ဆရာသခင်ယွီမု  

ဝူထျန်းဗုဒ္ဓအရှင် ပျောက်ကွယ်သွားပြီးနောက် ယခင်က ရီဖူရှင်းအား ခက်ခဲအောင် လုပ်ချင်ခဲ့သူများ၏ အမူအရာတို့က မကျေမနပ်ပြောင်းလဲသွားခဲ့ပေသည်။ သို့သော်  သူတို့က ဗုဒ္ဓအရှင်၏ အမိန့်ပေးမှုကို စိန်ခေါ်ရန် မလုပ်ဆောင်ရဲခဲ့ကြပေ။ သူတို့က ရီဖူရှင်းကို စိတ်မကျေမနပ်နှင့် ကြည့်ကာ ပြောလိုက်၏။ “မင်းက ကျုပ်တို့ ကျင့်ကြံသူတွေကို သတ်ဖြတ်ခဲ့ပေမယ့် အခု ဗုဒ္ဓအားလုံးရဲ့ အရှင်သခင်နဲ့ တွေ့ဆုံဖို့ တောင်းဆိုနေတယ်။ အရူးစကားတွေပဲ။”

ဗုဒ္ဓအားလုံး၏ အရှင်သခင်က ဤလောကထက်သာလွန်ကာ ကမ္ဘာမြေ၏ ဒြပ်စင်ငါးခုနှင့် ဆက်နွယ်နေခြင်းမရှိတော့ပေ။ သူက လာရောက်လည်ပတ်သူများကို အလွယ်တကူ တွေ့ဆုံမည့်သူ မဟုတ်ပေ။ သူသာလျှင်မကဘဲ ဗုဒ္ဓအရှင်များသည်ပင် သူတို့တွေ့ချင်တိုင်း တွေ့ခွင့်တောင်းနိုင်သည့် သူများမဟုတ်ပေ။

ယခု ဗုဒ္ဓပွဲတော်က အခွင့်အရေးကောင်းတစ်ခု ဖြစ်နိုင်ပေသည်။ သို့သော် သူတို့က ရီဖူရှင်းကို ဗုဒ္ဓအားလုံး၏ အရှင်သခင်နှင့် တွေ့ဆုံရန် သဘောတူလိမ့်မည် မဟုတ်ပေ။

လူအများက ရီဖူရှင်းကို အေးစက်ကာ လျစ်လျူရှုသည့် အမူအရာနှင့် ကြည့်လိုက်သည်။ ဗုဒ္ဓအားလုံး၏ အရှင်သခင်နှင့် တွေ့ဆုံရန် ရီဖူရှင်းအတွက် အခွင့်အရေးရှိခဲ့လျှင်ပင် သူတို့ရှိနေပါက မည်သည့်အခါမှ ထိုသို့ဖြစ်ခွင့်မရအောင် လုပ်ဆောင်ကြပေလိမ့်မည်။

“ဝူထျန်းဗုဒ္ဓအရှင် ကိုယ်တိုင်ရောက်လာ​ကြောင့် မင်း ကံကောင်းသွားတယ်။” တစ်စုံတစ်ယောက်က အေးစက်စွာ ပြောလိုက်သည်။ သူတို့က ရီဖူရှင်းကို ထို့ထက်ပို၍ ပြဿနာမလုပ်ရဲတော့သော်လည်း အတော်လေး ဒေါသထွက်နေဆဲ ဖြစ်ပုံရသည်။ သူတို့အတွက် ဝူထျန်းဗုဒ္ဓအရှင်၏ စကားလုံးများသည်ပင် သူတို့ စိတ်ကို မပြောင်းလဲနိုင်ပေ။

၎င်းက ရီဖူရှင်း၏ သိချင်စိတ်ကို နှိုးဆွနေခဲ့သည်။ ဗုဒ္ဓကျင့်ကြံသူတို့ လောကအတွင်း ဝူထျန်းဗုဒ္ဓအရှင်၏ အဆင့်အတန်းက မည်သို့ရှိသနည်း။

“ဒကာလေးရီ အခွင့်အရေးရှိရင် ကျုပ်တို့ ပြန်တွေ့ကြမှာပါ။ ထုံချန်းရဟန်းက ရီဖူရှင်းကို အပြုံးနှင့် ပြောလိုက်သည်။ ရုတ်တရက် ရီဖူရှင်း၏ မျက်လုံးများ၌ သတိအနေအထားတို့ ဖြစ်ပေါ်လာသည်။  သူသည် သူ့ ယခင်အတွေးများက တစ်ဖက်လူ၏ ဖောက်ထွင်းစုံစမ်းခြင်းခံခဲ့ရသည်ကို သိရှိပေသည်။

