယ်သည် ယွင်ရှန်းကို အထင်သေးခဲ့မိသည်။ ယွင်ရှန်းသည် ဟွမ်ချွဲကို အသုံးချကာ သူမကို ခြိမ်းခြောက်ရန် ကြံစည်နေသည့် ယန်ချန်းရွှယ်၏ အကြံကို ကြိုတင်ရိပ်မိနေခဲ့သည်။

ထောင်လွှားလှသော ရေနဂါးပတ်ကြီးမှာ ရုတ်တရက် လှုပ်ရှားလာပြီး ၎င်း၏ ကြီးမားလှသော ကိုယ်ထည်ကြီးမှာ ရေသက်တံ့တစ်ခုအလား ယန်ချန်းရွှယ် ဆင်းသက်မည့်နေရာသို့ အရှိန်အဟုန်ဖြင့် ပြေးဝင်သွားတော့သည်။

ဤစိုးရိမ်စရာကောင်းသော အခိုက်အတန့်တွင် ယန်ချန်းရွှယ်သည် သူမ၏ သိုင်းပညာအခြေခံ ကောင်းမွန်မှုကို ပြသလိုက်နိုင်သည်။ လေထဲတွင်ပင် ခြေဖျားဖြင့် အကြိမ်ကြိမ် ခတ်ကန်ကာ ဆင်းသက်မည့် လမ်းကြောင်းကို ရုတ်တရက် ပြောင်းလဲလိုက်သဖြင့် ရေနဂါးပတ်၏ တိုက်ခိုက်မှုမှ လွတ်မြောက်ကာ ဘေးကင်းရာသို့ ဆင်းသက်နိုင်ခဲ့သည်။

ရေနဂါးပတ်ကြီးမှာမူ အလွန်ပင် ပြင်းထန်လှရာ ဗုန်းခနဲ ကျယ်လောင်လှသော အသံနှင့်အတူ စားသောက်ဆိုင်၏ ကြမ်းပြင်ပေါ်တွင် ကြီးမားသော အပေါက်ကြီးတစ်ခု ဖြစ်သွားစေခဲ့သည်။ ရေနဂါးပတ်နှင့် ပေအနည်းငယ်သာ ကွာဝေးသော ဟွမ်ချွဲမှာ ထိတ်လန့်တကြား အော်ဟစ်မိရှာသည်။ အကယ်၍ သူမသာ စက္ကန့်ဝက်ခန့် နောက်ကျခဲ့ပါက လွင့်စင်လာသော အပိုင်းအစများကြောင့် ဦးခေါင်းတွင် ပြင်းထန်သော ဒဏ်ရာများ ရရှိသွားနိုင်ပေသည်။

ဤအကြပ်အတည်းတွင် ယွင်ရှန်း၏ အကြည့်မှာ ရေနဂါးပတ်နှင့် ယန်ချန်းရွှယ်၏ အကြားတွင် ကျရောက်သွားသည်။ ယန်ချန်းရွှယ်သည် ရေနဂါးပတ်ကို ကံကောင်းထောက်မစွာ ရှောင်တိမ်းနိုင်ခဲ့သော်လည်း အသာစီးတော့ မရရှိခဲ့ပေ။ သူမသည် ယိုင်တိယိုင်တိုင်ဖြင့် ဆင်းသက်ခဲ့ရပြီး သူမ၏ ကိုယ်ရံတော်များက ကူညီရန် ပြေးလာကြသော်လည်း သူမက ပြင်းထန်စွာ တားဆီးလိုက်သည်။

ယွင်ရှန်းသည် ယခုအခါ မျက်တောင်တစ်ခတ်အတွင်း လှုပ်ရှားမှုနှစ်ခုကို တစ်ပြိုင်နက် လုပ်ဆောင်ရတော့မည်ဖြစ်သည်။ တစ်ခုမှာ ရေနဂါးပတ်ကို စေခိုင်း၍ ယန်ချန်းရွှယ်ကို ဆက်လက်တိုက်ခိုက်ရန်ဖြစ်ပြီး အခြားတစ်ခုမှာ ဟွမ်ချွဲကို ဘေးကင်းရာသို့ ကယ်တင်ရန် ဖြစ်သည်။

