ဧရာမမျောက်ဝံ လေးပစ်ခြင်း။ ဟွားရှန်ကို နှုတ်ဆက်ခြင်း။ (၄)

“အင်း… အင်း” ဟွားယီက အကြိမ်ကြိမ် ခေါင်းညိတ်ပြလိုက်သည်။ သူက သိပ်ပြီး အကူညီမဖြစ်ပါ။ သူ အကောင်းဆုံးလုပ်နိုင်တာက ဝင်မရှုပ်ဘဲ ပြဿနာမရှာဖို့ပင်။

ဟွားယီထွက်သွားပြီးနောက် စူးချန်ခုန်းက မြင်းလှည်းကို တျဲရှင်းတောင်ခြေကို မောင်းသွားလိုက်သည်။ အမှန်တော့ တောင်ကို အရပ်လေးမျက်နှာ ကာရံထားပြီး တောင်ထိပ်သို့ ဦးတည်သော လမ်းကြောင်းတစ်ခုတည်းသာရှိပြီး ထိုလမ်းကြောင်းတွင် တျဲရှင်းဂိုဏ်းသားများ ရှိနေသည်။

တျဲရှင်းဂိုဏ်းတွင် အဖွဲ့ဝင်တစ်ထောင်ကျော်ရှိသည်။ စူးချန်ခုန်းက ဟွားရှန်ကို သူတို့လက်မှ ကယ်တင်ရန် ဆုံးဖြတ်ထားကာ ဂိုဏ်းသားနှစ်ယောက်ကို သတ်ပြီးဖြစ်သောကြောင့် ကိစ္စတွေက ကောင်းကောင်းမွန်မွန် အဆုံးသတ်ဖို့ မဖြစ်နိုင်ပါ။ ထိုသို့ဆိုလျှင် သူ သူတို့အားလုံးကို သတ်ရလိမ့်မည်။

မဟုတ်ပါက သမားတော်ဟွားရှန်ကို ကယ်တင်နိုင်ခဲ့လျှင်ပင် ဒီလူတွေက ဆရာ တပည့်နှစ်ဦးစလုံးကို လက်စားချေနိုင်သေးသည်။

သာမန်ပြည်သူလူထုနှင့် ရပ်ရွာများကို ခေါင်းပုံဖြတ်အမြတ်ထုတ်ခြင်းဖြင့် ကြီးပွားနေသော ဂိုဏ်းတစ်ခုသည် ဓားပြများနှင့် မခြားပါပေ။ သူတို့ကို ဖယ်ရှားပစ်တာက မကောင်းမှုကို ဖယ်ရှားသည့် တာဝန်ကို ထမ်းဆောင်ခြင်း ဖြစ်သည်။

ထို့အပြင် စူးချန်ခုန်း၏ ဝူချင်းရှီသည် ဒသမမြောက် နယ်ပယ်သို့ ရောက်ရှိခဲ့ပြီးနောက် သူ၏ တိုက်ခိုက်ရေးစွမ်းအားကို များစွာ တိုးတက်စေခဲ့သည်။ သို့သော် ဆက်တိုက် တိုက်ခိုက်ခြင်းက သူ၏စိတ်ဓာတ်နှင့် စိတ်စွမ်းအားကို သိသိသာသာ ထိခိုက်စေခဲ့ပြီး တျဲရှင်းဂိုဏ်း၏ များပြားလှသော ဂိုဏ်းသားအရေအတွက်ကြောင့် သူတို့သည် အရပ်မျက်နှာအားလုံးသို့ ပျံ့နှံ့သွားပါက စူးချန်ခုန်းအတွက် တစ်ယောက်ပြီးတစ်ယောက် သတ်ပစ်ဖို့ ခက်ခဲပေလိမ့်မည်။ ထို့ကြောင့် စူးချန်ခုန်းက မြားပစ်ဖြင့် ပစ်သတ်ရန် ဆုံးဖြတ်ခဲ့သည်။

စူးချန်ခုန်း၏ လေမိုးကြိုးမြားအတတ်သည် ကမ္ဘာ့ပြိုင်ဘက်ကင်း နဝမမြောက် နယ်ပယ်သို့ ရောက်ရှိခဲ့ပြီး တိုက်ခိုက်မှု အကွာအဝေး ကျယ်ပြန့်လှသည်။ စွမ်းအင်များစွာ သုံးစွဲရပြီး ပစ်မှတ်တစ်ခုမျှ မလွတ်တမ်း ပစ်နိုင်သော မြင့်မားသော စွမ်းအားရှိသော လှုပ်ရှားမှုများကို အသုံးမပြုဘဲ သူသည် တျဲရှင်းဂိုဏ်း၏ တပည့်တစ်ထောင်ကို သတ်ရန် သီအိုရီအရ မြားတစ်ထောင်သာ ပစ်ရန် လိုပါသည်။