ဤစိတ်နယ်လွန်ဆက်သွယ်ခြင်း စွမ်းအားက အလွန်အစွမ်းထက်လှပြီး အနီးမှ လူများအား အလွယ်တကူ ထောက်လှမ်းနိုင်ပေသည်။ သို့သော် သူက မည်သည့်အရေးကြီးသောအရာကိုမှ မတွေးနေသည့်အတွက် အရေးမကြီးလှပေ။

ထုံချန်းရဟန်းက ထွက်ခွာသွားသည်။ ကျန်သည့် ကျင့်ကြံသူများက ရီဖူရှင်းကို သာမန်ကာလျှံကာ ကြည့်လိုက်ကြသည်။ သူ့ကို ရန်လိုနေကြသည့် လူများစွာ ရှိနေဆဲ ဖြစ်သည်။

ထိုအချိန်တွင် ဗုဒ္ဓကျင့်ကြံသူတစ်ယောက်က မည်သည့်အသံမှ မထွက်ဘဲ ရုတ်တရက် ရီဖူရှင်းဘေးတွင် တိတ်တဆိတ် ထွက်ပေါ်လာသည်။ သူက ပါးလွှသော လေထုထဲမှ ထွက်ပေါ်လာပုံရလေသည်။ ထိုသတိပေးချက်မရှိသည့် ထွက်ပေါ်လာမှုက ရီဖူရှင်းကို သတိကြီးစွာ ဖြစ်စေခဲ့သည်။

မည်မျှ အံ့သြဖွယ်ကောင်းစွာ လျှို့ဝှက်ဆန်းကြယ်လှသည့် စွမ်းရည်ဖြစ်သနည်း။

“ဗုဒ္ဓရောင်ဝါခြေလှမ်း။” ရီဖူရှင်းက ဗုဒ္ဓအထူးစွမ်းရည် ခြောက်မျိုးထဲမှ တစ်ခုကို အမှတ်ရကာ ပြောလိုက်သည်။

ဗုဒ္ဓရောင်ဝါခြေလှမ်းက လေဟာနယ်စွမ်းအားကို အကြွင်းမဲ့အသုံးချနိုင်သည့် မဟာလမ်းစဥ် လေဟာနယ်စွမ်းအားကို အကြွင်းမဲ့ အသုံးချနိုင်ပုံရပြီး လေဟာနယ်မဟာလမ်းစဥ်စွမ်းအားထက် သာလွန်ပေသည်။ ထိုစွမ်းရည်က မည်သည့် ကန့်သတ်ချက်မှမရှိဘဲ နေရာအနှံ့ကို စိတ်ရှိသလို သွားလာနိုင်ပုံရလေသည်။ ဗုဒ္ဓရောင်ဝါခြေလှမ်းကို ကျွမ်းကျင်သည့် တစ်စုံတစ်ယောက်က သူ့ထက် မြင့်မားသော တစ်စုံတစ်ယောက်ထံမှ လိုက်ဖမ်းခြင်းခံရပါက  အလွယ်တကူ ထွက်ပြေးနိုင်ပေသည်။ အခြားလူများအား ခြေရာခံရာ၌ အသုံးပြုသည့်အခါတွင်လည်း အောင်မြင်နိုင်ချေ ပို၍ မြင့်မားပေသည်။

ဝူထျန်းဗုဒ္ဓအရှင်က ဗုဒ္ဓရောင်ဝါခြေလှမ်းကို ကျွမ်းကျင်သည့် တစ်စုံတစ်ယောက် ဖြစ်သည်။ ကြည့်ရသည်မှာ ယခု ထွက်ပေါ်လာသည့် ဗုဒ္ဓကျင့်ကြံသူက ဝူထျန်းဗုဒ္ဓအရှင်နှင့် တူညီသော စွမ်းရည်ကို ကျင့်ကြံပုံရသည်။

ရီဖူရှင်းက တစ်ဖက်လူကို အကဲခတ်နေပြီး သင်တိုင်းသဖွယ် သင်္ကန်းကို ဝတ်ဆင်ထားကာ သူ့လက်မောင်းများအား ဖော်ပြထားသည်။ သူက အသက်သုံးဆယ်ကျော်ခန့်ရှိပြီး ရိုးသားစင်ကြယ်ပုံရသည်။ သူက ခြိုးခြံခြွေတာသည့် အကျင့်ကို ကျင့်ကြံသည့် ကျင့်ကြံသူတစ်ယောက် ဖြစ်ပုံရပေသည်။

