သရဖူဆောင်းပွဲ အခမ်းအနား

ဝါယောဘုရင်၏ နက်ရှိုင်းသော မျက်ဝန်းများတွင် ထူးဆန်းသော အရိပ်အယောင်တစ်ခု ဖြတ်သန်းသွားပေသည်။

သူသည် အတော်လေး အံ့အားသင့်နေပေ၏။

ကုလင်းဖန်ကို သတ်ဖြတ်ခဲ့သူမှာ သူတော်စင်နတ်ဘုရားအဖွဲ့အစည်း၏ သမမြောက် သူတော်စင်နတ်ဘုရား ရှန်းချန်ကော ဖြစ်လိမ့်မည်ဟု သူ ထင်မထားခဲ့ပေ။

ရှေးဟောင်းနတ်ဘုရားချောက်နက်ကို တွန်းလှန်ကာ ရှေးဟောင်းနတ်ဘုရားမျိုးနွယ်ဝင်များကို မုန်းတီးစွာ ဆုတ်ခွာသွားစေခဲ့သော ဝတ်ရုံဖြူနှင့် သတ်ဖြတ်ခြင်းနတ်ဘုရားပင်။

ဝတ်ရုံဖြူနှင့် သတ်ဖြတ်ခြင်းနတ်ဘုရား

ဤသည်မှာ အရှေ့ကောင်းကင်ယံရှိ ကျင့်ကြံသူများက ရှန်းချန်ကောကို ခေါ်ဆိုသော အမည်နာမ ဖြစ်ပေသည်။

ဤသည်က ရှန်းချန်ကော၏ကြီးကျယ်သော ဂုဏ်သတင်းနှင့် တုနှိုင်းမဲ့ စွမ်းအားကို ပြသနေပေသည်။

"အရှေ့ကောင်းကင်ယံမှာ လူတိုင်းက ခင်ဗျားကို သူတို့ရဲ့ အစောင့်အရှောက်အဖြစ် မြင်ကြတယ်။ ခင်ဗျားကို အရှေ့ကောင်းကင်ယံရဲ့ မဏ္ဍိုင်၊ ပြိုလဲတော့မယ့် အဆောက်အဦကို ထောက်မပေးနိုင်တဲ့သူလို့ ခေါ်ဆိုကြတယ်"

ဖုန်းလင်းတန်က ရှန်းချန်ကောကို စူးစမ်းလိုစိတ်ဖြင့် ကြည့်ကာ ပြောလိုက်လေသည်။

သူ့အတွက်မူ ရှန်းချန်ကောသည် မြူခိုးတစ်လွှာ ဖုံးအုပ်ထားသကဲ့သို့ ဖြစ်နေပေသည်။

သူ ပို၍ မြင်ချင်လေ ပို၍ စူးစမ်းလိုစိတ် ဖြစ်လာလေ ဖြစ်ပေ၏။

နက်နဲဆန်းကြယ်ပြီး စွမ်းအားကြီးမားသူ။

ဤသည်မှာ ရှန်းချန်ကောက သူ့ကို ပေးစွမ်းသော ခံစားချက်ပင် ဖြစ်ပေသည်။

"ကျွန်ုပ်ရဲ့ ဖုန်းမိသားစုမှ ကြိုဆိုပါတယ် မိတ်ဆွေလေး"

ဤအချိန်တွင် ဝါယောဘုရင်၏ ခမ်းနားထည်ဝါသော အသံသည် ပင်မခန်းမဆောင် အထက်မှ ထွက်ပေါ်လာပေသည်။

သူသည် ရှန်းချန်ကောကို ငုံ့ကြည့်လိုက်ရာ သူ၏ ခန့်ညားသော မျက်နှာပေါ်တွင် အပြုံးတစ်ခု ပေါ်လာလေသည်။

