အခန်း (၁၄၁၅-၁၄၁၆)

ခေါင်းဆောင်နှင့် ဘုရင်

ခေတ္တမျှ စဉ်းစားပြီးနောက် ယန်ကျန့်သည် ရေလွှမ်းမိုးခြင်း စီမံကိန်း ကို အကြမ်းဖျင်း ရေးဆွဲလိုက်သည်။

ဒီစီမံကိန်းက သိပ်မထူးခြားလှပေမယ့် လက်ရှိအချိန်မှာတော့ ဘုရင်အဖွဲ့အစည်း ရဲ့ သင်္ဘော စီမံကိန်း ကို တန်ပြန်ဖို့ အကောင်းဆုံး နည်းလမ်းပဲ။ တစ္ဆေသင်္ဘော ကမ်းကပ်ပြီး ပြည်တွင်းမှာ တစ္ဆေတွေ သောင်းကျန်းလာရင် ယန်ကျန့်အနေနဲ့ ပြည်ပက လူတွေကိုပါ ဆွဲချပစ်ဖို့ ဝန်လေးမှာ မဟုတ်ဘူး။

သူ တစ္ဆေရေကန်ကို မဖွင့်ဘဲ နေလို့ရပါတယ်။ ဒါပေမဲ့ တစ်ဖက်လူကလည်း တစ္ဆေသင်္ဘော ကို မလွှတ်မှ ဖြစ်မှာပါ။

"စီမံကိန်းကို ဒီလိုပဲ အတည်ပြုလိုက်ပြီ နောက်တစ်ဆင့်က ဒုတိယအကြိမ် ခေါင်းဆောင်များ အစည်းအဝေး ခေါ်ယူပြီး တန်ပြန် တိုက်စစ်ဆင်ဖို့ ပြင်ဆင်ရမယ်"

ယန်ကျန့် စဉ်းစားလိုက်သည်။

'ဘုရင်' တစ်ပါးကို လုပ်ကြံသတ်ဖြတ်လိုက်တာက ပထမအဆင့် ဖြစ်ပြီး ရေလွှမ်းမိုးခြင်း စီမံကိန်း က ဒုတိယအဆင့် ဖြစ်သည်။ ဒုတိယအကြိမ် ခေါင်းဆောင်များ အစည်းအဝေး ကိုပါ အောင်မြင်စွာ ကျင်းပနိုင်ခဲ့ရင် ဌာနချုပ် အနေနဲ့ ဘုရင်အဖွဲ့အစည်း ကို တန်းတူ ယှဉ်နိုင်ပြီ ဖြစ်သည်။ ရှုပ်ထွေးနေတဲ့ အခြေအနေကို အပြီးတိုင် ထိန်းချုပ်နိုင်တော့မည်။

ဆုံးဖြတ်ချက် ချပြီးနောက် ယန်ကျန့် လုံခြုံရေး အခန်းထဲမှ ထွက်လာခဲ့သည်။

ဒီတစ်ခါ လျိုရှောင်ယွီ ကို မဆက်သွယ်တော့ဘဲ ချောင်ယန်ဟွာ ဆီသို့ တိုက်ရိုက် ဖုန်းခေါ်လိုက်သည်။

"ဟယ်လို ယန်ကျန့် လား ငါ ချောင်ယန်ဟွာ ပါ မင်းကိစ္စတွေ ငါ သိပြီးပြီ ဘုရင် တစ်ပါးကို လုပ်ကြံလိုက်တဲ့ အကွက်က အရမ်း အန္တရာယ် များပေမယ့် ကံကောင်းလို့ မင်း အောင်မြင်သွားတယ် အခု အခြေအနေက အရင်ကထက် အများကြီး ကောင်းလာပြီ ဌာနချုပ် အနေနဲ့ ဖိအားတွေ လျော့ကျသွားတယ် ပြည်တွင်းက တခြား တစ္ဆေဆရာ အဖွဲ့အစည်းတွေလည်း ငြိမ်ကျသွားပြီ မဟုတ်ရင် အခြေအနေတွေ ပိုဆိုးသွားမှာကို ငါ စိုးရိမ်နေတာ"

ချောင်ယန်ဟွာ ယန်ကျန့်ဆီက ဖုန်းရတော့ စိတ်လှုပ်ရှားစွာဖြင့် တရစပ် ပြောနေသည်။

ယန်ကျန့်၏ လှုပ်ရှားမှုတိုင်းက အရေးပါလာပြီ ဖြစ်သည်။ အထူးသဖြင့် အခုလို အချိန်မျိုးမှာ လူတိုင်းက ယန်ကျန့်၏ နောက်တစ်ဆင့် လှုပ်ရှားမှုကို စောင့်ကြည့်နေကြသည်။ ချောင်ယန်ဟွာ ကိုယ်တိုင်လည်း ယန်ကျန့်၏ ညွှန်ကြားချက်ကို စောင့်မျှော်နေသည်။

"စကားကောင်းတွေ ပြောမနေနဲ့တော့ ငါ ဖုန်းဆက်တာက ဒုတိယအကြိမ် ခေါင်းဆောင်များ အစည်းအဝေး ခေါ်ဖို့ ပြင်ဆင်ခိုင်းမလို့ အချိန်က မနက်ဖြန် နေ့လယ်၊ နေရာက တာတုန်းမြို့"

ယန်ကျန့် လေးလေးနက်နက် ပြောလိုက်သည်။

"တာတုန်းမြို့ ဟုတ်လား အဲဒါ ဝမ်ချာလင်း တာဝန်ယူထားတဲ့ မြို့လေ"

