အခန်း (၆၄)

တိတ်ဆိတ်နေသော ညဉ့်အမှောင်အတွင်း ကျောက်လင်း၏ အော်ဟစ်သံမှာ ဟိန်းထွက်သွားတော့သည်။ ဒုတိယထပ်တွင် ရှိနေသော ကျိရုရွှယ်မှာ ထိုအသံကို ကြားလိုက်ရချိန်တွင် ဆွံ့အသွားရရုံမျှမက အတော်လေးလည်း စိတ်ပျက်သွားမိသည်။

စီနီယာ ဟုတ်လား။

ဘာ စီနီယာလဲဟ။

ငါ့ပုံစံက နင်နဲ့ သိုင်းကားရိုက်နေတဲ့ စီနီယာကြီးနဲ့ တူနေလို့လား။

ဤရဲမေမှာ ဦးနှောက်ပိုင်းဆိုင်ရာ ပြဿနာတစ်ခုခု အကြီးအကျယ် ရှိနေသလောဟု ကျိရုရွှယ် တွေးတောမိသည်။ ဤကဲ့သို့ အသက်လုပြေးရမည့် အချိန်မျိုးမှာတောင် အမြန်မပြေးဘဲ ထိုသို့သော စကားမျိုးကို အော်ဟစ်ပြောဆိုသွားရသည်အထိ မိုက်မဲနေရတာလား။

သူမကိုယ်သူမ သိုင်းကားရိုက်နေရတယ်လို့ ထင်နေတာလား အရူးမ….

ကျိရုရွှယ်၏ အမြင်အရ ဇွန်ဘီအုပ်ကြီး၏ ရှေ့မှောက်တွင် ကျောက်လင်း ဤသို့ အသံကုန်

ဟစ်အော်သွားခြင်းမှာ သူမအား ကူညီခဲ့သည့် အသံရှင်ကို ရန်သူအား သတင်းပေးလိုက်သကဲ့သို့ပင်။

အကယ်၍သာ ဤရဲမေသည် ဆင့်ကဲဇွန်ဘီများ၏ လက်ချက်ဖြင့် နှစ်ကြိမ်တိုင်တိုင် သေဆုံးခဲ့သည်ကို ကျိရုရွှယ်ကိုယ်တိုင် မမြင်ခဲ့ပါက ကျောက်လင်းသည် ဇွန်ဘီများကို တမင်သက်သက် သတင်းပေးနေခြင်းဖြစ်သည်ဟုပင် သံသယဝင်မိပေလိမ့်မည်။

"သူမက ကမ္ဘာမပျက်ခင် ကတည်းက ဒီလောက်အထိ တုံးအခဲ့တာလား။ အံ့ဩစရာမရှိတော့ပါဘူး... ဒီလောက် ကြောက်စရာကောင်းတဲ့ ပါရမီကို ပိုင်ဆိုင်ထားပါလျက်နဲ့ ဘာလို့ ဧကရာဇ်

အဆင့်မှာတင် ရပ်တန့်သွားခဲ့ရလဲဆိုတာ အခုမှပဲ သဘောပေါက်တော့တယ်။"

"အရင်ကတော့ သူမဟာ ကမ္ဘာပျက်ကပ် အစောပိုင်းမှာ တစ်ခုခု အန္တရာယ်ကြီးကြီးမားမားနဲ့ ကြုံခဲ့ရလို့ ပြန်လည်ရှင်သန်နိုင်ခွင့်တွေကို အမြန်သုံးလိုက်ရတာလို့ ငါ ထင်ခဲ့တာ။ အခုကြည့်ရတာတော့ ဒီအမျိုးသမီးက သူမရဲ့ ကိုယ်ပိုင်တုံးအမှုကြောင့်ပဲ သေခဲ့တာ ဖြစ်ရမယ်"

အောက်ထပ်ရှိ ဇွန်ဘီအုပ်ကြီးကို တစ်ချက်ကြည့်ရင်း ကျိရုရွှယ်မှာ အားကိုးရာမဲ့စွာဖြင့် ခေါင်းကိုသာ ခါယမ်းလိုက်မိတော့သည်။