“ကျုပ်က ဒကာလေးရီနဲ့ ခင်မင်ရင်းနှီးချင်လို့ပါ။” ထိုဘုန်းကြီးက လက်များကို ရှေ့၌ထားကာ လက်အုပ်ချီဟန်နှင့် ရီဖူရှင်းကို အရိုအသေပြုလိုက်သည်။ သူက အလွန် ယဥ်ကျေးနေပုံ​ရလေသည်။ ရီဖူရှင်းကလည်း ထိုကဲ့သို့ အရိုအသေပြုဟန် လုပ်ကာ ပြောလိုက်သည်။ “ရီဖူရှင်းက ဆရာသခင်ကို နှုတ်ဆက်ပါတယ်။ ဆရာသခင်ကို ဘယ်လိုများ ခေါ်ရမလဲ။”

“ကျုပ်ကို ယွီမုလို့ ခေါ်နိုင်ပါတယ်။” ထိုရဟန်းက ပြန်ဖြေလိုက်သည်။ ရီဖူရှင်း၏ မျက်လုံးများထဲတွင် ထူးဆန်းသော အကြည့်တို့ ဖြစ်ပေါ်လာ၏။ ယွီမုဟူသော အမည်က ကြီးမားသော ဉာဏ်ပညာကို ရည်ညွှန်းပေသည်။

“ဆရာသခင်ယွီမုကို နှုတ်ဆက်ပါတယ်။” ရီဖူရှင်းက သူ့ကို တစ်ဖန်နှုတ်ဆက်လိုက်သည်။ သူသည် ဝူထျန်းဗုဒ္ဓအရှင်က သူ့အား ခက်ခဲသည့် အခြေအနေမှ ကယ်တင်ပေးခဲ့သည့်အတွက် အလွန် ဝမ်းမြောက်သွားခဲ့သည်။ ဤဆရာသခင်ယွီမုက ဝူထျန်းဗုဒ္ဓအရှင်၏ လက်အောက်မှ ကျင့်ကြံသူတစ်ယောက် ဖြစ်ပုံရသောကြောင့် ရီဖူရှင်းက သူ့အပေါ် ကောင်းမွန်သော အမြင်ရှိသည်။ အထူးသဖြင့် သူက ဗုဒ္ဓကျင့်ကြံသူများစွာ၏ ဆိုးဆိုးဝါးဝါး ဆက်ဆံမှုကို ခံယူခဲ့ရခြင်းကြောင့် ဖြစ်လေသည်။

“ဒကာလေးရီက ယဥ်ကျေးလွန်းနေပါပြီ။” ဆရာသခင်ယွီမုက ပြောလိုက်သည်။ “ရဟန်းငယ်လေးကျုပ်က ဒကာလေးရီရဲ့ မေးခွန်းတွေကို ကူညီပေးဖို့အတွက် လာခဲ့တာပါ။ မင်းက အခုမှ အနောက်ဘက်ကောင်းကင်ရဲ့ မြင့်မြတ်နယ်မြေကို အသစ်ရောက်လာတာ။ မင်းမှာ မေးချင်တာ တစ်ခုခုရှိရင် မေးလို့ရပါတယ်။”

ဤဆရာသခင်ယွီမုက ထူးချွန်သည့် ကျင့်ကြံသူတစ်ယောက်ဖြစ်သော်လည်း သူ့ကိုယ်သူ “ရဟန်းငယ်လေး” ဟု ရည်ညွှန်းသုံးနှုန်းခဲ့သည်။

ထို့ပြင် သူက အသံတစ်စက်မှ မထွက်ပါဘဲ အနားသို့ ရောက်လာခဲ့သည်။ ရီဖူရှင်းက သူ၏ ရောက်ရှိလာမှုမတိုင်ခင် အရှိန်အဝါအနည်းငယ်ကိုသာ ခံစားမိခဲ့ပေသည်။ ဤဆရာသခင်ယွီမုက သူ့ကို တိုက်ခိုက်ရန် ရွေးချယ်ခဲ့လျှင် သူက ခန့်မှန်း၍မရနိုင်လောက်အောင် ချုပ်ကိုင်ခံရလိမ့်မည် ဖြစ်သည်။

ထုံချန်းရဟန်းကဲ့သို့ ထူးချွန်သည့် ကျင့်ကြံသူများစွာလည်း ရှိပေသည်။ ထိုလူများက သူတို့မျိုးဆက်များအတွင်း ထူးချွန်သည့် ဗုဒ္ဓကျင့်ကြံသူများဖြစ်ကာ သူတို့ကျင့်ကြံသည့် ဗုဒ္ဓကျင့်ကြံရေးနည်းစနစ်တို့က တစ်မူထူးခြားပေသည်။ ရီဖူရှင်းကဲ့သို့ တစ်စုံတစ်ယောက်သည်ပင် လေးစားမှုထားရပြီး ထိုထိပ်သီးပုဂ္ဂိုလ်များကို လျှော့မတွက်ရဲပေ။

