သတ်ဖြတ်ခြင်းနတ်ဘုရားစင်မြင့်
Vol. 64 Ch. 925
နျန်ချီယွီသည် သူ့ကို စူစူးဝါးဝါး ကြည့်လိုက်ပြီးနောက် တစ်စုံတစ်ခုကို စဉ်းစားမိသွားဟန်ဖြင့် ချောင်းတစ်ချက်ဟန့်ကာ ရှက်ဒေါသထွက်နေသော အမူအရာကို အနည်းငယ် လျှော့ချလိုက်သည်။
“ဟင်း... ဘာပဲဖြစ်ဖြစ် မင်း ပေါ်ပေါ်ထင်ထင် လုပ်ဆောင်ဖို့ လိုတယ်။ ဒီနေရာက ငါတို့နယ်မြေ မဟုတ်တဲ့အတွက် မင်း လုပ်ချင်တာ အကုန်လုပ်လို့ရတယ်...”
နျန်ချီယွီက တည်ငြိမ်စွာ ပြောလိုက်သည်။
“ဒါပေမဲ့ ဒီနေရာက အန္တရာယ်တွေနဲ့ ပြည့်နှက်နေတယ်။ စိတ်ကြိုက် တိုက်ခိုက်လို့ရတဲ့အတွက် ဒီမှာတင် သေသွားနိုင်တယ်။ ဒီနေရာက ငရဲပဲ။ လုံးဝကို ငရဲခန်းတစ်ခုပဲ...”
သူမ စတင် လေးနက်လာပြီး မျက်ဝန်းထဲတွင် အေးစက်သော အရိပ်အယောင်များ ဖြတ်ပြေးသွားသည်။ ယခင်ကကဲ့သို့ နောက်ပြောင်နေသော ပုံစံမျိုး လုံးဝ မရှိတော့ချေ။
“ဒီနေရာက ထျန်ယုနတ်ဘုရားနယ်မြေရဲ့ ပိုင်နက်ထဲမှာ မရှိတော့ဘူးပေါ့...”
ယီထျန်းယွမ်က ခေါင်းညိတ်လိုက်သည်။ သူ ဘာလုပ်ရမည်ကို သိရှိသွားပြီပင်။
“ဟုတ်တယ်။ အကြမ်းဖျင်းပြောရရင် နတ်ဘုရားနယ်မြေ အမြောက်အများရဲ့ ကြားထဲမှာ ရှိနေပြီး ဘယ်သူကမှ စီမံခန့်ခွဲတာမျိုး မရှိတဲ့နေရာပဲ။ ရှုပ်ထွေးပွေလီတဲ့ နေရာတစ်ခုလို့ ပြောလို့ရတယ်...”
နျန်ချီယွီက ရှင်းပြလိုက်သည်။
“ဒါဆိုရင် အဲဒီတုန်းက အကြီးအကဲနျန်လည်း ဒီနေရာကို လာပြီး လေ့ကျင့်ခဲ့ဖူးတာပေါ့...”
ယီထျန်းယွမ်က မေးမြန်းလိုက်သည်။
“ဟုတ်တယ်။ ဒါပေမဲ့ ဒီအကြောင်းကို သိတဲ့သူ အလွန်နည်းတယ်။ ဒီနေရာက လူတိုင်း လာနိုင်တဲ့ နေရာမျိုး မဟုတ်ဘူး...”
နျန်ချီယွီသည် ဝေးလံသော နေရာရှိ ဂြိုဟ်ကို ကြည့်လိုက်ရာ သူမ၏ မျက်ဝန်းထဲတွင် လွမ်းဆွတ်မှု တစ်စက်မျှ မရှိဘဲ သတ်ဖြတ်လိုစိတ်များသာ ရှိနေသည်။
“ဒီကို လာတယ်ဆိုတာ သေခြင်းတရားနဲ့ ရင်ဆိုင်တာပဲ။ ဘယ်သူကမှ မိမိရဲ့ တပည့်ကို ဒီကို ခေါ်လာဖို့ အဆင်သင့် မဖြစ်ကြဘူး။ အကယ်၍ မင်း ဒီနေရာမှာ ခြေကုပ်ယူနိုင်ပြီဆိုရင် နတ်ဘုရားနယ်မြေ တက်လှမ်းခြင်းတိုက်ပွဲမှာ မင်း သေချာပေါက် နေရာတစ်နေရာ ရလိမ့်မယ်...”
