သတ်ဖြတ်ခြင်းနတ်ဘုရားအစီအရင်၏ မူလပုံစံ

နျန်ချီယွီ၏ ဤမျှအထိ ပြတ်သားမှုကြောင့် ၎င်းတို့ ပြန်လည် မချေပနိုင်တော့ချေ။ အဓိကအားဖြင့် သူမပြောသမျှ စကားတိုင်းမှာ ယုတ္တိရှိနေပြီး ၎င်းတို့၏ တပည့်များတွင်သာ ဤကဲ့သို့သော အရည်အချင်းမျိုး ရှိပါက ၎င်းတို့သည်လည်း ဧကန်မလွဲ ရူးသွပ်စွာ သတ်ဖြတ်ခိုင်းမည်သာ ဖြစ်သည်။

ဤသို့လုပ်ဆောင်မှသာ သတ်ဖြတ်လိုစိတ်များကို အရှိန်အဟုန်ဖြင့် ရယူနိုင်မည် ဖြစ်ပြီး စုစည်းမှု အောင်မြင်သွားပါက သတ်ဖြတ်ခြင်းနတ်ဘုရား၏ စွမ်းအားကို ရရှိနိုင်မည် ဖြစ်သည်။ တစ်ချိန်တည်းမှာပင် ဤနေရာ၌ မိမိ၏ နာမည်ကို ချန်ရစ်ထားနိုင်ခြင်းမှာ အလွန်ပင် ဂုဏ်ယူစရာ ကောင်းလှသည်။

သို့သော် ဤအခွင့်အရေးကို ယီထျန်းယွမ်က ရယူသွားခြင်းကြောင့် ၎င်းတို့မှာ အမှန်တကယ်ပင် မနာလို ဖြစ်နေကြခြင်းပင်။

အစီအရင်ပေါ်တွင် ဤမျှကြာအောင် နေနိုင်ရုံတင်မကဘဲ အသိဉာဏ်ကပါ ကြည်လင်နေဆဲဖြစ်ရာ ၎င်းတို့ မည်သို့ မနာလိုဘဲ ရှိပါမည်နည်း။ သို့သော် ၎င်းတို့မှာ အားနည်းချက်ကိုသာ ကြည့်တတ်သူများ ဖြစ်ကြသဖြင့် ယီထျန်းယွမ်၏ တော်ပုံကိုမူ ချီးကျူးကြမည် မဟုတ်ချေ။

“ဒါက မှန်ပေမဲ့ တခြားသူတွေကိုတော့ မထိခိုက်သင့်ဘူးလေ...”

ကောင်းကင်သခင် တစ်ဦးက မချိတင်ကဲ လေသံဖြင့် ပြန်လည် ချေပလိုက်သည်။

“ရိုးရှင်းပါတယ်... သူ အပေါ်က စိတ်ရိုင်းဝင်နေတဲ့ တပည့်တွေကို ရှင်းလင်းပြီးတဲ့အထိ စောင့်လိုက်၊ ပြီးမှ မင်းတို့လူတွေကို အပေါ်လွှတ်လိုက်ပေါ့။ အဲဒီအချိန်ကျရင်တော့ အလွန်ကို ဘေးကင်းသွားမှာပဲ... ဒါပေမဲ့ သတိတော့ ထားဦးနော်၊ သတ်ဖြတ်ခြင်းနတ်ဘုရားအစီအရင်အတွက် ရုပ်သေးရုပ်တွေ ထပ်မတိုးလာစေနဲ့ဦး...”

နျန်ချီယွီက အေးစက်စွာ ပြန်လည် တုံ့ပြန်လိုက်သည်။

၎င်းတို့အားလုံး ပြောစရာ စကားပင် မရှိတော့ဘဲ နျန်ချီယွီနှင့် တိုက်ခိုက်ချင်စိတ်ပင် ပေါက်လာတော့သည်။ သို့သော် ၎င်းတို့သည် ဤနေရာတွင် ပြဿနာ မရှာလိုကြချေ၊ ပုစဉ်းရင်ကွဲကို ဖမ်းသည့် သိမ်းငှက်၏ နောက်ကွယ်တွင် ဝံပုလွေ ရှိနေနိုင်သည် မဟုတ်ပါလား။