ချောင်ယန်ဟွာ ကြောင်သွားသည်။

"မင်းက အစည်းအဝေး ခေါ်ရင်းနဲ့ ဝမ်ချာလင်းရော၊ ပြိတ္တာ ကိစ္စရော တစ်ခါတည်း ရှင်းပစ်မလို့လား"

ယန်ကျန့် ပြောလိုက်သည်။

"ဒါ နောက်ဆုံး အခွင့်အရေးပဲ ဘုရင်တစ်ပါး သေဆုံးသွားတာက သူတို့ကို အချိန်အကြာကြီး ခြိမ်းခြောက်နိုင်မှာ မဟုတ်ဘူး သူတို့ အစီအစဉ်သစ် ရေးဆွဲပြီးတာနဲ့ ငါတို့ ခံစစ် ပြန်ရောက်သွားလိမ့်မယ် ဒါ့ကြောင့် ငါတို့ဘက်က တုံ့ပြန်မှု မြန်ဆန်ရမယ် တစ်ချက်ပြီး တစ်ချက် ဆက်တိုက် တိုက်ခိုက်မှ တစ်ဖက်လူက ဖိအားကို ခံစားရမှာ"

"ဒါ့အပြင် ဘုရင်အဖွဲ့အစည်း ရဲ့ သင်္ဘော စီမံကိန်း ကို တန်ပြန်ဖို့အတွက် ငါ စီမံကိန်းတစ်ခု ရေးဆွဲထားတယ် အဲဒီစီမံကိန်းကို ရေလွှမ်းမိုးခြင်း စီမံကိန်းလို့ နာမည်ပေးထားတယ်"

ထို့နောက် သူ ရေလွှမ်းမိုးခြင်း စီမံကိန်း အကြောင်း အကြမ်းဖျင်း ပြောပြလိုက်သည်။

ချောင်ယန်ဟွာ နားထောင်ပြီး အံ့သြမှင်သက်သွားသည်။

"ဒါ... ဒါက နည်းနည်း လွန်မနေဘူးလား ဒီစီမံကိန်း အကြောင်းသာ ပေါက်ကြားသွားရင် ဌာနချုပ်က ကမ္ဘာ့ရန်သူ ဖြစ်သွားလိမ့်မယ်"

"တစ်ဖက်လူက သင်္ဘော စီမံကိန်း ကို မစတင်သရွေ့ ငါတို့လည်း ရေလွှမ်းမိုးခြင်း စီမံကိန်း ကို ဘယ်တော့မှ စတင်မှာ မဟုတ်ဘူးလို့ ပြောလိုက်ရင် ရတာပဲ မဟုတ်ဘူးလား ဌာနချုပ်က ပညာရှင် အဖွဲ့တွေက အလကား ထိုင်စားနေတာလား ငါ့စီမံကိန်းကို နည်းနည်း ပြန်ပြင်ရေးပြီး အမြန်ဆုံး ထုတ်ပြန်လိုက် သတင်းထွက်သွားတာနဲ့ ၃ ရက်အတွင်း တစ်ဖက်လူ ဘာမှ လုပ်ရဲမှာ မဟုတ်ဘူးလို့ ငါ အာမခံတယ် အဲဒီအချိန်မှာ ငါတို့ အစည်းအဝေး အောင်အောင်မြင်မြင် ကျင်းပနိုင်လိမ့်မယ်"

"ဒီရက်ပိုင်းအတွင်း ပြိတ္တာ ကိုလည်း ရှင်းပစ်ရဦးမယ် အချိန်ဆွဲနေလို့ မရတော့ဘူး တစ္ဆေသင်္ဘော က ၁၀ ရက်အတွင်း ကမ်းခြေ တစ်နေရာရာမှာ ကမ်းကပ်တော့မယ် ငါတို့ အဆင်သင့် ပြင်ထားရမယ်"

ယန်ကျန့် လေးလေးနက်နက် ပြောလိုက်သည်။

"အော်... နားလည်ပါပြီ ရေလွှမ်းမိုးခြင်း စီမံကိန်း က တစ်ဖက်လူကို ခြိမ်းခြောက်ပြီး အချိန်ဆွဲဖို့ သက်သက်ပေါ့"

ချောင်ယန်ဟွာ ပြောလိုက်သည်။

သို့သော် ယန်ကျန့် အေးစက်စွာ ပြန်ပြောလိုက်သည်။

"မဟုတ်ဘူး တစ္ဆေသင်္ဘော တကယ် ကမ်းကပ်လာရင် ငါ့စီမံကိန်းကို တကယ် အကောင်အထည် ဖော်ရလိမ့်မယ် ဒါမှ ငါတို့ အသက်ရှင်ဖို့ လမ်းစ ရမှာ မဟုတ်ရင် တစ္ဆေသင်္ဘော က နောက်တစ်ခေါက် ထပ်လာဦးမယ် ငါတို့ဘက်က အင်အားတွေ လျော့နည်းသွားပြီး နောက်ဆုံးကျရင် ဘုရင်အဖွဲ့အစည်း ကို ယှဉ်နိုင်တော့မှာ မဟုတ်ဘူး ဒါ့ကြောင့် သေမထူး နေမထူး စိတ်ဓာတ်နဲ့ တိုက်ခိုက်ရမယ်"