"မင်းက ရှေးဟောင်းနတ်ဘုရားမျိုးနွယ်တွေကို သတ်ဖြတ်လိုက်ရုံနဲ့တင် မြင့်မြတ်မင်းဆက်က လူတွေရဲ့ လေးစားမှုကို ရရှိခဲ့ပြီးပြီ။ ငါ သူတော်စင်ဘုရင်ကို သတင်းပို့ပြီး မင်းအတွက် ဆုလာဘ် တောင်းပေးရမယ်"

"ကျေးဇူးတင်ပါတယ် ကောင်းကင်ဘုရင်"

ရှန်းချန်ကော၏မျက်နှာတွင် ထူးဆန်းသော အမူအရာတစ်ခု ပေါ်လာသော်လည်း တစ်ဖက်လူတွင် ရည်ရွယ်ချက်ကောင်း ရှိမှန်းသိသဖြင့် သူ ငြင်းဆန်၍ မရပေ။

မည်သို့ပင်ဆိုစေကာမူ သူသည် ဖုန်းမိသားစု၏ ဖိတ်ကြားချက်အရ ရောက်ရှိနေသော ဧည့်သည်တစ်ဦး ဖြစ်ပေသည်။

"ကောင်းကင်ဘုရင်၊ သူတော်စင်နတ်ဘုရားအဖွဲ့အစည်းကို လက်အောက်ခံအဖြစ် သွတ်သွင်းမယ့်ကိစ္စက ဘယ်လိုလဲ"

ရှန်းချန်ကော၏မျက်လုံးများ လင်းလက်သွားပြီး မေးလိုက်လေသည်။

သူတော်စင်နတ်ဘုရားအဖွဲ့အစည်းကို လက်အောက်ခံအဖြစ် သွတ်သွင်းမည့်ကိစ္စကို ငြင်းပယ်လိုက်လျှင်ပင် ကိစ္စကြီးမဟုတ်ပေ။

အဆိုးဆုံးအနေဖြင့် မြင့်မြတ်မင်းဆက်ကို မကျေမနပ် ဖြစ်စေရုံသာ ရှိပေမည်။

သို့သော် မင်းဆက်မှ စေလွှတ်လိုက်သော ယခင်သံတမန် ကုလင်းဖန်သည် သူတော်စင်နတ်ဘုရားအဖွဲ့အစည်းတွင် သေဆုံးခဲ့ရလေသည်။

သူ့လက်ချက်ဖြင့် သေဆုံးခဲ့ရခြင်း ဖြစ်ပေသည်။

သူတော်စင်နတ်ဘုရားအဖွဲ့အစည်းအတွက်မူ ဤသည်မှာ မြင့်မြတ်မင်းဆက်၏ အာဏာကို စိန်ခေါ်ခြင်းနှင့် အမျက်ထွက်စေခြင်းပင် ဖြစ်ပေသည်။

သူ့အတွက်မူ ကုလင်းဖန်ကို သတ်ဖြတ်ခဲ့ခြင်းကြောင့် မြင့်မြတ်မင်းဆက်မှ လူများသည် သူ့ကို မုန်းတီးကြမည်မှာ အသေအချာပင်။

ထို့အပြင် ကုလင်းဖန်သည် သာမန်နောက်ခံမဟုတ်ဘဲ မြင့်မြတ်မင်းဆက်၏အထင်ကရ ဆယ်မျိုးနွယ်ထဲမှ တစ်ခုဖြစ်သော ကုမိသားစုမှ ဖြစ်ပေသည်။

ယခုအချိန်တွင် ကုမိသားစုသည် သူ့ကို သတ်ဖြတ်လိုစိတ် ပြင်းပြနေလောက်ပေပြီ။

သူ မြင့်မြတ်မင်းဆက်သို့ ရောက်နေကြောင်း သိလျှင် သူ့ကို သတ်ဖြတ်ရန် ကြိုးစားကြပေလိမ့်မည်။

