ပါရမီ စမ်းသပ်ခြင်း

ဖုန်းလင်းတန် စကားဆုံးသည်နှင့်လောကကြီး တစ်ခုလုံး တိတ်ဆိတ်ငြိမ်သက်သွားလေသည်။

ကောင်းကင်ဆက်နွယ်မျှော်စင် တစ်ဝိုက်ရှိ မရေမတွက်နိုင်သော လူအများက မျှော်လင့်ခြင်း၊ သိချင်စိတ်ပြင်းပြခြင်းများဖြင့် ရှန်းချန်ကောကို လှည့်ကြည့်လိုက်ကြချေ၏။

ဖုန်းမိသားစုဝင်များသည် လွန်ခဲ့သော ရက်အနည်းငယ်အတွင်းက ရှန်းချန်ကော၏ အဆင့်အတန်းကို သိရှိထားပြီး ဖြစ်လေသည်။

သူသည် အရှေ့ဘက်ကောင်းကင်မှ လာသော ဧည့်သည်တော် တစ်ဦးဖြစ်ပြီး ဖုန်းမိသားစု၏ ဖိတ်ကြားချက်ဖြင့် ရောက်ရှိလာခြင်း ဖြစ်ပေသည်။

သူ ပထမဆုံး ရောက်ရှိလာစဉ်က ဝါယောဘုရင် ကိုယ်တိုင် ကောင်းကင်ဘုရင်ပလ္လင်ခန်းမ၌ လက်ခံတွေ့ဆုံခဲ့ပြီး ထို့နောက်တွင် ဖုန်းကလန်၏ဂုဏ်ယူရသော ကောင်းကင်သားတော် ဖုန်းလင်းတန်က အချိန်ပြည့် ဧည့်ခံစောင့်ရှောက်ပေးခဲ့လေသည်။

ဤအချက်များကို ကြည့်ခြင်းအားဖြင့် ဖုန်းမိသားစုက ရှန်းချန်ကောကို မည်မျှ အလေးထားကြောင်း သိမြင်ရန် မခက်ခဲချေ။

ထို့ကြောင့်ပင် ဖုန်းကလန် အဖွဲ့ဝင်များသည် ရှန်းချန်ကောအကြောင်းကို ပိုမို သိချင်နေကြခြင်း ဖြစ်ပေသည်။

သူတို့သည် ရှန်းချန်ကောနှင့် ပတ်သက်သော ဒဏ္ဍာရီများကို ကြားဖူးနားဝ ရှိထားကြလေသည်။

သို့သော် ထိုအရာများသည် ကောလဟာလ သတင်းစကားများသာ ဖြစ်၏။

ယခုအခါ ထိုဒဏ္ဍာရီကို ဖန်တီးသူ ကိုယ်တိုင် သူတို့၏ ရှေ့မှောက်သို့ ရောက်ရှိနေပြီဖြစ်ရာ သူတို့သည် သဘာဝကျစွာပင် မျှော်လင့်ချက်များ ပြည့်နှက်နေပြီး ရှန်းချန်ကောကို မျှော်လင့်တကြီး ကြည့်နေကြခြင်း ဖြစ်ပေသည်။

ကျန်ရှိသော လူအများစုနှင့် အခြားသော ကလန်ကြီး ကိုးခုမှ အခမ်းအနား လာရောက်ကြည့်ရှုကြသည့် အကြီးအကဲများသည်လည်း ဤအခြေအနေကို မြင်သောအခါ ရှန်းချန်ကောကို သိချင်စိတ်ဖြင့် ကြည့်လိုက်ကြလေသည်။

ဒီလူက ဘယ်သူလဲ

ဖုန်းကလန် တစ်ခုလုံးက မျှော်လင့်တကြီး မော့ကြည့်နေရလောက်အောင်၊ သိချင်စိတ် ပြင်းပြသော မျက်နှာထားများ ဖြစ်ပေါ်လာအောင် သူ့မှာ ဘယ်လို ဆွဲဆောင်မှုမျိုး ရှိနေတာလဲ။

