အခန်း (၂၀၅)

တပည့်အချို့မှာ အချိန်နှင့်အပြိုင် မှင်တံများကို အသည်းအသန် လှုပ်ရှားရင်း မေးခွန်းလွှာထဲသို့ အာရုံစိုက် နစ်မြုပ်သွားကြသည်။ အချို့မှာမူ သူတို့၏ ကမ္ဘာကြီးတစ်ခုလုံး ရုတ်တရက် ပြိုလဲသွားသကဲ့သို့ မေးခွန်းလွှာကို ငေးကြောင်ကြည့်ရင်း ကျန်ရစ်ခဲ့ကြသည်။

ရှောင်ယွီသည် လက်ကို နောက်ပစ်ကာ လူစုကြားတွင် အေးအေးလူလူ လမ်းလျှောက်နေပြီး မျက်နှာထက်၌ ကျေနပ်သော အပြုံးတစ်ခု ရှိနေသည်။ သူ၏ အကြည့်များက တပည့်များကို အနေရခက်စေသော်လည်း သူကတော့ သူတို့၏ ပုံစံမျိုးစုံကို ကြည့်ကာ သဘောကျနေမိသည်။

တပည့်တစ်ဦးမှာ အလွန်အမင်း အာရုံစိုက်ကာ အဖြေများကို ရေးသားနေသည်။ ရှောင်ယွီသည် ထိုတပည့်၏ ဘေးတွင် တမင်တကာ ရပ်လိုက်သည်။ အကြီးအကဲချုပ်၏ အရိပ်က သူ၏ မေးခွန်းလွှာပေါ်သို့ ကျရောက်လာသောအခါ ထိုလူငယ်မှာ တုန်တုန်ရင်ရင်ဖြင့် မော့ကြည့်လာရှာသည်။

'ဆောရီးပဲ သူငယ်ချင်း ငါ ဒါကို အမြဲတမ်း စမ်းလုပ်ကြည့်ချင်နေတာ'

ရှောင်ယွီက စိတ်ထဲမှ ရယ်မောရင်း တွေးလိုက်သည်။ သူသည် ဤတပည့်လေး၏ ယုံကြည်မှုကို ရိုက်ချိုးတော့မည် ဖြစ်သည်။

သူသည် အနည်းငယ် ငုံ့ကြည့်ကာ ထိုတပည့်၏ အဖြေများကို ဖတ်လိုက်သည်။ ထို့နောက် ဘာမှမပြောဘဲ ခေါင်းကို ဖြည်းဖြည်းချင်း ခါယမ်းကာ ထွက်ခွာသွားလေသည်။ ခြေလှမ်းအနည်းငယ် ရောက်သောအခါ သူ၏ နောက်ဆုံးလက်နက်ကို ထုတ်သုံးလိုက်သည်။

"မေးခွန်းတွေကို သေသေချာချာဖတ်ပြီး နားလည်အောင် လုပ်ကြဦးနော်"

ထိုစကားကို ကြားလိုက်ရသည့် တပည့်မှာ မျက်နှာတစ်ခုလုံး သွေးမရှိတော့သလို ဖြူဖျော့သွားတော့သည်။ သူသည် ထိတ်လန့်တကြားဖြင့် သူ၏ အဖြေဟောင်းများကို အသည်းအသန် ပြန်ဖျက်တော့သည်။ သူရေးခဲ့သမျှ အရာအားလုံးကို သံသယဝင်သွားပြီး နဖူးမှ ချွေးစက်များ တဖွဲဖွဲ ကျလာလေတော့သည်။

'တကယ်တော့ သူ အစကတည်းက မှားနေတာဆိုတော့လည်း...'

ရှောင်ယွီက တွေးရင်း သူ၏ ကင်းလှည့်မှုကို ဆက်လုပ်နေသည်။

မိနစ် ၃၀ ပြည့်သွားသောအခါ ရှောင်ယွီက လက်ကို အချက်ပေး ခပ်ပြင်းပြင်း တီးလိုက်သည်။ "အချိန်စေ့ပြီ။ မှင်တံတွေချ မေးခွန်းလွှာတွေကို အရှေ့ကို ပို့လိုက်ကြ"

သူသည် မေးခွန်းလွှာအားလုံးကို စုစည်းလိုက်သည်။ သူ၏ ဝိညာဉ်အာရုံကို အသုံးပြု၍ စက္ကူ ၈၀ ကျော်ကို စစ်ဆေးအမှတ်ပေးရန်မှာ စက္ကန့်ပိုင်းသာ ကြာမြင့်လေသည်။

"အောင်တယ် အောင်တယ် ရှုံးတယ် ရှုံးတယ် အောင်တယ်..."