ထို့ကြောင့် စူးချန်ခုန်းက မြားတစ်ထောင်ကျော် ဝယ်ယူခဲ့သည်။

“ဒီကနေ တက်မယ်။”

စူးချန်ခုန်းသည် မြင်းလှည်းကို တျဲရှင်းတောင်၏ ဘယ်ဘက်သို့ မောင်းနှင်ပြီး မတ်စောက်သော ကျောက်ဆောင်ကို လှမ်းကြည့်လျက် သူဝယ်ယူထားသော မြားအားလုံးကို ထိုနေရာသို့ ဆွဲယူရန် လိုအပ်ကြောင်း သိလိုက်သည်။

ဝူချင်းရှီ။ စိတ်စွမ်းအင် ကြိုးကြာပုံစံ။

စူးချန်ခုန်းသည် သူ၏အတွေးများကို အာရုံစိုက်လိုက်ပြီး သူ့နောက်ကွယ်ရှိ မမြင်ရသော ဝိညာဉ်စွမ်းအင်ကို စိတ်စွမ်းအင်အရ ဆွဲယူလိုက်သည်။ တောင်ပံနှစ်ဖက်နီးပါးရှိသော ခမ်းနားသော ကြိုးကြာအရိပ်တစ်ခု ထွက်ပေါ်လာပြီးနောက် စူးချန်ခုန်းက မြားများပြည့်နေသော သစ်သားသေတ္တာတစ်လုံးကို ကောက်ယူလိုက်သည်။

ဝှူးရှ်

ကြိုးကြာအရိပ်သည် ၎င်း၏တောင်ပံများကို ဝှေ့ယမ်းကာ စူးချန်ခုန်း၏ ပခုံးများကို ၎င်း၏ခြေသည်းများဖြင့် ဆုပ်ကိုင်လျက် တစ်ချက်တည်းဖြင့် ဆယ်ပေနီးပါး အကွာသို့ တက်သွားလေ၏။ စူးချန်ခုန်းသည် သူ၏ခြေလှမ်းများကို ကုပ်ယူရန် ထိုးထွက်နေသည့် ကျောက်စွန်းများကို အသုံးချပြီး အသက်ရှူရန် တစ်ထောက်နားလေသည်။ ထို့နောက် ကြိုးကြာအရိပ်က တဖန်မြင့်တက်သွားပြန်သည်။

စိတ်စွမ်းအင်မှ ပုံသဏ္ဍာန်သို့ ပြောင်းလဲထားသော ကြိုးကြာပြကွက်သည် စစ်မှန်သော ပျံသန်းမှုမဟုတ်ဘဲ အလွန်အဆင့်မြင့်သော ကိုယ်ဖော့ပညာပုံစံတစ်ခုဖြစ်ပြီး ကောင်းကင်ယံတွင် ပျံဝဲနိုင်စွမ်းမရှိဘဲ မြေပြင်အထက်တွင် လျှပ်တိုက်ပြေးနိုင်သည့် ပေါ့ပါးသော ခန္ဓာကိုယ်နည်းစနစ်တစ်ခုဖြစ်သည်။ မူလနယ်ပယ်ရှိ မည်သည့်ကိုယ်ခံပညာရှင်မဆို ဤအရာကို အောင်မြင်နိုင်မည်ဟု မသေချာသော်လည်း ခြေကုပ်ယူနိုင်သော ဤကျောက်ဆောင်များကဲ့သို့သော နေရာတွင် ၎င်းသည် ပြန့်ပြူးနေသော မြေပြင်ပေါ်တွင် လမ်းလျှောက်နေရသကဲ့သို့ပင်။

လေးကြိမ် ငါးကြိမ်လောက် တက်ပြီးနောက် ကြိုးကြာအရိပ်သည် စူးချန်ခုန်းအား မီတာ မြင့်မားသော ကျောက်ဆောင်များစွာကို ကျော်ဖြတ်စေပြီး တျဲရှင်းတောင်ပေါ်သို့ ရောက်သွားလေတော့သည်။