"ဒီကိစ္စအတွက် မင်း စိတ်ပူစရာမလိုပါဘူး"

ဝါယောဘုရင်က ရယ်မောလိုက်ပြီး လက်ကာပြလိုက်လေသည်။ သူသည် အလွန် သူရဲကောင်းဆန်ပုံရပြီး ကျယ်လောင်စွာ ရယ်မောကာ ပြောလိုက်လေသည်။

"သူတော်စင်နတ်ဘုရားအဖွဲ့အစည်းက မြင့်မြတ်မင်းဆက်ရဲ့ စေတနာကို ငြင်းပယ်လိုက်တာ နှမြောစရာပါပဲ။ မင်း ကုလင်းဖန်ကို သတ်လိုက်တဲ့ကိစ္စနဲ့ ပတ်သက်ပြီး သိပ်စိတ်မပူပါနဲ့။ ကုလင်းဖန်က မင်းနဲ့ မျိုးဆက်တူပဲလေ။ သူက မင်းလောက် မတော်လို့ မင်းလက်ချက်နဲ့ သေရတာပဲ။ ပြီးတော့ မင်းက ဖုန်းမိသားစုက ဖိတ်ခေါ်ထားတဲ့ ဧည့်သည်ပဲ။ ငါတို့ မင်းရဲ့ လုံခြုံရေးကို အသေအချာ တာဝန်ယူပေးမှာပါ"

"အနည်းဆုံးတော့ ကုမိသားစုက အဘိုးကြီးတွေ မျက်နှာမထောက်ဘဲ မင်းကို တိုက်ခိုက်လာရင်တော့ ငါ လက်ပိုက်ကြည့်နေမှာ မဟုတ်ဘူး"

ဝါယောဘုရင်က မောက်မာသော လေသံဖြင့် ပြောလိုက်ပြီး သူ့မျက်နှာတွင် အထင်သေးသော အမူအရာ ပေါ်နေလေသည်။

သူ၏ ဆိုလိုရင်းမှာ ရှင်းလင်းလှပေသည်။ ရှန်းချန်ကောသည် မြင့်မြတ်မင်းဆက်သို့ ရောက်နေပြီဖြစ်ရာ ကုမိသားစုနှင့် တွေ့ဆုံရမည်မှာ ရှောင်လွှဲ၍ မရနိုင်ပေ။

အကယ်၍ ကုမိသားစုမှ လူငယ်မျိုးဆက်များက ရန်စလာလျှင် ရှန်းချန်ကော ကိုယ်တိုင် ဖြေရှင်းရပေမည်။

သို့သော် လူငယ်ကို အနိုင်ကျင့်သော ကုမိသားစုမှ အဘိုးကြီးများ ပါဝင်လာလျှင်မူ ဖုန်းမိသားစုက သူ့အတွက် ကာကွယ်ပေးမည် ဖြစ်ပေသည်။

"ကျေးဇူးတင်ပါတယ် ကောင်းကင်ဘုရင်၊ ချန်ကော နားလည်ပါပြီ"

ရှန်းချန်ကောက လက်နှစ်ဖက်ယှက်၍ ကျေးဇူးတင်စကား ဆိုလိုက်သော်လည်း စိတ်ထဲတွင် အံ့အားသင့်နေမိပေသည်။

ရှေးဟောင်းမျိုးနွယ်ကြီး ၁၀ ခုကြား အားပြိုင်မှုသည် သူ ထင်ထားသည်ထက် ပိုမိုပြင်းထန်ပုံရပေသည်။

"လင်းတန်၊ မိတ်ဆွေလေးကို ခေါ်သွားပြီး အနားယူခိုင်းလိုက်ပါဦး"

ဝါယောဘုရင်က ဖုန်းလင်းတန်ကို ကြည့်လိုက်ရာ ဖုန်းလင်းတန်က အသာအယာ ခေါင်းညိတ်လိုက်လေသည်။

