ငါးက ငါးစာကို ဟပ်လိုက်ပြီ

ပိုင်ထျန်းဟမ်၏ စိတ်သည် နောက်ဆုံးတွင် အေးချမ်းသွားတော့သည်။

ပိုင်ကျီဟန် ပြောခဲ့သည့်စကားများကို သူ ယုံကြည်မှုရှိသော်လည်း ယခုကဲ့သို့ မိမိမျက်စိဖြင့် ကိုယ်တိုင်မြင်တွေ့ရခြင်းမှာ လုံးဝကွာခြားလှသည်။

ပိုင်ကျီဟန်သည် ပိုင်ရှင်းယွဲ့နှင့် ပတ်သက်သည့် ပြဿနာကို ကိုင်တွယ်ပေးခဲ့ပြီး ယခုအခါ ပိုင်ရွှယ်ချင်း၏ ကိစ္စကိုပါ ဖြေရှင်းပေးလိုက်သဖြင့် ပိုင်ထျန်းဟမ်သည် ဝန်ထုတ်ဝန်ပိုးများ ကင်းစင်သွားသလို ခံစားလိုက်ရသည်။

(ငါလည်း အေးအေးဆေးဆေး ကျင့်ကြံဖို့ လိုအပ်နေပြီထင်တယ်။)

ကျင့်ကြံသူတစ်ဦး၏ စိတ်ထဲတွင် ဝန်ထုပ်ဝန်ပိုးများ မရှိသည့်အခါ ကျင့်ကြံခြင်းမှာ ပို၍ ထိရောက်လှသည်။ သူ၏ နောက်ဆုံးသော စိတ်ပူပန်မှုမှာလည်း ကင်းစင်သွားခဲ့ပြီ မဟုတ်ပါလော။

သို့သော် သူ ဤနေရာသို့ လာခဲ့သည့် ရည်ရွယ်ချက်ကိုတော့ မေ့မပစ်လိုက်ပေ။

"ဟိုကောင်စုတ် ဘယ်မှာလဲ?"

ပိုင်ကျီဟန်၏ အရိပ်အယောင်ကို မတွေ့ရသေးသဖြင့် ပိုင်ထျန်းဟမ်က မေးလိုက်သည်။

"ပိုင်ကျီဟန်ကတော့ သူ့အခန်းထဲသူ ပြန်သွားလောက်ပြီ" ပိုင်ရွှယ်ချင်းက ဖြေလိုက်သည်။ သူမ သေချာမသိသော်လည်း သူသွားစရာ နေရာဆို၍ ထိုနေရာသာ ရှိပေလိမ့်မည်။

ပိုင်ထျန်းဟမ်သည် သူ၏နဖူးကို လက်ဖြင့် ဖိလိုက်မိသည်။

နောင်တစ်ချိန်တွင် ပိုင်မျိုးနွယ်စု ခေါင်းဆောင်တစ်ဦး ဖြစ်လာမည့်သူအနေဖြင့် အခြားသူများနှင့် အဆက်အသွယ်ကောင်းများ တည်ဆောက်ထားခြင်းသည် အနာဂတ်အတွက် များစွာ အထောက်အကူပြုလိမ့်မည်ဟု ပိုင်ကျီဟန်ကို မှာကြားခဲ့ဖူးသည်။

သို့သော် ထိုအတိုင်း မလုပ်ဆောင်ခဲ့သည့်အပြင် အထူးသဖြင့် ချစ်ရေးဆိုသူ အုပ်စုနှင့် အခြေအနေများကို ပိုမိုဆိုးရွားအောင်ပင် ပြုလုပ်ခဲ့သေးသည်။

ပိုင်ကျီဟန်သည် ကိစ္စရပ်တိုင်းတွင် ထူးကဲသော အရည်အချင်းရှိပြီး ပြီးပြည့်စုံသော မျိုးနွယ်စုခေါင်းဆောင်တစ်ဦး ဖြစ်လာနိုင်ကြောင်း ပိုင်ထျန်းဟမ် သိထားသော်လည်း အားနည်းချက်တစ်ခု ရှိနေ၏။ ၎င်းမှာ အခြားသူများနှင့် ဆက်ဆံရေးကောင်းမွန်အောင် ထိန်းသိမ်းခြင်းပင်။