“တက်လှမ်းခြင်းတိုက်ပွဲအကြောင်း ပြောရရင် အကြီးအကဲနျန်က ဘာလို့ မဝင်ပြိုင်ခဲ့တာလဲ...”
ယီထျန်းယွမ် အလွန် သံသယဝင်သွားသည်။ သူမ၏ ပါရမီနှင့်ဆိုလျှင် ထိပ်ဆုံး ဆယ်ယောက်ထဲ မဝင်လျှင်တောင် အနည်းဆုံး ထိပ်ဆုံး တစ်ရာထဲသို့ ဝင်နိုင်သည် မဟုတ်ပါလား။
တကယ့်ကို တပည့်အဖြစ် ရွေးချယ်ခံရမည့်သူမှာ တစ်ရာတည်းသာ ရှိသည်။ ထိုမျှများပြားသော အဆင့် ၁ နတ်ဘုရားနယ်မြေများမှ စေလွှတ်လိုက်သော တပည့်များမှာ ရာနှင့် ထောင်နှင့်ချီကာ ရှိနေပြီး စုစုပေါင်းလိုက်လျှင် သောင်းနှင့်ချီကာ ရှိနေပေလိမ့်မည်။
ထောင်သောင်းချီသော လူများထဲမှ လူတစ်ရာတည်းကိုသာ ရွေးချယ်ခြင်း ဖြစ်ရာ မည်မျှအထိ ရက်စက်ကြမ်းကြုတ်သည်ကို မြင်နိုင်ပေသည်။
“မပြိုင်ခဲ့ပါဘူး။ ငါက အဲဒါကို စိတ်မဝင်စားလို့...”
နျန်ချီယွီက ခေါင်းခါလိုက်သည်။ သူမသည် ဤအကြောင်းကို ဆက်ပြောရန် အလိုမရှိတော့ပုံရသည်။
သူမ၏ မျက်ဝန်းထဲတွင် နောင်တရသော အရိပ်အယောင်များ မရှိဘဲ ခိုင်မာပြတ်သားသော အကြည့်များသာ ပြည့်နှက်နေသည်။
ယီထျန်းယွမ် ဆက်မမေးတော့ဘဲ စိတ်ထဲတွင်သာ ခန့်မှန်းနေမိသည်။ သို့သော် သူ ထုတ်မပြောချေ။ အချို့ကိစ္စများကို စိတ်ထဲတွင် သိနေလျှင် ရပြီဖြစ်ရာ စိတ်ကြိုက် မပြောဝံ့ချေ။
မည်သို့ပင်ဖြစ်စေ နျန်ချီယွီသည် မိမိအပေါ် စေတနာဆိုး မရှိသည်မှာ သေချာလှသည်။
“မင်းရှေ့က ဒီဂြိုဟ်ကို သတ်ဖြတ်ခြင်းနတ်ဘုရားဂြိုဟ်လို့ ခေါ်တယ်။ အထဲမှာ ဘယ်သူ တည်ဆောက်ခဲ့မှန်း မသိတဲ့ ထူးခြားတဲ့ နတ်ဘုရားစင်မြင့် တစ်ခု ရှိတယ်။ အဲဒီထဲမှာ ပြင်းထန်တဲ့ သတ်ဖြတ်လိုစိတ်တွေနဲ့ ပြည့်နှက်နေပြီး အဲဒီထဲမှာ ကျင့်ကြံမယ်ဆိုရင် သတ်ဖြတ်ခြင်းလမ်းစဉ်အတွက် အံ့ဩဖွယ်ကောင်းတဲ့ ရလဒ်တွေ ရှိလိမ့်မယ်။ ဒါပေမဲ့ အဲဒီထဲမှာ သတ်ဖြတ်လိုစိတ်ကြောင့် စိတ်ရိုင်းဝင်သွားတဲ့ ကျင့်ကြံသူတွေ အမြောက်အများ ရှိတယ်။ သူတို့ကို သတ်လိုက်မယ်ဆိုရင် မင်း ပိုပြီးတော့ သတ်ဖြတ်လိုစိတ်တွေ ရလာလိမ့်မယ်...”