ထို့ကြောင့် ယွီမုက သူ့ကိုယ်သူ ရဟန်းငယ်လေးဟု သုံးနှုန်းသွားသော်လည်း ရီဖူရှင်းက သူ့နောက်မှ မျှောလိုက်ရန် တုံးအခြင်း မရှိပေ။ သူက ပြောလိုက်သည်။ “ဒီလိုဆိုရင် ဆရာသခင်ယွီမုကို ကျေးဇူးအများကြီးတင်ပါတယ်။”

“ကျေးဇူးပြုပြီး။” ယွီမုက လက်ကို ဆန့်ထုတ်ကာ အမူအရာပြလိုက်သည်။ သို့သော် ရီဖူရှင်းက တုန့်ပြန်လိုက်၏။ “ဆရာသခင်ယွီမု အရင်ကြွပါ။”

ယွီမုက ခေါင်းညိတ်ကာ လှည့်ထွက်သွားပေသည်။ သူက တမင်သက်သက် ဖြေးညင်းစွာ သွားရင်း ရီဖူရှင်းအား စောင့်ဆိုင်းနေကာ ရီဖူရှင်း သူ့ကို လိုက်မီလာသောအခါမှ ရှေ့ဆက်သွားခဲ့ပေသည်။ ကျင့်ကြံသူများက သူတို့ ထွက်ခွာသွားသည်ကို မြင်သည့်အခါ အမူအရာများက အေးစက်သွားခဲ့သည်။ သို့သော် ဝူထျန်းဗုဒ္ဓအရှင်၏ ကြားဝင်စွက်ဖက်မှုကြောင့် ထိုကိစ္စတစ်ခုလုံးကို လွှတ်ချလိုက်ရုံမှလွဲ၍ အခြားလုပ်နိုင်သည့်အရာ မရှိတော့ပေ။ ထို့ကြောင့် သူတို့က လူစုခွဲလိုက်ကြသည်။ လူတိုင်းက အစအနမကျန်အောင် ပျောက်ကွယ်သွားခဲ့လေသည်။

ရီဖူရှင်းနှင့် သူ့လူများက ယွီမုနှင့်အတူ အနောက်ဘက်ကောင်းကင်မှ မြင့်မြတ်နယ်မြေ ကောင်းကင်ထက်သို့ လျှောက်သွားခဲ့ကြသည်။ ရီဖူရှင်းက ပြောလိုက်၏။ “ဆရာသခင်ယွီမု ကျုပ် အရင်က အဲဒီကျင့်ကြံသူတွေရဲ့ စောင့်ကြည့်တာကို ခံခဲ့ရပြီး သူတို့က နည်းနည်းတော့ ရန်လိုနေပုံရတယ်။”

အမှန်တကယ်၌ သူ မပြောခဲ့သည့် တစ်စုံတစ်ခု ရှိသည်။ ဝူထျန်းဗုဒ္ဓအရှင်၏ စကားလုံးများက သူတို့ကို ရှေ့ဆက်တိုးခြင်းမှ ရပ်တန့်စေသော်လည်း လုံလောက်အောင် ဟန့်တားနိုင်သည်အထိ အားမကောင်းပေ။ အနည်းဆုံး လူတချို့က တွန့်ဆုတ်တွေဝေနေဆဲဖြစ်ပြီး ရီဖူရှင်းကို ဆက်လက်ခြိမ်းခြောက်ချင်နေသည်။ သူတို့၏ သဘောထားကို ဆုံးဖြတ်ရန်မှာ မခက်ခဲလှပေ။

ယွီမုက ခေါင်းညိတ်ကာ ​ပြောလိုက်သည်။ “ဒကာလေးရီက ကောင်းကင်ဒေသကနေ လာခဲ့တာကြောင့် ဘုံတိုင်းမှာ ဒီလိုတူညီတဲ့အခြေအနေတွေ ရှိတာကို သိမှာပါ။ ကောင်းကင်ဒေသမှာ နယ်မြေဆယ့်ရှစ်ခုနဲ့ နယ်မြေသခင်အိမ်တော် ဆယ့်ရှစ်ခု ရှိတယ်။ မဟာအင်ပါယာရဲ့ လက်အောက်က တိုက်ရိုက်အင်အားစုတွေတောင်မှ မတူညီတဲ့ တစ်စုံတစ်ယောက်ရဲ့ ထိန်းချုပ်မှုအောက်မှာ ရှိတယ်။ သူတို့က ဘယ်လိုလုပ် တစ်စိတ်တည်းတစ်ဝမ်းတည်း ရှိနေမှာလဲ။”