တစ်ဦးချင်းစီမှာ မိမိတို့၏ နတ်ဘုရားနယ်မြေကို ကိုယ်စားပြုလာကြသူများဖြစ်ပြီး ဤနေရာသို့ လာကြသူများမှာလည်း အရည်အချင်း ကောင်းမွန်သော ပါရမီရှင်များ ဖြစ်ကြသည်။ အကယ်၍ တစ်ဖက်လူ အားနည်းချိန်ကို အခွင့်ကောင်းယူ တိုက်ခိုက်မည်ဆိုပါက ပြိုင်ဘက်ကို ဖယ်ရှားနိုင်ရုံတင်မကဘဲ အကျိုးကျေးဇူးများစွာလည်း ရရှိနိုင်မည် ဖြစ်ရာ မည်သူက မလုပ်ဘဲ နေပါမည်နည်း။

ထို့ကြောင့် မည်သူမျှ စိတ်ကြိုက် မလှုပ်ရှားဝံ့ကြချေ။ အကယ်၍ တစ်ပါးသူက ကြားဖြတ် အမြတ်ထုတ်သွားမည်ဆိုပါက ကောင်းသော ကိစ္စ မဟုတ်ချေ။

၎င်းတို့မှာ ဒေါသကို မြိုသိပ်ကာ ယီထျန်းယွမ် အားလုံးကို ရှင်းလင်းပြီးမှသာ တပည့်များကို အပေါ်သို့ လွှတ်ရန် ဆုံးဖြတ်လိုက်ကြသည်။ သို့သော် ထိုအချိန်တွင် သတ်ဖြတ်ခြင်းနတ်ဘုရားအစီအရင်၏ သတ်ဖြတ်လိုစိတ်များက အလွန် ပြင်းထန်နေမည် ဖြစ်ရာ သတိကြီးစွာ ထားရန် လိုအပ်ပေလိမ့်မည်။

-ဂုဏ်ယူပါသည်။ ကစားသမား ‘ယီထျန်းယွမ်’ သည် ဒုတိယအဆင့် မြေကမ္ဘာအရှင်သို့ အောင်မြင်စွာ ထိုးဖောက်သွားပါပြီ။

ယီထျန်းယွမ်သည် အခြားသူများ၏ အကြည့်များကို ဂရုမစိုက်တော့ချေ။ ယခုအခါ သူသည် ဒုတိယအဆင့် မြေကမ္ဘာအရှင်သို့ အလွယ်တကူ ထိုးဖောက်သွားခဲ့ပြီ ဖြစ်ကာ ကျင့်ကြံသူ မြောက်မြားစွာကို သတ်ဖြတ်ပြီးနောက် နောက်ဆုံးတွင် အဆင့်တက်နိုင်ခဲ့ပြီ ဖြစ်သည်။

ချက်ချင်းပင် သူ၏ အကြည့်များက တည်ငြိမ်သွားပြီး ကျန်ရှိနေသော ကျင့်ကြံသူများကို ကြည့်လိုက်သည်။ သာမန် ကျင့်ကြံသူ အားလုံးမှာ ထွက်ပြေးသွားကြပြီ ဖြစ်သဖြင့် ကျန်ရှိနေသည်မှာ ဆယ်ယောက်ပင် မပြည့်တော့သော ကျင့်ကြံသူများသာ ဖြစ်သည်။ ၎င်းတို့ကို သတ်ဖြတ်ပြီးပါက သတ်ဖြတ်ခြင်းနတ်ဘုရားအစီအရင်မှာ လုံးဝ ရှင်းလင်းသွားပေလိမ့်မည်။

“နောက်ထပ် ဆယ်ယောက်လောက်ပဲ ကျန်တော့တယ်... ဆက်မယ်...”

