အသီးနား၏ ဖွင့်ဟ ဝန်ခံမှု

ဗင်းဆင့် တစ်ယောက် လက်ဖျောက် တစ်ချက် တီးလိုက်ရုံဖြင့် 'ထာဝရ ပျက်သုဉ်းခြင်း' ၏ အစွမ်းကို သုံးကာ တိုက်ခိုက်သူ အားလုံးကို ချက်ချင်းပင် ပြာအဖြစ်သို့ ပြောင်းလဲပစ်လိုက်သည်။

ထိုနေရာရှိ လူများမှာ ဘာဖြစ်သွားမှန်း မသိသော်လည်း သူတို့ မြင်တွေ့လိုက်ရသည့် မြင်ကွင်းမှာ အလွန်ပင် ထိတ်လန့်ဖွယ် ကောင်းလှသဖြင့် အချို့မှာ မခံနိုင်ဘဲ သတိလစ်သွားကြသည်။

ဗင်းဆင့် ဤသာမန်လူများ၏ တုံ့ပြန်မှုကို ကြည့်ပြီး မည်သူတို့ကို ရွေးချယ်ရမည်ကို သိရှိသွားပြီ ဖြစ်သည်။ အကယ်၍ မပါဝင်ချင်သူများ ရှိပါက ကလောက်ကို သူတို့၏ မှတ်ဉာဏ်များအား ဖျက်ခိုင်းကာ ပြန်လွှတ်ပေးရန် သူ ဆုံးဖြတ်ထားသည်။ သန့်ရှင်းရေး လုပ်ခြင်းမှာ လျှို့ဝှက် ဓမ္မထုံးတမ်း မျှော်စင်၏ အထူးပြု လုပ်ငန်းတစ်ခု ဖြစ်သည်။

အန်နီမှာ သူမ၏ သူငယ်ချင်း ဖြစ်သူ ဒဏ်ရာရသွားမည်ကို စိုးရိမ်ကာ မျက်ရည်များဖြင့် ကြည့်လိုက်၏။

"အသီးနား... နင်ဘာဖြစ်သွားသေးလဲ... အဆင်ပြေလား... နင်ကတော့လေ ငါ့ကို သေမတတ် ထိတ်လန့်အောင် လုပ်လိုက်တာပဲ"

အသီးနားက သက်ပြင်းချလိုက်၏။

"ရပါတယ်... ငါ ဘာမှမဖြစ်ပါဘူး... ဒါပေမဲ့ ငါ့အတွက် နောက်ပြန်လှည့်ဖို့ လမ်းမရှိတော့ဘူး... ဒါက လောင်မီးအကြွင်း တစ်ယောက်ရဲ့ ကံကြမ္မာပဲ”

အသီးနားသည် လောင်မီးအကြွင်း ဟု ခေါ်ဝေါ်သည့် မျိုးနွယ်စုဝင် တစ်ဦးဖြစ်သည်။ သူမ မည်သူမည်ဝါ ဖြစ်ကြောင်း သတင်းအချက်အလက်နှင့် အစွမ်းများကို အသုံးပြုပုံမှာ သူမ၏ မိဘဘိုးဘွားများထံမှ ဆင်းသက်လာခဲ့ခြင်း ဖြစ်သည်။

သို့သော်လည်း... အမှန်တကယ်တွင် အသီးနားသည် ဤအစွမ်းများကို ဆက်ခံလိုစိတ် မရှိခဲ့ဘဲ သာမန်လူတစ်ယောက်အဖြစ်သာ နေထိုင်လိုခဲ့သူ ဖြစ်သည်။ ထို့ကြောင့်ပင် သူမသည် လျှို့ဝှက်ဆန်းကြယ်လှသော မိသားစုထံမှ ထွက်ခွာလာပြီးနောက် ဘဝ၏ ပထမတစ်ဝက်ကို သာမန်လူများကြားတွင်သာ ကုန်ဆုံးစေခဲ့သည်။ သို့သော်လည်း... သူမတွင် အစွမ်းများ ရှိနေပြီးသား ဖြစ်သဖြင့် သဘာဝလွန် စွမ်းအားရှင် လောက၏ ဖြစ်ရပ်များကိုမူ အမြဲတစေ စိတ်ဝင်တစား စောင့်ကြည့်နေမိတတ်သည်။