ယွီမု၏ အဖြေမှနေ၍ ရီဖူရှင်းသည် တစ်ဖက်လူ ပြန်ဖြေလိုက်သည့် အဓိပ္ပါယ်ကို နားလည်သွားခဲ့သည်။

အမှန်တကယ်ပင် မည်သည့်နေရာ၌ဖြစ်စေ မတူညီသော အင်အားစုခွဲများဖြစ်ပြီး တစ်စိတ်တစ်ဝမ်းတည်းဖြစ်ရန် မဖြစ်နိုင်ပေ။ သူက ဗုဒ္ဓကျင့်ကြံသူတို့၏ လောကသို့ ပထမဆုံးရောက်ရှိလာသောအခါ သူက ဗုဒ္ဓကျင့်ကြံသူများ၏ လောကသည် တစ်စည်းတစ်လုံးတည်း ရှိနေသည်ဟု တွေးမိခဲ့သော်လည်း ပြန်တွေးကြည့်ပါက တစ်ဖက်သတ်ဆန်သော အယူအဆမျှသာ ဖြစ်ပေသည်။

“ဗုဒ္ဓအားလုံးရဲ့ အရှင်လက်အောက်မှာ ဗုဒ္ဓအရှင်များစွာ ရှိပြီး မတူညီတဲ့ ဗုဒ္ဓအရှင်တွေမှာ မတူညီတဲ့ ကျင့်ကြံခြင်းယူဆချက်တွေ ရှိတယ်။ ဗုဒ္ဓအားလုံးရဲ့ အရှင်သခင်လက်အောက်မှာ ဗုဒ္ဓကျင့်ကြံသူလောကကို စောင့်ကြပ်ပေးတဲ့ ဗုဒ္ဓအရှင်တွေရှိပြီး အနောက်ဘက်လောကရဲ့ စည်းမျဥ်းတွေကို လိုက်နာပြီး ဗုဒ္ဓကျင့်ကြံသူလောကရဲ့ အရေးအခင်းတွေကို ဖြေရှင်းပေးကြတယ်။ ဒီအပိုင်းရဲ့ ဦးဆောင်သူက ထုံချန်းဗုဒ္ဓအရှင် ဖြစ်တယ်။ ဒကာလေးရီနဲ့ အရင်တုန်းက ပဋိပက္ခဖြစ်ခဲ့တဲ့ ကျန်းချန်နန်းတော်နဲ့ အသတ်ခံလိုက်ရတဲ့ အရှင်ချူးချန်တို့အားလုံးက ထုံချန်းဗုဒ္ဓအရှင်ရဲ့ လက်အောက်ကပဲ။” ယွီမုက ရှင်းပြလိုက်သည်။

ရီဖူရှင်းက ထိုရှင်းပြချက်ကို ကြားသောအခါ ထုံချန်းရဟန်း၏ ထွက်ပေါ်လာမှု၌ မည်သည့်အတွက်ကြောင့် ထိုမျှ ရန်လိုနေရသည်ကို နားလည်သွားခဲ့သည်။ ကြည့်ရသည်မှာ ဤအပိုင်းမှ ဗုဒ္ဓကျင့်ကြံသူများအားလုံးက သူတို့ အမည်များ၏ တစ်နေရာရာတွင် 'ချန်' ဟူသော စကားလုံး ပါဝင်ပုံရလေသည်။

“ပြီးတော့ တရားဟောပေးတဲ့ ဗုဒ္ဓကျင့်ကြံသူလည်း ရှိတယ်။ ဒီလိုဗုဒ္ဓကျင့်ကြံခြင်းမျိုးက ဗုဒ္ဓကျင့်ကြံသူတွေရဲ့ လောကအတွင်း ဗုဒ္ဓသင်ကြားပြသမှုတွေကို ဟောကြားပြသပေးဖို့ တာဝန်ရှိတယ်။ ကျုပ်ဆရာ ဝူထျန်းဗုဒ္ဓအရှင်က ဒီအပိုင်းနဲ့ သက်ဆိုင်တယ်။”

“ဗုဒ္ဓကျင့်ကြံခြင်းလောကထဲက ကျင့်ကြံသူတွေရဲ့ နယ်မြေထဲက အသံတွေကို နားထောင်ပြီး စူးစမ်းလေ့လာနေတဲ့ ဗုဒ္ဓကျင့်ကြံသူတွေ ရှိတယ်။ နောက်ဆုံး  လောကအရေးအခင်းတွေကို ဂရုမစိုက်ဘဲ ဗုဒ္ဓကျင့်ကြံခြင်းမှာပဲ အာရုံစိုက်ထားတဲ့ ကျင့်ကြံသူတွေလည်း ရှိတယ်။”

