အခန်း (၃၉)

လုချွမ်းသည် ချီချီလေးအတွက် အသားဆန်ပြုတ်လုပ်ပေးရန် မျိုးဗီဇပြောင်းခွေးကြီး၏ အသားအချို့ကို ချန်ထားရန် စဉ်းစားခဲ့သေးသည်။ ကမ္ဘာပျက်ကပ်အတွင်း နို့မှုန့်နှင့် ဆန်ပြုတ်ကိုသာ စားသုံးနေရပါက အာဟာရဓာတ် လိုအပ်ချက်ရှိနေမည် ဖြစ်သောကြောင့်ပင်။

သို့သော် မျိုးဗီဇပြောင်းလဲထားသော သတ္တဝါ၏ အသားကို လူသားများ စားသုံးနိုင်ခြင်း ရှိမရှိ မသေချာသဖြင့် သူ အန္တရာယ်မစွန့်ဝံ့ပေ။ အကယ်၍ ကလေးငယ်က စားမိပြီး ဗိုင်းရပ်စ်ကူးစက်ခံရပါက အခြေအနေမှာ အလွန်ဆိုးရွားသွားနိုင်သည်။ ဤမျိုးဗီဇပြောင်းသတ္တဝါများ၏ အသားကို စားသုံးနိုင်ခြင်း ရှိမရှိကိုမူ နောင်တွင် သေသေချာချာ စမ်းသပ်စစ်ဆေးပြီးမှသာ ဆုံးဖြတ်ရမည်ဖြစ်သည်။

"သွေးရောင်လွှမ်းနေသောလမင်းညပြီးကတည်းက လူသားတွေ၊ ဇွန်ဘီတွေနဲ့ ကျန်ရှိနေတဲ့ သတ္တဝါတွေအားလုံး တစ်မျိုးမဟုတ်တစ်မျိုး မျိုးဗီဇပြောင်းလဲမှုတွေ ဖြစ်ကုန်ကြတာပဲ။ အကယ်၍ လူသားတွေက ဒီမျိုးဗီဇပြောင်းသတ္တဝါတွေရဲ့ အသားကို စားလို့ရမယ်ဆိုရင်တော့ သမီးလေးရဲ့ အနာဂတ် အစားအသောက်တွေက အခုထက် အများကြီး ပိုပြီး စုံလင်လာမှာပါ"

လောလောဆယ်တွင်မူ မျိုးဗီဇပြောင်းသတ္တဝါများ၏ ခန္ဓာကိုယ်အတွင်း မည်သည့်အရာများ ရှိနေမည်ကို မည်သူမျှ မသိနိုင်သဖြင့် ဤအသားများကို ဇွန်ဘီများကိုသာ ကျွေးခြင်းက ပိုမိုဘေးကင်းမည်ဟု သူ တွေးလိုက်သည်။ နောင်တွင်လည်း ဤကဲ့သို့သော သတ္တဝါများနှင့် ထပ်မံဆုံတွေ့ဦးမည်ဖြစ်ရာ အကယ်၍ အသားက တကယ်စားသုံးနိုင်ပါက အခွင့်အရေးများစွာ ရှိနေသေးသဖြင့် ယခုတစ်ကြိမ် မစားရခြင်းက ပြဿနာမဟုတ်ပေ။

ဧည့်ခန်းအတွင်း၌မူ ကျိရုရွှယ်သည် လုချွမ်းတစ်ယောက် ဇွန်ဘီအဖွဲ့နှင့်အတူ အပြင်မှာ တိုက်ပွဲဝင်နေသည်ကို မသိရှိဘဲ ဆိုဖာပေါ်တွင် တင်ပလ္လင်ခွေထိုင်ကာ တရားထိုင်လေ့ကျင့်နေသည်။ သူမ၏ ခန္ဓာကိုယ်လေးမှာ အနည်းငယ် တုန်ရင်နေသည်ကို မြင်တွေ့နိုင်သည်။ အကြောင်းမှာ သူမ၏ လက်ရှိခန္ဓာကိုယ်မှာ အလွန်အားနည်းနေသေးသောကြောင့် ဖြစ်သည်။