ကံကောင်းထောက်မစွာဖြင့် ပြိုင်ဘက်များမှာ ဇွန်ဘီများသာ ဖြစ်နေခဲ့သည်။ ဤအဆင့်ရှိ ဇွန်ဘီများသည် လူသားများနှင့် ပုံမှန်ဆက်သွယ်နိုင်ရန် အသိဉာဏ်မရှိသကဲ့သို့ လူသားဘာသာစကားကိုလည်း နားလည်နိုင်စွမ်း မရှိဟု သူမ ယူဆထားသောကြောင့် ဖြစ်သည်။

ကျိရုရွှယ် ယခုလေးတင် အသုံးပြုခဲ့သည်မှာ သူမ၏ အတိတ်ဘဝက လျှို့ဝှက်နယ်မြေတစ်ခုမှ သင်ယူခဲ့သော အထူးစွမ်းရည်တစ်ခု ဖြစ်သည်။ ၎င်းမှာ အသံတိတ် စကားပြောခြင်းနည်းပညာဖြစ်ပြီး မိမိ၏ စိတ်စွမ်းအင်ကို အသုံးပြုကာ တစ်ဖက်လူ၏ အသိစိတ်ထဲသို့ စကားလုံးများကို တိုက်ရိုက် ပေးပို့ခြင်းဖြစ်သည်။ ဤနည်းစနစ်ကြောင့် ကမ္ဘာပျက်ကပ်အတွင်း မည်သည့်အသံမျှ ထွက်ပေါ်မလာစေဘဲ အခြားသူများနှင့် အောင်မြင်စွာ ဆက်သွယ်နိုင်ခဲ့ခြင်း ဖြစ်သည်။

ယနေ့တွင်မူ ထိုနည်းစနစ်မှာ တစ်ဝက်သာ အောင်မြင်သည်ဟု ဆိုရမည်။ သူမဘက်မှ အသံမထွက်ခဲ့သော်လည်း ကျောက်လင်း၏ အော်ဟစ်နှုတ်ဆက်မှုက တစ်ကမ္ဘာလုံးကို ကြေညာလိုက်သကဲ့သို့ ဖြစ်သွားခဲ့သည်။

ကျိရုရွှယ်အနေဖြင့် ယခုကဲ့သို့ ကြားဝင်လှုပ်ရှားရခြင်း၏ ရည်ရွယ်ချက်မှာ ကိုးကြိမ်သေ နတ်ဆိုးရဲမေနှင့် အဆက်အသွယ်ရရှိရန် ဖြစ်သည်။ နေရောင်ခြည်ရပ်ကွက်အတွင်းရှိ ဇွန်ဘီဘုရင်ကို သုတ်သင်ရန်မှာ အလွန်ပင် အရေးကြီးနေပြီဖြစ်ပြီး ၎င်းအား ဆက်လက် အင်အားတောင့်တင်းလာစေရန် ကျိရုရွှယ် အချိန်မပေးနိုင်တော့ပေ။ ထို့ကြောင့် သူမသည် နတ်ဆိုးရဲမေနှင့် အမြန်ဆုံး ပူးပေါင်းနိုင်ရန် ကြိုးစားရခြင်း ဖြစ်သည်။

ဒုတိယအဆင့် အင်အားရှိရုံမျှမက အကြိမ်ကြိမ် ပြန်လည်ရှင်သန်နိုင်သည့် ဤရဲမေ၏ အကူအညီမပါဘဲ ကျိရုရွှယ် တစ်ဦးတည်းအနေဖြင့် ဇွန်ဘီဘုရင်ကို အပြတ်အသတ် နှိမ်နင်းနိုင်ရန် ယုံကြည်မှု မရှိသေးပေ။ ထို့ပြင် ကျောက်လင်းမှာ နေရောင်ခြည်ရပ်ကွက်အဝင်ဝ၌ နှစ်ရက်ဆက်တိုက် အသတ်ခံခဲ့ရပြီးဖြစ်ရာ ဤလူအသည် နောက်ထပ် အသက်တစ်သက်ကို ဤနေရာတွင် ထပ်မံဖြုန်းတီးပစ်မည်ကို ကျိရုရွှယ် မလိုလားတော့ပေ။