ရီဖူရှင်းက ထိုလူ၏ ရှင်းပြချက်ကို ကြားသောအခါ ခေါင်းညိတ်လိုက်သည်။ ယခု သူက လူများနှင့် အခြေအနေအချို့ကို အကြမ်းဖျင်းနားလည်သွားခဲ့ပြီ ဖြစ်သည်။ သူက ပြောလိုက်၏။ “အသေးစိတ်ရှင်းပြပေးလို့ ကျေးဇူးတင်ပါတယ် ဆရာသခင်။”

“ကျုပ် သိချင်မိတဲ့ တခြားကိစ္စတစ်ခု ရှိသေးတယ်။ ပြောကြတာတော့ လွန်ခဲ့တဲ့ နှစ်ရာချီတုန်းက အရှင်ဒွန်ဟောင် ဒီနေရာကို ဗုဒ္ဓလမ်းစဥ်ရှာဖွေဖို့ လာရောက်ခဲ့ပြီး ဗုဒ္ဓအားလုံး အရှင်သခင်ရဲ့ သင်ကြားပေးမှုကို ခံခဲ့ရတယ်။ ပြီးတော့ အရှင်ဒွန်ဟောင်က ဗုဒ္ဓစွမ်းရည်ခြောက်မျိုးထဲက တစ်မျိုး ကျင့်ကြံနိုင်ခဲ့တယ်လို့ ကြားမိတာ သူ ဘယ်စွမ်းရည်ကို ကျင့်ကြံလဲဆိုတာများသိလား။” ရီဖူရှင်းက မေးလိုက်သည်။

“ဒကာလေးရီကို ပြောပြသွားတဲ့သူက ထျန်းယင်ရဟန်းများလား။” ယွီမုက မေးလိုက်သည်။

“သူ ဟုတ်တယ်။” ရီဖူရှင်းက ခေါင်းညိတ်လိုက်၏။ ယခင်က ထျန်းယင်ရဟန်း သူ့ကို လာရှာကာ ထိုအကြောင်း ပြောပြခဲ့သော်လည်း အရှင်ဒွန်ဟောင်က မည်သည့်စွမ်းရည်ကို ကျင့်ကြံခဲ့ကြောင်း မပြောပြခဲ့ပေ။

“ဒကာလေးရီက ထျန်းယင်ရဟန်းရဲ့ လှည့်စားခံရမှာကို စိုးမိပါတယ်။” ယွီမုက ပြန်ဖြေလိုက်သည်။

ထျန်းယင်ရဟန်းက လိမ်နေသည်လား။ ရီဖူရှင်းသည် ၎င်းက အနည်းငယ် ထူးဆန်းကြောင်း ခံစားမိလိုက်သည်။

“ဒါဆို အရှင်ဒွန်ဟောင်က ဒီဗုဒ္ဓနယ်မြေကို ဘယ်တုန်းကမှ မလာဖူးခဲ့သလို အပြင်ဘက်က ကောလာဟလတွေက အမှားတွေလား။” ရီဖူရှင်းက အနည်းငယ် ဇဝေဇဝါ ဖြစ်နေခဲ့၏။

ယွီမုက ခေါင်းကို ယမ်းလိုက်သည်။ “အဲဒါကတော့ အမှန်ပဲ။ အရှင်ဒွန်ဟောင်က ဗုဒ္ဓကျင့်ကြံခြင်းပညာရပ်တွေကို ရှာဖွေဖို့ ဒီကို ရောက်လာခဲ့တယ်။ ဒါပေမယ့် အရှင်ဒွန်ဟောင် ဘယ်စွမ်းရည်ကို ကျင့်ကြံခဲ့လဲဆိုတာ ထျန်းယင်ရဟန်းမသိဘူး။ ကျုပ် သိသလောက် ဗုဒ္ဓအားလုံးရဲ့ အရှင်သခင်နဲ့ အရှင်ဒွန်ဟောင် နှစ်ယောက်တည်းပဲ သိလိမ့်မယ်။ အပြင်ဘက်မှာ မင်း ကြားခဲ့တဲ့ အရာအားလုံးက ကောလာဟလတွေပဲ။ ထျန်းယင်ရဟန်း မသိရုံမက ထျန်းယင်ဗုဒ္ဓအရှင် ကိုယ်တိုင်တောင် ဒီအကြောင်း သေချာသိမှာ မဟုတ်ဘူး။”