အသီးနားမှာ သာမန်လူတစ်ယောက်အနေဖြင့် နေထိုင်နေသော်လည်း အခြားသူများ မမြင်နိုင်သည့် အရိပ်အယောင်များကို ရှာဖွေနိုင်ခဲ့သည်။ သို့သော်လည်း ထိုအကြောင်းများကို မည်သူ့ကိုမျှ မပြောခဲ့ချေ။

ဥပမာအားဖြင့် ဖာသာဗင်းဆင့်နှင့် ပတ်သက်သည့် အခင်းဖြစ်စဉ်တွင်လည်း ဂတ်စ်အိုး ပေါက်ကွဲမှု ဟု ဆိုကြသော်လည်း... အမှန်တကယ်တွင် ၎င်းမှာ သဘာဝလွန် စွမ်းအားရှင် နှစ်ဦး တိုက်ခိုက်မှုကြောင့် ဖြစ်ပေါ်လာသည့် အကျိုးဆက်ဖြစ်ကြောင်း သူမ သိနှင့်ပြီးသား ဖြစ်သည်။

ထို့နောက်... အိပ်မက်ထဲတွင် နေမင်း၏ အစွမ်းကို မြင်လိုက်ရသည့် အချိန်မှစ၍ အသီးနားမှာ ရှောင်လွှဲ၍ မရနိုင်တော့ကြောင်း သဘောပေါက်သွားခဲ့သည်။ သမိုင်းဦးကာလကတည်းက ရှိခဲ့သည့် လောင်မီးအကြွင်း မျိုးနွယ်တို့၏ ဗီဇဆန္ဒက သူမအား ဤကံကြမ္မာကို လက်ခံရန် တွန်းအားပေးလာခဲ့သည်။

သဘာဝလွန် စွမ်းအားရှင်များ၏ ခြေရာကို သူမ အမြဲတမ်း လိုက်ရှာနေခဲ့ခြင်းမှာ စိတ်ဝင်စားမှုကြောင့် မဟုတ်ဘဲ သူမ၏ လောင်မီးအကြွင်း သွေးသားထဲမှ ငြိမ်သက်ခြင်းမရှိသည့် တောရိုင်း သဘာဝကြောင့် ဖြစ်ကြောင်း ယခုမှပင် သူမ သိလိုက်ရတော့သည်။ သူမက သာမန်လူတစ်ယောက်အဖြစ် ဇာတ်မြှုပ်နေရန် ကံပါလာသူ မဟုတ်ချေ။

အသီးနားက အသက်ပြင်းပြင်းတစ်ချက် ရှူလိုက်ရင်း သူငယ်ချင်း ဖြစ်သူကို စိုက်ကြည့်ကာ ပြောလိုက်သည်။

"အန်နီ... တကယ်တော့ ငါ နင့်ကို အကြာကြီး ဖုံးကွယ်ထားခဲ့တာ ရှိတယ်..."

"အဲဒါ ခုနက လူပြောသွားတဲ့ လောင်မီးအကြွင်း ဆိုတာလား... အသီးနား... နင်က ဖာသာဗင်းဆင့် ပြောတဲ့ အဲဒီလို... သဘာဝလွန် စွမ်းအားရှင် တစ်ယောက်လား..."

