ကျန်းချိုလန်အကြောင်း ပထမဆုံးကြားဖူးခြင်း

ထင်ယန်စီရင်စု

ယန်ကွေသည် မြင်းဇက်ကြိုးကိုဆွဲ၍ မြို့ထဲသို့ ဖြည်းညှင်းစွာ မောင်းနှင်လာခဲ့သည်။ နတ်ဆိုးနှိမ်နင်းရေးတပ်ဖွဲ့၏ ဒု-စစ်သူကြီးတစ်ဦးအနေဖြင့် သူ့အား မြင်းလှည်းမောင်းခိုင်းနိုင်သူ လူများများစားစား မရှိပေ။

အထက်လူကြီးထံမှ ဤအမိန့်ကို လက်ခံရရှိစဉ်က အနည်းငယ် မကျေမနပ်ဖြစ်မိသော်လည်း ယခုအခါတွင်မူ လုံးဝလက်ခံသွားခဲ့ပြီ ဖြစ်သည်။

ဒု-စစ်သူကြီးတစ်ယောက်က မြင်းလှည်းမောင်းရသည်မှာ ဘာများဆန်းသနည်း။ အမြုတေဖြစ်တည်ခြင်းအဆင့် ကျင့်ကြံသူလေးဦးပါသော မြင်းလှည်းကို မောင်းနှင်ရသည်မှာ သူနှင့်ပင် မတန်ဟု ခံစားမိသေးသည်။

မြင်းလှည်းအတွင်း၌ ပါလာသော သိုင်းပညာရှင် တာအိုဆရာကြီးနှစ်ဦးသည် စစ်သူကြီးယိုထံသို့ စာပို့ထားပြီးဖြစ်သော်လည်း ကိစ္စရပ်များ ပြီးစီးသွားချိန်တွင် လူကိုယ်တိုင်လာရောက် ကျေးဇူးတင်စကား မဆိုဘဲ မနေရဲကြပေ။

သူတို့သယ်ဆောင်လာသော ပုံသဏ္ဌာန်နှစ်မျိုး မူလအနှစ်သာရ အတွက်လည်း သိပ်မပူပန်ကြချေ။

အဘယ်ကြောင့်ဆိုသော် သူတို့လက်ထဲမှ ပစ္စည်းကို လုယူနိုင်သူ ရှားပါးလှသည့်အပြင် သခင်ရှန်းလည်း ဘေးတွင်ပါလာသဖြင့် ထင်ယန်စီရင်စုတစ်ခုလုံးတွင် မည်သူကများ အမိန့်ဖီဆန်ရဲမည်နည်း၊မည်သူကများ မကောင်းကြံရဲမည်နည်း။

...

ရှန်းယီသည် မျက်လုံးများကိုမှိတ်ကာ အနားယူနေရင်း မိုးကြိုးမုန်တိုင်းနေမင်းလောင်ကျွမ်းခြင်းရတနာကျမ်း ကို စိတ်ထဲတွင် ဆင်ခြင်လေ့ကျင့်နေလေ၏။

သူ၏ လက်ရှိခွန်အားအရ အမြုတေပြီးပြည့်စုံခြင်းအဆင့်ရှိသော နတ်ဆိုးသခင်ကို တစ်ဦးချင်း ယှဉ်ပြိုင်တိုက်ခိုက်ရန် ပြဿနာမရှိနိုင်ပေ။

ထိုတောဘုရင်အငွေ့အသက်ကို နောက်ဆုံးတွင် အသုံးပြုနိုင်ပြီဖြစ်သည်။

သို့သော် သူသည် တတ်နိုင်သမျှ တိုးတက်အောင် ကြိုးစားလေ့ရှိပေသည်။

မိုးကြိုးမုန်တိုင်း နေ‌မင်းလောင်ကျွမ်းခြင်းရတနာကျမ်း သည် မြစ်စောင့်နတ်ဆိုးကို သတ်ဖြတ်ခဲ့သည့်အတွက် နတ်ဆိုးနှိမ်နင်းရေးတပ်ဖွဲ့ထံမှ ဆုလာဘ်အဖြစ် ရရှိခဲ့ခြင်းဖြစ်သည်။