ချောင်ယန်ဟွာ ထိတ်လန့်သွားသည်။

"တကယ် အဲဒီအဆင့် ရောက်သွားရင် အားလုံး သေကုန်ကြလိမ့်မယ်"

တစ္ဆေတွေ ကမ္ဘာအနှံ့ သောင်းကျန်းနေမယ့် မြင်ကွင်းကို သူ မြင်ယောင်နေမိသည်။

"ငါတို့တောင် အသက်မရှင်နိုင်တော့ရင် သူများ အသက်ရှင်တာ မရှင်တာ ဂရုစိုက်နေစရာ လိုသေးလို့လား"

ယန်ကျန့် ရက်စက်သော ဘက်ခြမ်းကို ထုတ်ပြလိုက်သည်။

ချောင်ယန်ဟွာလည်း နားလည်လိုက်သည်။ ယန်ကျန့် လုပ်ရပ်က မှန်ကန်သည်။ တစ်ဖက်လူရဲ့ တစ္ဆေသင်္ဘော က ထွက်ခွာလာပြီ ဖြစ်ရာ တန်ပြန် နည်းလမ်း မရှိရင် ကပ်ဘေးကြီး ဆိုက်ရောက်လာတော့မည်။

"ချောင်ယန်ဟွာ တကယ်တော့ ငါ မင်းကို သည်းခံနိုင်စွမ်း ကုန်ဆုံးနေပြီ ဒီအချိန်မှာ ငါ့ကို ဒုက္ခမပေးနဲ့တော့ ငါပြောသလို လုပ် ငါ့လုပ်ရပ်ကို မကျေနပ်ရင် ငါ့ကို ရာထူးကနေ ထုတ်ပစ်လိုက် မထုတ်ရဲရင် အမိန့်နာခံ"

ယန်ကျန့် ပြောလိုက်သည်။

"ယန်ကျန့် မင်း ငါ့ကို လျှော့တွက်လွန်းနေပြီ အခြေအနေကို ထိန်းသိမ်းဖို့အတွက် ငါ အလျှော့ပေးတာတွေ များခဲ့ပေမယ့် ဒီတစ်ခေါက်တော့ ငါလည်း နောက်မဆုတ်သင့်မှန်း သိပါတယ် မင်းရဲ့ ရေလွှမ်းမိုးခြင်း စီမံကိန်း ကို ငါ တာဝန်ယူမယ် ဘာပြဿနာပဲ ဖြစ်ဖြစ် ငါ တာဝန်ခံမယ် လိုအပ်ရင် ငါ့ကို သေနတ်နဲ့ ပစ်သတ်လိုက်"

ချောင်ယန်ဟွာလည်း ဝန်ထုပ်ဝန်ပိုးတွေကို လွှတ်ချလိုက်ပြီး သူ့စိတ်ရင်းမှန်ကို ထုတ်ပြလိုက်သည်။

ဒုတိယဝန်ကြီး လုပ်ရတာ ပင်ပန်းလွန်းသည်။ ထည့်စဉ်းစားစရာတွေ များလွန်းသည်။ အခုတော့ ပြတ်ပြတ်သားသား ဆုံးဖြတ်လိုက်ပြီ။ မဟုတ်ရင် အခြေအနေကို ပြန်ထိန်းနိုင်မှာ မဟုတ်ဘူး။

"ကောင်းပြီ စတင် လှုပ်ရှားတော့"

ယန်ကျန့် ပြောပြီး ဖုန်းချလိုက်သည်။

ဌာနချုပ် ဘက်တွင်...

ချောင်ယန်ဟွာ ဖုန်းချလိုက်သည်နှင့် အမိန့်ပေးလိုက်သည်။

"မန်နေဂျာ အားလုံး ငါ့ရုံးခန်း လာခဲ့ကြ လုကျီဝမ် ကိုလည်း အကြောင်းကြားလိုက် ပညာရှင်အဖွဲ့ကို ခေါ်ပြီး အစည်းအဝေး လာတက်ခိုင်းလိုက် ပြီးတော့ ဌာနချုပ်ကို ပိတ်ထားလိုက် အစည်းအဝေး လုပ်နေစဉ် ဘယ်သူမှ ဝင်ထွက်ခွင့် မရှိစေနဲ့"

"ဝမ်ကော်ချန်ရော သူလျှို စုံစမ်းတာ ဘယ်လိုနေလဲ ဆက်မစုံစမ်းခိုင်းနဲ့တော့ သံသယရှိသူ အားလုံးကို အလုပ်ထုတ်ပစ်လိုက် လုံခြုံရေးဌာနကိုလွှဲလိုက် ဌာနချုပ်ကနေ ပြောင်းရွှေ့သွားတဲ့ ဝန်ထမ်းတွေပဲ ဖြစ်ဖြစ် သံသယရှိရင် ဖမ်းချုပ်ထားလိုက်"

"လီကျွင်းကို ခေါ်လိုက် အခု အားလုံး အသက်နဲ့ရင်းပြီး လုပ်ရမယ့်အချိန် ရောက်ပြီ သူ အနားယူနေလို့ မဖြစ်တော့ဘူး အလုပ်လုပ်ရတော့မယ်"

အမိန့်များ ဆက်တိုက် ထွက်ပေါ်လာပြီး ဌာနချုပ် စတင် လည်ပတ်နေသည်။ ယန်ကျန့်၏ ရေလွှမ်းမိုးခြင်း စီမံကိန်း ကို ရေးဆွဲရန်နှင့် ဒုတိယအကြိမ် ခေါင်းဆောင်များ အစည်းအဝေး ခေါ်ယူရန် ပြင်ဆင်နေကြသည်။