သူက တပည့်များ၏ အမည်များကို တစ်ဦးချင်း ခေါ်လိုက်သည်။

စစ်ဆေးမှု ပြီးဆုံးသွားသောအခါ လူစုမှာ နှစ်ခြမ်းကွဲသွားလေသည်။ မူလက လျှောက်ထားသူ ၈၀ ဦးအနက် ၃၀ ဦးသာ စာမေးပွဲ အောင်မြင်ခဲ့သည်။

"ကျရှုံးတဲ့သူတွေ ပြန်လို့ရပါပြီ"

သူက ကြေညာလိုက်သည်။

"တခြားကျောင်းတွေကို ပြောင်းလျှောက်နိုင်သလို ကိုယ့်ဘာသာ ဆက်လေ့လာပြီး နောက်တစ်ကြိမ် ဝင်ခွင့်စာမေးပွဲကို စောင့်နိုင်ပါတယ်"

ကျရှုံးသွားသော တပည့်များသည် စိတ်ပျက်အားငယ်သော မျက်နှာများဖြင့် လေးကန်စွာ ထွက်ခွာသွားကြသည်။ အချို့က အောင်မြင်သူများကို မနာလိုစွာ လှည့်ကြည့်သွားကြသော်လည်း အများစုမှာမူ ခေါင်းငိုက်စိုက်ကျလျက် ရှိနေသည်။

ထို့နောက် ရှောင်ယွီသည် အောင်မြင်သူများဘက်သို့ လှည့်ကာ လူအုပ်ထဲတွင် ခပ်ကွယ်ကွယ် နေရန် ကြိုးစားနေသော တပည့်တစ်ဦးကို တည့်တည့်ညွှန်ပြရင်း ပြောလိုက်သည်။

"မင်းက ဝမ်ချန်းမဟုတ်လား"

ထိုတပည့်သည် အကြီးအကဲချုပ်၏ တိုက်ရိုက်ခေါ်ယူခြင်းခံရသဖြင့် အံ့အားသင့်သွားကာ ကိုယ်ကိုမတ်လိုက်ပြီး "ဟုတ်ကဲ့ပါ အကြီးအကဲချုပ်" ဟု အမြန်ခေါင်းငြိတ်ထူးလိုက်သည်။

"ကောင်းပြီ။ မင်းဟာ ဒီစာမေးပွဲမှာ အမှတ်အများဆုံးရခဲ့တယ်"

ရှောင်ယွီက ချီးမွမ်းစကားပြောလိုက်သည်။

"ဒီနေ့ကစပြီး မင်းဟာ ဆေးပညာကျောင်းရဲ့ ဥက္ကဋ္ဌပဲ။ ကျောင်းနဲ့ပတ်သက်တဲ့ ကိစ္စအဝဝကို ငါ့ဆီ တိုက်ရိုက်အစီရင်ခံရမယ်"

ဝမ်ချန်းသည် အံ့ဩလွန်းသဖြင့် ပါးစပ်အဟောင်းသားဖြစ်သွားပြီးမှ သတိပြန်ဝင်လာကာ ရိုသေစွာ ဦးညွှတ်လိုက်သည်။

"ဒီတပည့်ငယ်အနေနဲ့ အကြီးအကဲချုပ်ရဲ့ လမ်းညွှန်မှုတွေကို အစွမ်းကုန် လိုက်နာပါ့မယ်"

သူက လေးလေးနက်နက် ပြန်လည်ဖြေကြားလေသည်။

"ကဲ... ကျန်တဲ့သူတွေလည်း ပြန်လို့ရပြီ"

ရှောင်ယွီက လက်ဝှေ့ယမ်းပြလိုက်သည်။

"ဟင်းချက်ပညာသင် တပည့်တွေလိုပဲ လောလောဆယ်တော့ ဆေးပညာဗဟုသုတတွေကို ကိုယ့်ဘာသာ လေ့လာထားကြ။ အတတ်ပညာခန်းမ ဆောက်ပြီးရင် ဥက္ကဋ္ဌ ဝမ်ချန်းကတစ်ဆင့် ငါ အကြောင်းကြားလိုက်မယ်။ အတန်းဆင်းပြီ"

"နေဦး... မပြန်ခင် တစ်ခုပြောစရာရှိသေးတယ်"

ရှောင်ယွီက ထွက်ခွာတော့မည့် တပည့်များကို လှမ်းတားလိုက်သည်။ သူ အရေးကြီးသောအချက်တစ်ခုကို မေ့တော့မလို့ ဖြစ်သွားသည်။