ထိုသူများအပြင် ဖုန်းကလန်၏လက်အောက်ခံ အင်အားစုများမှ လူအချို့ကလည်း လူအုပ်ကြီး ကြည့်ရာဘက်သို့ လိုက်ကြည့်ပြီး ရှန်းချန်ကောကို အကဲခတ်နေကြလေသည်။

သူတို့သည် ယနေ့မှသာ ဖုန်းကလန်သို့ ရောက်ရှိလာကြခြင်းဖြစ်ပြီး ဖုန်းကလန်ကလည်း ရှန်းချန်ကော၏ အကြောင်းကို ထုတ်ဖော်ကြေညာထားခြင်း မရှိပေ။

ထို့ကြောင့် ယခုအချိန်အထိ ဖုန်းကလန် အဖွဲ့ဝင်များမှလွဲ၍ မည်သူမျှ ရှန်းချန်ကော၏ တိကျသော အချက်အလက်ကို မသိရှိကြသေးချေ။

သူတို့သည် မကြာသေးမီက ဖုန်းကလန်သို့ ဧည့်သည်တော် တစ်ဦး ရောက်ရှိလာပြီး ဝါယောဘုရင် ကိုယ်တိုင် လက်ခံတွေ့ဆုံခဲ့ကြောင်းကိုသာ ကြားသိထားကြခြင်း ဖြစ်လေသည်။

ပြောစမှတ်တွင်နေသော ထိုပုဂ္ဂိုလ်သည် ယခု သူတို့ရှေ့မှောက်တွင် ရောက်ရှိနေလိမ့်မည်ဟု သူတို့ ထင်မှတ်မထားခဲ့ကြပေ။

"အစ်ကိုထန်... သူက ဘယ်သူလဲဗျ..."

လူပင်လယ်ကြီးအလယ်တွင် အကြီးအကဲအဆင့်ရှိ ပုဂ္ဂိုလ်တစ်ဦးက ပြုံးလျက် မေးလိုက်လေသည်။

သူသည် အခမ်းအနားကို ဦးစီးကျင်းပနေသော သူ၏ဘေးနားရှိ အကြီးအကဲကို မေးမြန်းလိုက်ခြင်း ဖြစ်၏။

"ဒီမိတ်ဆွေငယ်လေးက ဖုန်းကလန်ရဲ့ဧည့်သည်တော်ပါ... နောက်ကျရင် ခင်ဗျား သူ့အကြောင်း သိလာရမှာပါ..."

ဖုန်းကလန် အကြီးအကဲက ထိုသူကို ပြုံးလျက် ကြည့်လိုက်ပြီး နက်နဲဆန်းကြယ်သော မျက်လုံးများဖြင့် ပြောလိုက်လေသည်။

မေးခွန်းမေးလိုက်သူမှာ ကုကလန် မှ အကြီးအကဲတစ်ဦး ဖြစ်ပေသည်။

သူ့နောက်တွင် ကုကလန်၏ မျိုးဆက်သစ် လူငယ်အချို့ ပါလာကြလေသည်။

ဖုန်းထန် စိတ်ထဲမှ မဲ့ပြုံး ပြုံးလိုက်မိ၏။

ကုကလန်ရဲ့အမွေဆက်ခံသူ တစ်ယောက်ဖြစ်တဲ့ ကုလင်းဖန်ကို သတ်ခဲ့တဲ့သူက ခင်ဗျားတို့ ရှေ့မှာ ရောက်နေပြီလေ... ခင်ဗျားတို့ မသိကြသေးတာပဲ ရှိတာပါ...

