အခန်း (၆၀)

"အရူးမ မင်းမှာ ပြန်လည်ရှင်သန်နိုင်တဲ့ အသက်ကိုးသက်ပဲ ရှိတာကို။ အခုတော့ နှစ်သက်

တောင် အလကားဖြစ်သွားပြီဆိုတာ မင်းသိရဲ့လား"

ဝရန်တာထက်မှနေ၍ ကျောက်လင်း ထပ်မံအသတ်ခံရသည်ကို မြင်တွေ့လိုက်ရသောအခါ ကျိရုရွှယ်မှာ အံ့အားသင့်လွန်းသဖြင့် စကားပင် ဆွံ့အသွားရတော့သည်။

သေဆုံးပြီးနောက် အကြိမ်ကြိမ် ပြန်လည်ရှင်သန်နိုင်ရုံမျှမက စွမ်းပကားများပါ တိုးမြင့်လာစေသည့် ဤပါရမီမှာ အမှန်တကယ်ပင် ကြောက်မက်ဖွယ်ကောင်းလှသော စွမ်းရည်ထူးဖြစ်သည်။ သို့သော်လည်း ဤမျှကြီးမားလှသော ပါရမီကို ကျောက်လင်းက တန်ဖိုးမထားဘဲ ဖြုန်းတီးပစ်ခဲ့သည်။

ကျိရုရွှယ်၏ အတိတ်ဘဝ မှတ်ဉာဏ်များအရ ကိုးကြိမ်သေ နတ်ဆိုးရဲမေ၏ ပါရမီမှာ သာမန်ထက် များစွာထူးကဲလှပြီး စွမ်းရည်ပိုင်းတွင်လည်း အကန့်အသတ်မဲ့ တိုးတက်နိုင်သူဖြစ်သည်။ အဘယ်ကြောင့်ဆိုသော် ကျောက်လင်း၏ စွမ်းရည်မှာ သေဆုံးချိန်ရှိ အင်အားအပေါ် အခြေခံ၍ တွက်ချက်ခြင်းဖြစ်ရာ သေဆုံးမှုတစ်ခုချင်းစီက သူမ၏ အင်အားကို အဆပေါင်းများစွာ တိုက်ရိုက်မြှောက်ပေးနိုင်သောကြောင့် ဖြစ်သည်။

အကယ်၍ ကျောက်လင်းသာ ဤရှားပါးလှသော ပြန်လည်ရှင်သန်နိုင်ခွင့်များကို နောင်အချိန်များအတွက် သိမ်းဆည်းထားနိုင်ခဲ့ပါက သူမ၏ စွမ်းအားတိုးမြင့်မှုမှာ အလွန်တရာ တုန်လှုပ်ဖွယ်ရာ ကောင်းပေလိမ့်မည်။ ကျိရုရွှယ်၏ အတိတ်ဘဝတွင်လည်း နတ်ဆိုးရဲမေသည် ကမ္ဘာပျက်ကပ် အစောပိုင်းကာလများ၌ပင် ပြန်လည်ရှင်သန်နိုင်ခွင့်များကို အလွန်အမင်း အသုံးပြုခဲ့သဖြင့် ဤမျှကြီးကျယ်သော ပါရမီမှာ အဆုံး၌ အလဟာသ ဖြစ်ခဲ့ရသည်။

မဟုတ်ပါက ဤကဲ့သို့ ကောင်းကင်ဘုံကို ဆန့်ကျင်နိုင်သော ထူးခြားစွမ်းရည်မျိုးနှင့် သူမသည် ဧကရာဇ်အဆင့်၌သာ ရပ်တန့်နေမည့်သူ မဟုတ်ပေ။ ကျိရုရွှယ်သည် သူမအား စောစီးစွာ စည်းရုံးနိုင်ခဲ့ပါက နတ်ဆိုးရဲမေအား ဧကရာဇ်အဆင့်သို့ ကျော်လွန်အောင် ကူညီပေးနိုင်လိမ့်မည်ဟု တွေးတောခဲ့မိသည်။