“ဒီထူးခြားတဲ့ နတ်ဘုရားစင်မြင့်ထဲမှာ သတ်ဖြတ်လိုစိတ်တွေ များများ စုဆောင်းနိုင်လေလေ စင်မြင့်ရဲ့ အသိအမှတ်ပြုမှုကို ပိုရလေလေပဲ။ မင်းရဲ့ တာဝန်က ရိုးရှင်းပါတယ်။ သတ်ဖြတ်ခြင်းနတ်ဘုရားရဲ့ အသိအမှတ်ပြုမှုကို ရအောင် ယူရမယ်...”
နျန်ချီယွီက သူ့ကို စူးစိုက်ကြည့်လိုက်ရာ သူမ၏ မျက်ဝန်းထဲတွင် မျှော်လင့်ချက်များ ပိုမို ပါဝင်နေသည်။
“သတ်ဖြတ်ခြင်းနတ်ဘုရားရဲ့ အသိအမှတ်ပြုမှု ဟုတ်လား။ ဒါဆိုရင် ဒါကို သတ်ဖြတ်ခြင်းနတ်ဘုရားစင်မြင့်လို့ ခေါ်တာလား”
ယီထျန်းယွမ်က သိချင်စိတ်ဖြင့် မေးမြန်းလိုက်သည်။
“မှန်တယ်။ သတ်ဖြတ်ခြင်းနတ်ဘုရားစင်မြင့်ပဲ... ရူးသွပ်မတတ် သတ်ဖြတ်ပြီးတဲ့နောက် ဒါမှမဟုတ် လုံလောက်တဲ့ သတ်ဖြတ်လိုစိတ်တွေကို စုပ်ယူပြီးတဲ့နောက် မင်း အသိအမှတ်ပြုမှု ရလိမ့်မယ်...”
နျန်ချီယွီက ဆက်ပြောလိုက်သည်။
“အခုအချိန်အထိ အသိအမှတ်ပြုမှု ရထားတဲ့သူ ရှစ်ယောက်ပဲ ရှိသေးတယ်။ ဒါပေမဲ့ သူတို့ရဲ့ နာမည်အစစ်အမှန်က ဘာလဲ၊ ဘယ်သူလဲဆိုတာ ဘယ်သူမှ မသိဘူး။ သူတို့တွေက ရုပ်ဖျက်ပြီး လာကြတာ။ အားလုံးက ငါတို့လိုပဲ မျက်နှာဖုံးတွေ တပ်ထားကြတာ။ တစ်ယောက်နဲ့တစ်ယောက် ဘယ်သူမှန်း မသိကြဘူး။ ဒါမှလည်း စိတ်ကြိုက် သတ်ဖြတ်တဲ့အခါ ရန်ငြိုးတွေ နောက်က ပါမလာမှာ”
“အကြီးအကဲနျန်ကော မရခဲ့ဘူးလား”
ယီထျန်းယွမ်က သံသယဝင်သွားသည်။
“ငါကတော့ မရခဲ့တာ အမှန်ပဲ။ ဒါပေမဲ့ ငါ အများကြီးတော့ အကျိုးကျေးဇူး ရခဲ့ပါတယ်။ ဒါကြောင့် မင်းကို အသိအမှတ်ပြုမှု ရစေချင်တာ။ ဒါဆိုရင် မင်းရဲ့ အင်အားက အကြီးအကျယ် တိုးတက်လာပြီး နတ်ဘုရားနယ်မြေ တက်လှမ်းခြင်းတိုက်ပွဲရဲ့ ရှေ့တန်းမှာ ရှိနေနိုင်လိမ့်မယ်”
သူမသည် နတ်ဘုရားနယ်မြေ တက်လှမ်းခြင်းတိုက်ပွဲကိုသာ အဓိကထား ပြောဆိုနေခြင်း ဖြစ်ပြီး အရာအားလုံးမှာ ဤတိုက်ပွဲအတွက်ပင် ဖြစ်သည်။