"မင်းတို့ စာမေးပွဲအောင်ရုံနဲ့ တခြားတပည့်တွေကို ဆေးကုပေးဖို့ အရည်အချင်း မပြည့်မီသေးဘူးဆိုတာ သတိထားပါ"

သူက ပြတ်သားစွာ ပြောလိုက်သည်။

"လေ့ကျင့်ဖို့ လိုအပ်တဲ့ ပစ္စည်းတွေကို အဆင်သင့်ဖြစ်တာနဲ့ ဥက္ကဋ္ဌ ဝမ်ချန်းဆီ ငါ ပေးလိုက်မယ်။ ဘယ်လို အခြေအနေမျိုးမှာပဲဖြစ်ဖြစ် တခြားတပည့်တွေကိုဖြစ်ဖြစ် တခြားဘယ်သူ့ကိုဖြစ်ဖြစ် သွားပြီး ဆေးမကုပေးကြနဲ့"

တပည့်များက ခေါင်းငြိတ်ကြသည်။ ဆေးပညာတွင် မှားယွင်းမှုတစ်ခုသည် အသက်ဆုံးရှုံးသည်အထိ ဖြစ်နိုင်ပြီး အထူးသဖြင့် ကျင့်ကြံမှုနှင့်ပတ်သက်သော ဒဏ်ရာများမှာ ပို၍ပင် စိုးရိမ်ရသည်။ သူတို့ နားလည်သွားပြီဖြစ်ကြောင်း အတည်ပြုပြီးမှ ရှောင်ယွီက သူတို့ကို လွှတ်လိုက်တော့သည်။

ထို့နောက် သူသည် အဆောင်စာရွက်နှင့် အစီအရင်ကျောင်းများအတွက် စမ်းသပ်မှုများ ပြီးစီးသွားသော လျူချင်းထံသို့ လျှောက်လှမ်းသွားသည်။ သူမ၏အနားတွင် မျှော်လင့်ချက်အပြည့်ရှိနေသူများနှင့် စိတ်ပျက်နေသူများ ရောနှောနေသည့် တပည့်တစ်စု ရှိနေသည်။

"ဘယ်သူ အမှတ်အများဆုံးရလဲ"

ရှောင်ယွီက လျူချင်းကို မေးလိုက်သည်။

သူဖန်တီးထားသော စမ်းသပ်ကိရိယာမှာ စမ်းသပ်ရန်သက်သက်မဟုတ်ဘဲ ချီထိန်းချုပ်မှု အာရုံစူးစိုက်မှု တည်ငြိမ်မှုနှင့် ပုံစံကြမ်းပြီးမြောက်မှု တိကျချက်များအပေါ် မူတည်၍ ရမှတ်များကို တိကျစွာ တွက်ချက်ပေးနိုင်ခြင်း ဖြစ်သည်။

"ဒီနှစ်ယောက်ပါ"

လျူချင်းက အုပ်စုနှင့် အနည်းငယ်ခပ်ခွာခွာတွင် ရပ်နေသော တပည့်နှစ်ဦးကို ညွှန်ပြလိုက်သည်။

ရှောင်ယွီ၏ မျက်ခုံးများ ပင့်တက်သွားရသည်။ လျူချင်းထက် ပို၍ စွမ်းဆောင်နိုင်သူ ရှိနေသည်လား။ လျူချင်း၏ အစောပိုင်းက စွမ်းဆောင်ရည်ကို ကြည့်ခြင်းအားဖြင့် ဤသည်မှာ မထင်မှတ်ထားသော ကိစ္စပင်။ သူသည် လျူချင်းညွှန်ပြရာသို့ ကြည့်လိုက်သည်။

သူ မြင်လိုက်ရသောအရာကြောင့် သူ ခေတ္တမျှ မှင်သက်သွားရသည်။ အလွန်တရာ လှပသော မိန်းကလေးနှစ်ဦးမှာ သူ့ရှေ့တွင် ရပ်နေကြပြီး သူမတို့၏ ရုပ်ရည်သွင်ပြင်မှာ အမွှာများဟု ပြောရလောက်အောင်ပင် တူညီလှသည်။ သို့သော်လည်း တစ်ခုခုမှာ ပုံမှန်မဟုတ်သလို သူ ခံစားလိုက်ရသည်။

'ခဏနေဦး... တစ်ခုခုတော့ မဟုတ်တော့ဘူး။ အနံ့အသက်က သံသယဖြစ်စရာပဲ'