“အိပ်ခန်းထဲကို မြန်မြန်ပြန်မှ ဖြစ်မယ်။ တိုက်ပွဲပြီးသွားပြီဆိုတော့ ဖေဖေလည်း မကြာခင် ပြန်လာတော့မှာ”

ဇွန်ဘီအများအပြား ရပ်ကွက်အတွင်းသို့ ပြန်လည်ဝင်ရောက်လာသည်ကို မြင်သောအခါ ကျိရုရွှယ်သည် အမှတ် ၁ အဆောက်အအုံမှ အမြန်ထွက်ခွာပြီး အမှတ် ၅ အဆောက်အအုံသို့ အပြေးအလွှား ပြန်လာခဲ့သည်။ စဉ်ဆက်မပြတ် လေ့ကျင့်မှုနှင့် စိတ်စွမ်းအင် မြင့်မားလာမှုတို့ကြောင့် ကျိရုရွှယ်၏ လှုပ်ရှားမှုအရှိန်မှာ သိသိသာသာ မြန်ဆန်လာခဲ့ပြီ ဖြစ်သည်။

အောက်ထပ်တွင်မူ လုချွမ်းသည် ငြိမ်သက်စွာ မတ်တတ်ရပ်နေဆဲ ဖြစ်သည်။ သူသည် ဒဏ်ရာရသွားသော ထိုရဲမေ ညဉ့်အမှောင်ထဲသို့ လျင်မြန်စွာ ပျောက်ကွယ်သွားသည်ကို ကြည့်နေခဲ့သော်လည်း နောက်မှ လိုက်လံဖမ်းဆီးရန် ဇွန်ဘီများကို စေလွှတ်ခြင်း မပြုတော့ပေ။ သူသည် လေးနက်သော မျက်နှာပေးဖြင့်သာ သူမ ထွက်ခွာသွားသည်ကို စောင့်ကြည့်နေခဲ့တော့သည်။

နေ့လယ်ပိုင်းကမှ လုချွမ်းသည် အာရုံလွှဲသည့်ဗျူဟာဖြင့် တိုက်ခိုက်ခြင်းကို ကြုံတွေ့ခဲ့ရဖူးသည်။ ကံကောင်းထောက်မစွာဖြင့် ရပ်ကွက်အတွင်းရှိ ဇွန်ဘီရုပ်သေးများမှာ ထိုအဖွဲ့ကို အပြတ်အသတ် ချေမှုန်းနိုင်လောက်အောင် သန်မာနေခဲ့ကြသည်။ ယခုလည်း အခြားသော လူသားစွမ်းအားရှင်များ ဤနေရာ၌ ပေါ်ပေါက်လာဦးမည်လားဆိုသည်ကို မည်သူမျှ မသိနိုင်ပေ။

သို့သော် ကျောက်လင်း၏ စောစောက စကားများကြောင့် လုချွမ်းမှာ ဝေခွဲမရဖြစ်နေရသည်။

"စီနီယာကို ကျေးဇူးတင်ပါတယ် ဟုတ်လား။ အနီးအနားမှာ တခြား ပုန်းအောင်းနေတဲ့ လူသားစွမ်းအားရှင်တစ်ယောက် ရှိနေတာလား"

လုချွမ်းသည် ပတ်ဝန်းကျင်ကို သတိကြီးစွာဖြင့် အကဲခတ်ကြည့်သော်လည်း လမ်းမများမှာ ထူးခြားမှုမရှိဘဲ ပုံမှန်အတိုင်းသာ ရှိနေသည်။ မသင်္ကာဖွယ်ရာ လှုပ်ရှားမှု သို့မဟုတ် မူမမှန်သည့် အချက်အလက် တစ်ခုမျှ မတွေ့ရပေ။ အနီးအနားတွင် နေရာချထားသော သူ၏ ဇွန်ဘီရုပ်သေးများကလည်း မည်သည့် ထူးခြားမှုကိုမျှ သတင်းမပို့ကြချေ။