အနာဂတ် ခေါင်းဆောင်များ သို့မဟုတ် အင်အားကြီးသူများနှင့် မဟာမိတ်ဖွဲ့မည့်

အစား သူတို့ကို စော်ကားခဲ့လေသည်။

(သူက ပိုင်ရွှယ်ချင်း လက်ထပ်မှာကို တားလိမ့်မယ်လို့ ငါမထင်ခဲ့ဘူး။ သူကပဲ သူမကို အမြန်ဆုံး နှင်ထုတ်ချင်နေခဲ့တာ မဟုတ်ဘူးလား?)

ပိုင်ထျန်းဟမ် တွေးနေမိသည်။

သူ၏ သားနှင့် သမီးတို့သည် တစ်ယောက်နှင့်တစ်ယောက် အဆင်မပြေကြကြောင်း လူသိများလှသည်။

သူတို့နှစ်ဦး၏ စိတ်ရင်းထဲတွင် တစ်ဦးကိုတစ်ဦး ဂရုစိုက်ကြသည်ကို ပိုင်ထျန်းဟမ် သိသော်လည်း တစ်ဦး၏ အိမ်ထောင်ရေးကို တစ်ဦးက တားဆီးလောက်သည့်အထိ နီးကပ်သော ဆက်ဆံရေးမျိုးတော့ မဟုတ်ကြပေ။

အကယ်၍ သူ၏ သား သို့မဟုတ် သမီးသည် တစ်ဦးအပေါ်တစ်ဦး အလွန်အမင်း အကာအကွယ်ပေးတတ်သူများ ဖြစ်နေလျှင် ဤသို့ ဖြစ်နိုင်သည်ဟု တွေးကောင်းတွေးမိနိုင်သော်လည်း သူ၏ သားသမီးများမှာ ထိုသို့သောသူများ မဟုတ်ကြချေ။

"ရွှယ်ချင်းအာ... ကျီဟန်အာက တကယ်ပဲ သူ့ကို အနိုင်မတိုက်နိုင်ရင် ဘယ်သူမှ မင်းကို လက်မထပ်ရဘူးလို့ ပြောခဲ့တာလား?"

ပိုင်ထျန်းဟမ်သည် မယုံသင်္ကာဖြင့် မေးလိုက်သည်။

ဤကိစ္စ နောက်တစ်ကြိမ် ထပ်ဖြစ်လာပါက သူမအနေဖြင့် သူ့ကို အကူအညီတောင်းလာမည်ကို စိုးရိမ်သောကြောင့် ပိုင်ကျီဟန်သည် ထိုသို့ပြောလိုက်ခြင်း ဖြစ်ကြောင်း ပိုင်ရွှယ်ချင်း သိသည်။

သို့သော် အနှစ်ချုပ်အားဖြင့် သူ ထိုသို့ပြောခဲ့သည်မှာ အမှန်ပင်

"ဟုတ်ကဲ့။ ပြီးတော့ ဒီလူတွေက သမီးနဲ့ မထိုက်တန်ဘူးဆိုတာကို အဖေကို ပြောပြခိုင်းလိုက်ပါသေးတယ်"

သူမ၏ အိမ်ထောင်ရေးကို ပိုင်ကျီဟန် တားဆီးနေခြင်းဟု ပုံဖော်လိုက်ခြင်းအားဖြင့် သူမအနေဖြင့် အမြန်ဆုံး လက်ထပ်ရန် အကြီးအကဲများနှင့် မိဘများ၏ ဆူပူပြောဆိုမှုများကိုလည်း ရှောင်လွှဲနိုင်မည် ဖြစ်သည်။

ပိုင်ကျီဟန်အတွက် စိတ်ရှုပ်စရာတွေ ဖြစ်လာမည့် ကိစ္စမှာမူ—သူ့ဘာသာသူ ဖြေရှင်းရမည့် ကိစ္စသာ ဖြစ်ပေတော့မည်။