ဖုန်းထန်၏စကားကို ကြားသောအခါ အခြားသော ကလန်ကြီး ကိုးခုမှ အကြီးအကဲများသည်လည်း ရှန်းချန်ကောကို သိချင်စိတ်ဖြင့် ကြည့်လိုက်ကြလေသည်။

ထိုအချိန်တွင် ရှန်းချန်ကောသည် အာရုံစိုက်ခံရသူ ဖြစ်နေလေသည်။ လူတိုင်း၏ မျက်လုံးများသည် သူ့အပေါ်တွင် ကျရောက်နေချေ၏။

ရှန်းချန်ကောသည် အခမ်းအနား၏ အဓိကဇာတ်ကောင် ဖြစ်လာပြီး သူ၏ တောက်ပမှုသည် ဖုန်းကလန်၏ ဧည့်သည်အားလုံးကို လွှမ်းမိုးသွားလေသည်။

လူတိုင်း၏ အကြည့်အောက်တွင် ရှန်းချန်ကောက ပခုံးတွန့်ပြလိုက်လေသည်။

ထိုအချိန်၌ ကျန်ရှိသော ဖုန်းကလန် ဧည့်သည်တော်များ အားလုံးက သူ့ကို ကြည့်နေကြပြီဖြစ်ရာ ငြင်းပယ်ရန် မသင့်တော်တော့ပေ။

"ကောင်းပြီလေ... ကျွန်တော် စမ်းကြည့်ပါ့မယ်..."

ထို့နောက် သူသည် ကောင်းကင်ဆက်နွယ်မျှော်စင်ဆီသို့ လျှောက်လှမ်းသွားလေသည်။

သူ ရှေ့သို့ လျှောက်လှမ်းသွားသည်နှင့် ခန်းမဆောင်အတွင်းရှိ လေထုအခြေအနေ ရုတ်တရက် ပြောင်းလဲသွားလေသည်။

လူတိုင်း၏ မျက်လုံးများသည် ရှန်းချန်ကောအပေါ်၌သာ စွဲမြဲနေချေ၏။

ထိုမျှသာမက

ဖုန်းကလန် နန်းတော်၏နက်ရှိုင်းသော နေရာ၌ သားရဲကြီးတစ်ကောင် နိုးထလာသကဲ့သို့ ရှိလေသည်။

သူ၏နက်ရှိုင်းကျယ်ပြောသော မျက်လုံးများသည် အဆုံးမရှိသော လေဟာနယ်ကို ထိုးဖောက်ပြီး ကောင်းကင်ဆက်နွယ်မျှော်စင် ရှိရာဘက်သို့ လှမ်းမျှော်ကြည့်လိုက်ပေသည်။

ထို့အပြင် ကောင်းကင်ဆက်နွယ်မျှော်စင် ပတ်ဝန်းကျင် လေဟာနယ်ထဲတွင် ဝေဝါးသော ပုံရိပ်အချို့ ပေါ်လာလေသည်။

သူတို့၏မျက်လုံးများသည် တောက်ပနေပြီး ရှန်းချန်ကောကို ကြည့်နေကြ၏။

ဖုန်းလင်းတန်က ထိုသူများကို ဂရုမစိုက်သလို တစ်ချက်ကြည့်ပြီး အကြည့်လွှဲလိုက်လေသည်။

ရုတ်တရက် ပေါ်လာသော ဤပုံရိပ်များနှင့် သူ မစိမ်းချေ။

သူတို့သည် ဖုန်းကလန်၏လက်ရှိ အခြားသော အမွေဆက်ခံသူများ ဖြစ်ကြပေသည်။

ရှန်းချန်ကောသည် ဖုန်းကလန်၏ကောင်းကင်ဘုရင် ခန့်အပ်ထားသော ဧည့်သည်တော် ဖြစ်သော်လည်း လမ်းခရီးတစ်လျှောက်လုံးတွင် ဖုန်းလင်းတန်ကသာ လိုက်ပါ ဧည့်ခံခဲ့ခြင်း ဖြစ်လေသည်။

အခြားသော အမွေဆက်ခံသူများတွင် သဘာဝကျစွာပင် အခြားသော အတွေးများ ရှိနေကြပေသည်။

ရှန်းချန်ကော၏အဆင့်အတန်းသည် သူတို့၏ အာရုံကို ဖမ်းစားရန် လုံလောက်လေသည်။

လေဟာနယ်ထဲတွင် မသဲကွဲသော ပုံရိပ်များသည် လေထဲတွင် ရပ်တန့်နေကြပြီး သူတို့၏ဘေးပတ်လည်တွင် တာအိုလမ်းစဉ် နိယာမများနှင့် ဖရိုဖရဲ စွမ်းအင်ငွေ့များ ဝန်းရံနေသဖြင့် အလွန် ထူးခြားပုံ ပေါက်နေလေသည်။