သူက ရှန်းချန်ကောကို ပြုံးပြပြီး ပြောလိုက်လေသည်။

"အစ်ကိုရှန်း၊ ခရီးဝေးက လာရတာ ပင်ပန်းနေရောပေါ့။ အစ်ကိုရှန်း ကောင်းကောင်း အနားယူပြီးရင် ကျွန်တော် သူတော်စင်မြို့တော်ရဲ့ ရှုခင်းတွေကို လိုက်ပြပါမယ်"

"ကောင်းသားပဲ"

ရှန်းချန်ကောက ခေါင်းညိတ်လိုက်လေသည်။

ထို့နောက် သူသည် ဝါယောဘုရင်ဘက်သို့ လှည့်ကာ လက်နှစ်ဖက်ယှက်ပြီး နှုတ်ဆက်လိုက်လေသည်။

"ချန်ကောကို ခွင့်ပြုပါဦး"

ထို့နောက် ရှန်းချန်ကောသည် ဝါယောဘုရင်ထံမှ ထွက်ခွာလာခဲ့လေသည်။

ဖုန်းမိသားစုသည် ရှန်းချန်ကောကို အလွန် အလေးထားကြောင်း ပြောရပေမည်။

သူ အနားယူရမည့် နေရာသည် အလွန်ပင် ခမ်းနားထည်ဝါလှပေသည်။

နှစ်ရက်အကြာတွင်

ရှန်းချန်ကော အနားယူနေသည့် ခန်းမဆောင်သို့ ဖုန်းလင်းတန် လာရောက်လည်ပတ်လေသည်။

"အစ်ကိုရှန်း၊ ကျွန်တော် ခင်ဗျားကို ပြောစရာ သတင်းကောင်း နှစ်ခု ရှိတယ်"

ဖုန်းလင်းတန်က ပြုံး၍ ပြောလိုက်လေသည်။ ထို့နောက် သူ ထိုင်လိုက်ပြီး ဝိုင်အိုးတစ်အိုး ထုတ်ကာ ခွက်နှစ်ခွက် ငှဲ့လိုက်လေသည်။

သူ၏ စိတ်နေသဘောထားမှာ အလွန် နူးညံ့သိမ်မွေ့ပြီး လူများကို ယဉ်ကျေးစွာ ဆက်ဆံတတ်ပေသည်။

သူသည် ကျက်သရေရှိသော အမူအရာ ရှိသဖြင့် လူအများ အထင်ကြီးလေးစားမှုကို အလွယ်တကူ ရရှိနိုင်ပေသည်။

သူသည် မောက်မာပြီး လူတိုင်းကို အထင်သေးသော ကုလင်းဖန်နှင့် မတူပေ။

ထို့ကြောင့် ရှန်းချန်ကောသည် သူ့ကို ရှားပါးသော မိတ်ဆွေတစ်ဦးအဖြစ် သတ်မှတ်ထားလေသည်။

အနည်းဆုံးတော့ ယခုအချိန်အထိ ဖြစ်ပေသည်။

"အို... ဟုတ်လား"

ရှန်းချန်ကောသည် စားပွဲဘေးသို့ လာရောက် ထိုင်လိုက်လေသည်။ သူသည် ဝိုင်ခွက်ကို ကိုင်ကာ မွှေးပျံ့သော ရနံ့ကို ရှူရှိုက်လိုက်ပြီးနောက် တစ်ရှိန်ထိုး မော့သောက်လိုက်လေသည်။

သူက ပြုံး၍ မေးလိုက်လေသည်။

"ဘာသတင်းကောင်းလဲ"