သို့သော်လည်း ဤအမျိုးသမီးမှာ ကမ္ဘာပျက်ကပ် အစောပိုင်းကာလများတွင် သူမထင်မှတ်

ထားသည်ထက်ပင် ပိုမိုမိုက်မဲနေခဲ့ရာ ကျိရုရွှယ်နှင့် ဆုံတွေ့ချိန်၌ ကျောက်လင်းတွင် နောက်ဆုံးတစ်သက်သာ ကျန်ရှိတော့သည့် အဖြစ်မျိုးသို့ ရောက်ရှိသွားမည်ကို သူမ စိုးရိမ်မိတော့သည်။

ရပ်ကွက်အဝင်ဝတွင်မူ လုချွမ်းသည် တာဖန်းကို ထိန်းချုပ်၍ ပြန်လည်ရှင်သန်နိုင်လာသော ထိုရဲမေကို နောက်ဆုံး၌ သုတ်သင်နိုင်ခဲ့ပြီဖြစ်သည်။ သူသည် တာဖန်းအား ရှေ့သို့တိုးစေကာ ကျောက်လင်း၏လက်ထဲရှိ ရဲသုံးသေနတ်ကို သိမ်းဆည်းလိုက်တော့သည်။

ယခင်ရဲအရာရှိများထံမှ ရရှိသော လက်နက်များနှင့် ပေါင်းစပ်လိုက်လျှင် ယခုအခါ လုချွမ်းသည် ရဲသုံးသေနတ် ခြောက်လက်အထိ စုဆောင်းမိသွားပြီ ဖြစ်သည်။ ထို့ပြင် ရဲအရာရှိများ၏ အလောင်းများကို ရှာဖွေရာမှ ကျည်ဆန်အမြောက်အမြားကိုလည်း တွေ့ရှိခဲ့ရသည်။

အေးစက်လှသော ဤလက်နက်များကို လက်ဝယ်ပိုင်ဆိုင်လိုက်ရချိန်တွင် လုချွမ်း၏ မျက်ဝန်းအိမ်များ၌ အေးစက်လှသော အရောင်အဝါများ ယှက်သန်းသွားတော့သည်။ လက်နက်ကိုင်ဆောင်ထားသူတိုင်း၌ သတ်ဖြတ်လိုစိတ်ဟူသည်မှာ အလိုလို ပေါ်ပေါက်လာစမြဲပင်။

မူလက သူ၏ဇွန်ဘီများသည် မီးသတ်ပုဆိန်များကိုသာ ကိုင်ဆောင်ထားနိုင်ကြသော်လည်း ယခုအခါ သေနတ်များပါ ပိုင်ဆိုင်လာပြီဖြစ်ရာ သူ၏တိုက်ခိုက်ရေးစွမ်းအားမှာ အဆမတန် မြင့်မားသွားခဲ့ပြီ ဖြစ်သည်။ လုချွမ်းသည် ထိုရဲစခန်းတစ်ခုလုံးကိုပင် အမြစ်ပြတ်ချေမှုန်းပစ်ရန် စတင်တွေးတောနေမိသည်။

ရဲစခန်းအတွင်း၌ သေနတ်နှင့် ကျည်ဆန်များစွာ ရှိနေမည်မှာ အသေအချာပင်ဖြစ်ပြီး ယေဘုယျအားဖြင့် ရဲစခန်းများတွင် လက်နက်ခဲယမ်းကိရိယာများမှာ အပြည့်အစုံ ရှိနေတတ်ပေသည်။ အကယ်၍ ဖြစ်နိုင်ပါက သူ၏ဇွန်ဘီရုပ်သေးတပ်ဖွဲ့ကို လက်နက်သစ်များ တပ်ဆင်ပေးပြီး သေနတ်ကိုင်ဇွန်ဘီတပ်ဖွဲ့တစ်ခုအဖြစ် တိုက်ရိုက်ဖွဲ့စည်းနိုင်သည်။