၎င်းသည် ကျောက်စိမ်းအဆင့်သို့ တက်လှမ်းရန် အတွင်းအားကျင့်စဉ်ဖြစ်ပြီး တည်ဆောက်ထားသော နေမင်းလောင်ကျွမ်းခြင်းရတနာမီးပြင်းဖို သည် ကောင်းကင်နတ်ဆိုးအမြုတေ နှင့် နီးကပ်စွာ ဆက်စပ်နေလေသည်။

ယခင်က ပင်မမရီဒျန်ဆုံမှတ် ၂၇၅ ခုကို ဆက်သွယ်ခဲ့ပြီးကတည်းက ကောင်းကင်နတ်ဆိုးအမြုတေသည် မည်သည့်ပြဿနာမျှ မပေးတော့ပေ။

ဝမ်းနည်းစရာမှာ တစ်ဝက်သာပြည့်သော ပြင်ပအမြုတေသည် အမြုတေဖွဲ့စည်းခြင်းအဆင့်၏ အခြေခံမျှသာ ရှိနေသေးခြင်းပင်။

ရှန်းယီသည် ပုံသဏ္ဌာန်နှစ်မျိုး မူလအနှစ်သာရ ပုံစံသစ်ကို ယခုလေးတင် သင်ယူထားသည်။ အသုံးပြုရန် အခွင့်အရေးမရသေးသော်လည်း တာအိုဆရာအိုကြီးနှစ်ဦး၏ ယခင်အခြေအနေကို ကြည့်လျှင် ၎င်းသည် ကျင့်ကြံခြင်းစွမ်းအားကို အလွန်အမင်း ကုန်ဆုံးစေကြောင်း သိသာသည်။

ဤအခြေအနေတွင် ကောင်းကင်နတ်ဆိုးအမြုတေသည် သူ့အတွက် အားနည်းချက်တစ်ခု ဖြစ်လာခဲ့ပြီ...

【သင်သည် (၂၆) ခုမြောက် ပင်မ မရီဒျန်ဆုံမှတ်သစ်ကို အောင်မြင်စွာ ဆက်သွယ်ပြီးပါပြီ】

【ပင်မ မရီဒျန်ဆုံမှတ် ၃၀၁ ခုဖြင့် တည်ဆောက်ထားသော နေမင်းလောင်ကျွမ်းခြင်းရတနာမီးပြင်းဖိုသည် ကန့်သတ်ချက်သို့ ရောက်ရှိသွားပုံရသည်...】

【လက်ကျန်နတ်ဆိုးသက်တမ်း - ၁၂ နှစ်】

သူသည် နတ်ဆိုးသက်တမ်း ၁၄၀၀ ကျော်ကို အကုန်အကျခံ သုံးစွဲခဲ့လေ၏။

ရှန်းယီသည် ခန္ဓာကိုယ်အတွင်း ပြောင်းလဲမှုများကို ခံစားလိုက်သည်။ အနီရင့်ရောင် သွေးကြောများသည် ပိုမိုထင်ရှားလာပြီး ဖိနှိပ်မှုစွမ်းအားက သူ၏ ချီပင်လယ်ကို အကြိမ်ကြိမ် ဆေးကြောပေးနေသည်။

နတ်ဆိုးသိုင်းပညာများကို မှီခိုအားထားရသဖြင့် ခန္ဓာကိုယ်ထဲတွင် ကောင်းကင်နတ်ဆိုးအမြုတေနှင့် နတ်ဆိုးသခင်အသိစိတ်ကဲ့သို့ ထူးဆန်းသောအရာများ အနည်းနှင့်အများ ပေါ်လာတတ်ကြောင်း သူရိပ်မိနေသည်။

ကျင့်ကြံစဉ် ပြဿနာမတက်စေရန် ထိုဖိနှိပ်ခြင်းနည်းလမ်းများမှာ အစွမ်းထက်လေ ကောင်းလေပင်ဖြစ်သည်။

...

ရှန်းယီ မျက်လုံးပြန်ဖွင့်လိုက်သည်။ သူ မမှားဘူးဆိုလျှင် ဘေးနားမှ အမျိုးသမီးသည် တစ်နာရီအတွင်း သူ့ကို ၁၂ ကြိမ်ခန့် မတော်တဆ ခိုးခိုးကြည့်နေခဲ့သည်။

"စီနီယာရှောင်... ပြောစရာရှိရင် တဲ့တိုးသာ ပြောပါ"

ယန်ရှင်းခုံးကို လိုက်လံဖမ်းဆီးရာတွင် ရှန်းယီသည် သူမထံမှ နတ်ဆိုးဖမ်းစီးသူအတွေ့အကြုံများစွာ ရရှိခဲ့သည်။