သို့သော်လည်း လုချွမ်းသည် ကျောက်လင်း၏ စကားကို ပေါ့ပေါ့တန်တန် သဘောမထားဘဲ ဇွန်ဘီရုပ်သေး အမြောက်အမြားကို ချက်ချင်းပင် ပတ်ဝန်းကျင်သို့ ဖြန့်ကြက်ကာ ရှာဖွေခိုင်းလိုက်သည်။ သို့သော် မြေလှန်ရှာဖွေခဲ့သည့်တိုင်အောင် အခြားလူသားများ၏ အရိပ်အယောင်ကို လုံးဝ ရှာမတွေ့ခဲ့ပေ။

လူသားတစ်ဦးမျှ ရှာမတွေ့ခြင်းက လုချွမ်းကို စိတ်အေးသွားစေမည့်အစား ပို၍ပင် သတိထားမိစေခဲ့သည်။ ထိုရဲမေ၏ စကားမှာ အကြောင်းမဲ့ မဖြစ်နိုင်ဟု လုချွမ်း ယုံကြည်နေသည်။ အဘယ်ကြောင့်ဆိုသော် ဦးနှောက်မရှိသောဇွန်ဘီအုပ်စုနှင့် ရင်ဆိုင်နေရချိန်တွင် သူမ ထွက်မပြေးမီ ထိုကဲ့သို့ ပြုမူသွားစရာ အကြောင်းမရှိပေ။ ထိုအပြုအမူမှာ တစ်စုံတစ်ဦးကို အချက်ပြလိုက်ခြင်းဖြစ်ကြောင်း ထင်ရှားလှသည်။

"ထူးဆန်းတယ်... ဒီရဲမေက တကယ်ပဲ ဘယ်သူ့ကို ပြောနေတာလဲ"

လုချွမ်းသည် တာဖန်းကို စောစောက ထိန်းချုပ်ခဲ့သည့် အခြေအနေကို ပြန်လည်စဉ်းစားမိသည်။ မူလက သူသည် ထိုရဲမေကို သေစေလောက်သော ထိုးနှက်ချက်တစ်ခု ပေးနိုင်ခဲ့သည်။ သို့သော် ထိုအချိန်တွင် အကြောင်းရင်းတစ်ခုခုကြောင့် သူ၏ လှုပ်ရှားမှုမှာ ခဏတာ ရပ်တန့်သွားသကဲ့သို့ ဖြစ်ခဲ့ပြီး သူမကို ကံကောင်းထောက်မစွာ လွတ်မြောက်သွားစေခဲ့ခြင်း ဖြစ်သည်။

ဤအတွေးများကြောင့် လုချွမ်း၏ မျက်မှောင်များမှာ ပိုမိုတင်းကြပ်သွားရတော့သည်။

သူထိန်းချုပ်ထားသော ဇွန်ဘီရုပ်သေးများသည် အကြောင်းမဲ့ သက်သက် ရပ်တန့်သွားစရာ အကြောင်းမရှိပေ။ အနီးအနားတွင် တကယ်ပဲ သူ့မျက်ကွယ်မှာ ပုန်းအောင်းနေနိုင်သည့် အခြားလူသားတစ်ယောက် ရှိနေတာလား

သူ့ဆီမှာ ငါ့အာရုံခံနိုင်စွမ်းကိုတောင် ကျော်လွန်နေတာလား။

ကျောက်လင်းနှင့် တိုက်ပွဲအတွင်း တစ်စုံတစ်ဦးက တိတ်တဆိတ် ကြားဝင်နှောင့်ယှက်နိုင်သည်ဟူသော အတွေးက လုချွမ်းကို ကျောချမ်းသွားစေသည်။ ဤလူသား ဆင့်ကဲပြောင်းလဲသူများ၏ စွမ်းရည်မှာ တစ်ဦးထက်တစ်ဦး ပိုမိုဆန်းကြယ်နေကြသည် မဟုတ်ပါလား။