သို့သော် သူမသည် တစ်ဦးတည်းသောသူ ဖြစ်သည့်အပြင် လုပ်ဆောင်ချက်နှစ်ခုကို တစ်ပြိုင်နက်တည်း လုပ်ဆောင်ရန်မှာ မဖြစ်နိုင်သလောက် ခက်ခဲလှပြီး အားနည်းချက်တစ်ခုမှာ မလွဲမသွေ ပေါ်ပေါက်လာပေလိမ့်မည်။

သာမန်လူဆိုပါက ဤကဲ့သို့သောအခြေအနေမျိုးတွင် အလွန်အမင်း ထိတ်လန့်တုန်လှုပ်သွားမည်ဖြစ်သော်လည်း ယွင်ရှန်းမှာမူ သူမ၏ အတိတ်ဘဝ ခွဲစိတ်ဆရာဝန်တစ်ဦးအနေဖြင့် လေ့ကျင့်ပျိုးထောင်ခဲ့သော ပြတ်သားသည့် စိတ်ဓာတ်နှင့် လျင်မြန်သော တုံ့ပြန်မှုစွမ်းရည်တို့ကို အပြည့်အဝ ထုတ်ဖော်ပြသလိုက်သည်။

သူမသည် နောက်ဆုတ်ခြင်းလည်းမရှိ အလျှော့ပေးခြင်းလည်းမရှိဘဲ သူမ၏ နက်နဲသောအရိုးမှော်တောင်ဝှေးကို လေထဲတွင် အဝိုင်းပုံသဏ္ဌာန် တစ်ချက်ဝှေ့ယမ်းကာ မန္တန်ကို တိုးညှင်းစွာ ရွတ်ပြောလိုက်သည်။ သူမ၏ မှော်တောင်ဝှေးပေါ်ရှိ မှော်ဝိညာဉ်ကျောက်နှစ်လုံးနှင့် လေနတ်သမီးအမှတ်အသားတို့မှာ တစ်ပြိုင်နက်တည်း တောက်ပလာတော့သည်။

မူလက မြေအောက်သို့ တစ်ဝက်နစ်ဝင်နေသော ရေနဂါးပတ်ကြီးထံမှ ရုတ်တရက် ကျယ်လောင်လှသော ရေသံကြီး ထွက်ပေါ်လာသည်။ စည်ပိုင်းအလား ထွားကြိုင်းသော ၎င်း၏ကိုယ်ထည်ထက်တွင် လှိုင်းတွန့်တစ်ခု ဖြစ်ပေါ်လာပြီး ဦးခေါင်းမှစ၍ အမြီးအထိ အက်ကွဲကြောင်းကြီး ဖြစ်ပေါ်လာရာ မြင်ရသူအပေါင်း ထိတ်လန့်ဖွယ် ကောင်းလှသည်။ မျက်တောင်တစ်ခတ်အတွင်းမှာပင် ရေနဂါးပတ်တစ်ကောင်မှာ နှစ်ကောင်အဖြစ် ကွဲထွက်သွားတော့သည်။

နဂါးပတ်တစ်ကောင်မှာ ယန်ချန်းရွှယ်ကို ဦးတည်တိုက်ခိုက်ပြီး အခြားတစ်ကောင်မှာမူ ဟွမ်ချွဲကို ဘေးကင်းစေရန် တင်းကြပ်စွာ ဝန်းရံကာကွယ်လိုက်သည်။ အပေါ်မှ ပြိုကျလာသော အပိုင်းအစများကို ရေနဂါးပတ်၏ ထူထပ်လှသော ရေမြုံ့များက တားဆီးပေးလိုက်သဖြင့် ဟွမ်ချွဲမှာ အနာအဆာမရှိ ဘေးကင်းသွားခဲ့သလို ယန်ချန်းရွှယ်နှင့် အဖွဲ့မှာလည်း ဤမမျှော်လင့်ထားသော ပြောင်းလဲမှုကြောင့် လုံးဝ အငိုက်မိသွားကြတော့သည်။