ဖန်သားပြင်အသက်ရှူခြင်းအတတ်ကို အသုံးပြုလိုက်သည်နှင့် လေထုထဲမှ စွမ်းအင်များမှာ သူမ၏ ခန္ဓာကိုယ်အတွင်းသို့ အရှိန်အဟုန်ဖြင့် စီးဝင်သွားပြီး သူမ၏ ရုပ်ပိုင်းဆိုင်ရာ ခွန်အားနှင့် စိတ်စွမ်းအားများကို အဆက်မပြတ် မြင့်တင်ပေးနေသည်။ ခေတ္တမျှကြာပြီးနောက် ကျိရုရွှယ်ထံမှ ထွက်ပေါ်လာသော အရှိန်အဝါမှာ ရုတ်တရက် မြင့်တက်လာခဲ့သည်။

"ကောင်းပြီ။ ဒီလောက်ကြာအောင် လေ့ကျင့်ပြီးတဲ့နောက်မှာ နောက်ဆုံးတော့ ငါ အဆင့် ၂ ကို ချိုးဖျက်နိုင်ခဲ့ပြီ"

ကျိရုရွှယ် ရုတ်တရက် မျက်လုံးဖွင့်လိုက်သည်။ သူမ၏ အဖြူအမည်း သဲသဲကွဲကွဲရှိသော မျက်ဝန်းအစုံမှာ ကမ္ဘာပျက်ကပ်အတွင်းရှိ ဇွန်ဘီများနှင့် လုံးဝမတူဘဲ မှောင်ရိပ်သန်းနေသော ဧည့်ခန်းအတွင်း၌ အလွန်ပင် တောက်ပနေသည်။ ယခုအခါ ကလေးငယ်ဘဝဖြင့် အဆင့် ၂ သို့ ရောက်ရှိသွားခြင်းမှာ သူမ၏ မိမိကိုယ်ကိုယ် ကာကွယ်နိုင်စွမ်းကို များစွာ တိုးတက်စေမည်ဖြစ်သဖြင့် ကျိရုရွှယ်၏ မျက်ဝန်းများတွင် ယုံကြည်ချက်နှင့် စိတ်လှုပ်ရှားမှုများဖြင့် ပြည့်နှက်နေသည်။

ကျိရုရွှယ်၏ မှတ်ဉာဏ်ထဲတွင် ကမ္ဘာပျက်ကပ်၏ ကနဦးရုန်းရင်းဆန်ခတ်မှုများပြီးနောက် လူတိုင်းမှာ မျိုးဗီဇပြောင်းလဲ ဆင့်ကဲတိုးတက်သော ဘဝကို စတင်ဖြတ်သန်းကြရသည်။ လူသားအသက်ရှင်ကျန်ရစ်သူများသည် လူသားများ၊ ဇွန်ဘီများနှင့် သားရဲတိရစ္ဆာန်များကို ၎င်းတို့၏ ခွန်အားပေါ်မူတည်၍ အဆင့် ၉ ဆင့် ခွဲခြားထားကြသည်။

အဆင့် ၁ မှာ အားအနည်းဆုံးဖြစ်ပြီး အဆင့် ၉ မှာ အင်အားအကြီးမားဆုံး အထွတ်အထိပ်

ဖြစ်ခြင်းကို ကိုယ်စားပြုသည်။ အဆင့် ၇ မှာ ဘုရင်၊ အဆင့် ၈ မှာ ဧကရာဇ်နှင့် အဆင့် ၉ မှာ အစွမ်းအထက်ဆုံး အရှင်သခင် ဧကရာဇ်အဖြစ် သတ်မှတ်ထားသည်။ အတိတ်ဘဝတွင် ကျိရုရွှယ်သည် ကမ္ဘာပျက်ကပ်အတွင်း အကြိတ်အနယ် တိုက်ပွဲဝင်ရင်း နောက်ဆုံးတွင် အနှိုင်းမဲ့ဧကရီ ဖြစ်လာခဲ့သူ ဖြစ်သည်။