အန်နီက မျက်မှောင်ကြုတ်ရင်း မေးလိုက်၏။

ဗင်းဆင့်သည် ထူးခြားစွမ်းအားရှင်များအကြောင်းနှင့် နေမင်းယုံကြည်မှုအကြောင်းကို သူတို့အား သေသေချာချာ ရှင်းပြထားပြီး ဖြစ်သည်။

အသီးနားက ခေါင်းညိတ်ပြလိုက်သည်။

“လောင်မီး အကြွင်းတွေဆိုတာ ရှေးဟောင်းခေတ်တည်းက နေမင်းကို ယုံကြည်ခဲ့တဲ့ မျိုးနွယ်စုက ဆင်းသက်လာတဲ့သူတွေပဲ... အခုတော့ ငါတစ်ယောက်ပဲ ကျန်တော့တာ”

"ပြောရရင် ငါက မွေးကတည်းက နေမင်းယုံကြည်ခဲ့တဲ့သူ တစ်ယောက်ပဲ... အမိုးခုံး ဘုရားကျောင်းတော်ကို ကိုးကွယ်ခဲ့တာက ဟန်ပြသက်သက်ပဲ... တကယ်တော့ ငါတို့ဆီကို နေမင်းဆီက သတင်းစကား မရောက်လာတာ နှစ်ပေါင်း တစ်သောင်းကျော်နေပြီ... နေမင်းကြီး ပျောက်ကွယ်သွားပြီလို့တောင် ထင်ခဲ့ကြတာ... အဲဒါကြောင့် ငါက သာမန်လူတစ်ယောက်လို ဟန်ဆောင်ပြီး အချိန်ဖြုန်းနေနိုင်ခဲ့တာပေါ့...”

"ဒါပေမဲ့ အခု နေမင်းက ပြန်ပေါ်လာပြီဆိုတော့ လောင်မီးအကြွင်း တစ်ယောက်အနေနဲ့ နေမင်းရဲ့ မီးလျှံတွေ ဖြစ်လာဖို့ လောင်စာအဖြစ် ငါ ပေးဆပ်ရတော့မယ်... အဲဒါက ငါတို့ရဲ့ တာဝန်ပဲ"

"ဒါဆို... ပေါလ်ကရော"

အန်နီက စိုးရိမ်တကြီး မေးလိုက်၏။ သူတို့နှစ်ဦးစလုံးတွင် မိသားစုကိုယ်စီ ရှိကြပြီး အမျိုးသမီး အဖွဲ့အစည်းတစ်ခုတွင် ခင်မင်ခဲ့ကြသူများ ဖြစ်သည်။

အသီးနားက အနည်းငယ် ရှက်ကိုးရှက်ကန်းဖြင့် ဆံပင်ကို ပွတ်သပ်လိုက်၏။

"အဲဒါက... အဟမ်း... ဒီကိစ္စနဲ့ ဘာမှမဆိုင်ပါဘူး... ဘာပဲဖြစ်ဖြစ် နေမင်းယုံကြည်မှုက အမိုးခုံး ဘုရားကျောင်းတော်ရဲ့ နေရာမှာ အစားထိုးဝင်ရောက်လာရင် ငါတို့က သာသနာ့ဝန်ထမ်းတွေ ဖြစ်လာမှာပဲ... နောက်ပြီး နေမင်း ယုံကြည်မှု အရ ငါတို့တွေ အိမ်ထောင်သည် အဖြစ် ဆက်နေလို့ရမှာပါ... အချိန်တန်တဲ့အထိ သူ့ကို အမှောင်ချထားလိုက်ရင် အားလုံး အဆင်ပြေသွားမှာပါ"

အသီးနားက ခေတ္တတွေဝေသွားပြီးနောက်မှ ဆက်ပြောလိုက်သည်။

"ငါတို့ အခုလို ဒီအခြေအနေအထိ ရောက်လာပြီဆိုတော့ နင့်ကို တောင်းပန်စရာ တစ်ခုရှိသေးတယ်... ငါ့ကို သေချာကြည့်ဦး..."