ဒီအစည်းအဝေးက အားလုံးရဲ့ အနာဂတ်ကို အဆုံးအဖြတ် ပေးလိမ့်မည်။

ဒီအချိန်တွင် ယန်ကျန့်သည် ရေလွှမ်းမိုးခြင်း စီမံကိန်း အတွက် ကြိုးစားနေသည်။ သူ ကွမ်းကျန်း လူနေအိမ်ရာမှ ထွက်ခွာပြီး တစ္ဆေနယ်မြေ ကို အသုံးပြုကာ နိုင်ငံခြားသို့ သွားရောက်ခဲ့သည်။ နိုင်ငံခြားရှိ ရေလှောင်ကန်များနှင့် ရေကန်များတွင် တစ္ဆေရေကန် ၏ စွမ်းအားများကို ချန်ထားခဲ့သည်။ လုပ်ငန်းစဉ်က ရှုပ်ထွေးသော်လည်း အန္တရာယ် မရှိသဖြင့် လျင်မြန်စွာ လုပ်ဆောင်နိုင်သည်။

"ဖြစ်နိုင်ရင် ဒီစီမံကိန်းကို အကောင်အထည် မဖော်ချင်ဘူး"

သူ့စိတ်ထဲတွင် တွေးနေမိသည်။

နိုင်ငံခြားသားတွေကို သနားလို့ မဟုတ်ပေ။ တစ္ဆေရေကန် ထဲက တစ္ဆေတွေကို လွှတ်ပေးလိုက်ပြီ ဆိုကတည်းက ပြည်တွင်း အခြေအနေက အဆိုးရွားဆုံး အခြေအနေ ရောက်သွားပြီ ဆိုတဲ့ သဘောမို့လို့ပါ။

ယန်ကျန့် နိုင်ငံခြားရှိ ရေကန်များတွင် နေရာလိုက်ယူနေစဉ်...

နေ့လယ် ၁ နာရီတွင်...

ဌာနချုပ်က တစ္ဆေလောကသို့ ထုတ်ပြန်ကြေညာလိုက်သည်။ ရေလွှမ်းမိုးခြင်း စီမံကိန်း ကို တရားဝင် ကြေညာလိုက်သည်။

သို့သော် ချောင်ယန်ဟွာ၏ ထုတ်ပြန်ချက်က အနုပညာ ဆန်သည်။

"ပြည်တွင်းမှာ သဘာဝလွန် ဖြစ်ရပ်တွေ မကြာခဏ ဖြစ်ပွားနေပြီး ဌာနချုပ် အနေနဲ့ ကိုယ့်ပြဿနာကိုယ် ရှင်းဖို့တောင် မနိုင်မနင်း ဖြစ်နေပါတယ်။ ယုံကြည်စိတ်ချရတဲ့ သတင်းရင်းမြစ်တွေအရ အချို့သော အဖွဲ့အစည်းတွေက ကူညီပေးချင်စိတ် ပြင်းပြနေကြပါတယ်။ ဒါ့ကြောင့် တစ္ဆေသင်္ဘော ကမ်းကပ်ပြီးနောက် ရေလွှမ်းမိုးခြင်း စီမံကိန်း ကို စတင် အကောင်အထည် ဖော်သွားမှာ ဖြစ်ပါတယ်။ ကူညီပေးမယ့် အဖွဲ့အစည်းတွေကို အထူးကျေးဇူးတင်ရှိပါတယ်"

ထို့နောက် ရေလွှမ်းမိုးခြင်း စီမံကိန်း၏ အကြောင်းအရာ အချို့ကို အကျဉ်းချုံး ရှင်းပြထားသည်။

ချက်ချင်းပင် တစ္ဆေလောက တစ်ခုလုံး တုန်လှုပ်သွားသည်။

"ရူးကုန်ကြပြီ ချောင်ယန်ဟွာပါ ရောပြီး ရူးသွားပြီ ရေလွှမ်းမိုးခြင်း စီမံကိန်း တဲ့လား အတူတူ သေကြမယ့် သဘောပဲ"

"သေချင်သေကြပါစေ ဟားဟား စိတ်ဝင်စားစရာပဲ ဌာနချုပ်က ဒီတစ်ခါတော့ မာထန်နေတာပဲ ဘုရင်အဖွဲ့အစည်း ဘယ်လို ဖြေရှင်းမလဲ ကြည့်ရသေးတာပေါ့ ဌာနချုပ်မှာ ဒီလို ဝှက်ဖဲ ရှိလိမ့်မယ်လို့ မထင်ထားဘူး တန်ပြန် တိုက်ခိုက်မှုက မြန်ဆန်လိုက်တာ ကျေနပ်စရာပဲ"

"သူတို့က သင်္ဘော စီမံကိန်း လုပ်ရဲရင် ငါတို့ကလည်း ရေလွှမ်းမိုးခြင်း စီမံကိန်း လုပ်ရဲတာပေါ့ သူတို့က တစ္ဆေတွေကို ဒီဘက် ပို့လာရင် ငါတို့ကလည်း ဟိုဘက်ကို ပြန်ပို့ပေးလိုက်မယ် ဘယ်သူ အရင် သေမလဲ ကြည့်ကြတာပေါ့ ဘုရင်အဖွဲ့အစည်း နောက်ကွယ်က ထောက်ပံ့သူတွေ သေရမှာ မကြောက်ဘူးလား သိချင်တယ်"

