အခန်း (၄၃)

ကျောက်လင်းသည် သူမရှေ့မှ ဆင့်ကဲဇွန်ဘီကြီး လှုပ်ရှားမှုမရှိဘဲ ရပ်တန့်နေသည်ကို မြင်လိုက်ရသောအခါ မယုံကြည်နိုင်လောက်အောင် မျက်လုံးအစုံကို ပြူးကျယ်လျက် ကြည့်နေမိသည်။ ဤအခြေအနေမှာ သူမအတွက် များစွာ ဝေခွဲမရဖြစ်စေခဲ့သည်။

သို့သော် ဤကဲ့သို့သော အသက်နှင့်လုရသည့် အခြေအနေမျိုးတွင် အမှန်တကယ် ဘာဖြစ်ခဲ့သည်ကို စဉ်းစားနေရန် ကျောက်လင်း၌ အချိန်မရှိပေ။ သူမသည် ထိုဇွန်ဘီကို အမြန်ကျော်ဖြတ်ကာ ရဲစခန်းရှိရာဘက်သို့ ဦးတည်၍ အစွမ်းကုန် ထွက်ပြေးလေတော့သည်။ သာမန်ဇွန်ဘီတစ်ကောင်၏ လက်မှ လွတ်မြောက်ရန်ပင် ခဲယဉ်းလှသည်ဖြစ်ရာ ဆင့်ကဲဇွန်ဘီတစ်ကောင်၏ လက်တွင်းမှ လွတ်မြောက်နိုင်ခြင်းမှာ အံ့ဩစရာပင်။ လက်ရှိတွင် ကျောက်လင်း၏ မျက်နှာထက်၌ ထိတ်လန့်တုန်လှုပ်မှုများဖြင့် ပြည့်နှက်နေပြီး မည်သည့်အရာကိုမျှ မစဉ်းစားနိုင်တော့ချေ။

သူမ ထွက်ခွာသွားပြီးနောက်တွင်မူ ထိုဆင့်ကဲဇွန်ဘီမှာ ပြန်လည်လှုပ်ရှားလာခဲ့သည်။ ယခင်က ကြမ်းကြုတ်ခက်ထန်ခဲ့သော ဇွန်ဘီကြီးမှာ ယခုအခါတွင်မူ စွမ်းအားတစ်ခုခု၏ ထိန်းချုပ်မှုကို ခံထားရသည့်အလား စတိုးဆိုင်၏ ဘေးဘက်သို့ တုံးအစွာ လျှောက်လှမ်းသွားခဲ့သည်။

ခဏအကြာတွင် ထောင့်ချိုးတစ်ခုမှ လူရိပ်တစ်ခု ဖြည်းညှင်းစွာ ထွက်ပေါ်လာခဲ့သည်။ ၎င်းမှာ ဤနေရာသို့ အချိန်မီ ရောက်ရှိလာခဲ့သော လုချွမ်းပင်။ ထိုဆင့်ကဲဇွန်ဘီ ကျောက်လင်းနောက်သို့ ဆက်လက်မလိုက်တော့ခြင်းမှာ နောက်ဆုံးအချိန်တွင် လုချွမ်းက သူ၏ စိတ်စွမ်းအားကို အသုံးပြု၍ အောင်မြင်စွာ ထိန်းချုပ်လိုက်နိုင်ခြင်းကြောင့် ဖြစ်သည်။

"မယုံနိုင်စရာပဲ... ဒီလိုကမ္ဘာပျက်ကပ်ကြီးထဲမှာတောင် သူတော်စင်စိတ်ဓာတ်မျိုးရှိတဲ့ လူတွေ ကျန်သေးတာလား"

လုချွမ်းသည် စတိုးဆိုင်အတွင်း ဖြစ်ပျက်ခဲ့သမျှကို အစအဆုံး စောင့်ကြည့်နေခဲ့ခြင်း ဖြစ်သည်။ ဤကဲ့သို့သော အရာအားလုံး ပျက်စီးနေသည့် ကမ္ဘာတွင် မိမိကိုယ်ကိုယ် ကာကွယ်ရှင်သန်ရေးမှာ ပထမဦးစားပေး စည်းမျဉ်းဖြစ်ကြောင်း လူတိုင်း သိကြသည်။