ပိုင်ထျန်းဟမ်သည် အံ့အားသင့်လွန်းသဖြင့် မျက်လုံးများ ပြူးသွားရချေသည်။

ပိုင်ကျီဟန်၏ စကားကို ကန့်ကွက်လို၍တော့ မဟုတ်ပေ။

ပိုင်ရွှယ်ချင်းသည် ကောင်းကင်အင်ပါယာတွင် ပါရမီအရှိဆုံးဖြစ်ပြီး ပိုင်ကျီဟန်မှလွဲလျှင် မည်သူမျှ သူမကို မမှီနိုင်ချေ။

သူမ၏ နောက်ခံနှင့် ရုပ်ရည်ကို မဆိုထားနှင့်ဦး၊ ဖခင်တစ်ဦးအနေဖြင့် မိမိသမီးအပေါ် ဘက်လိုက်ပြီး စဉ်းစားလျှင်ပင် သူမနှင့် ထိုက်တန်သူမှာ မရှိသလောက်ပင်။

(သူက... သူက တကယ်ပဲ ရွှယ်ချင်းအာကို အိမ်ထောင်မပြုစေချင်တာလား?)

သူ့အနေနဲ့ ထိုအရာကို လုံးဝမယုံကြည်နိုင်ဘဲ ဖြစ်နေသည်။

သို့သော် ချစ်ရေးဆိုသူများကို စိစစ်ရန်အတွက် စမ်းသပ်မှုတစ်ခုသာ ဖြစ်သည်ဆိုလျှင်လည်း အမှန် မဖြစ်နိုင်ချေ။

ပိုင်ကျီဟန်သည် သူ၏ ဝိညာဉ်ခွဲခြမ်းစိတ်ဖြာခြင်းအဆင့် အရှိန်အဝါကို သုံးပြီး လျှောက်ထားသူအားလုံးကို ဖိနှိပ်ခဲ့ကြောင်း အစောင့်ထံမှ ကြားသိထားပြီးဖြစ်သည်။

ပိုင်ရွှယ်ချင်းကို အနိုင်တိုက်နိုင်သူပင် မရှိပါဘဲနှင့် သူ၏ မိစ္ဆာဆန်သော သားဖြစ်သူကို အနိုင်ယူဖို့ဆိုသည်မှာ မလွယ်ပေ

လာမည့်နှစ်များအတွင်းမှာပင် သူတို့မျိုးဆက်ထဲမှ မည်သူတစ်ဦးတစ်ယောက်မှ သူ၏သားထက် ပိုမိုမြန်ဆန်စွာ တိုးတက်လာနိုင်မည်ဟု သူ မထင်ပေ။ သူ၏သမီး ဖြစ်နိုင်ခြေရှိသော်လည်း ၎င်းမှာလည်း ခက်ခဲလှပေလိမ့်မည်။

အခွင့်အရေး ရနိုင်ခြေရှိသူများမှာ သူတို့ထက် မျိုးဆက်နှစ်ခု သို့မဟုတ် ထိုထက်မက စောသော ပါရမီရှင်များသာ ဖြစ်ပေလိမ့်မည်။

သို့သော် ဤမျိုးဆက်၏ ပါရမီရှင်သည် ယခင်လူများထက် များစွာသာလွန်သဖြင့် ၎င်းမှာလည်း ခက်ခဲနေဦးမည်သာ။

(ကျီဟန်အာကိုလည်း အနိုင်ယူနိုင်ပြီး ရွှယ်ချင်းအာအတွက်လည်း သင့်တော်တဲ့ ခင်ပွန်းလောင်း ဖြစ်နိုင်မယ့်သူ)

အင်ပါယာတစ်ခုလုံးတွင် ထိုသို့သောသူမှာ မရှိသလောက်ပင်။

"ဒီသားကတော့... ခေါင်းခဲစရာတွေပဲ ထပ်တိုးပေးနေတယ်။ ငါ သူ့ကို သေသေချာချာ စကားပြောရမယ်။"