"အရင် စစ်ကြေညာတယ်၊ ပြီးတော့ 'ဘုရင်' တစ်ပါးကို သတ်တယ်၊ အခု ရေလွှမ်းမိုးခြင်း စီမံကိန်း ချမှတ်တယ်... တစ်ချက်ပြီး တစ်ချက် တိုက်ခိုက်တာ တိကျပြီး ပြင်းထန်တယ် ဘုရင်အဖွဲ့အစည်း ဘက်က အခုထိ အသံတောင် မထွက်ရဲဘူး ဒီနည်းလမ်းတွေက တစ္ဆေမျက်လုံး ယန်ကျန့် လုပ်တာ ဖြစ်လောက်တယ် ဟိုချောင်ယန်ဟွာ က ခေါင်းခံပေးရုံ သက်သက်ပဲ သူ ဒီလောက် မလုပ်ရဲပါဘူး"

ဆွေးနွေးငြင်းခုံသံများ ဆူညံနေသည်။ တစ္ဆေဆရာ ဝက်ဘ်ဆိုက် ပျက်ကျလုနီးပါး ဖြစ်နေသည်။ အရင်က ဝင်မပြောဘဲ နေခဲ့သူများလည်း မနေနိုင်တော့ဘဲ ဝင်ပြောလာကြသည်။

"ငါ ကန့်ကွက်တယ် ဒီလုပ်ရပ်က လူသားမဆန်ဘူး ရေလွှမ်းမိုးခြင်း စီမံကိန်း ကို ပြင်းပြင်းထန်ထန် ကန့်ကွက်တယ် တစ္ဆေလောက ကိစ္စကို ဘာလို့ အပြစ်မဲ့ ပြည်သူတွေကို ဆွဲထည့်ရတာလဲ"

"ဟုတ်တယ် အရမ်း ရူးသွပ်လွန်းတယ် သင်္ဘော စီမံကိန်း က မကောင်းဘူးလား တစ္ဆေတွေကို တစ်နေရာတည်း စုပြီး အကုန် ရှင်းပစ်လိုက်ရုံပဲလေ ဘုရင်အဖွဲ့အစည်းကလည်း ကူညီမယ် ပြောထားတယ် သရဲနှင်အဖွဲ့ ကလည်း ထောက်ပံ့မယ် ပြောထားတယ် မဟုတ်လား"

"မင်း အမေလင်မို့လို့လား အရင်တုန်းကကျတော့ ထွက်မပြောဘဲ အခု ကိုယ့်အိမ် မီးလောင်တော့မှ ပူနေတာလား ဟားဟား ပြောရရင် မင်းတို့လည်း သေမှာ ကြောက်တာပါပဲ"

"ကန့်ကွက်တယ်"

မှတ်ချက်များ ပိုမို များပြားလာသည်။ သို့သော် ဒီမှတ်ချက် အများစုမှာ နိုင်ငံခြား တစ္ဆေဆရာများထံမှ ဖြစ်သည်။ အရင်က သူတို့ မထိခိုက်နိုင်ဘူး၊ ဘုရင်အဖွဲ့အစည်း ဘက်ကနေရင် အကျိုးရှိမယ် ထင်နေကြတာ။ အခု အခြေအနေ ပြောင်းသွားပြီး ကိုယ့်ဆီ မီးဟပ်လာတော့ မနေနိုင်ကြတော့ပေ။

"ငါ အရင်ကတည်းက ပြောဖူးတယ် ယန်ကျန့်က ဉာဏ်ရည်ရော သတ္တိရော ရှိတဲ့သူပါ သူ့ကို ရန်သူ မလုပ်သင့်ဘူး အရင်တုန်းက အာရှ နံပါတ်တစ် တစ္ဆေဆရာ လို့ ကြွေးကြော်ထားတဲ့ ရဲကျန့် တောင် ပင်လယ်မြို့မှာ ယန်ကျန့်နဲ့ တိုက်ခိုက်ပြီး အပြတ်အသတ် ရှုံးနိမ့်ခဲ့ရတယ် မြေကြီးပေါ်မှာ ခွေးသေတစ်ကောင်လို အချုပ်ခံထားရတဲ့ ပုံစံက တစ္ဆေလောကရဲ့ နာမည်ကြီး ပန်းချီကား တစ်ချပ် ဖြစ်ခဲ့ဖူးတယ် အဲဒီနောက်ပိုင်း အာရှ နံပါတ်တစ် နေရာ ပြောင်းသွားတယ် ရဲကျန့် က သူ့ကို ယန်ပြိုင်ဘက်ကင်း လို့တောင် ခေါ်ခဲ့တယ် တစ္ဆေလောကမှာ လူနာမည် မှားခေါ်တာ ရှိပေမယ့် ဘွဲ့နာမည် မှားခေါ်တာ မရှိဘူး ယန်ကျန့် က ယန်ပြိုင်ဘက်ကင်း ဘွဲ့ရထားတာ ကြာပြီ တိုက်ပွဲတိုင်း နိုင်ခဲ့တယ် သူ့စွမ်းရည်က ခန့်မှန်းလို့ မရအောင် နက်ရှိုင်းတယ် ဒီတိုက်ပွဲမှာ ယန်ကျန့် ဦးဆောင်တဲ့ ဌာနချုပ်က နိုင်မယ်လို့ ငါ အာမခံတယ်"