လမ်းတစ်လျှောက် သူ၏ ကိုယ်ကျိုးစွန့်စွန့်စားမှုများကြောင့် တာအိုဆရာအိုကြီးနှစ်ဦးပင် အကျိုးအမြတ်ရခဲ့သော်လည်း ဤအမျိုးသမီးမှာ ဘာမှမရခဲ့ပေ။

သူမ၌ အမှန်တကယ် အခက်အခဲရှိနေလျှင် တဲ့တိုးပြောသင့်သည်။ သူကူညီနိုင်မနိုင်က တခြားကိစ္စဖြစ်ပြီး ဤမျှ တွေဝေနေစရာ မလိုပေ။

ရှောင်ချမ်ဝေသည် မျက်လုံးကို လွှဲလိုက်ပြီးမှ ပြန်ကြည့်ကာ "နင် ရေဆာနေလားလို့ မေးချင်လို့ပါ" ဟု ဆိုလေသည်။

...

ရှန်းယီ မျက်လုံးကို အသာလှန်လိုက်မိသည်။

ဂုဏ်ရှိန်ဝါကြီးမားသော ငွေခေါင်းလောင်းအဆင့် နတ်ဆိုးဖမ်းစီးသူတစ်ဦးက လင်းပိုင်ဝေ့ထက်ပင် ပို၍ရှက်တတ်နေသည်လော။

လင်းအမည်ရှိသော အမျိုးသမီးကမှ ဗိုက်ဆာလျှင် အစာတောင်းစားတတ်ပြီး အေးလျှင် အဝတ်ရှာဝတ်တတ်သေးသည်။ သူမက ပို၍ ဉာဏ်ပြေးပုံရသည်။

ထိုအချိန်တွင် နှစ်ဦးစလုံး၏ ငွေခေါင်းလောင်းများ တုန်ခါသွားကြသည်။

ရှန်းယီသည် ခေါင်းလောင်းကို လက်ဖြင့်ပွတ်သပ်ကြည့်လိုက်ရာ စိတ်ပျက်သွားမိသည်။

နတ်ဆိုးကြီးတစ်ကောင်၏ သတင်းဟု ထင်ခဲ့သော်လည်း မည်သူမှန်းမသိသူတစ်ဦး ချန်ထားခဲ့သော ပျင်းစရာအတင်းအဖျင်းစကားများသာ ဖြစ်နေသည်။

ရှောင်ချမ်ဝေသည်လည်း ရှက်ရွံ့နေမှု ပျောက်သွားပြီး ရှန်းယီနှင့်မတူဘဲ စိတ်ဝင်တစားဖြစ်နေပုံရသည်။

"ကျန်းချိုလန်က လင်းကျန်းစီရင်စုကနေ ထွက်ခွာသွားပြီတဲ့လား"

မျက်နှာချင်းဆိုင်မှ တာအိုဆရာအိုကြီးနှစ်ဦးလည်း ချက်ချင်း ခါးမတ်သွားပြီး နားစွင့်နေကြသည်။

ထိုလူသုံးဦး၏ အမူအရာကိုကြည့်ပြီး ရှန်းယီ စပ်စုချင်သွားလေ၏။

"ကျန်းချိုလန်က ဘယ်သူလဲ"

သူ စကားပြောလိုက်သည်နှင့် မြင်းလှည်းတစ်ခုလုံး တိတ်ဆိတ်သွားလေ၏။

ကျန်သုံးဦးက သူ့ကို ဝိုင်းကြည့်လာကြသည်။

ပွင့်လင်းသော စိတ်ထားရှိသည့် တာအိုဆရာ ချွင်းယန်သည် သရဲတစ္ဆေမြင်လိုက်ရသကဲ့သို့ မျက်လုံးပြူးကာ "သခင်ရှန်းက အဲ့ဒီနာမည်ကို မကြားဖူးဘူးလား" ဟု ထစ်အစွာ မေးလိုက်သည်။

နတ်ဆိုးနှိမ်နင်းရေးတပ်ဖွဲ့မှလူက ကျန်းချိုလန်ကို မသိခြင်းသည် စာပေပညာရှင်တစ်ယောက် စာမရေးတတ်ခြင်းကဲ့သို့ ရယ်စရာကောင်းနေ၏။

ရှန်းယီအကြောင်း ကောင်းကောင်းသိသော ရှောင်ချမ်ဝေပင် ထိုအချိန်တွင် ကြောင်အသွားသည်။

အခြားအရာများကို ထားလိုက်ဦး၊ ရုံးခန်းထဲတွင် နှစ်လကြာ နေထိုင်ခဲ့ပါလျက် ဤကိစ္စကို လုံးဝမသိဘဲ နေနိုင်ပါသလား။

ထို့ပြင်...