ပိုင်ကျီဟန်၏ သတ်မှတ်ချက်နှင့် ကိုက်ညီမည့်သူကို လိုက်ရှာနေမည့်အစား စကားပြောပြီး ထိုကိစ္စကို ရပ်တန့်ခိုင်းခြင်းက ပို၍ကောင်းပေလိမ့်မည်။

မဟုတ်ပါက ပိုင်ကျီဟန်နှင့် တိုက်ခိုက်ရမည်ဆိုလျှင် မည်သူက ပိုင်ရွှယ်ချင်းကို လာရောက် လက်ထပ်ခွင့် တောင်းရဲတော့မည်နည်း?

"ပိုင်ရွှယ်ချင်း... မင်း သဘောကျတဲ့သူ တစ်ယောက်မှ မရှိဘူးလား?"

ပိုင်ထျန်းဟမ်က မေးလိုက်သည်။ အကယ်၍ ပိုင်ရွှယ်ချင်းမှ ရှိသည်ဟု ပြောလာပါက ပိုင်ကျီဟန်၏ သဘောထားကို ထည့်သွင်းစဉ်းစားနေရန် မလိုတော့ပေ

"တစ်ယောက်မှ မရှိပါဘူး။ ပိုင်ကျီဟန်ကို အနိုင်တိုက်နိုင်တဲ့သူ ပေါ်လာရင်တော့ တစ်မျိုးပေါ့လေ?"

ပိုင်ကျီဟန်သည် သူ၏ အိပ်ရာပေါ်တွင် လှဲနေသော်လည်း အိပ်ပျော်မနေပေ။

ယင်းအစား သူ၏ အာရုံမှာ ရှေ့ရှိ စာလိပ်ပေါ်တွင်သာ ရှိနေသည်—၎င်းမှာ ခုန်းကျန်းဟုန် ပေးပို့လာသော အစီရင်ခံစာများ ဖြစ်သည်။

၎င်းတို့ကို ပိုင်ကျီဟန်အတွက် အထူးအရေးကြီးသော သို့မဟုတ် သူ့ကို ထိခိုက်နိုင်သော ကိစ္စရပ်များအဖြစ် အကျဉ်းချုပ် ထားခြင်းဖြစ်သည်။

၎င်းကို ပိုင်ကျီဟန်အတွက် သီးသန့်ထုတ်ဝေသည့် သတင်းစာတစ်စောင်ဟုပင် ခေါ်ဆိုနိုင်သည်။

ပိုင်ကျီဟန်သည် စာလိပ်ကို ပွတ်သပ်ရင်း ပြုံးလိုက်သည်။

(ငါ သတင်းစာတိုက် တစ်ခုလောက် ထောင်ရမလား?)

ထိုအတွေးသည် ရုတ်တရက် ပေါ်လာခြင်းဖြစ်သော်လည်း ပို၍ စဉ်းစားကြည့်လေလေ၊ ၎င်းမှာ ပို၍ အဓိပ္ပာယ်ရှိလေလေ ဖြစ်လာသည်။

ဤကမ္ဘာတွင် သတင်းဆိုသည်မှာ ကုန်သည်များ၊ လှည့်လည်ပြောဆိုသူများ သို့မဟုတ် ခရီးသွားကျင့်ကြံသူများ သယ်ဆောင်လာသည့် အတင်းအဖျင်း စကားများထက် မပိုပေ။

အကယ်၍ တစ်စုံတစ်ဦးသည် သတင်းတစ်ခု သိချင်ပါက အရက်ဆိုင်ကဲ့သို့သော နေရာများသို့ သွားကြရပြီး တစ်ယောက်ယောက်က သူတို့သိချင်သည်ကို သိထားပါစေဟုသာ မျှော်လင့်နေကြရသည်။