ရှောင်ယွီ စဉ်းစားလိုက်မိသည်။

ရှောင်ယွီသည် သူ၏ ဝိညာဉ်အာရုံကို တိတ်တဆိတ် အသုံးပြုကာ ထိုနှစ်ယောက်ကို အနုစိတ် စစ်ဆေးလိုက်သည်။ သူတွေ့ရှိလိုက်ရသည့် အချက်က သူ၏ သံသယကို အတည်ပြုပေးလိုက်သည်။ ဤသည်မှာ တကယ့်ကို ထောင်ချောက်တစ်ခုပင်။ နူးညံ့သိမ်မွေ့သော အမျိုးသမီး အသွင်အပြင်များ ရှိနေသော်လည်း ဤနှစ်ယောက်မှာ အမှန်တကယ်တော့ အမျိုးသားများသာ ဖြစ်ကြသည်။

"မင်းတို့ နာမည်တွေက ဘယ်သူလဲ"

သူက မေးလိုက်သည်။

"ကျွန်မ နာမည်က လင်းယွီပါ"

ပထမအမွှာက ဦးညွှတ်ရင်း ပြောသည်။ သူ၏ အသံမှာပင် အမျိုးသမီးအသံကဲ့သို့ ဖြစ်

နေသည်။

ဒုတိယအမွှာကလည်း ပုံစံတူ ဦးညွှတ်မှုဖြင့် လိုက်လုပ်သည်။

"ကျွန်မကလည်း လင်းယွီပါပဲ"

သူက ပြောလိုက်သည်။ သူ၏ အသံမှာလည်း အလားတူပင် နူးညံ့နေသည်။

'နာမည်တောင် တူနေကြတာလား'

ရှောင်ယွီ တစ်ယောက် မယုံနိုင်အောင် ဖြစ်သွားမိသည်။

ဝိညာဉ်အာရုံဖြင့် အသေအချာ စစ်ဆေးနေသည့်တိုင်အောင် ထိုအမွှာနှစ်ယောက်ကို သူ လုံးဝ ခွဲခြား၍ မရပေ။ သူတို့၏ ဝိညာဉ်စွမ်းအင် အမှတ်အသားများမှာလည်း ထပ်တူနီးပါး တူညီနေကြသည်။

ထိုသူများအကြောင်း ပိုမိုသိရှိရန် လိုအပ်သည်ဟု ဆုံးဖြတ်ပြီးနောက် ရှောင်ယွီသည် သူ၏ တိုက်ပွဲပုံရိပ်ယောင်မှ ထောက်လှမ်းရေး စွမ်းရည်ကို အသုံးပြုလိုက်သည်။

[အမည် - လင်းယွီ]

[ကျင့်ကြံမှုအဆင့် - ခန္ဓာကြံ့ခိုင်မှု - အဆင့် ၁၅ ဝိညာဉ်စွမ်းအား - ရွှေအမြုတေအဆင့် အထွတ်အထိပ် စိတ်စွမ်းအား - အဆင့် ၄]

[မျိုးနွယ် - နတ်ဆိုး]

[ဝိညာဉ်အမြစ် - မြင့်မြတ်အဆင့်ယင်]

[ဉာဏ်အလင်းပွင့်မှု - ထူးကဲအဆင့်]

[ခန္ဓာကိုယ်ဖွဲ့စည်းပုံ - ယင်အစုံ တာအိုခန္ဓာကိုယ်]

[သွေးမျိုးဆက် - နတ်ဆိုးဘုရင် စစ်မှန်သောသွေး]

[သိုင်းပညာရပ်များ - ...]

[ကျမ်းစာများ - ...]

ရှောင်ယွီ၏ စိတ်ထဲတွင် လှိုင်းလုံးကြီးတစ်ခု ရိုက်ခတ်သွားသလို ခံစားလိုက်ရသည်။ ဤသူများမှာ သာမန်တပည့်သစ်များ မဟုတ်ကြဘဲ အဆင့်မြင့် နတ်ဆိုးမျိုးနွယ်များ ဖြစ်နေကြသည်။ ထို့အပြင် သူတို့၏ ကျင့်ကြံမှု နယ်ပယ်မှာ ရွှေအမြုတေ အထွတ်အထိပ်အဆင့်တွင် ရှိနေပြီး နတ်ဆိုးဘုရားသခင်၏ သွေးမျိုးဆက်ကိုပင် ပိုင်ဆိုင်ထားကြသည် မဟုတ်ပါလား။

ဤမျှ အစွမ်းထက်သော နတ်ဆိုးနှစ်ဦးသည် အဘယ်ကြောင့် မိုးပြာရောင်တိမ်တိုက်ဂိုဏ်းသို့ တပည့်အဖြစ် လာရောက် ခိုလှုံနေကြတာလဲ။

သူတို့ရဲ့ ရည်ရွယ်ချက်က ဘာလဲ။