ဤကာလအတွင်း လူသားအချင်းချင်း သတ်ဖြတ်နေကြသည်ကို လုချွမ်း အကြိမ်ကြိမ် မြင်တွေ့ခဲ့ရသည်။ တစ်ခဏအတွင်း အတူလက်တွဲနေကြသော်လည်း နောက်တစ်ခဏတွင် သစ္စာဖောက်ကာ အဖော်ဖြစ်သူကို ဇွန်ဘီများ၏ လက်တွင်းသို့ တွန်းပို့ကြသူများကိုလည်း သူတွေ့ဖူးသည်။ မိမိအဖော်အတွက် ကိုယ်တိုင် အနစ်နာခံကာ နောက်ချန်နေရစ်ခဲ့သူကို သူ ပထမဆုံးအကြိမ် မြင်ဖူးခြင်းပင်။ သေခါနီးအချိန်၌ပင် သူမနှင့် မည်သို့မျှ မသက်ဆိုင်သော ရဲစခန်းမှ အသက်ရှင်ကျန်ရစ်သူများအတွက် စိုးရိမ်ပူပန်နေခဲ့သေးသည်။

အမှန်စင်စစ် လုချွမ်းသည် ဤကဲ့သို့သော စိတ်ဓာတ်ပိုင်ရှင်မျိုးကို လေးစားမိသော်လည်း သူမ၏ လုပ်ရပ်အပေါ်တွင်မူ သဘောမတူနိုင်ပေ။

ဤမျှ တစ်ကိုယ်ကောင်းဆန်ပြီး ယုတ်မာကောက်ကျစ်သော ကမ္ဘာပျက်ကပ်ကြီးအတွင်း လူသားဆန်သည့် စိတ်ထားဖြူစင်မှုကို ဆက်လက်ထိန်းသိမ်းထားနိုင်ခြင်းမှာ အလွန်မွန်မြတ်သော သူတော်စင်တို့၏ လက္ခဏာပင်။ သို့သော် ပြဿနာမှာ ကမ္ဘာပျက်ကပ်အတွင်း၌ ကြင်နာမှုနှင့် တရားမျှတမှုတို့မှာ အသုံးမဝင်ဆုံးအရာများ ဖြစ်နေခြင်းပင်။ ရှင်သန်နိုင်ရေးသည်သာ အဓိက အကျဆုံးဖြစ်ပေသည်။ ဤကဲ့သို့ ကိုယ်ကျိုးစွန့်သည့် လုပ်ရပ်မှာ ကမ္ဘာပျက်ပြီးနောက်ပိုင်းတွင် အလွန်ရှားပါးလှသော်လည်း နှမြောစရာကောင်းသည်မှာ ဤသို့သော လူကောင်းများသည် များသောအားဖြင့် ကမ္ဘာပျက်ကပ်အတွင်း၌ အဆုံးသတ် မကောင်းတတ်ကြခြင်းပင် ဖြစ်သည်။ အဘယ်ကြောင့်ဆိုသော် လူသားတို့၏ စိတ်နေစိတ်ထားမှာ ခန့်မှန်းရ အခက်ခဲဆုံးအရာ ဖြစ်သောကြောင့်ပင်။

သို့သော် လုချွမ်းအတွက်မူ ထိုအချက်မှာ အရေးမကြီးပေ။ ယခုတစ်ကြိမ် ကျောက်လင်းကို ကယ်တင်လိုက်ခြင်းမှာလည်း ရုတ်တရက် စိတ်ကူးပေါက်၍ လုပ်ဆောင်လိုက်ခြင်းသာ ဖြစ်သည်။ ယနေ့ဖြစ်ရပ်ကြောင့် ဆင့်ကဲဇွန်ဘီများသည် သာမန်လူသားများထက် သိသိသာသာ ပိုမိုစွမ်းအားကြီးမားကြောင်း လုချွမ်း ကိုယ်တိုင် မြင်တွေ့ခွင့်ရခဲ့သည်။ လက်နက်ကိုင်ထားသော ရဲအရာရှိများပင်လျှင် ဤကဲ့သို့သော ဆင့်ကဲဇွန်ဘီတစ်ကောင်ကို အဆုံးစီရင်နိုင်ခြင်း မရှိခဲ့ချေ။

လုချွမ်းသည် သူ၏ရှေ့မှ ဆင့်ကဲဇွန်ဘီကို ကြည့်လိုက်သည်။ ၎င်း၏ ကိုယ်လုံးကိုယ်ပေါက်မှာ အနည်းငယ် ပိန်လှီသော်လည်း လက်ဖဝါးများမှာ ထက်မြက်သော လက်သည်းကြီးများအဖြစ် ပြောင်းလဲနေသည်ကို မြင်ရသောအခါ ကျေနပ်စွာ ခေါင်းညိတ်လိုက်မိသည်။