ထူးဆန်းသော သွေးရောင်လွှမ်းနေသောလမင်း ပေါ်ထွန်းလာပြီးနောက် မျိုးဗီဇပြောင်းလဲမှုမှတစ်ဆင့် ဆင့်ကဲတိုးတက်ခြင်း စွမ်းရည်များ ရရှိလာသူများကို အဆင့် ၁ ဟု သတ်မှတ်သည်။ ဇွန်ဘီများနှင့် သားရဲများသည် အဆက်မပြတ် ဆင့်ကဲတိုးတက်လိုပါက တစ်ဦး၏ အမြုတေကို တစ်ဦးက ဝါးမြိုပြီး မိမိ၏ စွမ်းအင်အဖြစ် ပြောင်းလဲကြရသည်။ ဇွန်ဘီများနှင့် သားရဲများအတွက်မူ ဆင့်ကဲတိုးတက်ရန်မှာ မနားတမ်း သတ်ဖြတ်ခြင်းဟူသော လမ်းတစ်လမ်းသာ ရှိသည်ဟု ဆိုနိုင်သည်။

အချို့သော ကဏ္ဍများတွင် လူသားများသည် ဇွန်ဘီများနှင့် သားရဲများလောက် ပြင်းထန်သော ပြိုင်ဆိုင်မှုမျိုး မရှိပေ။ လူသားအသက်ရှင်ကျန်ရစ်သူများသည် ကမ္ဘာပျက်ကပ် စတင်ပြီး မကြာမီမှာပင် ဆင့်ကဲပြောင်းလဲမှုကို အထောက်အကူပြုနိုင်သော ဆေးဝါးများကို စတင်

ဖော်ထုတ်နိုင်ခဲ့ကြသည်။

ကမ္ဘာပျက်ကပ်၏ အလယ်လောက်မှ နောက်ဆုံးအဆင့်ကာလများတွင် လူသားများသည် ရှေးဟောင်းအမွေအနှစ်များကို အသုံးပြုကာ ကျင့်စဉ်များကို ဖော်ထုတ်နိုင်ခဲ့ကြသည်။ ယင်းက လူသားများကို လေထုထဲမှ စွမ်းအင်များကို စုပ်ယူစေနိုင်ပြီး ခန္ဓာကိုယ်ကြံ့ခိုင်မှုနှင့် ကျင့်စဉ်အဆင့်များကို အဆက်မပြတ် မြင့်တက်လာစေခဲ့သည်။

သို့သော် လက်ရှိတွင်မူ ကမ္ဘာပျက်ကပ်၏ ကနဦးအစောပိုင်းကာလသာ ရှိသေးသဖြင့် လူသားများအတွက် ထိုကဲ့သို့သော ကျင့်စဉ်များကို ဖော်ထုတ်နိုင်ခြင်း မရှိသေးပေ။ ထို့ကြောင့် ဤအချိန်၌ လူသားများ၏ အင်အားမှာ အမြုတေများကို ဝါးမြိုကာ လျင်မြန်စွာ ဆင့်ကဲပြောင်းလဲနေသော ဇွန်ဘီများနှင့် မျိုးဗီဇပြောင်းသတ္တဝါများနှင့် နှိုင်းယှဉ်လျှင် များစွာ အားနည်းနေသေးသည်။

သို့သော် ကျိရုရွှယ်အတွက်မူ ထိုကန့်သတ်ချက်များမှာ သက်ရောက်မှုမရှိပေ။ ဧကရာဇ်အဆင့်ထိ တက်လှမ်းနိုင်ခဲ့သော စွမ်းအားရှင်တစ်ဦးပီပီ ကျိရုရွှယ်၏ ဖန်သားပြင်ကျင့်စဉ်မှာ ကမ္ဘာပျက်ကပ်၏ နောက်ဆုံးကာလများ၌ပင် ထိပ်တန်းအဆင့်ရှိသော ပညာရပ်တစ်ခု ဖြစ်သည်။

သူမသည် လက်ရှိတွင် ကလေးငယ်တစ်ဦးသာ ရှိသေးသော်လည်း ဖန်သားပြင်အသက်ရှူခြင်းအတတ်ကို အသုံးပြုကာ ကျင့်စဉ်၏ ဒုတိယအဆင့်သို့ ခြေလှမ်းလှမ်းနိုင်ခဲ့ပြီ ဖြစ်သည်။ ကျိရုရွှယ်၏ မှတ်ဉာဏ်အရ ဤအစောပိုင်းကာလ၌ အဆင့် ၂ သို့ ရောက်ရှိနိုင်သော လူသားဟူ၍ တစ်ဦးမျှ မရှိနိုင်သေးချေ။

ရှူး... ရှူး...