သွေးလမင်း ဖြစ်စဉ်အပြီးတွင် သူရရှိခဲ့သော ဇွန်ဘီထိန်းချုပ်နိုင်သည့် စွမ်းရည်မှာ အလွန်

ထူးခြားသည်ဟု လုချွမ်း ထင်ခဲ့မိသော်လည်း ယခုနောက်ပိုင်း ဖြစ်ရပ်များက ကမ္ဘာပျက်ကပ်အတွင်းရှိ ဆင့်ကဲပြောင်းလဲသူများကို အထင်သေး၍မရကြောင်း သတိပေးနေသကဲ့သို့ပင်။ မိုက်မဲပုံရသော ဤရဲမေပင်လျှင် နှစ်ကြိမ်တိုင်တိုင် ပြန်လည်ရှင်သန်နိုင်ရုံမျှမက အင်အားပါ နှစ်ဆတိုးလာနိုင်သေးလျှင် အခြားသော လူသားဆင့်ကဲပြောင်းလဲသူများမှာ ဘယ်လောက်အထိ အစွမ်းထက်နေကြမလဲ။

ကျောက်လင်း၏ အော်ဟစ်သံများက လုချွမ်းကို ပို၍သတိကြီးစေခဲ့သည်။ သူသည် နောင်တွင် မိမိကိုယ်ကိုယ် ပိုမိုလုံခြုံစွာ ပုန်းအောင်းနေထိုင်ရန် ဆုံးဖြတ်လိုက်သည်။ မည်သည့်ထောင့်မှ မည်ကဲ့သို့သော စွမ်းအားရှင် ပေါ်လာမည်ကို မခန့်မှန်းနိုင်သောကြောင့် ဖြစ်သည်။ အကယ်၍ ထိုသူများက ဤဇွန်ဘီအားလုံးကို သူက ထိန်းချုပ်နေခြင်းဖြစ်ကြောင်း သိသွားပါက ခေါင်းဆောင်ကို အရင်ဖမ်းရန်သူတို့ ကြိုးစားကြမည်မှာ အသေအချာပင်။

သူ့ကိုယ်တိုင်မှာ အဆင့် ၂ သို့သာ ရောက်ရှိသေးပြီး ကိုယ်ကာယ ကြံ့ခိုင်မှုထက် စိတ်စွမ်းအင်ကို အားပြုရသူဖြစ်ရာ အတိုက်ခိုက်ခံရပါက အခြေအနေ မကောင်းနိုင်ပေ။ ထို့ကြောင့် မလိုအပ်ဘဲ လူလုံးမပြဘဲ ငြိမ်ငြိမ်သက်သက် နေခြင်းကသာ အကောင်းဆုံး ဗျူဟာဖြစ်ပေလိမ့်မည်။

တစ်ဖက်တွင်မူ ကျောက်လင်းကို ကယ်တင်ခဲ့သော ကျိရုရွှယ်သည် အိပ်ခန်းသို့ ပြန်ရောက်နေပြီဖြစ်ပြီး နက်ဖြန်တွင် နတ်ဆိုးရဲမေနှင့် ဘယ်လို ဆက်သွယ်ရမလဲဆိုတာကို စဉ်းစားနေမိသည်။ အတိတ်ဘဝကသာဆိုလျှင် ဝန်လေးစရာမရှိဘဲ တိုက်ရိုက်သွားတွေ့နိုင်သော်လည်း ယခုမူ သူမသည် ကလေးငယ်တစ်ဦးအဖြစ် ပြန်လည်မွေးဖွားထားခြင်း ဖြစ်သည်။

သူမ၏ သေးငယ်နုနယ်လှသော ကလေးငယ် ခန္ဓာကိုယ်ကို ငုံ့ကြည့်ရင်း ကျိရုရွှယ် စကားပင် မဆိုနိုင်တော့ပေ။ ဤပုံစံဖြင့် လူသွားတွေ့မည်ဆိုပါက မည်သူမဆို အံ့အားသင့်ပြီး ပါးစပ်အဟောင်းသား ဖြစ်သွားကြမည်မှာ မြေကြီးလက်ခတ်မလွဲပင်။