၎င်းတို့နှစ်ဦးလုံးမှာ ဆင့်ကဲဇွန်ဘီများ ဖြစ်ကြသော်လည်း ယခုတစ်ကောင်မှာ သူယခင်က သိမ်းသွင်းခဲ့သော တာဖန်းနှင့် လုံးဝကွဲပြားနေသည်။ တာဖန်းမှာ ထွားကျိုင်းသော ကိုယ်ခန္ဓာဖြင့် တိုက်စစ်နှင့် ခံစစ်ကို ပေါင်းစပ်ထားသော အမျိုးအစားဖြစ်ပြီး ယခု ဤ လျင်မြန်ဖြတ်လတ်မှုအမျိုးအစားဇွန်ဘီမှာမူ အလွန်လျင်မြန်သဖြင့် လေ့ကျင့်သားရထားသော အရာရှိများပင် တစ်ချက်မျှ ထိမှန်အောင် မပစ်နိုင်ခဲ့ပေ။

လုချွမ်းသည် ရှေ့သို့တိုးကာ ဆင့်ကဲဇွန်ဘီ၏ လက်သည်းများကို စစ်ဆေးကြည့်ရာ အမှန်တကယ်ပင် အလွန်ထက်မြက်ကြောင်း တွေ့ရှိရသည်။

"ဒီနေ့ကစပြီး မင်းရဲ့နာမည်ကို လျှပ်စီးလို့ ခေါ်မယ်..."

လုချွမ်း ရောက်ရှိလာစဉ်က ဤဇွန်ဘီသည် ကျည်ဆန်များကို အဆက်မပြတ် ရှောင်တိမ်းနေသည်ကို မြင်တွေ့ခဲ့ရပြီး ၎င်း၏ လျင်မြန်သော အရှိန်အဟုန်မှာ လျှပ်စီးဟူသော အမည်နှင့် အလွန်ပင် လိုက်ဖက်လှသည်။

ထို့နောက် လုချွမ်းသည် သူ၏ အောင်မြင်မှုလက်ဆောင်အသစ်ကို နေရောင်ခြည်ရပ်ကွက်သို့ ခေါ်ဆောင်လာခဲ့သည်။ ဝင်ပေါက်တွင် စောင့်ကြပ်နေကြသော ကိုယ်လုံးကိုယ်ပေါက် ကြီးမားသူတစ်ဦးနှင့် သေးသွယ်သူတစ်ဦးတို့ကို ကြည့်ကာ လုချွမ်း ကျေနပ်စွာ ခေါင်းညိတ်လိုက်မိသည်။ တာဖန်းနှင့် လျှပ်စီးဟူသော အစွမ်းထက် ဆင့်ကဲဇွန်ဘီနှစ်ကောင် ရှိနေခြင်းက လုချွမ်းအတွက် လုံခြုံမှုအပြည့်အဝ ပေးစွမ်းနိုင်သည်။

ဤဆင့်ကဲပြောင်းလဲမှုနှင့် အင်အားစုဆောင်းမှု ကာလအတွင်း လုချွမ်းသည် သာမန်အဆင့်နိမ့် ဇွန်ဘီရုပ်သေး ၂၀ ကျော်နှင့် မတူညီသော ဆင့်ကဲဇွန်ဘီရုပ်သေး နှစ်ကောင်ကို ပိုင်ဆိုင်ထားနိုင်ခဲ့ပြီ ဖြစ်သည်။ တာဖန်းနှင့် လျှပ်စီးတို့မှာ ဆင့်ကဲဇွန်ဘီ အမျိုးအစားချင်း မတူကြပေ။ တာဖန်းမှာ ကြီးမားထွားကျိုင်းသော ကိုယ်ခန္ဓာဖြင့် အလွန်ပြင်းထန်သော ခွန်အားနှင့် ခံစစ်ကို အမြင့်ဆုံးမြှင့်တင်ထားသည်။ လျှပ်စီးမှာမူ အရှိန်အဟုန်နှင့် တိုက်စစ်ကို အသားပေးထားသည်။ တစ်ဦးက တိုက်စစ်၊ တစ်ဦးက ခံစစ်ဖြစ်ရာ အချင်းချင်း အားနည်းချက်များကို အကောင်းဆုံး ဖြည့်ဆည်းပေးနိုင်သည်။