သီးသန့်ခန်းအတွင်းရှိ ယီပိုင်မင်း၏ ငွေရောင်မျက်ဝန်းများမှာ ရုတ်တရက် ကျုံ့သွားပြီး "တကယ့်ကို ခမ်းနားတဲ့ မှော်အတတ်ပဲ" ဟု စိတ်ထဲမှ ချီးကျူးမိလိုက်သည်။

သာမန် ရေနဂါးပတ်အတုတစ်ခုကို ဖန်တီးနိုင်ခြင်းမှာ အံ့သြစရာမဟုတ်ပေ။ ယီပိုင်မင်းကဲ့သို့သော ပညာရှင်တစ်ဦးအတွက် ဤရေနဂါးပတ်မှာ အပြည့်အဝ မရင့်ကျက်သေးကြောင်း ထိုမှော်ဆရာမလေးသည် အလယ်အလတ်အဆင့်မှော်ကို တတ်မြောက်သည်မှာ မကြာသေးကြောင်း သိသာလှသည်။ သို့သော် ဤကဲ့သို့ နုနယ်သေးသော မှော်အတတ်ကို အသုံးပြုပြီး အရေးကြီးသော အချိန်အတွင်းမှာပင် နဂါးပတ်ကို နှစ်ကောင်ကွဲအောင် ပြုလုပ်နိုင်ခြင်းမှာ လုံးဝကို မမျှော်လင့်ထားသော အသွင်ပြောင်းလဲမှုပင်။

ထိုမှော်ဆရာမလေး၏ မှော်စွမ်းအင် ထိန်းချုပ်နိုင်စွမ်းမှာ အလွန်ပင် အထင်ကြီးစရာ ကောင်းလှသည်။ ကွဲထွက်သွားသော ရေနဂါးပတ်နှစ်ကောင်လုံးမှာ အရွယ်အစား အတူတူပင်ဖြစ်ပြီး ၎င်းတို့ထံမှ ထွက်ပေါ်နေသော မှော်လှိုင်းအရှိန်အဝါများမှာလည်း ထပ်တူနီးပါး ရှိနေသည်။

ဤသည်မှာ မှော်အတတ်ကို အသုံးပြုသူသည် မှော်စွမ်းအင်ဒြပ်စင်များအပေါ်တွင် အလွန်တိကျသေချာသော ထိန်းချုပ်မှုရှိကြောင်း သက်သေပြနေခြင်းပင်။

ထိုအခါမှသာ ယီပိုင်မင်းသည် စောစောက ချန်ပိုင်ပြောခဲ့သော စကား၏ အဓိပ္ပာယ်ကို နားလည်သွားတော့သည်။ တော်ဝင်မှော်အကယ်ဒမီမှ ဤမိန်းကလေးငယ်သည် သူမကို မြင်တွေ့ရတိုင်း အသစ်အသစ်သော ထိုးထွင်းသိမြင်မှုများကို ပေးစွမ်းနိုင်သည်မှာ အမှန်ပင်။

"ချန်းရွှယ်... တော်တော့ နင် ဘယ်လောက်အထိ ဒီလိုတွေ ဆက်လုပ်နေဦးမှာလဲ"

ဒေါသအရှိန်ကြောင့် ယန်ချန်းလန်၏ ခန္ဓာကိုယ်မှာ အရိပ်တစ်ခုအလား လျင်မြန်စွာ လှုပ်ရှားသွားပြီး ရေနဂါးပတ်နှင့် ကိုယ်ရံတော်များကို ကျော်ဖြတ်ကာ သူ၏ဘယ်လက်ကို မြှောက်၍ ယန်ချန်းရွှယ်၏ ပါးကို ဒေါသတကြီး ရိုက်ချလိုက်တော့သည်။