နျန်ချီယွီသည် ဤတိုက်ပွဲကို အမှန်တကယ် အလေးထားကြောင်း သိသာလှသည်။ ထျန်ယုနတ်ဘုရားနယ်မြေအတွက် အကျိုးအမြတ်များစွာ ရယူပေးလိုခြင်း ဖြစ်ပေလိမ့်မည်။ သူမ ဘာကြောင့် မပါဝင်သလဲဆိုသည်ကို ယီထျန်းယွမ် အလွယ်တကူ ခန့်မှန်းနိုင်သည်။ ဤသည်မှာ ထျန်ယုနတ်ဘုရားနယ်မြေနှင့် ပတ်သက်နေပေလိမ့်မည်။
ဖြစ်နိုင်ခြေမှာ သူမသည် နောက်တက်မည့် ဆက်ခံသူ ဖြစ်သောကြောင့် ပါဝင်ခြင်း မပြုရန် ရွေးချယ်ခဲ့ခြင်း ဖြစ်ပေလိမ့်မည်။ အကယ်၍ ပါဝင်ခဲ့ပါက ရွေးချယ်ခံရရန် အလွန်လွယ်ကူလှသည်။ ရွေးချယ်ခံရပြီးပါက ငြင်းပယ်ရန် မဖြစ်နိုင်တော့ချေ။ သို့မဟုတ်လျှင် လူကို လှည့်စားခြင်းနှင့် အတူတူပင်ဖြစ်ရာ နောက်ဆက်တွဲမှာ အလွန် ပြင်းထန်ပေလိမ့်မည်။
သေသေချာချာ စဉ်းစားကြည့်လျှင် နျန်ချီယွီနှင့် ထျန်ယုနယ်မြေအရှင်၏ သွေးမျိုးဆက်မှာ ထျန်ယုမျိုးနွယ်စုဝင်များ ဖြစ်ကြသည်။ နောက်ဆက်ခံသူအဖြစ် ရွေးချယ်ခြင်းမှာ ပုံမှန်ပင် ဖြစ်သဖြင့် သူမအနေဖြင့် ထွက်ခွာသွား၍ မရချေ။
“ကောင်းပြီ။ ကျွန်တော် ကြိုးစားကြည့်ပါ့မယ်...”
ယီထျန်းယွမ်က ခေါင်းညိတ်လိုက်သည်။ သူသည် အစွမ်းကုန် ကြိုးစားမည်ဟုသာ ပြောနိုင်သည်။ မည်သူက အရာအားလုံးကို အာမခံနိုင်ပါမည်နည်း။
အရေးကြီးသော အချက်များကို မှာကြားပြီးနောက် နျန်ချီယွီသည် ဝိညာဉ်သင်္ဘောကို ဆက်လက် ထိန်းချုပ်ကာ အတွင်းသို့ မောင်းနှင်သွားတော့သည်။ ဤကိစ္စများကို ရှင်းရှင်းလင်းလင်း ပြောပြထားရမည် ဖြစ်သည်။ မဟုတ်လျှင် ယီထျန်းယွမ် အတွင်းသို့ ရောက်သွားသည့်အခါ သူမ ရှင်းပြရန် မဖြစ်နိုင်တော့ချေ။
အတွင်းမှလူများက ရှင်းပြပေးလိမ့်မည်ဟု မျှော်လင့်၍ မရနိုင်သည် မဟုတ်ပါလား။ ထိုသူမှာ တိုက်ရိုက် တိုက်ခိုက်လာမည် ဖြစ်ရာ သူနှင့်နှင့် စကားအပို ပြောနေမည် မဟုတ်ချေ။