လုချွမ်းသည် ရဲစခန်း၌ အသက်ရှင်ကျန်ရစ်သူအဖွဲ့ရှိကြောင်းကို လွန်ခဲ့သော အချိန်ကတည်းက သိရှိထားခဲ့သော်လည်း ဇွန်ဘီတစ်ကောင်ဖြစ်နေသည့်တိုင် သူ၏လူသားအသိစိတ်မှာ ကျန်ရှိနေဆဲ ဖြစ်သည်။ ဤကမ္ဘာပေါ်ရှိ လူသားများအပေါ် သံယောဇဉ်မရှိသော်လည်း လူသားတစ်ဦး၏ ဝိညာဉ်ကို ပိုင်ဆိုင်ထားသူဖြစ်ရာ အသက်ရှင်ကျန်ရစ်သူ လူသားအဖွဲ့များကို ဦးစွာတိုက်ခိုက်ရန် လုချွမ်းက ဝန်လေးနေခဲ့ခြင်း ဖြစ်သည်။

သို့သော် သူက ထိုလူသားများကို သွားရောက်နှောင့်ယှက်ခြင်းမပြုသော်လည်း သူတို့က သူ၏အိမ်တံခါးဝအထိ ရန်လာစလိမ့်မည်ဟု သူ လုံးဝ ထင်မှတ်မထားခဲ့ပေ။ မနေ့က ရဲမေတစ်ဦး နေရောင်ခြည်ရပ်ကွက်သို့ ရောက်ရှိလာခြင်းမှာ တိုက်ဆိုင်မှုဟု ဆိုနိုင်သော်လည်း ယနေ့တွင် ပြန်လည်ရှင်သန်နိုင်လာသော ဇွန်ဘီတစ်ကောင်အနေဖြင့် အခြားအဖွဲ့ဝင်များကိုပါ ခေါ်ဆောင်လာခြင်းမှာမူ ကြိုတင်ကြံစည်ထားသည့် ရည်ရွယ်ချက်ရှိရှိ လုပ်ဆောင်မှုပင်။

ယနေ့တွင် ဆင့်ကဲပြောင်းလဲသူတစ်ဦးနှင့် လက်နက်ကိုင်ရဲအရာရှိများ ရောက်ရှိလာခဲ့ရာ မနက်ဖြန်တွင် SWAT ကဲ့သို့ အထူးတပ်ဖွဲ့များပါ ရောက်ရှိလာနိုင်သည်ကို လုချွမ်း အသေအချာ မပြောနိုင်တော့ပေ။ ထို့ပြင် သေနတ်ကိုင် ဇွန်ဘီရုပ်သေးတပ်ဖွဲ့ ဖွဲ့စည်းနိုင်ရေးဟူသော အချက်မှာလည်း သူ့အတွက် အလွန်တရာ ဆွဲဆောင်မှုရှိနေသည်။

သေခြင်းတရားကိုလည်း မကြောက်သလို နာကျင်မှုကိုလည်း မသိဘဲ အဝေးမှနေ၍ ပစ်ခတ်တိုက်ခိုက်နိုင်သော ဇွန်ဘီတစ်ကောင်အကြောင်းကို တွေးကြည့်ရုံမျှနှင့်ပင် အလွန်တရာ ကြောက်မက်ဖွယ်ကောင်းလှသည်။

အကယ်၍ ထိုကဲ့သို့သော တပ်ဖွဲ့မျိုးသာ ပိုင်ဆိုင်ခဲ့ပါက ဤမြို့အတွင်း၌ မည်သူ့ကိုမျှ ဂရုစိုက်ရန်မလိုဘဲ ရဲရဲဝံ့ဝံ့ လျှောက်လှမ်းနိုင်မည်ဟု လုချွမ်း ခံစားမိသည်။