ကျိရုရွှယ်၏ စိတ်အာရုံနှင့်အတူ ထမင်းစားပွဲပေါ်တွင် နက်ရှိုင်းစွာ စိုက်ဝင်နေသော သံမှိုနှစ်ချောင်းမှာ သူမ၏ လက်ထဲသို့ အရှိန်အဟုန်ဖြင့် ပြန်လည်ပျံသန်းလာခဲ့သည်။ အဆင့်တက်သွားပြီးနောက် ထိုသံမှိုများ၏ ပျံသန်းနှုန်းမှာ ယခင်ကထက် သိသိသာသာ ပိုမိုမြန်ဆန်လာသည်ကို မြင်တွေ့နိုင်သည်။

သာမကဘဲ အချိန်အတော်ကြာ မပြတ်မလပ် လေ့ကျင့်ခဲ့မှုကြောင့် ကျိရုရွှယ်၏ သံမှိုများကို ထိန်းချုပ်နိုင်စွမ်းမှာလည်း တစ်နေ့ထက်တစ်နေ့ ပိုမိုကျွမ်းကျင်လာခဲ့သည်။ ထိုမျှ မြန်ဆန်သောအရှိန်ဖြင့် ပြန်လည်ခေါ်ယူလိုက်သော်လည်း သူမ၏ နူးညံ့လှသော လက်ကလေးများကို တစ်စုံတစ်ရာ ထိခိုက်မှု မရှိစေခဲ့ပေ။

ကျိရုရွှယ်သည် သူမ၏ ထူးခြားသော ပါရမီနှစ်မျိုးကြောင့် ကျေနပ်အားရစွာ ခေါင်းညိတ်လိုက်မိသည်။ ယခုအခါ သူမ၏ စိတ်စွမ်းအားဖြင့် ပစ္စည်းများကို ထိန်းချုပ်နိုင်စွမ်းနှင့် အချိန်ကို ထိန်းချုပ်နိုင်စွမ်းတို့ ပေါင်းစပ်လိုက်ပါက ဤကမ္ဘာပျက်ကပ်အတွင်း သူမကိုယ်သူမ အပြည့်အဝ ကာကွယ်နိုင်ရုံသာမက သူမ၏ ဇွန်ဘီဖေဖေကိုပါ စောင့်ရှောက်နိုင်စွမ်း ရှိနေပြီဖြစ်သည်။

ဂျောက်..

တံခါးဖွင့်သံ ထွက်ပေါ်လာသည်နှင့် ကျိရုရွှယ်သည် သံမှိုများကို အလျင်အမြန် ဖုံးကွယ်လိုက်ပြီး သူမ၏ လက်ကလေးကို တစ်ချက်ဝှေ့ယမ်းလိုက်ရာ အနီးအနားရှိ အရုပ်ဝက်ဝံလေးမှာ သူမ၏ လက်ထဲသို့ ပျံသန်းရောက်ရှိလာသည်။

လုချွမ်း အခန်းထဲသို့ ဝင်လာသောအခါ ကျိရုရွှယ်သည် ဘာမှမသိနားမလည်သော ကလေးငယ်တစ်ဦးအလား အရုပ်များဖြင့် ဆော့ကစားနေဟန် ဆောင်လိုက်သည်။ စိတ်ကြည်လင်နေသော လုချွမ်းသည် သမီးလေး၏ ချစ်စဖွယ်ပုံစံကို မြင်လိုက်ရသောအခါ သူ၏မျက်နှာထက်မှ အပြုံးမှာ ပိုမိုတောက်ပလာခဲ့သည်။ သူသည် ကျိရုရွှယ်အနားသို့ ခပ်သွက်သွက် လျှောက်သွားကာ ဘေးရှိ ဘာဘီအရုပ်မလေးကို ကောက်ကိုင်ပြီး ကလေးငယ်ကို စတင်စနောက်တော့သည်။