'ငါ့မှာ အကြံတစ်ခု ရှိတယ်' အကောင့်ပိုင်ရှင်က စာရှည်ကြီး ဝင်ရေးလိုက်ပြန်သည်။

"အီးပေါက်မနေနဲ့ မင်း အရင်တုန်းက ယန်ကျန့် က အကြံအစည် မရှိဘူး၊ ရဲကျန့် က ဉာဏ်မရှိဘူး လို့ ပြောခဲ့တာလေ အခုကျမှ မြှောက်ပင့်နေပြန်ပြီ တကယ့် အရှက်မရှိတဲ့ကောင် ထွီ"

လူတစ်ယောက်က သူ့နာမည်ကို မှတ်မိပြီး ဝင်ဆဲလိုက်သည်။

'ငါ့မှာ အကြံတစ်ခု ရှိတယ်' က ဆက်ရေးသည်။

"တကယ့် အရူးတွေပဲ ရန်သူကို အားနည်းသယောင် ဟန်ဆောင်ပြရတယ် ဆိုတာ မသိဘူးလား မဟုတ်ရင် ဘုရင်အဖွဲ့အစည်း က ဘယ်လိုလုပ် သတိလက်လွတ် ဖြစ်သွားမလဲ ငါသာ အွန်လိုင်းမှာ ယန်ပြိုင်ဘက်ကင်း ဆိုပြီး လိုက်အော်နေရင် ဘုရင်အဖွဲ့အစည်း က သူလျှိုတွေ တွေ့သွားပြီး သတိထားသွားမှာပေါ့ အဲဒီကျရင် ယန်ကျန့် ဘယ်လိုလုပ် 'ဘုရင်' တစ်ပါးကို လွယ်လွယ်ကူကူ သတ်နိုင်မှာလဲ ယန်ကျန့် အခုလို အောင်မြင်တာ ငါ့ကျေးဇူး ၃၀ ရာခိုင်နှုန်းလောက် ပါတယ်လို့ ပြောရဲတယ်"

"မင်းက သစ္စာဖောက်ပဲ အမေရိကန်ကနေ ရေးနေတာ ငါ မသိဘူး မထင်နဲ့"

နောက်တစ်ယောက်က ဝင်ဆဲလိုက်သည်။

"ငါက ကိုယ်က ဟိုမှာ ရောက်နေပေမယ့် စိတ်က ဒီမှာ ရှိနေတာပါ ဒီနေ့ အခြေအနေ ရှင်းလင်းသွားပြီဆိုတော့ ငါ ပြည်တွင်းကို ပြန်လာပြီး ဌာနချုပ် ဝင်ကာ ဘုရင်အဖွဲ့အစည်း နဲ့ သေရေးရှင်ရေး တိုက်ခိုက်တော့မယ် မိတ်ဆွေတို့ စိတ်ထဲမှာ သိက္ခာတရား ကျန်ရှိသေးရင် ငါနဲ့အတူ ပြည်တွင်းပြန်ပြီး ယန်ပြိုင်ဘက်ကင်း ဆီ ဝင်ရောက် ခိုလှုံကြပါ ငါက သူနဲ့ ရင်းနှီးပါတယ် ငါ ကြားဝင်ပေးရင် ယန်ပြိုင်ဘက်ကင်း က မင်းတို့ကို ဒုက္ခပေးမှာ မဟုတ်ပါဘူး"

ဒီ 'ငါ့မှာ အကြံတစ်ခု ရှိတယ်' အကောင့်ပိုင်ရှင်က လူတွေကို ဌာနချုပ် ဝင်ဖို့ စည်းရုံးနေသည်။

သူ့စကားတွေက ရယ်စရာ ကောင်းသော်လည်း ပြည်ပ တစ္ဆေဆရာ အချို့က တိတ်တဆိတ် ဆက်သွယ်လာပြီး ဌာနချုပ် ဝင်လိုကြောင်း ကမ်းလှမ်းလာကြသည်။

သို့သော် အများစုကတော့ သူ့ကို ဆဲဆိုနေကြသည်။ တချို့ဆိုလျှင် 'ပင်လယ်မြို့က ဆရာကြီးရဲ' ကို ဆက်သွယ်ပြီး ဒီအရှက်မရှိတဲ့ ကောင်ကို ဆုံးမပေးဖို့ တောင်းဆိုကြသည်။

တစ္ဆေလောကတွင် လှိုင်းလုံးများ ထန်နေချိန်...

ပင်လယ်ပြင် တစ်နေရာရှိ ဟာဝိုင်ယီ ကျွန်းပေါ်တွင် လေယာဉ်များ အဆက်မပြတ် ဆင်းသက်နေသည်။ ကျွန်းတစ်ကျွန်းလုံးကို ပိတ်ဆို့ထားပြီး သတ်မှတ်ထားသူများသာ ကျွန်းပေါ် တက်ရောက်ခွင့် ရှိသည်။

ကျွန်းအလယ်ရှိ မြက်ခင်းပြင်ကျယ်ကြီးတွင် ကြီးမားသော စားပွဲဝိုင်းကြီး တစ်လုံး ရှိသည်။ ထူးဆန်းသော လူ ၁၀ ဦးခန့် စားပွဲဝိုင်းတွင် ထိုင်နေကြပြီး တစ္ဆေလောက အကြောင်း ဆွေးနွေးနေကြသည်။