ယီထျန်းယွမ်သည် ထျန်ချန်နတ်ဘုရားလှံကို ဆွဲကာ ပြေးဝင်သွားပြီး လှံကို ဝှေ့ယမ်းလျက် ထိုကျင့်ကြံသူများကို ဆက်လက် ရိုက်ခွဲပစ်လိုက်သည်။ စိတ်ရိုင်းဝင်နေသော ဤရုပ်သေးရုပ်များ၏ ခွန်အားမှာ ယခင်ကထက် များစွာ ပိုမို သန်မာလာပြီး အချို့မှာ ပထမအဆင့် မြေကမ္ဘာအရှင် အဆင့်သို့ပင် နီးကပ်နေပြီ ဖြစ်သည်။

ဤသည်မှာ သတ်ဖြတ်ခြင်းနတ်ဘုရားအစီအရင်၏ နောက်ဆုံး ရုန်းကန်မှု ဖြစ်ပြီး သူ့ကို အပြတ်အသတ် ဆွဲဖြဲပစ်ချင်နေသည့်အလား ခံစားရသည်။

သေချာပေါက်ပင် ဤသည်မှာ မည်သည့် အဓိပ္ပာယ်မျှ မရှိချေ။ ဘယ်နှစ်ယောက်လာလာ သူက သတ်မည်သာ ဖြစ်သည်။ စိတ်ရိုင်းဝင်နေသော ဤရုပ်သေးရုပ်များမှာ မည်မျှပင် အားဖြည့်ထားစေကာမူ အများဆုံးမှာ ပထမအဆင့် မြေကမ္ဘာအရှင် အဆင့်သာ ရှိသည်။ သူ၏ ကြမ်းတမ်းလှသော ခွန်အားရှေ့တွင်မူ မည်သည့် ခုခံနိုင်စွမ်းမျှ မရှိဘဲ အလွယ်တကူပင် ရိုက်ခွဲခြင်း ခံလိုက်ရတော့သည်။

မကြာမီပင် သူ၏ ကြမ်းတမ်းသော ခွန်အားအောက်တွင် စိတ်ရိုင်းဝင်နေသော ရုပ်သေးရုပ်များမှာ အလွယ်တကူ သတ်ဖြတ်ခြင်း ခံလိုက်ရပြီး သူ့အတွက် ဘာမှ မခက်ခဲချေ။

စင်အောက်ရှိ ကျင့်ကြံသူများနှင့် ကောင်းကင်သခင် အမြောက်အများမှာ ပါးစပ်အဟောင်းသား ဖြစ်သွားကြသည်။ ယခင်က ယီထျန်းယွမ် နောက်ထပ် တစ်ယောက် သို့မဟုတ် နှစ်ယောက် ထပ်သတ်လျှင် သေချာပေါက် စိတ်ရိုင်းဝင်သွားမည်ဟု ၎င်းတို့အားလုံး ထင်ထားခဲ့ခြင်း ဖြစ်သည်။

ယခုမူ တစ်ကြိမ်ပြီးတစ်ကြိမ် အမှားသက်သေပြခံလိုက်ရသဖြင့် ၎င်းတို့၏ မျက်နှာများမှာ ဖြတ်ရိုက်ခံလိုက်ရသကဲ့သို့ နာကျင်နေတော့သည်။ စိတ်ရိုင်းဝင်နေသော ကျင့်ကြံသူများ အားလုံး အသတ်ခံလိုက်ရသော်လည်း ယီထျန်းယွမ်မှာ စိတ်ရိုင်းဝင်မသွားခြင်းမှာ ၎င်းတို့အတွက် တကယ့်ကို အံ့ဩစရာပင်။

“ဒီကောင်လေးက... သူ့ကို ပေါ်ပေါ်ထင်ထင် လုပ်ခိုင်းတာ၊ တကယ်ကို ကြောက်စရာကောင်းလောက်အောင် ပေါ်ပေါ်ထင်ထင် လုပ်ပြနေတာပဲ...”