ဤအကြံဖြင့်ပင် လုချွမ်းသည် ရဲစခန်းအနီးရှိ အခြေအနေများကို သွားရောက်စုံစမ်းရန်အတွက် ဆင့်ကဲဇွန်ဘီတစ်ကောင်ကို မနက်ဖြန်တွင် စေလွှတ်ရန် ဆုံးဖြတ်လိုက်သည်။ အဓိကအားဖြင့် ရဲစခန်းအတွင်း၌ အခြားသော ဆင့်ကဲပြောင်းလဲသူများ ရှိမရှိကို သူ အသေအချာ သိရှိလိုခြင်း ဖြစ်သည်။ ယခု ပြန်လည်ရှင်သန်နိုင်လာသော အမျိုးသမီး၏ဖြစ်ရပ်မှာ သူ့အတွက် အမှန်တကယ်ပင် မမျှော်လင့်ထားသော ကိစ္စရပ်တစ်ခု ဖြစ်ခဲ့သည်။ တစ်ညအတွင်းမှာပင် ပြန်လည်ရှင်သန်လာရုံမျှမက ဒဏ်ရာများအားလုံး အရှင်းပျောက်ကင်းသွားခြင်းမှာ ဇွန်ဘီများထက်ပင် ပိုမိုဆန်းကြယ်လှပေသည်။

ပညာရှိတို့သည် ကလဲ့စားချေရန် အချိန်မဆိုင်းတတ်သော်လည်း ဇွန်ဘီတစ်ကောင်အဖို့မူ ကလဲ့စားချေခြင်းမှာ ချက်ချင်းလက်ငင်းသာ ဖြစ်ရပေမည်။

လုချွမ်း၏ မူဝါဒမှာ အမြဲတမ်း ထိုကဲ့သို့ပင်။

“တခြားတစ်ယောက်က ငါ့ကို မစော်ကားရင် ငါကလည်း ပြန်ပြီး ရန်ရန်ခြင်းတုံ့ပြန်မှာမဟုတ်ဘူး။ တကယ်လို့ ငါ့ကို လာရောက်စော်ကားရင် အဲ့လူကို အမြစ်ပြတ်အောင် ချေမှုန်းပစ်မယ်”

ရဲစခန်းဘက်မှ အဖန်ဖန်လာရောက် နှောင့်ယှက်နေမှုများကို လုချွမ်းအနေဖြင့် ဆက်လက်သည်းခံရန် ဆန္ဒမရှိတော့ပေ။ ချီချီလေးနှင့် သူ၏ ဘေးကင်းလုံခြုံမှုကို ခြိမ်းခြောက်လာမည့် အရာမှန်သမျှမှာ မည်သူပင်ဖြစ်စေ သုတ်သင်ဖယ်ရှားခြင်း ခံရမည်သာ ဖြစ်သည်။ အနည်းဆုံးတော့ သူသည် ထိုရဲအရာရှိများ၏ ရှေ့တွင် မတ်တတ်ရပ်လိုက်ပါက သူတို့သည် သူ့အား ဝန်လေးခြင်းမရှိဘဲ ပစ်ခတ်ကြမည်မှာ အသေအချာပင်ဖြစ်ရာ သူ၏ဘက်မှလည်း ညှာတာနေရန် အကြောင်းမရှိတော့ချေ။

“တောက် ချီချီလေးကို အောက်ထပ်ခေါ်သွားပြီး နေပူစာလှုံရင်း ကစားပေးဖို့ ပြင်ထားတာ။ အခုတော့ ဒီလို သတ်ဖြတ်ပွဲတွေနဲ့ဆို ဘယ်လိုလုပ် ဖြစ်နိုင်တော့မှာလဲ”

“မူလကတော့ ဒီလူသား အသက်ရှင်ကျန်ရစ်သူတွေကို ငါ မပတ်သက်ချင်ဘူး။ ဒါပေမဲ့ နေရောင်ခြည်ရပ်ကွက်ရဲ့ ဘေးကင်းလုံခြုံရေးအတွက်ဆိုရင်တော့ အနီးအနားမှာရှိတဲ့ ဒီအသက်

ရှင်ကျန်ရစ်သူအဖွဲ့ နှစ်ဖွဲ့လုံးကို လိုအပ်ရင် နှင်ထုတ်ပစ်ဖို့ပဲ ရှိတော့တယ်”