ထိုလူများထဲတွင် မျက်နှာပေါ်၌ အရေးအကြောင်းများ ပြည့်နှက်နေပြီး အလောင်းကောင် ပြင်ဆင်သူ အမျိုးသမီးကြီး တစ်ဦးကဲ့သို့ ဖြစ်နေသော အမျိုးသမီးကြီး တစ်ဦး၊ အငွေ့အသက် ထူးဆန်းပြီး ဝတ်စုံထူးဆန်း ဝတ်ဆင်ထားသော သာသနာပြု ဆရာ တစ်ဦး၊ အိမ်ခြေရာမဲ့ ပုံစံပေါက်နေသော ပန်းချီဆရာ တစ်ဦး၊ ကောင်းဘွိုင် ဦးထုပ်ဆောင်းပြီး ဟောင်းနွမ်းသော သေနတ်တစ်လက် လွယ်ထားသည့် ကောင်းဘွိုင် တစ်ဦး... ထို့အပြင် ခန္ဓာကိုယ် ဝိုးတဝါး ဖြစ်နေပြီး အမည်းရောင်နှင့် အဖြူရောင် ရောနှောနေကာ ဝိညာဉ် တစ်ကောင်နှင့် တူသော အမျိုးသား တစ်ဦးလည်း ပါဝင်သည်။

သေချာသည်မှာ သူတို့အားလုံးသည် ဘုရင်အဖွဲ့အစည်း ၏ အကြောက်စရာ အကောင်းဆုံး ပုဂ္ဂိုလ်များ ဖြစ်ကြပြီး အခြားသူများက သူတို့ကို 'ဘုရင်' များဟု ခေါ်ဆိုကြသည်။

ဒါသည် ပြင်ပလူများ မသိရှိသော ဘုရင်များ အစည်းအဝေး ဖြစ်သည်။

"ခြံဝင်းပိုင်ရှင် အသတ်ခံလိုက်ရတာက သက်ရောက်မှု ကြီးမားသွားတယ် အခု တစ်ဖက်လူက ရေလွှမ်းမိုးခြင်း စီမံကိန်း ကိုပါ ထုတ်သုံးလာပြီ ငါတို့ ဘာမှ မလုပ်ရင် အခြေအနေ ပိုဆိုးသွားလိမ့်မယ် သဘော် စီမံကိန်း အောင်မြင်ရင်တောင် ကြီးမားတဲ့ ပေးဆပ်မှုတွေ ပေးရလိမ့်မယ် ဒါက စီမံကိန်း စတင်တုန်းက အခြေအနေနဲ့ မကိုက်ညီတော့ဘူး"

သာသနာပြု ဆရာက ပြောလိုက်သည်။ သူ့လက်ထဲတွင် စာအုပ်အဟောင်း တစ်အုပ် ကိုင်ထားပြီး အမြဲတမ်း ယူဆောင်သွားလေ့ ရှိသည်။

"ဟို ယန်ကျန့် ဆိုတဲ့ကောင်က ပြဿနာကောင်ပဲ အဲဒီကောင်ကို ရှင်းပစ်လိုက်ရင် စီမံကိန်းက ချောချောမွေ့မွေ့ ဆက်သွားလိမ့်မယ်"

အမည်းရောင်နှင့် အဖြူရောင် ရောနှောနေသော ဝိညာဉ်ကဲ့သို့ အမျိုးသားက ပြောလိုက်သည်။ သူသည် အသက်ရှင်စဉ်က ပုံစံအတိုင်း ထိုင်နေပြီး ပေါ့ပေါ့ပါးပါး ပြောလိုက်သည်။

"ယန်ကျန့်ကို လုပ်ကြံလိုက်ရင်ရော ပြီးခဲ့တဲ့ တစ္ဆေဆရာကို လုပ်ကြံသလိုမျိုးပေါ့"

ကောင်းဘွိုင် ဦးထုပ်ဆောင်းထားသော အမျိုးသားက တိုက်ရိုက် နည်းလမ်းကို အကြံပြုလိုက်သည်။

"အကြံကောင်းပေမယ့် တစ်ဖက်လူက ပြင်ဆင်ထားပြီးလောက်ပြီ တကယ်လို့ တိုက်ခိုက်လိုက်ရင် တစ်ဖက်လူရဲ့ ခေါင်းဆောင်တွေ အများကြီး စစ်ကူ ရောက်လာလိမ့်မယ် အဲဒီကျရင် ခေါင်းဆောင်တွေနဲ့ ဘုရင်တွေရဲ့ တိုက်ပွဲ ဖြစ်သွားလိမ့်မယ် တစ်ဖက်လူက ခြံဝင်းပိုင်ရှင်ကို သတ်နိုင်တဲ့ စွမ်းရည် ရှိတယ် မျက်နှာချင်းဆိုင် တိုက်ရင် ငါတို့ အသာစီး ရမှာ မဟုတ်ဘူး"

အိမ်ခြေရာမဲ့ ပန်းချီဆရာက သက်ပြင်းချပြီး ပြောလိုက်သည်။

"ငါ ထင်တာတော့ ရေလွှမ်းမိုးခြင်း စီမံကိန်း က ငါတို့ကို လှည့်စားဖို့ လုပ်တာ နေမှာပါ တကယ် မရှိပါဘူး သူတို့ ရည်ရွယ်ချက်က အချိန်ဆွဲချင်တာ ငါတို့ ဆက်ပြီး ဖိအားပေးသင့်တယ် တစ္ဆေသင်္ဘော ကမ်းကပ်ဖို့ အာမခံရမယ် စီမံကိန်း အောင်မြင်ရင် ငါတို့ နိုင်ပြီ မဟုတ်လား ဘာလို့ သူတို့နဲ့ သွားပြီး အသေအလဲ တိုက်ခိုက်နေရမှာလဲ မိုက်မဲလွန်းတယ်"