နျန်ချီယွီမှာ ရယ်ရခက် ငိုရခက် ဖြစ်နေတော့သည်။ သူမ ယခင်က ယီထျန်းယွမ်ကို ပေါ်ပေါ်ထင်ထင် လုပ်ခိုင်းခြင်းမှာ အနည်းငယ် ပြတ်သားစွာ လုပ်ဆောင်ရန်နှင့် တွန့်ဆုတ်မနေရန်သာ ဖြစ်သည်။ သတ်နိုင်လျှင် သတ်ရန်နှင့် လက်မနှေးရန် ပြောခဲ့ခြင်း ဖြစ်သည်။ သို့သော် ရုပ်သေးရုပ် အားလုံးကို သတ်ဖြတ်ပစ်လိမ့်မည်ဟု သူမ မထင်ထားခဲ့ချေ။ လူမှာလည်း တစ်စက်မျှ ဘာမှမဖြစ်နေခြင်းမှာ ပေါ်ပေါ်ထင်ထင် ဖြစ်ရုံတင်မကဘဲ တကယ့်ကို ပေါက်ကွဲထွက်သွားခြင်းပင် ဖြစ်သည်။

တစ်ဦးချင်းစီမှာ စိတ်ထဲတွင် ဘာတွေ တွေးနေကြမှန်း မသိသော်လည်း ဤသည်မှာ တကယ့်ကို မယုံကြည်နိုင်စရာ ကောင်းသည်ဟုသာ ခံစားနေကြရသည်။

ထို့ကြောင့် ကောင်းကင်သခင်များ၏ ရင်ထဲတွင် သတိထားမှုများ ဖြစ်ပေါ်လာသည်။ စင်ပေါ်ရှိ ယီထျန်းယွမ်မှာ နတ်ဘုရားနယ်မြေ တက်လှမ်းခြင်းတိုက်ပွဲတွင် ပါဝင်မည့် ပါရမီရှင်တစ်ဦး ဖြစ်ရမည်ဟု ၎င်းတို့အားလုံး ယူဆလိုက်ကြသည်။ အကယ်၍ သူ့ကို ဤအတိုင်း ပြန်လွှတ်ပေးလိုက်မည်ဆိုပါက ၎င်းတို့၏ နေရာများအတွက် ကြီးမားသော ခြိမ်းခြောက်မှု ဖြစ်လာပေလိမ့်မည်။

၎င်းတို့၏ မျက်ဝန်းထဲတွင် သတ်ဖြတ်လိုစိတ်များ ဖြတ်ပြေးသွားသည်။ ဤသည်မှာ ဤနေရာ၏ သက်ရောက်မှုကြောင့် မဟုတ်ဘဲ ယီထျန်းယွမ်ကို အမှန်တကယ်ပင် ရှင်းလင်းပစ်ချင်နေကြခြင်းသာ ဖြစ်သည်။ ဤကဲ့သို့သော ပါရမီရှင်မျိုးကို တူညီသောအဆင့်ရှိ နတ်ဘုရားနယ်မြေတွင် ချန်ထား၍ မဖြစ်ချေ။

ဤအချက်ကို နျန်ချီယွီလည်း ခံစားမိသည်။ သို့သော် သူမ၏ မျက်ဝန်းထဲတွင် မကျေနပ်မှု သို့မဟုတ် ကြောက်ရွံ့မှု တစ်စက်မျှ မရှိချေ။ အဘယ်ကြောင့်ဆိုသော် ဤသည်မှာ ကောင်းသော ကိစ္စဖြစ်သောကြောင့်ပင်။ သန်မာသော စွမ်းအားကို ရယူလိုပါက မည်သို့လျှင် သိုသိပ်နေ၍ ရပါမည်နည်း။

ဥပမာအားဖြင့် ဤသတ်ဖြတ်ခြင်းအမှတ်အသား ဆိုပါက ဤသို့ မလုပ်ဆောင်လျှင် အောင်မြင်ရန်မှာ မဖြစ်နိုင်ချေ။ အကျိုးကျေးဇူး ရယူလိုပါက ထိပ်ဆုံးမှ ရှိနေရမည် ဖြစ်ပြီး လူတိုင်း၏ အာရုံစိုက်မှုကို ခံရမည်သာ ဖြစ်သည်။

ဤသည်မှာ ပထမဆု ရရှိပါက ထိပ်တန်း အထက်တန်း ပြန်လည်မွေးဖွားခြင်းအဆင့် လက်နက်ကို ရရှိမည်နှင့် အတူတူပင် ဖြစ်သည်။ မည်မျှပင် သိုသိပ်နေပါစေ အထက်တန်း ပြန်လည်မွေးဖွားခြင်းအဆင့် လက်နက်ကို ရယူနိုင်သူမှာ သိုသိပ်နေရန် ခက်ခဲလှသည်။

ယီထျန်းယွမ်သည်လည်း ဤအချက်ကို သိရှိပြီးသားပင်။ သူသည် ဤအခွင့်အရေးကို လုံးဝ လက်လွတ်ခံ၍ မဖြစ်ကြောင်းသာ သိရှိသည်။

“သေစမ်း...”