အတွင်းသို့ မောင်းနှင်ဝင်ရောက်ပြီးနောက် နျန်ချီယွီသည် ဝိညာဉ်သင်္ဘောကို လျင်မြန်စွာ သိမ်းဆည်းလိုက်သည်။ အခြားသူများမှာလည်း ထိုနည်းတူပင်ဖြစ်ပြီး အသီးသီး ဝိညာဉ်သင်္ဘောများကို သိမ်းဆည်းလိုက်ကြသည်။ ယီထျန်းယွမ် လှည့်ကြည့်လိုက်ရာ ပတ်ဝန်းကျင်ရှိ လူတိုင်းမှာလည်း ဝိညာဉ်သင်္ဘောများကို သိမ်းဆည်းပြီးနောက် ပတ်ဝန်းကျင်ကို သတိကြီးစွာဖြင့် ကြည့်နေကြသည်ကို တွေ့ရသည်။
မတူညီသော နတ်ဘုရားနယ်မြေများမှ ဖြစ်ကြပြီး မိတ်ဆွေများ မဟုတ်ကြသဖြင့် အနည်းငယ် သတိထားရပေမည်။ ဤနေရာတွင် စိတ်ကြိုက် သတ်ဖြတ်နိုင်ပြီး မည်သည့် အပြစ်ပေးမှုမှ ခံရမည် မဟုတ်ချေ။
ယခုမှပင် ယီထျန်းယွမ်သည် ၎င်းတို့ ဘာကြောင့် ကောင်းကင်သခင်များကို လွှတ်လိုက်သလဲဆိုသည်ကို သိရှိသွားတော့သည်။ အကယ်၍ ကျင့်စဉ်အဆင့် အားနည်းနေပါက ထိုသူက အမြင်မကြည်ရုံဖြင့် တိုက်ခိုက်လာပါက တစ်ဖွဲ့လုံး သေဆုံးသွားနိုင်သည် မဟုတ်ပါလား။
ဘာပဲဖြစ်ဖြစ် မျက်နှာဖုံးများ တပ်ကာ အတွင်း၌ ရူးသွပ်စွာ သတ်ဖြတ်နေကြခြင်း ဖြစ်သည်။ အကယ်၍ မိမိလူကို သတ်မိပြီးနောက် အပြင်သို့ ထွက်လာသည့်အခါ အလွယ်တကူ ထွက်သွားခွင့်ပေးမည်လော။
“သွားကြစို့။ သူတို့ကို ဂရုစိုက်နေဖို့ မလိုဘူး...”
နျန်ချီယွီသည် သူ့ကို ခေါ်ဆောင်ကာ ရှေ့သို့ လှမ်းသွားတော့သည်။ ကောင်းကင်သခင်၏ အရှိန်အဝါကို တစ်စက်မျှ ဖုံးကွယ်မထားဘဲ ထုတ်ဖော်လိုက်ရာ အခြားသူများကို ဤဘက်ရှိ အင်အားကို သိရှိစေသည်။
“လူနှစ်ယောက်ပဲ လာတာလား။ တစ်စုံတစ်ရာသော လျှို့ဝှက်မိသားစုက ပါရမီရှင်တပည့်ကို လေ့ကျင့်ပေးဖို့ ခေါ်လာတာလား မသိဘူး...”
“ဖြစ်နိုင်တယ်။ ဘာပဲဖြစ်ဖြစ် အမျိုးသမီး ကောင်းကင်သခင် တစ်ယောက်ပဲ။ ဆက်ဆံရတာ မလွယ်ဘူး...”