ပိုမိုတိကျပြီး သီးသန့်ဆန်သော သတင်းအချက်အလက်များအတွက်မူ သတင်းအချက်အလက်ဆိုင်ရာ ဂိုဏ်းအသီးသီး ရှိကြသော်လည်း ကျသင့်ငွေမှာ အလွန်ကြီးမားလှသည့်အပြင် ၎င်းတို့၏ ရုံးစိုက်ရာဌာနများမှာလည်း အကန့်အသတ်ရှိလှသည်။

သို့သော် သတင်းစာတစ်စောင်သည် ထိုပြဿနာအားလုံးကို ဖြေရှင်းပေးနိုင်ပေလိမ့်မည်။

သူ လိုချင်သည်မှာ ငွေကြေးသက်သက် မဟုတ်ပေ။ သတင်းအချက်အလက်များအပေါ် ထိန်းချုပ်နိုင်စွမ်းရှိသည့် အာဏာပင် ဖြစ်သည်

သတင်းအချက်အလက်ကို ထိန်းချုပ်နိုင်ခြင်းသည် အမှန်တရားကို ထိန်းချုပ်နိုင်ခြင်းပင်။

အမှန်တရားကို ထိန်းချုပ်နိုင်ခြင်းသည် ဇာတ်ကြောင်းတစ်ခုလုံးကို စိတ်ကြိုက်ပုံဖော်

နိုင်ခြင်းပင် ဖြစ်သည်။

ထိုသို့ဖြင့် ဓားတစ်စင်းမျှ မထုတ်ဘဲနှင့်ပင် ဂုဏ်သိက္ခာကို ဖျက်ဆီးခြင်း သို့မဟုတ် မြှင့်တင်ခြင်း၊ မျိုးနွယ်စုများအကြား ရန်တိုက်ပေးခြင်းနှင့် လူထု၏ သဘောထားကို မိမိအလိုကျ ပြောင်းလဲပစ်ခြင်းတို့ကို လုပ်ဆောင်နိုင်မည် ဖြစ်သည်။

၎င်းအပြင် သူသည် သတင်းစုဆောင်းခြင်းလုပ်ငန်း၌ အရှိန်အဝါကြီးမားစွာ ခြေကုပ်

ယူထားပြီးသား ဖြစ်နိုင်သည်။ လိုအပ်သည်မှာ သတင်းစာများကို ရိုက်နှိပ်ပြီး ဖြန့်ဝေရန်သာ ဖြစ်သည်။

သတင်းစာမှ သတင်းများကို လူအများ ယုံကြည်လာရန် အချိန်အတန်ကြာနိုင်

သော်လည်း နောက်ဆုံးတွင်မူ ၎င်းတို့ကို အချက်အလက်အမှန်များအဖြစ် လက်ခံလာကြပေလိမ့်မည်။

သူ၏အပြုံးမှာ ပို၍ ကျယ်ပြန့်လာသည်။

စတီးထက်ပင် ပို၍ ထက်မြက်လှသော စကားလုံးဓားသွားပင် ဖြစ်သည်။

"ဒါကို ခုန်းကျန်းဟုန်နဲ့ ဆွေးနွေးရမယ်" သူက တိုးတိုးလေး ရေရွတ်လိုက်သည်။

အမှန်အတိုင်းပြောရလျှင် သူသည် ထိုလူကို နောက်ပိုင်းတွင် ကိစ္စအဝဝ ခိုင်းစေနေခဲ့သည်။

သို့သော် ခုန်းကျန်းဟုန်သည် အရာရာကို အပြစ်ပြောစရာမရှိအောင် ကိုင်တွယ်ဖြေရှင်းနိုင်သည့် ထူးကဲသော အရည်အချင်းကို ပြသခဲ့သည်။

ထိုအချက်ကြောင့်ပင် ခုန်းကျန်းဟုန်ကို ပို၍ပို၍ ယုံကြည်အားကိုးလာမိကြောင်း ပိုင်ကျီဟန် တွေးတောမိလေသည်။

သို့သော်လည်း ခုန်းကျန်းဟုန်သည် မိမိကိုယ်မိမိ အလုပ်ဒဏ်ပိအောင် လုပ်နေသည်ဟု ပိုင်ကျီဟန် မထင်ပေ။ မဟုတ်ပါက သူသည် နဂါးနှင့် ဖီးနစ် ပြိုင်ပွဲကို လာရောက်ကြည့်ရှုရာတွင် လိုက်ပါနိုင်လိမ့်မည် မဟုတ်ပေ။