လုချွမ်း၏ ကလေးချော့နည်းမှာ အနည်းငယ် ကြမ်းတမ်းလှသော်လည်း အလိုက်သိတတ်သော ကျိရုရွှယ်က အလွန်သဘောကျဟန်ဆောင်ပေးသဖြင့် လုချွမ်းမှာ များစွာ စိတ်ကျေနပ်သွားရသည်။ ကျိရုရွှယ်ကမူ သူမကိုယ်သူမ အမြန်ဆုံး ကြီးထွားလာချင်လှပြီဟု စိတ်ထဲမှ သက်ပြင်းချနေမိသည်။

"ဟင် နေပါဦး"

လုချွမ်းနှင့်အတူ လိုက်ဆော့နေရင်းမှ ကျိရုရွှယ်သည် သူမ၏ ဇွန်ဘီဖေဖေထံမှ သွေးညှီနံ့ ခပ်ပါးပါးကို ရုတ်တရက် အာရုံခံမိလိုက်သည်။ အလောင်းတောင်တန်းနှင့် သွေးပင်လယ်များကြားမှ အောင်နိုင်သူအဖြစ် ထွက်ပေါ်လာခဲ့သူပီပီ ကျိရုရွှယ်သည် ထိုအနံ့ကို အလွန်အမင်း အကဲခတ်နိုင်စွမ်း ရှိသည်။

လုချွမ်း အမှတ်မထင်ဖြစ်နေခိုက် ကျိရုရွှယ် သေသေချာချာ အကဲခတ်ကြည့်ရာ လုချွမ်း၏ ကိုယ်ပေါ်တွင် သွေးစွန်းရာအချို့ကို အမှန်တကယ်ပင် တွေ့ရှိလိုက်ရသည်။ သိသာထင်ရှားခြင်း မရှိသော်လည်း ၎င်းမှာ လတ်လတ်ဆတ်ဆတ် ပေကျံထားခြင်း ဖြစ်ကြောင်း အတည်ပြုနိုင်သည်။ တစ်ချိန်တည်းမှာပင် ကျိရုရွှယ်သည် အမွေးအမျှင် အစုအဝေးလေး တစ်ခုကိုလည်း တွေ့ရှိလိုက်သည်။

သူမသည် ထိုအမွေးများကို တိတ်တဆိတ် ကောက်ယူထားလိုက်သည်။ လုချွမ်းက ထမင်းချက်ရန် မီးဖိုချောင်ထဲသို့ ဝင်သွားသောအခါ ကျိရုရွှယ်သည် ထိုအမွေးများကို မျက်လုံးနားသို့ ယူဆောင်ကာ ဂရုတစိုက် စစ်ဆေးကြည့်တော့သည်။

"ဒါ ဘယ်လိုအမွေးမျိုးလဲ... အမည်းရောင်ဖြစ်ပြီး အနည်းငယ် မာကျောနေတယ် ပြီးတော့ ရှည်လျားပြီး ကြမ်းတမ်းတယ်..."

"ဒါက လူသားတွေ ဒါမှမဟုတ် ဇွန်ဘီတွေဆီက ပေါက်တဲ့အမွေးမျိုး မဟုတ်တာတော့ သေချာတယ်။ ဒါဆိုရင်... မျိုးဗီဇပြောင်း သားရဲတိရစ္ဆာန်တစ်ကောင်ဆီက ဖြစ်နိုင်မလား"

ကျိရုရွှယ်သည် စိတ်ထဲမှ မှန်းဆနေမိသည်။ မျိုးဗီဇပြောင်းသားရဲများမှလွဲ၍ ဤကဲ့သို့သော အမွေးမျိုးရှိမည့် သတ္တဝါကို သူမ စဉ်းစားမရပေ။ သို့သော် ပြဿနာမှာ မျိုးဗီဇပြောင်းသားရဲများသည် များသောအားဖြင့် အလွန်အစွမ်းထက်ကြသည်။ ဆင့်ကဲပြောင်းလဲခြင်း မရှိသေးသည့် သူမ၏ ဇွန်ဘီဖေဖေက မျိုးဗီဇပြောင်းသားရဲတစ်ကောင်ကို ဘယ်လိုလုပ် ယှဉ်ပြိုင်နိုင်မှာလဲ။

"ဒါဆိုရင်... ဖေဖေက သာမန်ဇွန်ဘီတစ်ကောင် မဟုတ်ဘူးလား"