“ကျုပ် သိပါပြီ။” ရီဖူရှင်းက ခေါင်းညိတ်လိုက်သည်။ ထျန်းယင်ရဟန်းက သူ့ကို တစ်ခွန်းမှပင် ပြောမသွားခဲ့ပေ။ သူက အခြေခံအချက်များထက်ပို၍ မသိခဲ့ချေ။

သို့သော် ထျန်းယင်ရဟန်းက အံ့သြစရာကောင်းသော ပုဂ္ဂိုလ်တစ်ယောက် ဖြစ်သည်။ အနည်းဆုံး သူက ရီဖူရှင်းကို မထိခိုက်စေခဲ့ပေ။ ယခင်က ထုံချန်းရဟန်း ထွက်ပေါ်လာသည့်အခါ သူက ရီဖူရှင်းကို တစ်ဖက်လူအား သတိထားရန် သတိပေးလိုက်သည်။

“ယွီမု မင်းက ငါ မဟုတ်ဘူး။ ငါ မသိဘူးလို့ မင်း ဘယ်လိုသိလဲ။” သူတို့နှစ်ယောက် စကားပြောနေစဥ် ရုတ်တရက် အသံတစ်ခုက သူတို့နားစည်ကို ဖြတ်သန်းရိုက်ခတ်လာစေသည်။ ဤသည်မှာ ရီဖူရှင်းကို အပြည့်အဝ အံ့အားသင့်စေခဲ့သည်။ သူက အဝေးသို့ လှမ်းကြည့်လိုက်ကာ အံ့အားသင့်သွားခဲ့သည်။ သူတို့၏ စကားများက ခိုးနားထောင်ခံနေရသည်လား။

ဤဗုဒ္ဓသောတအာရုံက အမှန်တကယ် ထူးခြားဆန်းကြပေသည်။ သူက ၎င်းကို လုံးဝ သတိမပြုမိခဲ့ပေ။

“မင်းက ငါမဟုတ်တာကြောင့်  မင်းမသိဘူးဆိုတာ ငါ မသိဘူးလို့ ဘယ်လိုသိလဲ။” ယွီမုက တည်ငြိမ်စွာ ပြောလိုက်သည်။ သူက တုန့်ပြန်ပြောဆိုလိုက်သည့်အချိန်၌ အလေးအနက်ထားပုံမရပေ။

ထိုနှစ်ယောက်ကြားမှ စကားများကို ကြားသောအခါ ရီဖူရှင်းက ပြုံးလိုက်သည်။

“ငါ မင်းကို အနိုင်မရနိုင်ပါဘူး။ မင်းမှန်ပါတယ်။” ထျန်းယင်ရဟန်းက တုန့်ပြန်လိုက်ပြီး ရီဖူရှင်းက ထိုအဖြေကြောင့် အနည်းငယ် အံ့အားသင့်သွားခဲ့သည်။ ကြည့်ရသည်မှာ ယွီမု၏ တိုက်ပွဲစွမ်းရည်က မျက်လုံးဖြင့် မြင်တွေ့ရသည်ထက် ပိုသည့်ပုံရပေသည်။ ယခင်က သူ ထျန်းယင်ရဟန်းနှင့် တွေ့ဆုံခဲ့သောအခါ သူက တစ်ဖက်လူမှာ ထူးချွန်အစွမ်းထက်ကြောင်း ခံစားမိခဲ့သည်။

ယခု ထျန်းယင်ရဟန်းသည် သူ ယွီမုကို အနိုင်မရနိုင်ကြောင်း ပြောခဲ့သည့်အတွက် သူတို့၏ တိုက်ပွဲစွမ်းရည်များကြား သိသာသော ကွာခြားချက်ရှိနေသည်ကို ညွှန်ပြနေပေသည်။

သို့သော် ဝူထျန်းဗုဒ္ဓအရှင်က ဗုဒ္ဓပညာရပ်များ ဟောကြားပို့ချပေးပြီး ယွီမုက ဝူထျန်းဗုဒ္ဓအရှင်၏ ဆက်ခံသူဖြစ်သည်။ ပြောစရာမလိုအောင်ပင် သူက ဗုဒ္ဓပညာရပ်များနှင့် နည်းစနစ်များတွင် ကျွမ်းကျင်လိမ့်မည်ဖြစ်ပြီး သူ၏ တိုက်ပွဲစွမ်းရည်က အစွမ်းထက်မည်မှာ သေချာပေသည်။

“ကျုပ် နောက်ဆုံးမေးခွန်းတစ်ခု မေးချင်တယ်။ ဗုဒ္ဓအားလုံးရဲ့ အရှင်သခင်ကို ကျုပ် တွေ့ချင်လို့ ဆရာသခင်ယွီမုမှာ နည်းလမ်းတစ်ခုခုများ ရှိမလား။” ရီဖူရှင်းက ပြောလိုက်သည်။ ယွီမုက ခေတ္တမျှ တိတ်ဆိတ်သွားပြီး အဝေးရှိ ထျန်းယင်ရဟန်းသည်လည်း စကားမပြောခဲ့ပေ။