အမျိုးသား သုံးဦးနှင့် အမျိုးသမီး တစ်ဦး ရှိပြီး သူတို့အားလုံးသည် ထူးချွန်သော စိတ်နေသဘောထားနှင့် ပြိုင်ဘက်ကင်းသော ကျက်သရေကို ပိုင်ဆိုင်ထားကြချေ၏။

"သူတို့ ဒီကို လာလိမ့်မယ်လို့ ထင်မထားမိဘူး..."

ဖုန်းထန်၏မျက်နှာထား လေးနက်သွားလေသည်။

သူသည် ကောင်းကင်ကို မော့ကြည့်လိုက်ပြီး တုန်လှုပ်သွားမိ၏။ ရှန်းချန်ကော၏ ဝိညာဉ်ပါရမီ စစ်ဆေးမှုက ထိုလူများကိုပင် ဆွဲဆောင်နိုင်ခဲ့ပေသည်။

ကလန်ကြီး ကိုးခုမှ အကြီးအကဲများသည်လည်း ထိုမြင်ကွင်းကို မြင်လိုက်ရပြီး ရှန်းချန်ကောနှင့် ပတ်သက်၍ ပိုမို သိချင်စိတ် ပြင်းပြလာကြလေသည်။

ဒီလူက ဘယ်လို အဆင့်အတန်းမျိုး ရှိနေတာလဲ။

ဝါယောဘုရင် ကိုယ်တိုင် သူ့ကို ကောင်းကင်ဘုရင်ပလ္လင်ခန်းမသို့ ဆင့်ခေါ်ခဲ့ရုံသာမက ဖုန်းကလန်၏ ဂုဏ်ယူရသော သားတော် ဖုန်းလင်းတန်ကပါ ကိုယ်ရံတော်အလား လိုက်ပါလာခဲ့သည်။

ယခုတွင်လည်း စမ်းသပ်မှု သက်သက်သာ ဖြစ်သော်လည်း ဖုန်းကလန်၏ အခြားသော အမွေဆက်ခံသူများပါ ရောက်ရှိလာကြလေသည်။

ထိုအချိန်တွင် ကမ္ဘာလောကကြီးသည် တိတ်ဆိတ်ငြိမ်သက်နေချေ၏။

လူတိုင်း၏ အကြည့်အောက်တွင် ရှန်းချန်ကောသည် ကောင်းကင်ဆက်နွယ်မျှော်စင် ရှေ့သို့ ရောက်ရှိလာလေသည်။

သူ သေချာမျက်နှာမူကြည့်လိုက်သောအခါ ကောင်းကင်ဆက်နွယ်မျှော်စင်သည် ပိုမို ခမ်းနားထည်ဝါနေသည်ဟု ခံစားလိုက်ရပေသည်။

၎င်းသည် ကောင်းကင်အဆုံးတွင် ရပ်တည်နေသော ရှေးဟောင်း နတ်ဘုရားတောင်ကြီး တစ်လုံးနှင့် တူပြီး မျှော်စင်ထိပ်ဖျားသည် အထက်ကောင်းကင်နှင့် ဆက်စပ်နေသကဲ့သို့ ရှိနေလေသည်။

ကောင်းကင်ဆက်နွယ်မျှော်စင် ဆိုသည့် အမည်နှင့် အမှန်တကယ် လိုက်ဖက်လှပေသည်။

ရှန်းချန်ကော၏အဖြူရောင် ဝတ်ရုံသည် လေတွင် တလွင့်လွင့် ဖြစ်နေပြီး သူသည် ကောင်းကင်ဆက်နွယ်မျှော်စင် အတွင်းသို့ ဝင်ရောက်သွားလေသည်။

မကြာမီအချိန်တွင်

"ဝှစ်..."