အသိစိတ်မဲ့သော လျှပ်စီးကဲ့သို့ လျင်မြန်ဖြတ်လတ်သည့် ဆင့်ကဲဇွန်ဘီ တစ်ကောင်တည်းပင် လက်နက်ကိုင်ရဲအရာရှိတစ်ဖွဲ့ကို အသက်ဘေးအထိ ဒုက္ခပေးနိုင်စွမ်း ရှိသည်။ ယခုအခါ အဆင့်နိမ့်ဇွန်ဘီ ၂၀ ကျော်နှင့် ဆင့်ကဲဇွန်ဘီ နှစ်ကောင်ကို ထိန်းချုပ်ထားနိုင်သော လုချွမ်းမှာ ဤကမ္ဘာပျက်ကပ်အတွင်း ဘေးမသီရန်မခဘဲ သွားလာနိုင်ပြီဟု ခံစားနေရသည်။

အင်အားပြင်းထန်သော လက်နက်ကြီးများ ပိုင်ဆိုင်သည့် လူသားစစ်တပ်များနှင့် မတွေ့သရွေ့ မိမိအတွက် ကြီးမားသော ခြိမ်းခြောက်မှု မရှိနိုင်ဟု လုချွမ်း ယုံကြည်ထားသည်။ အဘယ်ကြောင့်ဆိုသော် သူ၏ ခံစစ်အကောင်းဆုံး လက်အောက်ငယ်သား တာဖန်းပင်လျှင် လူသားတို့၏ ခေတ်မီလက်နက်ကြီးများကို ကြံ့ကြံ့ခံနိုင်စွမ်း မရှိသေးသောကြောင့် ဖြစ်သည်။ နောင်တစ်ချိန်တွင် ထိုလက်နက်များကိုပါ ခုခံနိုင်သည်အထိ ဆင့်ကဲပြောင်းလဲလာနိုင်မည်လောဟူသည်ကိုမူ လုချွမ်း မသေချာပေ။

သို့သော် ယခုအခါ ကမ္ဘာကြီးမှာ ပျက်စီးယိုယွင်းနေပြီဖြစ်ပြီး ကမ္ဘာပျက်ကပ် စတင်ခဲ့သည်မှာ တစ်လကျော် ကြာမြင့်ခဲ့ပြီဖြစ်သော်လည်း မြို့တွင်းသို့ ကယ်ဆယ်ရေးလာရောက်သည့် စစ်တပ်များကို လုချွမ်း မတွေ့ရသေးပေ။ မြို့တွင်းရှိ သေးငယ်သော ရဲတပ်ဖွဲ့အင်အားစုများကသာ ကယ်ဆယ်ရေးလုပ်ငန်းများကို စတင်ခဲ့ကြသော်လည်း များပြားလှသော ဇွန်ဘီအရေအတွက်နှင့် လူအင်အားမလုံလောက်မှုကြောင့် နောက်ဆုံးတွင် ပျက်စီးခဲ့ရသည်။ ဤရုတ်တရက် ဖြစ်ပွားခဲ့သော ဇွန်ဘီဘေးဒုက္ခသည် တစ်ကမ္ဘာလုံးကို ပြိုလဲစေခဲ့ပြီ ဖြစ်သည်။

စစ်တပ်၏ အခြေအနေမှာလည်း ကောင်းမွန်နိုင်မည်မဟုတ်ဟု လုချွမ်း ခန့်မှန်းမိသည်။ အဘယ်ကြောင့်ဆိုသော် မြို့နေလူထုသာ ပိုးကူးစက်ခံရပြီး စစ်တပ်မှာမူ ဘေးကင်းလွတ်မြောက်နေသည်ဟူသောအချက်မှာ ယုတ္တိမရှိသောကြောင့်ပင်။

...

လုချွမ်းသည် သူ၏ ဇွန်ဘီရုပ်သေးတပ်မဟာကို စစ်ဆေးနေစဉ်အတွင်း ကျိရုရွှယ်မှာ အိပ်ခန်းထဲ၌ မရှိတော့သည်ကို သူ သတိမထားမိခဲ့ပေ။ အစောပိုင်းက လုချွမ်းသည် ဆင့်ကဲဇွန်ဘီ၏ အရှိန်အဝါကို အာရုံခံမိသည်နှင့် အလျင်အမြန် ထွက်ခွာသွားခဲ့ရာ ကျိရုရွှယ်သည် ထိုအခွင့်အရေးကို အသုံးချ၍ စိတ်စွမ်းအားဖြင့် တံခါးကို တိတ်တဆိတ် ဖွင့်လှစ်ခဲ့ခြင်းဖြစ်သည်။