ရပ်ကွက်အတွင်းရှိ တိုက်ပွဲများကို ရှင်းလင်းပြီးနောက် ဇွန်ဘီရုပ်သေးများအား စစ်မြေပြင်ကို သန့်ရှင်းရန် အမိန့်ပေးခဲ့ပြီး လုချွမ်းသည် အပေါ်ထပ်သို့ ပြန်လည်တက်လာခဲ့သည်။ အိမ်တံခါးကို ဖွင့်လိုက်သောအခါ စားပွဲပုလေးပေါ်တွင် စာကျက်နေသော ချီချီလေးကို မြင်တွေ့လိုက်ရသည်။ ကြိုးစားပမ်းစားနှင့် ချစ်စရာကောင်းလှသော သမီးငယ်လေး၏ မြင်ကွင်းကြောင့် လုချွမ်း၏ စိတ်မကြည်မလင်ဖြစ်မှုများမှာ ချက်ချင်းပင် ပျောက်ကွယ်သွားတော့သည်။

ငါ့သမီးလေးကတော့ ငါအချစ်ရဆုံးပါပဲ။

မည်သူပင်ဖြစ်စေ သူ့သမီး၏ ပညာသင်ကြားမှုကို နှောင့်ယှက်ရန် မကြံစည်သင့်ပေ။

ညဉ့်မှောင်စပြုလာသောအခါ လုချွမ်းသည် ချီချီလေး လိမ္မာယဉ်ကျေးစွာ အိပ်ရာဝင်သည်ကို ကြည့်ရှုပြီးနောက် ဧည့်ခန်းသို့ ပြန်လာခဲ့သည်။ သူသည် ဆိုဖာပေါ်တွင် ထိုင်ရင်း မျက်မှောင်ကြုတ်လျက် ရှေ့ဆက်လုပ်ဆောင်မည့် အစီအစဉ်များကို နက်နက်ရှိုင်းရှိုင်း စဉ်းစားနေမိသည်။

ချီချီလေး၏ ကြီးထွားနှုန်းမှာ သာမန်ကလေးငယ်များထက် သိသိသာသာ မြန်ဆန်နေပြီး သူ၏သမီးငယ်မှာ ပါရမီထူးချွန်သည့် ကလေးတစ်ဦးဖြစ်သည်မှာ မြေကြီးလက်ခတ်မလွဲပင်။ သမီးငယ်လေး ကောင်းမွန်စွာ ကြီးပြင်းလာနိုင်ရန်အတွက် ပိုမိုကောင်းမွန်သော ပတ်ဝန်းကျင်တစ်ခုကို ဘယ်လို ဖန်တီးပေးရမလဲဟူသော အချက်ကို လုချွမ်း အလေးအနက် တွေးတောနေမိသည်။ ကလေးတစ်ယောက်ကို ပြုစုပျိုးထောင်ခြင်းမှာ ရေရှည်ခရီးတစ်ခုဖြစ်ရာ ချီချီလေး ကျန်းမာစွာ ကြီးပြင်းလာစေရန်အတွက် နောင်နှစ်ပေါင်းများစွာအထိ သူ ပြင်ဆင်ထားရန် လိုအပ်ပေသည်။

ပထမဦးစွာ သူတို့ လက်ရှိနေထိုင်နေသော နေရောင်ခြည်ရပ်ကွက်သည် ရေရှည်နေထိုင်ရန် သင့်တော်သော နေရာတစ်ခု မဟုတ်သည်မှာ သေချာလှသည်။ သူသည် ရိက္ခာအမြောက်အမြား စုဆောင်းထားသော်လည်း ထိုရိက္ခာများသည် ထာဝရ တည်ရှိနေမည်မဟုတ်ဘဲ တစ်နေ့နေ့တွင် ကုန်ဆုံးသွားပေလိမ့်မည်။ ရိက္ခာများ မကုန်ဆုံးသည့်တိုင်အောင် အပူချိန်နှင့် ရာသီဥတု အပြောင်းအလဲများကြောင့် အချိန်ကြာမြင့်စွာ ထိန်းသိမ်းထားနိုင်မည်မဟုတ်ဘဲ ပုပ်သိုးပျက်စီးသွားနိုင်ပေသည်။