ထို့နောက် ယွီမုက ပြောလိုက်၏။ “နည်းနည်းတော့ခက်နိုင်တယ်။ အထူးသဖြင့် မင်းက ဗုဒ္ဓဂိုဏ်းတွေက လူအများကြီးကို ဆန့်ကျင်ခဲ့တယ်လေ။”

“ဟုတ်တယ်။ ဗုဒ္ဓအားလုံးအရှင်သခင်ကို တွေ့ဖို့ အခွင့်အရေးတစ်ခုပဲ ရှိနိုင်တယ်။ အနောက်ဘက်ကောင်းကင်ရဲ့ ဗုဒ္ဓကျင့်ကြံသူအားလုံး စုံညီပွဲကို ကျင်းပတဲ့ ဗုဒ္ဓပွဲတော်ရဲ့ နောက်ဆုံးလကိုရောက်ရင် အနောက်ဘက်ကောင်းကင်ရဲ့ ဗုဒ္ဓအားလုံးက ပွဲတော်အဆုံးသတ်တဲ့အထိ ဗုဒ္ဓနည်းစနစ်နဲ့ ပညာရပ်တွေကို ဆွေးနွေးကြလိမ့်မယ်။ ဒါက ဗုဒ္ဓပြက္ခဒိန်အရ နှစ်တစ်သောင်းမှာမှ ဖြစ်လာတာမို့ ဗုဒ္ဓအားလုံးရဲ့ အရှင်သခင်က ဒီတစ်ခေါက် ကျိန်းသေ ထွက်ပေါ်လာလိမ့်မယ်။ ဒါပေမယ့် ဒီတွေ့ဆုံပွဲမှာ ဗုဒ္ဓကျင့်ကြံသူတွေအားလုံးက သူတို့ရဲ့ ကျင့်ကြံရေးနည်းစနစ်တွေနဲ့ ပညာရပ်တွေကို ဆွေးနွေးဖလှယ်နိုင်တာကြောင့် ဗုဒ္ဓကျင့်ကြံသူတွေအားလုံး တက်ရောက်လိမ့်မယ်။ မင်း တက်ရောက်ခဲ့ရင် မင်းက သေချာပေါက် လက်ညှိုးထိုးစရာ ဖြစ်လိမ့်မယ်။ ပြီးတော့ မင်းက ဗုဒ္ဓကျင့်ကြံသူတွေ အများကြီးကို ဆန့်ကျင်ခဲ့တယ်။ မင်း အဲဒီထဲကို ဝင်ခွင့်ရမယ်တောင် မထင်ဘူး။” ယွီမုက ဆက်ပြောလိုက်သည်။

“ဗုဒ္ဓပွဲတော်။” ရီဖူရှင်းက ရေရွတ်လိုက်သည်။ အနောက်ဘက်ကောင်းကင်၏ ဗုဒ္ဓကျင့်ကြံသူများအားလုံးက တစ်နေရာတည်းတွင် စုဝေးနေမည်​ဖြစ်ပြီး အထဲဝင်ခွင့်ရရန် သူ့အတွက် ခက်ခဲပေလိမ့်မည်။

“အရင်တုန်းက အရှင်ဒွန်ဟောင် ဒီနေရာကို လာခဲ့တုန်း ဗုဒ္ဓအားလုံးအရှင်သခင်နဲ့ ဘယ်လို တွေ့ဆုံခဲ့တာလဲ။” ရီဖူရှင်းက ရုတ်တရက် မေးလိုက်သည်။

ယွီမုက ထိုအကြောင်းကို တွေးမိသည့်အခါ လေးနက်သည့် အမူအရာ ဖြစ်ပေါ်လာပေသည်။ သူက ထိုနှစ်များမှ မှတ်ဉာဏ်တို့ကြောင့် ထိတ်လန့်အံ့သြနေရဆဲ ဖြစ်သည်။ သူက ပြောလိုက်သည်။ “အရှင်ဒွန်ဟောင်က ဗုဒ္ဓကျင့်ကြံသူတွေ စုဝေးပွဲကို တက်ရောက်ခဲ့ပြီး ဗုဒ္ဓကျင့်ကြံခြင်း ပညာရပ်တွေကို ဆွေးနွေးခဲ့တယ်။ သူက ဗုဒ္ဓကျင့်ကြံသူတွေ အားလုံးကြားမှာ ထင်ပေါ်ခဲ့တယ်”