ခုန်းကျန်းဟုန်သည် လူစုဆောင်းရာတွင် အတော်ပင် တော်သော်လည်း နောက်ဆုံးတွင်မူ အရာရာကို အတည်မပြုမီနှင့် ပိုင်ကျီဟန်ထံသို့ မပို့မီ အမှားအယွင်းမရှိစေရန် သူကိုယ်တိုင် စစ်ဆေးလေ့ရှိသည်။

ဒေါက်! ဒေါက်

(ပြောရင်းဆိုရင်းနဲ့ပဲ ရောက်လာပြီ။)

ပိုင်ကျီဟန် တွေးလိုက်သည်။

"ဝင်ခဲ့”

ပိုင်ကျီဟန်သည် စာလိပ်မှ မျက်တောင်မခတ်ဘဲ ပျင်းရိစွာ ပြောလိုက်သည်။

တံခါးမှာ ပွင့်သွားပြီး ခုန်းကျန်းဟုန်သည် သူ၏ ထုံးစံအတိုင်း တည်ငြိမ်သော အမူအရာဖြင့် လှမ်းဝင်လာကာ အသာအယာ ဦးညွှတ်လိုက်သည်။

"သခင်လေး”

ပိုင်ကျီဟန် နောက်ဆုံးတွင် မော့ကြည့်လိုက်သည်။

"ဘာကိစ္စလဲ?"

ခုန်းကျန်းဟုန်း၏ နှုတ်ခမ်းများသည် ပြုံးယောင်သန်းနေသော်လည်း သူ၏မျက်လုံးများမှာမူ ထက်မြက်သော ရည်ရွယ်ချက်များဖြင့် တောက်ပနေသည်။

"ငါးက ငါးစာကို ဟပ်လိုက်ပါပြီ။"

ငွေရလျှင် မည်သည့်အလုပ်ကိုမဆို လုပ်ဆောင်ပေးလေ့ရှိသော အနက်ရောင်မီးအိမ်အဖွဲ့သည် ယခုအခါ ပိုင်ကျီဟန်၏ လက်အောက်သို့ ရောက်ရှိနေပြီဖြစ်သည်။

လက်အောက်ခံ ဖြစ်သွားသည်ထက် ပိုင်ကျီဟန်၏ လက်အောက်တွင် ပိုမိုလျင်မြန်စွာ အင်အားတောင့်တင်းလာခဲ့သည်ဟု ဆိုရမည်။

အမှန်စင်စစ် ထိုအဖွဲ့သည် ပိုင်ကျီဟန်၏ ထိန်းချုပ်မှုအောက်တွင် ရှိနေသည်ကို လူအများအပြား မသိကြဘဲ သူတို့လုပ်ဆောင်နေကျ အလုပ်များမှာလည်း ပြောင်းလဲခြင်း မရှိပေ

ရှဲ့ဝမ်ရှို့သည် သူတို့၏ ဂိုဏ်းချုပ်အဖြစ် ရှိနေဆဲဖြစ်ပြီး ပိုင်ကျီဟန်၏ အရိုက်အနှက်ခံခဲ့ရဖူးသူ အများစုသည် ရှဲ့ဝမ်ရှို့နှင့် ပိုင်ကျီဟန်တို့ တစ်ခုခု ညှိနှိုင်းလိုက်ကြသည် သို့မဟုတ် သဘောတူညီချက် ရယူလိုက်ကြသည်ဟုသာ ထင်မှတ်နေကြသည်။

မည်သို့ပင်ဖြစ်စေ ပိုင်ကျီဟန် သို့မဟုတ် ဖေးလိန်သည် လျှို့ဝှက်အဖွဲ့အစည်းတစ်ခုမှ သူမကို စောင့်ကြည့်ရန် လွှတ်ထားသော ဝိညာဉ်ခွဲခြမ်းစိတ်ဖြာခြင်းအဆင့် အစောင့်