နောက်ဆုံး လှံတစ်ချက်အောက်တွင် စိတ်ရိုင်းဝင်နေသော ရုပ်သေးရုပ်မှာ သူ၏ အပြီးအပိုင် သတ်ဖြတ်ခြင်းကို ခံလိုက်ရတော့သည်။

သူ လဲကျသွားပြီးနောက် ခဏချင်းမှာပင် သတ်ဖြတ်ခြင်းနတ်ဘုရားအစီအရင်မှာ လင်းထိန်သွားပြီး အောက်ခြေမှ ထိတ်လန့်ဖွယ် သတ်ဖြတ်လိုစိတ်များ တိုးဝှေ့တက်လာသည်။ ဤတစ်ကြိမ်တွင်မူ သာမန်မျက်စိဖြင့် မြင်နိုင်သော နီရဲသည့် စွမ်းအင်များမှာ အောက်ခြေမှ ရူးသွပ်စွာ တိုးထွက်လာပြီး ယီထျန်းယွမ်ကို လျင်မြန်စွာ ဝါးမြိုသွားတော့သည်။

ရုတ်တရက် ဖြစ်ပေါ်လာသော အပြောင်းအလဲကြောင့် လူအများအပြားမှာ မှင်တက်မိသွားကြသည်။

“ဒါ တကယ်ပဲ ဘာဖြစ်တာလဲ...”

ကျင့်ကြံသူ တစ်ဦးချင်းစီမှာ မူလက အတွင်းသို့ ပြန်ဝင်ရန် ပြင်နေကြသော်လည်း ဤမြင်ကွင်းကြောင့် မှင်တက်မိသွားကြသည်။ ဤမျှ သန်မာသော သတ်ဖြတ်လိုစိတ်များ တိုးထွက်လာခြင်းမှာ သာမန် သတ်ဖြတ်လိုစိတ် မဟုတ်တော့ချေ။ ရုပ်လုံးပေါ်နေသော သတ်ဖြတ်လိုစိတ်များ ဖြစ်ပြီး သာမန် သတ်ဖြတ်လိုစိတ်များထက် များစွာ ပို၍ ရက်စက်ကြမ်းကြုတ်လှကာ လူကို စိတ်ရိုင်းဝင်သွားစေရန် အလွန် လွယ်ကူလှသည်။

“ငါ မှတ်မိပြီ... ဒါက သတ်ဖြတ်ခြင်းနတ်ဘုရားအစီအရင်ရဲ့ မူလပုံစံပဲ။ အတွင်းမှာ လူတွေ အများကြီး ရှိနေပြီး အဲဒီရုပ်သေးရုပ်တွေကြောင့် သတ်ဖြတ်လိုစိတ်တွေက ပိုပြီး ကျဲပါးသွားတာ၊ ဒါကြောင့် စိတ်ဝိညာဉ်စွမ်းအား သာမန်လောက် ရှိတဲ့သူတွေတောင် ဒီထဲမှာ နေနိုင်ခဲ့တာပဲ...”