ယန်ချန်းရွှယ်မှာ မှင်သက်သွားရသည်။ ဆိုင်အတွင်းရှိ ကိုယ်ရံတော်များမှာလည်း စစ်သူကြီးယွင်၏ လက်ကိုကြည့်ကာ အံ့အားသင့်လွန်းသဖြင့် ပါးစပ်အဟောင်းသား ဖြစ်သွားကြသည်။ ဤပါးရိုက်ချက်ကြောင့် ယန်ချန်းလန်ကိုယ်တိုင်ပင် ထိတ်လန့်သွားပြီး သူ၏လက်ကို မယုံကြည်နိုင်သလို စိုက်ကြည့်နေမိသည်။

ထိုစဉ်မှာပင် ဆိုင်အပြင်ဘက်မှ မြင်းခွာသံများ ကျယ်လောင်စွာ ထွက်ပေါ်လာသည်။ သိုင်းသူတော်စင် စစ်သူကြီးကိုယ်တိုင် ရောက်ရှိလာခြင်းပင်။ စားသောက်ဆိုင်တွင် လူစည်ကားနေသဖြင့် ယန်ချန်းလန် ပေါ်ထွက်လာသည့် သတင်းမှာ ၁၅ မိနစ်အတွင်း မြို့အနှံ့ ပျံ့နှံ့သွားခဲ့သည်။ တစ်ချိန်တည်းမှာပင် သူလျှိုအချို့သည် ယန်ချန်းလန်၏ သတင်းကို ယွီကျင်မြို့ရှိ အချက်အချာကျသော နေရာအသီးသန့်သို့ တိတ်တဆိတ် ပေးပို့လိုက်ကြသည်။

ဆေးဧကရာဇ်ခန်းမက ယောင်ရုံသည်လည်း သတင်းကို ရရှိခဲ့သည်။

"ဘာ ယန်ချန်းလန်ကို ယွီကျင်စားသောက်ဆိုင်မှာ တွေ့ခဲ့တာလား။ သူ့ရဲ့ စိတ်ရူးပြန်ဝေဒနာက ပျောက်သွားပြီ ဟုတ်လား"

ယန်ချန်းလန်၏ ဝေဒနာမှာ ဆေးဧကရာဇ်ခန်းမအတွက် နှစ်ပေါင်းများစွာ စိန်ခေါ်မှုတစ်ခု ဖြစ်ခဲ့သည်။ ဆေးဧကရာဇ်ခန်းမကပင် မကုသနိုင်ခဲ့သော ဝေဒနာကို ဘယ်သူက ကုသပေးလိုက်တာလဲဆိုသည်မှာ သူမအတွက် အလွန်အရေးကြီးလှသည်။

"တစ်ယောက်ယောက်ကို သွားစုံစမ်းခိုင်းလိုက်။ စစ်သူကြီးအိမ်တော်ကို အခုတလော ဘယ်သူတွေ ဝင်ထွက်နေလဲဆိုတာ သေချာအောင်လုပ်ပါ"

ဝေယွမ်နယ်စားကြီး အိမ်တော်၌ ဝေယွမ်နယ်စားကြီးသည် ယန်ချန်းလန်၏ သတင်းကို ကြားရသောအခါ မျက်နှာထားမှာ ထူးဆန်းသွားသည်။ စိတ်လှုပ်ရှားနေပုံရသလို တစ်ဖက်တွင်လည်း စိုးရိမ်ပူပန်နေပုံ ရသည်။ သူသည် ခဏမျှ စဉ်းစားပြီးနောက် စာတစ်စောင်ကို အမြန်ရေးသားကာ သူ၏ ကိုယ်ရံတော်အား ပေးလိုက်သည်။

"ဒီစာကို သူတို့လက်ထဲ ရောက်အောင် ချက်ချင်းသွားပို့လိုက်။ ယန်ချန်းလန်ရဲ့ ရောဂါပျောက်သွားပြီလို့ ပြောလိုက်ပါ"