"ပထမ သတင်းကောင်းကတော့... ကောင်းကင်ဘုရင်က ရှေးဟောင်းနတ်ဘုရားမျိုးနွယ်စုရဲ့ ကပ်ဘေးကို ဖယ်ရှားပေးခဲ့တဲ့ ခင်ဗျားရဲ့ စွမ်းဆောင်ရည်ကို မြင့်မြတ်မင်းဆက်ဆီ တင်ပြလိုက်ပြီ။ မြင့်မြတ်မင်းဆက်က ခင်ဗျားကို ဧည့်သည်ဝန်ကြီး ရာထူး ပေးအပ်လိုက်တယ်။ ဒီနေ့ကစပြီး အစ်ကိုရှန်းမှာ တရားဝင် ရာထူးတစ်ခု ရှိသွားပြီ။ ကုမိသားစုတောင် ခင်ဗျားကို အလွယ်တကူ ထိလို့မရတော့ဘူး"

ဖုန်းလင်းတန်က ခွက်ကိုမြှောက်၍ ဝိုင်ကို မြည်းစမ်းရင်း မျက်လုံးများ ကျဉ်းမြောင်းကာ ပြုံးလိုက်လေသည်။

"မြင့်မြတ်မင်းဆက်ရဲ့ ဧည့်ဝန်ကြီးလား..."

ရှန်းချန်ကောက ရယ်မောလိုက်လေသည်။ ၎င်းသည် မည်သည့် အာဏာ သို့မဟုတ် အကျိုးခံစားခွင့်မျှ မရှိသော အမည်ခံရာထူးသက်သက်သာ ဖြစ်ပေလိမ့်မည်။

မြင့်မြတ်မင်းဆက်အနေဖြင့် ပြင်ပလူတစ်ဦးကို ထင်ရှားသော ရာထူးအဆင့်အတန်း ပေးအပ်ရန် မဖြစ်နိုင်ပေ။

ဝါယောဘုရင်က ကိုယ်တိုင် တောင်းဆိုလိုက်သဖြင့် ဝါယောဘုရင်ကို မျက်နှာထောက်သောအားဖြင့် ဧည့်ဝန်ကြီး အဆင့်အတန်း ပေးလိုက်ခြင်း ဖြစ်ပေလိမ့်မည်။

ရှန်းချန်ကော၏မျက်လုံးများ အရောင်လက်သွားလေသည်။ အမည်ခံသက်သက် ဖြစ်သော်လည်း သူ ငြင်းပယ်မည် မဟုတ်ပေ။

မည်သို့ပင်ဆိုစေကာမူ ၎င်းသည် တရားဝင် အဆင့်အတန်းတစ်ခု ဖြစ်နေသေးသည် မဟုတ်ပါလား။

နောင်အနာဂတ်တွင် ထိုအထွတ်အထိပ် ဓားသိုင်းကို လေ့လာလိုပါက သူ့တွင် အခွင့်အလမ်း ပိုများလာပေလိမ့်မည်။

"နောက်တစ်ခုကရော..."

ရှန်းချန်ကောက ခေါင်းခါလိုက်ပြီး စူးစမ်းလိုစိတ်ဖြင့် ဖုန်းလင်းတန်ကို မေးလိုက်လေသည်။

"ဖုန်းမိသားစုရဲ့ နှစ်စဉ်ကျင်းပမြဲ သရဖူဆောင်းပွဲ အခမ်းအနားကို နောက်သုံးရက်နေရင် ကျင်းပတော့မယ်။ ဒါက လူငယ်မျိုးဆက်တွေအတွက်ပါ။ တစ်ချိန်တည်းမှာပဲ သိုင်းပြိုင်ပွဲတွေ၊ ပါရမီစစ်ဆေးပွဲတွေနဲ့ တခြား အစီအစဉ်တွေ ပါဝင်မယ်။ ကျွန်တော်က အစ်ကိုရှန်းကို တက်ရောက်ဖို့ အထူး လာဖိတ်တာပါ"