အန်နီက သူငယ်ချင်းကို ကြည့်လိုက်ရာ မှင်တက်သွားလေ၏။ သူမရှေ့မှ အနည်းငယ် ဝဖြိုးပြီး ရိုးရိုးစင်းစင်းရှိလှသော သက်လတ်ပိုင်း အမျိုးသမီး ‘အသီးနား’ မှာ ရုတ်တရက် အသားညိုညို၊ ဆံပင်အနက်ရောင်နှင့် အသက် ၃၀ ခန့်ရှိသော အမျိုးသမီးအဖြစ် ပြောင်းလဲသွားသည်။

"ဒါက ငါတို့ အသုံးများဆုံး ရိုးရှင်းတဲ့ ထင်ယောင်ထင်မှား မှော်ပညာ တစ်ခုပါပဲ"

အသီးနားက ရှင်းပြလိုက်သည်။

"သဘာဝလွန် စွမ်းအားရှင်တွေက အသက်ရှည်ကြတယ်... တကယ်တော့ ငါ အိမ်ထောင် ၃ ဆက် ရှိခဲ့ပြီးပြီ... အဆိုးဆုံး ဖြစ်လာရင်လည်း ကွာရှင်းပြီး အသစ်က ပြန်စလိုက်ရုံပေါ့"

အန်နီမှာ လုံးဝကို အံ့သြမှင်တက်သွားခဲ့၏။ ဖြစ်ပျက်ခဲ့သမျှ အရာအားလုံးကို သူမ လက်ခံနိုင်သေးသော်လည်း သူမ၏ ကမ္ဘာအမြင်တစ်ခုလုံးမှာ လုံးဝ ပြောင်းလဲသွားပြီး သူမ သိခဲ့သော အမှန်တရားများမှာလည်း ပြိုလဲလုနီးပါး ဖြစ်နေပြီဖြစ်သည်။

"ကောင်းပြီလေ..."

အန်နီက တောင့်တောင့်ကြီး ရေရွတ်လိုက်သည်။ မည်သို့ပင် ဆို‌စေ အသီးနားမှာ သူမ၏ အခင်ဆုံး သူငယ်ချင်း မဟုတ်ပါလော။ ဤသို့ ဖြစ်လာမှတော့ လက်ခံရုံမှတစ်ပါး အခြားမရှိချေ။

စာအုပ် ကဖေးကို ရှင်းလင်းနေသည့် အခြားသူများမှာလည်း ရုတ်တရက် ပေါ်လာသည့် စစ်နတ်သမီးလို အမျိုးသမီးကို အံ့သြတကြီး ကြည့်နေမိကြသည်။ မည်သူမှ လာမပြောသော်လည်း... သူတို့နှစ်ဦး၏ စကားဝိုင်းကိုမူ ခိုးကြောင်ခိုးဝှက် နားစွင့်နေကြသည်။

အန်နီက အသီးနား အနားသို့ အနည်းငယ် ကပ်ရင်း ပြောလိုက်၏။

"ဖာသာက ရဲဌာနက အရာရှိတစ်ယောက်နဲ့လည်း သိနေတယ်နော်... သူ့ရဲ့ အဆက်အသွယ်တွေက တကယ်ကို ကျယ်ပြန့်တာပဲ"

ဗင်းဆင့်က နေမင်းယုံကြည်မှုအကြောင်း မိတ်ဆက်ပေးခဲ့သော်လည်း ကလောက်ကတော့ လျှို့ဝှက် ဓမ္မထုံးတမ်း မျှော်စင်အကြောင်း မပြောခဲ့ချေ။ ထို့ကြောင့်ပင်... အန်နီသည် ကလောက်ကို ရဲဌာနမှ ထူးချွန်သည့် ရဲအရာရှိတစ်ဦးဟုသာ ထင်နေခြင်း ဖြစ်သည်။ ထို့ကြောင့် ဖာသာဗင်းဆင့်က ရဲအရာရှိတစ်ဦးကို အလွယ်တကူ ခိုင်းစေနိုင်ခြင်းအပေါ် အံ့သြနေမိသည်။