ရှောင်ချမ်ဝေ၏ မျက်ခွံများ လှုပ်ခတ်သွားပြီး "သူမကို အဘိုးကြီးချန်က နတ်ဆိုးနှိမ်နင်းဖို့ လင်းကျန်းစီရင်စုဆီ ဖိတ်ခေါ်ထားတာလေ။ အဘိုးကြီးချန်က နင့်ကို မပြောပြဘူးလား" ဟု မေးလိုက်သည်။

သူမ အမှတ်မမှားလျှင် ဤလူငယ်က စစ်သူကြီးချန်ချမ်ခွင်း၏ အနီးကပ်တွဲဖက် ဒု-စစ်သူကြီးဟု ပြောခဲ့ဖူးသည်။

"သိပ် မရင်းနှီးဘူး"

ရှန်းယီ ခေါင်းခါလိုက်သည်။ တိတိကျကျပြောရလျှင် တစ်ခေါက်သာ တွေ့ဖူးပြီး စကားတစ်ခွန်းမှ မပြောခဲ့ရပေ။

ထိုအချိန်က သူသည် ကျောင်းနဂါးနတ်ဆိုး အမြုတေကို ရယူရန်သာ အာရုံစိုက်နေသဖြင့် အဘိုးကြီးကို ကြည့်ရန်ပင် စိတ်ကူးမရှိခဲ့ပေ။

ဤကိစ္စကို ဖုံးကွယ်ထားစရာမလို၊ ချင်းဖုန်းတောင်သို့ သွားဖူးသော မည်သည့် ဒု-စစ်သူကြီးမဆို သိကြသည်။

ထိုစကားကိုကြားလျှင် တာအိုဆရာ ချင်းကျင့်က အခြေအနေကို ချက်ချင်း ဝင်ရောက်ဖြေရှင်းပေးသည်။

"မရင်းနှီးတာ ပုံမှန်ပါပဲ။ ချင်ပြည်နယ်တစ်ခုလုံးမှာ သခင်မကျန်းနဲ့ ရင်းနှီးတဲ့လူ နည်းပါတယ်။ နတ်ဆိုးတွေက သူမနဲ့ ပိုရင်းနှီးကြတယ်၊ ကံဆိုးတာက အများစုက သေကုန်ကြပြီလေ"

ရှောင်ချမ်ဝေသည် လူငယ်၏ တည်ငြိမ်သော အမူအရာကိုကြည့်ပြီး ရုတ်တရက် ပျော်ရွှင်သွားသည်။

ရှန်းယီက အခြားသူများ အထင်လွဲနေသည်ကို သိသော်လည်း ရှင်းမပြတော့ပေ။ ကျော်ကြားသော သိုင်းပညာရှင်တစ်ဦးအကြောင်းထက် လင်းကျန်းစီရင်စုမှ နတ်ဆိုးများအကြောင်းကိုသာ သူ ပိုစိတ်ဝင်စားသည်။

"သူမကို ဘယ်လိုနတ်ဆိုးမျိုး နှိမ်နင်းဖို့ ဖိတ်ခေါ်ထားတာလဲ"

တောဘုရင်အဆင့်လောက်က ရှန်းယီ၏ သွားရည်စာပင် မလောက်တော့ပေ။ အချိန်ကိုက်ဖြစ်လျှင် လင်းကျန်းစီရင်စုသို့ သွားပြီး အချောင် ဝင်နှိုက်ရန် ဝန်မလေးပေ။ အထူးသဖြင့် နတ်ဆိုးအမြုတေ ရမည်ဆိုလျှင်ပေါ့။

"ချင်းဖုန်းဂိုဏ်း ပျက်စီးသွားတာကို နင်သိတယ်မလား"