ရုတ်တရက် ကောင်းကင်ဆက်နွယ်မျှော်စင်မှ တောက်ပသော အလင်းရောင်များ ထွက်ပေါ်လာလေသည်။

နဂါးတစ်ကောင် နိုးထလာသကဲ့သို့ သို့မဟုတ် ကောင်းကင်ထိတိုင်အောင် မြင့်မားသော မဏ္ဍိုင်ကြီး တစ်ခုကဲ့သို့ ဖြစ်နေပေသည်။

ကောင်းကင်ဆက်နွယ်မျှော်စင်၏ကိုယ်ထည်သည် တောက်ပသော အလင်းရောင်ဖြင့် လင်းလက်လာပြီး အဆုံးမရှိသော ကောင်းကင်ထဲသို့ တည့်တည့် ထိုးတက်သွားချေ၏။

ကောင်းကင်ဆက်နွယ်မျှော်စင်၏အပြင်ဘက်တွင် လူတိုင်းသည် အသက်အောင့်ထားကြပြီး အာရုံစိုက် ကြည့်ရှုနေကြလေသည်။ သူတို့၏ မျက်လုံးများသည် လင်းလက်နေသော ကောင်းကင်ဆက်နွယ်မျှော်စင်အပေါ်တွင် စွဲမြဲနေပြီး စိတ်ထဲမှ အထပ်အရေအတွက်ကို ရေတွက်နေကြပေသည်။

"၁၀ ထပ်..."

"၁၈ ထပ်..."

...

"၅၂ ထပ်..."

"၆၄ ထပ်..."

"၇၉ ထပ်..."

မျှော်စင်၏၇၉ ထပ်မြောက် လင်းလက်လာသောအခါ ဖုန်းလင်းတန် အသက်ပြင်းပြင်း ရှူလိုက်မိလေသည်။

သူသည် မျှော်စင်ကို မော့ကြည့်လိုက်ပြီး ရှန်းချန်ကော၏ ဝိညာဉ်ပါရမီကို အံ့သြမချီးကျူးဘဲ မနေနိုင်တော့ပေ။

သူသည် ၇၉ ထပ်သို့ လွယ်ကူစွာ ရောက်ရှိသွားခဲ့ခြင်း ဖြစ်ရာ ရှန်းချန်ကော၏ဝိညာဉ်ပါရမီသည် အနည်းဆုံး အဋ္ဋမအဆင့်တွင် ရှိနေကြောင်း ဖော်ပြနေခြင်း ဖြစ်လေသည်။

ထို့အပြင် ကောင်းကင်ဆက်နွယ်မျှော်စင် အထက်ရှိ အလင်းရောင်သည် ရပ်တန့်မည့် အရိပ်အယောင် မပြဘဲ ဆက်လက် မြင့်တက်နေဆဲ ဖြစ်ချေ၏။

ဖုန်းထန် အပါအဝင် ထိပ်တန်းကလန်ကြီး ဆယ်ခုမှ အကြီးအကဲများသည်လည်း ကောင်းကင်ဆက်နွယ်မျှော်စင်ကို စိုက်ကြည့်ရင်း လေးနက်သော မျက်နှာထားများ ဖြစ်ပေါ်လာကြလေသည်။

ထိုကဲ့သို့သော ပါရမီမျိုးဖြင့် သူသည် ထိပ်တန်းကလန်ကြီး ဆယ်ခု၏ အမွေဆက်ခံသူများထက် မညံ့ကြောင်း သက်သေပြနေပေသည်။

ဖုန်းလင်းတန်သည် ဖုန်းကလန်၏အမွေဆက်ခံသူများအနက် တစ်ဦး ဖြစ်သော်လည်း သူသည် ၇၂ ထပ်အထိသာ ရောက်ရှိခဲ့သည်ကို သိထားရမည် ဖြစ်၏။

ယခုအချိန်တွင် ရှန်းချန်ကော၏ဝိညာဉ်ပါရမီသည် ဖုန်းလင်းတန်ကို ကျော်လွန်သွားခဲ့ပြီ ဖြစ်လေသည်။

"၈၀ ထပ်..."