ကောင်းကင်သခင် တစ်ဦးက ထိတ်လန့်တကြား အော်ဟစ်လိုက်သည်။

လူတိုင်း သူ့ကို လှည့်ကြည့်လိုက်ကြပြီး ရင်ထဲတွင် တုန်လှုပ်သွားကြသည်။ ဤသည်မှာ ယီထျန်းယွမ်က အရာအားလုံးကို မူလအတိုင်း ပြန်ဖြစ်အောင် လုပ်လိုက်ခြင်းကို ဆိုလိုခြင်း မဟုတ်ပါလား။ သတ်ဖြတ်ခြင်းနတ်ဘုရားအစီအရင်က ဒေါသထွက်နေခြင်း မဟုတ်ဘဲ ရုပ်သေးရုပ် အမြောက်အများက ခန္ဓာကိုယ်အတွင်း စုပ်ယူထားသဖြင့် အားပျော့သွားခြင်းသာ ဖြစ်သည်။

“ဆရာ... ကျွန်တော်တို့ ဝင်ရမလား”

၎င်းတို့သည် ဤမြင်ကွင်းကို မြင်သည့်အခါ နောက်မဆုတ်ဘဲ ဆန့်ကျင်ဘက်အားဖြင့် စမ်းသပ်ကြည့်ချင်စိတ်များ ဖြစ်ပေါ်လာကြသည်။ ဘာပဲဖြစ်ဖြစ် စိတ်ရိုင်းဝင်နေသော ကျင့်ကြံသူများ မရှိတော့သဖြင့် တက်ရောက် စမ်းသပ်ကြည့်လျှင် ပြဿနာ မရှိချေ။ ဘာပဲဖြစ်ဖြစ် ဤနေရာတွင် သတ်ဖြတ်လိုစိတ် အမြောက်အများ ရှိနေသဖြင့် စုပ်ယူရသည်မှာ ယခင်ကထက် သေချာပေါက် မြန်ဆန်ပေလိမ့်မည်။ သို့သော် စိတ်ရိုင်းဝင်သွားနိုင်ခြေမှာမူ များစွာ ပို၍ ကြီးမားလှသည်။

“စိတ်ဝိညာဉ်စွမ်းအား သန်မာတဲ့သူတွေပဲ အပေါ်တက်ပြီး စမ်းကြည့်ကြ... အခြေအနေ မဟန်ရင် ချက်ချင်း ပြန်ဆင်းလာခဲ့...”

ကောင်းကင်သခင်သည် ဤအခြေအနေကို ကြည့်ပြီး မိမိ၏ တပည့်များကို စမ်းသပ်ခိုင်းရန် ဆုံးဖြတ်လိုက်သည်။ ထိုသို့မှသာ ထိုးဖောက်နိုင်မည့် အခွင့်အရေး ရှိမည် မဟုတ်ပါလား။

တစ်ဦးချင်းစီမှာ ခွင့်ပြုချက် ရရှိပြီးနောက် သတ်ဖြတ်ခြင်းနတ်ဘုရားအစီအရင်အတွင်းသို့ တစ်ယောက်ပြီးတစ်ယောက် ခုန်ဝင်လိုက်ကြသည်။ သို့သော် အချို့မှာ ဝင်လိုက်သည်နှင့် သတ်ဖြတ်လိုစိတ်များ၏ ဝါးမြိုခြင်းကို ချက်ချင်း ခံလိုက်ရပြီး ဟိန်းဟောက်သံများ အတွင်းမှ ထွက်ပေါ်လာသည်။

လူတိုင်း၏ ရင်ထဲတွင် တုန်လှုပ်သွားကြသည်။ ဤသည်မှာ သိသိသာသာပင် စိတ်ရိုင်းဝင်သွားသော လက္ခဏာပင်။ ခုတင်မှ ဝင်သွားပြီး ချက်ချင်း စိတ်ရိုင်းဝင်သွားတာလား။ မူလ သတ်ဖြတ်ခြင်းနတ်ဘုရားအစီအရင်ဆိုသည်မှာ ဤမျှ ကြောက်စရာကောင်းသော ပုံစံမျိုးလား။

“ထျန်းယွမ်...”

နျန်ချီယွီ၏ ရင်ထဲတွင် တင်းကျပ်သွားပြီး စိုးရိမ်လာမိသည်။

စိတ်ရိုင်းဝင်နေသော ရုပ်သေးရုပ် အမြောက်အများကို သတ်ဖြတ်ခဲ့ရုံတင်မကဘဲ ယခုကဲ့သို့သော အခြေအနေမျိုးတွင် ယီထျန်းယွမ် တောင့်ခံနိုင်ပါ့မည်လား။

အခန်း ၉၃၀ ပြီးပါပြီ။