"ကျုပ် မစ္စတာကလောက်ကို မသိပါဘူး... သူက အကြောင်းပြချက် တစ်ချို့ကြောင့် လာကူညီတာပါ"

ဗင်းဆင့်က ရုတ်တရက် သူတို့အနားသို့ လျှောက်လာကာ ဝင်ထိုင်လိုက်၏။

"ကျွန်တော် အသက်ရှင်နေတာ၊ စွမ်းအားတွေ ရလာတာနဲ့ ကလောက်ရဲ့ အကူအညီကို ရတာတွေဟာ အမှန်တော့ မစ္စတာလင် ကြောင့်ပါပဲ..."

သူ၏ ခန္ဓာကိုယ်မှာ နေမင်း၏ အနှစ်သာရနှင့် ပေါင်းစပ်သွားပြီဖြစ်သဖြင့် လူသားတစ်ယောက် မဟုတ်တော့ကြောင်းကိုတော့ ဗင်းဆင့် မပြောခဲ့ချေ။ သို့သော်လည်း... သူကိုယ်သူ ဤယုံကြည်မှုသစ်၏ ပုပ်ရဟန်းမင်းကြီးနှင့် တည်ထောင်သူအဖြစ် မှတ်ယူထားသည်။

အမိုးခုံး ဘုရားကျောင်းတော်ကို ဖြိုဖျက်ရန်မှာ သေချာနေပြီ ဖြစ်သော်လည်း နေမင်းယုံကြည်မှု အခိုင်အမာ တည်ဆောက်ရန်အတွက် အချက်အလက်အချို့ လိုအပ်နေသေးသည်။ ဥပမာအားဖြင့် ခိုင်လုံသော သမိုင်းကြောင်းမျိုးပင်။

ဗင်းဆင့်၏ မူလအစီအစဉ်မှာ ထိုကိစ္စနှင့် ပတ်သက်၍ ဆိုင်ရှင်လင့်ထံမှ အကူအညီတောင်းရန် ဖြစ်သော်လည်း ယခု လောင်မီးအကြွင်း တစ်ယောက် ပေါ်လာခြင်းမှာ ဤပြဿနာကို ဖြေရှင်းရန် အကောင်းဆုံး အခွင့်အရေး ဖြစ်လာသည်။ နေမင်းကို ကိုးကွယ်ခဲ့သည့် ရှေးဟောင်း မျိုးနွယ်စုဝင် တစ်ဦး ရှိနေခြင်းက နေမင်းယုံကြည်မှု၏ သမိုင်းကြောင်းကို ပိုမို ခိုင်မာသွားစေလိမ့်မည် ဖြစ်သည်။

ထို့ကြောင့်ပင်... အသီးနားကို နေမင်းယုံကြည်မှုအတွင်းသို့ သိမ်းသွင်းကာ တမန်တော် ၁၀ ပါး၏ အထက်ရှိ ဘုန်းတော်ကြီး အဖြစ် ခန့်အပ်ရမည်။ သူမက စိတ်ရိုင်းဝင်နေသည့် စစ်သည်တော် စတိုင် ဖြစ်နေလျှင်ပင် အလွန် သင့်တော်ပေသည်။

ဗင်းဆင့်မှာ စောစောတည်းကပင် အသီးနား၏ စကားများကို နားစွင့်နေခဲ့ခြင်း ဖြစ်ပြီး သူမ ကိုယ်တိုင်လည်း နေမင်းယုံကြည်မှုတွင် ပါဝင်လိုစိတ် ရှိနေကြောင်း သိရှိသွားသဖြင့် တရားဝင် ဖိတ်ခေါ်ရန် ရောက်လာခြင်း ဖြစ်သည်။

***