အလင်းရောင်သည် ၈၀ ထပ်မြောက်သို့ ရောက်ရှိသွားသောအခါ ရှိနေသူ အားလုံး တုန်လှုပ်သွားကြလေသည်။

လေဟာနယ်ထဲတွင် မာနကြီးစွာ ရပ်နေကြသော ဝေဝါးသည့် ပုံရိပ်များပင်လျှင် မျက်လုံးအိမ် ကျဉ်းမြောင်းသွားပြီး ရင်အုံများ နိမ့်ချည်မြင့်ချည် ဖြစ်သွားကြရချေ၏။

၈၀ ထပ်...

ထိုပါရမီမျိုးသည် ထိပ်တန်းကလန်ကြီး ဆယ်ခု၏ အမွေဆက်ခံသူ အများစုထက်ပင် သာလွန်နေပြီ ဖြစ်လေသည်။

ထိုအချိန်တွင် ကောင်းကင်ဆက်နွယ်မျှော်စင် တစ်ဝိုက်ရှိ လူတိုင်း၏ မျက်လုံးများသည် လင်းလက်နေသော မျှော်စင်အပေါ်တွင် စွဲမြဲနေပြီး လူတိုင်း မျှော်လင့်တကြီး စောင့်ကြည့်နေကြသကဲ့သို့ ရှိလေသည်။

အထပ် ၈၀ ဆိုသည်မှာ အတားအဆီး တစ်ခု၊ ကောင်းကင် ချောက်ကမ်းပါး တစ်ခု၊ ဖြတ်ကျော်၍ မရနိုင်သော သံခြေကျင်း တစ်ခု ဖြစ်ပေသည်။

အထပ် ၈၀ သည် နယ်နိမိတ် တစ်ခုလည်း ဖြစ်လေသည်။ ၇၁ ထပ်မှ ၇၉ ထပ် အထိသည် အဋ္ဋမအဆင့် အတွင်းတွင် ရှိသောကြောင့် နှိုင်းယှဉ်ရလျှင် လွယ်ကူသေးသည်ဟု ဆိုနိုင်ပေသည်။

အကယ်၍ ၈၀ ထပ်ကို ချိုးဖျက်နိုင်ပါက ကိုးခုမြောက် အဆင့်သို့ ရောက်ရှိသွားမည် ဖြစ်ပြီး ခက်ခဲမှု အဆင့်သည်လည်း နောက်တစ်ဆင့်သို့ မြင့်တက်သွားမည် ဖြစ်ချေ၏။

လူတိုင်း၏အကြည့်အောက်တွင် ကောင်းကင်ဆက်နွယ်မျှော်စင်မှ အလင်းရောင်သည် ရပ်တန့်မသွားဘဲ ဖြည်းညင်းစွာ ဆက်လက် လင်းလက်လာလေသည်။

နောက်ဆုံးတွင်...

"၈၁ ထပ်..."

တစ်စုံတစ်ယောက်က ရုတ်တရက် အာမေဋိတ်သံဖြင့် အော်ဟစ်လိုက်ရာ လူအများ စိတ်လှုပ်ရှားသွားကြလေသည်။

ထင်မှတ်ထားသည့်အတိုင်းပင် ကောင်းကင်ဆက်နွယ်မျှော်စင်သည် ၈၁ ထပ်အထိ လင်းလက်လာခဲ့ပြီး ရပ်တန့်မည့် အရိပ်အယောင် မရှိဘဲ ဆက်လက် တက်သွားနေဆဲ ဖြစ်ပေသည်။

၈၁ ထပ်သည် ကိုးခုမြောက် အဆင့် ပါရမီဟု သတ်မှတ်ထားပြီး ဖြစ်ချေ၏။

ထိုအချိန်တွင် ဖုန်းကလန် နန်းတော်၏ နက်ရှိုင်းသော နေရာမှ ကြည့်ရှုနေသူများပင်လျှင် သူတို့ရှေ့မှ မြင်ကွင်းကြောင့် တုန်လှုပ်သွားကြလေသည်။