ယခုတွင်မူ ရှောင်ချမ်ဝေသည် သူ၏ ခပ်တန်းတန်းနေတတ်သောပုံစံကို နေသားကျနေပြီဖြစ်သည်။

လူငယ်က ခေါင်းညိတ်ပြလိုက်မှ သူမ သက်ပြင်းချကာ ဆက်ပြောသည်။

"အဘိုးကြီးချန်က ယန်ချွန်းမြစ်က ကျောင်းသခင်ကို သတ်ပြီး ချင်းဖုန်းတောင်ဂိုဏ်းချုပ်နဲ့ ဘိုးဘေးဓားကိုပါ ဖျက်ဆီးပစ်လိုက်တယ်။ သူပြန်တော့မယ့်အချိန်မှာပဲ တောင်ပေါ်ကနေ အနည်းဆုံး အမြုတေဖြစ်တည်ခြင်းအဆင့်ရှိတဲ့ နတ်ဆိုးအငွေ့အသက်တွေ ရုတ်တရက် ထွက်ပေါ်လာခဲ့တယ်"

တာအိုဆရာနှစ်ဦး စိတ်ဝင်တစား နားထောင်နေရင်း "အမြုတေဖြစ်တည်ခြင်းအဆင့် နတ်ဆိုးလောက်က သခင်မကျန်း ကိုယ်တိုင်လာဖို့ လိုအပ်လို့လား" ဟု ဝင်မေးကြသည်။

ရှောင်ချမ်ဝေက မျက်စောင်းထိုးလိုက်ပြီး "အဲ့ဒီလောက် ရိုးရှင်းရင် ကောင်းတာပေါ့။ အဲ့ဒီနတ်ဆိုးက အငွေ့အသက်ကို ဖုံးကွယ်မထားဘဲ အဘိုးကြီးချန်ကို တမင်သက်သက် စိန်ခေါ်ခဲ့တာ။ အဘိုးကြီးချန်က ယင်ဝိညာဉ်ကို လွှတ်ပြီး ရှင်းပစ်ဖို့လုပ်တော့ အငွေ့အသက်က ချက်ချင်း ပျောက်ကွယ်သွားရော"

"တည်နေရာရွှေ့ပြောင်းခြင်း နည်းစနစ်ပဲ"

တာအိုဆရာချွင်းယန်က ယုံကြည်မှုအပြည့်ဖြင့် ပြောလိုက်သည်။

"စစ်သူကြီးချန်ရဲ့ ခြေရာခံမှုကို ရှောင်တိမ်းနိုင်တယ်ဆိုတော့ အနည်းဆုံး အမြုတေပြီးပြည့်စုံခြင်းအဆင့် ဒါမှမဟုတ် အမြုတေစွမ်းအင်စုစည််းခြင်းအဆင့် နတ်ဆိုးကြီး ဖြစ်လောက်တယ်"

"အဘိုးကြီးချန်လည်း အဲ့ဒီလိုပဲ ထင်တာ"

ရှောင်ချမ်ဝေ ခေါင်းညိတ်ထောက်ခံလိုက်သည်။ ထို့နောက် ဘေးမှလူငယ် ပြတင်းပေါက်အပြင်ဘက်သို့ ငေးကြည့်ရင်း တိတ်ဆိတ်သွားသည်ကို သတိထားမိလိုက်သည်။

...

ရှန်းယီ၏ ဆံနွယ်များအောက်ရှိ မျက်ဝန်းနက်များထဲတွင် အားလျှော့သောအရိပ်အယောင် ဖြတ်ပြေးသွားသည်။

တည်နေရာရွှေ့ပြောင်းခြင်းနည်းစနစ်၊ အမြုတေ ပြီးပြည့်စုံခြင်းအဆင့်တဲ့လား...။

ဒီလူတွေက ဖြစ်စဉ်တစ်ခုလုံးကို လွဲမှားပြီး တွက်ချက်နေကြပေမဲ့ ရလဒ်ကိုတော့ ဘယ်လိုလုပ်ပြီး အမှန်လိုလို ထင်ကြေးပေးနိုင်ကြတာပါလိမ့်။

ချင်းဖုန်းတောင်ပေါ်တွင် ရုတ်တရက် ပေါ်လာသော နတ်ဆိုးဆိုသည်မှာ ကောင်းကင်နတ်ဆိုးအမြုတေ ဖွဲ့စည်းခြင်းအောင်မြင်ခဲ့သည့် သူကိုယ်တိုင် ဖြစ်နိုင်ချေများနေသည်။

ဤ အချောင်ကိုတော့ သူ ဝင်မနှိုက်ရဲတော့ပေ။