ဝဖြိုးသော အမျိုးသား တစ်ဦးက ရှင်းလင်းစွာ ပြောလိုက်သည်။

"ဟုတ်တယ် ငါတို့ နောက်ထပ် ရက်နည်းနည်း စောင့်ပြီး တစ္ဆေသင်္ဘော ကမ်းကပ်အောင် ကာကွယ်ပေးလိုက်ရင် ငါတို့ နိုင်ပြီ အဲဒီကျမှ ခေါင်းကိုက်ရမှာက သူတို့ပဲ"

နောက်ထပ် 'ဘုရင်' တစ်ပါးက ထောက်ခံလိုက်သည်။

သူတို့ အမြင်မှာတော့ ဌာနချုပ်ရဲ့ တန်ပြန် တိုက်ခိုက်မှုက ပြင်းထန်တယ် ထင်ရပေမယ့် တစ္ဆေသင်္ဘော ကမ်းကပ်လာမယ့် အမှန်တရားကို ပြောင်းလဲနိုင်မှာ မဟုတ်ဘူး။ ပြီးတော့ အဖွဲ့အစည်း ထဲက သူလျှိုတွေက ရေလွှမ်းမိုးခြင်း စီမံကိန်း နဲ့ ပတ်သက်တဲ့ သတင်းအချက်အလက် ဘာမှ မရထားဘူး။ ဒါ့ကြောင့် ဒီစီမံကိန်းက လိမ်ညာမှု တစ်ခု ဖြစ်နိုင်တယ်။

"ဒါဆို ဆွေးနွေးချက် ရလဒ်က ဘာမှ မလုပ်ဘဲ ဆက်စောင့်နေမယ် ပေါ့ ဟုတ်လား"

သာသနာပြု ဆရာက အခြားသူများကို တည်ငြိမ်စွာ ကြည့်ပြီး ပြောလိုက်သည်။

"ငါ ဒီအကြံပြုချက်ကို ငြင်းပယ်တယ် ပြီးတော့ ငါ့မှာ အကြံတစ်ခု ရှိတယ် လူကြီးမင်းတို့ စဉ်းစားပေးကြပါ..."

သူ ဘုရင်များ အစည်းအဝေးတွင် သူ့အကြံအစည်ကို ပြောပြလိုက်သည်။

စကားလုံးတိုင်းက ကြောက်မက်ဖွယ် မုန်တိုင်းတစ်ခုကို ဖန်တီးနေသကဲ့သို့ ဖြစ်နေသည်။

သိသာထင်ရှားသည်မှာ ဒီသာသနာပြု ဆရာသည် အချိန်ကုန်ခံပြီး စောင့်ဆိုင်းချင်စိတ် မရှိတော့ပေ။ သူ ဦးဆောင်မှု အခန်းကဏ္ဍကို ပြန်လည် ရယူချင်နေသည်။ ဘာမှ မလုပ်ဘဲ နေရင် အခြေအနေ ပိုဆိုးသွားလိမ့်မည်ဟု သူ ခံစားနေရသည်။ ရေလွှမ်းမိုးခြင်း စီမံကိန်း သည် လိမ်ညာမှု မဟုတ်ကြောင်း သူ ယုံကြည်သည်။ အကြောင်းမှာ အကြောက်တရား ခြံဝင်း ပျောက်ကွယ်သွားသော နေရာတွင် ထူးဆန်းသော ရေကွက်များ ကျန်ရစ်ခဲ့သောကြောင့် ဖြစ်သည်။

ယန်ကျန့် သည် အလားတူ သဘာဝလွန် စွမ်းအားကို ပိုင်ဆိုင်ထားပုံ ရသည်။ တကယ်သာ ဆိုရင် သူ ရေလွှမ်းမိုးခြင်း စီမံကိန်း ကို အကောင်အထည် ဖော်နိုင်စွမ်း ရှိသည်။

ဘုရင်များ အစည်းအဝေး ပြီးဆုံးသွားပြီး သာသနာပြု ဆရာက နောက်တစ်ဆင့် လုပ်ဆောင်မည့် အစီအစဉ်များကို ချမှတ်ပြီးနောက်...

တစ်ယောက်က အကြံပြုလာသည်။ ကျန်းကျွင်း ၏ အလောင်းနှင့် ခြံဝင်းပိုင်ရှင်၏ ဦးခေါင်းကို လဲလှယ်ရန် ကြိုးစားသင့်ကြောင်း၊ ကံကောင်းရင် ထိုကံဆိုးသော ဘုရင်ကို ကယ်တင်နိုင်မည် ဖြစ်ကြောင်း ပြောဆိုလာသည်။

ဒီအကြံပြုချက်ကို ချက်ချင်း အတည်ပြုလိုက်သည်။

ခြံဝင်းပိုင်ရှင်၏ ဦးခေါင်းကို လစ်လျူရှုထားလို့ မဖြစ်ပေ။ အခွင့်အရေး ရှိရင် ကယ်တင်သင့်သည်။

အနာဂတ်ကို ဘယ်သူ အာမခံနိုင်မလဲ။ ကိုယ်တိုင် နောက်ထပ် ခြံဝင်းပိုင်ရှင် ဖြစ်လာရင် ဘယ်လိုလုပ်မလဲ။