နှစ်ယောက်အား သတ်ဖြတ်ပေးခဲ့သည်။

သူတို့၏ ဝိညာဉ်ကို ရှာဖွေကြည့်သည့်တိုင် မည်သည့်အဖြေမှ မရခဲ့ချေ။

ထိုကိုယ်ရံတော် နှစ်ယောက်ကို ပိုင်ကျီဟန် သတ်ဖြတ်လိုက်ပြီးနောက် ရှဲ့ဝမ်ရှို့ကို ချစ်

မြတ်နိုးသူသည် သူမထံ ဆက်သွယ်လာလိမ့်မည်ဟုသာ သူတို့ မျှော်လင့်နိုင်ခဲ့ကြသည်။

ယခုတော့ ထိုသူသည် အမှန်တကယ် ဆက်သွယ်လာပုံရချေပြီ။

"အဲဒီအဖွဲ့အစည်းက ရှဲ့ဝမ်ရှို့ကို စစ်ဆေးဖို့ တစ်ယောက်ယောက်ကို နောက်ဆုံးတော့ လွှတ်လိုက်ပြီ ထင်တယ်"

ပိုင်ကျီဟန်၏ အကြည့်များမှာ စူးရှသွားသည်။

ဤလျှို့ဝှက်ဆန်းပြားသော အဖွဲ့အစည်းသည် တကယ်ပင် စိတ်ဝင်စားစရာ ဖြစ်စေသည်။ သူ့နောက်သို့ လုပ်ကြံသတ်ဖြတ်သူများ လွှတ်ခဲ့ရုံတင်မက သူတို့၏ အခြေစိုက်

စခန်းကို ရှာဖွေရန်လည်း ခက်ခဲလွန်းပေ၏

သူတို့ကိုယ်သူတို့ ဖုံးကွယ်ရန်အတွက် အလွန်အမင်း သတိထားဆောင်ရွက်ပုံကို ကြည့်ခြင်းအားဖြင့် ဤအဖွဲ့သည် အားနည်းသော အဖွဲ့အစည်း မဟုတ်ကြောင်း သိသာလှသည်။

"သူ ဘယ်မှာလဲ?"

"အနက်ရောင်မီးအိမ်အဖွဲ့ ခေါင်းဆောင်က သူ့ကို အချိန်ဆွဲထားဖို့ စကားတွေနဲ့ လှည့်စားထားပါတယ်" ခုန်းကျန်းဟုန်က ချက်ချင်း ပြန်ဖြေသည်။

"ဒါပေမဲ့ သူမက သူ့ကို ဘယ်လောက်အထိ ဆက်ပြီး လှည့်စားထားနိုင်မလဲဆိုတာကတော့ ရှဲ့ဝမ်ရှို့ရဲ့ အရည်အချင်းပေါ်မှာပဲ မူတည်ပါလိမ့်မယ်"

ပိုင်ကျီဟန်သည် လက်ဖဝါးပေါ်တွင် စာလိပ်ကို အသာအယာ ပုတ်ရင်း စဉ်းစားနေသည်။

"အင်း... ဒါဆိုရင် ငါတို့ အမြန်သွားဖို့ လိုတာပေါ့"

ဘာပဲဖြစ်ဖြစ် သူ့ကို ဖမ်းဖို့က လွယ်ကူသည်။ အကယ်၍ လွတ်သွားခဲ့လျှင်တော့ ထိုအဖွဲ့အစည်းနှင့် ဆက်သွယ်နိုင်မည့် နည်းလမ်း မရှိတော့ဘဲ ဖြစ်သွားနိုင်သည်။

"ငါးစာကို လာတို့နေတဲ့ ငါးဟာ နောက်ဆုံးတော့ ငါးပါပဲ။ လွတ်ထွက်မသွားစေနဲ့"

ခုန်းကျန်းဟုန်က ဦးညွှတ်လိုက်သည်။

"အမိန့်အတိုင်းပါ သခင်လေး”