စူးချန်ခုန်းသည် ပတ်ဝန်းကျင်ကို ကြည့်ရှုလိုက်ရာ မဝေးလှသော နေရာ၌ အဆောက်အအုံများကို တွေ့ရှိခဲ့သည်။ ညဉ့်နက်နေပြီဖြစ်သောကြောင့် တျဲရှင်းတောင်တွင် အခြေစိုက်သော တျဲရှင်းဂိုဏ်းသားအများစုသည် အနားယူနေကြကာ အနည်းစုသာ ကင်းလှည့်နေကြပြီး ကျောက်ဆောင်ဘေးမှ တက်လာသော စူးချန်ခုန်းကို လုံးဝမသိကြပေ။

စူးချန်ခုန်းသည် မြားများဖြင့် ပြည့်နေသော သစ်သားသေတ္တာကို မြေပြင်ပေါ်တွင် ချလျက် နောက်ထပ်နှစ်ကြိမ် ခရီးဆက်ခဲ့ပြီး မြားတစ်ထောင်ကျော်ကို ထိပ်သို့ ပို့ဆောင်လိုက်သည်။

တိတ်ဆိတ်ငြိမ်သက်နေသော တျဲရှင်းဂိုဏ်း၏ ခံတပ်အတွင်းသို့ သေမင်းတမန် ဆင်းသက်လာသည်ကို မည်သူမျှ မသိကြပေ။

“စလိုက်ရအောင်။ တျဲရှင်းဂိုဏ်းက ခွန်အားကြီးတဲ့သူအားလုံးကို သတ်ပစ်မယ်။”

စူးချန်ခုန်း၏ မျက်လုံးများတွင် သတ်ဖြတ်လိုစိတ်များ အထင်းသား။ တျဲရှင်းဂိုဏ်း၏ တပည့်အားလုံးကို သတ်ဖြတ်တာက ရက်စက်ကြမ်းကြုတ်သည်ဟု ထင်ရသော်လည်း သူတို့သည် မရေမတွက်နိုင်သော မကောင်းမှုများ ကျူးလွန်ခဲ့သော သူခိုးဓားပြတစ်စုသာ ဖြစ်သည်။ မကောင်းမှုကို ဖယ်ရှားခြင်းသည် ကောင်းကျိုးကို မြှင့်တင်ပေးခြင်းပင် ဖြစ်သည်။

ဝှစ်

စူးချန်ခုန်းသည် သူ၏ အတွေးများကို အာရုံစိုက်လိုက်ပြီး သူ၏ အနောက်ဘက်က ဝိညာဉ်စွမ်းအင်ကို စုစည်းကာ ရွှေရောင်အမွေးများဖြင့် ရှင်းလင်းစွာ မြင်နိုင်သော မျောက်ဝံရုပ်သွင်၊မျောက်ဝံ အသွင်ပြောင်းနည်းအကွက်ကို ဖြည်းဖြည်းချင်း ဖွဲ့စည်းလိုက်သည်။

ရွှေရောင်မျောက်ဝံရုပ်သွင်သည် စူးချန်ခုန်း၏ ကြယ်ပုံစံရွှေ အားကောင်းလေးကို ဆွဲယူပြီး မြားတစ်ချောင်းကို တေ့လိုက်သည်။ ရွှေရောင်မျောက်ဝံရုပ်သွင်၏ လက်ထဲတွင် အားသန်လေးက အနည်းငယ် သေးငယ်နေသည့်ပုံရသည်။

စူးချန်ခုန်း၏ လက်ရှိခွန်အားသည် လေးကို ဆွဲပြီး မြားပစ်ရန် မလုံလောက်သော်လည်း သူ၏ အတွေးများနှင့် စွမ်းအင်များဖြင့် ဝိညာဉ်စွမ်းအင်မှ ပုံသွင်းထားသော ဝူချင်းရှီသည် သူ၏ ထိန်းချုပ်မှုအောက်တွင် ရှိနေသည်။ ဒါက သူ့ကိုယ်ပိုင် လက်များကို အသုံးပြုနေသလိုပါပင်။ သူက လူသားနဲ့ အနီးစပ်ဆုံးပုံစံရှိတဲ့ ဧရာမမျောက်ဝံပုံရိပ်ယောင်ကို သူ့ရဲ့မြားပစ်အတတ်ကို လုပ်ဆောင်ဖို့ အမိန့်ပေးခဲ့သည်။

သက်တံ့မြားလို နက်နဲတဲ့နည်းစနစ်တွေ အသုံးချဖို့ မလိုအပ်ပါ။ သာမန်ရိုးရိုးပစ်ခတ်မှုက တျဲရှင်းဂိုဏ်းရဲ့ သိုင်းပညာရှင်တွေကို သတ်ပစ်ဖို့ လုံလောက်ပါသည်။