သူကိုယ်တိုင်မှာ ဇွန်ဘီတစ်ကောင်ဖြစ်သဖြင့် ထိုကိစ္စများကို ဂရုစိုက်ရန် မလိုသော်လည်း သမီးငယ်လေးမှာမူ ကျန်းမာစွာ ကြီးထွားရန် လိုအပ်သည့်အတွက် ဤပြဿနာများကို သူ မဖြစ်မနေ ထည့်သွင်းစဉ်းစားရမည် ဖြစ်သည်။

“ရိက္ခာတွေကို ကိုယ်တိုင် ထုတ်လုပ်နိုင်မယ့် နည်းလမ်းတစ်ခု ရှိရမယ်။ သမီးငယ်လေးရဲ့ အနာဂတ်မှာ အာဟာရဓာတ်တွေ အဆက်မပြတ် ရရှိနိုင်ဖို့အတွက် ရေရှည်တည်တံ့တဲ့ ရိက္ခာအရင်းအမြစ်တစ်ခု ရှိဖို့ လိုအပ်တယ်...”

လုချွမ်းသည် ဤကိစ္စရပ်များနှင့် ပတ်သက်၍ အတွေ့အကြုံ လုံးဝမရှိပေ။ အတိတ်ဘဝတွင် သူသည် သာမန်အလုပ်သမားတစ်ဦးသာ ဖြစ်ခဲ့ဖူးသည်။ ကမ္ဘာပျက်ကပ်အတွင်း ရှင်သန်နိုင်မည့် နည်းလမ်းများကို စဉ်းစားရာတွင် သူ ကစားခဲ့ဖူးသော ကမ္ဘာပျက်ကပ်နောက်ခံ ဂိမ်းများကိုသာ လုချွမ်း သတိရမိတော့သည်။

“ငါကိုယ်တိုင် စိုက်ပျိုးရေး လုပ်ကြည့်ရင်ကော ဘယ်လိုနေမလဲ”

“ငါ့မှာ ဇွန်ဘီရုပ်သေးတွေ အများကြီး ရှိတာပဲ။ သူတို့က အခမဲ့ လုပ်သားတွေ မဟုတ်လား...”

မြေလွတ်မြေရိုင်းများကို ရှင်းလင်းပြီး စိုက်ပျိုးရေး လုပ်ဆောင်ခြင်းမှာ အမှန်တကယ်ပင် ရေရှည်တည်တံ့သော ဖွံ့ဖြိုးရေး အစီအစဉ်တစ်ခု ဖြစ်နိုင်သည်။ သို့သော် ထိုစဉ်မှာပင် လုချွမ်း၏ စိတ်ထဲ၌ ထိတ်လန့်တုန်လှုပ်မှုတစ်ခု ရုတ်တရက် ဖြစ်ပေါ်လာပြီး သူ၏ မျက်ဝန်းများမှာ အံ့အားသင့်မှုများဖြင့် ပြည့်နှက်သွားရသည်။

သူသည် သူ၏အာရုံကို တာဖန်း၏ အမြင်သို့ ပြောင်းလဲကြည့်ရှုလိုက်သောအခါ... နေ့လယ်ပိုင်းက သူကိုယ်တိုင် အစုံသုပ်ဖြစ်အောင် ထောင်းပစ်ခဲ့သော ထိုရဲမေသည် အကောင်းအတိုင်း ပြန်လည် မတ်တတ်ရပ်နေသည်ကို မြင်တွေ့လိုက်ရခြင်းပင်။

“ဒါ ဘယ်လို ဖြစ်နိုင်မှာလဲ”

“ဒီမိန်းမက ဂိမ်းထဲကလို အသက်ထပ်ဖြည့်နိုင်တာလား”