၎င်းတို့သည် ဤဘက်သို့ တစ်ချက်ကြည့်လိုက်ပြီးနောက် ဆက်လက် ဂရုမစိုက်တော့ချေ။ ဤကဲ့သို့သော ကိစ္စမျိုးကို ၎င်းတို့ ဝင်မစွက်ဖက်လိုကြချေ။ အထူးသဖြင့် တစ်ဖက်တွင် ကောင်းကင်သခင် ပါဝင်နေသည့် အခြေအနေမျိုးတွင် ဖြစ်သည်။
ယီထျန်းယွမ်သည် ရှေ့ဘက်သို့ အကြည့်လွှဲလိုက်သည်။ ရှေ့တွင် မြင့်မားသော စင်မြင့်တစ်ခု ရှိနေသည်။ သို့သော် ဤစင်မြင့်မှာ အလွန် မမြင့်လှဘဲ ထိုရှေးဟောင်း မင်နတ်ဘုရားစင်မြင့်နှင့် နှိုင်းယှဉ်လျှင် အလွန် အားနည်းလှသည်။
သို့သော် အရည်အသွေးကို ကြည့်မည်ဆိုပါက ရှေးဟောင်း မင်နတ်ဘုရားစင်မြင့်ကို တိုက်ရိုက် အလဲထိုးနိုင်မည်ဖြစ်သည်။
- အထက်တန်း ပြန်လည်မွေးဖွားခြင်းအဆင့် ရတနာ...
အထက်တန်း ပြလည်မွေးဖွားခြင်းအဆင့် ရတနာတစ်ခုကို မည်သူမဆို ပိုင်ဆိုင်လိုကြသော်လည်း မည်သူမျှ ရယူနိုင်ခြင်း မရှိချေ။ ဤနေရာတွင် အမြဲတမ်း တည်ရှိနေကာ အခြားသူများကို အတွင်းသို့ ဝင်ခွင့်ပြုထားသည်။
နျန်ချီယွီသည် သူ့ကို ခေါ်ဆောင်ကာ သတ်ဖြတ်ခြင်းနတ်ဘုရားစင်မြင့်အတွင်းသို့ ဝင်ရောက်လိုက်သည်။ ဝင်လိုက်သည်နှင့် အထက်မှ ဖိနှိပ်လာသော ထိတ်လန့်ဖွယ် သတ်ဖြတ်လိုစိတ်များကို ခံစားလိုက်ရသည်။ ရင်ထဲတွင် အလွန် ပိတ်လှောင်နေသလို ခံစားရပြီး စိတ်လှုပ်ရှားမှုအချို့ပင် ဖြစ်ပေါ်လာစေသည်။ သတ်ဖြတ်ခြင်းအတွက် စိတ်လှုပ်ရှားမှုပင် ဖြစ်သည်။
သူ၏ တည့်တည့်တွင် အလွန်ကြီးမားသော အစီအရင်ကြီး တစ်ခု ရှိနေသည်။ အပြင်မှ ကြည့်လိုက်လျှင် အတွင်း၌ ကျင့်ကြံသူ အမြောက်အများ တွန့်လိမ်နေကြသည်ကို မြင်ရပြီး မျက်လုံးများမှာ နီရဲကာ စိတ်ရိုင်းဝင်နေသကဲ့သို့ ဖြစ်နေသည်။
၎င်းတို့မှာ စံပြ စိတ်ရိုင်းဝင်နေသူများ ဖြစ်ကြပြီး အတွင်းသို့ ယခုတင်က ဝင်လာသော ကျင့်ကြံသူများကို တွေ့သည်နှင့် ချက်ချင်း ပြေးဝင်ကာ တိုက်ခိုက်ကြတော့သည်။ စိတ်ရိုင်းဝင်နေသော အမျိုးအစားတူများအပေါ်တွင်မူ ဂရုမစိုက်ကြချေ။ ထိန်းချုပ်ခံထားရသကဲ့သို့ ပြင်ပမှ လာသော ကျင့်ကြံသူများကိုသာ တိုက်ခိုက်ကြသည်။
“ဒါက သတ်ဖြတ်ခြင်းနတ်ဘုရားစင်မြင့်လား...”
ယီထျန်းယွမ်သည် ရှေ့ရှိ ကျင့်ကြံသူ အမြောက်အများကို ကြည့်ကာ ရင်ထဲတွင် ရူးသွပ်မတတ် ဖြစ်သွားသည်။ အတွေ့အကြုံအမှတ်များ ရယူရမည့် အချိန် ရောက်ပြီပင်။
အခန်း ၉၂၅ ပြီးပါပြီ။