ယခုအခါ ကျိရုရွှယ်သည် ဒုတိယအဆင့်သို့ တက်လှမ်းနိုင်ခဲ့ပြီဖြစ်ရာ သူမကိုယ်သူမ ယုံကြည်မှုများစွာ ပြန်လည်ရရှိလာခဲ့သည်။ အစွမ်းထက်သော စွမ်းရည်နှစ်ရပ်ကို ပိုင်ဆိုင်ထားပြီး ဒုတိယအဆင့်သို့ ရောက်ရှိနေပြီဖြစ်၍ အလွန်အမင်း အစွမ်းထက်သော ဆင့်ကဲဇွန်ဘီနှင့် တိုက်ရိုက်မတိုးသရွေ့ သူမအတွက် ကြီးမားသော အန္တရာယ်မရှိနိုင်ဘူးဟု ခံစားနေရသည်။

ပြန်လည်မွေးဖွားလာပြီးကတည်းက ကျိရုရွှယ်သည် အိမ်ထဲ၌သာ အမြဲပုန်းအောင်းနေခဲ့ရသည်။ လွတ်လပ်မှု၏ အရသာကို မခံစားရသည်မှာ ကြာပြီဖြစ်သလို သူမ၏ သေးငယ်လှသော ခန္ဓာကိုယ်မှာလည်း လှုပ်ရှားသွားလာမှုကို များစွာ အဟန့်အတား ဖြစ်စေခဲ့သည်။ သို့သော် အဆက်မပြတ် လေ့ကျင့်မှုနှင့် စိတ်စွမ်းအား၏ အကူအညီကြောင့် ယခုအခါ သူမ၏ ခန္ဓာကိုယ်မှာ ပုံမှန်အတိုင်း လှုပ်ရှားနိုင်သည့် အခြေအနေသို့ ရောက်ရှိလာပြီဖြစ်သည်။

ထို့ကြောင့် ကျိရုရွှယ်သည် အပြင်လောကကြီးမှာ မည်သို့ရှိနေမည်ကို စတင်စူးစမ်းရန် ကြိုးစားတော့သည်။ အိမ်ထဲ၌သာ အချိန်ပြည့် ပိတ်မိနေခြင်းမှာ မည်သူ့ကိုမဆို ရူးသွပ်သွားစေနိုင်သည်။ အထူးသဖြင့် တစ်ချိန်က ထိပ်သီးအဆင့်တွင် ရပ်တည်ခဲ့သော ဧကရီတစ်ပါးဖြစ်သည့် ကျိရုရွှယ်အဖို့ တစ်နေကုန် အခန်းထဲ၌သာ အချိန်ကုန်ဆုံးနေရခြင်းမှာ သည်းမခံနိုင်လောက်အောင် စိတ်အနှောင့်အယှက် ဖြစ်စရာပင်။

ယခင်က သူမ၏ အင်အားနည်းပါးမှုကို သည်းခံခဲ့သော်လည်း ယခုအခါ မိမိကိုယ်ကိုယ် ကာကွယ်နိုင်စွမ်းရှိပြီဖြစ်ရာ အခန်းထဲ၌သာ ဆက်လက်ပုန်းကွယ်နေရန် သူမ မလိုလားတော့ပေ။ အနည်းဆုံးတော့ သူမ မည်သည့်နေရာသို့ ရောက်နေသည်၊ မည်သည့်ရပ်ကွက်ဖြစ်သည်ကို သိရှိရန် လိုအပ်သည်။

သူမသည် ၆ ထပ်သို့ ဆင်းလာခဲ့ပြီး ဟင်းလင်းပွင့်နေသော တံခါးတစ်ခုမှတစ်ဆင့် အခန်းထဲသို့ ဝင်ရောက်သွားရာ တွေ့မြင်လိုက်ရသော မြင်ကွင်းကြောင့် များစွာ အံ့အားသင့်သွားရသည်။ ၆ ထပ်ရှိ အခန်းတစ်ခုလုံးမှာ အမျိုးအမည်စုံလင်လှသော ရိက္ခာများနှင့် ပြည့်နှက်နေခြင်းပင်။ အစောပိုင်းကတည်းက ပြင်ဆင်ထားသည့် သိုလှောင်ခန်းများအတွင်း၌ ပစ္စည်းများမှာ နေရာလွတ်မကျန် အပြည့်အသိပ် ရှိနေသည်။

ရိက္ခာများ ပြည့်လျှံနေသော အခန်းကို ကြည့်ရင်း ကျိရုရွှယ်မှာ ခေတ္တမျှ မှင်တက်သွားမိသည်။ ကမ္ဘာပျက်ကပ်အတွင်း သူမ၏ ဇွန်ဘီဖေဖေစုဆောင်းထားသော ရိက္ခာပမာဏမှာ ဆိုင်တစ်ဆိုင်ပင် ဖွင့်လှစ်နိုင်လောက်အောင် အဆမတန် များပြားလှပေသည်။