ဖုန်းလင်းတန်က ရှန်းချန်ကော၏ အဖြေကို စောင့်ဆိုင်းနေလေသည်။

သူသည် အရှေ့ကောင်းကင်ယံရှိ ရှန်းချန်ကောအကြောင်း ဒဏ္ဍာရီများကို အများအပြား ကြားသိခဲ့ရပြီး ရှန်းချန်ကော၏ ပါရမီနှင့် စွမ်းအားကို အလွန် စူးစမ်းချင်နေမိသည်။

သူသည် ရှန်းချန်ကောကို ဖိတ်ခေါ်ပြီး စမ်းသပ်ကြည့်ချင်နေခြင်း ဖြစ်ပေသည်။

"ကောင်းပြီလေ"

ရှန်းချန်ကောသည် သိပ်မသွားချင်ဘဲ ပျင်းစရာကောင်းမည်ဟု ထင်နေသော်လည်း သဘောတူလိုက်လေသည်။

သူသည် ဧည့်သည်တစ်ဦး ဖြစ်သည် မဟုတ်ပါလား။ စကားပုံအတိုင်း အိမ်ရှင်လုပ်သမျှ ဧည့်သည် ခံရမည် ဖြစ်သဖြင့် သူ ငြင်းဆန်၍ မရဘဲ သဘောတူလိုက်ရခြင်း ဖြစ်ပေသည်။

မျက်စိတစ်မှိတ်အတွင်း သုံးရက် ကုန်ဆုံးသွားခဲ့လေသည်။

ထိုနေ့တွင်

ဖုန်းမိသားစုအတွင်း၌ အလွန် စည်ကားသိုက်မြိုက်နေလေသည်။

အပြင်ထွက်၍ ကျင့်ကြံနေကြသော မိသားစုဝင်အများအပြား ပြန်လာကြလေသည်။

ထိုမျှမက ဖုန်းမိသားစု စံအိမ်တော်သည် ဧည့်သည်များဖြင့် ပြည့်နှက်နေလေသည်။ လူပင်လယ်ကြီးတစ်ခုဟုပင် တင်စားနိုင်ပေသည်။

သရဖူဆောင်းပွဲ အခမ်းအနား

မိသားစုများနှင့် အင်အားစု အားလုံးသည် ဤပွဲကို ကျင်းပလေ့ရှိကြသည်။

၎င်းသည် လူငယ်မျိုးဆက်များအတွက် သရဖူဆောင်းပေးရန်၊ ထို့နောက် သူတို့၏ ကျင့်ကြံခြင်း ပါရမီကို စစ်ဆေးရန်နှင့် သိုင်းပြိုင်ပွဲများ ယှဉ်ပြိုင်ရန် ရည်ရွယ်သည်။

ဆုလာဘ်များမှာလည်း အလွန် ရက်ရောလှပေသည်။

ဖုန်းမိသားစုသည် မြင့်မြတ်မင်းဆက်၏ အထင်ကရ မျိုးနွယ်ကြီး ၁၀ ခုထဲမှ တစ်ခု ဖြစ်ပေသည်။

သူတို့သည် ဂုဏ်သရေရှိပြီး အလွန် ထင်ရှားကျော်ကြားသဖြင့် အခမ်းအနားသည် သာမန်အင်အားစုများထက် ပိုမို ခမ်းနားကြီးကျယ်လှပေသည်။

မိသားစုဝင်များ ပြန်လာကြရုံသာမက အခြား အင်အားစုများကိုလည်း သက်သေအဖြစ် ဖိတ်ကြားထားလေသည်။

တစ်ချိန်တည်းမှာပင် ၎င်းသည် သူတို့၏အင်အားကို ပြသသည့် နည်းလမ်းတစ်ခုလည်း ဖြစ်ပေသည်။

ထို့အပြင် ဖုန်းမိသားစု၏လက်အောက်ခံ အင်အားစုများစွာလည်း အခမ်းအနားကို လာရောက်ကြည့်ရှုကြပြီး အားပေးထောက်ခံကြပေသည်။